ཀྭ་ཡེ་ཐར་འདོད་ཀྱི་སྐལ་ལྡན་སྐྱེས་བུ་རྣམས། །ཁ་ཙམ་མིན་པ་རུ་ཆོས་ཤིག་བྱེད་འདོད་ན། །ག་ལེར་ཕྱི་བཤོལ་གྱི་དབང་དུ་མ་བཏང་བར། །ང་ཡིས་བསྒོ་བ་བཞིན་མྱུར་བར་ཉམས་སུ་ལོང༌། །ཅ་ཅོ་ལོང་གཏམ་གྱིས་ཉིན་ཞག་ཆུད་གཟོན་ཞིང༌། །ཆ་ལུགས་གསོག་བྲུན་གྱིས་དམ་སྡོམ་ངོ་ཚ་འདྲལ། །ཇ་སོགས་ཟས་གོས་ཀྱི་སྲེད་པས་བསླུ་ཞིང་འབྲིད། །ཉ་ལྟོ་བ་བཞིན་དུ་འཁྲི་བ་བཅད་ན་ལེགས། །ཏ་ཐཱ་ག་ཏ་ཡི་བསྟན་པ་ཉིན་བཞིན་འགྲིབ། །ཐ་ཆད་སྙིགས་དུས་ཀྱི་རང་མཚང་མཚོ་ལྟར་རྡོལ། །ད་ནི་མི་ཚེ་ཡང་ཕལ་ཆེར་སོང་ཟིན་པས། །ན་འཆིས་མ་སླེབས་གོང་བསྒྲིམས་ཏེ་འབད་ན་ལེགས། །པ་ར་མི་ཏ་ཡི་གཞུང་ལ་སྦྱངས་པ་ཡང༌། །ཕ་རོལ་ཤགས་འགྱེད་ཀྱི་སྦྱོར་བ་ཙམ་མིན་པར། །བ་སྤུ་གཡོ་བ་ཡི་ངེས་འབྱུང་བྱང་སེམས་དང༌། །མ་ལུས་ཆོས་ཀུན་གྱི་དེ་ཉིད་རྟོགས་ཕྱིར་འབོད། །རྩ་བ་ཁས་བླངས་ཀྱི་ཚུལ་ཁྲིམས་གཙང་དང་གཅིག །ཚ་གྲང་བཀྲེས་སྐོམ་གྱི་དཀའ་སྤྱད་བཟོད་དང་གཉིས། །ཛ་ལང་སྤངས་པ་ཡི་ཞི་དུལ་སྤྱོད་དང་གསུམ། །ཝ་ལེར་འཛོམ་པ་དེ་ཆོས་པའི་ཡང་རྩེ་ལགས། །ཞྭ་གོས་མཚར་མཚར་འདི་སྒྱུ་མའི་བསླུ་བྲིད་ཡིན། །ཟ་འདོད་གྲོང་ཆོག་འདི་རང་གཞན་གཉིས་ཕུང་ཡིན། །འ་འུར་གྲགས་སྐམ་འདི་བདུད་ཀྱི་ཕྱེ་གཏོར་ཡིན། །ཡ་མཚན་སྙིང་པོ་དེ་ཆོས་ལས་གཞན་ན་མེད། །རྭ་གདེངས་འཆི་བདག་གི་ཕོ་ཉས་མ་ཟིན་གོང༌། །ལ་འུར་སྙིང་སྟོབས་དང་བརྩོན་པའི་ཤུགས་བསྐྱེད་དེ། །ཤ་ཁྲག་གདོས་བཅས་ཀྱི་དལ་འབྱོར་གཡར་པོ་འདིས། །ས་གསུམ་རྙེད་དཀའ་ཡི་ལམ་བཟང་བསྒྲུབས་ན་ལེགས། །ཧ་ས་བཛྲ་སོགས་དམ་པའི་མགོན་གྱིས་བཟུང༌། །ཨ་མྲྀ་ཏ་འདྲ་ཡི་གདམས་པའི་བདུད་རྩི་མྱང༌། །ཕྱི་ནང་རྟེན་འབྲེལ་ཀུན་འཛོམ་པའི་དུས་ཚོད་འདིར། །ཐར་བའི་བཙན་ས་ཞིག་ཨེ་ཟིན་འབད་པ་གཅེས། །མདོར་ན་སྐྱིད་སྡུག་གི་འདམ་དབང་ཡོད་དུས་འདིར། །འདུན་པ་འཕྱུག་མེད་ཅིག་དགོས་སོ་གྲོགས་པོ་དག །གཏམ་འདི་བསྙད་པ་ལས་བྱུང་བའི་དགེ་བ་ཡང༌། །འགྲོ་ཀུན་བྱང་ཆུབ་ལ་གཞོལ་བའི་རྒྱུ་རུ་བསྔོ། །

          ཞེས་པ་འདི་ནི་དད་བརྩོན་ལྡན་པ་རབ་འབྱམས་པ་དཀོན་མཆོག་དོན་གྲུབ་ཀྱིས་བསྐུལ་ངོར་ྋབཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ། །

                                                                                                    རྩོམ་སྒྲིག་པ། བྱ་མདོ་གུར་ཀུམ།
གསལ་འདེབས། 
              རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
དྲ་བའི་སྦྲེལ་ཐགhttp://www.tb1025.cn