བྲན་གཡོག་ང་རྒྱལ་ཆེ་བ་དང་།།

དཀའ་ཐུབ་ལྡན་པ་ཆས་གཟོབ་དང་།།

རྒྱལ་བོ་ཆོས་བཞིན་མི་སྤྱོད་པ།།

གསུམ་པོ་ཚུལ་མིན་ཞུགས་པ་ཡིན།།

མི་ལྕོགས་བྱ་བ་རྩོམ་པ་དང་།།

མང་དང་འཁོན་ཞིང་སྟོབས་ལྡན་རྩོད།།

བུད་མེད་ཡིད་རྟོན་ངན་དང་མཛའ།།

ལྔ་བོ་མྱུར་དུ་བརླག་པའི་རྒྱུ།།

ནོར་མེད་ཟས་གོས་མཆོག་འདོད་དང་།།

གཞན་ལ་སློང་ཞིང་ང་རྒྱལ་ཆེ།།

བསྟན་བཅོས་མི་ཤེས་རྩོད་པར་འདོད།།

གསུམ་པོ་འགྲོ་བའི་བཞད་གད་ས།།

ཡུལ་བཟང་ཡོད་བཞིན་ཡུལ་ངན་ལ།།

སྐྱེ་བོ་ངན་པ་ཕོངས་ཤིང་ཆགས།།

ཀིང་ཤུའི་མེ་ཏོག་ཤ་ཡིན་ཞེས།།

ཅེ་སྤྱང་ལས་གཞན་སུ་ཞིག་རེ།།

ཆེན་པོ་རྣམས་ལ་དགྲ་བས་ཀྱང་།།

རང་གི་འཁོར་གྱིས་གནོད་པ་མང་།།

སེང་གེ་ལུས་ཀྱི་འབུ་མིན་པ།།

སྲོག་ཆགས་གཞན་གྱིས་ག་ལ་ཟ།།

རྗེ་བོས་བདག་ལ་གནོད་བྱེད་པ།།

དེ་ལ་སྐྱོབ་པར་བྱེད་པ་སུ།།

སྣང་བས་གཟུགས་ལ་སྒྲིབ་བྱེད་ན།།

དེ་ལ་ལྟ་བའི་ཐབས་གཞན་མེད།།

སྐྱེ་ངན་རང་ལ་མི་ཕན་ཡང་།།

གཞན་ལ་གནོད་པ་བྱེད་པ་ཡོད།།

སྦྲུལ་གདུག་ཟས་སུ་རླུང་ཟ་ཡང་།།

ཕ་རོལ་མཐོང་ན་མི་གསོད་དམ།།

འདོད་པ་བདེ་འོ་སྙམ་སེམས་ཀྱང་།།

དེ་སྤྱོད་སྡུག་བསྔལ་ཁོ་ནའི་རྒྱུ།།

ཆང་འཐུང་བདེ་འོ་སྙམ་པ་དེ།།

སྨྱོ་བ་བདེ་བར་བསྒོམ་པ་ཡིན།།

ཡོན་ཏན་ཅན་ལ་འཇིག་རྟེན་གུས།།

ཡོན་ཏན་འབད་པའི་ཤུགས་ལ་གནས།།

འབད་ནས་ཡོན་ཏན་མི་བསྒྲུབ་པར།།

གཞན་ལ་འཁངས་པས་ཅི་ཞིག་ཕན།།

མི་རྣམས་ཚེ་རིང་བ་ལ་སྨོན།།

རྒས་པར་གྱུར་ལ་འཇིགས་པར་ལྟ།།

རྒས་པ་འཇིགས་ཤིང་ཚེ་རིང་བར།།

འདོད་པ་བླུན་པོའི་ལོག་ལྟ་ཡིན།།

གང་ཞིག་མཁས་པ་ཡོད་བཞིན་དུ།།

དེ་ལས་ཡོན་ཏན་མི་ལེན་ན།།

མི་དེ་གདོན་གྱིས་བཏབ་པའམ།།

ཡང་ན་ལས་ཀྱིས་མནར་བ་ཡིན།།

གང་ལ་ལོངས་སྤྱོད་ཡོད་བཞིན་དུ།།

སྤྱོད་དམ་སྦྱིན་པར་མི་བྱེད་ན།།

མི་དེ་ནད་ཀྱིས་བཏབ་པའམ།།

ཡང་ན་ཡི་དྭགས་མངོན་སུམ་ཡིན།།

ཆོས་ལུགས་ཤེས་ཀྱང་མི་སྒྲུབ་ན།།

དེ་ཡི་ཆོས་ཀྱིས་ཅི་ཞིག་བྱ།།

ལོ་ཏོག་ཕུན་སུམ་ཚོགས་ན་ཡང་།།

གཅན་གཟན་དགའ་བ་ག་ལ་སྐྱེ།།

ལས་ཀྱིས་མནར་བའི་སེམས་ཅན་ལ།།

ལོངས་སྤྱོད་ཡོད་ཀྱང་སྤྱོད་མི་ནུས།།

བྱ་རོག་ལྟོགས་ཀྱང་བསྐུངས་མོད་ཀྱི།།

འགྲངས་པར་ཟ་བ་ག་ལ་ནུས།།

སྤྱོད་དང་སྦྱིན་པར་མི་ནུས་པའི།།

ནོར་དེས་ཕྱུག་པོར་བསྒོམ་ན་ནི།།

རི་བོ་གསེར་དུ་བསྒོམས་པ་ཡིས།།

ཕྱུག་པོར་བསྒྲུབ་པ་ཤིན་ཏུ་སླ།།

ཆོས་དང་ཆོས་མིན་སྨྲ་བ་ལ།།

མཁས་པ་ཤིན་ཏུ་མང་ན་ཡང་།།

དེ་ལྟར་ཤེས་ནས་ཉམས་ལེན་པ།།

འཇིག་རྟེན་འདི་ན་ཤིན་ཏུ་དཀོན།།

རིགས་གཟུགས་ལང་ཚོ་ལྡན་ན་ཡང་།།

ཡོན་ཏན་མེད་ན་མཛེས་མ་ཡིན།།

རྨ་བྱ་སྤུ་སྡུག་ཡིད་འོང་ཡང་།།

ཆེན་པོའི་རྒྱན་དུ་འོས་སམ་ཅི།།

སྣ་ཡི་ཚབ་དང་ཉོས་པའི་བུ།།

གཡར་པོའི་རྒྱན་དང་བརྐུས་པའི་ནོར།།

སློབ་དཔོན་མེད་པའི་རིག་པ་རྣམས།།

ཡོད་ཀྱང་གཞན་གྱིས་བརྩི་བ་མེད།།

མི་གང་བྱས་པ་མི་གཟོ་བ།།

དེ་ནི་གཞན་པས་རང་ལ་གནོད།།

ལྟས་ངན་སྒྲུབ་པ་ཉེས་པ་འགའ།།

དགྲ་ཡི་ཐོག་མ་རང་ལ་འབྱུང་།།

ལོངས་སྤྱོད་འགྲུབ་པར་མཐོང་ན་ཡང་།།

གནས་མ་ཡིན་ལས་སུ་ཞིག་ལེན།།

ལུག་ཐུག་འཐབ་པའི་ཁྲག་བལྡགས་པས།།

ཝ་སྐྱེས་མགོ་བོ་བཀས་ཞེས་ཐོས།།

འབྲེལ་བ་འགའ་ཡི་ངོར་བྱས་ནས།།

གཞན་ལ་སྟེར་ཀྱིས་དོར་མི་བྱ།།

བརྒྱ་བྱིན་ཡིན་ཡང་འཁོར་འདབས་རྣམས།།

ག་བུར་བཞིན་དུ་འབྲོས་པར་འགྱུར།།

རྒྱུན་དུ་འགྲོགས་པའི་གྲོགས་སྤང་ནས།།

གསར་བུ་འགའ་ལ་ཡིད་མི་བརྟན།།

འུག་པའི་རྒྱལ་པོས་བྱ་རོག་གི།།

བློན་པོ་བསྟེན་པས་ཕུང་ཞེས་གྲགས།།

མི་ངན་འབད་པས་བསྟེན་བྱས་ཀྱང་།།

རང་གི་མི་རུ་འགྲོ་བ་མེད།།

ཆུ་ནི་ཇི་ལྟར་བསྐོལ་གྱུར་ཀྱང་།།

མེ་རུ་འབར་བ་མི་སྲིད་དོ།།

རྒྱུ་མཚན་བརྟགས་ནས་ཁྲོ་བ་ནི།།

ཅུང་ཟད་རིགས་ཤིང་སེལ་བའང་ཤེས།།

རྒྱུ་མེད་པར་ནི་གང་ཁྲོ་བ།།

དེ་ཡི་བསལ་ཐབས་སུ་ཡིས་ཤེས།།

དགྲ་བོའི་ནུས་པ་མ་བརྟགས་པར།།

ཉམ་ཆུང་ན་ཡང་བརྙས་མི་བྱ།།

ཏ་ཌི་བྷ་ལ་བརྙས་པ་ཡིས།།

ནམ་མཁའ་ལྡིང་གིས་རྒྱ་མཚོ་བཅོམ།།

བསོད་ནམས་འཛད་ན་ངན་སེམས་སྐྱེ།།

རིགས་འཛད་པ་ན་བུ་ངན་སྐྱེ།།

ནོར་འཛད་པ་ན་བརྐམ་ཆགས་སྐྱེ།།

ཚེ་འཛད་པ་ན་འཆི་ལྟས་འབྱུང་།།

རང་གིས་ངན་སྤྱོད་མ་བྱས་ན།།

བརྒྱ་བྱིན་གྱིས་ཀྱང་སྨད་མི་ནུས།།

ཆུ་མིག་རང་ཉིད་མ་བསྐམས་ན།།

ས་ཡིས་མནན་པས་ག་ལ་ཐུབ།།

བྱ་བ་མི་འདྲ་བརྒྱ་ཕྲག་རྩོམ།།

མཐར་ཕྱིན་བྱ་བ་གཅིག་ཀྱང་མེད།།

བློ་རྒོད་ཕལ་ཆེར་གྲོང་བར་གྱི།།

ཁྱི་རྒན་འདྲ་བར་རྒྱུན་དུ་འཁྱམས།།

ལས་ཀྱི་ཤུགས་ཀྱིས་ཁྲིད་པ་ན།།

བློ་ཆེན་ལོག་པའི་ལམ་ནས་འགྲོ།།

མུ་སྟེགས་བྱེད་པའི་སྟོན་པ་མཆོག།།

དབང་ཕྱུག་སྨྱོན་པའི་བརྟུལ་ཞུགས་འཛིན།།

མི་གང་ཁྲིམས་ལས་གང་འདའ་བ།།

རེ་ཞིག་རྒྱལ་ཡང་ཕམ་པ་ཡིན།།

ཆུ་སྐྱར་ཁྲིམས་ལས་འདས་པ་ཡིས།།

ས་ཀུན་ཐོབ་ཀྱང་སེང་གེས་བསད།།

ཧ་ཅང་ཤེས་རབ་ཆེ་དྲགས་པའི།།

བྱ་བ་མང་ན་བདག་ཉིད་བརླག།།

རྒྱལ་པོ་དྲན་རྒྱ་ཆེ་བ་ཡིས།།

རྒྱལ་སྲིད་ཉམས་པ་ཤིན་ཏུ་མང་།།

ཧ་ཅང་ལོངས་སྤྱོད་བསགས་དྲགས་པའི།།

ནོར་ནི་རང་གི་གཤེད་མ་ཡིན།།

ཕུང་ཁྲོལ་ཕལ་ཆེར་ཕྱུག་པ་ལ།།

འབྱུང་གི་སྤྲང་པོ་བདེ་བར་རྒྱུ།།

ཧ་ཅང་མཐུ་རྩལ་ཆེ་དྲགས་ན།།

ལྕེབ་པའི་སྟ་གོན་བྱེད་པ་ཡིན།།

གཡུལ་དུ་བསད་པ་ཕལ་མོ་ཆེ།།

མཐུ་རྩལ་ཅན་ལ་བྱུང་བ་མང་།།

འབྱོར་དང་ཤེས་རབ་སྟོབས་ལ་སོགས།།

བསོད་ནམས་ལྡན་ལ་གྲོགས་སུ་འགྱུར།།

བསོད་ནམས་མེད་ན་དེ་དག་ཀུན།།

བདག་ཉིད་བརླག་པའི་རྒྱུ་རུ་འགྱུར།།

མཁས་པས་བྱ་བ་ཅི་བྱེད་ཀྱང་།།

རང་གི་བསོད་ནམས་བརྟགས་ཏེ་བྱ།།

རྩོད་དུས་བསོད་ནམས་ཕུན་ཚོགས་པ།།

སྐྱེ་བོ་བརྒྱ་ཡི་ནང་ན་དཀོན།།

རྫིང་ངན་ཆུ་ཡིས་ཁེངས་པ་ན།།

ཕྱོགས་གཅིག་ཅི་ནས་འཇིག་པ་ལྟར།།

གང་ལ་ནོར་དང་ལྡན་གྱུར་པ།།

དེ་ལ་རིགས་རྒྱུད་ཤིན་དུ་དཀོན།།

བུ་དང་ལྡན་ན་ནོར་ཆེན་དཀོན།།

དེ་དང་ལྡན་ན་དགྲ་བོས་འཇོམས།།

ཐམས་ཅད་ཕུན་སུམ་ཚོགས་གྱུར་ན།།

མི་དེ་མྱུར་དུ་འཆི་བ་མང་།།

དེས་ན་མཁས་པས་བསོད་ནམས་གསོག།

བསོད་ནམས་ཁོ་ན་ཕུན་ཚོགས་རྒྱུ།།

སུ་ཞིག་གང་ན་ཕུན་ཚོགས་པ།།

དེ་ནི་བསོད་ནམས་བསགས་པའི་རྟགས།།

རྫུན་གྱིས་ཕ་རོལ་བསླུས་སོ་ཞེས།།

སྙམ་ན་རང་ཉིད་བསླུས་པ་ཡིན།།

ལན་གཅིག་རྫུན་དུ་སྨྲ་བ་དེས།།

བདེན་པ་སྨྲས་ཀྱང་དོགས་པ་སྐྱེ།།

ལེགས་ཉེས་རྣམ་པར་མི་དཔྱོད་པར།།

ཁྲོས་ཤིང་ཕ་རོལ་གནད་འབེབས་པ།།

ཆུང་མ་བསད་པའི་ཐི་བ་ལྟར།།

གྲོགས་དང་བྲལ་བའི་མྱ་ངན་ཐོབ།།

མ་འོངས་པ་ན་མི་དཔྱོད་པར།།

བྱུང་བའི་ཚེ་ན་འབད་དེ་བཙལ།།

ཆུ་དང་ཕྲད་ན་ལྷམ་ཕུད་ཀྱི།།

མ་ཕྲད་པ་ན་ག་ལ་ཕུད།།

ཕུགས་སུ་བསྒྲུབ་པར་མི་ནུས་པའི།།

བྱ་བ་ལེགས་ཀྱང་འཇུག་མི་རུང་།།

ཁོང་པའི་ནང་དུ་མི་འཇུ་བའི།།

ཁ་ཟས་ཞིམ་ཡང་སུ་ཞིག་ཟ།།

རྩོལ་བ་དོར་ནས་འདུག་པ་ལ།།

འདི་ཕྱི་གཉིས་ཀ་འགྲུབ་མི་འགྱུར།།

འབད་པ་མེད་ན་ཞིང་བཟང་ཡང་།།

ལོ་ཏོག་ཐོབ་པར་མི་འགྱུར་རོ།།

གནས་མ་ཡིན་པའི་དུལ་དྲགས་ན།།

ཐམས་ཅད་ཀྱིས་ནི་བཀོལ་བར་འགྱུར།།

ཤིང་བལ་སྟན་དུ་བྱེད་མོད་ཀྱི།།

ཡལ་ག་སུ་ཞིག་སྟན་དུ་འདིངས།།

བྱ་བ་ངན་དང་མི་འགྲུབ་པ།།

ཕ་རོལ་བསྒོ་ཡང་བྱེད་ན་བླུན།།

སྦྱར་དུག་ཉོ་ལ་སུ་ཡིད་རྟོན།།

ཐམས་ཅད་སྦྱིན་ཞེས་སུས་སྨྲ་ནུས།།

ནོར་རྣམས་གསོག་ཅིང་མི་སྤྱོད་པ།།

རང་སྲེག་བུད་ཤིང་གསོག་པ་ཡིན།།

བུང་བ་སྦྲང་རྩི་མི་ཟ་བ།།

གཞན་གྱིས་ཁྱེར་ན་ལྕེབ་པར་རྩོམ།།

                                                                                    རྩོམ་སྒྲིག་པ། བྱ་མདོ་གུར་ཀུམ།

གསལ་འདེབས།

              རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་།གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn