མང་ཐོས་སྤོས་དཀར་ལ་ཟོས་བློ་གྲོས་ཀྱི། །

གཉིས་འཐུང་སྒྲེགས་པའི་ལེགས་བཤད་བསུང་ཞིམ་པོས། །

སྐལ་བཟང་བུང་བ་ཡོངས་འདུའི་གོ་འབྱེད་མཁན། །

ཉམས་རྟོགས་རིན་ཆེན་དྲ་བས་སྤུད་དེའི་དྲུང་། །

མ་བརྟགས་ཉམས་དགའ་འདི་སྣང་སྨིག་རྒྱུའི་རླབས། །

སྙེགས་ཀྱིན་སྟོང་པས་རང་སེམས་རི་སྐྱེས་བུ། །

མངོན་སུམ་བསླུ་ཡང་ད་དུང་སྙིང་པོའི་ཆབ། །

ཡིད་ལ་བཅགས་པའི་བསམ་བརླག་དེའི་ཞུ་མཆིད། །

རྣམ་དཔྱོད་འཕེལ་པ་རྫོགས་པའི་ཟླ་གཞོན་ཉིད། །

གློ་བུར་ཉེ་ཞོའི་མུན་ལས་རྣམ་རྒྱལ་ངོས། །

གསུང་སྐྱེས་བདུད་རྩིའི་དོ་ཤལ་འགོག་མེད་དུ། །

སྤྲོས་པ་རབ་དགའི་རླབས་ཕྲེང་འཕེལ་བའི་གསོས། །

སྤངས་རྟོགས་དྲི་བསུང་འཐུལ་བའི་ཙནྡན་ནགས། །

འཁྲིལ་བའི་གཟི་བརྗིད་མཛེས་ལྡན་ལོ་འབྲས་ཀྱིས། །

ཀུན་ཡིད་འཕྲོག་པའི་ང་རོ་སྙན་པའི་སྒྲས། །

ཐོས་འཛིན་བདུད་རྩིའི་ཁང་པར་ཆེད་དུ་སྒྲུབས། །

ཡང་དག་རིགས་པའི་རྒྱུད་ཀྱི་ཟབ་གནད་གཞུ། །

འཁྱོག་པོར་བཀུག་པའི་ཐལ་ངག་ཉག་ཕྲན་གྱིས། །

མཁས་རློམ་སྙིང་ལ་བརྣག་པར་དཀའ་བའི་ཟུག །

སྦྱིན་མཁས་སྔོན་མེད་དགའ་བྱེད་གཉིས་པར་འཁུམས། །

མཁས་རྣམས་སོམ་ཉིའི་སྒྲོག་གིས་དམ་བཅིངས་པའི། །

དཀའ་གནས་ལྷུག་པར་བཀྲོལ་བའི་ལེགས་བཤད་ཀྱི། །

སྐྱེས་བཟང་བསྟར་བ་མཐོང་ཚེ་དུས་མཐར་ཡང་། །

ཐུབ་བསྟན་མགོན་དང་བཅས་སྙམ་གློ་བ་དགའ། །

ཨེ་མ་ཆེར་སྙིགས་དུས་དང་མི་འཚམས་པའི། །

ངོ་མཚར་བསམ་མི་ཁྱབ་པའི་ཡོན་ཏན་གཟུགས། །

ཁྱོད་བློའི་མེ་ལོང་ཉིད་ལ་མངོན་སུམ་པ། །

འདི་ལས་ཀུན་མཁྱེན་གཞན་པ་བཙལ་དུ་མེད། །

འདི་ན་སྣང་ཤས་གདོན་གྱིས་ཡིད་བརླམས་པས། །

ཅི་བྱས་སྨྱོན་པའི་གར་ལ་ཟློས་བཞིན་དུ། །

ཁ་བཤད་གླུ་དབྱངས་འཁྲོལ་བས་གཞན་གྱི་བློ། །

འབྲིད་པར་རྩོམ་པ་སྙིང་རྗེའི་ཡུལ་མིན་ནམ། །

ཕྱི་ཚུལ་དམ་པའི་ཀུན་སྤྱོད་ལྟར་བཅོས་ནས། །

ཕ་རོལ་འབྲིད་པའི་ཐབས་ཚུལ་ལྷུར་བླངས་ཀྱང་། །

ཐོག་མེད་དུས་ནས་གོམས་པའི་ཚུར་མཐོང་གི །

ལྷན་གཅིག་སྐྱེས་པའི་རང་བཞིན་བསྒྱུར་མ་ནུས། །

སྔོན་བྱས་འབྱུང་བའི་ཁམས་ལས་བརྒྱ་བྱིན་གྱི། །

ཚོན་ལ་འཁུ་བའི་བདེ་འབྱོར་ཡུད་ཙམ་པ། །

གློ་བུར་འཇིག་པའི་ངང་ཚུལ་དེ་མཐོང་ན། །

ཡིད་སྐྱོའི་གྲོགས་སུ་འགྱུར་ཡང་ཐབས་ཀྱིས་དབུལ། །

ཁྱད་པར་སྙིགས་དུས་མཚན་མོའི་སྨག་རུམ་དུ། །

འགལ་རྐྱེན་འཐོང་རླུང་འཚུབ་པས་ཡིད་སྐྱོ་ཡང་། །

མཆོག་གསུམ་བྱིན་རླབས་ཤེལ་གྱི་སྒྲོམ་བུ་རུ། །

ཚུད་པའི་སྲོག་གི་སྒྲོན་མེ་མ་མནལ་ཙམ། །

            མཚམས་ཞུ།

ཀ་ཡེ་རིང་ནས་བཅིངས་པའི་མཛའ་བའི་སེམས། །

མི་ཕྱེད་བརྟན་པའི་ཕྱི་ཐག་རིང་བ་ཁྱོད། །

གནས་ཀྱིས་བསྐལ་ཡང་མི་བརྗེད་དྲན་པའི་མཐུ། །

ལྷག་པར་བརྟས་པའི་རང་ཉམས་མདོངས་གསོལ་བ། །

ཟག་མེད་ཡོན་ཏན་འབྱོར་པའི་རྒྱལ་ཐབས་ཆེར། །

མི་ཟད་རྒྱན་གྱི་འཁོར་ལོས་དབང་བསྒྱུར་ནས། །

ལུས་ཅན་ཀུན་ལ་དབང་ཕྱུག་དམ་པའི་ལམ། །

མཚོན་པའི་མིག་གྱུར་གང་དེའི་དགྱེས་འཛུམ་ཞལ། །

བསྐལ་པར་བསྒྲུབས་པའི་ཚོགས་ཀྱིས་མངོན་སུམ་དུ། །

མཐོང་བའི་སྐལ་བ་སྔོན་ཆད་མི་དམན་ཡང་། །

འཕྲལ་སྣང་ཡུན་རིང་བསྐལ་པའི་ལྟར་སྣང་རྐྱེན། །

སྙིང་ལ་ལྕི་བའི་གུས་ལྡན་རྗེས་བརྩེའི་ཡུལ། །

དེ་སླད་ཞབས་སྐྱེས་མཚན་བཟང་འཁོར་ལོའི་རིས། །

མངོན་པར་བཀྲ་བ་སྐྱེ་རྒུའི་ཅོད་པན་དང་། །

འགྲོགས་པའི་རྩེ་དགའ་ཉམས་མེད་བྱིན་ཆགས་པར། །

སྤྱི་བོས་རེག་པའི་སྐལ་བཟང་དེང་འདིར་སྩོལ། །

སྡུག་བསྔལ་རླབས་ཕྲེང་གཡོ་བ་དུས་མཐའི་མཚོར། །

དལ་འབྱོར་གྲུ་གཟིངས་གློ་བུར་བྱིང་བའི་ཚེ། །

ལས་སྣང་རྐྱེན་གྱིས་མི་བརྫི་ཐར་བའི་སྲོག །

སྦྱིན་པའི་སྐྱབས་ཀྱི་འཇུག་པའང་གསོལ་བར་འཚལ། །

ཡིད་ཅན་ཀུན་གྱི་བླ་ན་ལྷན་ཅིག་ཏུ། །

སྐྱེས་པ་དཀར་ནག་ལས་ཀྱི་རྗེས་འབྲང་ནས། །

གཏན་གྱི་ལོངས་སྤྱོད་གང་ཡིན་མ་འཚལ་ཡང་། །

ད་དུང་བསམ་གཞིག་མེད་པ་བདག་ལ་གཟིགས། །

ཟག་བཅས་ཕུང་པོའི་སྙེ་མ་མཛེས་ལྷམ་མེར། །

སྦྱངས་པའི་སྙིང་པོར་རིགས་མཐུན་ཤས་ཙམ་ཞིག །

མངོན་སུམ་འདྲེན་པའང་ཕྱི་རོལ་ཀདྐུ་མའི། །

གཟི་འོད་ལྷམ་མེར་འཚེར་བ་ནོངས་མ་གྲང་། །

གང་ཤར་རིག་པའི་རྣམ་འཕྲུལ་ཉག་གཅིག་ཏུ། །

གྲུབ་པའི་བསོད་ནམས་ཤུགས་ལ་མ་ངེས་མོད། །

དོན་གྱི་གནས་ཚུལ་ཁོ་ནར་མི་བསླུ་བའི། །

དཔྱད་པའི་དག་པ་སྐྱེས་ཀྱི་ཕུལ་དུ་སེམས། །

ལེགས་བཤད་གཏམ་གྱིས་དབུལ་བའི་མཆུ་སྒྲོས་འདི། །

དོན་མེད་གཡོ་འགུལ་བགྱིད་པ་ངོ་ཚ་ཡང་། །

ཁྱོད་གསུང་དབྱུག་གུས་བསྐུལ་བས་དབང་མེད་དུ། །

མུ་ཅོར་དབྱངས་སུ་བསྒྲགས་པ་ཁྲེལ་ཅི་འཚལ། །

དེ་སྐད་བློ་མིག་ཡུལ་ལ་མི་གསལ་བས། །

སྙན་ཚིག་རྒྱན་གྱི་ཉམས་ལ་བཏང་སྙོམས་ཀྱང་། །

མི་ཕྱེད་མཛའ་བའི་རང་བཞིན་འདི་ལྟ་ཞེས། །

སྟོན་སླད་དར་དཀར་སྐྱེས་ལ་རྒྱ་འབྱར་བཅས། །

ཞེས་ཟླ་ཚེས་ལ་སྒྲུབ་པའི་དགའ་ཚལ་ཆེན་པོ་རྣམ་གྲོལ་གླིང་ནས་ཕུལ།

     ༼ གློག་རྡུལ་ཡི་གེ་གནང་ནས་མཚམས་སྦྱོང་མཁན། དྷཱིཿ  ཚ། རྨོག་རུ་སངས་རྒྱས་རྒྱ་མཚོ། ༽

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn