འཕོ་བ་བསྡུས་པ།
༄༅།། སངས་རྒྱས་སྤྱི་དང་ཁྱད་པར་འོད་དཔག་མེད། ། བདེན་པའི་མཐུ་ལས་འདི་ནས་འཕོས་མ་ཐག ། བདེ་བ་ཅན་དུ་པདྨོ་ལས་སྐྱེས་ཏེ། ། འོད་དཔག་མེད་པའི་ཞལ་མཐོང་གསུང་ཐོས་ཤོག ། ཅེས་བ་འདི་ནི་བ་མཐའ་སྐུ་སྐྱེ་བློ་བཟང་དཔལ་ལྡན་འོད་ཟེར་གྱིས་འདི་ལྟ་བུ་ཞིག་དགོས་ཞེས་བསྐུལ་བ་ལྟར་༧ ཤཱཀྱཱའི་དགེ་སློང་བློ་བཟང་དཔལ་ལྡན་ཡེ་ཤེས་ཀྱིས་སྦྱར་བའོ། །
ཨོཾ་སྭ་སྟི ། འདིར་འཕོ་བ་བསྡུས་པ་ཉམས་སུ་ལེན་པར་འདོད་པས། ། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམས་པ་སྔོན་དུ་བཏང་ནས་འདི་ལྟར་འདོན་ཏེ། རང་གི་སྤྱི་བོར་པདྨ་ཟླ་བ་དང་། ཉི་མའི་སྟེང་དུ་མགོན་པོ་འོད་དཔག་མེད། ། སྐུ་མདོག་དམར་པོ་མཚལ་ཞུན་བཏུལ་མ་བཞིན། ཞལ་གཅིག་ཕྱག་གཉིས་ཏིང་འཛིན་ཕྱག་རྒྱ་ཅན། ། དྲང་སྲོང་སྣོད་མཆོག་ཆོས་གོས་གསུམ་གྱིས་མཛེས། ། འོད་ཟེར་མུ་མེད་འཕྲོ་བའི་ཐུགས་ཀ་ནས། ། འོད་འཕྲོས་བདེ་བ་ཅན་གྱི་ཞིང་མཆོག་ནས། ། ཡེ་ཤེས་ཡི་་སྤྱན་དྲངས་དབྱེར་མེད་རོ་གཅིག་གྱུར། ། ཕྱག་འཚལ་མཆོད་འབུལ་སྡིག་ལྟུང་མ་ལུས་བཤགས། ། དགེ་ལ་སྤྱན་དྲངས་དབྱེར་མེད་རོ་གཅིག་གྱུར། ། ཕྱག་འཚལ་མཆོད་འབུལ་སྡིག་ལྟུང་མ་ལུས་བཤགས། ། དགེ་ལ་ཡི་རང་ཆོས་འཁོར་བསྐོར་དུ་གསོལ ། །མྱ་ངན་མི་འདའ་རྟག་པར་བཞུགས་གསོལ་འདེབས། །དགེ་བ་རྫོགས་བའི་བྱང་ཆུབ་ཆེན་པོར་བསྔོ ། །གླིང་བཞིའི་རི་རབ་རིན་ཆེན་བདུན་བཅས་པའི། ། ཞིང་ཁམས་རྒྱ་མཚོའི་བཀོད་པ་འདི་འབུལ་ན། ། དགྱེས་བཞིན་བཞེས་ལ་བདག་དང་འགྲོ་བ་ཀུན། ། ཞིང་མཆོག་བདེ་བ་ཅན་དུ་དྲང་དུ་གསོལ ། ། ཞེས་གསོལ་བ་བཏབ་སྟེ། རང་གི་ལས་ཀྱི་དབུས་དྲང་བོ་ལ་རྩ་དབུ་མ་སྤོམ་ཕྲ་མདའ་སྙུག་ཙམ་ཡར་སྣེ་སྤྱི་གཅུག་ཏུ་འོད་དཔག་མེད་ཀྱི་པདྨ་ལ་ཟུག་ཅིང་། མར་སྣེ་ལྟེ་འོག་སོར་བཞིར་གནས་བའི་སྙིང་དབུས་སུ་རང་གི་རྣམ་ཤེས་ཀྱི་ངོ་བོ་ཐིག་ལེ་རྒྱ་སྲིན་གྱི་འབྲུ་ཚད་ཙམ་འཕར་ལ་ཁད་འཕུར་ལ་ཁད་བྱེད་པ་གཅིག་གསལ་བཏབ་ལ། དེ་ཉིད་སྤྱི་བོ་ནས་ཞུགས་པས་མགོན་པོ་འོད་དཔག་མེད་ཀྱི་ཐུགས་ཀར་འཕོ་སྙམ་པའི་འདུན་པ་དང་བཅས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ལ་ཕྱག་འཚལ་ལོ། མཆོད་དོ་སྐྱབས་སུ་མཆིའོ ། ། བདག་འཇིག་རྟེན་གྱི་ཁམས་བདེ་བ་ཅན་དུ་ད་ལྟ་ཉིད་དུ་དྲང་དུ་གསོལ། ཞེས་བརྒྱ་སྟོང་ཁྲི་འབུམ་སོགས་བརྗོད་པས། མགོན་པོ་འོད་དཔག་མེད་ཀྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་བྱུང་སྤྱི་བོ་ནས་ཞུགས། སྙིང་ཁའི་ཐིག་ལེ་ལ་བཏབ་ཤད་ཀྱིས་དྲངས་ཏེ་སྤྱི་བོའི་པདྨ་ལ་རེག་ཙམ་བྱས་པར་བསྒོམས་ལ། ཧིཀྲ ། ཅེས་བརྗོད། སླར་ཡང་། ཀ་ཞེས་བརྗོད་ཅིང་སྙིང་ཁར་དལ་གྱིས་འབེབས ། དེ་ལྟར་སྦྱངས་བས་སྤྱི་བོ་ཟ་བ་དང་འཁྲིག་པ་སོགས་བྱུང་ན་སྤྱི་བོའི་མཆོག་པོ་འོད་དཔག་མེད་ཀྱི་ལྷུང་བཟེད་ནས་འཆི་མེད་བདུད་རྩིའི་རྒྱུན་བབས། ལུས་ཀྱི་ནང་ཐམས་ཅད་གང་། འཆི་མེད་ཚེའི་རིག་འཛིན་ཐོབ་པར་བསམས་ལ་ཚེ་གཟུངས་རིང་ཐུང་རྣམས་བཟླ ། དེ་ནས་གསོལ་བ་འདི་ལྟར་འདེབས་ཏེ། བླ་མ་དེ་བཞིན་གཤེགས་པ་བཅོམ་ལྡན་འདས། འོད་དཔག་མེད་མགོན་ཐུགས་རྗེའི་གཏེར་ཆེན་ཁྱེད། ། བདག་ལ་ཐུགས་རྗེ་ཆེན་པོས་ཉེར་དགོངས་ནས། ། བྱིན་རླབས་དངོས་གྲུབ་ཆར་ཆེན་དབབ་ཏུ་གསོལ། ། ཁྱད་པར་འདི་སྣང་འགག་པར་གྱུར་བའི་ཚེ ། ། འོད་དཔག་མེད་མགོན་དགེ་འདུན་བཅས་པ་ཡིས། ། ངོ་མཚར་བཀོད་པ་སྣ་ཚོགས་ཀྱིས་བསུས་ཏེ།། བདེ་བ་ཅན་གྱི་ཞིང་དུ་ཐོགས་མེད་དྲོངས། ། དེར་ནི་རིན་ཆེན་པདྨ་ལས་སྐྱེས་ནས། ། འོད་དཔག་མེད་པའི་སྲས་ཀྱི་མཆོག་གྱུར་ཅིང་། ། གཟུངས་སྤོབས་ཏིང་འཛིན་མངོན་ཤེས་རབ་ཐོབ་སྟེ། །མཐའ་ཡས་འགྲོ་བ་ཡོངས་སུ་སྒྲོལ་པར་ཤོག། སེམས་ཅན་ཁམས་དང་བསམ་པའི་མོས་པ་བཞིན། ། ཞིང་ཁམས་བྱེ་བར་སྤྲུལ་བ་རབ་བསྐྱེད་ནས། ། ཐེག་ཆེན་ཆོས་ཀྱི་སྒྲ་དབྱངས་བསྒྲགས་པ་ཡིས། ། སེམས་ཅན་མ་ལུས་རབ་ཏུ་སྒྲོལ་བར་ཤོག། དེ་ལྟར་གསོལ་བ་བཏབ་པས་བླ་མ་ལྷ། ། དགྱེས་བཞིན་རྟག་ཏུ་སྤྱི་བོར་བཞུགས་ནས་ཀྱང་། ། བདེ་བ་ཅན་གྱི་ཞིང་དུ་དྲང་དུ་གསོལ། ། ཁྱེད་ཀྱི་གོ་འཕང་ཐོབ་པར་མཛད་དུ་གསོལ། །ཞེས་གསོལ་བ་བཏབ་ཅིང་དུས་རྟག་ཏུ་སྤྱི་བོར་བཞུགས་པར་བསྒོམས་ཤིང་འཆི་བའི་དུས་སུ་ཐེ་ཚོམ་མེད་པར་འཕོ་བར་བྱའོ ། ཞེས་བ་འདི་ནི་ས་ཉིད་པ་གྲགས་པ་བཤད་སྒྲུབ་ཀྱིས་འདི་ལྟ་བུ་ཞིག་དགོས་ཞེས་བསྐུལ་ངོར ༧ ཤཱཀྱཱའི་དགེ་སློང་བློ་བཟང་དཔལ་ལྡན་ཡེ་ཤེས་ཀྱིས་སྦྱར་བའོ། །
