ན་མོ་ཨཱཪྱ་མཉྫུ་ཤྲི་ཡེ། ས་བཅུའི་དབང་ཕྱུག་རྒྱས་སྲས་པད་དཀར་ཅན། །ཐུགས་རྗེའི་དབང་གིས་བཤེས་གཉེན་ཚུལ་བཟུང་ནས། །འགྲོ་རྣམས་ཐར་པར་འཁྲིད་མཛད་དགེ་བའི་བཤེས། །བཀའ་དྲིན་མཉམ་མེད་ཞབས་ལ་ཕྱག་འཚལ་ལོ། །ཀུན་ལ་དགའ་བདེའི་དཔལ་རབ་སྐྱེད་མཛད་ཅིང་། །ལེགས་བཤད་རིན་ཅེན་རྒྱལ་མཚན་འཛིན་པའི་དཔལ། །བཟང་པོའི་མཛད་པས་ཐུབ་བསྟན་གསལ་མཛད་པ། །ཐེག་མཆོག་དགེ་བའི་བཤེས་ལ་ཕྱག་འཚལ་ལོ། །འབུམ་ཕྲག་འདུལ་བའི་ཚིག་དོན་ཀུན་ལ་མཁས། །རྣམ་དག་བསླབ་པ་མིག་འབྲས་ལྟ་བུར་གཟིགས། །ཉེས་ལྟུང་དྲི་མས་མ་གོས་འདུལ་བ་འཛིན། །དྲང་སྲོང་ངུར་སྨྲིག་འཆང་ལ་གསོལ་བ་འདེབས། །སྡུག་བསྔལ་བྱེ་བས་མནར་བའི་འགྲོ་བ་འདི། །བུ་གཅིག་ལྟ་བུར་དགོངས་པའི་ཐུགས་རྗེ་ཡིས། །ངེས་པར་ཐམས་ཅད་མཁྱེན་པར་འཁྲིད་མཛད་པ། །སེམས་དཔའ་ཆེན་པོའི་ཞབས་ལ་གསོལ་བ་འདེབས། །རྡོ་རྗེ་འཆང་དབང་གཞུང་ལུགས་འདབ་བརྒྱའི་ཚལ། །འབྱེད་མཁས་མཁྱེན་པའི་འོད་སྟོང་དྲ་བ་ཅན། །སྐུ་བཞིའི་དཀྱིལ་འཁོར་ཡོངས་རྫོགས་ཉིན་མོར་བྱེད། ཁྱབ་བདག་རྡོ་རྗེ་འཛིན་ལ་གསོལ་བ་འདེབས། །ཐབས་ཤེས་གཤོག་རླབས་གཡོ་བའི་རླུང་ཤུགས་ཀྱིས། །མཐའ་གཉིས་གཡངས་སར་ནམ་ཡང་མི་ལྟུང་ཞིང་། །བདག་ལྟའི་ཀླུ་དབང་ཚོགས་ཀྱི་སྲོག་འཕྲོག་པ། །མཁས་མཆོག་མཁའ་འགྲོའི་གཙོ་ལ་གསོལ་བ་འདེབས། །ནོར་འཛིན་(༡༧བ)སྒེག་མོའི་ཁྱོན་འདིར་མགོན་ཁྱོད་ཀྱིས། །ཆོས་ཀྱི་རྔ་དབྱངས་འབུམ་ཕྲག་བསྒྲགས་གྱུར་པས། །དེ་ཚེ་ཀུན་གྱིས་ཐུབ་དབང་གཉིས་པ་ཞེས། །བསྔགས་པ་དོན་དང་ལྡན་ལ་གསོལ་བ་འདེབས། །རྒྱལ་བ་ཀུན་གྱི་གདུང་འཚོབ་བློ་བཟང་ཞེས། །གྲགས་པའི་རྔ་ཆེན་འབུམ་ཕྲག་རྡུང་བའི་དཔལ། །ཆོས་ཀྱི་རྒྱལ་པོ་གང་དེའི་རྒྱལ་སྲིད་ལ། །དབང་སྒྱུར་གྲུབ་པའི་གཙོ་ལ་གསོལ་བ་འདེབས། །གང་ཐུགས་ཆོས་དབྱིངས་ཀུན་གསལ་ལང་ཚོ་ལ། །རྟག་ཏུ་འགྲོགས་པའི་རྩེ་དགའ་མི་གཏོང་ཡང་། །མཐའ་ཡས་སྤྲུལ་པའི་འོད་སྟོང་འགྱེད་མཁས་པ། །སྐལ་བཟང་པདྨོའི་གཉེན་ལ་གསོལ་བ་འདེབས། །གསེར་ལྡན་མཛེས་པའི་ཕང་པར་རབ་བླངས་པའི། །འདོད་དགུའི་དཔག་བསམ་འབྲས་བཟང་སྙེ་མ་ཡི། །གཡུར་ཟ་ལྡེམ་པ་འཆི་མེད་བདུད་རྩི་ཡི། །དངོས་གྲུབ་མཆོག་སྦྱིན་མཛད་ལ་གསོལ་བ་འདེབས། །འདི་ཕྱོགས་ལེགས་ཚོགས་ཀུན་གྱི་འབྱུང་གནས་མཆོག །ཐེག་མཆོག་དགེ་བའི་བཤེས་གཉེན་ཁྱོད་མཉེས་ནས། ཁྱོད་ཞལ་པདྨོའི་སྒོ་ལས་ལེགས་འོངས་པ། །བདུད་རྩིའི་བཅུད་བཟང་རྒྱུན་དུ་བསྟན་པའི་མཐུས། །སྒྲིབ་གཉིས་ནད་རྣམས་ཀུན་ལས་རྒྱལ་གྱུར་ཏེ། །སྟོབས་བཅུ་མངའ་བའི་གོ་འཕང་བརྙེས་པའི་ཚེ། །མི་བཟད་འཁོར་བར་ཡུན་རིང་འཁྱམས་པ་རྣམས། །གོ་འཕང་མཆོག་དེར་འཁྲིད་པར་བྱིན་གྱིས་རློབས། །དགེ་བ་འདི་ཡིས་རྗེ་བཙུན་ཐུགས་རྗེའི་གཏེར། ཁྱོད་སྐུ་རི་དབང་ལྟ་བུར་བརྟན་པ་དང་། ཁྱོད་གསུང་ལེགས་བཤད་གྲུ་ཆར་སྟོང་ཕབ་པས། །བདག་སོགས་མཁའ་ཁྱབ་གདུལ་བྱའི་དཔལ་གྱུར་ཅིག །ཅེས་རྗེ་བཙུན་དམ་པ་ཐུགས་རྗེ་ཆེན་པོ་དང་ལྡན་པ་འཇིག་རྟེན་དབང་ཕྱུག་གི་རྣམ་འཕྲུལ་དོན་གྱི་སླད་དུ་མཚན་ནས་སྨོས་ཏེ་འཇམ་པའི་དབྱངས་ཀུན་དགའ་བདེ་ལེགས་རིན་ཅེན་རྒྱལ་མཚན་དཔལ་བཟང་པོའི་ཞལ་སྔ་ནས་ལ་བསྟོད་པའི་རབ་ཏུ་བྱེད་པ་འདི་ནི། རྗེ་ཉིད་ཀྱི་ཞབས་ཟུང་ཅོད་པན་གྱི་རྒྱན་དུ་འཛིན་པའི་བཙུན་པ་དགེ་འདུན་རྒྱ་མཚོ་དཔལ་བཟང་པོས། ཆོས་གྲྭ་ཆེན་པོ་གནས་རྙིང་གི་བྱ་འདབས་ཡོལ་གསེར་ཁང་དུ་སྦྱར་བའོ།། །། 

                                                                 རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ། 
            གསལ་འདེབས། 
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
               དྲ་བའི་སྦྲེལ་ཐགhttp://www.tb1025.cn