༄༅འཆི་མེད་ལམ་ཀུན་ཆོས་སྐུའི་ཉི་ཟླ་གསལ། །

བར་སྣང་ཡངས་པོར་ལོངས་སྐུའི་འཇའ་ཚོན་བཀྲ། །

འཛིན་མའི་ཁྱོན་ཡོངས་དམ་པའི་མཛད་འཕྲིན་རྒྱས། །

དགེ་མཚན་སྟོང་གིས་འཇིག་རྟེན་མཛེས་གྱུར་ཅིག །

རབ་དཀར་དྲི་མེད་ཤེལ་གྱི་ལྷུན་པོ་ལ། །

ཉི་གཞོན་འབུམ་གྱིས་ཀུན་ནས་འཁྱུད་པ་བཞིན། །

མཐོང་བས་གསང་གསུམ་བྱིན་རླབས་བདུད་རྩིའི་བཅུད། །

ལྷུགས་པོར་སྩོལ་མཛད་དྲིན་ཆེན་བླ་མར་འདུད། །

ཕུལ་བྱུང་ཚུལ་ཁྲིམས་གསེར་གྱི་ག་ལ་ཤར། །

མདོ་རྒྱུད་རྒྱ་མཚོའི་རོ་མངར་ཨམྲིཏ། །

 ཡོངས་སུ་འཁྱིལ་བའི་ངོ་མཚར་ཟླ་མེད་པ། །

ཡོངས་འཛིན་བཀའ་དྲིན་ཅན་རྣམས་ཕྱག་གི་ཡུལ། །

ཐུབ་པས་རབ་བསྔགས་སྤྲེལ་རྫོང་ཕྱོགས་ཀྱི་རྒྱན། །

སྤང་གཞོང་སྨན་ལྗོན་མཚར་སྡུག་བལྟ་མི་ངོམས། །

ཏིང་འཛིན་སྒྲུབ་ལ་འདུ་འཛི་བྲལ་བའི་ཡུལ། །

གནས་འདིའི་བཀོད་ལེགས་ཡོན་ཏན་བསམ་ལས་འདས། །

དྭངས་བསིལ་ཡན་ལག་བརྒྱད་ལྡན་བདུད་རྩིའི་བཅུད། །

གང་ཞིག་མཐོང་བས་ལུས་སེམས་བདེ་བའི་དཔྱིད། །

 དཀོན་མཆོག་མཆོད་པའི་མཆོད་ཡོན་བླ་མེད་པའི། །

རླབས་འཕྲེང་གར་དུ་རྩེན་པ་ཧང་ཆབ་འགྲམ། །

ནེའུ་གསིང་མེ་ཏོག་སྣ་ཚོགས་འཛུམ་གྲོལ་ཞིང་། །

 རྐང་འཐུང་སྔོ་ལྗང་ཡལ་འདབ་ཕྱོགས་ཀུན་གཡོ། །

སྤུ་སྡུག་རྣམ་བཀྲ་དཔྱིད་ཀྱི་ཕོ་ཉ་དང་། །

གྲེ་འགྱུར་དབྱངས་ལྡན་འཇོལ་མོའི་མགྲིན་གླུ་སྙན། །

ཕྱོགས་མཚམས་ཀུན་ཏུ་གསར་སྐྱེས་ཡིད་འཕྲོག་ལྗོན། །

སེར་སྔོན་ལྗང་གསུམ་མཚར་སྡུག་ལོ་འདབ་སྟེང་། །

རྟ་བདུན་དབང་བོས་ཟེར་བརྒྱ་སྤྲོས་པ་ན། །

མརྒཏ་ལྷུན་པོར་འཇའ་ཚོན་འཁྱིལ་བ་འདྲ། །

གཡས་གཡོན་དག་ན་ལྷ་ཡི་དྲིལ་ཆུང་བཞིན། །

ལྷང་ལྷང་ཆུ་ཕྲན་དུ་མས་རང་སྒྲ་སྒྲོག།

དེ་ནང་གསེར་མིག་ཅན་སོགས་སྲོག་ཆགས་རིགས།།

གློག་བཞིན་འཁྱུག་འགྲོས་རྣམ་འགྱུར་ཅི་ཡང་སྟོན། །

གང་ཞིག་མཐོང་བས་ཡིད་ཀྱི་བརྟན་པ་འཕྲོག །

ཆུ་སྐྱེས་གཞོན་ནུའི་འདབ་བརྒྱ་བཞད་པའི་དབུས། །

ཐིག་ལེ་དྲུག་པའི་གཤོག་ཟུང་གར་བསྒྱུར་བཅས། །

སྙན་མོའི་རྒྱང་གླུ་ལེན་ལ་རྟག་ཏུ་བྲེལ། །

ཕྱོགས་དང་ཕྱོགས་མཚམས་ས་ཡི་སྐྱོན་དང་བྲལ། །

རྨད་བྱུང་དགེ་བཅུའི་ཡོན་ཏན་ཡོངས་སུ་རྫོགས། །

ཕྱི་ནང་མཐུན་རྐྱེན་ཀུན་ཚང་ནགས་ཀློང་འདིར། །

ཐར་འདོད་སྐྱེས་བུའི་སྒྲུབ་གནས་ལྷུན་གྱིས་གྲུབ། །

ཕྱོགས་ཀུན་གཡོ་བ་དྲི་གཞོན་གྱིས་བསྐུལ་བས། །

རབ་ལྗང་ལྗོན་པའི་ཡལ་ག་གཡོ་བ་ནི། །

བསམ་གཏན་སྒོམ་རྣམས་བསྟི་གནས་འདི་ལགས་ཞེས། །

རྒྱང་རིང་ལམ་ནས་མགྲོན་དུ་འབོད་པ་བཞིན། །

འཕུར་ལྡིང་ཉམས་བརྒྱའི་གཤོག་རྩལ་ངོམས་བཞིན་དུ། །

འགྱུར་ཁུགས་དབྱངས་ལྡན་བྱེའུའི་རིགས་ཀུན་གྱིས། །

དམ་ཆོས་གསུང་སྙན་སྒྲོག་ན་འདི་བཞིན་ཞེས། །

ནགས་ཀློང་གང་དུ་མགྲིན་པ་བཏེགས་ནས་གྲགས། །

ཨེ་མ་སྔོན་བྱོན་དམ་པའི་སྒྲུབ་གནས་འདིར། །

མཆོག་གསུམ་བྱིན་རླབས་དུས་སུ་སྨིན་པ་དང་། །

འདུན་ལྡན་འགྲོ་བའི་དད་བརྩོན་འགྱུར་མེད་སྒོས། །

རྒྱལ་བའི་ཐུགས་རྟེན་མངོན་པར་བླ་ན་མཐོ། །

དབྱིབས་ལེགས་གངས་ཀྱི་རི་བོར་ཟླ་བཞོན་གྱི། །

ཁུ་བས་ལན་བརྒྱར་བྱུགས་འདྲའི་དཔལ་དང་ལྡན། །

ནང་དུ་བྱིན་ལྡན་སྐུ་གསུང་ཐུགས་རྟེན་སོགས། །

ཕྱུར་བུར་གཏམས་པས་ངོ་མཚར་བརྗོད་ལས་འདས། །

ཕུལ་བྱུང་མཆོད་རྟེན་ལེགས་འགྲུབ་ཆོས་སྟོན་ཚེ། །

ཡབ་རྗེ་མཆོག་སྤྲུལ་བསྟན་འཛིན་དཔང་བོའི་གཙོས། །

ཁྲིམས་ལྡན་བཅུ་ཟུང་ལྷག་དང་བཅས་པ་ཡིས། །

དམ་ཚིག་པ་དང་ཡེ་ཤེས་དབྱེར་མེད་དུ། །

བསྟིམས་སྟེ་ཆོས་སྤྱོད་བསྔོ་སྨོན་རྣམ་དག་སྒོས། །

ངོ་མཚར་བཀྲ་ཤིས་མེ་ཏོག་ཆར་དུ་བསྙིལ། །

དེ་ནས་བརྩམས་ཏེ་འདིར་འཁོད་དད་ལྡན་རྣམས། །

བཅོས་མིན་སྙིང་ནས་སྒྲིབ་པ་སྦྱང་བའི་སླད། །

རྟག་ཏུ་ཁ་འདོན་ཕྱག་དང་བསྐོར་བའི་ལས། །

དབྱར་དུས་ལྷ་ལམ་ཆུ་འཛིན་འཁྲིགས་པ་བཞིན། །

དགེ་མཚན་སྟོང་འབར་རབ་བྱུང་བཅུ་བདུན་པའི།།

བགྲང་བྱ་མེ་བྱི་གྲོ་བཞིན་ཟླ་བ་ཡི།།

འཕེལ་ཕྱོགས་དགའ་བ་དང་བོ་ཉི་ཤར་དུས།།

སྡེ་སྤྱིར་དགེ་བའི་རིམ་གྲོར་ཟླ་མེད་པ། །

རྡོ་རྗེ་འཆང་དབང་དཔལ་ལྡན་བླ་མ་ཡིས།།

བཀའ་ལུང་ཇི་བཞིན་དུས་གསུམ་རྒྱལ་བའི་ཡུམ།།

ཚེ་སྦྱིན་མྱུར་སྐྱོབ་ལྷ་མོའི་སྟོང་མཆོད་ཀྱི། །

ཆོ་ག་ཆོས་སྤྱོད་འཁྲུལ་མེད་གསར་དུ་བཙུགས།།

དེ་ཡིས་མོད་ལ་ལས་ལྡན་སྐྱེ་བོ་ཀུན།།

འདི་ཕྱི་དོན་ཀུན་འགྲུབ་པས་དགའ་སྤྲོས་ཚིམས།།

ཤིང་བྱའི་གནམ་ལོ་ཆུ་སྟོད་ཟླ་བ་ཡི། །

ཆོས་འཁོར་བསྐོར་བའི་དུས་བཟང་ཚེས་བཞི་ལ། །

ཧང་ང་གསེར་གཞོངས་སྟོད་སྨད་བར་གསུམ་གྱི།།

གཅིག་ཏུ་ཆོས་ལ་གཞོལ་བས་བརྩོན་ལྡན་རྣམས།།

ལྷོད་མིན་སྙིང་ནས་ལྷག་བསམ་དད་གུས་ཀྱིས། །

མ་ཎི་དུང་ཕྱུར་བསྒྲུབས་པའི་སྐལ་བ་ལྡན།།

དེ་མཐུས་རྫོགས་ལྡན་ཇི་བཞིན་བདེ་སྐྱིད་ཀྱི།།

ཞོགས་ཀའི་ཉི་གཞོན་གསར་བའི་འོད་ཀྱིས་ཁྱབ།།

གཅིག་ཏུ་ལོ་བརྒྱར་མ་ཎི་བགྲངས་པ་ལས།།

སྐྱ་སེར་དམངས་དང་དགེ་སྒྲུབ་བསོད་ནམས་མཆོག།

དཔེར་ན་གླང་ཆེན་སྟོང་གི་ཁུར་ལྗི་བ།།

འཕྲུལ་འཁོར་ཤིང་རྟ་གཅིག་གིས་འདྲེན་ལ་ལྟོས། །

ཕུལ་བྱུང་རབ་ཚེས་ས་བྱི་ཟླ་བ་ཡི། །

དུས་གཉེན་ཁྱད་འཕགས་ཚེས་བཟང་ལྷ་བབས་ཉིན། །

ཆོས་ཕུང་ཡང་སྙིང་གཅིག་བསྡུས་དམ་ཆོས་ཕུལ། །

 བྱིན་ལྡན་བལྟ་ན་སྡུག་པའི་མཆོད་ཀྱི་ཞིང་། །

མ་ཎི་ཡིག་དྲུག་དུང་ཕྱུར་གསུམ་ལྡན་ཞིག།

དད་ལྡན་དཔག་ཡས་ཡོན་སྦྱར་སྔོན་བསགས་ཀྱིས།།

རྣམ་དཀར་དགེ་བའི་འབྲུས་བུ་ཉིད་དུ་འཁུམས། །

གངས་ཅན་འགྲོ་བའི་ཆོས་སྐལ་མ་ཎིའི་གཟུགས། །

ས་ལ་བྲིས་དང་ལག་པས་རེག་པ་ཡང་། །

འགྱང་མིན་སྲིད་པ་མཐའ་མར་འགྱུར་གསུངས་ན། །

ལྷག་བསམ་ངག་བཟླས་ཆུས་བསྐོར་སྨོས་ཅི་དགོས།།

རབ་བྱུང་བགྲང་བྱ་ས་མོ་ཕག་གི་ལོའི།།

ཆུ་སྟོད་དཀར་ཕྱོགས་རྫོགས་པ་གསུམ་པའི་ཉིན།།

བཀོད་ལེགས་ལྟ་ན་སྡུག་པའི་མ་ཎི་ཁང་། །

གངས་ལྗོངས་འགྲོ་བ་ཡོངས་ཀྱི་རྒྱན་དུ་གྲུབ། །

འདིར་འབད་ལེགས་བྱས་དགེ་བ་ཆུ་ཐིགས་ཙམ། །

མངོན་མཐོ་འཛིན་མའི་ལྟོ་བར་ལེགས་བརྒྱུད་དེ། །

ངེས་ལེགས་ཐར་བ་གཏིང་མཐའ་བྲལ་བའི་མཚོར།།

དབྱེར་མེད་གཅིག་ཏུ་འདྲེས་པར་གྱུར་ཅིག་གུ༐༐

ནོར་འཛིན་ཁྱོན་ཡངས་གནས་པའི་ཡིད་ཅན་རྣམས། །

སྙིགས་དུས་རང་མཚང་ལོ་འདབ་ཀྱིས་བསྒྲིབས་པ། །

མཆོག་གསུམ་རྟ་བདུན་དབང་བོའི་གཟི་བྱིན་གྱིས། །

འཕྲལ་ཡུན་བདེ་སྐྱིད་པདྨའི་འཛུམ་གྲོལ་ཤོག  །།    ༎

ཅེས་ཏཱ་རེ་སྟོང་མཆོད་དང་མ་ཎི་དུང་སྒྲུབ་སོགས་ནམ་བཙུགས་ཀྱི་ལོ་ཟླ་ཚེས་གྲངས་ངེས་བྱེད་དོན་ལྡན་ཚིག་གི་ཕྲེང་བ་འདི་ནི་རབ་བྱུང་བཅོ་བདུན་པའི་ས་ཕག་ཆུ་སྟོད་ཟླ་བའི་དཀར་ཕྱོགས་རྫོགས་པ་གསུམ་པ་སྟེ་སྤྱི་ལོ་༢༠༡༩ལོའི་ཟླ་༧ཚེས་༡༧ཉིན་གོ་བཞིའི་རྒན་པོ་འཇིགས་མེད་བློ་གྲོས་ཀྱིས་ཏཱ་རེ་གསེར་གཞོངས་རང་སྤྱིལ་བསམ་གཏན་ཁང་ཆུང་ནས་བྲིས་པ་ཛ་ཡན་ཏུ།

རྩོམ་པ་པོ་ངོ་སྤྲོད།

༧སྐྱབས་རྗེ་༧ཨ་རོལ་རིན་པོ་ཆེའི་རིགས་ཀྱི་ཅོད་པན་དམ་པ་སྦས་པའི་རྣལ་འབྱོར་བ་འཇིགས་མེད་བློ་གྲོས་ཚང་ནི་བིས་མདོ་ནགས་རྒན་སྡེ་བར་རབ་བྱུང་བཅོ་ལྔ་བའི་མེ་ཕོ་སྟག་སྟེ་ཕྱི་ལོ་1923ལོར་རིགས་རུས་ཆོ་འབྲང་ཕུན་སུམ་ཚོགས་པ་ས་སྐྱའི་འཁོན་དཀོན་མཆོག་རྒྱལ་བོའི་རིགས་ལས་རྒྱུད་པའི་ཡབ་དཀོན་མཆོག་སྐྱབས་དང་ཡུམ་རིན་ཆེན་སྒྲོལ་མའམ་རིན་ཆེན་མ་གཉིས་ཀྱི་སྲས་སུ་སྐུ་འཁྲུངས།དགུང་ལོ་བཅུ་བཞེས་པ༼ རབ་བྱུང་བཅུ་དྲུག་པའི་ཤིང་མོ་ཕག་སྟེ་ཕྱི་ལོ1935ལོར་བྲག་དཀར་སྤྲེལ་རྫོང་དགོན་དུ་དགེ་བའི་བཤེས་གཉེན་རྗེ་ཨ་ལགས་དགེ་འདུན་ནམ་དགེ་འདུན་གྲགས་པ་ཚང་གི་མདུན་དུ་དགེ་འདུན་གྲངས་ཚང་བའི་དབུས་སུ་རབ་ཏུ་བྱུང་སྟེ་མཚན་ལ་འཇིགས་མེད་བློ་གྲོས་སུ་གསོལ། དེ་ནས་བཟུང་དགོན་པའི་འདོན་རྟ་དབྱངས་གསུམ་ལ་ཞིབ་པར་བསླབས། དགེ་བཤེས་བིས་མདོ་དཀོན་མཆོག་རྒྱལ་མཚན་ལས་ཞི་རྒྱས་དབང་དྲག་གི་ཐིག་དང་མཆོད་རྟེན་སོགས་ཀྱི་ཐིག་རྩ་བསླབས། དགེ་བཤེས་སངས་རྒྱས་རྒྱ་མཚོ་ལས་དབུ་ཅན་དབུ་མེད་ཀྱི་ཡིག་གཟིགས་དང་སུམ་རྟགས་དག་གསུམ་སྙན་ངག་སོགས་རིག་གནས་ཆུང་བ་ཀུན་ལ་བསླབས། དགེ་བཤེས་སྐུ་དཔོན་དགེ་ལེགས་རྒྱ་མཚོའི་སྤྱན་སྔ་ནས་ཚད་མའི་འཇུག་སྒོ་བསྡུས་གྲྭ་ནས་གཞུང་པོ་ཏི་ལྔ་ལ་རིམ་པར་བསླབས། 1981ལོར་དགོན་པའི་ཆོས་སྒོ་ཡང་བསྐྱར་ཕྱེས་པ་ནས་དགོན་པའི་འདོན་རྟ་དབྱངས་གསུམ་དང་ཚོགས་འཚོགས་ལུགས་དགེ་བསྐོས་ཀྱི་སྐྱབས་འཇུག་ཞུ་སྟངས་དང་ཚོགས་གཏམ་གཏང་སྟངས་སོགས་དགོན་པའི་གྲྭ་གསར་ཀུན་ལ་བསླབས། དགོན་པའི་ཕྱིའི་འཛུགས་བསྐྲུན་འདུ་ཁང་ཀ་བརྒྱ་མ་དང་མཆོད་རྟེན་བརྒྱད་པ་རྗེས་དྲན་མཆོད་རྟེན་སོགས་ཁོང་གིས་དབུ་མཛད་དེ་བཞེངས། 1991ལོར་སྐྱབས་རྗེ་ཨ་རོལ་སྐུ་ཕྲེང་བཞི་བའི་ཡོངས་འཛིན་དུ་ཨ་ལགས་ཆུ་ཀྱཱ་རིན་པོ་ཆེ་ནས་མངལ་གསོལ་མཛད། ཨ་རོལ་རིན་པོ་ཆེ་ནས་རྒྱུད་པའི་དགོན་པའི་ཚོགས་འདོན་ཆ་ཚང་དང་ཁོང་གི་བདེ་ལམ་སོགས་ཀྱི་ལུང་དགོན་པའི་གྲྭ་ཚང་ཀུན་ལ་ཡང་ཡང་གནང་། མདོར་ན་དགོང་ལོ་གོ་དྲུག་བཞེས་པའི་དེ་རིང་གི་བར་དུ་གཞན་དོན་འབའ་ཞིག་ལ་གཞོལ་བར་བཞུགས་པ་དེ་ལྟར་ལགས།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn