མཆོད་པར་བརྗོད་ཅིང་རྩོམ་པར་དམ་བཅའ་བ།
        ༄༅། །རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་ཐུབ་དབང་རྡོ་རྗེ་འཆང་དང་དབྱེར་མ་མཆིས་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་གཟུང་དུ་གསོལ། །མཚན་ཙམ་ཐོས་པས་ངན་འགྲོའི་འཇིགས་ལས་སྐྱོབ། །གསོལ་བ་བཏབ་ན་དངོས་གྲུབ་ཀུན་སྩོལ་ཞིང༌། །བཀའ་བཞིན་བསྒྲུབས་ན་སྐུ་གསུམ་ཐོབ་མཛད་པ། །སྟོན་པ་ཐུབ་པའི་དབང་པོ་ལ་ཕྱག་འཚལ། །རབ་འབྱམས་ཞིང་ཀུན་སྤྲུལ་པས་ལེགས་བཀང་སྟེ། །རྒྱལ་བའི་མཛད་པ་མཐའ་དག་སྒྲུབ་མཛད་པ། །རྒྱལ་ཚབ་མི་ཕམ་མགོན་དང་འཇམ་པའི་དབྱངས། །བྱང་ཆུབ་སྙིང་པོའི་བར་དུ་གཙུག་གིས་མཆོད། །རབ་བརྟན་བྱང་ཆུབ་སེམས་ཀྱི་སྡོང་པོ་ལ། །རླབས་ཆེན་སྤྱོད་པའི་ཡལ་འདབ་རབ་ཏུ་རྒྱས། །དོན་གཉིས་འབྲས་བུས་འགྲོ་ཀུན་ཚིམས་མཛད་པ། །རྒྱ་ཆེན་སྤྱོད་རྒྱུད་བླ་མ་རྣམས་ལ་འདུད། །ཟབ་ཞི་སྤྲོས་དང་བྲལ་བའི་མཁའ་དབྱིངས་དབུས། །ཡེ་ཤེས་རྡོ་རྗེའི་ཉིན་བྱེད་འོད་སྣང་གིས། །འགྲོ་བློའི་མ་རིག་མུན་པ་སེལ་མཛད་པ། །ཟབ་མོ་ལྟ་རྒྱུད་བླ་མ་རྣམས་ལ་འདུད། །ཟབ་དང་རྒྱ་ཆེའི་ལམ་གྱི་རིམ་པ་ཀུན། །རབ་གསང་བྱིན་རླབས་རིན་ཆེན་འབྱུང་གནས་ཆེར། །ཐབས་མཁས་གྲུ་ཡིས་མྱུར་དུ་བགྲོད་མཛད་པ། །བྱིན་རླབས་ཉེ་རྒྱུད་བླ་མ་རྣམས་ལ་འདུད། །བརྒྱུད་པ་གསུམ་ལྡན་མན་ངག་སྙིང་པོའི་བཅུད། །རིན་ཆེན་བྱང་ཆུབ་སེམས་ཀྱི་བདུད་རྩི་ཡིས། །བྱང་ཕྱོགས་དམུ་རྒོད་འགྲོ་རྣམས་འདུལ་མཛད་པ། །མགོན་པོ་ཨ་ཏི་ཤ་ལ་གསོལ་བ་འདེབས། །བློ་ཆེན་རྒྱལ་དང་རྒྱལ་སྲས་ཀུན་གྱི་མཛད་པ་འཕྲིན་ལས་བཟང་པོ་མ་ལུས་གང་གི་སྙིང་སྟོབས་ཡངས་པའི་གྲྭ་གཅིག་ན། །ངལ་བསོ་བགྱིས་པས་རྒྱལ་བ་ཀུན་ལས་ལྷག་པའི་ཐུགས་རྗེ་ཅན་ཞེས་སྙན་པའི་གྲགས་པ་ཕྱོགས་ཀྱི་བུ་མོས་རབ་སྒྲོག་པ། །བྱང་ཕྱོགས་གངས་རིའི་ཁྲོད་ཀྱི་ཟས་གཙང་སྲས་པོ་འཇམ་མགོན་བླ་མ་བདག་གི་སྤྱི་གཙུག་མཛེས་པའི་རྒྱན་དུ་རྟག་བཞུགས་ལ། །ཉིད་ཀྱི་ལེགས་བཤད་བདུད་རྩིའི་ཆུ་ཡིས་བདག་བློའི་འདབ་བརྒྱ་ཆ་ཚང་ལམ་གྱི་བདུད་རྩིའི་སྙིང་པོ་ཅན་དུ་མཛད་དུ་གསོལ། །རབ་འབྱམས་རྒྱལ་བ་ཀུན་གྱི་ཐུགས་རྗེའི་གཟུགས། །བདག་གི་དགེ་བའི་བཤེས་སུ་ལེགས་ཤར་བ། །མ་ནོར་ལམ་སྟོན་དྲིན་ཅན་བླ་མ་ལ། །སྙིང་ནས་འདུད་དོ་རེ་བ་འབྲས་ལྡན་མཛོད། །ལྷ་བཅས་འགྲོ་བ་ཀུན་གྱི་ཕན་བདེའི་གཞི།།རྒྱལ་བའི་གསུང་རབ་ཀུན་གྱི་སྙིང་པོའི་དོན། །བྱང་ཆུབ་ལམ་རིམ་བླ་མ་བརྒྱུད་པ་ཡི། །རྟོགས་པ་བརྗོད་ལ་བདག་བློ་སྤྲོ་བ་སྐྱེས། །དེ་ལ་འདིར་མཁའ་ཁྱབ་ཀྱི་སེམས་ཅན་ཐམས་ཅད་ལ་ཕན་པ་དང་བདེ་བ་མ་ལུས་གང་ལས་འབྱུང་བའི་རྒྱུ་གཅིག་པུ་རྒྱལ་བས་གསུངས་པའི་ཆོས་ཕུང་བརྒྱད་ཁྲི་བཞི་སྟོང་གི་སྙིང་པོའི་དོན་ཐམས་ཅད་གང་ཟག་གཅིག་གི་ཉམས་ལེན་གྱི་རིམ་པར་ཧྲིལ་གྱིས་དྲིལ་བ་བྱང་ཆུབ་ལམ་གྱི་རིམ་པའི་མན་ངག་ལེགས་པར་སྟོན་པའི་རྩ་བརྒྱུད་ཀྱི་བླ་མ་རྣམས་ཀྱི་རྣམ་པར་ཐར་པ་ནི་གང་བཤད་པར་བྱ་བའོ། །དེ་ཡང་ཆུ་འགོ་གངས་ལ་ཐུག་པ་ཞིག་དགོས་པ་ལྟར་དག་པའི་ཆོས་ཀྱི་བརྒྱུད་པའང་ཡང་དག་པར་རྫོགས་པའི་སངས་རྒྱས་ལ་ཐུག་པ་ཞིག་དགོས་པས་ཐོག་མར་བསྟན་པའི་བདག་པོ་སྟོན་པ་བཅོམ་ལྡན་འདས་ཤཱཀྱ་ཐུབ་པ་ཐུགས་རྗེ་ཅན་དེ་ཉིད་ཀྱི་རྣམ་པར་ཐར་པར་ཕྱོགས་ཙམ་ཞིག་བརྗོད་པར་བྱའོ། །

        སྟོན་པ་ཤཱཀྱ་ཐུབ་པའི་རྣམ་ཐར་ཕྱོགས་ཙམ་བརྗོད་པ། དེ་ལ་སངས་རྒྱས་འཇིག་རྟེན་དུ་འབྱོན་པ་ནི་རྒྱ་ལམ་ན་ཨུ་དུམ་ཝ་རའི་མེ་ཏོག་ལྟར་ཤིན་ཏུ་དཀོན་པར་གསུངས་ལ། དེའི་རྒྱུ་མཚན་ཡང་སངས་རྒྱས་འཇིག་རྟེན་དུ་འབྱུང་བ་ལ་དང་པོར་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་བ་གྲངས་མེད་པ་གསུམ་ལ་སོགས་པ་དུས་རིང་དཔག་ཏུ་མེད་པར་ཚོགས་གཉིས་རླབས་པོ་ཆེ་བསགས་ཏེ། སངས་རྒྱས་ཀྱི་ཞིང་ཡོངས་སུ་དག་པ་དང༌། སྨོན་ལམ་ཡོངས་སུ་རྫོགས་པ་དང༌། གདུལ་བྱ་རྣམས་རྒྱུད་ཡོངས་སུ་སྨིན་པ་སོགས་རྟེན་འབྲེལ་མཐའ་ཡས་པ་ཞིག་འགྲིག་པ་ན་སངས་རྒྱས་འཇིག་རྟེན་དུ་འབྱོན་པ་ཡིན་ལ། དེ་ལྟ་བུའི་རྟེན་འབྲེལ་འགྲིག་པ་ཤིན་ཏུ་དཀའ་བས་འཇིག་རྟེན་འདི་ཕལ་ཆེར་མུན་བསྐལ་ཤ་སྟག་ཏུ་གནས་ཤིང༌། སངས་རྒྱས་འབྱོན་པའི་སྒྲོན་བསྐལ་ནི་རྒྱ་ལམ་ན་སྲིད་པ་ཙམ་མོ། །དེ་ཙམ་དུ་དཀོན་པ་ཅི་ཡིན་སྙམ་ན། སྤྱོད་འཇུག་ལས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་རྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་འབྱུང༌། །ཞེས་གསུངས་པ་ལྟར། ཁམས་གསུམ་གྱི་འཁོར་བའི་སེམས་ཅན་རྣམས་ལ་དགེ་སེམས་ཕྲ་མོ་རེ་སྐྱེ་བ་ཡང་ཤིན་ཏུ་དཀའ་ཞིང༌། དགེ་སེམས་གང་སྐྱེ་བ་ཐམས་ཅད་སངས་རྒྱས་ཀྱི་མཐུ་ཁོ་ན་ལ་ལྟོས་ལ། སངས་རྒྱས་ལ་དད་པ་སོགས་དགེ་སེམས་ཕྲ་མོ་རེ་སྐྱེ་བ་ཡང་ཤིན་ཏུ་དཀོན་ན། དཀོན་མཆོག་གསུམ་ལ་དད་པ་རྙེད་ནས་ལས་དཀར་ནག་གི་སྤང་བླང་ཚུལ་བཞིན་དུ་བྱེད་པ་དང༌། སྲིད་པ་མཐའ་དག་ལ་ཞེན་པ་ལོག་པའི་ངེས་འབྱུང་གིས་བསྐུལ་ནས་ཐར་པའི་ལམ་ལ་སློབ་པ་རྣམས་དཀོན་པ་ལྟ་ཅི་སྨོས། ངེས་འབྱུང་གི་བསམ་པས་ཀུན་ནས་བསླངས་ཏེ་ཐར་ལམ་ལ་སློབ་པའང་ཤིན་ཏུ་དཀོན་ན། བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེས་ཀུན་ནས་བསླངས་ཏེ་རྒྱལ་སྲས་ཀྱི་སྤྱོད་པ་རྒྱ་མཚོ་ལྟ་བུ་ལ་དུས་བསྐལ་བ་གྲངས་མེད་མང་པོར་བར་མ་ཆད་དུ་སློབ་པ་དང་བསླབ་པ་མཐར་ཕྱིན་པ་ཤིན་ཏུ་དཀོན་པ་ལྟ་སྨོས་ཀྱང་ཅི་དགོས། དེའི་ཕྱིར་སངས་རྒྱས་འཇིག་རྟེན་དུ་འབྱོན་པ་ཤིན་ཏུ་དཀོན་པར་དྲི་མ་མེད་པའི་རིགས་པས་ལེགས་པར་གྲུབ་བོ། །

        དེ་ལྟར་སངས་རྒྱས་འབྱོན་དཀའ་བ་ལས་བསྐལ་བ་འདི་ལ་ནི་སངས་རྒྱས་སྟོང་འབྱོན་པས་བསྐལ་བ་བཟང་པོ་ཞེས་བརྗོད་པ་ཡིན་ཏེ། སྔོན་མི་མཇེད་ཀྱི་འཇིག་རྟེན་འདི་ཐོག་མར་ཆགས་པའི་དུས་ཆུའི་དཀྱིལ་འཁོར་ཆགས་པའི་ཚེ་མཚོ་ནང་ནས་པདྨ་སྟོང་འཐོན་པ། གནས་གཙང་མའི་ལྷ་རྣམས་ཀྱིས་མཐོང་ནས་འདི་གང་གི་ལྟས་ཡིན་སྙམ་དུ་བརྟག་པ་ན་བསྐལ་བ་འདི་ལ་སངས་རྒྱས་སྟོང་འབྱུང་བའི་ལྟས་སུ་གོ་ནས།ཨེ་མ་བསྐལ་བ་འདི་ནི་བཟང་པོའོ་ཞེས་ཆེད་དུ་བརྗོད་པར་སྙིང་རྗེ་པདྨ་དཀར་པོ་ལས་བཤད་དོ། །དེ་ལ་སྐྱེ་དགུ་རྣམས་ཀྱི་ཚེ་ལོ་བཞི་ཁྲི་པའི་དུས་སུ་སངས་རྒྱས་འཁོར་བ་འཇིག་བྱོན། ཚེ་ལོ་སུམ་ཁྲི་པའི་དུས་སུ་སངས་རྒྱས་གསེར་ཐུབ་བྱོན། ཚེ་ལོ་ཉི་ཁྲི་པའི་དུས་སུ་རྒྱལ་བ་འོད་སྲུང་བྱོན།རྩོད་ལྡན་ཚེ་ལོ་བརྒྱ་པའི་དུས་སུ་སྟོན་པ་བཅོམ་ལྡན་འདས་ཤཱཀྱ་ཐུབ་པ་འདི་ཉིད་བྱོན་པ་ཡིན་ལ། ཐོག་མར་ཐུགས་བསྐྱེད་ཚུལ། སྟོན་པ་ཐུགས་རྗེ་ཅན་འདི་ཉིད་ཀྱིས་ཐོག་མར་ཐུགས་ཇི་ལྟར་བསྐྱེད་པའི་ཚུལ་ནི།མདོ་སྡེ་བསྐལ་བཟང་ལས། ང་ནི་སྔོན་ཚེ་དམན་པར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་ཆེན་ལ། །འཇམ་གང་ཞིག་གི་དབུལ་བ་བྱས་ནས་ཀྱང༌། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་གསུངས་པ་ལྟར།རྫ་མཁན་གྱི་བུ་ཁྱེའུ་སྣང་བྱེད་དུ་སྐུ་འཁྲུངས་པའི་ཚེ། དེ་བཞིན་གཤེགས་པ་ཤཱཀྱ་ཐུབ་ཆེན་ཞེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ་རྫའི་བུམ་པ་འཇམ་གྱིས་བཀང་བ་མེ་ལོང་གིས་ཁ་བརྒྱན་པ་སོགས་མཆོད་པའི་ཡོ་བྱད་ཅི་ཡོད་ཕུལ་ཏེ། དེ་བཞིན་གཤེགས་པ་ཁྱེད་སྐུ་ཅི་འདྲ་དང༌། །འཁོར་དང་སྐུ་ཚེའི་ཚད་དང་ཞིང་ཁམས་དང༌། ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་ཀྱང་འགྱུར་བར་ཤོག །ཅེས་བརྗོད་ནས་བྱང་ཆུབ་ཏུ་ཐུགས་བསྐྱེད་པར་མཛད་དོ། །གཞན་ཡང་སྟོན་པ་ཐུགས་རྗེ་ཅན་འདི་ཉིད་ཀྱིས་རང་ཅག་ཁམས་གསུམ་གྱི་འགྲོ་བ་འཁོར་བའི་གནས་ན་ཉོན་མོངས་ཤིང་སྡུག་བསྔལ་བརྒྱ་ཕྲག་དུ་མས་མནར་བ་རྣམས་ཐུགས་ཀྱིས་མ་བཟོད་ནས། དེ་བཞིན་གཤེགས་པ་བགྲང་བ་ལས་འདས་པ་དག་གི་སྤྱན་སྔར་ཐུགས་བསྐྱེད་ཅིང་སྨོན་ལམ་འདེབས་པར་མཛད་དེ།

        དེ་ཡང༌། སྟོན་པས་སྔོན་དེ་བཞིན་གཤེགས་པ་བགྲང་བ་ལས་འདས་པའི་སྤྱན་སྔར་ཐུགས་བསྐྱེད་མཛད་པ་ལས།འདིར་མདོ་སྡེ་ལས་འབྱུང་བ་ལྟར་གཙོ་ཆེ་བ་འགའ་ཞིག་སྨོས་ན། དྲིན་ལན་བསབ་པའི་མདོ་ལས་གསུངས་ཚུལ་ནི། སྟོན་པ་ཐུགས་རྗེ་ཅན་འདི་ཉིད་སྔོན་དམྱལ་བའི་ཤིང་རྟ་འདྲེན་པར་འཁྲུངས་པ་ན།གྲོགས་ཟླ་བོ་ཞིག་དང་གཉིས་ཀྱིས་ལྕགས་བསྲེགས་ཀྱི་ས་གཞིར་གཤིན་རྗེ་ཨ་གླང་གི་ཤིང་རྟ་འདྲེན་པ་ལས་ཟླ་བོ་དེ་ཉམ་ཆུང་བས་ཤིང་རྟ་འདྲེན་མ་ནུས་པ་ན། གཤིན་རྗེ་ཨ་གླང་གིས་ལྕགས་ཀྱི་མདུང་རྩེ་གསུམ་པ་བྲང་ལ་བསྣུན་པས་ཁྲག་གི་ཆར་བབ་ཅིང་སྡུག་བསྔལ་གྱིས་ཉམ་ཐག་ནས་སྨྲེ་སྔགས་འདོན་པ་ན།དེ་ལ་བཟོད་གླགས་མེད་པའི་སྙིང་རྗེ་འཁྲུངས་ནས་སེམས་ཅན་འདི་སྡུག་བསྔལ་ལས་ཐར་པར་བྱས་ཏེ་དམྱལ་བའི་སྡུག་བསྔལ་འདི་ང་གཅིག་པུས་བཟོད་པར་བྱའོ་སྙམ་དུ་ཐུགས་བསྐྱེད་ཅིང༌། སེམས་ཅན་དེས་མཚོན་ནས་ལས་ངན་པའི་དབང་གིས་དམྱལ་བར་ལྷུང་བ་དང་ལྷུང་བར་འགྱུར་བའི་སེམས་ཅན་ཐམས་ཅད་ལ་བཟོད་གླགས་མེད་པའི་སྙིང་རྗེ་སྐྱེས་ནས་བྱང་ཆུབ་ཏུ་ཐུགས་བསྐྱེད་དེ། གཤིན་རྗེ་ཨ་གླང་ལ་སེམས་ཅན་ཉམ་ཐག་འདི་ཐོངས་ལ་འདིའི་ཐག་པའང་ངའི་མགོ་ལ་སྐོན་ཅིག ང་གཅིག་པུས་དྲང་བར་བྱའོ་ཞེས་གསུངས་པ་ན། ཨ་གླང་ཁྲོས་ནས་ལྕགས་ཀྱི་མདུང་རྩེ་གསུམ་པ་བསྣུན་པས་བསྐལ་བ་བརྒྱར་བསགས་པའི་སྡིག་པ་དག་ཅིང༌། དེ་ནས་ཚེ་འཕོས་ཏེ་སུམ་ཅུ་རྩ་གསུམ་གྱི་ལྷར་སྐྱེས་པར་གསུངས་སོ། །འདི་བཅོམ་ལྡན་འདས་ཀྱིས་བྱམས་པའི་ཐུགས་བསྐྱེད་པའི་ཐོག་མ་ཡིན་པ་དང༌། དེ་ནས་བཟུང་སྟེ་མངོན་པར་རྫོགས་པར་སངས་རྒྱས་པའི་བར་དུ་སེམས་ཅན་ཐམས་ཅད་ལ་བྱམས་པ་དང་སྙིང་རྗེའི་སེམས་རྒྱུན་མ་ཆད་པར་བསྐྱེད་པར་མཛངས་བླུན་ལས་གསུངས་སོ། །

        ཐུགས་བསྐྱེད་ཚུལ་འདུལ་བ་ལུང་ལས་གསུངས་པ་ནི། ལུང་སྨན་གྱི་གཞི་ལས། སྟོན་པ་ལ་རྒྱལ་པོ་གསལ་རྒྱལ་གྱིས་སྟོན་པས་ཐོག་མར་གང་དུ་སེམས་བསྐྱེད་ལགས་ཞུས་པ་ན།སྟོན་པས་བཀའ་བསྩལ་པ། སྔོན་རྒྱལ་པོ་འོད་ལྡན་ཞེས་བྱ་བའི་ཡུལ་དུ་གླང་པོ་རིན་པོ་ཆེ་མེ་ཏོག་ཀུ་མུ་དའི་མདོག་ལྟར་དཀར་བ། ཡན་ལག་བདུན་ཤིན་ཏུ་གནས་པ་ཞིག་བྱུང་སྟེ། དེ་རྒྱལ་པོ་འོད་ལྡན་གྱིས་མཐོང་ནས་གླང་པོ་འདུལ་མཁན་ལ་འདི་དུལ་བར་བྱོས་ལ་ང་ལ་ཕུལ་ཅིག་ཅེས་གསུངས་པས། གླང་པོ་འདུལ་མཁན་གྱིས་བཀའ་བཞིན་འཚལ་ཞེས་ཟེར་ཏེ། དེ་དུལ་བར་བྱས་ནས་རྒྱལ་པོ་ལ་ཕུལ་བ་དང༌། རྒྱལ་པོ་གླང་པོ་ལ་བཞོན་འདུལ་མཁན་ཡང་གོང་དུ་བཞོན་ཏེ་རི་དྭགས་གཤོར་དུ་སོང་བ་ན། གླང་པོ་ཆེ་དེས་གླང་མོའི་དྲི་ཚོར་ཏེ་རྗེས་བཞིན་དུ་རྒྱུགས་ནས་རླུང་ལྟར་ཁྱེར་བ་དང༌། རྒྱལ་པོ་འོད་ལྡན་གྱིས་གླང་པོ་འདུལ་མཁན་ལ་ནམ་མཁའ་འགུལ་བ་འདྲ་ཞིང་ཕྱོགས་ཀུན་མྱུར་དུ་འགྲོ་བ་འདྲ་བ་འདི་བཟློག་ཅིག །དེས་བཟློག་མ་ནུས་ཏེ་རྒྱལ་པོ་ལ་གླང་པོ་འདི་མི་ཐུབ་ཀྱིས་ཤིང་གི་ཡལ་ག་ལ་འཇུས་མཛོད་ཅིག་བྱས་པས། རྒྱལ་པོས་ཤིང་གི་ཡལ་ག་ལ་འཇུས་པས་སྲོག་གི་འཇིགས་པ་ལས་ཐར་རོ། །

        དེ་ནས་རྒྱལ་པོས་གླང་པོ་འདུལ་མཁན་ལ་ཁྱོད་ཀྱིས་གླང་པོ་མ་ཐུལ་བར་ང་ལ་ཕུལ་ལོ། །དེས་སྨྲས་པས། ལྷ། བདག་གིས་ཤིན་ཏུ་དུལ་མོད་ཀྱིས། གླང་མོའི་དྲི་ཚོར་ནས་ཉན་དུ་མ་བཏུབ་ལགས་སོ། །འོན་ཀྱང་དཔྱད་དྲན་ཏེ་ལོག་ནས་མཆིའོ་ཞེས་ཞུས་སོ། །དེ་ནས་གླང་པོ་དེ་མྱོས་པ་དང་བྲལ་ཏེ་ཞག་བདུན་ལོན་པ་དང༌།དཔྱད་དྲན་ཏེ་རང་གི་གནས་སུ་འོངས་སོ། །དེ་ནས་འདུལ་མཁན་གྱིས་རྒྱལ་པོ་ལ་གླང་པོ་མཆིས་ལགས་སོ། །རྒྱལ་པོས་སྨྲས་པ། ཁྱོད་ཀྱིས་འདི་མ་ཐུལ་ལོ། །ལྷ་ཐུལ་ལོ། །ཅིས་མངོན། ལྷའི་སྤྱན་སྔར་ཕབ་པར་བགྱིའོ་ཞེས་དེས་ལྕགས་ཀྱི་ཐུ་ལུམ་མེས་བསྲེགས་ཏེ་དཔྱད་ཀྱི་སར་ཁྱེར་ནས་ལེན་དུ་གཞུག་པར་བརྩམས་པས། བག་ཚ་བ་མེད་པར་ལེན་ནོ། །དེ་མཐོང་ནས་གླང་རྫིས་རྒྱལ་པོ་ལ་གསོལ་བ། ལྷ། ལེན་དུ་ནི་བཏུབ་ཀྱང་འགུམ་ལགས་སོ། །རྒྱལ་པོས་སྨྲས་པ། ཀྱེ་མཁས་པ། དེ་ལྟར་ཤིན་ཏུ་དུལ་བ་འདིས་བདག་ཅག་གཡེངས་པ་འདི་ལ་རྒྱུ་ཅི་ཞིག་ཡོད། གླང་རྫིས་གསོལ་བ། ལྷ། བདག་གིས་སྔར་ལུས་དུལ་གྱི་སེམས་མ་དུལ་ལོ་ཞེས་མ་གསོལ་ཏམ། བདག་ནི་ལུས་འདུལ་བ་ལགས་ཀྱི།སེམས་འདུལ་བ་ནི་མ་ལགས་སོ། །རྒྱལ་པོས་སྨྲས་པ། སེམས་འདུལ་བ་འགའ་ཡོད་པ་ཐོས་སམ་ཞེས་དྲིས་པ་ན། གླང་པོ་ཆེ་འདུལ་མཁན་དེ་ལ་ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་དང་ནུས་མཐུ་ཞུགས་ནས་དེས་སྨྲས་པ། ལྷ། ལུས་དང་སེམས་གཉིས་ཀ་འདུལ་བར་བྱེད་པ་སངས་རྒྱས་བཅོམ་ལྡན་འདས་མཆིས་སོ། །རྒྱལ་པོ་ཆེན་པོ་སངས་རྒྱས་མཐུ་བོ་ཆེ། །ཉོན་མོངས་སྤངས་པ་དཔའ་བོ་སྟོབས་ལྡན་པ། །དེ་དང་གང་དག་དེ་ལྟར་རྗེས་འབྲང་བ། །དེ་དབང་འདིར་ནི་གཟུགས་མེད་སེམས་འགྱུར་རོ། །ཞེས་སོགས་སངས་རྒྱས་རྣམས་ཀྱི་ཡོན་ཏན་རྒྱ་ཆེར་བསྒྲགས་སོ། །དེ་ནས་རྒྱལ་པོ་འོད་ལྡན་གྱིས་སངས་རྒྱས་བཅོམ་ལྡན་འདས་རྣམས་ཀྱི་བརྩོན་འགྲུས་དང་སྟོབས་ཐོས་ནས་ཤིན་ཏུ་དད་དེ་སྦྱིན་པ་དག་བྱིན། བསོད་ནམས་དག་བྱས་ཏེ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ། སྦྱིན་པ་རྒྱ་ཆེན་གྱུར་པ་འདི་ཡིས་མཐུས། །འགྲོ་བ་རང་བྱུང་སངས་རྒྱས་གྱུར་ནས་ནི། །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བ། །སྐྱེ་བོའི་ཚོགས་དག་བདག་གིས་བསྒྲལ་བར་བྱ། །བདག་གིས་སྐྱེ་དགུ་ལེགས་བསྐྱངས་ལས་བྱུང་བའམ། །བཏང་བ་ལས་བྱུང་བསོད་ནམས་ཡོད་པ་གང༌། །དེས་ནི་སངས་རྒྱས་ཉིད་ཐོབ་འཇིག་རྟེན་དག །འདོད་པའི་རིམས་ནད་ལས་ནི་ཐར་པར་བྱ། །ཞེས་བྱང་ཆུབ་མཆོག་ཏུ་ཐུགས་བསྐྱེད་པར་གསུངས་སོ། །

        མ་སྐྱེས་དགྲའི་འགྱོད་པ་བསལ་བའི་མདོ་ལས་ཐུགས་བསྐྱེད་ཚུལ་གསུངས་པ་ནི། དེ་བཞིན་གཤེགས་པ་སྔོན་འདས་པའི་བསྐལ་བ་བྱེ་བཁྲག་ཁྲིག་བརྒྱ་སྟོང་གྲངས་མེད་པའི་སྔོན་རོལ་གྱི་ཡང་སྔོན་རོལ་ན་ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བར་འཁྲུངས་པའི་ཚེ།རྗེ་བཙུན་འཇམ་དཔལ་དགེ་སློང་ཆོས་སྨྲ་བ་ཡེ་ཤེས་རྒྱལ་པོ་ཞེས་བྱ་བར་འཁྲུངས་པ་དེས་བསྐུལ་ནས་དེ་བཞིན་གཤེགས་པ་མི་ཐུབ་ཟླ་བའི་རྒྱལ་མཚན་གྱི་སྤྱན་སྔར་ཁྲིད་ནས་དེ་བཞིན་གཤེགས་པ་འཁོར་དང་བཅས་པ་ལ་བསོད་སྙོམས་འབུལ་དུ་བཅུག་པ་ན། ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བ་དེས་ཀྱང་བསོད་སྙོམས་ཕུལ་ནས་བསོད་སྙོམས་གཅིག་ཕུལ་བས། དེ་བཞིན་གཤེགས་པ་མི་ཐུབ་ཟླ་བའི་རྒྱལ་མཚན་འཁོར་ཉན་ཐོས་བརྒྱད་ཁྲི་བཞི་སྟོང་དང་བྱང་ཆུབ་སེམས་དཔའ་ཁྲི་ཉིས་སྟོང་དང་བཅས་པ་ཁྱབ་ཅིང་ཐམས་ཅད་ཀྱིས་ཚིམ་པར་བཞེས་ཀྱང་བསོད་སྙོམས་དེ་ཟད་པར་མ་གྱུར་པ་ན་ཁྱེའུ་དེ་རབ་ཏུ་དགའ་ཞིང་དད་པ་ལྷག་པར་སྐྱེས་ནས་དེ་བཞིན་གཤེགས་པ་དེའི་སྤྱན་སྔར་འདུག་པ་དང༌། དེ་བཞིན་གཤེགས་པ་མི་ཐུབ་ཟླ་བའི་རྒྱལ་མཚན་གྱིས་ཁྱེའུ་དེ་ལ་བྱང་ཆུབ་ཀྱི་ལམ་བསྟན་པ་ན། ཚོང་དཔོན་གྱི་བུ་དྲི་མ་མེད་པའི་དཔུང་པས་ཕྱིར་མི་ལྡོག་པའི་དད་པ་ཆེན་པོས་སྐྱབས་སུ་སོང་ཞིང་བྱང་ཆུབ་ཏུ་ཐུགས་བསྐྱེད་པར་གསུངས་སོ། །བྱང་ཆུབ་སེམས་དཔའི་སྡེ་སྣོད་ལས་སྟོན་པས་སྔོན་ཐུགས་བསྐྱེད་ཚུལ་དང་ས་ལམ་རིམ་གྱིས་བགྲོད་ཚུལ་གསུངས་པ་ནི་མདོ་དེ་ཉིད་ལས། དེ་བཞིན་གཤེགས་པ་སྔོན་འདས་པའི་བསྐལ་བ་གྲངས་མེད་བསམ་གྱིས་མི་ཁྱབ་པའི་སྔོན་རོལ་ན། ཆོས་ཀྱི་རྒྱལ་པོ་ཚེ་རྣམ་པར་རྒྱལ་བ་ཞེས་བྱ་བའི་བུ་གཞོན་ནུ་བརྩོན་འགྲུས་སྤྱོད་པ་ཞེས་བྱ་བར་འཁྲུངས་པའི་ཚེ་དེ་བཞིན་གཤེགས་པ་ཕུང་པོ་ཆེན་པོ་ཞེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ། དེ་བཞིན་གཤེགས་པ་དེས་རྫུ་འཕྲུལ་གྱི་བཀོད་པ་བསམ་གྱིས་མི་ཁྱབ་པ་བསྟན་ནས་གཞོན་ནུ་བརྩོན་འགྲུས་སྤྱོད་པ་ཡིད་འདུན་པར་བྱས་ཏེ་བྱམས་སྙིང་རྗེ་བྱང་ཆུབ་ཀྱི་སེམས་བསྐྱེད་ཚུལ་དང༌། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་དང་བསྡུ་བའི་དངོས་པོ་བཞིས་བསྡུས་པའི་རྒྱལ་སྲས་ཀྱི་སྤྱོད་པ་རླབས་པོ་ཆེ་རྣམས་ལ་སློབ་ཚུལ་རྒྱས་པར་བསྟན་ཅིང༌། སྟོབས་བཅུ་དང་མི་འཇིགས་པ་བཞི་དང༌། མ་འདྲེས་པ་བཅོ་བརྒྱད་སོགས་སངས་རྒྱས་ཀྱི་ཡོན་ཏན་རྣམས་རྒྱ་ཆེར་བསྒྲགས་པ་ན། གཞོན་ནུ་བརྩོན་འགྲུས་སྤྱོད་པ་ཐེག་པ་ཆེན་པོའི་ལམ་ལ་ཕྱིར་མི་ལྡོག་པའི་ངེས་པ་བརྟན་པོ་ཐོབ་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོ་ཉན་ཐོས་ཀྱི་དགེ་འདུན་དང་བཅས་པ་ལ་ལོ་བྱེ་བ་ཕྲག་དགུ་བཅུ་རྩ་དྲུག་ཏུ་མཆོད་པའི་དངོས་པོ་ཐམས་ཅད་ཀྱིས་མཆོད་ཅིང་བསྙེན་བསྐུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་གསུངས་སོ། །དེ་ནས་བསྐལ་བ་ཆེན་པོ་གྲངས་མེད་པ་གཅིག་འདས་པ་ན་ཚོང་དཔོན་ཤེས་རབ་བཟང་པོ་ཞེས་བྱ་བར་འཁྲུངས་པའི་ཚེ། དེ་བཞིན་གཤེགས་པ་དཀོན་མཆོག་ཡན་ལག་ཅེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ། དེ་བཞིན་གཤེགས་པ་དཀོན་མཆོག་ཡན་ལག་གིས་ཚོང་དཔོན་ཤེས་རབ་བཟང་པོ་ལ་བྱང་ཆུབ་ཀྱི་ལམ་རྒྱས་པར་བསྟན་ཅིང༌། རྫུ་འཕྲུལ་གྱི་བཀོད་པ་དུ་མའང་བསྟན་པས་དད་པ་དང་དགའ་བ་རྒྱ་ཆེན་པོ་དང་བྱང་ཆུབ་ཀྱི་ལམ་ལ་ཕྱིར་མི་ལྡོག་པའི་ངེས་པ་བརྟན་པར་གྱུར་ནས། ཚོང་དཔོན་ཤེས་རབ་བཟང་པོས་དེ་བཞིན་གཤེགས་པ་དཀོན་མཆོག་ཡན་ལག་ཉན་ཐོས་ཀྱི་དགེ་འདུན་དང་བཅས་པ་ལ་ལོ་སྟོང་དུ་མཆོད་ཅིང་བསྙེན་བཀུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་ཅིང་བྱང་ཆུབ་ཀྱི་ལམ་རྣམས་ཡོངས་སུ་བསྒྲུབ་བོ། །དེ་ནས་བསྐལ་བ་གྲངས་མེད་པ་གཅིག་འདས་པ་ན་བྲམ་ཟེའི་ཁྱེའུ་གཞོན་ནུ་སྤྲིན་དུ་འཁྲུངས་པའི་ཚེ། དེ་བཞིན་གཤེགས་པ་མར་མེ་མཛད་འཇིག་རྟེན་དུ་བྱོན་པ་དང་མཇལ་ཏེ། དགའ་བ་དང༌། མགུ་བ་དང༌། དད་པ་རྒྱ་ཆེན་པོས་དེ་བཞིན་གཤེགས་པ་མར་མེ་མཛད་ཀྱི་སྤྱན་སྔར་ལོ་བཅུ་གཉིས་སུ་རལ་པ་གསེར་གྱི་མདོག་ཅན་བཏིང་ནས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མི་སྟོན་ན་བདག་འདི་ཉིད་དུ་ལུས་བསྐམ་པར་བྱའོ་ཞེས་ཡི་དམ་བཅས་སོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀུན་ནས་སྤྱན་ཀུན་ནས་མཁྱེན་པ་དུས་གསུམ་གང་ཡང་མི་མཁྱེན་པ་ཅུང་ཟད་ཀྱང་མེད་པ་དེས་བྲམ་ཟེའི་ཁྱིའུ་སྤྲིན་གྱི་བསམ་པ་མཁྱེན་ནས། དེའི་རལ་པ་གསེར་གྱི་ཁ་དོག་ལྟ་བུ་ལ་ཞབས་བཞག་གོ །དེ་ནས་བྲམ་ཟེའི་ཁྱེའུ་སྤྲིན་གྱིས་ལངས་ནས་དེ་བཞིན་གཤེགས་པ་མར་མེ་མཛད་ལ་ཨུཏྤ་ལས་སྙིམ་པ་བཀང་སྟེ་གཏོར་རོ། །གཏོར་མ་ཐག་ཏུ་དེའི་ཚེ་དེ་བཞིན་གཤེགས་པའི་དབུའི་གཙུག་གི་སྟེང་གི་ཐད་དུ་ཨུཏྤ་ལའི་ཁང་པ་བརྩེགས་པ་གྲྭ་བཞིར་ཀ་བ་བཞི་ཟུག་པ། ཆ་མཉམ་པ། ཤིན་ཏུ་རྣམ་པར་ཕྱེ་བ། ཉམས་དགའ་བ། ཡིད་དུ་འོང་བ་ཞིག་གནས་པར་གྱུར་ཏེ། ཁང་པ་བརྩེགས་པ་དེ་ནའང་དེ་བཞིན་གཤེགས་པའི་སྐུ་སྣང་ངོ༌། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་བྲམ་ཟེའི་ཁྱེའུ་སྤྲིན་ལ་འདི་སྐད་ཅེས་བཀའ་བསྩལ་ཏོ། །བྲམ་ཟེའི་ཁྱེའུ་ཁྱོད་དགེ་བའི་རྩ་བ་འདིས་མ་འོངས་པའི་དུས་བསྐལ་བ་གྲངས་མེད་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་རོ། །ཞེས་ལུང་བསྟན་ཏོ། །

        དེ་ནས་བྲམ་ཟེའི་ཁྱེའུ་སྤྲིན་བདག་ཉིད་ལུང་བསྟན་པ་ཐོས་ནས་དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་དང་ཡིད་བདེ་བ་སྐྱེས་ནས་དེའི་ཚེ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །དེ་བཟོདཔ་ཐོབ་ནས་སྟེང་གི་ནམ་མཁའ་ལ་ཏ་ལ་བདུན་སྲིད་དུ་འཕགས་ནས་ཏིང་ངེ་འཛིན་དྲུག་སྟོང་མངོན་དུ་གྱུར་ཅིང༌། དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་དག་ཀྱང་མངོན་དུ་གྱུར་ཏོ། །ཞེས་གསུངས། ལྷག་པར་སྟོན་པ་ཐུགས་རྗེ་ཅན་འདིས་རང་ཅག་རྩོད་ལྡན་སྙིགས་མ་ལྔ་བདོའི་འགྲོ་བ་སངས་རྒྱས་དང་བྱང་ཆུབ་སེམས་དཔའ་གཞན་ཐམས་ཅད་ཀྱིས་འདུལ་མ་ནུས་པར་ཡལ་བར་བོར་བ་རྣམས་ཐུགས་རྗེས་མ་བཟོད་པར་བྲམ་ཟེ་རྒྱ་མཚོའི་རྡུལ་དུ་འཁྲུངས་པ་ན་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཔང་དུ་བཞག་སྟེ། སྤྱིར་ཕྱོགས་བཅུའི་སངས་རྒྱས་ཐམས་ཅད་ཀྱི་འདུལ་མ་ནུས་པར་ལུས་ཤིང༌། ཁྱད་པར་བསྐལ་བ་བཟང་པོ་འདི་ལ་འབྱོན་པའི་སངས་རྒྱས་འཁོར་བ་འཇིག་ནས། མཐའ་མ་མོས་པ་སྣང་མཛད་ལ་ཐུག་གི་བར་དགུ་བརྒྱ་དང་དགུ་བཅུ་རྩ་དགུ་པོ་དེ་དག་ཐམས་ཅད་ཀྱིས་རང་རང་གི་ཞིང་བཟུང་བ་ན་རྩོད་ལྡན་ཚེ་ལོ་བརྒྱ་པའི་དུས་འདི་ནི་ཇི་ལྟར་མེ་དཔུང་འབར་བའི་ནང་དུ་སུ་ཡང་འཇུག་པར་མི་སྤྲོ་བ་བཞིན་དུ་དགུ་བརྒྱ་དང་དགུ་བཅུ་རྩ་དགུ་པོ་དེ་དག་ཐམས་ཅད་ཀྱིས་སྙིགས་མ་ལྔ་བདོའི་སེམས་ཅན་མ་རུང་པ་དམུ་རྒོད་པ་གདུལ་དཀའ་བ་ཕ་ལ་ཕར་མི་འཛིན་པ་མ་ལ་མར་མི་འཛིན་པ་སློབ་དཔོན་ལ་སློབ་དཔོན་དུ་མི་འཛིན་པ་དྲིན་ལན་ལོག་པར་འཇལ་བ་མ་རུང་པ་དེ་དག་གི་ནང་དུ་སུ་ཞིག་འཇུག་ཅེས་ཡལ་བར་བོར་བ་ན།བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་ཆེན་སྙིང་པོའི་སྤྱན་སྔར་ཕྱོགས་བཅུའི་སངས་རྒྱས་ཐམས་ཅད་དཔང་དུ་བཞག་སྟེ་མཁྱེན་པར་གསོལ་ནས། རྩོད་ལྡན་ཚེ་ལོ་བརྒྱ་པའི་དུས་ཀྱི་སེམས་ཅན་དེ་དག་སྙིང་རེ་རྗེ། དེ་དག་ང་འབའ་ཞིག་གིས་གདུལ་བར་བྱའོ། །དེའི་བར་དུ་འཚང་རྒྱ་བར་རང་དབང་ཡོད་ཀྱང་འཚང་མི་རྒྱ་བར་དེའི་དུས་ཁོ་ནར་ངེས་པར་འཚང་རྒྱ་བའི་མཛད་པ་བསྟན་པར་བྱའོ །ཞེས་དམ་བཅས་ཤིང་རང་ཅག་སྙིགས་མ་ལྔ་བདོའི་འགྲོ་བ་རྣམས་ཀྱི་དོན་དུ་སྨོན་ལམ་ཆེན་པོ་ལྔ་བརྒྱ་བཏབ་པ་ན་དེ་བཞིན་གཤེགས་པ་རིན་ཆེན་སྙིང་པོ་དང་ཕྱོགས་བཅུའི་སངས་རྒྱས་ཐམས་ཅད་ཀྱིས་མགྲིན་གཅིག་ཏུ་ལེགས་སོ་བརྗོད་ཅིང་མེ་ཏོག་གཏོར་ཏེ་བདག་ཉིད་ཆེན་པོ་ཁྱོད་ནི་བྱང་ཆུབ་སེམས་དཔའ་ཐམས་ཅད་ཀྱི་ནང་ན་ཟླ་མེད་པ་སྟེ་མེ་ཏོག་ཐམས་ཅད་ཀྱི་ནང་ན་མཚུངས་པ་མེད་པ་མེ་ཏོག་པདྨ་དཀར་པོ་ལྟ་བུའོ་ཞེས་རྒྱ་ཆེར་བསྔགས་སོ། །སྟོན་པ་ཐུགས་རྗེ་ཅན་འདིའི་མཛད་པ་གཞན་ལྟ་ཞོག །སྔོན་ཐུགས་བསྐྱེད་པའི་མཛད་པ་འདི་ཉིད་བསམས་ནས་ཀྱང་བཀའ་དྲིན་དང་ཐུགས་རྗེ་དྲན་པའི་དད་པ་ཆེན་པོའི་སྒོ་ནས་མཆོད་ཅིང་གསོལ་བ་འདེབས་པ་ལ་བརྩོན་པ་ལྷུར་བྱའོ། །

                                                                 རྩོམ་སྒྲིག་པ། མང་ར་བ།
        གསལ་འདེབས། 
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།
             དྲ་བའི་སྦྲེལ་ཐགhttp://www.tb1025.cn