༈ ན་མཿསྭ་ར་སྭ་སྟྱཻ། སྲིད་ཞིའི་མཛེས་སྡུག་བསྡུས་པའི་སྐུ་ཡི་དཔེར། །གཞན་བྲལ་རང་ཉིད་དཔེར་སྟོན་གསུང་དབང་མ། །བདག་གི་མགྲིན་པའི་འོ་མཚོར་རོལ་སྒེག་གིས། །གསང་གསུམ་ནམ་མཁའ་མཛོད་ཀྱི་སྒོ་ཕྱེ་ཞིག །མཚན་ཙམ་ཐོས་པ་ཡིས་ཀྱང་རྨོངས་པའི་མུན། །མ་ལུས་འཇོམས་པའི་གསུང་གི་དབང་ཕྱུག་མ། །སྔོན་མེད་རྨད་བྱུང་སྤོབས་པ་འབུམ་གྱི་རྒྱུད། །ལྡན་པའི་མགྲིན་པ་འཕང་འགྲོའི་གླུར་ལོངས་ཀྱེ། །རབ་ཡངས་བློ་གྲོས་མཁའ་ཡི་མཐའ་ལ་ཟ། །གྲགས་སྙན་ཉི་མ་འབུམ་གྱི་འོད་ལས་ལྡང༌། །གསར་བཤད་ཟབ་བརླིང་ཟླ་བའི་མ་མ་དང༌། །རྗེས་མཐུན་དོན་ལྡན་གནས་ལྔ་གཟིགས་པའི་དྲུང༌། །ཞུ་བ། མ་བགོས་མཁྱེན་པས་དམར་བའི་བྱི་རུའི་མཆུ། །མ་ཕྱིས་ལེགས་འགྲིལ་སྙན་ཚིགས་ཤེལ་དཀར་ཚེམས། །མི་དམན་.....མ་བྲིས་བློ་ཡི་རི་མོའི་འཇུག་པ་བརྒྱ། །ཁོངས་ནས་འཛུམ་འདི་དཔྱིད་ཀྱི་ལང་ཚོའི་ཆ། །དམན་པའི་འདྲེན་བྱེད་ཡུལ་མིན་འཇའ་འོད་ལུས། །རེག་པའི་སྐུ་སྤྲུལ་བྱིན་རྟེན་བསིལ་བའི་ཆབ། །གངྒཱ་མིན་ཡང་སྲིད་ཞིའི་དྲི་མའི་ཚོགས། །དག་བྱེད་ལེགས་བྱས་རྒྱ་མཚོའི་རྗེས་སུ་ཞུགས། །རྣམ་དཀར་ཕུན་ཚོགས་ཁོ་ན་གཡས་སུ་འཁྱིལ། །སྐྱེ་བ་བདུན་གྱི་དབྱངས་སྙན་ང་རོ་ཡིས། །ལོག་ལྟུང་དུཿཁའི་ཡམས་ནད་དྲུང་འབྱིན་པ། །ཉུང་མིན་ལས་ཀྱི་བགོ་སྐལ་ཇི་བཞིན་ཐོབ། །བགྲངས་བྲལ་འཁོར་བ་མཐའ་ཅན་འགྱུར་གྱི་བར། །ཕན་པའི་དར་དཀར་གཡོ་བའི་ལེགས་སྦྱར་གདུགས། །སྙན་པའི་རྒྱལ་མཚན་.....བ་དན་དེ་དང་ཆབ་གཅིག་ཏུ། །མཁས་པའི་རུ་མཚོན་ཆེ་དེ་ད་ཕྱོར་ཞིག །འཛིན་མ་ཕ་མཐར་སོན་པའི་གྲགས་.....ཟབ་རྒྱས་སྙན་སྒྲ། །རྒྱུན་མི་འཆད་པར་.....སྒྲོགས་པའི་ཆོས་ཀྱི་རྔ་བོ་ཆེ། །བརྡུངས་ཀྱང་ཐོས་མིན་རྡུལ་ལ་ཅོ་འདྲིའི་འགྲོ། །རྣ་བ་ལྡན་ཡང་འོན་ནམ་སེམས་མེད་ཅི། །དམན་མིན་ཡུལ་མིན་དངོས་ལྔ་འདུས་འོང་ལུས། །རྣམ་དཀར་ཚོགས་གཉིས་རྒྱུན་བསགས་གཡས་སུ་འཁྱིལ། །སྐྱེ་བ་བདུན་གྱི་སྒྲ་སྙན་འཚེར་བ་ཡིས། །ལོག་ལྟུང་དུཿ་ཁའི་ཡམས་ནད་དྲུངས་འབྱིན་པ། །ཉུང་མིན་ལས་ཀྱིས་བགོ་སྐལ་ཇི་བཞིན་ཐོབ། །མཆན་ཡིག་ལྷ་རྫས་ལྷབ་ལྷུབ་གཡོ་འཁྲི་ཤིང༌། །ཞགས་འགྲོས་གསལ་ལྡན་དབྱངས་འཆར་ཀུན་གྱི་བཞུང༌། །འཛིན་མའི་ཐིག་ལེ་དབུས་དེར་སྤྱན་དྲོངས་དང༌། །མཐུན་རྐྱེན་དར་དཀར་གཡབ་མོ་བདག་ཀྱང་ཞུ། །བཀྲ་ཤིས་ལྷ་རྫས་དཀར་པོའི་གཤོག་ཟུང་རྒྱས། །དགེ་མཚན་ངང་པའི་སྐྱེ་བོས་མདུན་ས་བདར། །ཐུབ་གསུང་ནུས་ལྡན་མགྲིན་རྔ་སྒྲོགས་བཞིན་དུ། །བློ་གྲོས་རིན་ཆེན་འབྱུང་གནས་དེར་ཡུད་སོང༌། །

                                                                                                                   རྩོམ་སྒྲིག་པ། མང་ར་བ།

         གསལ་འདེབས། 
                   རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                   དྲ་བའི་སྦྲེལ་ཐགhttp://www.tb1025.cn