དེ་ཡང་རྗེ་བཙུན་བྱམས་པ་མགོན་པོས་དུས་དང་ཡུལ་དང་རིགས་དང་རུས་དང་ཡུམ་ལྔ་ལ་གཟིགས་ནས་དགའ་ལྡན་གྱི་གནས་ནས་བབས་ཏེ་འཛམ་བུའི་གླིང་དུ་འབྱོན་པ་ཡིན་ནོ། །དེ་ཡང་དུས་ནི་ཚེ་ལོ་བརྒྱད་ཁྲི་པ་སྣོད་བཅུད་ཐམས་ཅད་ཕུན་སུམ་ཚོགས་པ་བྱམས་མགོན་རང་ཉིད་ཀྱི་འདུལ་བར་འོས་པའི་སེམས་ཅན་རྣམས་འདུལ་བའི་དུས་ལ་གཟིགས་པའོ། །ཡུལ་ནི་འཛམ་བུའི་གླིང་ལ་གཟིགས་པའོ། །རིགས་ནི་དེའི་དུས་ཀྱི་མི་རྣམས་བྲམ་ཟེའི་རིགས་མཆོག་ཏུ་བྱེད་པས་བྲམ་ཟེའི་རིགས་ལ་གཟིགས་པའོ། །རུས་ནི་ཡབ་ཡུབ་གཉིས་ཀའི་རིགས་རྒྱུད་སྐྱོན་མེད་པ་ལ་གཟིགས་པའོ། །ཡུམ་ནི་བྲམ་ཟེ་ཚངས་ལྡན་མ་ཡོན་ཏན་ཐམས་ཅད་དང་ལྡན་ཞིང་སྨོན་ལམ་གྱི་མཐུ་ཅན་དེ་ལ་གཟིགས་པའོ། །

              དེ་ལྟར་གཟིགས་ནས་དུས་ལ་བབ་པ་ན་ལྷ་རྣམས་ཀྱིས་མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བཅས་དགའ་ལྡན་ནས་བབས་ཏེ་འཛམ་བུའི་གླིང་དུ་གཤེགས་ཏེ་ཡུམ་ཚངས་ལྡན་མའི་ལྷུམས་སུཞུགས་སོ། །དེ་ནས་ཟླ་བ་བཅུའི་རིང་ལ་དཀར་ཕྱོགས་ཀྱི་ལྷ་རྣམས་ལ་ནུབ་རེ་བཞིན་ཆོས་སྟོན་པ་སོགས་གདུལ་བྱའི་དོན་རྒྱ་ཆེར་མཛད་ནས་ཟླ་བ་བཅུ་སོང་བ་ན་ཡུམ་ཚངས་ལྡན་མ་སྐྱེས་མོས་ཚལ་མེ་ཏོག་བཟང་རྒྱས་ཞེས་བྱ་བར་བྱོན་ནས་ཕྱག་གཡས་པས་ཤིང་གི་ཡལ་ག་ལ་འཇུས་ཏེ་གནམ་དུ་གཟིགས་པ་ན་རྩིབ་ལོགས་གཡས་ནས་སྐུ་བལྟམས། དེའི་འོད་ཀྱིས་འཇིག་རྟེན་ཐམས་ཅད་བཀང་སྟེ་སྐད་ཅིག་དེ་ལ་སེམས་ཅན་རྣམས་ཀྱི་སྡུག་བསྔལ་རྒྱུན་བཅད་དེ་བདེ་བས་ཁྱབ་པར་བྱས། ལྷའི་དབང་པོ་བརྒྱ་བྱིན་གྱིས་བར་སྣང་ལས་བླངས་ཀླུའི་རྒྱལ་པོ་རྣམས་ཀྱིས་ནམ་མཁའ་ལས་བདུད་རྩིའི་ཁྲུས་གསོལ། དེ་ནས་ཕྱོགས་བཞིར་གོམ་པ་བདུན་བོར་བའི་ཤུལ་དུ་གཏེར་ཆེན་པོ་རེ་དང་པདྨ་རེ་བྱུང་ཞིང༌། ཕྱོགས་བཞིར་གཟིགས་ཏེ།

               ང་ཡི་སྐྱེ་བའི་མཐའ་མ་ནི། །འདི་ཡིན་ཡང་སྲིད་ཡོད་མ་ཡིན། །ཡང་དང་ཡང་དུ་ཕྱིར་མི་འོང༌། །ཟག་མེད་མྱ་ངན་འདས་པར་འགྲོ། །ཞེས་གསུངས། དེའི་ཚེ་བྱམས་མགོན་སྐུ་བལྟམས་པ་དང་མཉམ་དུ་འཁོར་ལོས་བསྒྱུར་བའི་རྒྱལ་པོ་དུང་ལ་སྲས་སྟོང་དང༌། གཞན་ཡང་འཇིག་རྟེན་ན་ཡ་རབས་ཀྱི་རིགས་མང་པོ་བཙའ་ཞིང་གཏེར་རྣམས་ཀྱང་ཁ་བྱེ། ལྷ་རྣམས་ཀྱིས་མེ་ཏོག་གི་ཆར་འབེབས། བྱམས་མགོན་གྱི་དབུ་ཐོག་ཏུ་གདུགས་དཀར་པོ་བཟུང༌། ཕྱོགས་ཐམས་ཅད་རོལ་མོའི་སྒྲ་སོགས་མཆོད་པའི་བྱེ་བྲག་སྣ་ཚོགས་པས་ཁྱབ་པར་བྱེད་དོ། །དེ་ནས་ཡབ་ཡུམ་གཉིས་ཀྱིས་གཞོན་ནུ་དེ་མཚན་མཁན་ལ་བསྟན་པ་ན་འདི་ནི་བྱང་ཆུབ་སེམས་དཔའ་བྱམས་པ་ཞེས་བྱ་བ་ཡིན་པས་མྱུར་དུ་འཚང་རྒྱ་བར་འགྱུར་རོ། །ཞེས་ལུང་སྟོན།

              དེ་ནས་བྱམས་མགོན་གྱིས་སྒྱུ་རྩལ་སྟོན་པ་སོགས་གཞོན་ནུ་རོལ་རྩེད་མཛད་པས་སྲོག་ཆགས་གྲངས་མེད་པ་ཞིག་སྨིན་གྲོལ་ལ་འགོད་ཅིང་ལོ་ཉི་ཁྲིའི་བར་དུ་ཁྱིམ་དུ་བཞུགས། དེ་ནས་འཚང་རྒྱ་བའི་དུས་ལ་བབ་པ་ན། རྒྱལ་པོ་དུང་གིས་རིན་པོ་ཆེ་སྣ་ཚོགས་ཀྱིས་བརྒྱན་པའི་མཆོད་སྡོང་སྦོམས་སུ་འདོམ་དྲུག་ཅུ་རྩ་བཞི། འཕང་དུ་འདོམ་སྟོང་ཡོད་པ་ཞིག་བྱམས་པའི་ཡབ་ཚངས་རབས་ལ་ཕུལ་ལོ། །ཚངས་རབས་ཀྱིས་བྲམ་ཟེ་རྣམས་ལ་བྱིན་ནོ། །བྲམ་ཟེ་རྣམས་ཀྱིས་དེ་མ་ཐག་བགོས་སོ། །རྗེ་བཙུན་བྱམས་པས་མཆོད་སྡོང་དེ་ཉིད་མི་རྟག་པར་དགོངས་ཏེ་ཡབ་ལ་གནང་བ་གསོལ་ནས་བྲམ་ཟེ་དང་རྒྱལ་བུ་བཞི་སྟོང་བརྒྱད་ཅུ་དང་བཅས་ཏེ་རབ་ཏུ་བྱུང་ནས་ཀླུ་ཤིང་ཞེས་པའི་བྱང་ཆུབ་ཀྱི་ཤིང་འཕང་དུ་དཔག་ཚད་ཙམ་དུ་འཕགས་ཤིང༌། ལོ་འདབ་དང་འབྲས་བུས་མཛེས་པའི་ཡལ་གས་ཁོ་ར་ཁོར་ཡུག་ཏུ་རྒྱང་གྲགས་དྲུག་གི་བར་ཁེབས་པའི་དྲུང་དུ་འཁོད་དེ་རབ་ཏུ་བྱུང་བའི་ནུབ་མོ་ཉིད་ལ་མངོན་པར་རྫོགས་པར་སངས་རྒྱས་སོ། །

              དེ་ནས། ད་ནི་གནས་བཟང་མཆོག་ཐོབ་པས། །ད་བཟོད་གནས་གཞན་མི་འགྲོ་སྟེ། །འཆི་བདག་ན་རྒ་ལས་གྲོལ་བས། །ཟབ་མོ་བདུད་རྩིའི་སྒོ་འདི་རྙེད། །ཅེས་གསུངས་ནས་ཞག་བདུན་དུ་ཆོས་མ་གསུངས་པ་ལས། ཚངས་པས་གདུགས་དཀར་པོ་གསེར་གྱི་རྩ་བ་ཅན་ཁ་དོག་སྣ་ལྔའི་མུ་ཏིག་དང་དྲིལ་བུའི་དྲྭ་བས་གཡོགས་པ་དཔག་ཚད་གསུམ་ཡོད་པ་འཛིན་ཅིང༌། ལྷའི་རིན་པོ་ཆེས་བརྒྱན་པའི་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ཞིང༌། མེ་ཏོག་དང་རིན་པོ་ཆེ་དང་སྤོས་ཀྱི་ཆར་རབ་ཏུ་ཕབ་སྟེ། རྗེ་བཙུན་བྱམས་པ་མགོན་པོ་ཁྱེད་ཉིད་ཀྱིས། །ཆོས་ཀྱི་འཁོར་ལོ་བླ་མེད་བསྐོར་དུ་གསོལ། །ཞེས་སོགས་ཀྱིས་གསོལ་བ་བཏབ་པས་ཅང་མི་གསུངས་པས་གནང་སྟེ། མེ་ཏོག་མཛེས་པར་རྒྱས་པའི་སྐྱེད་མོས་ཚལ་དུ་གཤེགས་སོ། །

                                                                                                                     རྩོམ་སྒྲིག་པ། མང་ར་བ།
             གསལ་འདེབས།
                      རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                      དྲ་བའི་སྦྲེལ་ཐགhttp://www.tb1025.cn