༄༅།།  ནམ་ཟླ་དབྱར་དུས་སྐྱིད་པོ་སླེབས་པ་འདི་དགའ་ཡང་།།

མྱུར་དུ་ཡལ་ཡོལ་ཟད་ནས་འགྲོ་བ་འདི་སྐྱོ་བ།།

མི་ཚེ་བདེ་སྐྱིད་མྱོང་བའི་དུས་ཚོད་འདི་དགའ་ཡང་།།

མྱུར་དུ་ཡལ་ཡོལ་ཟད་ནས་འགྲོ་བ་འདི་སྐྱོ་བ།།

མདངས་མཛེས་མེ་ཏོག་གསར་བ་ཤར་བ་འདི་དགའ་ཡང་།།

སེར་བ་དྲག་པོས་ནམ་འཇོམས་ཆ་མེད་འདི་སྐྱོ་བ།།

ནད་མེད་རྒུད་མེད་ལང་ཚོ་དར་བ་འདི་དགའ་ཡང་།།

རྐྱེན་ངན་ཐོག་ཏུ་ནམ་འབབ་ཆ་མེད་འདི་སྐྱོ་བ།།

སྦྲང་མས་འབད་ནས་རྩི་བཅུད་བསགས་པ་འདི་དགའ་ཡང་།།

དོན་མེད་ཕྱིགས་རྫིས་ཞིམ་ཟས་བྱེད་པ་འདི་སྐྱོ་བ།།

ད་ལྟ་སེར་སྣས་བོར་རྫས་བསོགས་པ་འདི་དགའ་ཡང་།།

ཉིན་གཅིག་གཞན་གྱིས་ཧབ་ཐོབ་བྱེད་པ་འདི་སྐྱོ་བ།།

འགྲོན་པོས་ཞག་མལ་ཁང་བཟང་འཛོམས་པ་འདི་དགའ་ཡང་།།

སང་ཉིན་རང་སར་སྐྱུར་ནས་འགྲོ་དགོས་འདི་སྐྱོ་བ།།

ཚེ་འདིའི་བདེ་སྐྱིད་འབྱོར་པ་འཛོམས་པ་འདི་དགའ་ཡང་།།

འཆི་ནས་རང་སར་སྐྱུར་ནས་འགྲོ་བ་འདི་སྐྱོ་བ།།

མི་རིགས་སྣ་ཚོགས་ཁྲོམ་དུ་ཞལ་འཛོམས་འདི་དགའ་ཡང་།།

མྱུར་དུ་སོ་སོར་གྱེས་ནས་འགྲོ་བ་འདི་སྐྱོ་བ།།

ཉེ་འབྲེལ་མཆེད་གྲོགས་ལྷན་ཅིག་འཛོམས་པ་འདི་དགའ་ཡང་།།

ཉིན་གཅིག་སོ་སོར་གྱེས་ནས་འགྲོ་བ་འདི་སྐྱོ་བ།།

ངང་པའི་ཚོགས་རྣམས་འཕུར་ལྡིང་རོལ་པ་འདི་དགའ་ཡང་།།

ངང་ཕྲུག་གཅིག་ཅིག་སྙི་ཡིས་ཟིན་པ་འདི་སྐྱོ་བ།།

མཆེད་གྲོགས་ཕལ་ཆེར་རི་ཁྲོད་འགྲིམ་པ་འདི་དགའ་ཡང་།།

བན་ཆུང་སྣ་ཐག་གཞན་ལ་ཤོར་བ་འདི་སྐྱོ་བ།།

དྲོ་འཇམ་ཉི་མ་དགུང་ལ་ཤར་བ་འདི་དགའ་ཡང་།།

ནུབ་རིའི་ཕག་ཏུ་བཞུད་ལ་ཉེ་བ་འདི་སྐྱོ་བ།།

སངས་རྒྱས་བསྟན་པ་དར་ཞིང་རྒྱས་པ་འདི་དགའ་ཡང་།།

རྟགས་ཙམ་འཛིན་པའི་དུས་ལ་ཉེ་བ་འདི་སྐྱོ་བ།།

རྒྱ་མཚོར་འཇུག་པའི་གྲུ་རྫིངས་འཛོམས་པ་འདི་དགའ་ཡང་།།

མཐུན་ཕྱོགས་རྒྱུ་བའི་རླུང་དང་བྲལ་བ་འདི་སྐྱོ་བ།།

གཞུང་ལུགས་དགོངས་འགྲེལ་ཐོས་བསམ་བྱེད་པ་འདི་དགའ་ཡང་།།

བརྩོན་འགྲུས་དྲག་པོས་མཐར་ཕྱིན་མེད་པ་འདི་སྐྱོ་བ།།

ནེ་ཙོས་མ་ཎྀའི་རྗེས་བཟློས་ཤེས་པ་འདི་དགའ་ཡང་།།

དོན་གྱི་ཆ་ཤས་ཙམ་ཡང་མི་ཤེས་པས་སྐྱོ་བ།།

ཁ་ནས་སྐྱོ་གླུ་ཡང་ཡང་བླངས་པ་འདི་དགའ་ཡང་།།

རྒྱུད་ལ་སྦྱོར་བའི་ཉམས་ལེན་མེད་པ་འདི་སྐྱོ་བ།།

  ཞེས་པ་འདི་ཡང་འདུ་གསུམ་པ་བློ་བཟང་ཆོས་ཀྱི་ཉི་མས་སྨྲས་པའོ།།

                             རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

                                                                                                     དྲ་བའི་སྦྲེལ་ཐགhttp://www.tb1025.cn