ཧན་ཧྲན་གྱིས་ཧྲི་ཏི་ལ་དྲིས་པ། 

འཇིག་རྟེན་གལ་ཏེ་བདག་ལ་བརྙས། །འཕྱ་ཞིང་སྐུར་བ་འདེབས་པ་དང་། །

གད་མོ་བྱེད་ཅིང་མཐོང་མི་འཛིན། །སྡང་ཞིང་བསླུ་ན་ཅི་ཞིག་བྱེད། །

དེ་ལ་ཧྲི་ཏིས་ལན་གསུངས་པ། །བཟོད་ཅིང་གཟུར་ལ་རང་དགར་ཐོངས། །

གཡོལ་ཅིང་བསྲན་བཞིན་དེ་ལ་གུས། །དེ་ལ་ཡ་ལན་མ་བྱས་པར། །

ལོ་ནི་འགའ་ཞིག་སོང་བའི་མཚམས། །མི་དེ་ཅིར་འགྱུར་བལྟ་བར་བྱ། །

ཧན་ཧྲན་གྱིས་ནི་སླར་སྨྲས་པ། །གཞན་ཡང་དེ་ལ་གཡོལ་བ་ཡི། །

ཐབས་མཆོག་མན་ངག་ཡོད་དམ་ཅི། །དེ་ལ་ཧྲི་ཏི་ཡིས་སྨྲས་པ། །

བདག་ནི་སྔོན་ཚེ་བྱང་སེམས་མཆོག །བྱམས་པས་གསུངས་པའི་མགུར་ཞིག་མཇལ། །

ཁྱོད་ཀྱིས་གསོན་དང་བདག་གིས་མགུར། །བན་རྒན་བདག་ནི་འདི་ལྟར་སེམས། །

ཟས་ཀྱིས་ལྟོ་བ་འགྲངས་པ་དང་། །གོས་ཀྱིས་གྲང་བ་ཁེགས་པ་ན། །

བྱ་བ་ཐམས་ཅད་རང་དགར་ཐོངས། །མི་ཡིས་བདག་ལ་སྤྱོ་བ་ན། །

བདག་ནི་དེ་ལ་བཟང་ཞེས་སྨྲ། །མི་ཡིས་བདག་ལ་བརྡེེག་འཚོག་ན། །

བདག་ནི་ས་ལ་འགྱེལ་ཏེ་གཉིད། །གདོང་ལ་མཆིལ་མ་འཕེན་གྱུར་ན། །

དེ་ཉིད་རང་དགར་བསྐམ་དུ་འཇུག །བདག་ནི་ངལ་བར་མི་འགྱུར་ཞིང་། །

ཕ་རོལ་བོ་ཡང་འཁྲུག་མི་འགྱུར། །ཤེས་རབ་ཕ་རོལ་ཕྱིན་པ་འདི། །

ངོ་མཚར་ནང་གི་ཁྱད་ནོར་ཏེ། །གལ་ཏེ་གཏམ་བཟང་འདི་ཐོས་ན། །

ལམ་མི་འགྲུབ་ལ་ཅི་ཕྱིར་སྐྱོ། །ལུས་ནི་གཉོམ་ཡང་སེམས་མི་གཉོམ། །

འབྱོར་བ་དམན་ཡང་ལམ་མི་དམན། །རྩེ་གཅིག་ཉམས་སུ་ལེན་འདོད་ན། །

རྟག་ཏུ་ལམ་ལ་གནས་ཏེ་རྩོལ། །ཕལ་བ་ཁེ་གྲགས་འབྱོར་བར་དགའ། །

བདག་ནི་དེ་ལ་ལྟ་བ་མེད། །ཁེ་གྲགས་ནམ་ཞིག་སྟོང་བར་འགྱུར། །

བདག་སེམས་སྲེད་པས་འཁྲུག་པ་མེད། །གསེར་ནི་རི་བཞིན་སྤུངས་ན་འང་། །

མི་རྟག་འཆི་བ་ལྡོག་པར་དཀའ། །ཙི་ཀུང་སྨྲ་བརྗོད་གཏམ་ལ་མཁས། །

ཀྲུའུ་ཀུང་ལྷ་ཡི་མངོན་ཤེས་ལྡན། །དམ་པ་ཁུང་མེན་ཇུས་ལ་མཁས། །

ཧྥན་ཁུའེ་དཀའ་སྡུག་སེལ་བའི་མགོན། །ཧན་ཞིན་མཛད་རྗེས་རབ་ཏུ་ཆེ། །

འཆི་དུས་རལ་གྲི་གཅིག་ལས་མེད། །གནའ་ནས་ད་བར་བྱོན་པ་ལས། །

ལོ་སྟོང་འཚོ་བའི་མི་ཅི་ཙམ། །འདི་ཡིས་དཔའ་བོ་བྱས་པ་དང་། །

དེ་ཡིས་ཕོ་རྒོད་ཟེར་ན་ཡང་། །འགྲམ་སྐྲ་གཞོགས་གཉིས་དཀར་བ་དང་། །

ལོ་ལྟར་བཞིན་གྱི་མདངས་ཀྱང་འགྱུར། །ཉིན་ཞག་རེ་རེ་བགྲངས་པ་ཡིས། །

སྣང་མུན་གཉིས་ནི་མདའ་ལྟར་ཟུག །མི་རིང་ནད་ཀྱིས་མནར་འགྱུར་ཞིང་། །

མགོ་བོ་སྨད་ནས་དངན་པ་འབྱིན། །ལོ་ཆུང་དུས་སུ་དམ་པའི་ཆོས། །

ཉམས་ལེན་མ་བྱས་འགྱོད་པས་གདུང་། །ནད་ཀྱིས་མནར་ཚེ་འགྱོད་ན་ཡང་། །

འཆི་བདག་དགྲ་ལ་ཕྱིར་ཟློག་མེད། །སོར་གསུམ་དབུགས་ཀྱང་འགག་པར་འགྱུར། །

དེ་ཚེ་སུ་ལ་གནས་ལུགས་རྩོད། །སྡིགས་ཀྱང་ལན་དུ་སྨྲ་མི་ནུས། །

དྲིས་ཀྱང་དཔའ་བོ་ལྐུགས་པ་བཞིན། །བརྡེག་ཀྱང་ཡ་ལན་བྱེད་མི་ནུས། །

སྒུལ་ཚེ་ལུས་ཡོངས་འགྲིལ་བར་འགྱུར། །དེ་ཚེ་འཕྱ་མོར་སྐྲག་མི་འགྱུར། །

ངོ་སྲུང་ལས་ཀྱང་བྱེད་མི་འགྱུར། །བུ་དང་བུ་མོ་ངུ་ན་ཡང་། །

དེ་ནས་གཏན་དུ་འཕྲད་མི་འགྱུར། །ཁེ་གྲགས་སྙན་གསུམ་བཙལ་ན་ཡང་། །

འབྲོག་སྟོང་དབེན་པར་ལུས་པར་འགྱུར། །བདག་གིས་བལྟས་ན་འཇིག་རྟེན་པ། །

སྙིང་བོ་མེད་ལ་འབད་པ་མཐོང་། །དམ་པ་རྣམས་ལ་གོ་བསྐོན་ཞུ། །

བྱ་བ་བཤོལ་ཏེ་ཉམས་ལེན་མཛོད། །སྐྱེས་མཆོག་ཕོ་རབ་ངང་ཚུལ་གྱིས། །

ལས་འཕྲོ་དུམ་བུར་འབྱེད་པར་མཛོད། །མེ་མུར་དོང་ལས་འབུད་པར་མཛོད། །

ཞི་བསིལ་དཔའ་བོ་བྱེད་པར་འཚལ། །འཆི་མེད་གནས་ལུགས་འདི་རྟོགས་ན། །

ཉི་ཟླ་ལྷན་དུ་འགྲོགས་པར་འགྱུར། །

    ཞེས་པ་འདི་ནི་བོད་རྒྱའི་སྙན་ངག་ལ་དགའ་བ་རབ་ཏུ་རྒྱས་པའི་བཙུན་གཟུགས་གྱི་ལིང་འཇིགས་མེད་དུ་འབོད་པས། དམ་པ་ཧན་ཧྲན་གྱི་སྙན་རྩོམ་ལས་ཁོལ་དུ་ཕྱུངས་ཏེ་བོད་འགྱུར་ཞུས། འོན་ཀྱང་སྙན་ངག་གི་ནང་དོན་ཟབ་པ་དང་རྒྱའི་གནའ་ཡིག་གི་མ་ཕྱི་ཤིང་དཔར་རྙིང་བ་ཞིག་ཡིན་པས་ཡིག་རྙིང་ཤིན་ཏུ་ཆོད་དཀའ་བ། དེ་བཞིན་སྙན་ངག་འདི་ལ་འགྲེལ་བ་སོགས་ཀྱང་མ་མཐོང་བས་འོལ་ཚོད་ཀྱིས་བསྒྱུར་བ་ཡིན་ལ། ཕལ་མོ་ཆེ་དོན་འགྱུར་ཞུས་ཤིང་ནང་དོན་ལས་མ་ཡོལ་བ་ཞིག་ཅི་འཁྱོངས་ཞུས་ཀྱང་མ་འཇོན་པ་ཡོད་ན་བཟོད་པར་གསོལ། 

    ཧན་ཧྲན་དང་ཧྲི་ཏི་གཉིས་ནི་རྒྱ་བརྒྱུད་ནང་བསྟན་ཁྲོད་ཆེས་སྙན་གྲགས་ཆེ་བའི་དགེ་སློང་དཀའ་ཐུབ་པ་གཉིས་ཡིན་ལ། ངག་རྒྱུན་དུ་དགྲ་བཅོམ་པ་གཉིས་བསམ་བཞིན་མི་རུ་སྤྲུལ་ནས་བྱོན་པ་ཡིན་ཟེར་རོ། །

寒山问拾得

昔日寒山問拾得曰：世間有人謗我、欺我、辱我、笑我、輕我、賤我、惡我、騙我、如何處治乎？拾得曰：

只要忍他、讓他、由他、避他、耐他、敬他、不要理他，再待幾年你且看他。寒山雲：還有甚訣可以躲得？

拾得雲：我曾看過彌勒菩薩偈，你且聽我念偈曰：

老拙穿衲襖，淡飯腹中飽，補破好遮寒，萬事隨緣了。

有人罵老拙，老拙只說好；有人打老拙，老拙自睡倒；

涕唾在面上，隨他自乾了，我也省力氣，他也無煩惱，

這樣波羅蜜，便是妙中寶。若知這消息，何愁道不了。

人弱心不弱，人貧道不貧，一心要修行，常在道中辦，

世人愛榮華，我卻不待見，名利總成空，我心無足厭，

堆金積如山，難買無常限。子貢他能言，周公有神算，

孔明大智謀，樊噲救主難，韓信功勞大，臨死只一劍，

古今多少人，哪個活幾千？這個逞英雄，那個做好漢，

看看兩鬢白，年年容顏變，日月穿梭織，光陰如射箭，

不久病來侵，低頭暗嗟嘆，自想年少時，不把修行辦，

得病想回頭，閻王無轉限，三寸氣斷了，那時哪個辨？

也不論是非，也不把家辨，也不爭人我，也不做好漢，

罵著也不言，問著如啞漢，打著也不理，推著渾身轉，

也不怕人笑，也不做臉面，兒女哭啼啼，再也不得見，

好個爭名利，須把荒郊伴。我看世上人，都是精扯淡，

勸君即回頭，單把修行乾，做個大丈夫，一刀截兩斷，

跳出紅火坑，做個清涼漢，悟得長生理，日月為鄰伴。

东林寺酬韦丹刺史

                     灵澈（唐代）

年老心闲无外事，

麻衣草做亦容身。

相逢尽道修官好，

林下何曾见一人？

ཏུང་ལིན་དགོན་ནས་ཚི་ཧྲི་དཔོན་བིས་ཏན་ལ་ཕུལ་བ།

                                             ཐང་གུར་གྱི་དགེ་སློང་ལིན་ཁྲི།

ལོ་ན་བགྲེས་པས་སེམས་ཞི་བྱ་བ་བྲལ།།

རྩྭ་རས་གྱོན་ཅིང་རྩྭ་ཡི་གདན་ལ་ཤོང་།།

དཔོན་ས་བསྐྱུར་ནས་དབེན་པར་བསྔགས་མཁན་མང་།།

འོན་ཏེ་ནགས་འདབས་སླེབས་པ་གཅིག་མཐོང་ངམ།།

དགེ་སློང་སྙན་ངག་པ་ལིན་ཁྲི་ནི་༼746-816༽ཐང་རྒྱལ་རབས་ཀྱི་མི་ཡིན་ལ།འཁྲུངས་ཡུལ་ཀྲེ་ཅང་རེད།ཆུང་དུས་སློབ་གཉེར་ལ་ཤིན་ཏུ་འབད་ཅིང་འདུལ་བ་མཁན་པོའི་མཚན་སྙན་བཞེས།རྗེས་སུ་སྙན་གྲགས་ཆེ་བའི་དགེ་སློང་མང་བོ་དང་འབྲེལ་འདྲིས་བྱུང་བས་རིམ་གྱིས་སྐབས་དེར་སྙན་གྲངས་ཆེན་པོར་གྱུར།

སྙན་ངག་འདི་ནི་ཁོང་གི་གྲོགས་པོ་ཚེ་ཧྲིའི་ཐབས་ཡོད་པ་བིས་ཏན་གྱིས་རང་ཉིད་དཔོན་གནས་དོར་ཏེ་དབེན་གནས་འགྲིམས་འདོད་པའི་འཕྲིན་ཡིག་ཅིག་ཏུང་ལིན་དགོན་དུ་བསྐུར་བ་ལ་ལན་དུ་ཕུལ་བ་རེད།སྙན་ངག་འདིའི་ཕྱེད་སྔ་མས་རྩོམ་པ་བོ་དགེ་སློང་རང་གི་ངང་ཚུལ་ཏེ།སེམས་ཞི་ཞིང་ལྟོ་གོས་ཤིན་ཏུ་སྟབས་བདེར་ཡོད་པ་དང་།འཇིག་རྟེན་གྱི་བྱ་བ་དང་བྲལ་བས་གཡེང་བ་མེད་པ་སོགས་སྲོང་བོར་བརྗོད་ཅིང་།ཕྱེད་ཕྱི་མས་སྐབས་དེར་དབེན་པ་ལ་དགའ་ཁུལ་བྱེད་པའི་དཔོན་པོ་མང་བོར་ཟུར་ཟ་གནང་ཡོད།སྐབས་དེར་དཔོན་ས་ལ་ཞེན་ཆགས་མེད་པ་ནི་སྐྱེ་བུ་དམ་པར་བརྩི་བས་མང་བོ་ཞིག་གིས་རང་ཉིད་དཔོན་གནས་ལ་ཞེན་ཆགས་ཆུང་བ་ཁ་ནས་བསྒྲགས་ཏེ་ཚུལ་འཆོས་བྱས་པ་དར་བས་དགེ་སློང་ཁོང་གིས་འོན་ཏེ་ནགས་འདབས་སླེབས་པ་གཅིག་མཐོང་ངམ་ཞེས་དངོས་སུ་དཔོན་ས་དོར་ནས་དབེན་དགོན་འདིར་ཡོང་བ་གཅིག་ཀྱང་མེད་ཅེས་བིས་ཏན་ལ་ཡང་འཕྱ་མོ་གནང་བ་རེད།

临川道中

                  护国（唐代）

出谷入谷路回转，

秋风已到归期晚。

举头何处望来踪，

万刃千山鸟飞远。

ལིན་ཁྲོན་རི་ལམ་ཁྲོད་དུ་བྲིས་པ།

                      ཐང་གུར་གྱི་དགེ་སློང་ཧུའུ་གོ།

ལུང་བ་གཅིག་ནས་གཅིག་ཏུ་ཡང་ཡང་འཛུལ།།

སྟོན་གྱི་རླུང་བུ་འཇགས་ཤིང་ནམ་ཟླ་འཕྱི།།

མགོ་བོ་དགྱེས་ནས་ཡོང་སའི་ལམ་ལ་བལྟས།།

རི་བོ་མཐོ་ལ་འདབ་ཆགས་རྒྱང་དུ་འཕུར།།

ཧུའུ་གོ་ནི་ཐང་རྒྱལ་རབས་ཀྱི་དགེ་སློང་སྙན་ངག་པ་གྲགས་ཅན་ཞིག་ཡིན་མོད།འཁྲུངས་འདས་མི་གསལ།ཕལ་ཆེར་ལྷོ་བརྒྱུད་ཀྱི་མི་ཞིག་ཡིན་ངེས།ཁོང་ནི་ཡུལ་ངེས་མེད་དུ་འཁྱམས་པར་དགའ་ཞིང་སྙན་ངག་འདིའང་ཁོང་ཅང་ཞིས་ས་ཆར་ཕེབས་སྐབས་བྲིས་པ་ཞིག་སྟེ།སྙན་རྩོམ་འདིར་ཨ་སྐྱོ་བ་ཞིག་གི་འགྲུལ་དཀའ་ལམ་གྱི་གནས་ཚུལ་དང་མཐོང་སྣང་བྲིས་ཡོད།

送童子下山

                     金地藏（唐代）

空门寂寞汝思家，礼别云房下九华。

爱向竹栏骑竹马，懒于金地聚金沙。

添瓶涧底休招月，烹茗瓯中罢弄花。

好去不须频下泪，老僧相伴有烟霞。

བྱིས་པ་རི་ནས་སྐྱེལ་བ།

                    ཐང་གུར་གྱི་ཏིས་གཙང་གིས་བརྩམས།

དགོན་སྡེ་དབེན་པས་ཁྱོད་ཀྱིས་ཕ་ཡུལ་དྲན།།

རྩེ་དགུའི་རི་ལས་བབས་ཏེ་རང་ཁྱིམ་སྙེག།

སྨྱུག་མའི་རྟ་ལ་ཞོན་པའི་རྩེད་འཇོར་དགའ།།

ཀུན་དགའ་ར་བར་བསོད་ནམས་སྒྲུབ་ལ་ཞུམ།།

[ཆུ་གཙང་བླུགས་ན་བུམ་པར་ཟླ་གཟུགས་གསལ།།

རྫ་མའི་ནང་དུ་མེ་ཏོག་ཡོངས་འཛིན་བསྐོལ།།]1

འགྲོ་བའི་ཚེ་ན་མཆི་མ་འདོན་མི་དགོས།།

ང་ལ་འདུག་གྲོགས་མཚམས་སྤྲིན་སྨུག་པ་ཡོད།།

སློབ་དཔོན་ཏིས་གཙང་ལགས་ནི་（696--794）ཐང་རྒྱལ་རབས་ཀྱི་མི་ཡིན་ལ།ད་ལྟའི་ཁྲོ་ཞན་གྱི་རྒྱལ་སྲས་ཡིན།དགུང་ན་གཞོན་པའི་དུས་ནས་རབ་ཏུ་བྱུང་།འཕགས་པ་ས་ཡི་སྙིང་བོའི་སྤྲུལ་བ་ཡིན་པར་གྲགས་པས་མཚན་ལའང་ཏིས་གཙང་སྟེ་ས་སྙིང་ཞེས་བཏགས།དགུང་ལོ་བརྒྱ་ལ་ཉེ་སྐབས་སྐུ་གཤེགས་པའི་དམར་གདུང་ད་ལྟའི་བར་བཞུགས།ཁོང་གི་ཁྱད་མཚར་བའི་གཏམ་རྒྱུད་དམངས་ཁྲོད་དུ་ཧ་ཅང་མང་།

ཁོང་རི་བོ་རྩེ་དགུ་ན་བཞུགས་དུས་ཞབས་གཡོག་པ་བྱིས་པ་ཆུང་ཆུང་ཞིག་ཡོད་མོད།དེ་དགོན་པའི་ནང་གི་ལྷིང་འཇགས་ལ་སུན་ཏེ་ཡུལ་དུ་ལོག་རྒྱུའི་རེ་བ་ཞུས།སྐབས་དེར་ཁོང་གིས་ཆུ་ལེན་ཇ་སྐོལ་བྱེད་པའི་བྱིས་པ་དེ་ལ་སྐྱེལ་མའི་ཚུལ་དུ་སྙན་ངག་འདི་བྲིས་པ་ཡིན།སྙན་ངག་འདིར་བྱམས་བརྩེ་ཡིས་ཁྱབ་ཡོད་ལ།ནམ་རྒྱུན་གྱི་འཚོ་བ་དེ་ཞིབ་འབྲི་བརྒྱུད་དེ་རྩོམ་པ་བོས་བྱིས་པ་དེ་ལ་བཅངས་པའི་བརྩེ་བ་མཚོན་པར་བྱས་ཡོད།

མཆན།

1རྐང་བ་འདི་གཉིས་ལ་རྒྱའི་སློབ་དཔོན་ཅིན་ཁུང་གིས་རི་བོ་རྩེ་དགུ་ནས་འགྲེལ་བཤད་བྱས་པ་ཞིག་ཏུ་རྐང་བ་དང་བོས་ཆོས་རྣམས་སྣང་ཡང་སྒྱུ་མའི་དཔེ་དང་།གཉིས་པས་མེ་ཏོག་མཛེས་ཀྱང་མི་རྟག་ཟགས་ནས་འགྲོ་ཞེས་པའི་དཔེ་ལྟར་བཀྲལ་འདུག་མོད།དོན་དངོས་སུ་བྱིས་པ་དེས་ཁོང་ལ་ཞབས་གཡོག་སྒྲུབ་སྐབས་ཆུ་ལེན་ཇ་བསྐོལ་གྱི་ལས་ཀ་བྱས་པ་ཡིན་པས།འདིར་ནམ་རྒྱུན་གྱི་འཚོ་བའི་ཟུར་ཞིག་བསྟན་མེད་དམ་སྙམ།ལིའོ་དབྱང་ཀྲིན་廖养正གྱིས་གཙོ་སྒྲིག་ཞུས་པའི་《ཀྲུང་གོའི་དུས་རབས་རིམ་བྱོན་གྱི་གྲྭ་བའི་སྙན་ངག་ཕྱོགས་བསྒྲིགས།》ཞེས་པ་རུ་ཚིག་རྐང་གཉིས་པའི་ནང་གི་弄花དེ་ཇ་བསྐོལ་སྟངས་ཤིག་ཏུ་བཀྲལ་ཡོད་པ་ནི་དོན་དངོས་དང་མཐུན་པར་འདུག་སྙམ་མོ།།

རྩོམ་སྒྲིག་པ།ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

དྲ་བའི་སྦྲེལ་ཐགhttp://www.tb1025.cn