དེ་ནས་བྱང་ཆུབ་སེམས་དཔས་རྒྱལ་པོའི་ཁབ་ཏུ་བསོད་སྙོམས་ལ་བྱོན་པ་ན་རྒྱལ་པོ་གཟུགས་ཅན་སྙིང་པོ་འཁོར་བཅས་ཀྱིས་མཐོང་སྟེ་ངོ་མཚར་ནས་བྱང་ཆུབ་སེམས་དཔའི་དྲུང་དུ་ཕྱིན་ཏེ་བརྟགས་པ་ན་གཞོན་ནུ་དོན་ཐམས་ཅད་གྲུབ་པ་ཡིན་པར་ངོ་ཤེས་ནས་བློར་མ་ཤོང་བར་བརྒྱལ་ལོ། །བརྒྱལ་བ་དེ་ལས་སངས་ནས་བྱང་ཆུབ་སེམས་དཔའ་ལ་ཕྱག་བཙལ་ཏེ་གསོལ་བ། ཁྱོད་ལ་རྒྱལ་སྲིད་ཀྱི་ཕྱེད་འབུལ་གྱི། བདག་གི་གྲོགས་མཛོད་ལ་ཕྱིན་ཆད་རིའི་སུལ་དང་རྩའི་གདིང་བ་ལ་མ་བཞུགས་ཤིག་ཅེས་ཞུས་པ་ན། ལན་གསུངས་པ། རྩེ་མོ་སྣ་ཚོགས་ཡངས་པར་གྱུར་པ་ཡི། །ལྷུན་པོ་གངས་ཅན་རླུང་གིས་བསྐྱོད་སྲིད་ཀྱིས། །ང་ཡི་བློ་ནི་ཐར་པ་ལ་བརྟེན་པ། །འདོད་པའི་ཤུགས་ཀྱིས་བསྐྱོད་པར་མི་ནུས་སོ། །ཞེས་གསུངས།

               དེ་ནས་བྱང་ཆུབ་སེམས་དཔས་དྲང་སྲོང་རྣས་ཀྱི་ཁྲོད་དུ་བྱོན་ཏེ་དྲང་སྲོང་དཀའ་ཐུབ་སྤྱོད་པ་དེ་དག་གི་དཀའ་ཐུབ་གང་དང་གང་སྤྱོད་པ་དེ་དང་དེ་ལས་ཉིས་འགྱུར་ཉིས་འགྱུར་དུ་མཛད་པ་ན་དྲང་སྲོང་དེ་དག་ངོ་མཚར་ཏེ་དགེ་སྦྱོང་འདི་ནི་ཆེན་པོ་ཞིག་གོ་ཞེས་བརྗོད་པས་དེ་ཕྱིན་ཆད་དགེ་སྦྱོང་ཆེན་པོ་ཞེས་མཚན་དུ་གྲགས་སོ། །དེ་ནས་ཡབ་ཟས་གཙང་མས་བྱང་ཆུབ་སེམས་དཔའ་གཡོག་མེད་པར་འཁྱམ་མོ་ཞེས་ཐོས་ནས། རྒྱལ་པོ་ཟས་གཙང་མས་གཡོག་སུམ་བརྒྱ་དང༌། སྲུ་སྐྱེ་དགུའི་བདག་མོས་ལྷས་བསྟན་ནས་མི་ཉིས་བརྒྱ་ཞབས་འབྲིང་དུ་བཏང་ངོ༌། །དེ་ནས་བྱང་ཆུབ་སེམས་དཔའ་འཁོར་ལྔ་བརྒྱ་ཡོད་པ་དེ་དང་མཉམ་དུ་སྤྱོད་པ་ན་དབེན་པར་འཁོར་མང་པོ་བསྟེན་པ་འདི་མ་ལེགས་སོ་སྙམ་དུ་དགོངས་ནས་བྱིངས་རྣམས་ཕྱིར་སློག་ཅིང༌། ཡབ་དང་སྲུའི་ཕྱོགས་ཀྱི་ངོ་བསྲུང་བ་དང་ལྔ་པོ་དེ་ལ་དགེ་བའི་རྩ་བ་ཡོད་པར་མཁྱེན་ནས་ཀོའུ་དི་ནྱ་ལ་སོགས་པ་མི་ལྔ་ཞབས་འབྲིང་དུ་བསྟེན་ནོ། །དེ་ནས་བྱང་ཆུབ་སེམས་དཔས་ཆུ་ཀླུང་ནཻ་རཉྫ་ནའི་འགྲམ་གྱི་ཤིང་དྲུང་ཞིག་ཏུ་དཀའ་ཐུབ་ལ་བཞུགས་ཏེ་ཐོག་མར་འབྲས་འབྲུ་རེ་རེ་ཙམ་གསོལ་ཞིང༌། དེ་ནས་རིམ་གྱིས་འབྲུ་རེ་རེ་གསོལ་བ་དེ་ཡང་སྤངས་ནས་ལོ་དྲུག་ཏུ་སྐྱིལ་མོ་ཀྲུང་བཅས་ནས་ཏིང་ངེ་འཛིན་ལ་བཞུགས་སོ། །དེ་ལྟར་དཀའ་བ་སྤྱད་པའི་བརྟུལ་ཞུགས་ལོ་དྲུག་པོ་དེས་ལྷ་དང་མི་ཁྲག་ཁྲིག་ཕྲག་བཅུ་གཉིས་དང༌། བྱེ་བ་ཕྲག་དྲུག་ཅུ་རྩ་བཞི་ཐེག་པ་གསུམ་ལ་པར་མཛད་དོ། །

              དེའི་ཚེ་ལྷ་ནས་ལྟོ་འཕྱེའི་བར་སྡེ་བརྒྱད་རྣམས་ཀྱིས་ཉིན་མཚན་དུ་མཆོད་ཅིང་སྨོན་ལམ་འདེབས་སོ། །ལྷ་དང་མི་གང་དག་རྒྱ་ཆེན་པོ་ལ་མོས་པ་དེ་དག་གིས་ནི་བྱང་ཆུབ་སེམས་དཔའ་རིན་པོ་ཆེའི་ཁང་པ་བརྩེགས་པ་ན་འདུག་ཅིང༌། བདེ་བ་མྱོང་བར་མཐོང་ངོ༌། །ལྷ་དང་མི་ཆོས་བསྟན་པས་སྨིན་པར་མཛད་པ་རྣམས་ཀྱིས་ཆོས་འབའ་ཞིག་འཆད་པར་མཐོང་ངོ༌། །སེམས་ཅན་སྤྱི་མཐུན་གྱིས་ནི་དཀའ་བ་སྤྱོད་པ་སྔར་སྨོས་པ་བཞིན་དུ་མཐོང་ངོ༌། །དཀའ་སྤྱད་མཛད་པ་དེས་ཕྱི་རོལ་པའི་དྲང་སྲོང་ས་ཡ་ཕྲག་བཞི་དང་ཉིས་འབུམ་བཏུལ་ཏེ་བྱང་ཆུབ་ཏུ་སྨིན་པར་མཛད་དོ། །

               དེ་ནས་བྱང་ཆུབ་སེམས་དཔས་འདི་སྙམ་དུ་དགོངས་ཏེ།དཀའ་ཐུབ་གཅིག་པོས་འཚང་རྒྱ་བར་མི་ནུས་ཀྱི་མཐའ་གཉིས་སྤངས་པའི་དབུ་མའི་ལམ་ལ་བརྟེན་ཏེ་འཚང་རྒྱ་བར་བྱའོ་སྙམ་དུ་དགོངས་ཤིང༌། ཕྱོགས་བཅུའི་སངས་རྒྱས་རྣམས་ཀྱིས་ཀྱང་དཀའ་ཐུབ་ལས་བཞེངས་ཏེ་བྱང་ཆུབ་ཀྱི་སྙིང་པོར་འཚང་རྒྱ་བའི་མཛད་པ་སྟོན་དགོས་སོ་ཞེས་ཡང་དང་ཡང་དུ་བསྐུལ་བ་ལ་བརྟེན་ནས། དཀའ་ཐུབ་ལས་བཞེངས་ཏེ་དབུགས་འབྱུང་རྔུབ་ཅི་བདེར་མཛད་པ་དང༌། ཞལ་ཟས་རགས་པ་གསོལ་ཏེ་སྐུ་ལུས་ཀྱི་སྟོབས་བསྐྱེད་དོ། །

                                                                                                                               རྩོམ་སྒྲིག་པ། མང་ར་བ།
              གསལ་འདེབས། 
                        རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                         དྲ་བའི་སྦྲེལ་ཐགhttp://www.tb1025.cn