རྨད་བྱུང་ད༵གེ་བའི་ལེག༵ས་ཚོགས་འཛིན་པའི་མཛོད།།

ལུང་རྟོགས་ཡོན་ཏན་ནོར་བུའི་ཟ་མ་ཏོག།

སྔོན་མེད་ལེགས་བཤད་དྲ་བའི་འོད་དཀར་ཅན།།

འཕྲིན་ལས་ཡ༵ར་ཟླ་ལྟར་འཕེ༵ལ་རྒྱལ་གྱུར་ཅིག།

དགེ༵་ལྡན་བསྟན་པའི་རྒྱལ་ཐབས་འཛིན་པའི་གཙོ།།

ལེག༵ས་བྱས་ཚོགས་གཉིས་གངས་རིའི་མདངས་འཕྲོ་བ།།

ཡ༵ར་ཚེས་ཟླ་བ་གཞོན་ནུའི་ལང་ཚོ་ཅན།།

འཕེ༵ལ་མཛད་བླ་མ་མཆོག་ལ་དང་བས་འདུད།།

གསེར་བཟང་གཞོན་ནུའི་མདངས་ཀྱིས་མཛེས་པའི་སྐུ།།

དགྱེས་ཆགས་བརྩེ་བའི་འོད་ཟེར་འཕྲོ་བའི་གསུང་།།

སྒྲིབ་མེད་ཡེ་ཤེས་སྤྱན་ཡངས་དག་པའི་ཐུགས།།

གསུམ་ལྡན་རྡོ་རྗེ་འཛིན་པ་ཡང་ཡང་དྲན།།

ཕྱོགས་བཅུའི་རབ་འབྱམས་ཞིང་དུ་བཞུགས་པ་ཡི།།

དུས་གསུམ་རྒྱལ་བ་ཀུན་གྱི་མཁྱེན་བརྩེའི་གཟི།།

གཅིག་ཏུ་བསྡུས་ཀྱང་ཆ་ཚམ་མི་མཚོན་པའི།།

ཡོན་ཏན་ལྷུན་རྫོགས་ཁྱོད་ཉིད་ཡང་ཡང་དྲན།།

གཙུག་ལག་ནོར་གྱིས་རབ་ཏུ་ཕྱུག་གྱུར་ཀྱང་།།

འདོད་ཡོན་སྒྱུ་མས་བསླུ་བྲིད་མ་ཐེབས་པའི།།

དཔལ་ལྡན་སྲིད་ཞིའི་མཆོད་ནོར་ཁྱོད་ལགས་ཞེས།།

ཕྱོགས་ཀྱི་བུ་མོས་ངལ་མེད་བཟླས་ལ་བརྩོན།།

དེ་ལྟར་གསང་གསུམ་འཕྲིན་ལས་མཐར་ཕྱིན་པའི།།

རླབས་ཆེན་འདྲེན་པ་གང་དེའི་རྣམ་ཐར་འགངས།།

སྡེབ་ལེགས་ཚིག་གི་ཕྲེང་བར་བསྟར་ལགས་ན།།

དཔྱོད་ལྡན་དགྱེས་པའི་ཚེམས་དཀར་འཕྲོ་བར་རིགས།།

རྒྱལ་བའི་འཁྲུངས་སྐར་རྒྱལ་དང་འཛོམས་པའི་དུས།།

རབ་བྱུང་བཅུ་གསུམ་མེ་ཕོ་ཁྱི་ཡི་ལོར།།(ཕྱི་ལོ༡༧༦༦)

མཁས་མཛངས་ལྡོང་གི་རིགས་སུ་འཁྲུངས་བ་ན།།

ཉམ་ཐག་འགྲོ་རྣམས་མགོན་དང་བཅས་པར་གྱུར།།

རྣ༵མ་འདྲེན་ཤཱཀྱ་སེང་གེའི་དབང་པོ་ཡིས།།

རྣ༵མ་དག་རྒྱལ་སྲས་ཚོགས་ལ་བཀས་བཅད་དེ།།

རྣ༵མ་པར་སྤྲུལ་བའི་རོལ་གར་བསྒྱུར་བ་བོ།།

རྣ༵མ་སྲས་བདེ་ཆེན་ལགས་ཞེས་གསོལ་བ་བཞིན།།(རྣམ་སྲས་བདེ་ཆེན་ནི།དམ་པ་ཁོང་སྐུ་ན་ཕྲ་དུས་ཀྱི་མཚན།)

སྐྱེ་བའི་སྨེ་དང་རྨི་ལྟས་རྟེན་འབྲེལ་དང་།།

འཁྲུངས་བའི་སྐར་མ་མཛད་པའི་རྣམ་པ་སོགས།།

གང་ལ་བརྟགས་ཀྱང་སྤྱན་རིས་གཟིགས་དབང་གི།

རྣམ་པར་ཐར་བར་ཅོ་འདྲི་བྱས་སམ་སྙམ།།

རིང་ནས་རྣམ་དཀར་ལས་ལ་གོམས་པའི་མཐུས།།

འཁྲུལ་སྣང་འདུ་འཛིའི་གནས་ལ་ཡིད་ཕྱུང་སྟེ།།

བདེ་གཤེགས་བརྟུལ་ཞུགས་གཙུག་གིས་མནོས་དང་ལྷན།།

དམར་སེར་ངུར་སྨྲིག་མཛེས་པའི་གར་དུ་བསྒྱུར།།

སུ་ཡི་སྐྱེ་བར་བཏགས་པའི་ལོ་རྒྱུས་མེད།།

གཞན་གྱི་ཡང་སྤྲུལ་བསྙད་པའི་བྱུང་བ་མེད།།

ཐོས་བསམ་སྒོམ་པའི་སྙིང་བོ་མ་བོར་བར།།

མཆོག་གི་རྣམ་ཐར་གངས་རིའི་རྩེ་ནས་འཛུམ།།

ཐོས་བསམ་བསྟན་པའི་གནད་དུ་སོང་བ་ད༵གེ།

བཤད་སྒྲུབ་འགྲོ་བའི་དོན་དུ་གྱུར་བ་ལེག༵ས།།

འཕྲིན་ལས་བྲི་གང་མེད་པར་ཡར་ནས་ཡ༵ར།།

ལུང་རིགས་དུས་མཐའི་རླུང་གིས་ཕྱོགས་བཅུར་འཕེ༵ལ།།

བསླབ་གསུམ་ཁྲིམས་ཀྱི་ཤམ་བུས་བརྒྱན་པ་སྟེ།།

མདོ་སྔགས་གཙུག་གི་ནོར་བུའི་འཁྲིལ་བག་ཅན།།

སྔོན་བྱོན་དམ་པའི་རྗེས་འཇུག་མ་འཁྲུལ་བ།།

ངག་དབང་ཡར་འཕེལ་འགྲོ་བའི་མཆོད་རྟེན་ཡིན།།(ངག་དབང་ཡར་འཕེལ་ནི།དམ་པ་ཁོང་གི་རབ་བྱུང་མཚན་ལགས།)

མཁན་ཆེན་དམ་པའི་ཐུགས་ཀྱི་དགོངས་པ་དང་།།

དམ་པ་ཉིད་ཀྱི་རྩེ་གཅིག་འདུན་པ་གཉིས།།

མ་གྲོས་གཅིག་ཏུ་མཐུན་པའི་རྟེན་འབྲེལ་གྱིས།།

ཞབས་ཟུང་གསེར་གྱི་འཁོར་ལོ་དབུས་ལ་བསྒྱུར།།

འཇམ་མགོན་བློ་བཟང་གྲགས་པའི་རྒྱལ་ཚབ་དང་།།

འཕགས་མཆོག་མིག་མི་འཛུམ་པའི་ཡོངས་འཛིན་སྟེ།།

ཆོས་མཛད་གཟིམ་ཁང་ངག་དབང་སྙན་གྲགས་ཀྱིས།།

དགྱེས་པའི་དབུགས་དབྱུང་བསྩལ་བ་ཁྱོད་ལ་འདུད།།

དེ་ལྟར་བསམ་སྦྱོར་རྣམ་པར་དག་པ་ཡིས།།

བཤེས་གཉེན་ཚུལ་བཞིན་བསྟེན་ཏེ་རིགས་ལམ་ལ།།

ལྷག་པར་བོགས་ཐོན་ཀུན་ལས་ཁྱད་འཕགས་པའི།།

དགེ་ལེགས་ཡར་འཕེལ་མཁས་པའི་གཙུག་རྒྱན་ཡིན།།(དགེ་ལེགས་ཡར་འཕེལ་ནི།དམ་པ་ཁོང་གི་བསྙེན་རྫོགས་ཀྱི་མཚན་ནོ།།)

ལ་ཤས་ལྟོ་ཡི་ཆེད་དུ་གྲྭ་སར་འགྲིམ།།

འགའ་ཟུང་བག་མེད་རྣམ་གཡེང་རྩེན་ལ་གཡེང་།།

དུས་ཀྱི་དྲི་མས་ཆ་ཙམ་མ་གོས་པའི།།

དམ་པ་ཁྱོད་ནི་མཚན་མོའི་མགོན་པོ་ཡིན།།

ཐོས་བསམ་གྲུབ་མཐའི་ལ་རྒྱར་མ་འཁྱེར་ཞིང་།།

བཤད་སྒྲུབ་གྲགས་པའི་ཆེད་དུ་མ་བཙོང་བར།།

མདོ་སྔགས་ཟུང་འབྲེལ་རྒྱལ་བསྟན་དགུང་འདེགས་པའི།།

གནམ་འདེགས་གསེར་གྱི་ཀ་བ་ཁྱོད་མིན་སུ།།

འགྲོ་བའི་བདེ་སྐྱིད་རྒྱལ་བའི་བསྟན་ལ་རག།

རྒྱལ་བའི་བསྟན་པ་འདུལ་བའི་གནད་ལ་ཐུག།

འདུལ་བའི་ཉམས་ལེན་དགེ་འདུན་སྡེར་བརྟེན་ཕྱིར།།

བསྟན་པ་དག་ཐེར་མཛད་པའི་རྣམ་ཐར་དྲན།།

སྐབས་ཤིག་དགའ་ལྡན་གསེར་ཁྲིའི་ཞབས་དྲུང་དུ།།

མཐའ་བྲལ་དབུ་མའི་ལྟ་བའི་དོགས་གཅོད་ཕུལ།།

མཉམ་བཞག་རྗེས་ཐོབ་གང་གི་སྐབས་སུ་ཡང་།།

སྒོམ་ཚུལ་དེ་ལས་གཞན་ན་མི་འདུག་གསུངས།།

གཞན་ཡང་གསང་སྔགས་སྔ་འགྱུར་རང་ལུགས་ཆེ།།

འབར་ཆུང་བླ་མ་བཀྲ་ཤིས་རྒྱ་མཚོ་དང་།།

དགའ་ལྡན་མེར་རྒན་ཆོས་རྗེ་རྣམ་གཉིས་ལ།།

ཆོས་ཀྱི་རྩོད་ལན་སྐྱེས་སུ་གནང་བ་དྲན།།

རིགས་ཀྱི་ཁྱབ་བདག་རྡོ་རྗེ་འཛིན་པའི་གཙོ།།

བཀའ་དྲིན་གཞལ་མེད་ཨོ་འོན་ནུད་སྤྲུལ་མཆོག།

ཟག་མེད་ཐུགས་ཀྱི་དགྱེས་པ་བསྐྱེད་པ་ཕྱིར།།

བསྟོད་པ་ཀུན་བཏུས་མཛད་པའི་རྣམ་ཐར་དྲན།།

སྒྲིབ་མེད་སྤྱན་གྱིས་ཆོས་ཀུན་གསལ་བར་གཟིགས།།

བརྩེ་ཆེན་ཞགས་པས་འགྲོ་ཀུན་དམ་དུ་བཅིངས།།

རིང་ནས་རྗེ་བཙུན་སྒྲོལ་མའི་ཞལ་གཟིགས་པའི།།

སྟག་ཕུ་རྡོ་རྗེ་འཆང་ལ་འདི་སྐད་ཞུས།།

བརྟན་གཡོའི་ཆོས་ཀུན་རང་བཞིན་རྡུལ་ཙམ་མེད།།

མེད་ཀྱང་སྣང་བ་མི་འགོག་རྟེན་འབྲེལ་གཤིས།།

སྣང་སྟོང་དབུ་མ་ལྟ་བའི་དཔྱད་པ་ཆེ།།

ཡོངས་སུ་རྫོགས་ཞེས་རྒྱལ་ཡུམ་སྒྲོལ་མས་གདམས།།

ཡབ་གཅི༵ག་རྒྱལ་ཀུན་ཡེ་ཤེས་ཐིག་ལེ་དཔལ།།

དོན་གཉི༵ས་ལྷུན་གྱིས་གྲུབ་པའི་ཡིད་བཞིན་ནོར།།

རྩ་གསུ༵མ་སྐྱབས་གནས་ཀུན་གྱི་ངོ་བོ་སྟེ།།

སྐུ་བཞི༵འི་བདག་ཉིད་དཔལ་ལྡན་བླ་མ་རྒྱལ།།

རྟག་འཛིན་ཅན་རྣམས་ཆོས་ལ་འགོད་པ་དང་།།

ཞིང་འདིར་མཛད་པ་འཕྲིན་ལས་མཐར་སོན་ཏེ།།

ལྕགས་ཕོ་བྱི་བའི་དགུང་གྲངས་དོན་ལྔ་ལོར།།

འོད་གསལ་ཆོས་སྐུའི་ཀློང་དུ་གཤེགས་ཚུལ་མཛད།།

མགོན་ཁྱོད་དགའ་ལྡན་ཞིང་དུ་གཤེགས་པ་དེར།།

ལེ་འདེད་འགྱོད་བདལ་ཅི་ཡང་མ་མཆིས་ཏེ།།

བདག་ཅག་ལས་ཀྱི་རླུང་གིས་བདས་པ་ཡི།།

ཉམ་ཆུང་ཤིང་བལ་ཐུགས་རྗེས་གཏོང་མི་འཚལ།།

ཐུབ་བསྟན་གངས་ཀྱི་ལྷུན་པོ་མ་བརྟན་པར།།

བཤད་སྒྲུབ་འོ་མའི་རྒྱུན་བཟང་ཆད་གྱུར་ཏེ།།

སྐལ་བཟང་རི་སྐྱེས་མགོན་མེད་ལུས་གྱུར་ན།།

བླ་མ་གདོང་ལྔའི་དབང་པོས་བཟོད་ལགས་སམ།།

ཁྱོད་ནི་དུས་གསུམ་སངས་རྒྱས་དངོས་ཡིན་ཞེས།།

རྒྱལ་བའི་མདོ་དང་རྒྱུད་སྡེ་མཐའ་དག་དང་།།

ཁྱད་པར་དགོངས་འགྲེལ་བསྟན་བཅོས་ཚད་ལྡན་རྣམས།།

གཅིག་ཏུ་མཐུན་ཞེས་དགེ་ལེགས་དཔལ་བཟང་བཞེད།།

(ཁོང་གི་མཚན་གཞན་ལ།དབོན་པོའི་བླ་མ་བློ་འགྱུར་ཡང་ཞུ།)

གཞན་ཡང་ལས་དང་སྨོན་ལམ་རྟེན་འབྲེལ་གྱིས།།

རྒྱལ་མཆོག་སྣང་བ་མཐའ་ཡས་བསམ་བཞིན་དུ།།

སྤྲུལ་བའི་ཟློས་གར་ཞིང་འདིར་བསྒྱུར་བ་དེ།།

མགོན་ཁྱོད་ཡིན་ཞེས་ས་སྐྱ་བླ་མས་གསུངས།།

(འདི་ས་པཎྚི་ཏ་ཀུན་དགའ་རྒྱལ་མཚན་དང་གཅིག་ཏུ་འཁྲུལ་བར་མི་བྱའོ།།ས་འདུལ་རྒྱག་མཁན་གྱི་བླ་མ་ཞིག་སྟེ།དགེ་ལེགས་དཔལ་བཟང་གི་མི་འགྱུར་དོན་དམ་མའི་འགྲེལ་བར་གསལ།)

མཁས་ཤིང་གྲུབ་པ་བརྙེས་པའི་རྣལ་འབྱོར་བ།།

འཇིགས་མེད་སྟོབས་བཅུའི་རྒྱལ་ཐབས་འཛིན་པ་པོ།།

རྫོགས་ཆེན་མི་འགྱུར་ནམ་མཁའི་རྡོ་རྗེ་ཡིས།།

མགོན་ཁྱོད་དགེ་ལེགས་དཔལ་བཟང་དངོས་ཡིན་གསུངས།།

གཞན་ཡང་སེར་བྱེས་སྦས་པའི་བརྟུལ་ཞུགས་པ།།

མཚན་ཙམ་གྱིས་ཀྱང་གདུང་བ་སེལ་བ་ཡི།།

དགེ་བཤེས་དངོས་གྲུབ་མཚན་ཅན་གང་དེས་ཀྱང་།།

མགོན་ཁྱོད་ཤ་ར་བ་ཡི་རྣམ་སྤྲུལ་གཟིགས།།

(ཆོས་ཧོར་དགེ་བཤེས་ཀྱིས་མཛད་པའི་རྣམ་ཐར་དཔག་བསམ་ལྗོན་ཤིང་དུ་གསལ།)

དེ་ལྟར་ཡིད་ཆེས་ལུང་དང་རིགས་པ་ཡིས།།

བསྟན་འཛིན་བྱེ་བའི་གཙུག་རྒྱན་ཁྱོད་གྲུབ་ན།།

ད་དུང་མ་རྟོགས་ལོག་རྟོག་ཐེ་ཚོམ་གྱིས།།

ཀུན་ནས་བཅིངས་བ་ཁྱེད་ཅག་ངོ་རེ་ཚ།།

དྲེགས་མྱོས་མཁས་པའི་གཟུགས་བརྙན་མ་ལགས་ཤིང་།།

འཆལ་སྤྱོད་ཡོན་ཏན་རློམ་པའི་གྲུབ་ཆེན་མིན།།

ཐབས་ཤེས་ཟུང་འབྲེལ་གཤོག་ཟུང་དཀར་པོ་ཡིས།།

ཀུན་རིག་ནམ་འཕངས་བསྐྱོད་པའི་འདབ་བཟང་ཡིན།།

ཆོས་བརྒྱད་འདམ་རྩྭར་འཁྲིལ་བའི་ངང་བ་མིན།།

འདོད་ཡོན་ཐབས་ཀྱིས་འགུག་པའི་སྤྱང་བོ་མིན།།

ལྟོ་སྐྱ་གོས་ཧྲུལ་ཐོས་དང་ཚུལ་ཁྲིམས་ཀྱིས།།

བདག་མེད་རི་ལ་འཚོ་བའི་སྒོམ་ཆེན་ཡིན།།

མཁས་གྲགས་མེ་ལྕེར་རེ་བའི་ཕྱེ་ལེབ་མིན།།

རྒྱུ་འབྱོར་པདྨར་ཆགས་པའི་རྐང་དྲུག་མིན།།

འཇིགས་མེད་གངས་རིའི་སྤོ་ལ་གནས་བཅས་ཏེ།།

ལུང་རིགས་གཡུ་རལ་རྒྱས་པའི་གངས་སེང་ཡིན།།

གཞན་ཡང་ཀུན་རིག་འཕྲུལ་གྱི་བྱེད་པོ་དེའི།།

མཛད་པའི་ཆ་ཙམ་བྲིས་པ་ཙམ་ཉིད་ལས།།

ཐུན་མོང་ཐུགས་བསྐྱེད་ཉི་མའི་འོད་ལ་འཁུ།།

ཐུན་མིན་མཛད་པ་འཕགས་པའི་སྤྱོད་ཡུལ་ཉིད།།

རྒྱལ་བསྟན་སྙིང་བོ་གསེར་གྱི་ཡང་ཞུན་ཉིད།།

དུས་མཐར་སྤེལ་མཛད་རྒྱལ་བའི་གདུང་འཚོབ་སྟེ།།

རིགས་བརྒྱའི་ཁྱབ་བདག་རྡོ་རྗེ་འཛིན་པའི་དཔལ།།

འགྲོ་བའི་མགོན་ཁྱོད་དུས་ཀྱི་ཉི་མ་ལགས།།

གཞལ་མེད་བློ་གྲོས་ནོར་བུའི་སྤྱི་གཙུག་མཛེས།།

ཡོན་ཏན་ཁོ་ལག་རྫོགས་པའི་ལང་ཚོ་འབར།།

འཕྲིན་ལས་རིན་ཆེན་རྒྱན་གྱིས་ཉེར་མཛེས་པའི།།

མཐོང་གྲོལ་སྐུ་ཡི་རྒྱལ་མཚན་ཁྱོད་ལ་བསྟོད།།

སྣ་ཚོགས་མོས་པའི་འདུལ་བྱའི་ཁམས་དབང་ལྟར།།

ལེགས་བཤད་དབྱིག་གི་གྲུ་ཆར་དུས་སུ་འཇོ།།

མདོ་རྒྱུད་ཚངས་དབྱངས་འབུམ་གྱི་དབང་ཕྱུག་ཆེ།།

ཐོས་གྲོལ་གསུང་གི་རྒྱལ་མཚན་ཁྱོད་ལ་བསྟོད།།

དཔག་ཡས་མཁྱེན་བརྩེའི་མངའ་བདག་འཁོར་ལོའི་བསྒྱུར།།

བདེ་སྟོང་ཕྱག་རྒྱའི་བྲང་ལ་དམ་དུ་འཁྱུད།།

གཡོ་མེད་ཞི་ཁྲོའི་ཐབས་ལ་དབང་འབྱོར་བ།།

མྱོང་གྲོལ་ཐུགས་ཀྱི་རྒྱལ་མཚན་ཁྱོད་ལ་བསྟོད།།

མི་འགྱུར་དོན་དམ་དགེ་བའི་ཕྱག་རྒྱ་ཆེ།།

མི་ཤིགས་སྤྲོས་བྲལ་དབྱིངས་ཀྱི་ཀུན་ཁྱབ་ཆེ།།

མི་ཟད་རིམ་གཉིས་ཟབ་མོའི་གདེངས་ལྡན་པ།།

རྒོད་ཚང་གྲུབ་པའི་དབང་ཕྱུག་ཁྱོད་ལ་བསྟོད།།

མི་མཐུན་ཕྱོགས་ལས་རྣམ་པར་རྒྱལ་བས་མཚན།།

རིགས་ཤེས་མཛའ་བོར་ལེགས་སྦྱར་མཆོག་གི་དཔྱིད།།

མཆོག་ཐུན་ལས་བཞིའི་དངོས་གྲུབ་འབྱུང་བའི་སྒོ།

ཁྱབ་བདག་ནུས་པའི་དབང་ཕྱུག་ཁྱོད་ལ་བསྟོད།།

དགྱེས་ཞགས་བརྩེ་བའི་འོད་དཀར་མཐར་བརྐྱངས་ཏེ།།

ཟག་མེད་བདེ་སྟོང་གར་མའི་འཇོ་སྒེག་མཁན།།

བསམ་དང་བརྗོད་བྲལ་ཡར་རྒྱས་འབབ་ལྡན་མ།།

ཡབ་གཅིག་མཁྱེན་པའི་དབང་ཕྱུག་ཁྱོད་ལ་བསྟོད།།

ཐུགས་བསྐྱེད་ཟླ་བ་གཞོན་ནུས་འཕེལ་བར་བྱས།།

བརྩེ་ཆེན་གདམས་པའི་ཡན་ལག་བརྒྱད་དང་ལྡན།།

ཐུགས་ཀྱི་བཞེད་དགོངས་ག་བུར་ཞུན་མའི་ཆབ།།

ཇི་བཞིན་རྟག་པར་འཕེལ་ལ་གསོལ་བ་འདེབས།།

དེ་ལྟར་རྟོགས་བརྗོད་སོས་ཀའི་མེ་ཏོག་འདི།།

སྙན་ངག་ཆེན་པོའི་ལུགས་སུ་མ་བྱས་ཤིང་།།

མངོན་བརྗོད་བརྡ་རྙིང་གང་གིས་མ་བཅིངས་བར།།

ཀུན་གྱིས་གོ་སླད་ཕལ་བའི་སྐད་དུ་བྱས།།

ཚིག་གི་བརྗིད་ཆེ་དོན་གྱི་འགངས་ཐོན་པའི།།

སྙན་ཚིག་རིག་བྱེད་གྲལ་དུ་མ་སླེབས་ཀྱང་།།

མ་བབ་ཨུ་ཚུགས་བྱས་ནས་བཙིར་བ་དང་།།

རྡོ་ཆག་བཙན་གྱིས་སྒྲིག་པའི་ཤུལ་ཙམ་མེད།།

རྣམ་ཐར་དབྱངས་ཀྱི་ཡན་ལག་ཚིག་གི་སྡེ༵བ།།

སྡེ༵བ་ལེགས་རིག་བྱེད་དཀར་པོ་དྲི་ཟའི་ང༵ག།

ང༵ག་རིག་ཆུ་གཏེར་རླབས་ཀྱི་ཟེགས་མ་འ༵དི།།

འ༵དི་སྣང་ཁོལ་གྱུར་བདག་གིས་སྦྱར་བ་དགེ།

དམ་པ་འདི་ལ་སྙིང་ནས་གུས་དང་གཅིག།

གྲོགས་པོ་གང་དེས་ཡང་ཡང་སྐུལ་དང་གཉིས།།

དགོངས་རྫོགས་མཆོད་སྤྲིན་བགྱིས་པའི་དགེ་རྩར་བཅས།།

དམིགས་ནས་ཐོལ་རྩོམ་འདི་ཉིད་ཁོ་བོས་བྲིས།།

འདིས་མཚོན་བདག་གི་རྣམ་པར་དཀར་བའི་ལས།།

ཇི་སྙེད་བསགས་དང་བསག་པར་འགྱུར་བ་དག།

གངས་རིའི་མགོན་པོ་སྤྱན་རིས་གཟིགས་དབང་གི།

མཛད་འཕྲིན་ཉི་ཟླའི་ཁྱོན་དང་མཉམ་པར་ཤོག།

ཕྱི་ནང་གྲུབ་མཐའ་རྒྱ་མཚོའི་ཕ་མཐར་སོན་ཞིང་།བཤད་སྒྲུབ་བསྟན་པའི་རྒྱལ་མཚན་དགུང་དུ་འདེགས་པའི་མཁས་གྲུབ་ཀུན་གྱི་གཙུག་རྒྱན༧བྲག་དཀར་རྒོད་ཚང་བ་ཁྱབ་བདག་དགེ་ལེགས་ཡར་འཕེལ་མཆོག་གི་«རྟོགས་བརྗོད་སོས་ཀའི་མེ་ཏོག་ཞེས་བྱ་བ»འདི་ནི།མགོན་པོ་ཁོང་གི་འདུལ་ཞིང་དུ་འཚོ་བའི་བཙུན་གཟུགས་གྱི་ན་བ་མང་དགེ་བསོད་ནམས་འབྱུང་གནས་ཀྱིས་ཁོང་གི་འདས་མཆོད་ཀྱི་སྐབས་དང་བསྟུན་ཏེ།ཚོགས་འཚོགས་པའི་བར་གསེང་ནས་གང་དྲན་ཡི་གེར་བསྡེབས་པ་ཞིག་ཡིན་པ་ཙམ་ལས།ཆེད་དུ་རང་རྣམ་དང་རྣམ་ཐར་ཡང་ཀློག་བགྱིས་ཏེ།ཚིག་རྒྱན་དང་རིག་བྱེད་ཀྱི་གཞུང་དང་བསྟུན་པའི་བབ་འོས་ཀྱི་བྱ་བ་ཅི་ཡང་འཁྱོངས་མ་སོང་བས།ཚིག་ནོར་དོན་ནོར་གྱི་ཆ་མང་དུ་མཆིས་པར་གཟུར་གནས་ཀློག་མཁན་ཡོངས་བཟོད་གསོལ་ཞུའོ།།ཚེ་དང་བསྐལ་བ་བཟང་པོས་མ་བཏང་ཞིང་།ལས་དང་སྨོན་ལམ་བཟང་པོ་སྟབས་འགྲིག་ན།རྗེས་མར་ཚིག་གི་སྡེབ་དང་།དོན་གྱི་འགངས་སོགས་འདི་ལས་ཀྱང་ཞིབ་རྒྱས་ཤིག་འབྲི་འཆར་ཡོད་མོད།མ་འོངས་བྱ་བའི་རྣམ་བཞག་རྟོག་འཆར་རྫིང་བུར་འཆར་བ་ཙམ་ལ་ཡིད་རྟོན་བགྱི་བར་གཏན་ནས་མི་འོས་པས།ཁ་ཚོན་བཅད་དེ་སྨྲ་བའི་སྦོབས་པ་བདག་ལ་མ་མཆིས་སོ།།གང་ལྟར་གནས་སྐབས་ཚོད་ལྟའི་ཚུལ་དུ་འདི་ཙམ་བཏགས་ཏེ།སླད་ཆར་ཡང་སེམས་ཀྱིས་མི་བཏང་བར་རེ་བ་དང་སྨོན་ལམ་བཅངས་ངེས་པས།དེ་དེ་བཞིན་དུ་འགྲུབ་པའི་གསོལ་བ་སྙིང་གི་ཁོང་ནས་འདེབས་པ་ལགས་ཞེས་མགོན་པོ་ཁོང་གི་དགོངས་རྫོགས་འདས་མཆོད་ཀྱི་ཉིན་མོ་སྟེ་དམར་ཕྱོགས་རྒྱལ་བ་གཉིས་པའི་ཐོ་རངས་ཀྱི་ཆར་བྲིས་པ་དགེ་གྱུར་ཅིག།།།

རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ། 

    གསལ་འདེབས། 

       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 

             དྲ་བའི་སྦྲེལ་ཐགhttp://www.tb1025.cn