ཆབ་ཤོག་ཚོགས་མཐའ་ཀླས་མ།
༈ ཚོགས་གཉིས་མཐའ་ཀླས་རིན་ཆེན་ཀུན་བསྡུས་ཆ། །ལེགས་སྨོན་སྣ་ཚོགས་བཟོ་བོས་ཕྱི་བདར་གྱིས། །ཐུབ་བསྟན་འོད་སྟོང་སྤྲོ་མཛད་སྤྲུལ་པའི་གར། །སྲིད་ཞིའི་ནམ་མཁའི་རྒྱན་དེའི་པཱ་ད་ལ། །ས་འཛིན་མཐོན་པོར་བསྡད་ཀྱང་ལྷག་བསམ་དམན། །ལང་ཚོས་རྒན་པོར་གྱུར་ཀྱང་བྱིས་པའི་སེམས། །མི་རྟག་རྒྱུན་དུ་བསྒོམས་ཀྱང་རྟག་འཛིན་ཅན། །བྱ་བཏང་ཟེར་ཡང་འདུ་འཛི་ཅན་འདི་སྐད། །རྗོད་བྱེད་ཟབ་པས་རྒྱལ་བའི་བཀའ་ཡི་ཟླ། །སྙན་འགྱུར་ཉམས་བརྒྱས་སྒེག་པ་འཕྱོར་བའི་ངག །ཐོས་ཚེ་སྔོན་གོམས་རྣམ་རྟོག་བརྒྱ་མངོན་གྱུར། །ཅི་འདིར་དབྱངས་ཅན་གསུངས་སྙན་སོམ་ཉིས་བྲེལ། །གསུང་རབ་ཀུན་འགྲེལ་དཀའ་ཆེན་རབ་འབྱམས་ཀྱི། །གཞུང་སྨྲ་དབང་ཡང་ཆོས་ཀྱི་མུ་ཏོ་ཞེས། །བྱིས་པར་བསྟིང་ཚིག་འཇུག་པ་བཅུ་པའི་ངག །ཟོལ་གྱིས་མཛད་དམ་ལྡེམ་པོ་འདི་ཅིའི་སླད། །ཕུན་ཚོགས་ཚོན་བརྒྱ་བཀྲ་བའི་ལྷའི་ཁང་བཟང༌། །མི་མཐུན་ལས་རྒྱལ་རིན་ཆེན་སྤྲས་པའི་ཁྲིར། །ཐབས་ཤེས་ཞབས་བཀོད་མཐུ་སྟོབས་རྩེ་བརྒྱ་གདེངས། །མཁྱེན་པའི་སྤྱན་སྟོང་གཡོ་བ་ཁྱོད་ལས་གང༌། །མཛེས་སྡུག་རྒྱ་མཚོའི་མངའ་བདག་ཉི་གཉེན་ཞལ། །མཁའ་ཡི་འཇའ་བཞིན་དོན་ལ་མི་སྣང་ཚེ། །མགོན་མེད་དམུས་ལོང་མཐའ་ཡས་སྐྱེ་དགུ་ཡི། །དམིགས་བུ་ཁྱོད་མིན་འོས་པ་ད་ག་རེ། །བདེ་འདོད་སྙིགས་འགྲོ་སྨིག་རྒྱུ་འཐུང་བྲལ་ཚོགས། །དམ་མིན་མྱ་ངན་ཐང་དུ་ངལ་རྣམས་ལ། །སྙིང་རྗེའི་ཆུ་འཛིན་སྡུག་པོར་གཡོ་ཆོས་ཆར། །མི་འབེབས་ཐུགས་རྗེའི་སེམས་བསྐྱེད་སྤྲིན་གྱིས་ཅི། །སྔོན་སྨོན་རྭ་བས་ཡོངས་བསྐོར་གདུལ་བྱའི་ཚལ། །དགའ་བའི་འབྱུང་གནས་དད་དང་ཤེས་རབ་ཀྱི། །ལྷ་རྫས་རྒྱན་མང་འཕྱང་བའི་རྐང་འཐུང་ཚོགས། །ཐུགས་རྗེའི་སྤྱན་རས་མི་སྐྱོང་འདིའི་བདག་གར། །སྤྲུལ་པའི་ལྷ་དབང་ཁྱོད་སྙན་འཚེར་མོད་ཀྱང༌། །བྱིས་པའི་རང་བཞིན་ནི་ཏ་ན་ཡི་ངག །བདེན་ཞེས་བདུད་རྩིའི་ཟས་ཅན་མ་ལུས་ཀྱང༌། །བཞིན་རས་འཛུམ་པ་ངོ་མཚར་སྟོན་པ་ཅི། །སྨྲ་བའི་རྣམ་རྟོག་ཆུ་གཉེར་ལྟར་འཁྲིགས་ཀྱང༌། །བྷ་ཡུ་རོ་ག་ལངས་དགོས་འཛབ་བསྙེན་གྱིས། །ལྷ་ཆེན་རལ་པར་ལེགས་བཤད་གངྒཱའི་ཀླུང༌། །བཟུང་བའི་ཐིགས་པ་དེ་ལས་ཐོབ་མ་གྱུར། །རྣམ་གཡོ་རླབས་གཡོ་ཐོས་པའི་རྒྱ་མཚོ་ལས། །ཆབ་ཤོག་རྣམ་སད་རི་བོ་བསྒྲིལ་བའི་མཐུས། །སྙན་ཚིག་བདུད་རྩི་འཐོར་བའི་ཞུ་ཡིག་ཟླ། །དད་པའི་ཀུ་མུད་བཞད་བཞིན་ཟླ་ཚེས་ལའོ། །
རྩོམ་སྒྲིག་པ། མང་ར་བ།
གསལ་འདེབས།
རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn
