༄༅། །མཁྱེན་རབ་མན་ཤེལ་བཟང་པོའི་གྲྭ་རེར་ཡང་།།

ལུང་དང་རིགས་པའི་རྫུ་འཕྲུལ་ཕོ་ཉ་བས།།

ཇི་སྙེད་ཤེས་བྱ་འགུགས་པའི་རིག་སྔགས་མཁན།།

སྨྲ་བའི་ཟླ་བ་དེ་ཡི་མདུན་ས་ལ།།

རིག་བྱེད་རྔ་ཡབ་བསིལ་བའི་བདུད་རྩི་ནི།།

འགྲེམ་ལ་རིག་པ་འབྱུང་བའི་ཞིང་ཁམས་ན། །

ཟླ་བོས་མ་བཟུང་ཚངས་པའི་རལ་བ་ཡང་། །

རྐང་སེན་གདན་དུ་ལེན་པས་ཚུལ་འདི་གླེང་། །

མཐོ་རིས་འབྱུང་བོ་འཛིན་པའི་ཡོན་ཏན་ལས། །

ལན་བརྒྱར་འགོངས་པའི་འཇིག་རྟེན་འཛམ་བུའི་གླིང་། །

ཁོར་ཡུག་དཀྱིལ་འཁོར་ཡངས་པའི་ཐིག་ལེ་གང་། །

ལྷོ་རྒྱུད་ས་ལ་འོག་མིན་ལས་ཀྱང་བཀྲ། །

སྲིད་ཞིར་དགེ་བ་བཀྲ་ཤིས་རི་མོའི་ལམ། །

གཡས་འཁྱིལ་མེ་ཏོག་སྡུག་གུའི་འཇའ་ཚོན་ནི། །

གང་ལ་བརྟེན་པ་ནོར་འཛིན་དཔལ་མོ་ཡང་། །

སྐལ་བ་བཟང་བའི་ཡ་མཚན་ཟད་མི་ཤེས། །

རྣམ་བདུན་རིན་ཆེན་བ་གམ་མངོན་མཐོ་བའི། །

གསེར་གྱི་ཁང་བཟང་འབར་བའི་ཕྲེང་བ་ཡིས། །

ལྟ་ན་སྡུག་པའི་གྲོང་ཡང་ངམ་གྲོག་ཏུ། །

བཏང་བས་སྐབས་གསུམ་བུ་ཡང་ཕྱོགས་དེར་འཁོན། །

བྱིན་རྟེན་ནོར་བུའི་བང་བ་རྒྱ་ཕྱེ་ནས། །

མ་ག་ངྷ་ཡི་ཚལ་ཡངས་ཡི་དྭགས་ཀྱི། །

འཇིག་རྟེན་ཉིད་དུ་བགྱིད་ན་ཕྱོགས་གཞན་དུ། །

དག་པའི་ཞིང་ཁམས་དེ་ཡང་བཙལ་བྱ་མིན། །

ཕྱོགས་བཅུའི་རྒྱལ་བའི་ཡོན་ཏན་མ་ལུས་པ། །

བ་སྤུའི་ཆ་ཤས་རེར་ཡང་ཡོངས་རྫོགས་པས། །

གྲགས་པའི་འོད་དཔུང་ས་གསུམ་འཁོར་ཡུག་ལས། །

རྣམ་པར་རྒྱལ་བ་ཧ་ས་བཛྲ་ཉིད། །

བྱེད་པོ་དེ་ཡི་ཀུན་རྟོག་པིར་གྱིས་ནི། །

མཐའ་དག་བཤད་སྒྲུབ་ས་ལ་གཟུགས་རིས་སུ། །

བགྱིས་པ་དུས་གསུམ་ཕྱོགས་ཀྱི་སྐལ་བཟང་མའི། །

ཡིད་དབང་འགུགས་པའི་ཕོ་ཉ་གཞན་ཡོད་མིན། །

གངས་ཅན་མཁས་མང་རལ་བའི་མེ་ཏོག་གིས། །

ཞབས་སེན་མཆོད་པ་འཇིགས་མེད་སྨྲ་བའི་དབང་། །

དེ་ཡི་ཐུགས་བསྐྱེད་གསེར་གྱི་ཤིང་རྟ་བརྒྱས། །

ལུགས་གཉིས་རིན་ཆེན་དྲངས་པའི་མཐའ་མི་དཔོག །

རེ་ཞིག་དུས་ཀྱི་དམོད་པ་སྲིན་མོའི་མངལ། །

སྦྲུམ་པའི་མི་བསྲུན་མཚན་མོ་རྒྱུ་བ་ཅན། །

ཕན་བདེ་ཆུ་གཏེར་བཞི་ཡང་རིལ་མིད་དུ། །

བྱེད་པ་མུ་སྟེགས་རྒྱལ་བློན་དུ་མས་མནར། །

དེ་ལྟའི་ཉམས་ང་འཇིགས་པའི་ཚ་བ་ལ། །

འཐུངས་པའི་གཟུར་གནས་ཁོང་བའི་ནད་ཅན་ཀུན། །

མྱ་ངན་སྙིང་གི་ཐེམ་སྐས་ལ་ཕྱིན་ནས། །

འཇིག་རྟེན་ཕ་རོལ་ལྟ་ལ་ཅི་ཡང་རངས། །

འོན་ཀྱང་ཀུན་མཁྱེན་ཐུགས་བསྐྱེད་རཱ་མ་ཎས། །

གཞུ་རྒྱལ་གནམ་ལྕགས་འཕྲུལ་གྱི་འཁོར་ལོ་གང་། །

འཕངས་པས་མགྲིན་བཅུ་ཉི་མའི་སྲས་པོ་ལ། །

བྱིན་པས་ད་ནི་མཐའ་དག་རྒྱ་ལས་གྲོལ། །

སྡོམ་བརྩོན་ལི་ཁྲིའི་ཆུ་གཏེར་ནི། །

འབྱུང་བོ་འཛིན་པའི་ཕང་བ་ལ། །

བྲི་གང་མེད་པར་འཁྱིལ་ལགས་སམ། །

ཞེས་པའི་རོལ་མོ་དབྱངས་སུ་འཚེར། །

དྲེགས་ལྡན་རྒྱལ་ཕྲན་བྱེ་བའི་མགོར། །

ཞབས་ཟུང་ནོར་བུའི་འོད་སྦྱིན་པ། །

ཀུན་མཁྱེན་མཆོག་སྤྲུལ་འཁོར་ལོས་སྒྱུར། །

ལུགས་གཉིས་སྐྱོང་བཞིན་འཚོ་གཞེས་སམ། །

ཆོས་ཀྱི་རྒྱུན་ནི་ཆུ་བོ་བཞིན། །

བར་མེད་འཇོ་བའི་ཆོས་ཀྱི་སྤྲིན། །

ཉག་གཅིག་བགྲེས་རྒུད་མ་མངར་བར། །

ཕན་བདེ་གཞི་མར་བདེ་ལགས་གྲང་། །

ལྗགས་ཀྱི་རྩེ་མོ་གཡོ་བའི་རྡུལ། །

རེ་རེར་བཀའ་པོད་གཞུང་བརྒྱའི་ཆུ། །

རབ་འཁྱིལ་ལུང་རིགས་སྨྲ་བའི་ཚོགས། །

ཐུབ་བསྟན་རྒྱན་དུ་ངེས་ཆེའམ། །

རྣམ་དཔྱོད་ལྷ་ཡི་ཡུར་བ་ལས། །

གཞུང་དོན་ཆུ་བོ་འདྲེན་མཁས་པ། །

ཁྱོད་ཀྱང་འཚེ་བས་ཡོངས་བཏང་ནས། །

དགེའམ་ཞེས་པ་སྙན་དུ་སྟེ། །

སྤྲེའུའི་རྣམ་ཐར་ལྷུར་བྱེད་པ། །

ཤིང་རྩེར་མཆོངས་པའི་རྒོད་བག་ཅན། །

དེ་དེ་ངལ་བས་རང་མལ་ན། །

རང་ཚོད་གཞལ་ལ་མིག་བགྲད་དམ། །

བྱམས་པའི་བདུད་རྩིས་ཡིད་བརླན་ཞིང་། །

ཕྱི་མཐའ་གཟིགས་པའི་སྤྱན་ཡངས་པ། །

ས་སྐྱོང་སྡེ་བཞིའི་དཔལ་འབྱོར་ཅན། །

ལུགས་གཉིས་གཟི་ཡིས་མཐོ་ལགས་གྲང་། །

བསོད་ནམས་ལྡན་པའི་དེད་དཔོན་གྱིས། །

གཟིངས་ལ་རིན་ཆེན་བཀལ་བ་བཞིན། །

ཚོང་འདུས་ལ་ནི་དོན་མཐུན་ཁྱུས། །

སྣ་ཚོགས་འབྱོར་བས་གཏམས་སམ་ཅི། །

འཐབ་རྩོད་མུ་གེའི་གཡུལ་ངོ་ལས། །

རྣམ་རྒྱལ་སྐྱེ་དགུའི་རི་དྭགས་མོ། །

བདེ་སྐྱིད་ནགས་མར་ཡན་པ་ལས། །

རྫོགས་ལྡན་རྩེ་དགར་ལོངས་སྤྱོད་དམ། །

ཆོས་སྲིད་པད་མཚོར་རྙོག་མའི་རྡུལ། །

སློང་བྱེད་ལག་ལྡན་གྱིས་དབེན་ཏེ། །

ལུགས་ཟུང་འོད་ཀྱི་སྣང་བ་འབུམ། །

སྤྲོ་བའི་ཉི་མ་འགའ་མཆིས་སམ། །

འདི་ན་འཇམ་དཔལ་ཞལ་གྱི་པདྨོ་ལ། །

སྐྱེངས་པའི་རྡུལ་ཕྲེང་ནོར་བུའི་དོ་ཤལ་ནི། །

འགྲེམ་མཁས་སྐལ་ལྡན་རྒྱལ་བ་རྒྱ་མཚོའི་ལྷའི། །

འཕྲིན་ལས་གྲིབ་མ་བསིལ་བའི་ཚལ་ན་བདེ། །

རྒྱལ་རྣམས་མཛད་བཟང་དཀྱིལ་འཁོར་མཐའ་དག་པ། །

ལེགས་བྱས་མཛད་པ་གཅིག་གི་བགྲོད་པ་ལ། །

བཤད་སྒྲུབ་བང་རྩལ་རྫོགས་པ་འཇིགས་མེད་དབང་། །

རྒྱལ་བའི་བསྟན་ལ་རྒྱ་བ་གཉིས་པ་བཞིན། །

རང་གྲོགས་དཔག་བསམ་རྐང་འཐུང་འདི་དག་ཀྱང་། །

དུས་དང་མི་འཚམ་ནོར་བུའི་འཕྱང་འཕྲུལ་གྱིས། །

ཐུབ་བསྟན་འཆི་མེད་ལུས་བཟང་བརྒྱན་པ་ལ། །

དྲེགས་པས་མྱོས་པ་ཕལ་གྱིས་འགྲིན་མ་གྱུར། །

གསེར་ཞུན་བཀའ་ཡིག་ཕྱོགས་ཀྱི་རྒྱལ་ཕྲན་ལ། །

སྤྲིངས་མཁས་ས་ཡི་ཚངས་པ་ཆེན་པོ་དང་། །

དེ་ཡི་མངའ་འབངས་དཔག་ཚད་ཁྲི་ཕྲག་ལ། །

ཚོམ་བུར་སྤུངས་པའང་ལུགས་གཉིས་འབྱོར་བས་མྱོས། །

གྲུ་འཛིན་བདག་པོ་ལི་ཁྲིའི་མཚོར་ཞུགས་ནས། །

ས་གསུམ་མིག་གི་བདུད་རྩིར་བལྟམས་པའི་གཟུགས། །

འདི་ཡི་འོད་ཀྱི་ཉག་མ་གཅིག་གིས་ཀྱང་། །

ཕྱོགས་ཀུན་དགེ་བའི་སྣང་བ་བྱིན་དུ་འབེབས། །

ཀྭ་ཡེ་རང་ལུས་ཆུ་སྲིན་གྲོང་འདི་ན། །

དོན་གཉིས་རིན་ཆེན་འབྱུང་བའི་གནས་མཆིས་པས། །

སྲུང་བྱེད་གྲིབ་མ་དར་བབ་གཞོན་ནུ་མས། །

རང་གཟུགས་སྒེག་ལྡན་ལ་ནི་འཁྱུད་པས་མཚོན། །

རྨོངས་ཆེན་འཁོར་བའི་མུན་པ་འཇིག་པ་ལ། །

མང་ཐོས་ཉི་མའི་མེ་ལོང་ལས་འགོངས་པའི། །

སྣང་བ་ཀུན་རིག་ཤེས་བྱའི་ར་བ་ལ། །

མཚོན་ཕྱིར་མོ་གཤམ་བུ་རྣམས་རང་རྩལ་འགྲན། །

དེ་ནས་ཐོས་དང་བརྩོན་པའི་གཟིངས་བཅོས་ནས། །

གཞུང་ལུགས་རྒྱ་མཚོའི་མཆིང་རྣམ་གཅོད་པ་ལ། །

དྲན་དབང་ཕལ་ཆེར་སྲིན་བུའི་ཟླར་བྱས་ནས། །

སྲིད་ན་མེད་པའི་དེད་དཔོན་མཆོག་ཏུ་ལོངས། །

ཕྱོགས་གླང་གྲགས་པའི་རིགས་པ་ཡན་ལག་བཞིའི། །

དཔུང་ཚོགས་ནམ་མཁའ་འདི་ཡང་རལ་སྙམ་པས། །

ཀུན་ལས་རྒྱལ་བའི་གྲགས་པའི་བ་དན་དཀར། །

ཁོར་ཡུག་རི་བོའི་བར་དུ་ཅི་ཡང་སྒྲོངས། །

མཁྱེན་དཔྱོད་སྒྲོ་ལྡན་ཐོགས་མེད་ནི། །

ཀུན་ཁྱབ་མཐར་ཡང་བགྲོད་དོ་ཞེས། །

ཤེས་བྱའི་འབེན་དག་འདར་ལྡན་པས། །

ལུས་སྐྱེས་བསེར་བུས་བདས་ལ་སྙོགས། །

ལྔ་རིག་མུ་ཏིག་དཀར་པོའི་ཕྲེང་། །

འཇིག་རྟེན་མུན་པ་འཕྲོག་པའི་རྒྱན། །

འཛིན་མཁས་སྔོན་མེད་གཞོན་ནུ་ཞེས། །

རྒྱལ་རྣམས་ཆགས་པའི་ལམ་དུ་ཟུངས། །

དགེ་ལེགས་ནོར་གྱི་བློ་གྲོས་མ། །

བཤད་སྒྲུབ་གསེར་གྱི་མེ་ཏོག་ལྡན། །

ཐུབ་བསྟན་གང་གི་དཔུང་བ་ལ། །

བརྟེན་པའི་ཀ་བ་གཞན་མེད་ཕྱིར། །

གྲུབ་པ་མཆོག་འདིའི་ཞབས་རྡུལ་ནི། །

ཟུར་ཕུད་ཕོན་པོའི་རྒྱན་དུ་སྟེན། །

ཉི་མའི་བུ་ཡི་དབྱུག་ཏོ་ནི། །

འཚོ་བའི་ལྷག་མར་མ་འགྲོགས་ཕྱིན། །

ལེགས་བཤད་རྩེ་དགའི་མེ་ཏོག་ཆར། །

ལྷན་ཅིག་འབེབས་ལ་འདིར་ཡང་སྨོན། །

རང་མཐོང་དུག་གིས་གསོས་པས་ལུས་བརྟས་ནས། །

གྲིབ་མར་བརྡེགས་ནས་མིང་ལ་འཁོན་འཛིན་པ། །

དེ་དག་དགེས་པ་མིན་ཡང་ལྷག་པའི་སེམས། །

དཀར་བ་ཁྱེད་ལ་རིན་ཆེན་གཏེར་དུ་ཕུལ། །

ཡོངས་འཛིན་བློ་བཟང་དཔལ་ལྡན་གྱི་ལྗགས་རྩོམ་ཕྱོགས་བསྒྲིགས་ལས་བཤུས།

༢༠༡༨༠༢༢༡ཚུལ་ཁྲིམས་རྒྱ་མཚོས་གཏག་སྟེ་མཚམས་སྦྱོར་བྱས།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn