སྒྲིབ་གཉིས་མུན་སེལ་ངག་གི་ཉི་མ་དང་།།

སྐྱེ་རྒུའི་དབུགས་དབྱུང་ཆོས་ཀྱི་བདུད་རྩི་སྟེ།།

ལེགས་ཚོགས་ནམ་མཁའི་མཛོད་ཀྱི་སྒོ་འབྱེད་པའི།།

དམ་ཆོས་གསེར་གྱི་ཉི་མར་གུས་པས་འདུད།།

སྲིད་ན་དཀོན་པའི་ལེགས་བཤད་རིག་པའི་ནོར།།

ནོར་གྱི་མཆོག་གྱུར་ཟབ་དོན་གསུང་གི་ནོར།།

ནོར་བུའི་གཟུགས་སུ་བསྐྲུན་པའི་གསུང་རབ་ནོར།།

ནོར་མཆོག་འདི་ཉིད་དཔལ་ལྡན་ཀུན་གྱི་ནོར།།

འཕགས་བོད་མཁས་གྲུབ་གསུང་གི་ཉི་མའི་འོད།།

འོད་ཀྱི་མཆོག་གྱུར་རིག་པ་འབུམ་གྱི་གཟི།།

གཟི་འོད་འབར་བའི་དཔལ་ལྡན་གསུང་རབ་མཆོག།

མཆོག་དམན་ཀུན་གྱི་བསོད་ནམས་ཞིང་དུ་སྨིན།།

རྒྱལ་བའི་བསྟན་པ་དར་བ་ཚ་བ་རོང་།།

རོང་ཆེན་དགོན་སྡེ་མཚམས་གནས་རིག་པའི་རྒྱན།།

རྒྱན་དྲུག་མཆོག་གཉིས་གསུང་རབ་ཁྱུང་སྔོན་སྐྱེས།།

སྐྱེས་མཆོག་རྣམས་ཀྱི་ལེགས་བཤད་འདི་ན་ལྷམ།།

ཤེས་རབ་རྒྱ་མཚོ་འཕྱུར་བའི་མཁས་པའི་གསུང་།།

རབ་འབྱམས་ཟབ་དོན་སྟོན་པའི་དམ་པའི་གསུང་།།

རྒྱ་བོད་གསེར་རིའི་མཁས་གྲུབ་དག་གི་གསུང་།།

མཚོ་བྱུང་མགྲིན་པ་རོལ་པའི་ངག་གི་གསུང་།།

གསུང་དབྱངས་གསེར་གྱི་ཉི་མའི་རྗེས་འགྲོ་བའི།།

གསུང་རབ་རིན་ཆེན་གཏེར་གྱི་སྒོ་ཕྱེས་པས།།

གསུང་གི་བདུད་རྩིའི་ཟེགས་མ་ཆ་རེས་ཀྱང་།།

གསུང་རབ་འབུམ་གྱི་དགོངས་པ་འགྲེལ་བར་བྱེད།།

 ས་གསུམ་ལས་རྒྱལ་རྒྱལ་བ་མཆོག་གི་གསུང་།།

 གསུང་གི་མཛོད་ལས་ལས་འཕྲོ་ལྡན་པའི་སྐལ།།

སྐལ་བཟང་གཅེས་ནོར་ནོར་གྱི་དམ་པ་འདི།།

 འདིར་མཇལ་བསོད་ནམས་ནམ་མཁའ་བཞིན་དུ་ཡངས།།

སྣོད་ལ་རྒྱལ་བའི་བཀའ་ཡིས་བཀྲ་ཤིས་ཤིང་།།

བཅུད་ལ་དམ་པའི་གསུང་གིས་བཀྲ་ཤིས་པ།།

སྣོད་བཅུད་ཀུན་ལ་རྟག་ཏུ་བཀྲ་ཤིས་པའི།།

དམ་པའི་ཆོས་ཀྱིས་སྲིད་འདིར་བཀྲ་ཤིས་ཤོག །

ཅེས་པ་འདི་ནི་རྒྱལ་རོང་མཚམས་གནས་ཐོས་བསམ་ནོར་བུའི་གླིང་གིས་རྒྱན་དྲུག་མཆོག་གཉིས་ཀྱི་གསུང་འབུམ་སོགས་གསུང་ཟབ་མང་དུ་བསྐྲུན་ཏེ་བཀྲམ་པས་དགའ་བ་མངོན་པར་རྒྱས་ཏེ་བསྔགས་འོས་བསྔགས་པའི་དོན་དུ་ཤཱཀྱའི་དགེ་སྦྱོང་གི་གཟུགས་བརྙན་འཛིན་པ་ཤེས་རབ་བསྟན་དར་གྱིས་ས་ག་ཟླ་བའི་ཚེས་མགོར་མང་རའི་དགོན་དུ་གུས་པས་ཕུལ་ལོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn