༄༅། །ན་མོ་གུ་རུ་མཉྫུ་གྷོ་ཥཱ་ཡ། སྡེ་བ་ཞབས་དྲུང་ཆོས་ཀྱི་རྗེ། །བདག་ལ་ཐུགས་རྗེས་ཉེ་བར་དགོངས། །བླ་མ་བསོད་ནམས་རྒྱ་མཚོ་ནི། །ས་ཕོ་སྟག་ལོར་ཨ་མདོར་བྱོན། །དེ་ནས་ད་ལོའི་ཆུ་འབྲུག་ལ། །རྒྱལ་དབང་བློ་བཟང་རྒྱ་མཚོའི་དཔལ། །བྱོན་པ་ཡན་ལ་ལོ་གྲངས་ནི། །བདུན་ཅུ་དོན་ལྔ་ངེས་པར་སོང་། །སྤྲུལ་སྐུ་བསོད་ནམས་རྒྱ་མཚོའི་དུས། །གཟིམ་ཁང་གོང་གི་སྤྲུལ་བའི་སྐུ། །བསོད་ནམས་ཡེ་ཤེས་དབང་བོ་དང་། །སྟོང་སྐོར་ཡོན་ཏན་རྒྱ་མཚོ་དང་། །མདུང་རྩེ་ཀུན་དགའ་དཔལ་བཟང་སོགས། །སངས་རྒྱས་བྱང་སེམས་དུ་མ་ཡིས། །མདོ་སྨད་ཕྱོགས་འདིར་ཡོངས་སུ་གང་། །དེ་ནས་རིང་བོར་མ་ལོན་པར། །ཆབ་མདོའི་རྗེའི་དྲུང་སྤྲུལ་བའི་སྐུ། །དགེ་འདུན་བསྟན་པ་རྒྱ་མཚོ་དང་། །རྒྱལ་སྲས་དོན་ཡོད་ཆོས་རྒྱ་མཚོ། །བྱོན་ནས་བསྟན་འགྲོའི་དོན་ཆེན་མཛད། །ཁྱད་པར་ཆུ་མོ་ཡོས་ལོ་ལ། །སྤྲུལ་སྐུ་ཡོན་ཏན་རྒྱ་མཚོ་ཕེབས། །དེ་ནས་ལོ་གྲངས་ལྔ་བཅུ་སོང་། །རྒྱལ་སྲས་དོན་ཡོད་ཆོས་རྒྱ་མཚོས། །ཤིང་ཕོ་འབྲུག་ལོར་དགོན་ལུང་བཏབ། །དེ་ནས་ལོ་གྲངས་ཞེ་དགུ་ལོན། །ཆོས་རྗེ་འོད་ཟེར་རྒྱ་མཚོ་ཡིས། །ཆུ་བྱིའི་ལོ་ལ་སྐུ་འབུམ་དུ། །གྲྭ་ཚང་བཙུགས་ནས་བསྟན་པ་སྤེལ། །དེ་ནས་ལོ་གྲངས་ཞེ་གཅིག་སོང་། །ཆོས་རྗེ་ཤེས་རབ་མཆོག་ལྡན་གྱིས། །ས་མོ་ལུག་ལ་གྲོ་ཚང་དུ། །གྲྭ་ཚང་བཙུགས་ཤིང་དགོན་ཡང་བཏབ། །ས་མོ་ལུག་ལོ་དེ་ཉིད་ལ། །ཆོས་རྗེ་དགེ་འདུན་རིན་ཆེན་པས། །ཐང་རིང་དགོན་བཏབ་གྲྭ་ཚང་བཙུགས། །དེ་ནས་ལོ་གྲངས་སོ་བཞི་སོང་། །ཆོས་རྗེ་བསྟན་པ་རིན་ཆེན་པས། །ཆུ་མོ་ཕག་ལོ་བྱ་ཁྱུང་དུ། །མཚན་ཉིད་གྲྭ་ཚང་ལེགས་པར་བཙུགས། །དེ་ནས་ལོ་གྲངས་སུམ་ཅུ་སོང་། །ཆོས་རྗེ་ཀུན་དགའ་ལེགས་པ་ཡིས། །མེ་ཕོ་སྟག་ལོར་རྡོ་བིས་སུ། །གྲྭ་ཚང་བཙུགས་ཤིང་བསྟན་པ་སྤེལ། །དེ་ནས་ལོ་གྲངས་ཉེར་བདུན་སོང་། །སྐལ་ལྡན་རྒྱ་མཚོས་ལྕགས་རྟ་ལ། །རོང་བོའི་ཆོས་སྡེར་གྲྭ་ཚང་བཙུགས། །དེ་ནས་ལོ་གྲངས་ཉེར་གསུམ་སོང་། །མེ་ཕོ་ཁྱི་ལོར་རྨ་མགུར་དུ། །སྤྲུལ་སྐུ་བློ་གྲོས་རྒྱ་མཚོ་དང་། །ཆོས་རྗེ་འོད་ཟེར་བཀྲ་ཤིས་གཉིས། །ཐུགས་མཐུན་བཤད་པའི་གྲྭ་ཡང་བཙུགས། །དེ་ནས་ལོ་གྲངས་བདུན་ཙམ་སོང་། །ཆོས་རྗེ་ཀུན་དགའ་རྣམ་རྒྱལ་གྱིས། །སྟག་ལུང་དགོན་དུ་གྲྭ་ཚང་བཙུགས། །ལོ་གྲངས་ལྔ་བཅུ་ལྷག་ཙམ་སོང་། །སེམས་ཉིད་ཐེའི་དུང་ཁ་ཏི་ཁ། །བལ་ཅུའི་དགོན་དང་སེ་ར་ལུང་། །ད་ལྟ་མཚན་ཉིད་བཤད་པའི་གྲྭ། །ལེགས་པ་གནས་པ་མང་དུ་ཡོད། །སྔོན་ཚེ་ཅོ་ནེའི་གཡེར་བ་དང་། །མེན་ཇོའུ་ཆོས་སྡེ་ཆོས་རྫོང་དང་། །མཛོ་མོ་མཁར་དང་བིས་མདོ་དང་། །ཧ་ད་བྱ་མདོའི་དགོན་སོགས་སུ། །མདོ་སྔགས་བཤད་གྲྭ་ཡུན་རིང་དར། །ལྕགས་མོ་ཡོས་ལོ་སྐུ་འབུམ་དུ། །མཁས་པ་ལེགས་པར་རྒྱ་མཚོ་ཡིས། །སྔགས་ཀྱི་བཤད་གྲྭ་འཛུགས་པར་མཛད། །དགོན་ལུང་ཆོས་རྗེ་ཟུར་བཞུགས་པ། །མཁས་པ་དོན་གྲུབ་རྒྱ་མཚོ་ཡིས། །བྱ་ཁོག་གསེར་ཁོག་ཞེས་བྱ་བར། །གྲྭ་ཚང་གསར་དུ་འཛུགས་པར་ཐོས། །དགོན་ལུང་རི་ཁྲོད་དགོན་པ་དང་། །ཐང་རིང་དང་ནི་སླས་སྔོ་དིང་། །བྱ་ཁྱུང་བྲག་ལ་སོགས་པ་ཡི། །ཐག་ཉེའི་རི་ཁྲོད་དགོན་རྣམས་སུ། །སྡོམ་བརྩོན་མང་པོས་སྒྲུབ་ལ་གཞོལ། །སྐྱེས་རིའི་གསེར་ཁང་དབེན་གནས་དང་། །འུར་དགུའི་ཤ་རྫོང་དགོན་པ་དང་། །དན་ཏིག་ཡང་ཏིག་འབུམ་གླིང་དང་། །བཀྲ་ཤིས་འཁྱིལ་ལ་སོགས་པ་ཡི། །སྒྲུབ་བརྒྱུད་དགོན་ཡང་ཤིན་ཏུ་མང་། །ད་ལྟར་ཨ་མདོའི་ས་ཕྱོགས་འདིར། །སྒྲུབ་པ་མཛད་མཁན་མང་ན་ཡང་། །ཀུན་གྱི་ནང་ན་ཉི་ཟླ་བཞིན། །འགྲན་ཟླ་མེད་པ་ཆོས་ཀྱི་རྗེ། །བློ་བཟང་བསྟན་པའི་རྒྱལ་མཚན་དང་། །དགོན་ལུང་ཆོས་རྗེ་ཀུན་སྤངས་པ། །འདན་མ་ཚུལ་ཁྲིམས་རྒྱ་མཚོའོ། །རྡོ་རྗེ་འཆང་དབང་དགེ་སློང་ཚུལ། །སྐྱིད་ཤོད་སྡེ་བ་ཆོས་ཀྱི་རྗེ། །བསྟན་འཛིན་བློ་བཟང་རྒྱ་མཚོ་བ། །ས་ཕོ་རྟ་ལོར་ཁམས་སུ་ཕེབས། །དེ་ནས་ལོ་གྲངས་སོ་ལྔ་སོང་། །སྟོང་སྐོར་འཇམ་དབྱངས་རྒྱ་མཚོ་དང་། །སྤྲུལ་སྐུ་རྒྱལ་བ་རྒྱ་མཚོ་དང་། །དེ་སྤྲུལ་མདོ་རྒྱུད་རྒྱ་མཚོ་སོགས། །སྟོང་སྐོར་སྤྲུལ་བའི་སྐུ་རྣམས་དང་། །རྒྱལ་བའི་སྲས་པོ་སེམས་དཔའ་ཆེ། །ངག་དབང་ཕྱོགས་ལས་རྣམ་རྒྱལ་དང་། །བྱམས་པ་རྒྱ་མཚོའི་སྤྲུལ་བའི་སྐུ། །དགེ་འདུན་དཔལ་བཟང་རྒྱ་མཚོ་དང་། །རྒྱལ་ཁང་རྩེ་བའི་སྤྲུལ་སྐུ་དང་། །འཇམ་དབྱངས་ཆོས་རྗེའི་སྐུ་སྐྱེ་དང་། །དབེན་ས་སྤྲུལ་པའི་སྐུ་མཆོག་དང་། །སྤྱན་རས་གཟིགས་དང་དབྱེར་མེད་པ། །ཆོས་རྗེ་དེ་མོ་སྤྲུལ་བའི་སྐུ། །ལྷ་དབང་བསྟན་པའི་རྒྱལ་མཚན་དང་། །སངས་རྒྱས་བྱང་སེམས་དཔག་མེད་ཀྱིས། །སྔ་ཕྱིར་ཨ་མདོར་བསྟན་པ་བསྐྱངས། །བདེ་མཆོག་ཕོ་བྲང་གཉའ་གོང་བྲག །བྱམས་མགོན་བཞུགས་གནས་འབུམ་གླིང་དང་། །བྱ་ཁྱུང་སྐུ་འབུམ་སྤྲུལ་བའི་སྡེ། །དན་ཏིག་ཡང་ཏིག་ལ་སོགས་པ། །ངོ་མཚར་ཅན་གྱི་གནས་ཀྱང་མང་། །སྔོན་ཚེ་སྟོན་པ་སངས་རྒྱས་ཀྱིས། །བསྟན་པ་བྱང་ནས་བྱང་དུ་རྒྱས། ། གསུངས་པའི་ལུང་བསྟན་དུས་ལ་བབ། །དེས་ན་ཕྱོགས་འདིར་མངོན་པ་དང་། །མི་མངོན་སྦས་པའི་རྣལ་འབྱོར་བ། །དཔག་ཏུ་མེད་པ་བཞུགས་པར་ངེས། །དེ་ཕྱིར་སྐྱེས་བུ་གང་ཡིན་ལ། །སྐུར་བ་མ་འདེབས་དག་སྣང་སྦྱོང་། །ད་ལྟར་ཐུབ་བསྟན་ཉི་མ་ཤར། །སངས་རྒྱས་བྱང་སེམས་དཔག་མེད་བཞུགས། །འདི་འདྲ་སྐལ་བ་བཟང་སྙམ་དུ། །ཡང་ཡང་སོམས་ལ་དགའ་བ་སྒོམ། །བསྟན་འཛིན་སྐྱེས་བུ་མཐའ་དག་ལ། །དག་སྣང་ཕྱོགས་མེད་སྐྱེ་གྱུར་ཅིག །

ཅེས་པ་འདི་ཡང་༧ སྐལ་ལྡན་རྒྱ་མཚོས་ཞིབ་ཏུ་རྩད་བཅད་ནས་གཟུ་བོར་གནས་པའི་བློས་བྲིས་པའོ། ། ། །

                                                 རྩོམ་སྒྲིག་པ།  ཤེས་རབ་རལ་གྲི།  

གསལ་འདེབས། 

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།  

དྲ་བའི་སྦྲེལ་ཐགhttp://www.tb1025.cn