བསྟོད་པ་ཡོན་ཏན་སྤར་འཛིན།
ང་ཡོན་ཏན་ཅི་སྐྱེས་བླ་མའི་དྲིན།།
ང་བླ་མ་ཁོ་ནའི་དྲིན་གྱིས་འཚོ།།
ང་བླ་མ་བསྟེན་ལས་ཡོན་ཏན་ཅི།།
ང་རྟེན་འབྲེལ་མགོ་ནས་མ་ལོག་པ།།
ང་ཨ་མདོ་བཀྲ་ཤིས་སྒོ་མང་བ།།
ང་ལོག་སྨྲ་ཚར་གཅོད་སྒྲ་ཚད་བྱང་།།
ང་སྐལ་ལྡན་རྗེས་འཛིན་བཟོ་གསོ་སྨྲ།།
ང་ལུང་ཁྲིད་མན་ངག་གཏེར་ཀྱི་མཛོད།།
ང་མཁས་པའི་ཡན་ལག་ཀུན་རྫོགས་པ།།
ང་ཨ་མདོ་བཀྲ་ཤིས་སྒོ་མང་བ།།
ང་བཤད་པའི་དུས་སུ་སྒྲུབ་ཚུགས་བཟང་།།
ང་སྒྲུབ་པའི་དུས་ན་ཐོས་པ་མང་།།
ང་བཤད་སྒྲུབ་དུས་སུ་འགྲོ་དོན་འཕེལ།།
ང་མཁས་པའི་མཛད་གསུམ་སྒོར་འཁྱིལ་ལེ།།
ང་ཨ་མདོ་བཀྲ་ཤིས་སྒོ་མང་བ།།
ང་ཚུལ་ཁྲིམས་སྲུང་དུས་ཏིང་འཛིན་འཕེལ།།
ང་ཏིང་འཛིན་སྒོམ་དུས་ཤེས་རབ་རྒྱས།།
ང་ཤེས་རབ་སྒོམ་དུས་ཚུལ་ཁྲིམས་སྲུང་།།
ང་བསླབ་གསུམ་ཕྱོགས་ཆར་མ་ལྷུང་བ།།
ང་ཨ་མདོ་བཀྲ་ཤིས་སྒོ་མང་བ།།
ང་རང་གི་ལུགས་ལ་ཉམས་རྒྱུས་ཆེ།།
ང་གཞན་གྱི་ལུགས་ལ་དག་སྣང་སྦྱོང་།།
ང་མཁས་པའི་གསུང་ཀུན་གདམས་པར་གོ།།
ང་རང་གཞན་ཆགས་སྡང་མི་ཆེ་བ།།
ང་ཨ་མདོ་བཀྲ་ཤིས་སྒོ་མང་བ།།
ང་དབུ་ཚད་རིགས་པས་རྟག་ཆད་གྲོལ།།
ང་ཕར་མངོན་གཞུང་གིས་བྱིང་རྨུགས་སངས།།
ང་འདུལ་བའི་ལུང་གིས་སྤྱོད་པ་གཙང་།།
ང་པོཏ་ལྔའི་གཞུང་ལ་སྲབ་མཐུག་མེད།།
ང་ཨ་མདོ་བཀྲ་ཤིས་སྒོ་མང་བ།།
ང་མདོ་ལ་སློབ་དུས་སྔགས་ལ་མོས།།
ང་སྔགས་ལ་སྦྱོང་དུས་མདོ་ལ་བརྟེན།།
ང་མདོ་སྔགས་དུས་ན་དམ་ཚིག་གཟབ།།
ང་མདོ་སྔགས་རིས་སུ་མ་བཅད་པ།།
ང་ཨ་མདོ་བཀྲ་ཤིས་སྒོ་མང་བ།།
ཞེས་པ་འདི་ནི་བཀྲ་ཤིས་འཁྱིལ་གྱི་བཀའ་དྲིན་གསུམ་ལྡན་གྱི་བླ་མ་དམ་པ་དུ་མའི་བཀའ་དྲིན་ལས་བྱང་ཆུབ་ལམ་གྱི་རིམ་པའི་གདམས་པ་ཤས་ཙམ་མྱངས་པའི་སྐལ་བ་ཅན་སྨར་སངས་ཀྱིས་སྐྱེ་བ་ནས་ཚེ་རབས་ཐམས་ཅད་དུ་དམ་པ་དེ་དག་དང་མི་འབྲལ་བའི་སྨོན་ལམ་ཙམ་དུ་བྲིས་པའོ།། ༢༠༡༦.༤.
