༄༅། །ན་མོ་གུ་རུ་ཨ་མི་དེ་ཝཱ་ཡ། །དཔལ་ལྡན་མཆོག་ཏུ་དགེ་བའི་ཞིང་གི་ཆར། །བདེ་ཆེན་མགོན་ཞེས་རྒྱལ་བ་ཀུན་གྱིས་བསྒྲགས། །ཚེ་དང་ཡེ་ཤེས་འོད་རྣམས་གཞལ་དཀའ་བ། །ལྷ་ཡི་ལྷ་མཆོག་ཚེ་དཔག་མེད་ལ་འདུད། །གངྒའི་ཀླུང་གི་བྱེ་སྙེད་མཐའ་ཡས་ཞིང༌། །དེ་ཉིད་ཆུ་ཡི་རྡུལ་གྱི་གྲངས་ཀྱི་ཡང༌། །ཚད་དུ་མི་སྤོབས་བསོད་ནམས་ཡེ་ཤེས་ཀྱིས། །ཕུང་པོ་རྫོགས་སྨིན་སྦྱངས་གསུམ་ཡོངས་སུ་དག །དེ་ཕྱིར་ཕྱོགས་བཅུའི་རྒྱལ་བ་ཐམས་ཅད་ཀྱིས། །ཚེ་མཐའ་ཡས་ཞེས་བསྔགས་ལ་བདག་གིས་ནི། །བསྟོད་པ་འདི་ཡི་ཅི་ཞིག་འདི་ལྟ་ཡང༌། །ཅུང་ཟད་བསྟོད་ཕྱིར་བདག་ལ་བསོད་ནམས་སྩོལ། །ཐ་མལ་རྣམ་རྟོག་ཀུན་དང་རི་བྲག་ཚོགས། །ལྷན་ཅིག་དག་པའི་མེ་ལོང་ཡེ་ཤེས་ཆ། །ཞིང་དུ་ཤར་བ་ཡོན་ཏན་དཔག་མེད་ཀྱི། །དོན་དང་འདི་ཡི་ཡོན་ཏན་འདི་ལྟར་བརྗོད། །ཀུན་རྟོག་སྣ་ཚོགས་དག་ཕྱིར་རབ་ཏུ་ཟླུམ། །ཁྲོ་བའི་སྐྱོན་ཀུན་ཟད་ཕྱིར་ས་གཞི་འཇམ། །ཏིང་འཛིན་ཕ་མཐར་ཕྱིན་ཕྱིར་རེག་ན་བདེ། །ཚུལ་ཁྲིམས་གཙང་མས་མེ་ཏོག་ཚོགས་ཀྱིས་བླུབས། །སྦྱིན་ལས་བྱུང་བའི་ཆུ་ཀླུང་དལ་གྱིས་འབབ། །བརྩོན་འགྲུས་བརྟན་པས་འདམ་སྐྱེས་དག་གིས་མཛེས། །ཤེས་རབ་མཐའ་རུ་སོན་པའི་བྱ་ཡི་ཚོགས། །སྟོང་ཉིད་སྟོན་པའི་མགྲིན་པའི་རྫ་རྔ་སྒྲོག །སྨོན་ལམ་ལས་བྱུང་དཔག་བསམ་ལྗོན་པའི་ཤིང༌། །བསྡུ་བཞི་ལས་བྱུང་དགོས་འདོད་ཅིར་ཡང་སྟེར། །ཐབས་ཀྱི་ཕ་རོལ་སོན་པའི་ཐི་གུ་ཡིས། །འབྲེལ་ལ་ཆོས་ཕུང་དྲིལ་བུ་གཡེར་ཁ་འཁྲོལ། །གནམ་སྔོན་ཞུ་བར་དོགས་པའི་ནོར་འཛིན་ཁྱོན། །ས་ཡི་ཟླ་བ་མིག་མང་རིས་བྲིས་པ། །ཀུན་གསལ་དབྱིངས་ནས་བལྟ་བའི་ལྷ་ཡི་བུའི། །གཟུགས་བརྙན་རིན་ཆེན་ཐིག་ལེའི་ཚོམ་བུ་བཞིན། །གཉིས་ཀྱིས་ལྷག་པའི་བཅུ་ཕྲག་དཔག་ཚད་འཕང༌། །ཀུན་ཏུ་མཚུངས་ཤིང་གཡས་དང་གཡོན་གྱི་ཆར། །རྒྱང་ཕྲག་བརྒྱད་དུ་བསགས་པ་གཅིག་ནས་ནི། །འབུམ་གྱི་བདག་ཉིད་ཉལ་འགྲོ་དལ་གྱིས་རྒོད། །ཀེ་ཀེ་བཻཌཱུར་གསེར་དང་ཨིནྜ་སྙིལ། །སྤུག་དང་རྡོ་ཡི་སྙིང་པོ་ལས་བྱས་པའི། །འཇུག་ངོགས་ཐེམ་སྐས་བཀྲ་བའི་ལྟད་མོ་འདི། །མཐོང་ཕྱིར་དབང་པོ་མིག་སྟོང་བགྲད་དམ་སྙམ། །བདེ་ཕྱིར་འཁྱིལ་བའི་ཀློང་ལ་རབ་རྩེ་བའི། །ངང་པ་ཀ་རན་ཙ་དང་ངུར་པ་སོགས། །དུད་འགྲོའི་སྐད་ལྟར་བཅོས་པས་ཏིང་འཛིན་གྱི། །སྒོ་བརྒྱ་འབྱེད་འདིའི་དཔེ་རུ་སུ་ཞིག་འོས། །དཔག་ཚད་དུ་མའི་ཁྱོན་ལས་བརྒལ་བ་ཡི། །ལྗོན་ཤིང་གསེར་གྱི་སིལ་སྙན་དཔྱངས་པ་ལ། །དྲི་བཞོན་རེག་བྱས་བསམ་གཏན་བཞི་པ་ཡི། །དགའ་བ་སྐྱེངས་བྱེད་དག་གིས་དཀྲོལ་བར་བྱེད། །རྫིང་ལས་རྫིང་གི་ཡོན་ཏན་མང་འབྱུང་དང༌། །དེ་ལས་དེ་ཉིད་སྟོན་པའི་ཐབས་མཁས་དང༌། །རོལ་ལས་རོལ་པ་ཀུན་གྱི་རྩེར་སོན་པ། །འདི་ལ་འདི་ཡིས་བསྒྲུན་ཞེས་སུ་ཞིག་འཆད། །འདབ་བརྒྱད་འདབ་མ་ལྔ་དང་འདབ་བརྒྱའི་བར། །ཉིན་བྱེད་གང་ལས་འོང་བའི་ཕྱོགས་དེ་ལས། །དུས་བཞིར་བཀྲམ་པས་ས་ཀུན་ཁྱབ་བྱེད་པ། །ཀུན་ཏུ་བཟང་པོའི་རྫུ་འཕྲུལ་དག་ལ་འགྲན། །བར་བར་ཆུ་སྐྱེས་འདབ་མ་མང་གྲོལ་བ། །ཁོང་ནས་འཛུམ་པའི་གེ་སར་རྒོད་པ་ནི། །རྒྱལ་སྲས་སར་གནས་དཔའ་བོ་བསྐྱེད་པ་ལ། །ཤེས་རབ་ཕ་རོལ་ཕྱིན་མའི་ངང་ཚུལ་འཛིན། །ཀུན་གསལ་ངོགས་ལ་རིན་ཆེན་ཆུ་འཛིན་ཚོགས། །བཀྲ་ལས་བདུད་རྩིའི་ཆུ་རྒྱུན་འབབ་པ་དང༌། །ཆོས་ཀྱི་འབྲུག་སྒྲ་ཟབ་མོ་རྒོད་པ་ཡང༌། །དེར་གནས་བྱང་སེམས་རྣམས་ཀྱི་དགེ་བའི་བཤེས། །ཞིང་འདིའི་རླུང་གིས་རེག་པ་ཙམ་གྱིས་ཀྱང༌། །མི་བདེའི་གོ་སྐབས་རིང་དུ་བསྐྲད་གྱུར་པ། །འདི་ཡི་ཡོན་ཏན་ཀུན་ལ་སྤྱོད་པ་ལ། །ཟག་མེད་བདེ་ཀུན་གཅིག་ཏུ་བསྡུས་པ་འདྲ། །དེ་ལྟར་དག་པའི་ཞིང་གི་སྣོད་བཅུད་ཀུན། །གཅིག་ཏུ་འཁྱིལ་བའི་ཡོན་ཏན་ཕུང་པོ་ཅན། །ཞིང་དེའི་མགོན་པོ་འོད་དང་ཚེ་མཐའ་ཡས། །རབ་ཏུ་འབད་པས་བདག་གིས་བསྟོད་པར་བྱ། ༈། རིན་ཆེན་རིན་ཐང་བྲལ་བའི་དཔག་བསམ་ཤིང༌། །རིན་ཆེན་ཁ་དོག་མི་འདྲ་སྣ་ཚོགས་ཅན། །རིན་ཆེན་ལོ་འདབ་དག་གིས་སྤུད་པ་ལ། །རིན་ཆེན་འབྲས་བུ་བཟང་པོས་ཡོངས་སུ་མཛེས། །དེ་ཡི་མདུན་ན་རབ་བཀྲའི་འདབ་མ་ཅན། །གཙུག་ཕུད་འཛིན་པ་བརྒྱད་ཀྱིས་ཉེར་བཏེག་པའི། །ནོར་བུའི་ཁྲི་མཆོག་འོད་ཟེར་འབར་བ་ནི། །པདྨོའི་གཉེན་གྱི་གཟི་བརྗིད་བྱེ་བ་འཕྲོག །ཐུན་མཚམས་མདངས་ལ་ཚལ་གྱིས་བྱུགས་པ་ཡི། །ཆུ་སྐྱེས་བརྒྱ་ཕྲག་འདབ་མའི་གྲངས་ལྡན་པ། །ཚ་ཟེར་ཅན་དང་བསིལ་ཟེར་བྱེད་པ་ཡི། །ལྕི་ཡང་རྙིད་པ་མེད་པའི་བཀའ་དྲིན་སྩལ། །དེ་ན་བཞུགས་པའི་སྟོན་པ་མཚུངས་མེད་དེ། །ཆོས་ཀྱི་སྐུ་ལ་སྣང་བ་མཐའ་ཡས་ཤིང༌། །ལོངས་སྤྱོད་རྫོགས་སྐུ་ཚེ་མཐའ་ཡས་པར་བསྒྲགས། །སྤྲུལ་པའི་སྐུ་ནི་འོད་དཔག་མེད་དུ་ངེས། །དེ་ཀུན་ངོ་བོའི་སྒོ་ནས་རོ་གཅིག་པར། །མཉམ་མེད་ཤཱཀྱའི་རྒྱལ་པོས་ཚེ་ཡི་མདོར། །ཇི་ལྟར་གསུངས་པ་དེ་བཞིན་ཚེ་དཔག་མེད། །བསྟོད་པར་གྱུར་ན་མཆོག་ཏུ་བསྔགས་པ་ལགས། །ཁྱོད་སྐུ་འོད་ཟེར་བྱེ་བ་བརྒྱ་ཕྲག་གིས། །གྲངས་མེད་ཞིང་མཆོག་མ་ལུས་འགེངས་མཛད་པ། །འོད་ཟེར་རེ་རེར་ཁྱོད་ཀྱི་སྤྲུལ་པ་རེས། །ཞིང་ཁམས་མ་ལུས་བདག་ཏུ་བཟུང་བ་ལགས། །མཐོན་མཐིང་ཁུག་པ་ལྔ་རུ་བཅིངས་པ་ཡི། །གསེར་གྱི་མཁྱུད་མོ་ནོར་བུའི་ཕྲ་ཅན་གྱི། །གཟི་བརྗིད་བཟོད་པའི་གོ་སྐབས་དང་བྲལ་བས། །ཞིང་འདིར་ཉི་མའི་བགྲོད་པ་ཀུན་ཏུ་སྤངས། །ནམ་མཁའི་མཐའ་འདི་གཞལ་བར་མི་ནུས་ཞེས། །སྨྲ་བའི་ལྕེ་དེ་གྱི་ནའི་ངང་ཚུལ་ཅན། །མིན་ན་མགོན་པོ་ཁྱོད་ཀྱི་གཙུག་ཏོར་མཐས། །ཀུན་འཁོར་ངལ་བར་བྱས་འདི་རྒྱུ་གང་ཞིག །མུ་ཁྱུད་རྩིབས་དང་བཅས་དང་གཅོད་བྱེད་དང༌། །རུས་སྦལ་དབྱིབས་ཅན་ཀུན་ཏུ་འབྲེལ་གྱུར་བ། །བསོད་ནམས་གྲངས་མེད་ཟོང་གིས་བསྒྲུབ་ཅེས་པ། །དྲང་དོན་ལས་བརྒལ་བདེན་པའི་ཚིག་གི་བདག །ལུང་བསྟན་སྦྱིན་པར་བྱ་བའི་སར་གནས་ཀྱི། །དཔའ་བོའི་མགོ་ལ་ཉུག་པར་མཛད་པ་དང༌། །གང་དུ་བྲིས་པའི་ས་ཀུན་བཀྲ་ཤིས་པ། །འདི་ཡི་རེག་བྱའི་དཔེ་ནི་ནམ་མཁའི་རྩ། །སྐུ་ཡི་མདུན་ཕྱོགས་མངོན་པར་མཐོ་བ་དང༌། །ཕྱག་སོར་རིང་བ་འོད་ཟེར་དྲ་བ་ཅན། །རྟིང་ཡངས་སྐུ་ཆེ་གང་བའི་དཀྱིལ་འཁོར་ནི། །རྒྱལ་བ་མ་ལུས་གཅིག་ཏུ་བསྡུས་པ་བཞིན། །ཞབས་ལ་སོགས་པའི་ལོང་བུའི་ཚིགས་འབུར་རྣམས། །མི་མངོན་སྦས་པའི་མངོན་རྟོགས་རིམ་པ་དང༌། །སྐུ་ཡི་བ་སྤུ་རེ་རེ་གྱེན་ཕྱོགས་སུ། །གནས་པས་མཐར་ལམ་ཅི་བདེར་སྟོན་པར་མཛད། །ཨེ་ན་ཡ་ལྟར་བགས་ཀྱིས་ཞོལ་བའི་བྱིན། གཉིས་འཐུང་སྣ་ཞགས་ལྟ་བུར་མཛེས་པའི་ཕྱག །མི་མངོན་སྦས་པའི་ཚུལ་གྱི་བརྟུལ་ཞུགས་ཅན། །འདི་དག་ཤེར་ཕྱིན་སླད་དུ་བསྟན་པ་ལགས། །གསེར་འོད་ལྟ་བུར་སྣང་ཡང་གསེར་གྱི་འོད།།ལྕགས་ཀྱི་ཁམས་དང་མཚུངས་བྱེད་མཚལ་ཞུན་ཅན།།སྣུམ་ཞིང་གཡས་སུ་འཁྱིལ་བའི་ཐིག་ལེ་བཀྲ། ལྷ་བརྒྱའི་གཙུག་རྒྱན་ཁེངས་པ་ཅིག་ཅར་འཕྲོག །ཁྱོད་ཁྲུའི་བདག་ཉིད་སྨིན་མཚམས་ཚོམ་བུ་དཀར། །བདུད་རྩིའི་ཆུ་རྒྱུན་མང་པོ་འཛག་པ་དང༌། །རོ་སྟོད་སེངྒེ་ལྟ་བུར་འགྱིངས་པའི་དཔལ། །བརྗོད་པར་མི་སྤོབས་ཐུབ་པའི་ཚིག་གིས་བརྗོད། །དཔུང་མགོ་ཟླུམ་ཞིང་ཐལ་གོང་རྒྱས་པ་དང༌། །བསྐ་བའི་རོ་ཡང་བདུད་རྩིའི་རོ་ལྟར་སྣང༌། །ནྱ་གྲོ་ཏ་ལྟར་ཆུ་ཞེང་གབ་པའི་སྐུ། །འོད་ཟེར་དབང་བསྐུར་ཐོབ་པའང་ཞུམ་པར་བྱེད། །སྟོང་གསུམ་བླ་རེར་བྲེས་པའི་ལྗགས་ཀྱི་ཁྱོན། །ཚངས་པ་གདོང་ལྔ་པ་ཡི་སྒྲ་དང་བཅས། །སེངྒེ་ལྟ་བུའི་འགྲམ་པ་གཟི་བརྗིད་ཅན། །བདུད་ཀྱི་དཀྱིལ་འཁོར་གཞོམ་སླད་བསྟན་པ་བཞིན།༈། རབ་དཀར་ཐགས་བཟང་འཛུམ་པའི་འོད་ཟེར་ཅན། །བཞི་བཅུའི་གྲངས་ལྡན་སྤྱན་ནི་ཨུཏྤལ་མདངས། །བ་མཆོག་འདྲ་བའི་རྫི་མའི་རྒྱན་གྱིས་སྤྲས། །ཁྱོད་ཀྱི་སྙིང་རྗེ་ཆེན་པོ་མཚོན་པ་བཞིན། །དེ་ཉིད་དཔེ་ཡི་མཚོན་བྱེད་བྱད་བརྒྱད་ཅུ། །གཉིས་ལྷག་སུམ་ཅུས་སྤྲས་པ་རེ་རེས་ཀྱང༌། །རླན་གཤེར་ཚ་རེག་སྟོབས་ལྡན་གྱིས་ཁྱབ་པའི། །བཅོ་བརྒྱད་གནས་སོགས་རུས་སྦལ་སྤུ་ཡིས་འཆིང༌། །ཁྱོད་སྐུའི་ཟེར་དང་བདུད་རྩི་ཕྱོགས་གཅིག་པ། །དེ་ཡི་ཐིགས་པ་རེ་ཙམ་འཐུང་པས་ཀྱང༌། །ཉི་མའི་བུ་ཡི་ལྡད་བྱེད་དབྱུག་པར་བཅས། །གཅོག་ཀྱང་རྣམ་པ་ཀུན་ཏུ་ཁྲོ་དང་བྲལ། །ངེས་པར་འཆི་དང་ནམ་འཆི་ངེས་མེད་པའི། །གསུང་དེའང་མགོན་ཁྱོད་བྱིན་རླབས་ཐོབ་དེ་ལ། །དྲང་བའི་དོན་དུ་ངེས་པར་འགྱུར་བ་སྟེ། །འཆི་བ་མེད་ཅེས་གསུངས་པ་བདེན་པའི་ཚིག །སྤྱན་རས་གཟིགས་དབང་མཐུ་ཆེན་ཐོབ་པ་དང༌། །སར་གནས་ཉན་རང་གྲངས་མེད་དགེ་འདུན་རྣམས། །ཉེ་བའི་སྲས་བརྒྱད་བཅས་པར་བསྟོད་ལགས་ཀྱིས། །བསྟོད་པའི་འབྲས་བུ་ངེས་པར་བདག་གིར་སྩོལ། །ཁྱོད་ཀྱི་ཡོན་ཏན་ཚད་འདི་ཕྱོགས་བཅུ་ཡི། །རྒྱལ་བ་ཀུན་གྱིས་བརྗོད་ཀྱང་ཟད་མིན་པ། །དེས་ན་བདག་གིས་བརྗོད་པས་ཆ་ཤས་ཀྱང༌། །དཔོག་པར་མིན་ན་དེ་ཙམ་ཞིག་ཏུ་བས། །དེ་སླད་མགོན་ཁྱོད་ཐུགས་རྗེས་ཉེར་དགོངས་ལ། །ཉམ་ཆུང་བདག་དང་འདྲ་བའི་འགྲོ་བ་ཀུན། །རབ་ཏུ་སྐྱབས་ཏེ་ཇི་ལྟར་སྨོན་པའི་དོན། །བདེ་བླག་ཉིད་དུ་འགྲུབ་པར་བྱིན་གྱིས་རློབས།༈།དེ་བཞིན་གཤེགས་པ་ཐམས་ཅད་ཀྱི་ངོ་བོ།དཀྱིལ་འཁོར་རྒྱ་མཚོ་སྤྲོ་བ་དང་བསྡུ་བའི་གཞི་གཅིག་པུ།ཐུབ་དབང་རྡོ་རྗེ་འཆང་བློ་བཟང་ཚེ་དཔག་མེད། ཤིན་ཏུ་རྣམ་པར་དེས་པ་གཟི་བརྗིད་ཀྱི་རྒྱལ་པོའི་ལྷ་ཚོགས་འཁོར་དང་བཅས་པ་བདག་ལ་དགོངས་སུ་གསོལ། རྡོ་རྗེ་འཆང་ཆེན་པོ་རྗེ་བཙུན་བློ་བཟང་དཔལ་ལྡན་ཡེ་ཤེས་དཔལ་བཟང་པོའི་ཐུགས་བསྐྱེད་བྱིན་རླབས་དེ་དང་དེ་བཞིན་དུ་སོ་སོར་ཐར་པའི་ཚུལ་ཁྲིམས་ཀྱི་ཕུང་པོ་ཡོངས་སུ་དག་པར་བྱས་པ་དང༌།ཏིང་ངེ་འཛིན་ལ་རྣམ་པར་བསླབ་པ་དང༌།ཤེས་རབ་ལ་འབད་པ་བཏོན་པའི་དགེ་བའི་རྩ་བ་དང༌། བདེན་པའི་མཐུ་ལ་བརྟེན་ནས་བསྟོད་པའི་རྒྱལ་པོ་འདི་གང་གིས་འདོན་པར་བྱེད་པའི་གང་ཟག་དེ་རྣམས་ཀྱི་འདོད་ཆགས་ཀྱི་ཆུ་བོ་རབ་ཏུ་བསྐེམ་པར་གྱུར་ཅིག །ཞེ་སྡང་གི་མེ་རབ་ཏུ་ཞི་བར་གྱུར་ཅིག །གཏི་མུག་གི་མུན་པ་ཀུན་ཏུ་སངས་བར་གྱུར་ཅིག །རྩ་བ་དང་ཉེ་བའི་ཉོན་མོངས་པ་ཐམས་ཅད་རྒྱུན་ཆད་པར་གྱུར་ཅིག །ལས་ཀྱི་ཆུ་བོ་མི་འབབ་པར་གྱུར་ཅིག །སྡུག་བསྔལ་གྱི་རྒྱ་མཚོ་མི་འཁྱིལ་བར་གྱུར་ཅིག །སྲིད་པ་ཐམས་ཅད་ཡོངས་སུ་ཟད་པར་གྱུར་ཅིགསྲིད་པ་ཕྱིས་མི་འབྱུང་བར་གྱུར་ཅིག །སྐྱེ་རྒ་ན་འཆིའི་རྒྱུན་ཆད་པར་གྱུར་ཅིག །ས་བཅུ་དང་ལམ་ལྔའི་རྟོགས་པ་ཐམས་ཅད་རིང་པོར་མི་ཐོགས་པར་མངོན་དུ་བྱེད་པར་གྱུར་ཅིག །རིམ་པ་གཉིས་ཀྱི་རྟོགས་པ་ཚེ་འདི་ཉིད་ལ་མངོན་དུ་བྱེད་པར་གྱུར་ཅིག །དཔལ་ལྡན་བླ་མ་དམ་པ་རྣམས་ཀྱིས་དགྱེས་བཞིན་རྗེས་སུ་འཛིན་པར་གྱུར་ཅིག།མི་མཉེས་པ་སྐད་ཅིག་ཀྱང་མི་སྒྲུབ་པར་གྱུར་ཅིག།གཞན་ཡང་བསྟོད་པའི་རྒྱལ་པོ་འདི། འདོན་པར་བྱེད་པའི་གང་ཟག་དེའི་ལུས་ལ། །རླུང་མཁྲིས་བད་ཀན་གྱི་ནད་མི་འབྱུང་བར་གྱུར་ཅིག །ལྷ་དང་ཀླུ་དང་གནོད་སྦྱིན་དང་སྲིན་པོ་ལ་སོགས་པའི་གདོན་རྣམས་ཀྱིས་གླགས་མི་སྙེད་པར་གྱུར་ཅིག །སོ་སོར་ཐར་པའི་ཚུལ་ཁྲིམས་དང་ལྡན་པའི་སྐྱེ་བོ་རྣམས་ཀྱི་ཚུལ་ཁྲིམས་ཀྱི་ཕུང་པོ་ཡོངས་སུ་དག་པར་གྱུར་ཅིག །རྒྱལ་པོ་དང་བློན་པོ་དང་དམག་མི་དང་བྲམ་ཟེ་ལ་སོགས་པ་རྣམས་ཀྱང་བདེ་བ་དང་ལྡན་པར་གྱུར་ཅིག །བསྟོད་པ་འདི་གང་དུ་འདོན་པར་བྱ་བའི་ཡུལ་ཕྱོགས་དེར་དུད་འགྲོ་རྣམས་ཀྱང་བདེ་བ་དང་ལྡན་པར་གྱུར་ཅིག །ཡུལ་ཕྱོགས་རྣམས་ལོ་ལེགས་ཤིང་སྐྱེ་བོ་རྣམས་རྟག་ཏུ་སྐྱིད་པར་གྱུར་ཅིག།བསྟོད་པ་འདི་གང་གིས་འདོན་པར་བྱེད་པའི་སྐྱེ་བོ་དེས། བཅོམ་ལྡན་འདས་མགོན་པོ་ཚེ་དཔག་མེད་མཐོང་བར་གྱུར་ཅིག །མཐོང་ནས་ཀྱང་དབུགས་དབྱུང་བ་སྩལ་ཏེ་བདེ་བ་ཅན་གྱི་ཞིང་དུ་འཁྲིད་པར་གྱུར་ཅིག །གཞན་ཡང་ཚེ་མདོ་ལས་གསུངས་པའི་ཕན་ཡོན་ཐམས་ཅད་ཐོབ་པར་གྱུར་ཅིག །གནས་སྐབས་སུ་བསམ་དོན་ཐམས་ཅད་འགྲུབ་པར་གྱུར་ཅིག །འདི་སྐྱབས་མགོན་བློ་བཟང་དཔལ་ལྡན་ཡེ་ཤེས་ཀྱིས་མཛད་པའོ། །། །

གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
རྩོམ་ཁུངས། རྩོམ་འདིའི་སྦྲེལ་ཐགhttp://www.tb1025.cn