རྗེ་བླ་མའི་བསྟན་པ་དང་མཇལ་བའི་སྨོན་ལམ་བཞུགས་སོ། །
ཨོཾ་བདེ་ལེགས་སུ་གྱུར་ཅིག །ཕྱོགས་བཅུར་བཞུགས་པའི་རྒྱལ་བ་སྲས་བཅས་ཀྱིས། ། བདག་གིས་དུས་གསུམ་བསགས་པའི་དགེ་བ་རྣམས། །ཟླ་གྲོགས་དམ་པར་བཟུང་ནས་སྒྲུབ་པའི་ལམ། །བློ་བཟང་རྒྱལ་བའི་བསྟན་དང་མཇལ་བར་ཤོག ། རང་ཉིད་ཡལ་བོར་མར་གྱུར་འགྲོ་བ་ཀུན། ། སྡུག་བསྔལ་ཀུན་བྲལ་བདེ་ལ་འགོད་པའི་ཕྱིར ། །སེམས་བསྐྱེད་ཕྱིན་དྲུག་བསམ་སྦྱོར་ཚང་བའི་ལམ། །བློ་བཟང་རྒྱལ་བའི་བསྟན་དང་མཇལ་བར་ཤོག ། རྣམ་དག་སྡོམ་བསྟེན་མི་མཐུན་ཕྱོགས་ལས་བསྲུངས། །ཉམས་པ་ཕྱིར་བཅོས་ཚུལ་བཞིན་སྒྲུབ་པ་སོགས། །འདུལ་བའི་སྡེ་སྣོད་གདམས་པར་འཁྱེར་བའི་ལམ།།བློ་བཟང་རྒྱལ་བའི་བསྟན་དང་མཇལ་བར་ཤོག ། ཕུང་ཁམས་སྐྱེ་མཆེད་ཀུན་བྱང་ཡུལ་ཡུལ་ཅན། ། ཟག་བཅས་ཟག་མེད་བདེན་བཞིའི་གནད་ལ་མཁས། །སྙོམས་འཇུག་དག་བྱེད་ཤེས་བཅུ་རྫོགས་པའི་ལམ། །བློ་བཟང་རྒྱལ་བའི་བསྟན་དང་མཇལ་བར་ཤོག ། བརྒྱ་དང་དོན་གསུམ་སྦྱོར་བཞིའི་ཉམས་ལེན་གྱིས། །རྣམ་པ་ཀུན་མཁྱེན་གཞི་ལམ་སྦྱངས་བྱས་ཏེ། ། ཞི་ལྷག་མཐར་ཕྱིན་དོན་གཉིས་སྒྲུབ་པའི་ལམ། །བློ་བཟང་རྒྱལ་བའི་བསྟན་དང་མཇལ་བར་ཤོག ། རྟོག་ཀེའི་ཚིག་དོན་ཡང་དག་ལྟར་སྣང་གིས། ། གནས་གསུམ་དོན་ལ་འཁྲུལ་བ་ཀུན་བསལ་ཏེ། །བཤད་སྒྲུབ་གོམས་པ་རབ་ཀྱི་མཐར་ཕྱིན་ལམ།།བློ་བཟང་རྒྱལ་བའི་བསྟན་དང་མཇལ་བར་ཤོག ། རྒྱལ་ཀུན་སྐུ་གསུམ་གསང་བ་རྒྱན་གྱི་མཛོད ། །བདེ་སྟོང་མཆོག་གི་རོལ་བར་སྡོམ་པའི་གནད། །ཕྱི་ནང་གཞན་གསུམ་དག་པའི་འཁོར་ལོར་མཉམ། །བློ་བཟང་རྒྱལ་བའི་བསྟན་དང་མཇལ་བར་ཤོག ། ཕྱི་ནང་གསང་བའི་གཤིན་རྗེ་དྲུངས་ཕྱུང་སྟེ། ། སྐྱེ་ཤི་བར་དོ་རྒྱལ་བའི་སྐུ་གསུམ་དུ། །བསྒྱུར་བའི་སྒྱུ་ལུས་འོད་གསལ་ཟུང་འཇུག་ལམ། །བློ་བཟང་རྒྱལ་བའི་བསྟན་དང་མཇལ་བར་ཤོག། མདོར་ན་མདོ་སྔགས་ལུང་རྟོགས་མ་ལུས་པ ། །ཐུན་གཅིག་ལ་ཡང་གྲུ་བཞི་ལམ་འཁྱེར་ཤིང་ ། །འགྲན་ཟླ་ཀུན་བྲལ་བྱང་ཆེན་སྒྲུབ་པའི་ལམ ། ། བློ་བཟང་རྒྱལ་བའི་བསྟན་དང་མཇལ་བར་ཤོག། ཚེ་རབ་ཀུན་ཏུ་སྐྱབས་གསུམ་འདུས་པའི་དངོས། །ཐེག་མཆོག་བཤེས་ཀྱིས་དགྱེས་བཞིན་རྗེས་བཟུང་སྟེ ། །གསུང་གི་བདུད་རྩིས་བློ་བཟང་རྒྱལ་བའི་བསྟན། །འཛིན་སྐྱོང་སྤེལ་ལ་ཟླ་དང་བྲལ་བར་ཤོག། །། ཅེས་པ་འདི་ནི ། ལུང་དང་རིགས་པ་སྨྲ་བ་དཀའ་བཅུ་བསྟན་པ་རྒྱལ་མཚོས། །རྗེ་བླ་མ་རང་ལུགས་ལ་མཆོག་ཏུ་དད་པས་བསྐུལ་བའི་ངོར༧ རཏྣ་དྷྭ་ཛས་བྲིས་བའོ ། ། །།འདིས་ཀྱང་རྒྱལ་བའི་བསྟན་པ་ཡུན་རིང་དུ་གནས་བར་གྱུར་ཅིག། །། སརྦ་མངྒ་ལཾ །།
རྩོམ་སྒྲིག་པ།ཤེས་རབ་རལ་གྲི།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn