དཔལ་ལྡན་ཤ་བ་རི་དབང་ཕྱུག་ལ་བསྟོད་པ་ནི། ན་མོ་བཛྲ་དྷ་རཱ་ཡ། ཇི་སྙེད་ཆོས་རྣམས་ཀུན་གྱི་གདོད་མའི་གཤིས། །དབྱེར་མེད་བརྗོད་བྲལ་ལྷན་ཅིག་སྐྱེས་པའི་དངོས། །གྲུབ་པའི་དབང་པོའི་གར་གྱིས་རྣམ་རོལ་བ། ཁྱོད་ཞབས་པདྨོར་དང་བས་ཕྱག་བགྱིད་དོ། །ཏེ་ཏེ་ན་ཞེས་བརྒྱ་བྱིན་གྲོང་ཁྱེར་གྱི། །མཛེས་པ་ཐུལ་བར་གར་མཁན་རིགས་(༡༡བ)དག་ཏུ། །འཁྲུངས་གྱུར་མཁར་ཉལ་ཚོགས་བཞིན་གླུ་གར་གྱིས། །རྣམ་རོལ་མཆེད་ལྕམ་དང་བཅས་ཁྱོད་ཕྱག་འཚལ། །ཀླུ་སྒྲུབ་ཞབས་སེན་གསར་པའི་ཟླ་ཚེས་ནི། །མཆོག་གི་དངོས་གྲུབ་རྣམ་པ་དང་བཅས་བཞིན། །དགྱེས་པའི་འཛུམ་དཀར་འོད་དང་ལྷན་ཅིག་ཏུ། །རལ་པའི་ནགས་སུ་ལྷུང་གྱུར་ཁྱོད་ཕྱག་འཚལ། །བློ་གྲོས་ཡིད་བཞིན་རིན་ཅེན་ཡིད་བཟང་གི །རི་མོ་མིག་ལ་བདུད་རྩིའི་ཆར་འབབས་པ། །དེ་མཐོང་ངོ་མཚར་གྱུར་ལས་འདི་ཅི་ཞེས། །གུས་ལྡན་ཞེ་སར་བཅས་གསོལ་ཁྱོད་ཕྱག་འཚལ། །དེ་ཚེ་འདི་ནི་རྒྱལ་སྲས་འཆི་མེད་བུ། །ཆུ་བུར་མིག་གི་ཡུལ་མིན་ཞེས་སྩལ་བས། །ཞལ་བཟང་བདུད་རྩི་འཐུང་བའི་ཐབས་གང་ཞེས། །འདུན་པའི་དབང་དུ་གྱུར་ལ་ཕྱག་འཚལ་ལོ། །དེ་ནས་འཁོར་ལོ་ལྔ་ཡི་དཀྱིལ་འཁོར་དུ། །དབང་གི་ཆུ་བོས་སྨིན་མཛད་གདམས་ངག་གི །གསེར་གྱི་ཐུར་མས་རབ་རིབ་ཀུན་བསལ་ཏེ། །འོད་གསལ་རྒྱལ་བའི་སྲས་གཟིགས་ཁྱོད་ཕྱག་འཚལ། །དྲུག་ལྡན་གླུ་ཡིས་ངེས་བཅིངས་མདའ་བསྣུན་གྱི། །དོན་བཟང་དབྱངས་ཀྱིས་མཆོད་ཚེ་མགོན་དེ་ཡིས། །དེ་ཡི་དོན་དྲིས་ལྐོག་ཏུ་གྱུར་པ་ལ། །མངོན་སུམ་ཉིད་དུ་སྣང་མཛད་ཁྱོད་ཕྱག་འཚལ། །དེ་ནས་ཧི་རའི་རྐང་འཐུང་ཕྲེང་བ་ཅན། །དཔལ་གྱི་ས་འཛིན་ངོགས་སུ་ལུང་བསྟན་ཏེ། །ཤ་བ་རི་ཡི་ཆས་བཟུང་སྐལ་བཟང་ཀུན། །རྗེས་སུ་འཛིན་པའི་དབང་ཕྱུག་ཁྱོད་ཕྱག་འཚལ། །ཐབས་ཤེས་གཞུ་ལས་སྙིང་པོའི་དོན་གྱི་མདའ། །གཟུང་འཛིན་རི་དྭགས་ཀུན་གྱི་སྲོག་འཕྲོག་པ། །འཕོང་སྐྱེན་ཁྱོད་ཀྱིས་(༡༢ན)མདའ་ལྔ་པ་བཅོམ་པས། །སྲིད་སྒྲུབ་ལྔ་པའི་མཐའ་ལ་བྲོས་པར་གྱུར། །འཇའ་ལུས་རྡོ་རྗེའི་སྐུ་བརྙེས་བདེ་ཆེན་གྱི། །གནས་ལ་འདོད་དགུར་སྤྱོད་ཀྱང་ཐུགས་རྗེ་ཡིས། །བགྲང་ཡས་སྤྲུལ་བའི་གར་གྱིས་རྣམ་རོལ་བ། ཁྱོད་ལ་རྣམ་པ་ཀུན་དུ་ཕྱག་འཚལ་ལོ། །དེ་ལྟར་ཁྱོད་ཞབས་རྗེས་སུ་དྲན་པ་ལས། །ཅུང་ཟད་བསྟོད་འདིས་ཚེ་རབས་ཐམས་ཅད་དུ། །ཞབས་སེན་སྤྱི་བོའི་རྒྱན་དུ་མི་འབྲལ་ཞིང་། །ངོམས་མེད་གསུང་གི་བདུད་རྩི་འཐུང་བར་ཤོག །བརྩེ་ལྡན་ཁྱེད་ཀྱིས་དགྱེས་བཞིན་རྗེས་བཟུང་ནས། །ཅུང་ཟད་ཙམ་གྱི་དཀའ་བ་མེད་པར་ཡང་། །བདེ་ཆེན་ལམ་གྱི་རྟོགས་པ་མཐར་སོན་ནས། །ཟུང་འཇུག་གོ་འཕང་ཚེ་འདིར་ཐོབ་གྱུར་ཅིག །གནས་སྐབས་འདིར་ཡང་བདུད་སྡེའི་དགྲ་རྣམས་ཀྱི། །བར་དུ་གཅོད་པས་ནམ་ཡང་མི་བརྫི་བར། །བསྟན་དང་སེམས་ཅན་དོན་ཆེན་སྒྲུབ་པ་ལ། །གྲུབ་པའི་དབང་པོ་ཁྱོད་དང་མཚུངས་པར་ཤོག །ཅེས་དཔལ་རི་ཁྲོད་ཞབས་ཀྱི་རྣམ་པར་ཐར་པ་ལ་བསྟོད་པ་མདོ་ཙམ་དུ་བརྗོད་པ་འདི་ནི་དགེ་བའི་བཤེས་གཉེན་ཤཱཀྱ་མགོན་པོས་བསྐུལ་བ་ལས་བཙུན་པ་དགེ་འདུན་རྒྱ་མཚོའི་དཔལ་གྱིས་ཆོས་གྲྭ་ཆེན་པོ་རྩེས་ཐང་དུ་ཉེ་བར་སྦྱར་བའོ།། །།
 

                   རྩོམ་སྒྲིག་པ། ཀླུ་ཚང་འཇམ་དབྱངས་ཤེས་རབ།
   གསལ་འདེབས། 
      རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་ དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
     དྲ་བའི་སྦྲེལ་ཐགhttp://www.tb1025.cn