རུ་སྔུན་གྲྭ་ཚང་ངམ་རུ་སྔུན་དགོན་དགེ་ལྡན་ཕུན་ཚོགས་ཆོས་གླིང་ནི། ད་ལྟ་མང་རྫོང་ནས་སྤྱི་ལེ་བརྒྱ་དང་མགོ་མང་གྲོང་བརྡལ་ནས་སྤྱི་ལེ་བཅོ་བརྒྱད་ཡས་མས་ཙམ་ཡོད་པའི་གོང་ཁ་ཟེར་བའི་ཡུལ་དེར་གནས་སྤར་ཡོད།     སྔོན་མདོ་སྨད་ཆོས་འབྱུང་ལས། གབ་རོན་ལུང་ལག་རུ་ངན་བདེ་སྐྱིད་ཆུ་ཚན་གྱི་ཉེ་འགྲམ་དུ་ཐིས་པ་ནང་སོ་སྔོན་མོས་བཏབས་པར་གསུང་པ་བཞིན་ཡུལ་དེ་གར་སྤྱི་ལོ་1542ནས་ཚུགས་པར་གྲགས་ལ་ཕལ་ཆེར་མཚོ་ལྷོའི་ཡུལ་དུ་ཆེས་སྔ་བའི་དགོན་པར་ཡང་བཤད། རུ་སྔུན་གྲྭ་ཚང་ཟེར་དོན་ནི་གཙོ་བོ་ལྷ་སྡེའི་ཆ་ནས་ཐོགས་པ་རེད། དེ་ཡང་རུ་སྔུན་ལ་གོང་ཞོལ་བར་མའི་ཁག་གསུམ་ཡོད་པ་ལས། དཔོན་ཚང་། བུ་དགུ། གཞུང་མ། བབ་རུ། རྡོ་ར། གྲྭ་ཚང་བཅས་ཚོ་སྟེང་དྲུག་པོའམ་རུ་སྔུན་ཞོལ་མའི་དགོན་པ་ཡིན་པས་རུ་སྔུན་ཞེས་ཐོགས་ཤིང་དེ་ལས་གཞན་གླིང་རྒྱ་སོགས་ཡོན་བདག་མཆོད་ཀྱི་འབྲེལ་བ་ཡོད་པའི་སྡེ་ཚོ་མང་དུ་ཡོད།

ཡང་དགོན་སྡེ་འདི་ཉིད་མཚོ་ལྷོ་མང་རྫོང་ཕྱོགས་གཏོགས་ཀྱི་དགོན་པ་ཞིག་ཡིན་ཡང་མདོ་སྨད་ཆོས་འབྱུང་ལས་རྨ་ཆུའི་སྨད་རྒྱུད་ཀྱི་ཁྲི་ཀ་སོགས་བཤད་པ་ཞེས་པའི་སྐབས་སུ་བཤད་ནས་ཁྲི་ཀའི་ཁུངས་གཏོགས་སུ་བསྡུས་པ་ནི་གང་དུ་ཆགས་པའི་གནས་ཀྱི་སྒོ་ནས་ཡིན་ཏེ། སྔར་བདེ་སྐྱིད་ཆུ་ཚན་གྱི་གཡས་གཡོན་ནས་གནས་སྤོ་ཐེངས་འགའ་བྱས་ཀྱང་ཁྲི་ཀའི་ས་ཐོག་ན་ཡོད།     ཡུལ་དེར་ལྟར་ཐིལ་བའི་ནང་སོ་སྐུ་ཕྲེང་དང་པོས་ཕྱག་བཏབས་པ་ནས་བཟུང་སྐུ་ཕྲེང་བརྒྱད་པའི་བར་སྐུ་ཕྲེང་རིམ་བྱོན་གྱིས་ཆོས་བཞིན་དུ་བསྐྱངས་ཤིང་སྐུ་ཕྲེང་དགུ་བའི་རུས་རྒྱ་ཡིན་སྟབས་བོད་སྐད་ཀྱི་ལམ་ནས་དགོན་དེ་གའི་ཆོས་སྲིད་ལེགས་ཚོགས་ཀྱི་བྱ་བ་བསྒྲུབ་པ་ལ་སྟབས་མ་བདེ་བས་ཁོང་དང་སྐུ་ཕྲེང་ཕལ་ཆེར་མཉམ་ཞིང་དགོན་གྲོང་ཀུན་ལ་བཀའ་དྲིན་བླ་ན་མཐོ་བའི་སྐྱང་རྩེ་སྐུ་ཕྲེང་རིམ་བྱོན་ལས་སྐུ་ཕྲེང་བཅུ་བ་འཇམ་དབྱངས་སྦྱིན་པ་རྒྱ་མཚོ་ཚང་གིས་དགོན་དེའི་བྱ་བ་ཆེ་ཕྲ་ཆུང་གསུམ་གྱི་ཐུགས་འགན་འཁུར་དགོས་བྱུང་ཞིང་ཁྱད་པར་དུ་དུས་རབས་ཉེར་གཅིག་པའི་ཉི་གཞོན་ཁད་ཀྱིས་ཤར་བ་ནས་རྗེ་འདི་ཉིད་ཀྱིས་ཡུལ་དང་དུས་ཀྱི་འགྱུར་བ་ལ་བརྟག་སྟེ་སྔར་གྱི་དགོན་གནས་ལས་དགོན་པ་གནས་སྤོ་དགོས་པའི་ཐུགས་དགོངས་བཞེས་ཏེ་གནས་སྤོར་བྱས་ནས་ལེགས་པར་གྲུབ་ཟིན་པ་འདི་བཞིན་ལགས་ལ། ངག་རྒྱུན་དུ་རྭ་རྒྱའི་དགོན་ལག་ཡིན་པར་བཤད།    

2015ལོར་དགོན་དགོན་གནས་གསར་བར་མཚོ་ལྷོའི་འཇང་དགུན་ཆོས་འཚོགས་དུས་ཀྱི་རྣམ་པ།

ཡང་དགོན་སྡེ་འདི་རྗེས་སུ་བཟུང་བའི་སྐྱེས་ཆེན་གསེར་གྱི་རི་ཚོམ་ལྟ་བུ་ལས་འགའ་ཞིག་བརྗོད་ན་ཨ་ཁུ་ཕུན་ཚོགས་ཚང་སོགས་མང་པོ་བཞུགས་ཤིང་། གོང་ཞུས་ཀྱི་དཔལ་ལྡན་བླ་མ་ཡུལ་འདི་གའི་སེར་སྐྱ་ཕོ་མོ་ཡོངས་ཀྱི་འདི་ཕྱིའི་སྐྱབས་གནས་དམ་པ་ཨ་ལགས་ནང་སོ་སྐུ་ཕྲེང་རིམ་བྱོན་དང་ཨ་ལགས་སྐྱང་རྩེ་སྐུ་ཕྲེང་རིམ་བྱོན་ནི་སྨྲས་མ་དགོས་ལ། སྔར་གྱི་དགོན་གནས་བདེ་སྐྱིད་ལུང་བ་ན་ཡོད་དུས་༧རྗེ་བཙུན་སྐེ་ཀྱཱ་ཚང་ཕེབས་ནས་ཟླ་གཅིག་ལྷག་ལ་བཀའ་ཆོས་མང་དུ་བསྩལ་ཞིང་། མདོ་སྨད་དྷཱིཿ་ཚ་དགོན་གྱི་ལྔ་རིག་སྨྲ་བའི་དབང་བོ་རྒན་མུན་འཇོམས་སྒྲོན་མེ་ཡང་གདན་དྲངས་ནས་ཐུན་མོང་དང་ཐུན་མོང་མ་ཡིན་པའི་བསླབ་ཁྲིད་མང་དུ་བསྩལ་ཏོ།། ཁྱད་པར་དུ་སྐྱང་རྩེ་སྐུ་ཕྲེང་དགུ་བ་འདི་ཉིད་འཁྲུལ་མེད་ངོས་འཛིན་གནང་མཁན་རིགས་དང་དཀྱིལ་འཁོར་ཀུན་གྱི་བདག་པོ་ལཱ་མོ་ཡོངས་འཛིན་རིན་པོ་ཆེ་བློ་བཟང་མཁས་གྲུབ་རྒྱ་མཚོས་ད་ལྟའི་དགོན་གནས་འདི་གར་དཔལ་དུས་ཀྱི་འཁོར་ལོའི་དབང་ཆེན་གནང་ཞིང་འབྱུང་འགྱུར་ལ་ལུང་བསྟན་དང་ཐུགས་བསྐྱེད་ཆེན་པོས་དགོན་ས་གཟིགས་པ་སོགས་བཀའ་དྲིན་བླ་ན་མ་མཆིས་པར་ཡོད།   གཞན་ཡང་བཅུ་ཕྲག་རིག་པའི་གནས་ཀྱི་གཡུ་རལ་སྟུག་པའི་ད་ལྟའི་རྒྱུན་བཞུགས་དགེ་རྒན་ཨ་ཁུ་ལེགས་བཤད་ཚང་ནས་ཀྱང་བསླབ་བྱའི་བདུད་རྩིའི་འབད་མེད་ལྷུན་གྲུབ་དུ་གནང་བཞིན་པ་ལགས་སོ།། 

དུས་འཁོར་མཆོད་རྟེན་དབུས་མར་བཞེངས་པའི་མཆོད་རྟེན་བརྒྱད་པ།

གཞན་འདུ་ཁང་གི་རྟེན་གཙོ་རྒྱལ་བ་བྱམས་པ་སོགས་ཀྱིས་མཚོན་ནང་རྟེན་ཁྱད་པར་ཅན་འགའ་ངོ་སྤྲོད་སྟབས་མ་བདེ།  

ཆོས་ཐོག་གི་སྐོར་ལl།   རྒྱ་ལོའི་སྨོན་ལམ།     གསུམ་པའི་སྒྲུབ་མཆོད།      བཞི་བའི་མཆོད་པ།    དྲུག་པའི་སྐྱི་ཆེན།     དགུ་བའི་ཆོས་ཐོག   བཅུ་བའི་ལྔ་མཆོད་སོགས་ཆོས་ཐོག་སོ་སོའི་སྐབས་སུ་གསུང་ཆོས་མི་འདྲ་བ་དུ་མ་ཡོད་ལ།  དགོན་པ་གནས་སྤར་བྱས་རྗེས་གཟའ་ཉི་མ་མ་གཏོགས་སྔ་དྲོ་རྒྱུན་ཚོགས་དང་གསོ་སྦྱོང་གསར་བཙུགས་ཡོད་པ་ལས་མཚོ་ལྷོ་ཁུལ་གྱི་དགོན་སྡེ་ཁག་གི་ལོ་རྒྱུས་སྙིས་བསྡུས་སུ་གསལ་བ་ལྟར་རོ།།

 གསལ་འདེབས། 

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
             དྲ་བའི་སྦྲེལ་ཐགhttp://www.tb1025.cn