༄༅།།བདེ་ཆེན་ལྷུན་གྲུབ་ཆོས་སྐུའི་ནམ་མཁའ་ལས།།བྱམས་བརྩེའི་སྤྲིན་གྱིས་འཇིག་རྟེན་ཁྱབ་མཛད་ཅིང༌།།རྒྱུན་མི་ཆད་དུ་མཛོད་པའི་ཆར་འབེབས་པ།།མི་ཕམ་རྒྱལ་བའི་དབང་པོར་གུས་ཕྱག་འཚལ།།གྲངས་མེད་གདུལ་བྱའི་ཁམས་དང་བསམ་པ་ཀུན།།ཇི་བཞིན་གཟིགས་པའི་ཡེ་ཤེས་རྣམ་རོལ་ལས།།དད་པའི་དབང་གིས་ཆུ་ནང་ཟླ་གཟུགས་བཞིན།།གནས་འདིར་ཐོགས་པ་མེད་པར་གཤེགས་སུ་གསོལ།།རབ་མཛེས་གསེར་ཞུན་བརྩེགས་པའི་ལྷུན་པོ་ལ།།རྣམ་མང་རིན་ཆེན་ཚོགས་ཀྱི་ཕྲ་བཀོད་ལྟར།།ལྟ་བས་མི་ངོམས་སྐུ་གཟུགས་མཆོག་འདི་ལ།།སྲིད་མཐའི་བར་དུ་བརྟན་པར་བཞུགས་སུ་གསོལ།།ཡིད་འོང་བྱམས་པའི་སྐུ་གཟུགས་བཞེངས་པ་ལ།མཐུན་རྐྱེན་སྒྲུབ་པར་བྱེད་པའི་སྐྱེ་བོ་ཀུན།།མགོན་ཁྱོད་ཐུགས་རྗེའི་ཕྱག་གིས་ཉེར་བཟུང་ནས།།དགའ་ལྡན་གནས་སུ་ངེས་པར་དྲང་དུ་གསོལ།།ཁྱོད་ཞལ་མིག་གི་བདུད་རྩིར་མི་འབྲལ་ཞིང༌།།ཐེག་མཆོག་གསུང་གིས་རྟག་ཏུ་འཚེ་བ་དང༌།།རྒྱལ་སྲས་སྤྱོད་པའི་གནས་ཀུན་མཐར་ཕྱིན་ནས།།མྱུར་དུ་སངས་རྒྱས་ཐོབ་པར་བྱིན་གྱིས་རློབས།།གནས་སྐབས་སུ་ཡང་བསམས་པའི་དོན་ཀུན་གྲུབ།།མཐའ་དག་འགྲོ་འདི་བྱམས་པའི་སེམས་དང་ལྡན།།རྒྱལ་བའི་བསྟན་པ་ཕྱོགས་བཅུར་དར་ཞིང་རྒྱས།།འགྲོ་ཀུན་ཕན་བདེའི་དཔལ་ལ་སྤྱོད་པར་ཤོག།བསླབ་པ་གསུམ་ལྡན་ངུར་སྨིག་འཛིན་པ་ཡི།།འདུས་པའི་ཚོགས་ཀྱིས་གནས་འདིར་ཡོངས་གང་ཞིང༌།།རྟག་ཏུ་བཤད་སྒྲུབ་བྱ་བས་སྲིད་མཐའི་བར།།ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག།བསླུ་མེད་དཀོན་མཆོག་གསུམ་གྱི་བདེན་པ་དང༌།།མི་ཕམ་རྒྱལ་བའི་དབང་པོའི་བྱིན་རླབས་དང༌།།མཐུ་ལྡན་ཆོས་སྐྱོང་སྲུང་མའི་འཕྲིན་ལས་ཀྱིས།།རྣམ་དག་སྨོན་པའི་གནས་འདི་འགྲུབ་པར་ཤོག།།།ཅེས་པ་རྗེ་བཙུན་ཐམས་ཅད་མཁྱེན་པ་དགེ་འདུན་རྒྱ་མཚོའི་དཔལ་གྱི་ཆོས་འཁོར་རྒྱལ་གྱི་གཙུག་ལག་ཁང་དུ་ཉེ་བར་སྦྱར་བའོ།།།།

                                              རྩོམ་སྒྲིག་པ།  ཤེས་རབ་རལ་གྲི། 
གསལ་འདེབས། 
                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn