དེ་ནས་རིམ་གྱིས་ཡུལ་གཞན་དང་དུས་གཞན་དག་ཏུ་འདུལ་བ་ལུང་དང༌།མདོ་སྡེ་དྲན་པ་ཉེར་བཞག་དང༌། རྒྱ་ཆེར་རོལ་པའི་མདོ་དང༌། མདོ་སྡེ་ལས་བརྒྱ་པ་དང༌། རྟོགས་བརྗོད་བརྒྱ་པ་ལ་སོགས་པ་འཁོར་ལོ་དང་པོའི་སྡེར་གཏོགས་ཀྱི་མདོ་སྡེ་མཐའ་ཡས་པ་ཞིག་བཀའ་བསྩལ་ཏོ། །དེ་ལྟར་སྟོན་པ་མངོན་པར་རྫོགས་པར་སངས་རྒྱས་ནས་ཀཽ་དི་ནྱ་ལ་སོགས་པའི་ལྔ་སྡེ་དང༌། གྲགས་པ་ལ་སོགས་པ་ཉེ་བའི་ལྔ་སྡེ་དང༌། རྒྱལ་པོའི་ཁབ་ཏུ་ཕེབས་ནས་ཤཱ་རིའི་བུ་དང་མོའུ་འགལ་གྱི་བུ་འཁོར་ལྔ་བརྒྱ་དང་བཅས་པ་དང༌། འོད་སྲུང་ཆེན་པོ་ལ་སོགས་པ་བདག་ཉིད་ཆེན་པོ་བགྲང་བ་ལས་འདས་པ་ཞིག་རྗེས་སུ་བཟུང་སྟེ་སྙན་པའི་གྲགས་པས་སའི་སྟེང་ཐམས་ཅད་ཁྱབ་པ་ན།རྒྱལ་པོ་ཟས་གཙང་མས་དེ་ཐོས་ཏེ་དགའ་ཞིང་མགུ་ལ་མཇལ་བར་འདོད་ནས་ཡང་དང་ཡང་དུ་ཕོ་ཉ་བཏང་སྟེ་སེར་སྐྱའི་ཡུལ་དུ་འབྱོན་དགོས་པར་གསོལ་བ་བཏབ་པ་ན་བཅོམ་ལྡན་འདས་ཀྱིས་ཡབ་ཟས་གཙང་མ་དང༌། སྲུ་སྐྱེ་དགུའི་བདག་མོ་དང༌། བདུད་རྩི་ཟས་དང་བྲེ་བོ་ཟས་དང༌། སྒྲ་གཅན་འཛིན་དང༌། ཀུན་དགའ་བོ་ལ་སོགས་པ་ཤཱཀྱ་བགྲང་བ་ལས་འདས་པ་དག་འདུལ་བའི་དགོས་པ་ཉེ་བར་གཟིགས་ནས་འཆར་ཀ་ཕོ་ཉར་འོངས་པ་ལ་འབྱོན་པར་ཞལ་གྱིས་བཞེས་ཏེ། དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་རྒྱལ་པོའི་ཕོ་བྲང་དུ་མི་བཞུགས་ཀྱི།གྲོང་ལས་འཕགས་པའི་གཙུག་ལག་ཁང་དུ་བཞུགས་སོ་ཞེས་འཕྲིན་དང་བཅས་བཏང་ངོ༌། །གདུལ་བྱ་འདུལ་ཕྱིར་སེར་སྐྱའི་གནས་སུ་གཤེགས་པ། དེ་ནས་བཅོམ་ལྡན་འདས་ཀྱིས་མོའུ་འགལ་གྱི་བུ་ལ་བཀའ་བསྩལ་པ། དགེ་སློང་རྣམས་ལ་བཅོམ་ལྡན་འདས་སེར་སྐྱའི་གཞིར་གཤེགས་ཏེ་ཡབ་སྲས་གདན་འཛོམས་ན། ཁྱེད་ཅག་ལས་ཡབ་སྲས་མཇལ་བ་སུ་བལྟ་བ་སྤྲོ་བ་དེ་དག་ཆོས་གོས་ལོངས་ཞིག དེས་ཀྱང་དེ་བཞིན་དུ་བྱས་ནས་བཅོམ་ལྡན་འདས་འཁོར་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ལྷན་ཅིག་འབབ་ཆུ་རོ་ཧི་ཀའི་འགྲམ་དུ་བྱོན་ཏེ། གྲོང་ཁྱེར་ཆེན་པོ་སེར་སྐྱ་དང་ཉེ་བར་བྱོན་པར་གྱུར་ཏོ། །དེ་ལྟར་བྱོན་པ་རྒྱལ་པོ་ཟས་གཙང་མས་ཐོས་ནས་རྒྱལ་པོས་གང་ཡང་འབབ་ཆུ་རོ་ཧི་ཀ་ནས་ནྱ་གྲོ་དྷའི་ཀུན་དགའ་ར་བའི་བར་གྱི་ལམ་ཤིན་ཏུ་མཛེས་པར་བྱས་ཏེ། ས་ཕྱོགས་ཡངས་ཤིང་རྒྱ་ཆེ་བར་གདན་རྣམ་པར་བཀྲ་བ་དག་ཤོམ་དུ་བཅུག་གོ །སེར་སྐྱའི་གཞིའི་རྡོ་བ་དང༌། གྱོ་མོ་དང༌། གསེག་མ་རྣམས་བསལ་ནས། ཙན་དན་གྱི་ཆུས་ཆག་ཆག་བཏབ། དྲི་ཞིམ་པོའི་སྤོས་ཕོར་ཉེ་བར་བཤམས། དར་གྱི་ཆུན་འཕྱང་མང་པོ་དཔྱངས་ཏེ། ཤཱཀྱ་རྣམས་ལ་བསྒོ་བ། ཁྱེད་ཀྱིས་བཞོན་པའི་མཆོག་རྣམས་སྟ་གོན་གྱིས་ཤིག དེ་ཅིའི་ཕྱིར་ཞེ་ན། དེ་རིང་བདག་ཅག་རྣམས་ཀྱིས་བཅོམ་ལྡན་འདས་མཆོག་ཏུ་བལྟ་ན་སྡུག་པ་དེ་བལྟ་ཞིང་འདོང་ངོ༌། །ལྷ། ལགས་སོ་ཞེས་གསོལ་ནས་ཤཱཀྱ་རྣམས་ཀྱིས་ཐེག་པའི་མཆོག་རྣམས་མྱུར་དུ་སྟ་གོན་བྱས་སོ། །

              དེ་ནས་རྒྱལ་པོས་སེར་སྐྱའི་གནས་དང་ནྱ་གྲོ་དྷའི་ཀུན་དགའ་ར་བའི་བར་དེ་དག་ཐམས་ཅད་རྒྱལ་པོའི་གཤེགས་ཤུལ་དུ་མཉམ་པར་བྱེད་དུ་བཅུག་ཅིང་བྱེ་མ་གཙང་བ་བདལ་བ་ལ་མེ་ཏོག་གིས་བཀྲམ། དར་གྱི་ལྡ་ལྡི་བྲེས།གར་མཁན་དང༌། ཀླུ་མཁན་དང༌།གྱད་དང༌། བུམ་རྔ་ཐོགས་པ་དག་བཀོད་ནས། རྒྱལ་པོ་ཟས་གཙང་བཞོན་པ་ཞོན། ཤཱཀྱ་གཞོན་ནུ་བརྒྱད་ཁྲི་མང་པོས་བསྐོར་ཏེ། རྒྱལ་པོའི་དཔལ་ཆེན་པོ་དང་མཐུ་ཆེན་པོས་སོང་ངོ༌། །དེ་ལ་ཤཱཀྱ་ཁ་ཅིག་གིས་ཤིང་རྟ་ཡང་སྔོ་ལ་དེ་འདྲེན་པའི་རྟ་ཡང་སྔོ་བ་དང༌། རྒྱན་རྣམས་དང་དྲིལ་བུ་གཡེར་ཁའི་དྲ་བ་ཡང་སྔོ་བ་དང༌། འཁོར་རྒྱན་སྔོན་པོ་ཅན་གྱིས་བསྐོར་བ། གདུགས་དང་རལ་གྲི་དང༌། ཐོད་དང༌། ནོར་བུ་ཅན་གྱི་རྔ་ཡབ་དང༌། ལྷམ་ཡང་སྔོན་པོ་དང་ལྡན་པ། ཁ་ཚར་མ་བཅད་པའི་རས་སྔོན་པོ་གྱོན་པ། རྒྱན་སྔོན་པོ་ཐོགས་པའིཞལ་ཏ་པ་རྣམས་ཞལ་ཏ་བྱེད་པ་རྒྱན་སྔོན་པོ་ཅན་གྱིས་ལྕགས་ཐོགས་པའི་ཁྲིད་པ་དུ་མ་དང་ལྡན་པ། རྒྱལ་མཚན་སྔོན་པོ་བསྒྲེང་བ།ཤིང་རྟ་རེ་རེ་ཞིང་ཡང་རྒྱན་སྔོན་པོ་ཅན་གྱི་མི་བརྒྱ་ཕྲག་རེ་རེས་བསྐོར་བ་དག་དང༌། དེ་བཞིན་དུ་ཁ་ཅིག་སེར་བ་དང༌། ཁ་ཅིག་དམར་བ་དང༌། ཁ་ཅིག་དཀར་བ་དང༌། ཁ་ཅིག་ཁྲ་བོར་གྱུར་བ་ཤ་སྟག་གོ །ཤིང་རྟ་དེ་དག་རེ་རེའི་ཕྱི་བཞིན་དུ་གླང་པོ་ཆེ་བརྒྱད་ཁྲི་གསེར་གྱི་རྒྱན་དང་གསེར་གྱི་རྒྱལ་མཚན་ཅན། གསེར་གྱི་དྲྭ་བས་གཡོགས་པའི་སྟེང་དུ་རིན་པོ་ཆེ་སྣ་བདུན་གྱི་ཁང་པ་བརྩེགས་པ་བརྒྱད་ཁྲི་བཞག་ནས་དོང་བར་གྱུར་ཏོ། །དེའི་རྗེས་སུ་རྟ་གསེར་གྱི་རྒྱན་གྱིས་བརྒྱན་པ། གསེར་གྱི་དྲིལ་བུ་གཡེར་ཁ་བརྒྱུས་པ། རིན་པོ་ཆེ་སྣ་བདུན་གྱི་རྒྱན་དང་ལྡན་པ་བརྒྱད་ཁྲི་བཤམས་ནས་དོང་བར་གྱུར་ཏོ། །དེ་ལྟར་རྒྱལ་པོ་ཟས་གཙང་ཤཱཀྱའི་ཚོགས་ཀྱིས་ཟླ་བ་ཁམས་པ་བཞིན་དུ་བསྐོར་ཏེ་བྱུང་བ་གཟིགས་ནས། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་བསྩལ་པ། ཤཱཀྱ་རྣམས་སེར་སྐྱའི་གནས་ནས་བྱུང་བ་དེ་དག་ནི་སུམ་ཅུ་རྩ་གསུམ་གྱི་ལྷ་སྐྱེད་མོས་ཚལ་དུ་དོང་བ་དང་རྗེས་སུ་མཐུན་ནོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་མཐུ་ཆེ་བ་ལྔ་སྡེ་བཟང་པོ་དང༌། གྲགས་སྦྱིན་དང༌། འཆར་ཀ་དང༌། ལྟེང་རྒྱས་འོད་སྲུང་དང༌། ག་ཡ་འོད་སྲུང་དང༌། ཆུ་ཀླུ་འོད་སྲུང་དང༌། འོད་སྲུང་ཆེན་པོ་དང༌། ཤཱ་རིའི་བུ་དང༌། མོའུ་འགལ་གྱི་བུ་ཆེན་པོ་ལ་སོགས་པ་དགེ་སློང་སྟོང་ཉིས་བརྒྱ་ལྔ་བཅུས་བསྐོར་ཞིང༌། ལྷ་རྣམས་འདུ་བར་དགོངས་པ་ན་རྒྱལ་པོ་ཆེན་པོ་བཞི་དང༌། ལྷ་མ་ཡིན་གྱི་དབང་པོ་ཐག་བཟང་རིས་དང༌། མདོར་ན་འདོད་པ་དང་གཟུགས་ན་སྤྱོད་པའི་ལྷའི་བུ་མཐུ་ཆེ་བ་རྣམས་ཀྱང་དེར་འདུས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མ་ང་རྒྱལ་ཆེ་བར་མཁྱེན་ཅིང༌། ཞབས་ཀྱིས་སེར་སྐྱའི་གཞིར་གཤེགས་ན་ཤཱཀྱ་རྣམས་ཀྱང་མི་གུས་པ་སྐྱེ་བར་དགོངས་ནས་ཕྱོགས་བཞིར་འབར་བ་དང༌། འོད་འབྱིན་པ་དང༌། ཆུའི་རྒྱུན་འབེབས་པ་ལ་སོགས་མཛད་ནས་རྫུ་འཕྲུལ་དེ་བཏུལ་ཏེ་བཅོམ་ལྡན་འདས་ཏ་ལ་བདུན་གྱི་སྲིད་ཙམ་ན་བཞུགས་སོ། །དགེ་སློང་རྣམས་ཏ་ལ་དྲུག་གི་སྲིད་ཙམ་གྱི་བར་མཐོ་དམན་དུ་གྱུར་ནས་རྒྱལ་པོ་འདུས་པའི་ཁྱམས་དེར་གཤེགས་སོ། །དེའི་མོད་ལ་བཅོམ་ལྡན་འདས་མི་གང་ལྷག་ཙམ་གྱི་སྟེང་གི་བར་སྣང་ལ་འཆག་པར་མཛད་པའི་གཡས་ཕྱོགས་ན་ཚངས་པ་འགྲོའོ། །གཡོན་དུ་ནི་བརྒྱ་བྱིན་ནོ། །ཞབས་འབྲིང་དུ་འདོད་ལྷ་རིས་བཞི་པོས་གདུགས་འཛིན་ཅིང་བསིལ་ཡབ་ཀྱིས་གཡོབ་བོ། །རྒྱལ་པོ་ཆེན་པོ་བཞིས་ནི་ཤར་ནུབ་ཏུ་ཐལ་མོ་སྦྱར་ཏེ་འདུག་གོ །ལྷ་རྣམས་ཀྱིས་རིན་པོ་ཆེའི་ཁང་པས་བར་སྣང་གང་བར་བྱས་ཤིང༌། མེ་ཏོག་དང་སྤོས་ཀྱི་ཕྱེ་མས་མཆོད། གླུ་དབྱངས་དང་སིལ་སྙན་དག་སྒྲ་འབྱིན་ཅིང༌། སྤོས་ཀྱི་ཆར་སྤྲིན་དག་ལས་སྤོས་ཀྱི་ཆར་ཟིམ་བུ་ཟིམ་བུ་དག་བབས་སོ། །དེ་ནས་དགེ་སློང་རབ་ཏུ་མང་པོ་དང༌། ཆོ་འཕྲུལ་དེ་ལྟ་བུ་དག་མཐོང་ནས། ཡབ་རྒྱལ་པོས་བཅོམ་ལྡན་འདས་གང་ཡིན་པ་མ་ཤེས་ཏེ་རྨོངས་པར་གྱུར་ནས་ནག་པོ་འཆར་ཀ་རྒྱལ་པོའི་ཞབས་འབྲིང་ན་གནས་པ་དེ་ལ་དྲིས་པ། ངུར་སྨྲིག་གྱོན་པའི་རབ་ཏུ་བྱུང་བ་མང་པོ་ཞིག་ཡོད་ན་གཞོན་ནུ་གང་ཡིན། ནག་པོ་འཆར་ཀས་བཅོམ་ལྡན་འདས་བསྟན་ནས་སྨྲས་པ། འདི་ནི་བཅོམ་ལྡན་འདས་ལགས་མི་དབང་ད་གཟིགས་ཤིག དེ་ནས་བཅོམ་ལྡན་འདས་ཀྱི་མཐུས་ལྷ་དང་མི་དེ་དག་ཕན་ཚུན་དུ་ཡང་མཐོང་བར་གྱུར་ཅིང་རྒྱལ་པོས་ཀྱང་བཅོམ་ལྡན་འདས་དང༌། བཅོམ་ལྡན་འདས་ལ་མཆོད་པ་བྱེད་པའི་ལྷ་རྣམས་དང་ལྷའི་རིན་པོ་ཆེ་སྣ་བདུན་གྱི་ཁང་པ་བརྩེགས་པས་བར་སྣང་གང་བ་མཐོང་ནས།བཅོམ་ལྡན་འདས་ཀྱི་གསུངས་པ་དེ་ནི་ངོ་མཚར་ཆེ་སྟེ། འདི་གཞོན་ནུའི་དུས་སུ་ང་ནི་ཆོས་ཀྱི་དབང་ཕྱུག་ལ་དབང་བྱའོ་ཞེས་གསུངས་ན་དེ་ནི་འདི་ཡིན་པ་ལྟ་སྟེ། བདག་ནི་མིའི་འཁོར་ཅན་དུ་ཟད་ན། བཅོམ་ལྡན་འདས་ནི་ལྷ་དང་མིའི་འཁོར་ཅན་དུ་གྱུར་ཏོ་སྙམ་མོ། །སེར་སྐྱའི་གཞི་ན་གནས་པའི་ཤཱཀྱ་རྣམས་དགེ་བའི་རྩ་བས་བསྐུལ་ནས་ཐམས་ཅད་བྱུང་སྟེ། ཅི་ཡབ་སྲས་ལ་ཕྱག་བྱེད་དམ། འོན་ཏེ་སྲས་ཡབ་ཀྱི་ཞབས་ལ་ཕྱག་བྱེད་པ་བལྟའོ་སྙམ་ནས་ཐམས་ཅད་ཚོགས་པར་གྱུར་ཏོ། །དེ་ནས་རྒྱལ་པོ་ཆེན་པོ་ཟས་གཙང་མས་བླ་གོས་རིན་ཐང་མ་མཆིས་པ་ཕྲག་པ་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ནས་རང་གི་ཐོར་ཙུགས་ནོར་བུ་དང་ཅོད་པན་གྱིས་བརྒྱན་པ་བཅོམ་ལྡན་འདས་ཀྱི་ཞབས་ལ་བཏུད་ནས་ཕྱག་བཙལ་ཏེ་ཚིགས་སུ་བཅད་པ། བློ་གྲོས་ཡངས་པ་ཁྱོད་ལ་འདི་དང་ནི། །ཀུན་སྤྱད་ཞབས་ལ་ལན་གསུམ་ཕྱག་བགྱིས་ཏེ། །བལྟམས་པའི་ཚེ་ནས་ས་ནི་གཡོས་པ་དང༌། །འཛམ་བུའི་གྲིབ་མ་སྐུ་ལས་མ་འདས་པའོ། །ཞེས་གསོལ་བ་དང༌། དེ་ལྟར་ཡབ་ཀྱིས་སྲས་ཀྱི་ཞབས་ལ་ཕྱག་བྱས་པ་དེའི་ཚེ་ཤཱཀྱ་རྣམས་ཀྱིས་འདི་ཅིའི་ཐ་ཚིག་ཅེས་མ་དད་པ་དང༌། རྒྱལ་པོ་ཟས་གཙང་མས་ཤཱཀྱ་དེ་རྣམས་ལ་སྨྲས་པ། ཤེས་ལྡན་དག་ད་གདོད་ཁོ་བོས་གཞོན་ནུའི་ཞབས་ལ་ཕྱག་བྱས་པ་མ་ཡིན་ཏེ། འདི་དང་ལན་གསུམ་དུ་ཕྱག་བགྱིས་སོ་ཞེས་གོ་བར་བྱས་སོ། །དེ་ནས་བཅོམ་ལྡན་འདས་ཀྱི་རྫུ་འཕྲུལ་དེ་བཏུལ་ནས། དགེ་སློང་གི་དགེ་འདུན་གྱི་དགུང་ལ་འདོད་པའི་ལྷའི་བུ་རྣམས་ཀྱིས་སེང་གེའི་ཁྲི་ལྷའི་རས་སྣ་ཚོགས་སུ་སྤེལ་ནས་བཤམས་པ་ལ་བཞུགས་ཏེ། འདོད་ལྷ་རྣམས་ཀྱིས་སྟེང་དུ་ལྷའི་བླ་བྲེ་བྲེས་ཤིང༌། ཁྱམས་དེར་ཡང་ལྷའི་རས་བཅོས་བུ་བཏིང་ངོ༌། །དེ་ནས་རྒྱལ་པོ་ཟས་གཙང་སྐད་འཛེར་ཅིང་སྙིང་སྔངས་ལ་མིག་མཆི་མས་གང་བཞིན་དུ་ཚིགས་སུ་བཅད་པས་ཞུ་བ་ཞུས་པ། གཞལ་མེད་ཁང་གི་གནས་རྣམས་སུ། །ཡབ་ཀྱི་ཁབ་ན་བཞུགས་པ་ལས། །དགོན་པ་འཇིགས་དང་བཅས་རྣམས་སུ། །ཇི་ལྟར་བུར་ནི་འབའ་ཞིག་བཞུགས། །བཅོམ་ལྡན་འདས་ཀྱི་བཀའ་བསྩལ་པ། །མི་ཡི་བདག་པོ་གང་དུ་ནི། །ཁྱིམ་གྱི་འཆིང་བ་ལས་གྲོལ་བ། །འཕགས་པ་ཡི་ནི་གནས་པ་བཅུས། །ཐུབ་པ་རྣམས་ནི་གནས་པར་མཛད། །ཅེས་སོགས་རྒྱ་ཆེར་ཡབ་དང་སྲས་གཉིས་དེ་ལྟ་བུའི་བཀའི་འབེལ་མཆིད་གླེང་བར་མཛད་དེ། དེས་རྒྱལ་པོ་ཟས་གཙང་དགའ་ནས་ཞབས་ལ་ཕྱག་བྱས་ཏེ། བདེ་བར་གཤེགས་པ་ལ་ཀུན་ནས་རྟོག་ཅིང་འདུག་གོ །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ།གང་བདག་གི་བུས་འདི་ལྟ་བུའི་ཡོན་ཏན་ཐོབ་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་ནྱ་གྲོ་དྷའི་ཀུན་དགའ་ར་བར་འཁོར་དེ་དང་མཐུན་པའི་ཆོས་བཤད་པས་ཟས་དཀར་ལ་སོགས་པ་ཤཱཀྱ་བདུན་ཁྲི་བདུན་སྟོང་གིས་བདེན་པ་མཐོང་ངོ༌། །དེའི་སང་ཚངས་པས་བསྐོར་བའི་སྐྱེད་མོས་ཚལ་དུ་གཤེགས་ཏེ་ཆོས་བསྟན་པས་བྲེ་བོ་ཟས་ལ་སོགས་པ་ཤཱཀྱ་བདུན་ཁྲི་དྲུག་སྟོང་གིས་བདེན་པ་མཐོང་ངོ༌། །

                                                                                                                      རྩོམ་སྒྲིག་པ། མང་ར་བ།
              གསལ་འདེབས། 
                       རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                       དྲ་བའི་སྦྲེལ་ཐགhttp://www.tb1025.cn