དེའི་ཚེ་གནས་གཙང་མའི་ལྷའི་བུ་རྣམས་བྱང་ཆུབ་སེམས་དཔའ་མངལ་དུ་འཇུག་པའི་ལོ་བཅུ་གཉིས་ཀྱི་གོང་ནས་བྲམ་ཟེར་སྤྲུལ་ཏེ། འོག་ནས་འཆད་པའི་རྣམ་པས་མངལ་དུ་ཞུགས་པར་གྱུར་ན་མཚན་དཔེ་དང་ལྡན་ཏེ། འཁོར་ལོས་བསྒྱུར་རྒྱལ་ལམ།སངས་རྒྱས་སུ་འགྱུར་རོ་ཞེས་འདོན་དུ་འཇུག་ཅིང་རང་སངས་རྒྱས་རྣམས་ལ། ལོ་བཅུ་གཉིས་ན་བྱང་ཆུབ་སེམས་དཔའ་ལྷུམས་སུ་འཇུག་གིས་ཞིང་འདི་བོར་ཅིག་ཅེས་ཟེར་ཞིང༌། དེ་རྒྱལ་པོའི་ཁབ་ཀྱི་མཇུག་མ་སྒྱུར་བའི་རི་ལ་རང་རྒྱལ་གླང་པོ་ཞེས་པས་ཐོས་ཏེ། རྡོ་ལ་རྐང་རྗེས་བཞག་སྟེ་འདས་སོ། །ཝཱ་ར་ཎཱ་སིར་རང་རྒྱལ་ལྔ་བརྒྱ་མེའི་ཁམས་ལ་ཞུགས་ཏེ་འདས་ནས་རིང་བསྲེལ་ལྷུང་བས་དྲང་སྲོང་ལྷུང་བར་གྲགས་སོ། །དེ་ནས་བྱང་ཆུབ་སེམས་དཔའ་གཞལ་མེད་ཁང་ཆེན་པོ་དེ་ནས་བྱུང་སྟེ། ཆོས་ཀྱིས་མཐོ་བའི་ཁང་བཟང་ལྷ་རྣམས་ལ་ཆོས་སྟོན་པའི་ས་དེར་ཞུགས་ནས་སེར་གེའི་ཁྲི་ཆོས་བཟང་པོ་ཞེས་བྱ་བ་ལ་བཞུགས་ཏེ། བྱང་ཆུབ་སེམས་དཔའ་བྱམས་པ་དང༌། ལྷའི་བུ་ཡོངས་སུ་དགའ་ལྡན་དང༌། གང་ཡང་བྱང་ཆུབ་སེམས་དཔའ་ཕྱོགས་ཀུན་ནས་འདུས་པ་རྣམས་ལ་ཆོས་རྒྱ་ཆེར་སྟོན་པར་མཛད་ཅིང༌། མྱུར་དུ་སངས་རྒྱས་ཀྱི་མཛད་པ་སྟོན་པར་བཞེད་ནས་གཟིགས་པ་ལྔ་ལ་གཟིགས་སོ། །

              གཟིགས་པ་ལྔ་ནི། དུས་ལ་གཟིགས་པ། ཡུལ་ལ་གཟིགས་པ ། རིགས་ལ་གཟིགས་པ། རུས་ལ་གཟིགས་པ། གང་གིས་ཡུམ་བྱེད་པ་ནུས་པའི་བུད་མེད་ལ་གཟིགས་པ་ལྔའོ། །དེའི་དང་པོ་དུས་ལ་གཟིགས་པ་ནི། སྔོན་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་བྲམ་ཟེ་རྒྱ་མཚོའི་རྡུལ་གྱིས་རྩོད་ལྡན་ཚེ་ལོ་བརྒྱ་པའི་དུས་འདིར་སངས་རྒྱས་ཀྱི་མཛད་པ་སྟོན་པར་ཐུགས་དམ་བཅས་ཤིང༌།དེ་བཞིན་གཤེགས་པ་མར་མེ་མཛད་ནས་བཟུང་རྒྱལ་བ་འོད་སྲུང་གི་བར་དུ་བྱོན་པའི་སངས་རྒྱས་རྣམས་ཀྱིས་ཀྱང་དེ་ལྟར་དུ་ལུང་བསྟན་པ་ལྟར་བྱང་ཆུབ་སེམས་དཔའ་དམ་པ་ཏོག་དཀར་པོས་དོན་དེ་ཐུགས་ལ་དགོངས་ཤིང༌།ཕྱོགས་བཅུའི་སངས་རྒྱས་རྣམས་ཀྱིས་ཀྱང་སྙིགས་མའི་འགྲོ་བ་མགོན་སྐྱབས་དང་བྲལ་བ་འདི་རྣམས་ཀྱི་མགོན་སྐྱབས་སུ་མྱུར་དུ་འབྱོན་དགོས་སོ་ཞེས་ཡང་ཡང་བསྐུལ་བ་ལྟར་འཛམ་བུའི་གླིང་དུ་འབྱོན་པའི་དུས་ལ་བབ་པར་གཟིགས་པའོ། །ཡུལ་ལ་གཟིགས་པ་ནི། སངས་རྒྱས་འཇིག་རྟེན་དུ་འབྱོན་པ་ནི་གདུལ་བྱའི་དོན་ཁོ་ནར་འབྱོན་པ་ཡིནལ། གདུལ་བྱའི་གཙོ་བོ་ནི་ལྷ་དང་མི་གཉིས་ཏེ། དེ་ལ་ལྷ་ཡུལ་དུ་མཆོག་གི་སྤྲུལ་སྐུ་བྱོན་ན་ནི་མི་རྣམས་ལ་ལྷ་ཡུལ་དུ་བགྲོདཔའི་མཐུ་མེད་པས་དེ་དག་ལ་མི་ཕན་པ་དང༌། ལྷ་རྣམས་ཀྱང་འདོད་པས་གཡེངས་ཤིང་ངེས་འབྱུང་སྐྱེ་དཀའ་བས་སོ་ཐར་གྱི་སྡོམ་པའི་རྟེན་དུ་མི་རུང་བ་སོགས་ཀྱིས་ཕན་ཆུང་བ་དང༌། ལྷ་རྣམས་ཆོས་མཉན་པའི་ཕྱིར་འཛམ་བུའི་གླིང་དུ་བགྲོད་ནུས་པས་མིའི་ནང་ཁོ་ནར་མཆོག་གི་སྤྲུལ་སྐུའི་མཛད་པ་སྟོན་པ་ཡིན་ལ། མི་ལ་ཡང་གླིང་བཞི་ལས་གླིང་གཞན་གསུམ་ནི་ལོངས་སྤྱོད་ཕུན་སུམ་ཚོགས་པ་ཡོད་ཀྱང་དབང་པོ་རྟུལ་ཞིང་ངེས་འབྱུང་ཤུགས་དྲག་པོ་སྐྱེ་དཀའ་བ་དང༌། འཛམ་བུའི་གླིང་གི་མི་རྣམས་ནི་དབུལ་ཞིང་ཚེ་ཐུང་ཡང་དབང་པོ་ཤིན་ཏུ་རྣོ་བ་མང་བ་དང༌། ངེས་འབྱུང་ཤུགས་དྲག་པོ་སྐྱེ་སླ་བ་དང༌།ཚེ་སྟོད་ལ་བསགས་པའི་ལས་ཚེ་སྨད་ལ་སྨིན་ནུས་པའང་སྲིད་པ་དང༌།འཛམ་བུའི་གླིང་གི་ཤར་ཕྱོགས་ན་རྗེ་བཙུན་འཇམ་པའི་དབྱངས་ཀྱི་སྤྲུལ་པའི་ཞིང་ཁམས་རི་བོ་རྩེ་ལྔའི་གནས་དང༌། ལྷོ་ཕྱོགས་ན་ཐུགས་རྗེ་ཆེན་པོའི་ཞིང་ཁམས་པོ་ཏ་ལའི་གནས་དང༌། ནུབ་ཕྱོགས་ན་དཔའ་བོ་དང་རྣལ་འབྱོར་མ་རྣམས་ཀྱི་གནས་ཨཽ་ཌི་ཡཱ་ན་དང༌། བྱང་ཕྱོགས་ན་དཔལ་ཕྱག་ན་རྡོ་རྗེ་སོགས་ཉེ་བའི་སྲས་བརྒྱད་ཀྱིས་རྒྱལ་པོའི་ཚུལ་བཟུང་སྟེ་སེམས་ཅན་གྱི་དོན་བྱེད་པའི་གནས་ཤམ་བྷ་ལ་རྣམས་ཡོད་ཅིང༌། གཞན་ཡང་འཛམ་བུ་གླིང་གི་ཕྱོགས་དང་ཕྱོགས་མཚམས་རྣམས་ན་ཟུང་འཇུག་གྲུབ་པའི་དཔའ་བོ་དང་དཔའ་མོ་བཞུགས་པའི་གནས་མང་དུ་ཡོད་པས་འཛམ་བུའི་གླིང་འདིར་མདོ་དང་སྔགས་ཀྱི་བསྟན་པ་རྒྱས་པར་འགྱུར་བར་དགོངས་ནས་བྱང་ཆུབ་སེམས་དཔའ་དམ་པ་ཏོག་དཀར་པོ་འཛམ་བུའི་གླིང་འདིར་སངས་རྒྱས་ཀྱི་མཛད་པ་སྟོན་ཕྱིར་འབྱོན་བཞེད་པའོ། །རིགས་ལ་གཟིགས་པ་ནི། རྒྱལ་བ་རྣམས་མཆོག་གི་སྤྲུལ་སྐུའི་མཛད་པ་སྟོན་པའི་ཚེ་རྒྱལ་རིགས་དང་བྲམ་ཟེའི་རིགས་གང་རུང་ཞིག་ཏུ་འཁྲུངས་ནས་སངས་རྒྱས་ཀྱི་མཛད་པ་མཛད་ཀྱི་དེ་གཉིས་ལས་རིགས་དམའ་བར་འཁྲུངས་པའི་མཛད་པ་མི་སྟོན་ནོ། །དེ་ཡང་འཇིག་རྟེན་ན་རིགས་གཉིས་པོ་དེ་གང་བཙུན་པར་བྱེད་པ་དེར་འཁྲུངས་པར་མཛད་པས་དུས་འདིར་རྒྱལ་རིགས་བཙུན་པར་བྱེད་པས་ན་འཇིག་རྟེན་ཆགས་ཏེ་འཛམ་བུའི་གླིང་དུ་རྒྱལ་པོ་ཐོག་མར་བྱུང་བ་དེ་ནས་བཟུང་གདུང་རྒྱུད་མ་ཆད་པའི་རྒྱལ་རིགས་སུ་འཁྲུངས་པར་བཞེད་ནས་དེ་ལ་གཟིགས་ཏེ། དེ་ལྟ་བུའི་རྒྱལ་རིགས་ཀྱི་གདུང་དྲི་མ་མེད་པ་ནི་ཤཱཀྱའི་རྒྱལ་པོ་ཟས་གཙང་མ་ཡིན་པར་གཟིགས་སོ། །

              དེའི་ཚུལ་ནི།འཇིག་རྟེན་ཐོག་མར་ཆགས་པ་ན་མི་རྣམས་འོད་གསལ་གྱི་ལྷ་ལས་འཕོས་ཏེ་བརྫུས་ཏེ་སྐྱེས་པ། ཁམས་ཟས་རགས་པ་ལ་མི་ལྟོས་པར་དགའ་བའི་ཟས་ཀྱིས་འཚོ་བ། ལུས་དྭངས་གསལ་འོད་ཀྱི་རང་བཞིན་ཅན།འཁྲུག་རྩོད་གང་ཡང་མེད་ཅིང་འཁྲིག་པའི་འདོད་ཆགས་ཀྱང་མེད་ལ། བརྫུན་དུ་སྨྲ་བའང་མེད་པར་རང་བཞིན་གྱིས་དག་པའི་ངང་དུ་གནས་པས་དུས་དེ་ལ་ནི་བསྐལ་བ་རྫོགས་ལྡན་གྱི་དུས་ཞེས་བྱའོ། །དེ་ནས་བསྐལ་བ་བཟང་པོ་རིམ་གྱིས་བྲི་ནས་བདུད་རྩིའི་ཟས་ཀྱིས་འཚོ་བ་དང༌།མ་རྨོས་པའི་ལོ་ཏོག་གིས་འཚོ་བ་རྣམས་རིམ་གྱིས་བྱུང་སྟེ་མི་རྣམས་ཀྱི་ལུས་ཀྱི་འོད་ནུབ་ཅིང་ལུས་ལྕི་ལ་བཤང་གཅི་དང་ལྡན་པས་ཕོ་མོའི་དབང་པོ་དོད་དེ་འཁྲིག་པ་སྤྱོད་ཅིང༌། དེ་ནས་ཀྱང་བསྐལ་བ་བཟང་པོ་རིམ་གྱིས་བྲི་སྟེ་མ་རྨོས་པའི་ལོ་ཏོག་ཀྱང་མེད་པར་ས་ལ་ཞིང་རྨོས་ཏེ་འཚོ་བར་བྱེད་པ་ན། ངེད་ཀྱི་ཞིང་དང་ཁྱོད་ཀྱི་ཞིང་ཞེས་ཕན་ཚུན་འཁྲུད་རྩོད་དུ་གྱུར་ཅིང༌། མ་བྱིན་པར་ལེན་པ་དང༌། བརྫུན་དུ་སྨྲ་བས་ཕན་ཚུན་འཐབ་ཅིང་རྩོད་པར་གྱུར་པ་ན་འཛམ་བུའི་གླིང་གི་མི་ཐམས་ཅད་ཀྱིས་སྤྱི་མཐུན་དུ་རྒྱལ་པོ་བསྐོས་པ་ནི་མང་པོས་བཀུར་བའི་རྒྱལ་པོ་ཞེས་བྱ་བ་བྱུང་ངོ༌། །རྒྱལ་པོ་དེའི་བུ་འོད་མཛེས།དེའི་བུ་དགེ་བ།དེའི་བུ་དགེ་མཆོག །དེའི་བུ་གསོ་སྦྱོང་འཕགས། དེ་རྣམས་ལ་སྔོན་གྱི་རྒྱལ་པོ་ལྔ་ཟེར། གསོ་སྦྱོང་འཕགས་ཀྱི་སྤྱི་བོའི་ཤ་རྨེན་ལས་སྐྱེས་པ་ང་ལས་ནུ། དེ་ནས་མཛེས་པ། ཉེ་མཛེས།མཛེས་ལྡན། ཉེ་མཛེས་ལྡན། དེ་ལྔ་ནི་སུམ་ཅུ་རྩ་གསུམ་མན་དང༌། གླིང་བཞི་ནས་གཅིག་གི་བར་ལ་དབང་བའི་འཁོར་ལོས་བསྒྱུར་བའི་རྒྱལ་པོ་ལྔའོ། །ཉེ་མཛེས་ལྡན་གྱི་བུ་བཟང་པོ་ནས་རྒྱལ་པོ་ས་ཡ་གཅིག་དང་བཞི་ཁྲི་དྲུག་སྟོང་སུམ་བརྒྱ་བདུན་ཅུ་རྩ་དགུ་འདས་པ་ན་རྒྱལ་པོ་ཀྲི་ཀྲི་བྱུང་སྟེ། རྒྱལ་པོ་ཀྲི་ཀྲིས་ནི་སངས་རྒྱས་འོད་སྲུང་ལ་བསྙེན་བཀུར་ཞིང༌། སངས་རྒྱས་འོད་སྲུང་མྱ་ངན་ལས་འདས་ནས་དེའི་སྐུ་གདུང་གི་མཆོད་རྟེན་ཡང་བྱས་སོ། །རྒྱལ་པོ་ཀྲི་ཀྲིའི་བུ་ལེགས་སྐྱེས་ནས་རྒྱལ་པོ་བརྒྱ་འདས་པ་ན། གྲོང་ཁྱེར་གྲུ་འཛིན་དུ་རྒྱལ་པོ་རྣ་བ་ཅན་བྱུང་སྟེ།དེ་ལ་བུ་གཽ་ཏ་མ་ཞེས་པ་རིགས་མཆོག་དང༌། བྷ་ར་དྭཱ་ཛ་གཉིས་ལས། གཽ་ཏ་མ་དྲང་སྲོང་མདོག་ནག་ལས་རབ་ཏུ་བྱུང་ནས་གྲོང་འདབ་ཏུ་གནས་པས་བྷ་ར་དྭཱ་ཛས་རྒྱལ་སྲིད་བསྐྱངས་སོ། །དེའི་ཚེ་གཽ་ཏ་མ་ཉེས་པ་མེད་པར་མི་གཡོ་ཅན་ཞིག་གི་གཡོ་ཐབས་ཀྱི་མཐུས་རྒྱལ་པོའི་ཁྲིམས་ཀྱིས་གསལ་ཤིང་ལ་བསྐྱོན་པ་དང༌། དྲང་སྲོང་མདོག་ནག་གཽ་ཏ་མའི་སྤྱིལ་བོར་དུས་དུས་སུ་འགྲོ་བས་ཕྱིན་པ་ན། དེ་མ་མཐོང་ནས་བཙལ་བ་དང་གཽ་ཏ་མ་གསལ་ཤིང་ལ་བསྐྱོན་པ་མཐོང་ནས། བུ། ཅི་ཡིན། རྨ་མ་བྱུང་ངམ། བདག་གི་སེམས་ཀྱིས་རྨ་མ་བྱུང་བའི་བདེན་པའི་ཚིག་གིས་མཁན་པོའི་པགས་པ་གསེར་མདོག་ཏུ་གྱུར་ཅིག།ཅེས་སྨྲས་མ་ཐག་གསེར་མདོག་ཏུ་གྱུར་ཏེ་ཡིད་ཆེས་སོ། །

               དེ་ནས་དྲང་སྲོང་གསེར་མདོག་གིས་བསམ་པ།རྒྱལ་པོ་བྷ་ར་དྭཱ་ཛ་ལ་བུ་མི་འབྱུང་བས་གཽ་ཏ་མ་ཤི་ན་མང་པོས་བཀུར་བའི་རྒྱལ་རྒྱུད་ཆད་པར་འགྱུར་ལ། དེ་ཆད་ན་འཇིག་རྟེན་སྤྱི་ལ་མི་ལེགས་སོ་སྙམ་དུ་བསམས་ནས་གཽ་ཏ་མ་ལ་དྲིས་པ། ཁྱོད་ལ་བུ་བསྐྱེད་པའི་ནུས་པ་ཡོད་དམ། མཁན་པོ། བདག་གཞོན་ནུ་ནས་རབ་ཏུ་བྱུང་བས་བུད་མེད་ཀྱི་རྒྱུས་མ་འཆོལ་ན་བུ་བསྐྱེད་པ་ལྟ་ག་ལ་མཆིས། བུ། སྔོན་སྤྱད་པའི་ཡུལ་དྲན་པར་གྱིས་ཤིག མཁན་པོ། གནད་ཆད་པའི་ཚོར་བས་ཉེན་ན་ཡུལ་དྲན་པར་ག་ལ་འགྱུར། དེར་རྫུ་འཕྲུལ་གྱིས་རྫི་ཆར་ཆེན་པོ་ཕབ་སྟེ་ཆར་པའི་ཐིགས་པ་ལུས་ལ་ཕོག་ཅིང་རླུང་གྲང་མོས་རེག་པས་སྡུག་བསྔལ་མནན་ནས། སྔོན་གྱི་ཡུལ་དྲན་པར་བྱས་ཏེ་འཁྲིག་པའི་འདོད་ཆགས་དྲན་ནས་ཁུ་བ་ཁྲག་དང་འདྲེས་པ་གཉིས་ལྷུང་ངོ༌།  །དེ་གཉིས་སྒོ་ང་གཉིས་སུ་གྱུར་ནས་ཉི་མའི་འོད་ཟེར་གྱིས་སྨིན་པ་རྡོལ་བ་དང་ཁྱེའུ་གཉིས་བྱུང་སྟེ་དེ་དང་ཉེ་བའི་བུ་རམ་ཤིང་གསེབ་ཏུ་ཞུགས་སོ། །

              གཽ་ཏ་མ་ཉི་མའི་ཟེར་གྱིས་ཤིན་ཏུ་ཚ་ནས་ཤིའོ། །དྲང་སྲོང་འོངས་ནས་ཉེ་འཁོར་དུ་བལྟས་པས་སྒོང་སྐོགས་མཐོང་སྟེ་བཙལ་བས་བུ་རམ་ཤིང་གི་ཚལ་ན་ཁྱེའུ་གཉིས་འདུག་པ་དེ་དེའི་བུར་ཤེས་ཏེ་གནས་སུ་ཁྲིད་ནས་སྣུན་བསྙོད་དེ་གསོས་པ་ཉི་མའི་འོད་ཀྱིས་སྨིན་པར་བྱས་པས་ཉི་མའི་རིགས། གཽ་ཏ་མའི་བུ་ཡིན་པས་གཽ་ཏ་མ།བུ་རམ་ཤིང་གི་ཚལ་ནས་རྙེད་པས་བུ་རམ་ཤིང་པ་ཞེས་མིང་བཏགས་སོ།།དེ་ནས་དུས་ནམ་ཞིག་ན་རྒྱལ་པོ་བྷ་ར་དྭཱ་ཛ་བུ་མེད་པར་ཤི་ནས་ཁྱེའུ་གཉིས་རྒྱལ་སར་བོས་ཏེ། ཕུ་བོ་རྒྱལ་སྲིད་ལ་བཞག་པ་ན་དེ་ལའང་བུ་མ་བྱུང་བས་ནུ་བོ་རྒྱལ་སྲིད་ལ་དབང་བསྐུར་བས། རྒྱལ་པོ་བུ་རམ་ཤིང་པ་ཞེས་བྱ་བར་གྱུར། དེའི་བུ་རྒྱུད་ལ་རྒྱལ་པོ་བུ་རམ་ཤིང་པ་བརྒྱ་ཐམ་པ་ཡུལ་གྲུ་འཛིན་དུ་བྱུང༌། དེའི་མཐའ་མ་བུ་རམ་ཤིང་པ་འཕགས་སྐྱེས་པོ། དེའི་བུ་རྐང་གདུབ་ཅན།དེའི་བུ་གནས་འཇོག་སྟེ། རྒྱལ་པོ་གནས་འཇོག་འདི་ནི་ཤཱཀྱའི་རྒྱུད་ཀྱི་ཐོག་མ་ཡིན་ནོ། །དེའི་བུ་ས་ཁྱིམ་སྟེ་དེ་སེར་སྐྱའི་རྒྱལ་སར་བཞག་སྟེ། སེར་སྐྱའི་རྒྱལ་པོ་ས་ཁྱིམ་འདི་ནི་སེར་སྐྱར་ཤཱཀྱའི་རྒྱལ་རྒྱུདབྱུང་བའི་ཐོག་མ་ཡིན་ནོ། །

              རྒྱལ་པོ་ས་ཁྱིམ་ནས་བརྒྱུད་པ་ཤཱཀྱའི་རྒྱལ་པོ་ལྔ་ཁྲི་ལྔ་སྟོང་བརྒྱ་བཅུ་གཉིས་སེར་སྐྱར་བྱུང་བའི་མཐའ་མ་རྒྱལ་པོ་གཞུ་བརྟན། དེའི་བུ་སེང་གེ་འགྲམ། ཤཱཀྱའི་རྒྱལ་པོ་སེང་གེ་འགྲམ་ལ་བུ་བཞི་བྱུང་སྟེ།ཟས་གཙང༌། ཟས་དཀར།བྲེ་བོ་ཟས།བདུད་རྩི་ཟས་སོ། །དེ་བཞི་ལས་རྒྱལ་པོ་ཟས་གཙང་ལ་བཙུན་མོ་བླངས། དེ་ཤཱཀྱའི་རྒྱལ་པོར་དབང་བསྐུར་ཏོ། །རུས་ལ་གཟིགས་པ་ནི།ཡབ་ཡུམ་གཉིས་ཀ་བདུན་བརྒྱུད་ཚུན་ཆད་མ་ཉམས་པ་སྐྱོན་མེད་པ་ཞིག་ལ་གཟིགས་པ་སྟེ། ཡབ་ཟས་གཙང་དང༌། ཡུམ་སྒྱུ་མ་ལྷ་མཛེས་གཉིས་ཀྱིས་སྲས་སུ་འཁྲུངས་བཞེད་པའོ། །དེ་ལ་ཡབ་ཀྱི་གདུང་རྒྱུད་ནི་བརྗོད་ཟིན་ལ། ཡུམ་ནི་ལྷས་བསྟན་གྱི་རྒྱལ་པོ་ལེགས་པར་རབ་སད་དང་བཙུན་མོ་ལུམྦི་ནི་གཉིས་ལ་སྲས་གཅིག་དང་སྲས་མོ་གཉིས་བྱུང་སྟེ། སྲས་མོ་ཆེ་བ་ནི་སྒྱུ་འཕྲུལ་མ་སྟེ། སྒྱུ་འཕྲུལ་མ་འཁྲུངས་པའི་ཚེ་ལྟས་ཁྱད་པར་ཅན་བྱུང་ཞིང་མིའི་བུ་མོ་ལས་འདས་པ་ཤིན་ཏུ་གཟུགས་བཟང་ཞིང་བལྟ་ན་སྡུག་པ་ལྷའི་བཟོ་བོས་བཅོས་པ་ལྟ་བུ་ཞིག་བྱུང་བས་མིང་སྒྱུ་འཕྲུལ་མ་ཞེས་བཏགས། དེ་མཚན་མཁན་ལ་བསྟན་པས་མཚན་ཤིན་ཏུ་བཟང་ཞིང་འདི་ལ་བུ་སྟོབས་ཀྱི་འཁོར་ལོས་བསྒྱུར་བ་ཞིག་འབྱུང་བར་ལུང་བསྟན། དེའི་རྗེས་སུ་སྲས་མོ་ཆུང་བ་འཁྲུངས་པ་ན་འཇིག་རྟེན་ཐམས་ཅད་འོད་ཀྱིས་ཁྱབ་པ་དང༌། སངས་རྒྱས་ཀྱི་མཛད་པ་བཅུ་གཉིས་སྟོན་པའི་སྒྲ་གྲག་པ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པར་བྱུང་ཞིང༌། སྲས་མོ་ཆེ་བ་ལས་ཀྱང་གཟུགས་བཟང་ཞིང་མཛེས་པ། ལྷའི་བུ་མོ་ཇི་ལྟ་བ་ཞིག་བྱུང་བས་མིང་སྒྱུ་འཕྲུལ་ཆེན་མོ་ཞེས་ཀྱང་བྱ། ལྷ་མོ་སྒྱུ་འཕྲུལ་མ་ཞེས་ཀྱང་བྱ། སྒྱུ་མ་ལྷ་མཛེས་ཞེས་ཀྱང་བྱ་བར་གྲགས་སོ། །དེ་མཚན་མཁན་ལ་བསྟན་པས།འདི་ལ་བུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་འབྱུང༌། ཁྱིམ་དུ་བཞུགས་ན་འཁོར་ལོས་བསྒྱུར་རྒྱལ་དང༌། རབ་ཏུ་བྱུང་ན་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །

               དེ་ནས་རྒྱལ་པོ་ལེགས་པར་རབ་སད་ཀྱིས་ཤཱཀྱའི་རྒྱལ་པོ་སེང་གེ་འགྲམ་ལ་བུ་མོ་ཁྱད་པར་དུ་འཕགས་པ་གཉིས་ཤིག་བྱུང་ན་འདི་གཉིས་ལས་གཞོན་ནུ་ཟས་གཙང་གི་བཙུན་མོར་གང་འོས་པ་ཞིག་བཞེས་དགོས་ཞེས་བསྐུལ་བ་ན་རྒྱལ་པོ་སེང་གེ་འགྲམ་གྱིས་སྔོན་ལ་བུ་མོ་ཆུང་བ་སྒྱུ་མ་ལྷ་མཛེས་ཟས་གཙང་གི་བཙུན་མོར་བླངས་ཤིང༌། རྗེས་སུ་ཆེ་བ་སྒྱུར་འཕྲུལ་མ་ཡང་བླངས་སོ། །དེ་ནི་མཚན་མཁན་དག་གིས་ཇི་ལྟར་བསྟན་པ་ལྟར། སྒྱུ་མ་ལྷ་མཛེས་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་བྱང་ཆུབ་སེམས་དཔའ་འཁྲུངས།ཆེ་བ་སྒྱུ་འཕྲུལ་མ་ལ་བུ་སྟོབས་ཀྱི་འཁོར་ལོས་བསྒྱུར་བའི་མཚན་རྟགས་དང་ལྡན་པ་དགའ་བོ་འཁྲུངས་སོ། །

               གང་གིས་ཡུམ་བྱེད་པར་ནུས་པའི་བུད་མེད་ལ་གཟིགས་པ་ནི། སྔོན་ཡུན་རིང་པོ་ནས་དེ་བཞིན་གཤེགས་པ་འཇིག་རྟེན་འདིར་འབྱོན་པའི་ཚེ་ཡུམ་བྱེད་པར་སྨོན་ལམ་བཏབ་པ་ཡུམ་སྒྱུ་མ་ལྷ་མཛེས་ཀྱི་རུམ་དུ་སྐྱེ་བ་བཞེས་པར་བཞེད་པའོ། །དེ་ལྟར་བྱང་ཆུབ་སེམས་དཔའ་དམ་པ་ཏོག་དཀར་པོས། དུས་དང༌། ཡུལ་དང༌།རིགས་དང༌། རུས་དང༌། ཡུལ་བུད་མེད་ལྔ་ལ་གཟིགས་ནས་དགའ་ལྡན་གྱི་གཞལ་མེད་ཁང་ཆུ་དང་རྒྱར་དཔག་ཚད་དྲུག་ཅུ་རྩ་བཞི་ཡོད་པ་དེ་ན་ཆོས་སྟོན་པའི་གནས་རྒྱལ་མཚན་མཐོན་པོ་ཞེས་བྱ་བ་ཡོད་པས།དེར་བྱོན་ནས་བསོད་ནམས་མཆོག་གི་སེང་གེའི་ཁྲི་ལ་བཞུགས་ཏེ། ལྷའི་འཁོར་རྣམས་ལ། གྲོགས་པོ་དག་ངའི་ལུས་བསོད་ནམས་བརྒྱའི་མཚན་གྱིས་བརྒྱན་པ་ལ་ལྟོས། ཕྱོགས་བཅུ་ན་བྱང་ཆུབ་སེམས་དཔའ་ང་དང་འདྲ་བ་བགྲང་བ་ལས་འདས་པ་ལ་ཡང་ལྟོས། ཞེས་གསུངས་པ་དང༌། འཁོར་དེ་དག་ཀྱང་དེའི་བྱིན་རླབས་ཀྱིས་ཕྱོགས་ཀུན་ན་བྱང་ཆུབ་སེམས་དཔའ་དགའ་ལྡན་གྱི་གནས་ན་འཁོད་པ་འདི་དང་འདྲ་བ་ཚད་མེད་པ་མཐོང་ནས་ཀྱང་ཆེད་དུ་བརྗོད་དོ། །

               དེ་ནས་བྱང་ཆུབ་སེམས་དཔའ་དམ་པ་ཏོག་དཀར་པོས་རྗེ་བཙུན་བྱམས་པ་ལ་སོགས་པའི་དགའ་ལྡན་ན་གནས་པའི་ལྷ་རྣམས་ལ། གྲོགས་པོ་དག །དད་པ་ནི་ཆོས་སྣང་བའི་སྒོ་སྟེ། བསམ་པ་མི་ཕྱེད་པར་འགྱུར་རོ། །དང་བ་ནི་ཆོས་སྣང་བའི་སྒོ་སྟེ། སེམས་རྙོག་པ་ཅན་དང་བར་འགྱུར་རོ། །ཞེས་པ་ནས།ཕྱིར་མི་ལྡོག་པའི་ས་ནི་ཆོས་སྣང་བའི་སྒོ་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །ས་ནས་སར་འཕར་བའི་ཡེ་ཤེས་ནི་ཆོས་སྣང་བའི་སྒོ་སྟེ། ཐམས་ཅད་མཁྱེན་པའི་ཡེ་ཤེས་ཀྱི་དབང་བསྐུར་བར་འགྱུར་རོ། །དབང་བསྐུར་བའི་ས་ནི་ཆོས་སྣང་བའི་སྒོ་སྟེ། མངལ་དུ་འཇུག་པ་དང༌། བཙས་པ་དང༌། མངོན་པར་འབྱུང་བ་དང༌། དཀའ་བ་སྤྱད་པ་དང༌། བྱང་ཆུབ་ཀྱི་སྙིང་པོར་འགྲོ་བ་དང༌། བདུད་འདུལ་བ་དང༌། བྱང་ཆུབ་མངོན་པར་འཚང་རྒྱ་བ་དང༌། ཆོས་ཀྱི་འཁོར་ལོ་བསྐོར་བ་དང༌། ཡོངས་སུ་མྱ་ངན་ལས་འདས་པ་ཆེན་པོ་སྟོན་པར་འགྱུར་རོ། །ཞེས་ཆོས་སྣང་བའི་སྒོ་བརྒྱ་རྩ་བརྒྱད་རྒྱས་པར་བསྟན་ནས་རིན་པོ་ཆེའི་ཅོད་པན་མ་ཕམ་པའི་དབུ་ལ་བཅིངས་ནས། གྲོགས་པོ་དག་ཁོ་བོ་འཛམ་བུའི་གླིང་དུ་འཚང་རྒྱར་འགྲོ་སྟེ། ཁྱེད་ལ་མ་ཕམ་པས་ཆོས་སྟོན་ཏོ། །ཞེས་བྱམས་མགོན་རྒྱལ་ཚབ་ཏུ་དབང་བསྐུར་ཏོ། །

              དེ་ཚེ་རྒྱལ་པོ་ཟས་གཙང་གི་ཁྱིམ་དུ་སྔ་ལྟས་བརྒྱད་བྱུང་སྟེ།ས་གཞི་མཉམ་ཞིང་ཁྱིམ་དུ་རྡུལ་མེད་ལ་ཆག་ཆག་བཏབ་པ་སྦྲང་བུ་དང་ཕྱེ་མ་ལེབ་དང་སྡིག་སྦྲུལ་མེད་ཅིང་མེ་ཏོག་གིས་བཀྲམ་པ་དང༌། གངས་རིའི་བྱ་ཁུ་བྱུག་སོགས་ཁྱིམ་དེའི་སྟེགས་བུ་སོགས་སུ་འདུག་ནས་སྐད་སྙན་པ་སྒྲོག་པ་དང༌།དེའི་ཀུན་དགའ་ར་བ་དང་སྐྱེད་མོས་ཚལ་གྱི་མེ་ཏོག་རྒྱས་པ་དང༌། དེའི་རྫིང་ལ་སོགས་པར་པདྨ་འདབ་མ་བྱེ་བ་ཁྲག་ཁྲིག་བརྒྱ་སྟོང་དང་ལྡན་པས་ཁེབས་པ་དང༌། མར་དང་སྦྲང་རྩི་སོགས་ལོངས་སྤྱོད་ཀྱང་ཟད་པར་མི་འགྱུར་བ་དང་རོལ་མོ་རྣམས་མ་བླངས་པར་འཁྲོལ་བ་དང༌། རིན་པོ་ཆེ་སྣ་བདུན་གྱི་སྣོད་རང་བྱེ་སྟེ་འབར་བ་དང༌། ཉི་ཟླའི་འོད་ཟིལ་གྱིས་གནོན་ཅིང་ལུས་སེམས་བདེ་བ་བསྐྱེད་པའི་འོད་སྣང་བ་རྣམས་བྱུང་ངོ༌། །དེ་ནས་བྱང་ཆུབ་སེམས་དཔའ་རྒྱལ་མཚན་མཐོན་པོ་ནས་ཁང་པ་ཆེན་པོ་བསོད་ནམས་ཐམས་ཅད་ཀྱིས་ཡང་དག་པར་བྱུང་བ་ནོར་བུ་དང་དཔལ་གྱི་སྙིང་པོ་ལྷ་རྣམས་ཀྱིས་ཀུན་ནས་བལྟ་བའི་ཁང་བརྩེགས་གནས་ཀྱི་རྒྱན་དུ་བྱོན་ནས་དེར་བཞུགས་ཏེ། བྱང་ཆུབ་སེམས་དཔའ་དང་ལྷ་མང་པོས་བསྐོར་ཞིང་མདུན་དུ་བདར་ནས་བསྐྱོད་པར་བརྩམས་སོ། །དེའི་ཚེ་བྱང་ཆུབ་སེམས་དཔའ་བདེ་བའི་རྒྱན་ཞེས་བྱ་བའི་འོད་ཟེར་དགུ་ལ་སོགས་པ་འོད་ཟེར་གྲངས་མེད་པར་བརྒྱ་སྟོང་ཕྲག་བཅུ་བཀྱེ་བས། སྟོང་གསུམ་གྱི་མུན་པ་མུན་ནག་ཀུན་སྣང་བར་བྱས་ནས་ཉི་ཟླའི་འོད་ཟིལ་གྱིས་མནན་ཏེ། ངན་སོང་གི་སྡུག་བསྔལ་སྐད་ཅིག་དེ་ལ་ཞི་བ་དང༌། སེམས་ཅན་སུ་ལ་ཡང་ཉོན་མོངས་པས་མི་གནོད་པ་དང༌། སྣོད་མ་ཡིན་པ་དག་སེལ་བ་དང༌། ལག་ན་རྡོ་རྗེ་ཕྱི་བཞིན་དུ་འབྲང་བ་དང༌། འདུལ་བ་སྣ་ཚོགས་པ་དག་མཐོང་བ་སྣ་ཚོགས་པས་མཐོང་བཞིན་པའི་ལས་དེ་དག་ལ་སོགས་པ་དག་བྱེད་དོ། །ཡུམ་ལ་ཁྱད་པར་དུ་བྱ་བའི་འོད། ཡུམ་གྱི་ཡོན་ཏན་གྱི་དཀྱིལ་འཁོར་ལས་བྱུང་བའི་སྣང་བ་ཞེས་བྱ་བའི་འོད་བ་སྤུའི་སྒོ་ཐམས་ཅད་ནས་བཀྱེ་བས། ལྷ་མོ་སྒྱུ་འཕྲུལ་གསོ་སྦྱོང་བླངས་པའི་ལུས་ལ་ཞུགས་མ་ཐག དེའི་ལུས་བདེ་ལ་འགྲོ་བ་ཐམས་ཅད་ཀྱི་ལུས་ལས་མངོན་པར་འཕགས་ཤིང་རུམ་ནམ་མཁའི་ཁྱོན་ལྟར་ཡངས་པར་གྱུར་ཀྱང་མིའི་ལུས་ལས་མ་འདས་ལ། ཡུམ་གྱི་གློ་གཡས་པར་བྱང་ཆུབ་སེམས་དཔའ་ཡོངས་སུ་སྤྱད་པ་རིན་པོ་ཆེ་བཀོད་པ་ཞེས་བྱ་བ། ཅན་དན་སྦྲུལ་གྱི་སྙིང་པོའི་ཁང་པ་བརྩེགས་པ་མཛེས་ཤིང་བལྟ་ན་སྡུག་པ། གྲུ་བཞི་ཀ་བ་བཞི་པ། སྟེང་ཁང་པ་བརྩེགས་པས་བརྒྱན་པ། འཕང་དུ་བྱིས་པ་བཙས་ནས་ཟླ་བ་དྲུག་ལོན་པའི་ཚད་ཙམ་པ། དེའི་ནང་ན་ཁང་པ་བརྩེགས་པ་གཉིས་པ་དང༌། དེ་བཞིན་དུ་གསུམ་པ་ཡང་དེ་དང་མ་རེག་པར་འདུག་པ་སྲ་ཞིང་བརྟན་ལ་མི་བཤིགས་པ་རེག་ན་བདེ་བ།སྔོན་པོ་མཆོག་གི་ཁ་དོག་ཅན། འདོད་ལྷའི་གནས་ཀྱི་བཀོད་པ་ཅི་སྲིད་པ་དེར་སྣང་བ། དེའི་ཕྱེ་མ་སྲང་ཕྱེད་ལ་སྟོང་གསུམ་འདི་རིན་པོ་ཆེ་བཀང་བས་རིན་དུ་མི་ཆོག་པ། དེའི་འཁོར་ས་ན་ལྷའི་མེ་ཏོག་ལས་འདས་པའི་མེ་ཏོག་སྐྱེ་ཞིང་འདོད་པའི་ཡོན་ཏན་ལྔས་འབྱོར་པ། ཁང་པ་བརྩེགས་པ་གསུམ་པའི་ནང་ན་བྱིས་པ་བཙས་ནས་ཟླ་བ་དྲུག་ལོན་པ་ལ་འཚམ་པའི་ཁྲི་ཟླུམ་པོ། ཚངས་པ་ཆེན་པོའི་གོས་ཀྱང་དེའི་འོད་ཀྱིས་མོག་མོག་པོར་བྱེད་པའི་སྟེང་ན་མཆོག་གི་གདན་ལ་གོས་སྟོང་ཕྲག་བརྒྱའི་རྒྱན་ཞེས་བྱ་བ་ཕྲུགས་གཅིག་ཀྱང་ཡོད་པ་ལོངས་སྤྱོད་ཀྱི་དོན་དུ་གྲུབ་བོ། །བརྒྱ་བྱིན་གྱིས་ཀྱང་ཡུམ་གྱི་གཟི་བརྗིད་བསྒྲུབ་པ་དང༌། ལྷུམས་གཙང་མར་བྱེད་པ་ལ་འབད་དོ། །

               དེ་ནས་བྱང་ཆུབ་སེམས་དཔའ་དམ་པ་ཏོག་དཀར་པོ་ལྷའི་འཁོར་གྲངས་མེད་པ་དང༌། མཆོད་པའི་བྱེ་བྲག་གསམ་གྱིས་མི་ཁྱབ་པ་དང་བཅས་དགའ་ལྡན་ནས་རིམ་གྱིས་ཕེབས་ཏེ་གླང་པོ་ཆེའི་ཕྲུག་གུ་ཐལ་ཀར་མཆེ་བ་དྲུག་དང་ལྡན་པའི་གཟུགས་ཀྱིས་ནམ་གྱི་གུང་ཐུན་ལ་ཡུམ་གྱི་གློ་གཡས་པ་ནས་ཞུགས་ཏེ། ཞུགས་མ་ཐག་བྱིས་པ་བཙས་ནས་ཟླ་བ་དྲུག་ལོན་པའི་ཚད་ཙམ་མཚན་གྱིས་བརྒྱན་པར་གྱུར་ཏེ། ཡུམ་གྱི་གློ་གཡས་པའི་ཁང་པ་བརྩེགས་པའི་ནང་གི་ཁྲི་སྟན་ལ་སྐྱིལ་མོ་ཀྲུང་བཅས་ཏེ་ན་བཟའ་ཕྲུགས་དེ་ཡང་གསོལ་ནས་ཞིང་བཅུའི་རྡུལ་སྙེད་ཀྱི་བྱང་ཆུབ་སེམས་དཔའི་སྐལ་བ་མཉམ་པ་ཀླུའི་སྙིང་པོའི་ཁང་པ་བརྩེགས་པ་འཁོད་པ་དག་དང་ལྷན་ཅིག་ཡུམ་གྱི་རུམ་དུ་བཞུགས་སོ། །བྱང་ཆུབ་སེམས་དཔའ་ཡུམ་གྱི་ལྷུམས་སུ་ཞུགས་པའི་ནུབ་མོ་སྔོན་ཞིང་དམ་པ་ལ་ཟས་ཀྱི་ཕུད་ཕུལ་བའི་རྣམ་སྨིན་ལས་བྱུང་བའི་པདྨ་ཆེན་པོས་རྒྱ་མཚོ་དང་ས་ཆེན་པོ་བརྟོལ་ཏེ་ཞག་བདུན་ལ་ཚངས་པའི་འཇིག་རྟེན་གྱི་བར་དུ་འཕགས་པ་སྐྱེས་སོ། །སྟོང་གསུམ་གྱི་བཅུད་ཇི་སྙེད་པ་པདྨ་དེ་ལ་ཟིལ་དངར་གྱི་ཐིགས་པ་བཞིན་དུ་ཆགས་པ་དེ་ཚངས་པ་ཆེན་པོ་གཅིག་པུས་མཐོང་ནས་བཻཌཱུརྱའི་སྣོད་བཟང་པོར་བླངས་ཏེ་ཕུལ་བ་བྱང་ཆུབ་སེམས་དཔས་བཞེས་ཏེ་སྐུ་ལུས་བརྟས་པར་བྱེད་དོ། །དེ་འཇུ་བར་ནུས་པའི་སེམས་ཅན་ནི་གཞན་མེད་དོ། །

               ཡུམ་གྱི་ལྷུམས་ན་བཞུགས་པའི་སྐུ་མེའི་ཕུང་པོ་ལྟ་བུ་འདུག་པའི་སྣང་བས་དཔག་ཚད་ལྔའི་བར་ཁྱབ་བོ། །མི་རྣམས་བྱང་ཆུབ་སེམས་དཔའ་བལྟ་བར་འོངས་པ་དེ་དག་གི་མེ་ལོང་གི་ནང་དུ་གཟུགས་བརྙན་མཐོང་བ་ལྟར། ཡུམ་གྱི་ལྷུམས་ན་ཁང་པ་བརྩེགས་པའི་ནང་ན་བྱང་ཆུབ་སེམས་དཔའ་བཞུགས་པ་མཐོང་བར་གྱུར་པ་ལ་ཐོག་མར་བྱང་ཆུབ་སེམས་དཔས་དགའ་བར་བྱེད་པའི་གསུང་སྩོལ་ལོ། །དེ་ནས་ཡུམ་གྱིས་སྨྲའོ། །བྱང་ཆུབ་སེམས་དཔའ་ལ་ཆོས་མཉན་པའི་ཕྱིར་རྒྱལ་པོ་ཆེན་པོ་བཞི་དང༌། གནོད་སྦྱིན་གྱི་སྡེ་དཔོན་རྣམས་སྔ་དྲོ་འོངས་པ་ལ་བྱང་ཆུབ་སེམས་དཔས་ཕྱག་གཡས་བརྐྱང་པའི་མཛུབ་མོ་བསྒྲེངས་ནས་སྟན་སྟོན་ཏོ། །དེ་རྣམས་ཀྱང་སྟན་ལ་འཁོད་ནས་འདུག་པ་ལ་ཆོས་སྟོན་ཏེ། སླར་འགྲོ་བར་འདོད་པ་དང༌། ཕྱག་གཡས་པ་བརྐྱང་སྟེ་དེ་དག་འདོང་བའི་བརྡ་སྟོན་ནོ། །དེ་བཞིན་དུ་ཉི་མའི་གུང་ལ་བརྒྱ་བྱིན་ལ་སོགས་པའི་ལྷ་རྣམས་བྱུང་བ་དང༌། ཕྱི་དྲོ་ཚངས་པས་ཟིལ་དངར་གྱི་ཐིགས་པ་འདུལ་བ་དང༌། ནུབ་ཐུན་དང་པོ་ལ་ཕྱོགས་བཅུའི་བྱང་ཆུབ་སེམས་དཔའ་རྣམས་འོངས་པ་ལ། སྐུ་ལས་བཀྱེ་བའི་འོད་རྣམས་སེང་གེའི་ཁྲིར་སྤྲུལ་པ་ལ་དེ་དག་འཁོད་དུ་བཅུག་སྟེ། སྔར་བཞིན་ཕྱག་བརྐྱང་བསྐུམ་མཛད་དེ་ཆོས་ཀྱི་བརྡའི་སྒོ་ཆེན་པོས་བགྲོ་བར་བྱེད་དོ། །

                                                                                                                   རྩོམ་སྒྲིག་པ། མང་ར་བ།
             གསལ་འདེབས། 
                    རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
                    དྲ་བའི་སྦྲེལ་ཐགhttp://www.tb1025.cn