ཐོག་མར་ཕྱག་འདེབས་པ་པོ་༧རྗེ་འཇམ་དབྱངས་བསྟན་འཛིན་རྒྱ་མཚོའམ་ཡོངས་གྲགས་སུ་ཨ་ལགས་རྒྱ་མཚོ་ཞེས་འབོད་པ་དེ་ཉིད་ཡིན་ལ། ཁོང་ནི་རབ་བྱུང་བཅོ་ལྔ་བའི་ལྕགས་སྤྲེལ་ལོར༼༡༩༢༠ལོ༽བན་ཤུལ་དུ་སྐུ་འཁྲུངས།

        རབ་བྱུང་བཅུ་དྲུག་པའི་ས་ཁྱི་ལོར་༼༡༩༥༨ལོ༽བླ་བྲང་ནས་ཕྱིར་མང་རར་ཕེབས་ཤིང་། སྔར་ཡོད་བན་ཤུལ་སྤྱི་བའི་གྲྭ་བ་རྣམས་རྨང་གཞི་བྱས་ཏེ་དགོན་པ་འདེབས་པའི་ཉེར་བསྡོགས་ལ་ཞུགས་ཀྱང་། དུས་འགྱུར་གྱི་དབང་གིས་རེ་འབྲས་དོན་དོན་སྨིན་མ་བྱུང་ངོ་།།

        རབ་བྱུང་བཅུ་དྲུག་པའི་ལྕགས་བྱ་ལོར༼༡༩༨༡ལོ༽སྲིད་གཞུང་གི་གི་ཆོག་མཆན་ཐོབ་པས། དམ་པ་དེ་ཉིད་ཀྱིས། སེམས་ཅན་གྱི་ཕན་བདེ་ནི་རྒྱལ་བའི་བསྟན་པ་ལས་བྱུང་ཞིང་། བསྟན་པ་རིན་པོ་ཆེ་ཡུན་རིང་དུ་གནས་མིན་དང་དེ་དར་རྒྱས་སུ་འབྱུང་མིན་ནི། དེ་ཉིད་བཤད་སྒྲུབ་ཟུང་གི་སྒི་ནས་འཛིན་པའི་དགེ་འདུན་གྱི་སྡེ་ལ་རག་ལས་པར་དགོངས་ནས། དམ་པ་ཁོང་གི་ལྷ་སྡེ་བན་ཤུལ་ཚོ་བ་དྲུག་ནས་གྲྭ་རྒྱུན་བསྡུས་ཤིང་། ཡབ་མེས་གོང་མའི་རིང་ནས་གསོལ་ཅིང་མཆོད་པའི་སྐྱེས་ལྷ་ཆེན་པོ་ཨ་མྱེས་གླང་ཆེན་གྱི་ལྷ་ཞོལ། ཡན་ལག་བརྒྱད་ལྡན་གྱི་ལྷ་ཆབ་སྨན་ཆུའི་འགྲམ་ངོགས་སུ་། བཟོ་བཀོད་ཕུན་སུམ་ཚོགས་པའི་གཙུག་ལག་ཁང་དང་མུ་ཏིག་བསྟར་ལ་བརྒྱུས་འདྲའི་གྲྭ་ཤག་བཅས་ཕིབས་ཏེ་བན་ཤུལ་དགོན་གསར་ཞེས་བྱ་བའི་ཆོས་སྡེ་འདི་ཉིད་གསར་དུ་འདེབས་པར་མཛད་དོ།།

 དེ་རྗེས། གནས་ལྔ་རིག་པའི་པཎ་ཊི་ཏ་ཆེན་པོ་༧རུ་མང་ཨ་ཁུ་བྱམས་པ་འཕྲིན་ལས་ཚང་གདན་དྲངས་ཏེ་གྲྭ་བ་བློ་གསར་བ་རྣམས་ལ་སྒྲ་སྙན་དངགས་དང་། རྩིས་དཀར་ནག་སོགས་མཛུབ་ཁྲིད་གནང་དུ་བཅུག

        རབ་བྱུང་བཅུ་བདུན་པའི་ས་སྦྲུལ་ལོར་༼༡༩༨༩ལོར༽ རིགས་དང་དཀྱིལ་འཁོར་རྒྱ་མཚོའི་མངའ་བདག གངས་ལྗོངས་བསྟན་པའི་གསལ་བྱེད་ཆེན་པོ༧ ལ་མོ་ཡོངས་འཛིན་རིན་པོ་ཆེ་མཆོག་ཅི་ལྟར་གསོལ་བ་བཏབ་པ་བཞིན་ཆོས་སྡེ་འདིར་ཞབས་སོར་འཁོད་པའི་རྫོགས་ལྡན་གྱི་དུས་སྟོན་ཤར་བར་གྱུར་ཏོ།།

 དུས་དེ་ཙ་ན་ཁོང་ནས། དགོན་པ་འདེབས་ས་ཧ་ཅང་བཟང་ཞེས་བསྔགས་བརྗོད་ཀྱི་མེ་ཏོག་འགྲེམ་པར་མཛད་ཅིང་། དགོན་མགོ་ཕུལ་བར་ཡང་ཐུགས་ཟག་མེད་ཀྱི་བརྩེ་ཆེན་དཀྲིགས་པའི་ཀློང་ནས། ཐར་ཤུལ་དགོན་པ་དང་དགོན་པ་འདི་གཉིས་ཁྱོད་ཀྱི་དགོན་པ་དང་ངའི་དགོན་པ་ཞེས་ཁྱད་པར་འབྱེད་རྒྱུ་མེད་གསུངས་ནས་ཕྱིས་འབྱུང་དགོན་འདི་ལ་བརྩེ་གཟིགས་གནང་རྒྱུའི་ཞལ་བཞེས་དང་། དགོན་པའི་མིང་ལ་ཕུན་ཚོགས་བཀྲ་ཤིས་ཆོས་རྫོང་གླིང་ཞེས་ཐོགས་གསུངས། དགོན་པ་འདི་ནས་ཉིན་ཁ་ཡར་ལ་བཞུགས་ཤིང་། དབང་ལུང་མན་ངག་ཀྱང་མང་དུ་གནང་། 

ཡང་། སྒྲ་རིག་སྨྲ་བའི་དབང་བོ༧སྨད་སོག་ཨ་ཁུ་བཛྲ་ཚང་ཡང་དགོན་འདིར་གདན་ཞུས་བཞིན་ཕེབས་ནས་གྲྭ་བ་རྣམས་ལ་སྒྲ་རྩིས་ཀྱི་དཔེ་ཁྲིད་ཞིབ་རྒྱས་སུ་སྩལ་ཅིང་། དེ་ཉིད་ཀྱིས་གནང་བའི་བཀའ་བསྟན་གྱི་པོ་ཏི་གཟུངས་གཞུག་ཏུ་ཕུལ་ཏེ། ༧ཁོང་ཡོངས་འཛིན་རིན་པོ་ཆེ་ཐུགས་བཀོད་ལྟར་བྱམས་སྐུ་དང་ཉེ་སྲས་བཅས་ཀྱི་སྨན་སྐུ་བཞེངས་ཤིང་། སྔར་གྱི་འདུ་ཁང་བྱམས་ཁང་བྱས། 

དེ་ནས་འདུ་ཁང་གསར་བ་བཞེངས་པའི་སྦྱོར་བ་བརྩམས་ཏེ་༧ ཁོང་ཡོངས་འཛིན་རིན་པོ་ཆེས་ས་ལ་གཟིགས་ཤིང་རབ་གནས་མཛད། དེའི་ཕྱིར་ལོར་བཟོ་བཀོད་འགྲན་ཟླ་བྲལ་བའི་འདུ་ཁང་ཀ་བ་བཞི་བཅུ་ཅན་ཞིག་ལེགས་པར་བཞེངས་གྲུབ་པོ།། 

འདུལ་འཛིན་དམ་པ་དཔའ་རིས་ཨ་ཁུ་བསྟན་འཛིན་ཚང་གིས་དགོན་འདིར་དབྱར་དགག་གསོ་གསུམ་འཛུགས་པར་མཛད་ཅིང་། ལམ་རིམ་ཆེན་མོའི་ཁྲིད་སོགས་ཅིང་གནང་། ༧ ཡོངས་འཛིན་རིན་པོ་ཆེ་སྐུ་ན་སྨིན་དྲགས་པས་དགོན་འདིར་རྒྱུན་དུ་ཕེབས་མི་ཐུབ་པའི་རྐྱེན་གྱིས་རེ་ཞིག་ཀླུ་རྩེ་སྐུ་ཕྲེང་གསུམ་པར་དགོན་འདིར་བདག་སྐྱོང་བྱེད་དགོས་པའི་ཁུར་གཏད་དོ།། ཡིན་ཡང་། ཐུན་མོང་བའི་སྣང་ངོར་ཁོང་དགོངས་པ་ཆོས་དབྱིངས་སུ་འཐིམ་པའི་ཚུལ་མཛད། དེང་གི་ཆར། སྤྲུལ་སྐུ་ཕྱག་ཤུལ་གྱིས་ཐུགས་ཁུར་འོག་གྲྭ་བ་ལྔ་བཅུ་ཙམ་གྱིས་ཀུན་རིག་དང་འཇིགས་བྱེད་ཀྱི་སྒྲུབ་མཆོད་སོགས་རྒྱ་ལོའི་སྨོན་ལམ་དང་བཞི་བའི་སྨྱུང་གནས། དྲུག་པའི་དུས་བཟང་། དབྱར་གནས། བཅུ་བའི་ལྔ་མཆོད་སོགས་འཆར་ཅན་ལྟར་ཚོགས་ཏེ་གཙང་དགོན་གྱི་ཆོས་སྤྱོད་ཀྱི་རིམ་པ་ལྟར་སྒྲུབ་བཞིན་པ་བཅས། མདོར་ན་བཤད་སྒྲུབ་འཁོར་ལོ་གསུམ་གྱི་བྱ་བས་ཐུབ་བསྟན་རིན་པོ་ཆེ་བླ་རུ་འདེགས་པའི་ཐབས་ལ་བརྩོན་བཞིན་བཞུགས་སོ།།
           

       གསལ་འདེབས། 
            རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
            དྲ་བའི་སྦྲེལ་ཐགhttp://www.tb1025.cn