ན་མོ་གུ་རུ་ཀཱ་ལ་ཙཀྲཱ་ཡ།རང་ཉིད་ཚེ་འདི་ཉིད་ལ་སྟོང་གཟུགས་ཕྱག་རྒྱ་ཆེན་པོ་མངོན་དུ་བྱེད་པར་འདོད་པས།ཡིད་དང་མཐུན་པའི་གནས་སུ༑སྦྱོར་བའི་ཆོས་དྲུག་ལ་སོགས་པ་སྔོན་དུ་བཏང་ནས།སྐྱབས་ཡུལ་རྣམས་ལེགས་པར་གསལ་བཏབ་སྟེ།སངས་རྒྱས་སློབ་དཔོན་དབང་མཆོག་ཐོབ།།དེས་བསྟན་ཐབས་ཤེས་དབྱེར་མེད་ཆོས།།དེར་གནས་དགེ་འདུན་རྣམ་གཉིས་ལ།།རབ་ཏུ་དྭངས་པས་སྐྱབས་སུ་མཆི།།བླ་མ་སངས་རྒྱས་སྲས་བཅས་ལ།།བདག་ཉིད་རྣམ་པ་ཀུན་ཏུ་འབུལ།།ཡོན་གནས་དམ་པ་ཁྱེད་རྣམས་ཀྱི༑༑བྲན་དང་འབངས་སུ་བཟུང་དུ་གསོལ།།བདག་གི་དུས་གསུམ་དགེ་བའི་ཚོགས།།རང་དོན་དྲི་མས་མ་གོས་པར།།སྲིད་གསུམ་སེམས་ཅན་མ་ལུས་པ།།སངས་རྒྱས་ཐོབ་པའི་རྒྱུ་རུ་བསྔོ།།དུས་འདི་ནས་བཟུང་བྱང་ཆུབ་བར།།བྱང་ཆུབ་སེམས་ནི་བསྐྱེད་བགྱི་ཞིང༌།།བསམ་པ་རྣམ་པར་དག་པ་བསྐྱེད།།བདག་དང་བདག་གིར་འཛིན་པ་སྤངས།།ཞེས་སྐྱབས་འགྲོ་སེམས་བསྐྱེད་ནན་ཏན་དུ་བྱ།དེ་ནས་འདི་ལྟར་བརྗོད་དེ།བེམ་ཆོས་ཟད་པའི་ལྷ་ལམ་ཡངས་པའི་ངོགས།།ཆུ་སྐྱེས་ཟླ་ཉི་སྒྲ་གཅན་དུས་མེའི་སྟེང༌།།རྩ་བའི་བླ་མ་ངོ་བོ་དུས་གསུམ་གྱི།།སངས་རྒྱས་ཀུན་འདུས་དཔལ་ལྡན་དུས་འཁོར་ལོ།།ཞལ་གཅིག་ཕྱག་གཉིས་སྐུ་མདོག་ནམ་མཁའི་མདངས།།རྡོར་དྲིལ་བཟུངས་སྟེ་སྣ་ཚོགས་ཡུམ་ལ་འཁྱུད།།སྣ་ཚོགས་ཡུམ་གྱི་ལྷན་ཅིག་སྐྱེས་དགའ་དང༌།།སྟོང་གཟུགས་འགོག་མེད་ཐབས་ཤེས་རོ་གཅིག་པ།།སྣ་ཚོགས་ཡུམ་ནི་སྐུ་མདོག་སེར་མོ་སྟེ།།གྲི་གུག་ཐོད་པས་མི་ཤེས་རྨོངས་མུན་ཀུན།།ལྷག་པར་དྲུངས་ཕྱུང་བདེ་བ་ཆེན་པོ་ཡིས།།སེམས་ཅན་ཀུན་ལ་དགེ་ལེགས་སྦྱིན་པར་མཛད།།གཡས་དམར་ཞབས་བརྐྱངས་གཡོན་དཀར་ཞབས་བསྐུམས་པས།།བདུད་དང་དྲག་པོ་བརྫིས་པའི་བཅོམ་ལྡན་གྱི།།སྐུ་ལ་རྡོ་རྗེ་ནོར་བུ་ལ་སོགས་པ།།ཆ་ཚད་རྫོགས་པའི་རྒྱན་མང་འོད་ཀྱིས་བརྗིད།།ཐུགས་ཀ་ནས་སྤྲོས་རྡོ་རྗེ་ཤུགས་ཀྱི་མཐུས།།ཡེ་ཤེས་སྤྱན་དྲངས་དམ་ཚིག་པ་དང་འདྲེས།།དབང་ལྷ་སྤྱན་དྲངས་དེ་ལ་གསོལ་བཏབ་པས།།དབང་ལྷས་དབང་བསྐུར་རིགས་བདག་གིས་རྒྱས་བཏབ།།ཐུན་མོང་བ་དང་ཐུན་མོང་མིན་པ་ཡི།།ཉེར་སྤྱོད་ཕྱི་ནང་གསང་བའི་མཆོད་པའི་སྤྲིན།།རབ་འབྱམས་ནམ་མཁའི་ཁྱོན་ཀུན་གང་བ་ཡིས།།བླ་མ་སྐྱབས་གསུམ་ཀུན་འདུས་མཆོད་པར་བགྱི།།བསྐྱེད་རིམ་ས་བོན་འདེབས་བྱེད་དབང་རྣམ་བདུན།།ཡན་ལག་དྲུག་གི་བག་ཆགས་འཇོག་བྱེད་པ།།གོང་མ་གོང་ཆེན་སྟོང་གཟུགས་ཕྱག་རྒྱ་ཆེ།།འདེབས་བྱེད་བདག་པོ་ཆེན་པོའི་དབང་རྣམས་སྩོལ།།ཞེས་པའི་གསོལ་འདེབས་བླ་མ་ལྷས་གསན་པས།།ཐུགས་ཀ་ནས་སྤྲོས་ནུས་མའི་ཚོགས་རྣམས་དང༌།།དེ་བཞིན་གཤེགས་པ་ཁྲོ་བོའི་དབང་པོ་སོགས།།དབང་ལྷ་ནམ་མཁའི་ཁྱོན་ཀུན་གང་བ་ཡི།།བྱིས་པ་ལྟར་འཇུག་བདུན་དང་གོང་མ་ཡི།།དབང་བཞི་གོང་ཆེན་དབང་བཞི་དབང་གི་མཆོག།རྡོ་རྗེ་སློབ་དཔོན་ཆེན་པོའི་དབང་ཡང་བསྐུར།།དེ་དག་མཐུ་ལས་ལུས་ཀྱི་རྩ་དང་རླུང༌།།ལས་རླུང་རིམ་པ་གཉིས་ཀྱི་བག་ཆགས་ཆེ།།རྒྱུད་ལ་ཐེབས་པས་ཚེ་འདི་ཉིད་ལ་ནི།།ཕྱག་ཆེན་མངོན་དུ་གྱུར་པའི་སྐལ་ལྡན་བྱས།།བླ་མ་དང་པོའི་སངས་རྒྱས་དུས་འཁོར་ལོ།།ཁྱེད་ཀྱིས་བདག་ལ་བྱིན་གྱིས་བརླབ་ཏུ་གསོལ།།དངོས་གྲུབ་མྱུར་བ་ཉིད་དུ་སྩལ་དུ་གསོལ།།འདོད་དགུའི་ཆར་ཆེན་མྱུར་དུ་ཕབ་ཏུ་གསོལ།།ཞེས་ལན་གང་མང་བརྗོད་མཐར།ཨོཾ་ཨཱཿགུ་རུ་བཛྲ་དྷ་ར་ཝ་གིནྡྲ་སུ་མ་ཏི་ཤཱ་ས་ན་དྷ་ར་ས་མུ་དྲ་ཤྲཱི་བྷ་དྲ་སརྦ་སིདྡྷི་ཧཱུཾ་ཧཱུཾ།།ཞེས་བླ་མའི་མཚན་སྔགས་དང༌།ཨོཾ་ཨཱཿཧཱུཾ་ཧོ་ཧྃ་ཧཱུཾ་ཕཊ།ཅེས་ཡབ་དང༌།ཨོཾ་ཕྲེཾབི་ཤྭ་མཱ་ཏ་ཧཱུཾ་ཕཊ།ཅེས་ཡུམ་གྱི་སྔགས་བཅས་ཅི་མང་བཟླ་ཞིང༌།བླ་མ་ཡབ་ཡུམ་གྱི་སྐུ་ལས་དུད་རྩིའི་རྒྱུན་བབས་པས་རང་གི་སྤྱི་བོར་ཞུགས་ལུས་ཀྱི་ནང་ཐམས་ཅད་གང༌།སྡིག་སྒྲིབ་ཐམས་ཅད་སངས་ཀྱིས་དག་པར་བསམ་མོ།།དེ་ནས་གདུང་ཞུགས་དྲག་པོས་འདི་ལྟར་གསོལ་བ་གདབ་སྟེ།༈དུས་གསུམ་བདེ་གཤེགས་སྲས་བཅས་ཉན་རང་དང༌།།དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས།།མ་ལུས་གཅིག་ཏུ་བསྡུས་པའི་ངོ་བོ་ཉིད།།ཐུགས་རྗེ་སྤྱན་ལྡན་ཁྱོད་ཀྱིས་བྱིན་རླབས་སྩོལ།།ཐབས་དང་ཤེས་རབ་ཟུང་དུ་འཇུག་པ་ཡི།།གཤོག་ཡངས་དཀར་པོ་བསྐྱོད་པའི་རྒྱལ་བའི་སྲས།།ངང་པའི་རྒྱལ་པོ་རྣམས་དང་ལྷན་ཅིག་ཏུ།།སྤྱོད་པ་རྒྱ་མཚོའི་ཕ་རོལ་ཕྱིན་པར་ཤོག།ཁྱད་པར་རྣམས་བཅས་བཞིན་ལག་ཅན་གྱི་སྐུ།།རྣམ་མེད་སྒྱུ་མའི་ཕྱག་རྒྱའི་འོད་ཟེར་བཀྲ།།འཕོ་ཆེན་བཅུ་གཉིས་སྲིད་པའི་རྩ་བ་ཡི།།དྲི་བཞོན་འཇོམས་པའི་གོ་འཕང་བསྒོམ་པར་ཤོག།དེ་ནས་ཉི་ཁྲི་ཆིག་སྟོང་དྲུག་བརྒྱ་ཡི།།འགྱུར་མེད་བདེ་ཆེན་དཀར་དམར་རྡུལ་ཕྲ་རབ།།དབུ་མའི་ནང་དུ་བརྩེགས་པའི་ནུས་པ་ཡིས།།བེམ་ཆོས་ཁམས་རྣམས་ཟོས་ཏེ་ཟད་པར་ཤོག།སྟོང་གཟུགས་ཕྱག་རྒྱའི་དབང་པོའི་གཞུའི་དྭངས་མ།།མི་འགྱུར་བདེ་བའི་ཁ་དོག་རྣམ་པ་ལྔ།།དབྱེ་བར་མི་ནུས་གཞོམ་མེད་རྡོ་རྗེའི་སྐུ།།ངེས་དོན་ནཱ་ད་མངོན་དུ་བྱེད་པར་ཤོག།ཆད་པ་མེད་པའི་རྡོ་རྗེའི་ཨེ་ཝཾ་གདངས།།ཆོས་དབྱིངས་མཁའ་ལས་མ་གཡོས་བསྒྲགས་པ་ཡིས།།འགྲོ་བ་འདི་དག་མ་རིག་གཉིད་བསླངས་ཏེ།།དཔལ་ལྡན་དུས་ཀྱི་འཁོར་ལོའི་སར་འགོད་ཤོག།ཡང་ན་བྱང་ཕྱོགས་ནོར་བུའི་གྲོང་ཁྱེར་ཆེ།།དཔལ་ལྡན་ཤམྦྷ་ལ་ཡི་གནས་མཆོག་ཏུ།།གསེར་གྱི་མྱུ་གུ་བཟང་པོའི་སེང་ཁྲི་ལ།།འགྱིང་བའི་རིགས་ལྡན་ཞལ་བཟང་མངོན་འགྱུར་ཤོག།ལོག་པར་ལྟ་བའི་ཀླ་ཀློའི་དཔུང་མང་པོ།།འཐོར་བྱེད་མི་རྗེ་དྲག་པོའི་འཁོར་ལོ་ཆེའི།།ཞབས་རྡུལ་གུར་ཀུམ་བཀྲ་ཤིས་རི་མོ་ཡིས།།བདག་གི་མགོ་བོའི་ཅོད་པན་མཛེས་གྱུར་ཅིག།དེ་ལྟར་གསོལ་བ་བཏབ་པས་བླ་མ་ལྷ།།དགྱེས་བཞིན་འོད་དུ་ཞུ་ནས་བདག་ཉིད་ཀྱི།།ལུས་ལ་ཐིམ་པས་རང་ཉིད་གདན་ལྔའི་སྟེང༌།།དཔལ་ལྡན་དུས་ཀྱི་འཁོར་ལོའི་ངོ་བོར་གྱུར།།ཅེས་དམིགས་པ་བརྟན་པོས་བརྗོད་པར་བྱའོ།།༈ན་མོ་གུ་རུ།དཔལ་ལྡན་དང་པོའི་སངས་རྒྱས་རིང་ལུགས་ཆེ།།ཤམྦྷ་ལ་ཡི་གྲོང་དུ་རྒྱས་མཛད་པ།།རྗེ་བཙུན་བླ་མ་ཁྱེད་ལ་གསོལ་འདེབས་ཀྱི།།བདག་གི་བདེན་པའི་ཚིག་འདི་འགྲུབ་པར་མཛོད།།བྱང་སེམས་དུས་འཁོར་སོགས་ཀྱིས་རྟག་བརྟེན་ཅིང༌།།དམ་པའི་ཆོས་རྣམས་མཆོག་ཏུ་རྒྱས་པའི་ས།།བྱང་ཕྱོགས་ཀ་ལ་པ་ཞེས་བྱ་བའི་གྲོང༌།།བརྒྱ་བྱིན་ཁང་བཟང་ལས་ཀྱང་ཆེས་ལྷག་པའི།།ཕོ་བྲང་མཆོག་ནི་དཔག་ཚད་བཅུ་གཉིས་ཚད།།གྲུ་བཞི་ལྷམ་ཞིང་རིན་ཆེན་དུ་མས་བརྒྱན།།བྱེ་བ་ཕྲག་ནི་དགུ་བརྒྱའི་གྲོང་གིས་བསྐོར།།སྐྱེད་མོས་ཚལ་མཆོག་ལྷ་ཡུལ་ལས་ལྷག་པར།།དང་པོའི་སངས་རྒྱས་དཀྱིལ་འཁོར་ཆེ་ཆུང་གཉིས།།མཐོང་བའི་མོད་ལ་དངོས་གྲུབ་མཆོག་སྩོལ་གྱི།།རྒྱུ་ནི་རིན་ཆེན་རིན་ཐང་བྲལ་ལས་གྲུབ།།དེ་ཡི་གཡས་གཡོན་ཡིད་འོང་མཚོ་ཆེན་ནི།།ནོར་བུས་གང་ཞིང་དཔག་ཚད་བཅུ་གཉིས་པ།།མི་རྣམས་ནོར་ཕྱུག་ཆོས་ཀྱི་དུས་འདའི་ཕྱུག།བླ་མ་མཆོག་ཁྱེད་དེང་དུས་ནས་བཟུངས་པའི།།ལོ་ནི་བདུན་བརྒྱ་ཙམ་ཞིག་རྫོགས་པ་ན།།རིགས་ལྡན་དྲག་པོར་གྱུར་ནས་ཀླ་ཀློའི་དཔུང༌།།བཅོམ་ནས་རྫོགས་ལྡན་བཞིན་དུ་མཛད་པའི་དུས།།སྔོན་གྱི་ཞལ་བཞེས་དམ་བཅའ་མ་གཡེལ་བར།།བདག་ཀྱང་འཁོར་གྱི་ཐོག་མར་རྗེས་འཛིན་མཛོད།།རྗེ་བཙུན་བླ་མ་དམ་པ་མཆོག་ཁྱེད་ཉིད།།རླུང་གི་ཤུགས་ཅན་རྡོ་ཡི་རྟར་ཆིབས་ནས།།ཕྱག་གི་མདུང་ཐུང་བྱིས་པའི་བློར་བསྣུན་ནས།།ངེས་པར་འཇོམས་ཚེ་བདག་ཀྱང་རྗེས་སུ་བཟུངས།།དམག་དཔུང་བྱེ་བ་ཁ་དོག་སྣ་ཚོགས་པ།།གླང་ཆེན་རིག་བྱེད་ཆང་དྲེགས་བཞི་འབུམ་དང༌།།གླང་ཆེན་ཉེས་པ་འབུམ་ཕྲག་བཞི་འབུམ་དང༌།།གསེར་གྱི་ཤིང་རྟ་མཚོན་ལྡན་དཔུང་བུ་ཆུང༌།།འཇིགས་རུང་དམག་ཚོགས་དབུས་སུ་རབ་ཞུགས་ནས།།རང་གིས་བྱིས་པའི་བློ་ལ་བསྣུན་མཛད་ཅིང༌།།རྟར་གནས་ཟླ་བ་ཆེན་པོའི་བུ་ལ་ནི།།ཧ་ནུ་མནྡྲ་རྣོན་པོའི་མཚོན་གྱིས་བསྣུན།།དྲག་པོ་ལ་སོགས་ལྷ་ཆེན་བཅུ་གཉིས་ཀྱིས།།ལྷ་མིན་ལ་སོགས་ཐམས་ཅད་ཚར་གཅོད་ཅིང༌།།གླང་པོ་ཆེ་ཡིས་གླང་པོ་རྣམ་པར་འཇོམས།།རྡོ་ཡི་རྟ་ཡིས་རྟ་རྣམས་གསོད་བྱེད་ཅིང༌།།གསེར་གྱི་ཤིང་རྟས་ཤིང་རྟ་ཕྱེ་མར་བྱེད།།ས་སྐྱོང་རྣམས་ཀྱིས་ས་སྐྱོང་འདུལ་བར་མཛད།།ཀླ་ཀློའི་རྒྱུན་ནི་རབ་ཏུ་བཅད་བྱས་ནས།།དང་པོའི་སངས་རྒྱས་ཀྱིས་མཚོན་ཆོས་ཚུལ་ཀུན།།རྒྱས་པར་མཛད་ཚེ་བདག་ཀྱང་རྗེས་སུ་བཟུང༌།།དེ་ལྟར་ལོ་ནི་མང་པོ་ཆོས་བསྟན་ནས།།རྟ་ཡི་ལོ་ནི་ཧོར་ཟླ་གཉིས་པ་ཡི།།ཉི་ཤུ་གཉིས་ཉིན་དཔའ་བོ་དཔའ་མོ་ཡིས།།རོལ་མོའི་སྒྲ་བཅས་འཁོར་ནི་འབུམ་ཕྲག་བཅས།།བདེ་དུས་ལམ་ལས་འོག་མིན་གནས་སུ་ནི།།ལོངས་སྤྱོད་རྫོགས་སྐུ་མངོན་དུ་མཛད་པའི་ཚེ།།བདག་ཀྱང་སངས་རྒྱས་གོ་འཕང་ཐོབ་པར་མཛོད།།ཅེས་དཔལ་དུས་ཀྱི་འཁོར་ལོའི་བླ་མའི་རྣལ་འབྱོར་སྟོང་གཟུགས་བདུད་རྩིའི་བུམ་བཟང་ཞེས་བྱ་བ་འདི་ཉིད་སྒྲུབ་པ་ལ་གཞོལ་བའི་ལབ་བླ་མ་ཡེ་ཤེས་བསྟན་རྒྱན་གྱིས་བསྐུལ་བ་ལྟར་དཔལ་དུས་ཀྱི་འཁོར་ལོའི་རྣལ་འབྱོར་སྤྱོད་པ་ཤཱཀྱའི་དགེ་སློང་བློ་བཟང་དཔལ་ལྡན་ཡེ་ཤེས་ཀྱིས་སྦྱར་བའི་ཡི་གེ་པ་ནི་དགེ་ཚུལ་བློ་བཟང་ཆོས་འཕེལ་ལོ།།

                                                               རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn