མུ་སྟེགས་སྟོན་པ་དྲུག་སོགས་ཆོ་འཕྲུལ་གྱིས་བཏུལ་ཚུལ། དེ་ནས་བཅོམ་ལྡན་འདས་དགུང་ལོ་ང་བདུན་ལ་བབ་པ་མེ་ཕོ་འབྲུག་གི་ལོ་གཉན་ཡོད་དུ་ཆོ་འཕྲུལ་ཆེན་པོ་སྟོན་པར་མཛད་དེ། དེ་ཡང་འདི་ལྟར་སྟོན་པ་མངོན་པར་རྫོགས་པར་སངས་རྒྱས་ནས་ལྷ་མི་བགྲང་པ་ལས་འདས་པ་ཞིག་སྨིན་ཅིང་གྲོལ་བར་མཛད། འཛམ་བུའི་གླིང་གྱི་རྒྱལ་པོ་ཆེ་དགུ་ཐམས་ཅད་ཀྱིས་སྟོན་པ་ཉན་ཐོས་ཀྱི་དགེ་འདུན་དང་བཅས་པ་མཆོད་པ་ན་རྫོགས་བྱེད་ལ་སོགས་པའི་མུ་སྟེགས་ཀྱི་སྟོན་པ་དྲུག་པོ་ཕྲག་དོག་གིས་ཡིད་དཀྲུགས་ཏེ་སྟོན་པ་ལ་འགྲན་པར་འདོད་པ་ན་བདུད་སྡིག་ཏོ་ཅན་གྱིས་ཀྱང་མུ་སྟེགས་ཀྱི་སྟོན་པ་དྲུག་པོའི་རྒྱུད་བསྐུལ་ཏེ།སྟོན་པ་ལ་འགྲན་པའི་བསམ་པ་ཆེས་ཆེར་སྐྱེས་ནས་རྫོགས་བྱེད་ལ་སོགས་པ་མུ་སྟེགས་པ་དྲུག་པོ་དེས་རྒྱལ་པོ་གཟུགས་ཅན་སྙིང་པོའི་དྲུང་དུ་ཕྱིན་ཏེ། རྒྱལ་པོ་བདག་ཅག་དང་གཽ་ཏ་མ་གཉིས་ཀ་ཤེས་པར་སྨྲ་བ་ཡིན་ན་ལྷན་ཅིག་རྫུ་འཕྲུལ་འགྲན་དུ་གཞུག་པའི་རིགས་སོ། །རྒྱལ་པོས་བགད་དེ་ཁྱེད་རྣམས་རེ་གླེན།སངས་རྒྱས་རྫུ་འཕྲུལ་ཆེན་པོ་དང་ལྡན་ན་ཇི་ལྟར་འགྲན། སྟོན་པ་དྲུག་གིས་སྨྲས་པ།བདག་ཅག་གཉིས་ཀྱིས་ཞག་བདུན་ན་རྫུ་འཕྲུལ་ཆེན་པོ་འགྲན་ན་མངོན་ཏེ། བསྒྲུན་པའི་འོག་ཏུ་གང་རྒྱལ་བ་གཟིགས་ཤིག རྒྱལ་པོས་ཀྱང་བདག་གིས་དེ་བཞིན་བགྱི་ན་ཁྱེད་སྐྱེངས་ཀྱིས་དོགས་སོ། །ཞེས་སྨྲས་ཏེ། རྒྱལ་པོས་བཅོམ་ལྡན་འདས་ལ་དོན་དེ་གསོལ་བ་དང༌། ང་ཉིད་དུས་མཁྱེན་ནོ་ཞེས་གནང་ངོ༌། །རྒྱལ་པོས་ཆོ་འཕྲུལ་སྟོན་པའི་གནས་བྱེད་དུ་བཅུག་པ་ན། ཞག་བདུན་གྱི་ཉིན་པར་བཅོམ་ལྡན་འདས་དགེ་འདུན་དང་བཅས་པ་ཡངས་པ་ཅན་དུ་གཤེགས་སོ། །

               སྟོན་པ་དྲུག་གིས་ཀྱང་གཽའུ་ཏ་མའི་ཆོ་འཕྲུལ་གྱིས་བདག་མི་ཐུབ་བོ་ཞེས་བྱས་ན་ཁྱེད་ཡིད་མི་ཆེས་ཀྱིས་ཆོ་འཕྲུལ་འགྲན་པའི་དུས་བྱས་པ་ལས་བྲོས་སོ་ཞེས་བསྒྲགས་ནས་ང་རྒྱལ་སྐྱེས་ཏེ་རྗེས་སུ་བསྙེགས་ཤིང་རྒྱལ་པོ་གཟུགས་ཅན་སྙིང་པོ་ཡང་བཅོམ་ལྡན་འདས་ཀྱི་རྗེས་སུ་ཡངས་པ་ཅན་དུ་དོང་ངོ༌། །ཡངས་པ་ཅན་པ་རྣམས་ཀྱིས་བཅོམ་ལྡན་འདས་བསུས་སོ། །སྟོན་པ་དྲུག་གིས་ལི་ཙ་བྱི་རྣམས་ལ་གཽ་ཏ་མ་དང་ཆོ་འཕྲུལ་འགྲན་པར་གནང་ན་ཞག་བདུན་ན་འགྲན་ནོ། །དེ་བཅོམ་ལྡན་འདས་ལ་གསོལ་བ་དང༌། ང་ཉིད་ཀྱིས་དུས་མཁྱེན་ནོ། །ཞེས་གསུངས་ནས།སང་འགྲན་པ་ལས་དེ་རིང་བཅོམ་ལྡན་འདས་ཡུལ་ཀཽ་ཤམྦིར་རྒྱལ་པོ་ཨུ་ཏྲ་ཡ་ན་ཅན་དུ་གཤེགས་སོ། །དེར་ཡང་འགྲན་པར་ཞུས་པ་ལས་ཡུལ་ཝརྒར་རྒྱལ་པོ་ཤུན་ཙི་ད་ལ་ཅན་དུ་གཤེགས་སོ། །དེར་ཡང་འགྲན་པར་ཞུས་པ་ལས། ཡུལ་ཙམྤར་རྒྱལ་པོ་ཨིནྡྲ་ཝརྨི་ཅན་དུ་གཤེགས་སོ། །དེར་ཡང་འགྲན་པར་ཞུས་པ་ལས་ཝཱ་ར་ཎཱ་སིའི་རྒྱལ་པོ་ཚངས་བྱིན་ཅན་དུ་གཤེགས་སོ། །དེར་ཡང་འགྲན་པར་ཞུས་པ་ལས། སེར་སྐྱར་ཤཱཀ་རིགས་ཅན་དུ་གཤེགས་སོ། །སྟོན་པ་དྲུག་པོ་ཡང་ང་རྒྱལ་ལྷག་པར་སྐྱེས་ཏེ། རྒྱལ་པོ་གཟུགས་ཅན་སྙིང་པོ་ལ་གཽའུ་ཏ་མ་དང་རྫུ་འཕྲུལ་འགྲན་དུ་ཆུག་ཅིག་ཅེས་ཡང་ནས་ཡང་དུ་བསྐུལ་ལོ། །རྒྱལ་པོས་གལ་ཏེ་ཁྱོད་དོན་འདི་ལན་གསུམ་གྱི་བར་དུ་ཟེར་ན་སྤྱུགས་ཏེ་བཏང་ངོ༌། །ཞེས་སྨྲས་པ་དང༌། དེ་རྣམས་འདི་སྙམ་དུ་རྒྱལ་པོ་འདི་ནི་གཽའུ་ཏ་མའི་ཕྱོགས་བྱེད་ཀྱིས། རྒྱལ་པོ་གསལ་རྒྱལ་དེ་གཟུ་བོ་ཞིག་ཡོད་ཅེས་གྲག་གི དེའི་གན་དུ་འགྲོའོ་ཞེས་བཅོམ་ལྡན་འདས་ཀྱི་རྗེས་བཞིན་དུ་བསྙེགས་སོ། །

              བཅོམ་ལྡན་འདས་ཀྱང་མཉན་ཡོད་དུ་བྱོན་ནས་རྒྱལ་བྱེད་ཚལ་དུ་བཞུགས་སོ། །དེའི་ཚེ་རྒྱལ་པོ་གཟུགས་ཅན་སྙིང་པོ་གཞོན་པ་ལྔ་བརྒྱ་དང་འཁོར་འབུམ་བཞི་ཁྲི་དང་། ལི་ཙ་བྱི་བཞོན་པ་ལྔ་བརྒྱ་དང༌། འཁོར་བདུན་ཁྲི་དང༌།ཨུ་ཏྲ་ཡ་ན་འཁོར་སྟོང་ཕྲག་བརྒྱད་ཁྲི་དང༌། ཤུན་ཙི་ད་ལ་འཁོར་ལྔ་ཁྲི་དང༌། ཨིནྡྲ་ཝརྨི་དྲུག་ཁྲི་དང༌། ཚངས་བྱིན་བརྒྱད་འབུམ་དང༌། ཤཱཀ་རིགས་ཁྲི་ཁྲག་དགུ་པོ་དག་རྗེས་སུ་འབྲངས་ཏེ། མཉན་ཡོད་ཀྱི་ལྗོངས་ཡོངས་སུ་གང་བར་གྱུར་ཏོ། །དེ་ནས་སྟོན་པ་དྲུག་གིས། རྒྱལ་པོ་གསལ་རྒྱལ་ལ་སྨྲས་པ། དགེ་སྦྱོང་གཽའུ་ཏ་མ་དང་བདག་ཅག་ཆོ་འཕྲུལ་འགྲན་པར་དུས་བྱས་པ་ལས། དུས་ལ་བབ་པ་དང་བྱོན་ཞིང་བྲོས་ཏེ། ད་ནི་འཁོར་མང་པོ་ཡང་རྒྱལ་པོའི་ཡུལ་དུ་ཚོགས་ཀྱིས། རྒྱལ་པོ་ནི་ས་དང་འདྲ་བས་བྱམས་སྡང་མེད་པའི་ཞལ་ཆེ་གཅོད་པའི་རིགས་སོ། །གཽ་ཏ་མ་རྒྱལ་ན་བདག་ཅག་དེའི་དབང་དུ་མཆི་ལ། བདག་ཅག་རྒྱལ་ན་བདག་ཅག་དབང་བར་མཛོད་ཅིག་རྒྱལ་པོས་སྨྲས་པ། ཅིའི་ཕྱིར་ཁྱེད་ལྟ་བུའི་མ་རབས་ཅི་ཡང་མི་ཤེས་པས་ཆོས་ཀྱི་རྒྱལ་པོ་ཆེན་པོ་དང་ཆོ་འཕྲུལ་འགྲན་པར་བྱེད་ཁྱེད་ཕམ་གྱིས་དོགས་སོ། །སྨྲས་པ་ཁྱོད་ཀྱང་གཽའུ་ཏ་མས་བསླུས་ཟིན་ནམ་བསྒྲུན་ན་མངོན་པར་འགྱུར་རོ། །རྒྱལ་པོས་སྨྲས་པ། གལ་ཏེ་དེ་ལྟ་ན་བདག་གིས་བཅོམ་ལྡན་འདས་ལ་ཞུའོ། །

              དེ་ནས་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་ལན་གསུམ་གྱི་བར་དུ་གསོལ་བས། བཅོམ་ལྡན་འདས་ཀྱིས་མཉན་ཡོད་འདིར་སྔོན་གྱི་སངས་རྒྱས་རྣམས་ཀྱིས་ཆོ་འཕྲུལ་ཆེན་པོ་བསྟན་ཞིང་སྐྱེ་བོའི་ཚོགས་ཆེན་པོའང་ཞག་བདུན་ན་འདུ་བར་མཁྱེན་ནས། རྒྱལ་པོ་ཞག་བདུན་ན་དེ་བཞིན་བྱ་ཡི་ཁྱོད་སོང་ལ་འདི་མ་ཡིན་པ་ཡངས་པ་དག་ཏུ་འདུན་ཁང་རྩིགས་ཤིག དེ་ནས་རྒྱལ་པོས་སྟོན་པ་དྲུག་ལ་དོན་དེ་སྨྲས་པ་དང༌། དེ་རྣམས་བགྲོས་པ་གཽའུ་ཏ་མ་འབྲོས་པའམ་གྲོགས་ཚོལ་བ་གཉིས་ལས་གདོན་མི་ཟ་བར་གྲོགས་འཚོལ་བར་འགྱུར་བས། བདག་ཅག་གིས་ཀྱང་གྲོགས་བཙལ་ལོ་ཞེས། གྱད་ཡུལ་གྱི་ཀུན་ཏུ་རྒྱུ་རབ་བཟང་གི་དྲུང་དུ་སོང་སྟེ་བདག་ཅག་གི་གྲོགས་གྱིས་ལ་གཽའུ་ཏ་མ་དང་རྫུ་འཕྲུལ་འགྲན་པར་གྱིས་ཤིག རབ་བཟང་གིས་སྨྲས་པ། ཁོ་བོ་ཉིན་མོ་དལ་འབབ་ཀྱི་མཚོ་འགྲམ་ན་གནས་ནས་བསོད་སྙོམས་བསླངས་པ་མ་དྲོས་པར་ཟ་བ་ན། ཤཱ་རིའི་བུའི་དགེ་ཚུལ་སྐུལ་བྱེད་ཀྱིས་ཕྱག་དར་ཁྲོད་པ་ཁྱེར་བ་མ་དྲོས་པའི་ལྷས་བཀྲུས་ནས་འབུལ་ཞིང་དེའི་ཆུ་བདག་གི་མགོར་འདེབས་པས། བདག་ཅག་དེའི་ཡང་སློབ་དང་ཡང་མི་མཉམ་ན། རྫུ་འཕྲུལ་ཆེན་པོ་དེ་ཁྱེད་ཀྱི་རྫུ་འཕྲུལ་ལ་བོས་པ་མ་ལེགས་སོ། །

                                                                                                                      རྩོམ་སྒྲིག་པ། མང་ར་བ།
              གསལ་འདེབས། 
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn