བཀའ་དྲིན་མཉམ་མེད་ཤཱཀྱའི་རྒྱལ་པོ་ཡིས།།

སྙིགས་དུས་མ་རུང་གདུལ་བྱ་འདུལ་བའི་ཕྱིར།།

ཐ་མལ་སྐུ་སྤྲུལ་ཕན་བདེའི་ལམ་སྟོན་པའི།།

དྲིན་ཅན་ཆོས་ཀྱི་རྗེ་ལ་ཕྱག་འཚལ་ལོ།།

ད་ལྟ་རང་ལ་བླ་མ་མང་ཡོད་ཀྱང་།།

ཉེ་རིང་མེད་པའི་མོས་གུས་མི་བྱེད་པར།།

བླ་མ་གཅིག་ལ་གཙོ་བོར་ཞེན་པ་དེ།།

ཕོ་རུས་ཞེས་བྱ་ཉོན་མོངས་འདོད་ཆགས་ཡིན།།

དེ་ལ་མོས་གུས་མི་ཟེར་ཤཱཀྱའི་སྲས།།

ཚིགས་བཅད་གཅིག་ཙམ་ཞིག་ལས་མ་ཉན་ནའང་།།

དེ་ཡི་བཀའ་དྲིན་དེ་ལ་འཁོར་ཐབས་མེད།།

དེ་ལས་མང་པོ་ཉན་ན་ལྟ་ཅི་སྨོས།།

བཀའ་དྲིན་མེད་ཅེས་མ་སྨྲ་ཤཱཀྱའི་སྲས།།

སངས་རྒྱས་བླ་མར་རག་ལས་ལྟ་ཅི་སྨོས།།

ད་ལྟ་ཉིན་རེའི་གྲོགས་ལའང་དྲིན་ཆེ་ཟེར།།

བླ་མའི་དྲིན་ལས་ཕན་བདེ་ཀུན་འབྱུང་ན།།

སྐུ་དྲིན་འཁོར་ཐབས་འདུག་གམ་ཤཱཀྱའི་སྲས།།

རང་རེ་ལས་ངན་སྒྲིབ་པ་ཆེ་ཚོད་ལ།།

བླ་མ་མི་རུ་མཐོང་བའང་དགའ་ཚད་ཡིན།།

ཁྱི་དང་བོང་བུར་མ་མཐོང་བསོད་ནམས་ཆེ།།

མོས་གུས་སྙིང་ནས་བསྐྱེད་ཅིག་ཤཱཀྱའི་སྲས།།

མཁྲིས་ནད་ཅན་གྱི་དུང་དཀར་སེར་པོ་མཐོང་།།

ལོག་ལྟ་ཅན་གྱིས་སངས་རྒྱས་ཟོག་པོར་མཐོང་།།

དད་ལྡན་མི་ཡིས་ཐམས་ཅད་སངས་རྒྱས་མཐོང་།།

དེ་ལ་གདམས་ངག་གྱིས་ཤིག་ཤཱཀྱའི་སྲས།།

བླ་མ་མཆོད་ཚེ་སངས་རྒྱས་ཀུན་བྱོན་ནས།།

མཆོད་པ་བཞེས་ནས་སློབ་མར་བྱིན་གྱིས་རློབས།།

སངས་རྒྱས་མཆོད་ཀྱང་དེ་ལྟར་ཡོང་ངེས་མེད།།

མཆོད་ཡུལ་བླ་མ་བཟང་ངོ་ཤཱཀྱའི་སྲས།།

ཆོས་ལ་སྙད་བཏགས་ཆོས་མིན་འབའ་ཞིག་བྱེད།།

གཞན་དོན་སྙད་བཏགས་རང་དོན་མཁར་ཁང་སྒྲུབ།།

རང་གི་འདོད་པ་ཁོ་ནར་དོན་གཉེར་ཞིང་།།

སློབ་མ་རྣམས་ཀྱང་བླ་མའི་རྣམ་ཐར་སྐྱོང་།།

མནར་མེད་དམྱལ་བ་མདུན་ན་འདུག་བཞིན་དུ།།

བ་སྤུ་གཡོ་འགུལ་སྐད་ཅིག་མི་འབྱུང་བར།།

ཚེ་འདིར་བདེ་བ་སྒྲུབ་ལ་རིང་བ་འདི།།

རང་ཉིད་མཁས་པར་འདུག་གམ་ཤཱཀྱའི་སྲས།།

དབེན་པའི་ཕན་ཡོན་བསམ་གྱིས་མི་ཁྱབ་སྟེ།།

ཡུལ་ངན་མེད་པས་ཉེས་སྐྱོན་རང་ཤུགས་འགགས།།

རྣམ་གཡེང་མེད་པའི་དགེ་སྦྱོར་ངང་གིས་འཕེལ།།

རིག་པ་དྭངས་པས་ཆོས་ལ་ངེས་ཤེས་སྐྱེ།།

སོ་སོའི་སྐྱེ་བོས་དབེན་པ་མ་བསྟེན་ན།།

གང་ཟག་རབ་ཀྱིས་དབེན་པ་བསྟེན་མི་དགོས།།

རྒྱལ་བ་རྣམས་ཀྱིས་དབེན་པར་བསྔགས་པ་དེ།།

སུ་ལ་དགོངས་སམ་སོམས་ཤིག་ཤཱཀྱའི་སྲས།།

རྩོམ་སྒྲིག་པ།  ཤེས་རབ་རལ་གྲི།  

གསལ་འདེབས།  

 རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 

   དྲ་བའི་སྦྲེལ་ཐགhttp://www.tb1025.cn

❈ ཅེས་པ་འདི་ནི་སྤྱན་སྔ་བ་བློ་གྲོས་རྒྱལ་མཚན་གྱིས་སྦྱར་བའོ།།