ཡང་ནུབ་གཅིག་ཆར་ཆེན་པོ་བྱུང་བས་གཟིམ་ཁང་གི་ཝ་རྩ་ཤོར་ནས་ཆུ་ནར་གྱིས་བྱུང་བས། ཉེ་གནས་ཀྱིས་ལྟར་མཛད་དམ་སྙམ་ནས་བརྫུས་བསྡད་པས། གཟིམ་མལ་ནས་ཀོག་གིས་བཞེངས་ནས་ས་སྐལ་ལ་ཐེགས་པ་བཞིན་རྩེན་གྱིས་གཤེགས་ཏེ་ཝ་ཁ་དེར་ཅག་ཅག་ཅིག་མཛད་ནས་ཡང་ས་སྐལ་ལ་འབྱོན་པ་བཞིན་བྱོན་པ་ཉེ་གནས་ཀྱིས་དངོས་སུ་མཐོང༌། ཡང་གྲོག་ཅེས་བྱ་བའི་ཡུལ་ན་ཤ་འཛུལ་སྨོན་ནེ་བྱ་བ་དད་གུས་ཤིན་ཏུ་ཆེ་བ་ཡོད་པ་ཚེའི་དུས་བྱས་པས་ནངས་གཅིག་ཞལ་ནས། ཉེ་གནས་ལ་འུ་ཅག་གི་ཡང་གྲོག་གི་ཡོན་བདག་དེ་ཤི་བ་འདྲ་གསུངས། ཇི་ཙུག་གདའ་ཞུས་པས། ད་ནངས་ཡོན་བདག་དེ་གོས་གསར་པ་ཞིག་གྱོན། མེ་ཏོག་ཚན་ཞིག་ཐོགས་ནས་ངའི་དྲུང་དུ་བྱུང་གསུངས་ཏེ། དེའི་དུས་ཁོ་ནར་ཚེའི་དུས་བྱས་པ་ཇི་ལྟ་བ་བཞིན་མཁྱེན་པར་གདའ། ཡང་བྱ་ཡུལ་བ་ཆེན་པོས་སྤྱན་སྔ་གཤེགས་པའི་སྐུ་སྐལ་ཞིག་དང་ན་བཟའ་ཞིག་སྐྱེལ་དུ་བྱོན།

          དེར་གསུང་གླིང་འདྲ་མཛད་དེ། སྣེའུ་ཟུར་བའི་ཞལ་ནས་དུས་ཚོད་འདི་ཁོ་ན་ལ་འདས་ཏེ་འོང༌། ཚེས་གྲངས་འདིའི་ཉི་མའི་དུས་ཚོད་འདི་ཙམ་ལ་ཤར་ཕྱོགས་ནས་འོད་ཟེར་ཞིག་བྱུང་ནས་འཇམ་དཔལ་སྐུ་མདོག་དམར་སེར་ཞིག་ནམ་མཁའ་ལ་གཤེགས་པའི་སྣང་བ་ཞིག་བྱུང༌། ཕྱིས་འདི་ལྟར་བརྩིས་ཙ་ན་དུས་ཚོད་དང་ཚེས་གྲངས་ཀྱང་ཏིག་གེ་པར་འདུག་པ་ལ། རྟོག་པ་ཞིག་གིས་བསྒྲིབས་ནས་ཆོས་ཞུ་རྒྱུ་འདྲ་ཡོད་པ་མ་ཞུས་གསུངས་ནས་འགྱོད་པ་མཛད་དོ། །དགེ་བཤེས་སྣེའུ་ཟུར་པ་དེ་གཙོ་བོར་དགེ་བཤེས་དགོན་པ་བ་ལ་བརྟེན་ཞིང་སྐུ་མཆེད་གསུམ་ལའང་བརྟེན་ལ། དགེ་བཤེས་སྤྱན་སྔ་བ་ལ་མི་གཡོ་བའི་སྒྲུབ་སྐོར་ཞུས། དགེ་བཤེས་དགོན་པ་བ་དང་སྤྱན་སྔ་བ་གཉིས་ཀས་གནང་བའི་ཇོ་བོ་མི་གཡོ་བའི་བསྙེན་པ་མང་དུ་མཛད་པས་ཞལ་གཟིགས། དགེ་བཤེས་སྒྲེ་པ་དེ་སྤྱན་སྔའི་སློབ་མར་གདའ་ན། ཇོ་བོ་མི་གཡོ་བའི་ཡི་གེ་བཅུ་པ་ཁོ་ན་བགྲངས་པས་མི་གཡོ་བ་དམར་པོ་ཞལ་གཟིགས། ཀ་མ་བ་ལ་དྲིས་པས་ཆ་མེད་བཟླས་པ་འདྲ་བགྱིས་དང་གསུངས། དགེ་བཤེས་ཀྱི་སྤྱན་སྔར་བྱོན་པས། འོ་སྐྱེས་བུ་དད་པས་གོ་བཅད་ནས་འདུག་གི་གསུངས། འོ་ན་དམར་པོར་འོང་བ་ཇི་ལྟར་ལགས་ཞུས་པས་ཁྱོད་ཐུགས་རྗེ་ཆེ་བའི་རྟགས་ཡིན་གསུངས། འོ་ན་དེའི་སྔོན་དུ་ཇོ་མོའི་སྣང་བ་ཞིག་ཀྱང་གདའ་ན་ཞུས་པས། ཡི་དམ་གྱི་ལྷ་གང་གི་ཞལ་མཐོང་ཡང་ལས་ཀྱི་ལྷ་མོ་ཡིན་པས་སྔོན་ལ་ཇོ་མོའི་ཞལ་མཐོང་བ་ཆོས་ཉིད་ཡིན་གསུངས། དེར་དགེ་བཤེས་སྒྲེ་པས་དགེ་བའི་བཤེས་གཉེན་ལ་ཡང་དེ་ལྟ་བུའི་ཡོན་ཏན་མངའ་འམ་ཞུས་པས་ང་ལ་བསྟན་པའི་སྒོར་ཞུགས་མ་ཐག་ནས་དེ་འདྲའི་སྣང་བ་མང་དུ་བྱུང་གསུངས།

              དགོན་པ་བའི་གདམས་པ་ལ་བརྟེན་ནས་དམ་ཚིག་གསུམ་བཀོད་པའི་རྒྱལ་པོའི་སྒོམ་ཟླས་མཛད་པས་ཀྱང་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པའི་ཞལ་གཟིགས་སོ། །དགེ་བཤེས་སྣེའུ་ཟུར་པ་རང་ཉིད་སྨིན་པར་མ་ཟད་གདུལ་བྱ་གཞན་གྱི་རྒྱུད་བྱིན་གྱིས་རློབས་པ་ལའང་མངའ་བརྙེས་པ་ཞིག་སྟེ། དགེ་བཤེས་སྣེའུ་ཟུར་པའི་དྲུང་ན་འདུག་པ་ཀུན་ཀྱང་ལས་དང་ཉོན་མོངས་པ་འགོ་ནོན་པ་དང༌། ཡོན་ཏན་རིན་པོ་ཆེ་རྣམས་མེ་ལོང་གི་ངོས་ལ་ཤར་བ་བཞིན་གསལ་བ་ཆོས་ཉིད་ཡིན། དབྱར་གཅིག་ཆར་ཆེས་པས་གཟིམ་ཆུང་གི་རྩིག་པའི་ཟུར་དེ་ཞིག །དེར་ཞང་བཙུན་དགེ་འདུན་གྱིས་གཡོག་བྱས་ནས་འདག་པ་དང་རྡོ་བཏང༌། དགེ་བཤེས་ཀྱི་ཐུགས་དམ་འཕྲེང་བ་དེ་དབུ་ལ་བསྐོར་ནས་རྩིག་པ་མཛད་པའི་ཚེ་དེ་མ་ཚར་གྱི་རིང་ལ་ཞང་བཙུན་གྱིས་ཀྱང་མི་ཕྱུགས་མང་པོའི་སེམས་ཤེས་པ་བྱུང་ཞེས་ཟེར། དགེ་བཤེས་སྣེའུ་ཟུར་བས་སྐལ་བ་དང་ལྡན་པ་གཞན་མང་པོ་ལ་ལམ་རིམ་གྱི་ཁྲིད་རྒྱ་ཆེར་སྩལ་ཏེ། དགེ་བའི་བཤེས་གཉེན་དགོན་པ་བ་དེ་རང་ལ་བློ་གཏད་པའི་སློབ་མ་རྣམས་ལ་དབྱར་དུས་ལམ་རིམ་ཚར་རེ་དང་དགུན་དུས་ལམ་རིམ་ཚར་རེ་གནང་བ། དགེ་བཤེས་སྣེའུ་ཟུར་བའང་དགོན་པ་བའི་རྣམ་ཐར་རྗེས་སུ་བསྐྱངས་ཏེ་ལམ་གྱི་རིམ་པ་དེ་དབྱར་ཚར་རེ་དགུན་ཚར་རེ་གསུངས། སྐལ་བ་དང་ལྡན་པ་མང་པོ་ལམ་གྱི་རིམ་པ་ལ་ཁྲིད་པས་བསྐྱང་བཏུབ་པར་བྱུང་གསུངས། ལམ་རིམ་གྱི་ཁྲིད་རྒྱས་པར་གསུངས་པ་ལ་སློབ་མས་ཟིན་བྲིས་སུ་བྱས་པའང་མང་དུ་ཡོད། དེ་ལ་བརྟེན་ནས་བོད་འདིར་སྣེའུ་ཟུར་བའི་ལུགས་ཀྱི་ལམ་གྱི་རིམ་པ་ཤིན་ཏུ་དར་བར་བྱུང་ངོ༌། །དེ་ལྟར་བསྟན་པ་ལ་བྱ་བ་རྒྱ་ཆེན་པོ་མཛད་པས་སློབ་མ་མཐའ་ཡས་པ་བྱུང་ཞིང༌། པོ་ཏོ་བ་གཤེགས་ནས་གྲྭ་པ་མང་པོ་སྣེའུ་ཟུར་དུ་ལྷགས། སྨྱུག་རུམ་པ་འདའ་བའི་དུས་སུ།ང་ལ་བླ་མར་འཛིན་པ་རྣམས་སྦྲས་ཐོང་པ་ན་དགོན་པ་བའི་སློབ་མ་མི་གཡོ་བའི་བསྐྱེད་རིམ་ལ་བརྟན་པ་ཐོབ་པ་ཞིག་ཡོད་པས་དེར་སོང་གསུངས་ནས་ཁོང་གི་གྲྭ་པ་མང་པོ་ཞིག་ཀྱང་བྱོན།

              ཁམས་པ་ལུང་པ་གཤེགས་རྗེས་ཇ་རྫ་ཚུན་ཆད་ཁུར་ནས་བྱུང་བས་གྲྭ་པ་དེ་ཡང་འུར་གྱིས་སོང༌། ཚ་རོང་གི་ཇོ་སྟན་ནག་པོ་ལ་སོགས་པའི་འདུལ་བ་འཛིན་པ་ཆེན་པོ་མང་པོས་ཀྱང་ཞབས་ལ་གཏུགས། གཞན་ཡང་དགེ་བའི་བཤེས་གཉེན་རིན་ཆེན་སྒང་པ། ལྷ་འབྲི་སྒང་པ། འདུལ་འཛིན་ཐག་མ་བ་སོགས་བསྟན་པ་ཡོངས་རྫོགས་འཛིན་པའི་དགེ་བའི་བཤེས་གཉེན་ཡང་མང་དུ་བྱུང་ངོ༌། །ཚོགས་པ་ཡང་མང་དུས་སུ་ཉིས་སྟོང་ལྷག་ཙམ་འདུས། བུ་ཆུང་བའི་རྟེན་འབྲེལ་དེ་ཡང་མཁས་པའི་ཚད་ཅིག་མཁྱེན། བསླབ་ཕྱོགས་དང་ཕ་རོལ་ཏུ་ཕྱིན་པ་དེ་ཡང་མཁས་པའི་ཚད་ཅིག་མཁྱེན། ལན་ཅིག་བརྒྱད་སྟོང་འགྲེལ་ཆེན་ཞིག་གསུངས་པས་སྐབས་དང་པོ་གཅིག་པུ་ལ་ཟླ་བ་གསུམ་སོང་གསུངས་སོ། །བདག་ཉིད་ཆེན་པོ་འདི་སྤྲུལ་པའི་སྐུར་ཡང་གྲགས་ཏེ། དེ་དུས་འཕན་ཡུལ་དུ་ནད་ཡམས་ཆེན་པོ་བྱུང་བས་མི་མང་པོའང་ཤི །དེ་ནས་མི་མ་ཡིན་རྣམས་སྣེའུ་ཟུར་དུ་འགྲོ་བར་བརྩམས་པ་ན་ནམ་མཁའ་ལས། དེ་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྲུལ་པ་ཡིན་ནོ་བྱ་བའི་སྒྲ་བྱུང་བས་མི་མ་ཡིན་རྣམས་ཕྱིར་ལོག་སྟེ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྲུལ་པར་ཡང་གྲགས་སོ། །དེ་ལྟར་དགེ་བའི་བཤེས་གཉེན་སྣེའུ་ཟུར་བས་བསྟན་པའི་བྱ་བ་རྒྱ་ཆེན་པོ་མཛད་ནས་སྐུ་དངོས་ཀྱི་གདུལ་བྱ་རྣམས་ཕལ་ཆེར་རྫོགས་ཏེ་ཞིང་གཤེགས་པ་ལ་ཉེ་བ་ན་ཆོས་ཤིག་གནང་བའི་དུས་སུ་བྱང་ཤར་མཚམས་དེར་བྲག་བརྡབས་པ་འདྲ་བའི་སྒྲ་ཆེན་པོ་དང༌། འོད་དང་ས་གཡོ་བ་ལ་སོགས་པའང་བྱུང༌། དེ་ནས་སྐུ་ཁམས་ཅུང་ཟད་ལྟེམ་པ་ཞིག་བྱུང་བ་ལ་ཉེ་གནས་དཔོན་རྡོག་ཆུང་བ་བྱ་བ་སྣེའུ་ཟུར་བ་ཇི་སྐད་གསུངས་པ་བཞིན་བསྒྲུབ་པ་བྱེད་པ་ཞིག་ཡོད་པ་དེས་ལྷ་རྗེ་ཡེ་འབྱུང་བྱ་བའི་སྨན་པ་ཞིག་བོས་ནས་སྦྱོང་ཆུང་ཞིག་བྱས་པས་འཕྲོག་མ་ཆོད་ནས་སྐུ་ཤེད་དེ་ཞན་ཙམ་བྱུང༌། ནམ་མཁའ་ལས་བདུད་རིགས་ཀྱི་ཡི་དྭགས་མིང་འདི་ཞེས་བྱ་བས་དགེ་བཤེས་ཀྱི་ཐུགས་དམ་ལ་བར་ཆད་བྱེད་པ་འདུག་པས་བཟླས་པ་གྱིས་བྱ་བའི་སྒྲ་སྤྱན་སྔར་བཞུགས་པ་རྣམས་ཀྱིས་ཀྱང་ཚོར་བར་བྱུང་བས། ཁྱེད་རྣམས་ཀྱིས་སྔགས་རིག་དེ་ལ་མིང་སྤེལ་ཆུག་ལ་བཟླས་པ་གྱིས་གསུངས་པས་དགེ་འདུན་རྣམས་ཀྱིས་བཟླས་པ་བྱས། དེ་ནས་ཞག་བདུན་སོང་བ་ན་སྨན་པ་གཅིག་དང་ཚུལ་ཁྲིམས་འོད་ཟེར་གཉིས་ཞབས་དྲུང་ན་ཡོད་དུས་སྐྱིལ་ཀྲུང་ལམ་གྱི་མཛད་ནས་ཐུགས་དམ་དུ་ལྷན་གྱིས་སོང༌། ཁོང་གཉིས་ཀྱིས་བལྟས་པས་ཞལ་ཀོ་ཕྱང་གིས་སོང་བྱུང་ཙ་ན་སྤྱི་བོ་ནས་ཡར་ལ་འོད་འཇག་མ་ཙམ་ཞིག་དཀར་ནར་གྱིས་སོང༌། ཕྱི་ན་ཡོད་པ་ཀུན་གྱིས་སྦ་ལྕག་ཙམ་དཀར་ནར་ནར་མཐོང༌། དེ་ཇེ་ཆེ་ལ་སོང་ནས་ནམ་མཁའ་ལ་འོད་རྫ་མ་ཙམ་ཞིག་ཏུ་སོང་བ་ཞིག་བྱུང་ངོ༌། །

              དེ་ལྟར་དགེ་བའི་བཤེས་གཉེན་སྣེའུ་ཟུར་པ་དེ་དགུང་ལོ་བདུན་ཅུ་རྩ་བདུན་པ་ས་ཕོ་རྟའི་ལོ་ལ་ཞིང་གཤེགས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། །སློབ་མ་རྣམས་ཀྱིས་སྤུར་གང་དུ་སྦྱོང་སྙམ་པ་ལ་སྤུར་ལ་འཇའ་གཅིག་ཟུག་པའི་སྣེ་མོ་ཤོད་དེ་ན་ཞིང་གཅིག་ཡོད་པའི་སྟེང་དུ་ཟུག་དེར་འོད་གཡུལ་ཐང་ཙམ་ཞིག་ཞག་གཉིས་གསུམ་དུ་བྱུང་བས། དགེ་བཤེས་ཉིད་ཀྱི་བསྟན་པ་ཡིན་ཏེ་འོང་སྙམ་ནས་དེར་སྤུར་སྦྱངས་པའི་དུས་ཉི་མའི་དཀྱིལ་འཁོར་གྱི་དབུས་ནས་འོད་ཟེར་ཞིག་བྱུང་བ་སྤུར་ཁང་ལ་ནར་གྱིས་ཟུག་པས་གདུགས་ཀྱི་ཡུ་བ་འདྲ་བ་ཞིག་བྱུང༌། ཉི་མ་དེ་ལ་སྤྲིན་སྲབ་སེ་བ་ཞིག་བྱུང་བས་འཇའ་ཚོན་གདུགས་འདྲ་བས་བསྐོར་བའང་བྱུང༌། སྤུར་ཁང་གི་ཁྲིའི་ཟུར་བཞི་ལ་འཇའ་ཚོན་འཕྱར་དར་འདྲ་བ་བཞི་དང༌། གཞན་ཡང་འཇའ་ཚོན་འཕན་འདྲ་བ་དང་རྒྱལ་མཚན་འདྲ་བ་མང་པོའང་བྱུང༌། དེའི་དུས་སུ་ལྷ་བཀའ་གདམས་པ་དེ་ཞབས་ཏོག་ཀྱང་ཆེ། མི་ཡང་ཆེ་བས་མང་བསྐོལ་ཞིག་བྱས་ནས་འདི་ལ་རྟེན་ཁྱད་པར་ཅན་བྱོན་འོང་བས། དེ་བྱོན་ནའམ་བུ་ལ་ཐུགས་ལ་འདོགས་པར་ཞུ་ཟེར་ནས་སྤྱི་ཞུས་བྱས།གདུང་རྣམས་གདན་དྲངས་པའི་དུས་སུ་དགོན་པ་བས་ཕྱག་གཡས་པ་བཞག་པའི་རྗེས་ཀྱི་དབུ་ཐོད་དེ་ལྷ་བཀའ་གདམས་པ་ལ་ཕུལ་བས་དངུལ་གྱི་གདུང་རྟེན་ཞིག་བཞེངས།ཕྱིས་འབྲི་སྒང་ནས་གདན་དྲངས་ཏེ་དོན་སྟེང་གི་གདུང་རྟེན་ཆེན་མོའི་ནང་ན་བཞུགས། ཕྱག་མཉལ་སྨད་གསེར་ཕྱེ་འབུམ་པའི་ནང་ན་བཞུགས་པར་གྲགས།ཞལ་ཀོ་རིན་ཆེན་སྒང་གི་མཆོད་རྟེན་ནང་ན་བཞུགས། གཞན་ཡང་རིང་བསྲེལ་དཔག་ཏུ་མེད་པ་བྱོན་ནོ། །

              དེས་ན་བྱང་ཆུབ་ལམ་རིམ་ལ་བློ་སྦྱོང་བར་འདོད་པ་རྣམས་ཀྱིས་དགེ་བའི་བཤེས་གཉེན་སྣེའུ་ཟུར་བ་ལ་གསོལ་བ་འདེབས་ཤིང་གསོལ་བ་བཏབ་ན་སེམས་རྒྱུད་ལས་སུ་རུང་བ་དང༌། དབེན་པར་སྒྲུབ་ཚུགས་ཟིན་པ་དང༌། སྒྲུབ་པ་བྱེད་པ་ལ་མི་མ་ཡིན་གྱི་བར་ཆད་མི་འབྱུང་བ་དང༌།ལྷག་པར་ཀླུ་ནད་ཞི་བ་ལ་ཤིན་ཏུ་བསྔགས་སོ། །གཙོ་བོར་ནི་བདག་ཉིད་ཆེན་པོ་འདིའི་མཛད་པ་རྣམ་ཐར་རྣམས་དྲན་པར་བྱས་ལ་སྤྱིར་སྐྱེ་བོ་མང་པོ་དང་བསྲེ་བསླད་མི་བྱ་བ་དང༌། ལྷག་པར་གྲོང་ཁྲོད་དུ་རྒྱུ་བ་སྤངས་ཏེ་དབེན་པའི་གནས་སུ་ལམ་གྱི་རིམ་པའི་ཉམས་ལེན་མཐར་ཕྱིན་པ་ཞིག་བྱའོ།། །།

                                                                          རྩོམ་སྒྲིག་པ། མང་ར་བ།
       གསལ་འདེབས། 
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
             དྲ་བའི་སྦྲེལ་ཐགhttp://www.tb1025.cn