བླ་མ་དམ་པའི་ཞབས་ལ་ཕྱག་འཚལ་ལོ། །མི་དམན་ཀུན་དགའི་འོད་ཚོགས་ག་བུར་གྱིས། །ཆེས་དཀར་བདེ་ལེགས་རང་བཞིན་གཞལ་མེད་ཁང་། །རིན་ཅེན་རྒྱལ་མཚན་གཞན་བཞིན་བསླབ་གསུམ་གྱི། །དཔལ་འབྱོར་བཟང་པོ་འཕྲོག་བྱེད་ལ་འཁུ་བཞིན། །དམར་སེར་ཐུན་འཚམས་བླ་གོས་དྲ་བ་ཅན། །བག་ཡོད་བདུད་རྩིའི་འོད་ཀྱི་ཟླ་ཚེས་ནི། །ཆུ་ལྡན་གསར་པའི་ཁེངས་པ་ཉམས་བྱས་ཤིང་། །དྲང་སྲོང་ཚོགས་རྣམས་ནགས་མཐར་བྲོས་སམ་སྙམ། །བགྲང་ཡས་མཁས་དང་གྲུབ་པའི་ལེགས་བཤད་ཀྱི། །བདུད་རྩི་ཁྱོད་ཐུགས་ཤེལ་བུམ་ལ་བརྟེན་པ། །ཟླ་ཤར་འོ་མའི་ཆུ་གཏེར་འགྱུར་པའི་བརླབས། །མན་དྷ་ར་ཡི་དབུ་བ་བརྩེགས་པ་བཞིན། །དད་པའི་ཉི་འོད་ཀྱིས་བཅུས་བཅུ་ཕྲག་གི །ཀུ་མུད་ཐལ་མོ་མཛེས་ལྡན་རང་བྱུང་ནི། །ཅོད་པན་ས་ལ་ལྷུང་ཚེ་ནོར་ལྡན་མའི། ཁེངས་ལྡན་ཚོགས་ལ་འཕྱ་བས་དགོད་པ་བཞིན། །བརྒྱ་ཕྲག་མཁྱེན་བརྩེའི་ཚོན་བརྒྱས་འབྱུང་པོའི་ཡུམ། །དུ་གུ་ལ་ཡིས་ཁེབས་པའི་སྐལ་བཟང་ནི། །རྫོགས་ལྡན་གསར་དུ་འོངས་འདི་ཡ་མཚན་ཞེས། །ཕྱོགས་བཅུའི་རྒྱལ་རྣམས་ཅིག་ཅར་(༡༦བ)ཁོང་བཞད་མཛད། །པད་དཀར་འདབ་བརྒྱ་དགོད་པའི་ཡན་ལག་ཅན། །ཟློས་གར་གུར་གུམ་ཟོལ་ལ་བརྟེན་པ་ན། །འདི་ཡིས་ཐུབ་པོའི་གདན་ཁྲི་ཕྲོགས་སྙམ་ནས། །མ་ཕམ་ཕྲག་དོག་དཔྱང་ཐག་འཛིན་ལགས་གྲང་། །ཕན་དང་བདེ་བའི་ཆུ་གཏེར་ཉལ་འགྲོའི་ཚོགས། །གང་ན་དོག་པ་མེད་པར་ངལ་གསོ་བ། །སྔོན་མེད་རི་བྱི་འདི་ཡིས་སྦྱིན་མའི་བུ། །སྲིད་ཉོན་ཟུང་འདི་ཅི་སྟེ་ཞུམ་མི་བགྱིད། །མགོན་ཁྱོད་ཞབས་སེན་བནྟུ་ཛ་ཝ་ཀའི། །ལན་ཆར་གཡོ་བ་མྱོས་ལྡན་དཔྱིད་ཀྱི་ནི། །དཔལ་མོ་གསར་དུ་འོངས་པའི་འཇོ་སྒེག་གིས། །འདབ་བརྒྱ་དགོད་པའི་ཞིང་ལ་ཅོ་འདྲི་བཞིན། །ལྔ་པའི་ཟོལ་ལ་ཉེར་བརྟེན་སྒྱུ་མ་ཡིས། །སྲིད་འདིའི་ངང་ཚུལ་འགྲོ་ལ་འདོམས་པ་ན། །བདེ་སོགས་བླ་གོས་དྲ་བ་དང་འགྲོགས་པའི། །འཆི་མེད་འདབ་བརྒྱའི་ཕྲེང་བས་ཆུ་མཐོངས་འགོག །བསོད་ནམས་བརྒྱ་པའི་གཟི་འབར་ཉི་མའི་གཉེན། །ལེགས་དཔྱད་འབྲས་བུ་འགྲོ་ལ་ངོམ་པ་བཞིན། །མི་བཟད་རྒྱན་གྱི་འཁོར་ལོས་དུས་མཐའི་བར། །རྣམ་རོལ་ཁྱོད་ཞབས་པདྨོར་གུས་ཕྱག་འཚལ། །དེ་ལྟར་བླ་མ་མཆོག་གི་ཡོན་ཏན་ཚོགས། །སྡེབ་ལེགས་ངག་གི་སྲད་བུར་བརྒྱུས་པ་ལས། །རྣམ་དཀར་ཟླ་འོད་དང་མཚུངས་ཀུན་ཁྱབ་ངོས། །གང་བས་འགྲོ་ཀུན་སངས་རྒྱས་ཐོབ་པར་ཤོག །ཅེས་འཕགས་པ་འཇིག་རྟེན་དབང་ཕྱུག་གི་རྣམ་འཕྲུལ། དོན་གྱི་སླད་དུ་མཚན་ནས་སྨོས་ཏེ་མཁན་པོ་རིན་པོ་ཆེ་ཀུན་དགའ་བདེ་ལེགས་རིན་ཆེན་རྒྱན་མཚན་དཔལ་བཟང་པོའི་ཞལ་སྔ་ནས་ལ་བསྟོད་པའི་རབ་ཏུ་བྱེད་པ་འདི་ནི། ཆ་མལ་ནས་དཔོན་པོ་ཨ་འཛམ་པའི་གསུང་གིས་བསྐུལ་ནས་(༡༧ན)སྙན་དངགས་མཁན་གྱི་ཅོད་པན་དགེ་འདུན་རྒྱ་མཚོའི་དཔལ་གྱིས་ཉེ་བར་སྦྱར་བའོ།། །།

                    རྩོམ་སྒྲིག་པ། ཀླུ་ཚང་ འཇམ་དབྱངས་ཤེས་རབ།
     གསལ་འདེབས།
    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
       དྲ་བའི་སྦྲེལ་ཐགhttp://www.tb1025.cn