ཨོཾ་སྭ་སྟི་སིདྡྷི། གསལ་བར་བྱས་སོ་ཐུབ་བསྟན་མཁའ་མ་ལུས། །རྣམ་དཔྱོད་བློ་དང་རྩོལ་བས་ཕན་དང་བདེའི། །སྲོག་གི་འཚོ་བའི་གྲོས་སྟོན་དགེ་བའི་བཤེས། །ནང་གི་ཉི་མ་དམ་པའི་ཞབས་པད་ལ། །ཟག་བཅས་རྣམ་ཤེས་ལྕགས་ཀྱི་གོང་བུ་ཆེ། །ལས་ཉོན་དྲང་སྲོང་དམོད་པས་བརྒྱར་བྱས་པ། །ཟིན་མེད་བྱ་བས་སྐྱོངས་ལ་སུན་པའི་ཡིད། །ཅུང་ཟད་ཙམ་ཉིད་ཐུགས་རྗེར་བལྟས་ཞུ་བ། །དམ་པའི་དངོས་པོ་གཅིག་བྱས་མགོན་ཁྱོད་ཀྱིས། །མ་བསླབས་མ་གཞལ་མང་ཐོས་ཤེས་བྱའི་གཞི། །བྲལ་ཕྱིར་མི་སྒྲོགས་ཆུབ་ཀྱང་འགའ་ཞུ་བ། ལུགས་གཉིས་མ་མཐོང་ཉེ་བའི་སེམས་ཀྱི་གཤིས། །རྟགས་དང་སྟོབས་ཆེའི་ཉོན་མོངས་རྒྱུན་འདི་ཀོ །ཡུལ་དང་རྐྱེན་དུ་བབས་ཚེ་རང་གི་སེམས། །ཡང་ཡང་བཅུན་ལ་ཐུབ་པའི་བཀར་བལྟ་བ། །དུས་གསུམ་རྒྱལ་བ་སྲས་བཅས་བཞུད་པའི་ལམ། །དུས་འདིར་ཆོས་ཀྱི་བཤེས་དང་གྲོགས་དཀོན་ཕྱིར། །སྡེ་སྣོད་གསུམ་ལ་བླ་མ་དམ་པ་ཞེས། །སྟོན་པས་གསུངས་ཤིང་གོང་མ་རྣམས་བཞེད་པས། །སྲིད་ཞིའི་སྐྱོན་ཡོན་གཟིགས་པའི་ཀུན་གསལ་མཛོད། །ཀུན་གྱི་རྩ་བ་དད་དང་ཤེས་རབ་ཅེས། །རིས་མེད་གྲུབ་མཐའ་སྨྲ་བ་ཀུན་མཐུན་ཕྱིར། །ཐོག་མའི་ལམ་མཁན་བར་དུ་གྲོགས་ཀྱི་མཆོག །འབྲལ་མེད་གན་མཛོད་ཅེས་ཀྱང་འདི་གཉིས་མཛོད། །གཟི་བྱིན་མཁའ་མཐར་འགྲོ་བའི་རྗེའི་ཕྱག་ཚྭ། །རྡོ་རྗེའི་ནུས་ལྡན་བསྲུང་བའི་སྔགས་མདུད་དང༌། །སྙིང་གཏམ་འདབ་མ་བརྒྱ་ལྡན་ཀུ་མུ་ཏ། །མཐུན་པའི་རླུང་གིས་ཁྱོད་ཞབས་དྲུང་དུ་སོང༌། །

                                                                                                                 རྩོམ་སྒྲིག་པ། མང་ར་བ།

         གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                   དྲ་བའི་སྦྲེལ་ཐགhttp://www.tb1025.cn