ན་མོ་ཡེ། རང་ཉིད་ཀྱི་རྣམ་ཐར་གསོལ་འདེབས་བྱིན་རླབས་མངོན་གྱུར་ཅེས་བྱ་བ། བླ་མ་རྣམས་ལ་ཕྱག་འཚལ་ལོ། །ཀ་ཡེ་ལྷོ་རྒྱལ་འཛམ་གླིང་བྱང་གི་ཕྱོགས། །ཁ་བ་ཅན་གྱི་ཆ་ཤས་མདོ་ཁམས་སྨད། །ག་ཇུ་ཐོའུ་ཇུའི་ཉེ་འཁོར་མཛོ་དགེ་སྨད། །ང་ཡི་ལྟེ་ཁྲག་འབོ་བའི་ས་ཆ་ཡིན། །ཅ་ཅོའི་རྫུན་གཏམ་གྲགས་པ་མཆེད་པ་དང༌། །ཆ་ལེ་ཆོ་ལེ་རང་ཡང་ཁ་བླས་ཤིང༌། །ཇ་ལག་འགའ་ཞིག་ངོས་འཛིན་བྱས་པ་ཡིས། །ཉ་མོ་ལྕགས་ཀྱུས་དྲངས་བཞིན་ས་འདིར་བླུས། །ཏ་ཐཱ་ག་ཏའི་བསྟན་པའི་སྒོར་ཞུགས་ཀྱང༌། །ཐ་མལ་བག་མེད་བྱིས་པའི་སྤྱོད་པ་བསྐྱངས། །ད་ལྟ་བསམ་ན་སྤྱོད་ཚུལ་འགའ་ཞིག་ནི། །ན་ཚོད་སྨིན་པའི་དུས་ལས་དགའ་བའང་སྣང༌། །པ་སངས་ལྟར་དཀར་ལྷག་བསམ་མེད་ན་ཡང༌། །ཕ་རོལ་བསླུ་ཕྱིར་ལྷག་བསམ་ཆེ་མདོག་བསྟན། །བ་སྤུ་ཙམ་ཡང་གཡོ་བ་མེད་བཞིན་དུ། །མ་རྒན་སེམས་ཅན་ཟེར་ནས་མིག་བཙུམ་བྱེད། །ཙ་ན་ཀ་ཡི་འབྲུ་ཚད་ནོར་ཕྱིར་ཡང༌། །ཚ་གྲང་ཁྱད་དུ་བསད་ནས་གྲོང་ཆོག་ཉུལ། །ཛ་ཡའི་བསྟན་པ་འཛིན་སྐྱོང་བྱས་སོ་ལོ། །ཝ་སྐྱེས་རྒྱལ་པོར་བསྐོས་པའི་རྣམ་ཐར་ཡིན། །ཞྭ་སེར་བསྟན་པ་སྐད་པོ་ཆེ་འདི་ཡང༌། །ཟ་ཆོག་མཁན་པོ་ང་འདྲས་འཛིན་དགོས་ཚེ། །འ་འུར་གྲགས་པ་ཅི་ཙམ་ཆེ་ན་ཡང༌། །ཡ་མ་བརླ་ཞིག་མིན་པ་ཡོང་ས་མེད། །ར་ལྟར་གྱོང་བའི་སེམས་འདི་མ་ཐུལ་ན། །ལ་ལུང་དབེན་པར་བསྡད་ཀྱང་དགོས་པ་ཆུང༌། །ཤ་ཐུད་དཀོར་ཟས་བག་མེད་སྤྱོད་བཞིན་དུ། །ས་ལམ་བགྲོད་པའི་རེ་བ་ཨ་ཙ་མ། །ཧ་ཧ་མགོ་འཕངས་རྐྱང་ལས་མཐོ་བ་འདི། །ཨ་ཨ་འཇིག་རྟེན་ཕྱི་མར་ཇི་འདྲ་ཡིན། །བསམ་གྱིན་བསམ་གྱིན་རང་ལ་ཕྱག་འཚལ་ཞིང༌། །གསོལ་བ་འདེབས་སོ་རང་རྒྱུད་བྱིན་གྱིས་རློབས། །

            འདི་ནི་གཞན་མང་པོས་གསོལ་འདེབས་ཀྱི་བསྐུལ་མ་བྱུང་བས་རྐྱེན་བྱས། སྐོར་བར་འགྲོ་བཞིན་པའི་སྐབས་ཤིག་སེམས་ཀྱི་འཆར་སྒོ་ཐོལ་བྱུང་དུ་སྨྲས་པའོ། །

                                                                                                           རྩོམ་སྒྲིག་པ། བྱ་མདོ་གུར་ཀུམ།
གསལ་འདེབས།
            རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn