ཨ་ཕ་ནི་བདག་གི་ལག་པ་གཡས་པ་ཡིན་ལ

ཨ་མ་ནི་བདག་གི་ལག་པ་གཡོན་པ་ཡིན།

ང་ལ་ལག་པ་ཆ་གཅིག་ལྡན་པས།

ད་གཟོད།ཁ་ཆར་གྱི་ཁྲོད་ནས།

ཉི་དུག་གི་གསེང་ནས།

ང་རང་ཡར་ལངས་ཤེས་པར་གྱུར།

ཨ་མ་ནི་བདག་གི་ལག་པ་གཡས་པ་ཡིན་ལ།

ཨ་ཕ་ནི་བདག་གི་ལག་པ་གཡོན་པ་ཡིན།

ང་ལ་ལག་པ་ཆ་གཅིག་ལྡན་པས།

ད་གཟོད།ལོ་ཟླའི་རླུང་རླབས་ཀྱི་ཁྲོད་ནས།

མི་ཚེའི་བརྡབ་གསིག་གི་གསེང་ནས།

ང་རང་འགྲོ་ཤེས་པར་གྱུར།

བདག་ལ་ཕ་མ་གཉིས་ཀ་འཛོམས་པས།

བདག་ལ་གཤོག་པ་གཉིས་ཀ་ལྡན་པས།

ད་གཟོད།ཤེས་རབ་ཀྱི་ས་བོན་ལས།

ངེས་ཤེས་ཀྱི་བློ་མིག་རྙེད་དེ།

ནམ་མཁའ་པང་དུ་བསྐྱིལ་ནས།

ང་རང་འཕུར་ཤེས་པར་གྱུར།

དོན་དུ།ལག་པ་གཡས་གཡོན་ནི།

ཕ་མ་རྣམ་གཉིས་ཡིན་ལ།

ཕ་མ་རྣམ་གཉིས་ནི།

གཤོག་པ་གཡས་གཡོན་ཡིན།

གཤོག་པ་གཡས་གཡོན་ལ་བརྟེན་ནས།

ངས་སྣང་བའི་ཡུལ་ནས་སེམས་ཅན་མ་རུ་རྙེད་ཅིང་།

ཕ་མ་རྣམ་གཉིས་ལ་བརྟེན་ནས།

ངས་འཚོ་བའི་ཀློང་ནས་བདེན་པའི་དེ་ཉིད་རྙེད་བྱུང་།

2015.7.26ཉིན་གྱི་ཞོགས་པར་རང་ཤག་ནས།

གསལ་འདེབས།     
       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།     

       རྩོམ་ཁུངས། དགེ་ལུགས་པའི་དྲ་བ།
      རྩོམ་འདིའི་སྦྲེལ་ཐགhttp://www.tb1025.cn