དུས་གཞན་ཞིག་ན་བཅོམ་ལྡན་འདས་ཤིང་ས་ལ་ཅན་གྱི་བྲམ་ཟེའི་གྲོང་ཁྱེར་ན་བཞུགས་སོ། །དེའི་ཚེ་ཉན་ཐོས་ཆེན་པོ་མང་བོ་འདུས་པའི་དབུས་སུ། བཅོམ་ལྡན་འདས་ཀྱིས་བཀའ་སྩལ་བ། ནམ་ཞིག་ན་ང་རྒས་ཤིང་འཁོར་རྣམ་པ་བཞི་ལ་གདམས་ངག་འབོགས་པས་དུབ་པར་འགྱུར་གྱི། ངའི་རིམ་གྲོ་བ་ཐུགས་ལ་འཐད་པ་རང་གི་དོན་ཉམས་པར་མི་འབྱུང་བ་ཞིག་སྤྲོ་བ་སྐྱེད་ཅིག་གསུངས། དེ་ནས་ཀུན་ཤེས་ཀཽ་ཎྜི་ནྱ་བཞེངས་ཏེ། བདག་གིས་རིམ་གྲོ་བགྱིའོ་ཞེས་ཞུས་པས། ཁྱོད་ཉིད་ལའམ་རིམ་གྲོ་བ་དགོས་ཀྱི་སྟན་ལ་སྡོད་ཅིག་གསུངས། དེ་བཞིན་དུ་འཕགས་པ་རྟ་ཐུལ་ནས་གང་བོའི་བར་ལྔ་བརྒྱས་དེ་ལྟར་ཞུས་ཀྱང་མ་གནང་ངོ༌། །དེའི་ཚེ་འཕགས་པ་མཽངྒལ་གྱི་བུས་སྟོན་པའི་ཐུགས་གང་ལ་གཏད་པ་བརྟགས་པས། ཀུན་དགའ་བོ་ལ་ཐུགས་གཏད་པར་ཤེས་ཏེ། འཕགས་པ་ཤཱ་རིའི་བུ་ལ་འང་བཤད་ནས། རང་ཅག་དོང་ལ་དེ་ལ་སྤྲོ་བར་བྱའོ་ཞེས་སོ། །དེ་ནས་དེ་གཉིས་ཀུན་དགའ་བོའི་སར་བྱོན་ཏེ། འཕགས་པ་ཤཱ་རིའི་བུས། འཕགས་པ་ཀུན་དགའ་བོ་ལ་ཁྱོད་སྟོན་པའི་རིམ་གྲོ་བྱེད་པར་སྤྲོ་འམ། དེ་བྱས་ན་དོན་ཆེན་པོར་འགྱུར་རོ་གསུངས། ཀུན་དགའ་བོས། བཅོམ་ལྡན་འདས་ནི་བསྙེན་ཀྱང་བཟོད་པར་དཀའ་བ་སྟེ། དེས་ན་བདག་མི་སྤྲོ་ཟེར། མོངྒལ་གྱི་བུས་སྟོན་པའི་ཐུགས་དགོངས་ཁྱོད་ལ་གཏད་དོ་གསུངས་པས། ཀུན་དགའ་བོས་འདི་སྐད་ཅེས། དེ་བཞིན་གཤེགས་པའི་ན་བཟའ་བདག་གིར་མི་བྱ་བ་དང༌། མགྲོན་དུ་བོས་པ་བདག་གིར་མི་བྱ་བ་དང༌། བཅོམ་ལྡན་འདས་ལ་བལྟ་ཞིང་བསྙེན་བཀུར་བྱེད་པའི་ཕྱིར་དུ། དུས་དང་དུས་མ་ཡིན་པ་ཅུང་ཟད་ཀྱང་མེད་པར་དེ་བཞིན་གཤེགས་པའི་དྲུང་དུ་སོང་ཆོག་པ་སྟེ། གསུམ་པོ་འདི་གནང་ན་རིམ་གྲོ་བགྱིད་པར་སྤྲོའོ། །ཞེས་ཞུས་སོ། །དེ་ནས་འཕགས་པ་མོངྒལ་གྱི་བུས། ཀུན་དགའ་བོའི་ཞུ་ཚིག་དེ་སྟོན་པ་ལ་གསོལ་བས། བཀའ་སྩལ་བ། ཀུན་དགའ་བོ་ནི་མཁས་པ་ཡིན་ཏེ། སྔ་མ་གཉིས་ནི། གོས་དང་ཟས་ཀྱི་ཕྱིར་རིམ་གྲོ་བ་བྱས་སོ་ཞེས་ཁ་ཟེར་བ་སྤང་བའི་ཕྱིར་དང༌། ཕྱི་མ་ནི་གཞན་དག་གིས་དུས་དང་དུས་མིན་སོགས་ཤེས་པ་དང༌། བཀའ་སྩལ་བ་འཛིན་ཅིང་རང་གི་དོན་མི་བསམ་པའི་ཕྱིར་ཟིན་པས་དེ་གསུམ་གནང་གི་རིམ་གྲོ་བ་གྱིས་ཤིག ཅེས་གནང་སྟེ་ཞམ་རིང་དུ་ལྷན་དུ་གནས་པའི་རིམ་གྲོ་བར་གྱུར་ཏོ། །དེ་ཡང་འཕགས་པ་ཀུན་དགའ་བོ་ནི། ཆོས་མཉན་པ་ན་དད་པས་བསམ་པ་གཅིག་ཏུ་བསྡུས་པས། སྤྱི་བོར་ཕོལ་མིག་བྱུང་བ་འཚོ་བྱེད་ཀྱིས་བྲད་པ་ཡང་མ་ཚོར་རོ། །ཚེ་རབས་ལྔ་བརྒྱར་མཚན་མའི་བསྟན་བཅོས་དྲུག་ཁྲི་བསླབས་པས། རྟགས་དང་མཚན་མ་རྟོགས་པ་ལ་ཤིན་ཏུ་མཁས་ཤིང་གསལ་ལ་རྣམ་པར་འབྱེད་པ་རྣམས་ཀྱི་མཆོག་ཏུ་གསུངས་སོ། །གཞན་ཡང༌། བཅོམ་ལྡན་འདས་ཡང་དག་པར་འཇོག་པ་ལ་བཞུགས་པ་དང༌། བཞེངས་པ་དང༌། ཏིང་ངེ་འཛིན་གྱི་གནས་པ་གང་ལ་གནས་པ་ཡང་འཕགས་པ་ཀུན་དགའ་བོས་ཤེས་ཏེ། ངོ་མཚར་རྨད་དུ་བྱུང་བའི་ཆོས་གཅིག་ཡིན་ནོ།། 
        ཡང་ཡུལ་ཀཽ་ཤམ་བྷི་ཞེས་པ་ན་ཁྱིམ་བདག་ནོར་བཟང་ཞེས་བྱ་བ་ཞིག་རྐང་བ་ཁོ་ནས་འགྲོ་ཞིང་ལས་ཀྱི་མཐའ་ལ་བརྩོན་པ་ལས། རྒྱལ་བོ་ཤར་བས་དེའི་སྐད་ཀྱི་གདངས་ལས་གསེར་སྲང་འབུམ་ཡོད་པར་ཤེས་ནས། མིང་ལ་གདངས་ཅན་ཞེས་བཏགས་ཤིང་བློན་པོར་བསྐོས་སོ། །དུས་ལན་ཅིག་རྒྱལ་བོས་དེའི་སེམས་བརྟག་པའི་ཆེད་དུ་ཆད་པས་བསྡིགས་ཀྱང༌། མི་རིགས་པའི་ལས་ལ་མི་འཇུག་པས། རྒྱལ་བོ་གཏིང་ནས་མགུ་སྟེ། དམ་པ་ཅི་དགོས་ཞེས་དྲིས་པ་ན། བདག་ཅི་དགར་བསོད་ནམས་དག་བགྱིད་པར་བསྩལ་དུ་གསོལ། ཞེས་པས། རྒྱལ་བོས་ཀྱང་གནང་ངོ༌། །དེའི་ཚེ་ལྷོ་ཕྱོགས་ནས་དྲང་སྲོང་ལྔ་བརྒྱ་ཡུལ་དབུས་སུ་འོངས་པ་དང་ལྷན་ཅིག་མཉན་ཡོད་དུ་ཕྱིན་ཏེ། ཁྱིམ་བདག་མགོན་མེད་ཟས་སྦྱིན་ལ་སྨྲས་པ། རྒྱལ་ཆེན་རིགས་བཞི་བའི་ལྷན་གཅིག་གིས། བདག་གིས་སྔོན་མགོན་མེད་ཟས་སྦྱིན་གྱི་དྲུང་དུ་བསྙེན་གནས་ཀྱི་སྡོམ་པ་བླངས་ཏེ། ཡན་ལག་གཞན་རྣམས་བསྲུང་ཐུབ་ཀྱང༌། གཞན་གྱིས་ནན་ཏན་ཆེན་པོས་ཟུར་བཅུག་པས། དུས་མིན་གྱི་ཁ་ཟས་བསྲུང་མ་ཐུབ་སྟེ། བསྙེན་གནས་ཡན་ལག་བརྒྱད་པ་དེ་མ་རལ་ན་སུམ་ཅུ་རྩ་གསུམ་པའི་ལྷར་སྐྱེ་བ་ཟིན་པ་ལ། བསྙེན་གནས་རལ་བ་དེས་རྒྱལ་ཆེན་རིགས་བཞི་བའི་ལྷར་སྐྱེས་སོ། །ཞེས་ཟེར་བས། བདག་ཅག་གིས་ཀྱང་བསྙེན་གནས་ཡན་ལག་བརྒྱད་པ་ལེན་པར་འདོད་དོ་ཞེས་པས། མགོན་མེད་ཟས་སྦྱིན་གྱིས། ཁྱེད་རྣམས་ཀྱིས་ང་ལས་བསྙེན་གནས་ལེན་ནམ། བཅོམ་ལྡན་འདས་ལས་ལེན་ཞེས་དྲིས་པ་ལ། དེ་རྣམས་ཀྱིས་སླར་དྲིས་པ། ཁྱིམ་བདག་ཉིད་ཀྱིས་སུ་ལས་བླངས། དེས་སྨྲས་པ། བདག་གིས་བཅོམ་ལྡན་འདས་ལས་སོ། །འོ་ན་བདག་ཅག་གིས་ཀྱང་བཅོམ་ལྡན་འདས་ལས་སོ་ཞེས་པས། མགོན་མེད་ཟས་སྦྱིན་གྱིས་དེ་རྣམས་ཁྲིད་ནས་བཅོམ་ལྡན་འདས་ཀྱི་སྤྱན་སྔར་ཕྱིན། སྟོན་པས་དེ་རྣམས་ལ་ཆོས་བསྟན་པས། གདངས་ཅན་གྱིས་རྒྱུན་ཞུགས་ཐོབ་ཅིང༌། དྲང་སྲོང་ལྔ་བརྒྱ་བོ་ཚུར་ཤོག་གིས་བསྙེན་པར་རྫོགས་ནས་མི་རིང་བར་དགྲ་བཅོམ་ཐོབ་བོ། །

        དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཡུལ་ཀཽ་ཤམ་བྷིར་གཤེགས་སུ་གསོལ། ཇི་སྲིད་འཚོའི་བར་དུ་བསྙེན་བཀུར་བགྱིའོ། །ཞེས་ཞུས་སོ། །དེ་ནས་ཚེ་དང་ལྡན་པ་བསྐུལ་བྱེད་ཁྱིམ་བདག་གདངས་ཅན་དང་ལྷན་ཅིག་མངགས་ཏེ་སོང་ངོ༌། །གནས་རྒྱལ་བྱེད་ཚལ་དང་འདྲ་བ་ཞིག་ཏུ་གཙུག་ལག་ཁང་ཡང་དེ་དང་ཕྱོགས་འདྲ་བ་ཞིག་བརྩིགས། བཅོམ་ལྡན་འདས་དགེ་འདུན་དང་བཅས་པ་སྤྱན་དྲངས། གཙུག་ལག་ཁང་དེ་ཡང་ཕུལ་ཏེ། བཅོམ་ལྡན་འདས་འཁོར་དང་བཅས་པ་ལ་མཆོད་པ་དུ་མས་མཆོད་དོ། །དེ་ནས་བཅོམ་ལྡན་འདས་ཀྱིས་འཕགས་པ་བསྐུལ་བྱེད་ལ། རྫས་ལས་བྱུང་བའི་བསོད་ནམས་བདུན་དང༌། རྫས་ལས་བྱུང་བ་མ་ཡིན་པའི་བསོད་ནམས་ཀྱིས་གཞི་ཆེན་པོ་བདུན་གསུངས་སོ། །དེ་ཡང་ལུང་རྣམ་འབྱེད་ལས། བཅོམ་ལྡན་འདས་ཡུལ་ཀཽ་ཤམ་བྷི་ན་དབྱངས་ལེན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་བསྐུལ་བྱེད་བཅོམ་ལྡན་འདས་ག་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་སྟེ། བཅོམ་ལྡན་འདས་ལ་ཚེ་དང་ལྡན་པ་བསྐུལ་བྱེད་ཀྱིས་འདི་སྐད་ཅེས་གསོལ་ཏོ། བཙུན་པ། རྫས་ལས་བྱུང་བའི་བསོད་ནམས་བགྱི་བའི་དངོས་པོ་འབྲས་བུ་ཆེ་བ་ཕན་ཡོན་ཆེ་བ་གཟི་བརྗིད་ཆེ་བ་རྒྱ་ཆེ་བ་གདགས་པ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། སྐུལ་བྱེད་ཡོད་དོ། །བདུན་པོ་འདི་དག་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ། ཕན་ཡོན་ཆེ་བ། གཟི་བརྗིད་ཆེ་བ། རྒྱ་ཆེ་བ་ཡིན་ཏེ། དེ་དག་དང་ལྡན་པའི་དད་པའི་རིགས་ཀྱི་བུའམ། རིགས་ཀྱི་བུ་མོ་ནི། རྒྱུ་ཡང་རུང༌། འདུག་ཀྱང་རུང༌། ཉལ་ཡང་རུང༌། མི་ཉལ་ཡང་རུང་སྟེ། རྟག་ཏུ་རྒྱུན་མི་འཆད་པར་བསོད་ནམས་མངོན་པར་འཕེལ་བ་ཁོ་ནར་འགྱུར་རོ། །བདུན་གང་ཞེ་ན། བསྐུལ་བྱེད་འདི་ན་དད་པའི་རིགས་ཀྱི་བུའམ་རིགས་ཀྱི་བུ་མོས། ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའ་ར་བ་འབུལ་བར་བྱེད་དེ། བསྐུལ་བྱེད་འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་ཕན་ཡོན་ཆེ་བ་གཟི་བརྗིད་ཆེ་རྒྱ་ཆེ་བ་དང་པོ་ཡིན་ཏེ། དེ་དང་ལྡན་པའི་དད་པའི་རིགས་ཀྱི་བུའམ་རིགས་ཀྱི་བུ་མོ་ནི། རྒྱུ་ཡང་རུང་འདུག་ཀྱང་རུང་ཉལ་ཡང་རུང་མི་ཉལ་ཡང་རུང་སྟེ། རྟག་ཏུ་རྒྱུན་མི་འཆད་པར་བསོད་ནམས་མངོན་པར་འཕེལ་བ་ཁོ་ནར་འགྱུར་ཞིང༌། བསོད་ནམས་ཉེ་བར་སྐྱེ་བ་ཁོ་ནར་འགྱུར་རོ། །ཞེས་པ་ནས། དེ་བཞིན་དུ་ཀུན་དགའ་ར་བ་དེ་ཉིད་དུ་གཙུག་ལག་ཁང་རྩིག་པ་དང༌། མལ་ཆ་དང་སྟན་འབུལ་བ་དང༌། འཚོ་བ་ནར་མ་འབུལ་བ་དང༌། མགྲོན་པོ་གློ་བུར་དུ་འགྲོ་འོང་བྱེད་པ་ལ་སྦྱིན་པ་གཏོང་བ་དང༌། ནད་པ་དང་ནད་གཡོག་ལ་སྦྱིན་པ་གཏོང་བ་དང༌། རླུང་དང་ཆར་བ་ལ་སོགས་ཡུལ་ངན་བྱུང་བའི་ཚེ་གཙུག་ལག་ཁང་གི་ནང་དུ་བསོད་སྙོམས་འབུལ་བ་ཞེས་བྱ་བ་དྲུག་ལའང་སྦྱར་ནས་རྒྱས་པར་གསུངས་སོ། །ཡང་བཅོམ་ལྡན་འདས་ལ་ཚེ་དང་ལྡན་པ་བསྐུལ་བྱེད་ཀྱིས་འདི་སྐད་ཅེས་གསོལ་ཏོ། །བཙུན་པ་རྫས་ལས་བྱུང་བ་མ་ལགས་པའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་ནས་རྒྱ་ཆེ་བའི་བར་གདགས་སུ་མཆིས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་བ། བསྐུལ་བྱེད་ཡོད་དོ། །བསྐུལ་བྱེད་བདུན་པོ་འདི་དག་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་ཡིན་ཏེ། དེ་དག་ལྡན་པའི་རིགས་ཀྱི་བུའམ་རིགས་ཀྱི་བུ་མོ་ནི། རྒྱུ་ཡང་རུང༌། འདུག་ཀྱང་རུང༌། ཉལ་ཡང་རུང༌། མི་ཉལ་ཡང་རུང་སྟེ། རྟག་ཏུ་རྒྱུན་མི་འཆད་པར་བསོད་ནམས་མངོན་པར་འཕེལ་བ་ཁོ་ནར་འགྱུར་རོ། །བདུན་གང་ཞེ་ན། བསྐུལ་བྱེད་འདི་ན་དད་པའི་རིགས་ཀྱི་བུའམ་རིགས་ཀྱི་བུ་མོས། དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས། གྲོང་ངམ། ཞིང་ཆེ་གེ་མོ་ཞིག་ན་རྟེན་ཀྱང་བཞུགས་སོ། །ཞེས་ཐོས་ཤིང༌། ཐོས་ནས་ཀྱང་དགའ་བ་དང༌། རབ་ཏུ་དགའ་བ་རྒྱ་ཆེ་བ་དགེ་བ་ངེས་པར་འབྱུང་བ་དང་ལྡན་པ་ཐོབ་སྟེ། བསྐུལ་བྱེད། འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་དང་བོ་ཡིན་ནོ། །ཞེས་པ་ནས། བསོད་ནམས་ཉེ་བར་སྐྱེ་བ་ཁོ་ནར་འགྱུར་རོ། །ཞེས་བྱ་བའི་བར་སྔ་མ་བཞིན་དུ་གསུངས་སོ། །དེ་བཞིན་དུ་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་ཚུར་གཤེགས་པར་རྩོམ་པ་དང༌། ལམ་དུ་ཞུགས་པ་དང༌། ཉེ་བའི་གྲོང་དང་གྲོང་ཁྱེར་དུ་ཕྱིན་པ་དང༌། ལྟ་བའི་ཕྱིར་འགྲོ་ཞིང་མཐོང་བ་དང༌། ཆོས་ཐོས་པ་དང༌། དཀོན་མཆོག་གསུམ་ལ་སྐྱབས་སུ་འགྲོ་བ་དང༌། བསླབ་པའི་གནས་འཛིན་པ་ན་དགའ་བ་དང༌། རབ་ཏུ་དགའ་བ་རྒྱ་ཆེ་བ་དགེ་བ་ངེས་པར་འབྱུང་བ་དང་ལྡན་པ་ཐོབ་སྟེ། བསྐུལ་བྱེད། འདི་ནི་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་བདུན་པ་ཡིན་ནོ། །ཞེས་གསུངས་ཏེ། ཇི་སྐད་དུ། ཀུན་དགའ་ར་བ་གཙུག་ལག་ཁང༌། །མལ་སྟན་འཚོ་བ་ནར་མ་དང༌། གློ་བུར་ནད་པ་ནད་གཡོག་དང༌། །ཡུལ་ངན་བྱུང་ཚེ་སྦྱིན་པ་ནི། །རྫས་ལས་བྱུང་བའི་བསོད་ནམས་བདུན། །བཞུགས་དང་གཤེགས་རྩོམ་ལམ་ཞུགས་དང༌། །ཕྱིན་པ་ཐོས་དང་མཐོང་བ་དང༌། །ཆོས་ཐོས་བསླབ་པའི་གཞི་འཛིན་ལ། །དགའ་དང་དད་པ་བསྐྱེད་པ་ནི། །རྫས་ལ་མ་ལྟོས་བསོད་ནམས་བདུན། །ཞེས་སྔོན་གྱི་མཁས་པ་དག་གིས་སྡོམ་དུ་མཛད་པ་ལྟར་རོ། །གཞན་ཡང་མདོ་ལས། སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཞེ་ན། ཁ་ཅིག་ནི་སྦྱིན་པ་པོར་གྱུར་ཏེ། དགེ་སྦྱོང་ངམ། བྲམ་ཟེ་དང་སྙིང་རྗེ་བ་དང་སློང་བ་དང་ལམ་དུ་ཞུགས་པ་དག་ལ་འདི་ལྟ་སྟེ། ཟས་དང་སྟོན་མོ་དང་གོས་དང་ཕྲེང་བ་དང་དྲི་དང་བྱུག་པ་དང་ཁྲི་དང་སྒྲོན་མ་དག་སྦྱིན་པར་བྱེད་པ་སྟེ། ཞེས་དང༌། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་གང་ཞེ་ན། འདི་ན་ཁ་ཅིག་སྲོག་གཅོད་པ་སྤོང་ཞིང་སྲོག་གཅོད་པ་ལས་ལོག་པ་དང་ཞེས་པ་ནས། བག་མེད་པའི་གནས་ལས་ལོག་པར་འགྱུར་པའོ། །ཞེས་དང༌། བསྒོམ་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཞེ་ན། འདི་ན་ཁ་ཅིག་བྱམས་པ་དང་ལྷན་ཅིག་པར་གྱུར་པའི་སེམས་ཁོ་ན་མེད་པ་འགྲན་ཟླ་མེད་པ་གནོད་པ་མེད་པ་ཡངས་པ་ཐམས་ཅད་དུ་ཁྱབ་པ་ཚད་མེད་པ་ལེགས་པར་བསྒོམ་པས་ཕྱོགས་གཅིག་ཏུ་རྒྱས་པར་ཁྱབ་པར་བྱས་ནས་བསྒྲུབས་ཏེ་གནས་སོ། །ཞེས་དང༌། ཐོག་མ་ཐ་མར་བདེ་འགྱུར་བའི། །ཆོས་ཉིད་རྗེས་སུ་བསླབ་པར་བྱ། །སྦྱིན་པ་དང་ནི་ཚུལ་ཁྲིམས་དང༌། །བྱམས་པའི་སེམས་ནི་བསྒོམ་པར་བྱ། །ཆོས་གསུམ་དག་ནི་བསྒོམ་བྱས་ནས། །རྟག་ཏུ་བདེ་བ་ཐོབ་ཅིང་ལྡན། །མཁས་པ་གནོད་མེད་བདེ་བ་ཡི། །འཇིག་རྟེན་དག་ཏུ་སྐྱེ་བར་འགྱུར། །ཞེས་གསུངས་ཤིང༌། ལེགས་ཉེས་ཀྱི་རྒྱུ་འབྲས་བསྟན་པའི་མདོ་ལས་ཀྱང༌། གང་ཟག་རྣམ་པ་གསུམ་ལ་སྦྱིན་པ་བཏང་ན་རྣམ་པར་སྨིན་པའི་འབྲས་བུ་ཡོངས་སུ་གཏུགས་པར་མི་འགྱུར་ཏེ། དེ་བཞིན་གཤེགས་པ་དང༌། ཕ་མ་དང༌། ནད་པ་རྣམས་སོ། །ཞེས་དང༌། གང་གིས་ཐེག་པ་ཆེན་པོའི་དེ་བཞིན་གཤེགས་པའི་སྙིང་པོ་འཁོར་མང་པོ་ལ་ཡང་དག་པར་བསྒྲགས་ནས་སེམས་ཅན་གྱི་མིག་འབྱེད་པའི་ཆོས་སྨྲ་བ་ལ་སྦྱིན་པ་བཏང་ན་རྣམ་པར་སྨིན་པའི་འབྲས་བུ་ཚད་མེད་པ་སྙེད་འཐོབ་པར་འགྱུར་རོ། །ཞེས་བཀའ་སྩལ་ཏོ།། 
        བར་སྐབས་ཀྱི་ཚིགས་བཅད། 
        སྨྲས་པ། རྒྱ་ཆེན་ཚོགས་གཉིས་འཆི་མེད་ར་བ་ན། །སྲིད་ཞིའི་འདོད་འཇོ་དགེ་ལེགས་རིན་ཆེན་གཏེར། །དཔག་མེད་སྲིད་གསུམ་གྲོལ་བའི་ཡལ་ཀ་རྒྱས། །སྟོན་པ་དཔག་བསམ་ལྗོན་པ་དེ་ལ་འདུད། །དགྲ་བཅོམ་ཆེན་པོ་ཀཽ་ཎྜི་ནྱ། །སྤྱོད་ལམ་མཆོག་གྱུར་འཕགས་པ་རྟ་ཐུལ་སོགས། །ཐུབ་པའི་གསུང་སྐྱེས་དགེ་འདུན་དཀོན་མཆོག་གི །ཐོག་མར་བྱོན་ལ་ལྔ་སྡེ་བཟང་བོར་གྲགས། །འབབ་ཆུ་གནོད་པ་ཅན་གྱི་ཆུ་འགྲམ་དུ། །གྲགས་པ་དྲི་མེད་གང་བོ་བ་ལང་བདག །ལག་བཟང་རྣམས་ནི་ཚུར་ཤོག་བསྙེན་པར་རྫོགས། །སྐུ་མཆེད་རྣམས་ལ་ཉེ་བའི་ལྔ་སྡེར་གྲགས། །ལྟེངས་རྒྱས་འོད་སྲུངས་ཆུ་ཀླུང་འོད་སྲུངས་དང༌། །ཀ་ཡ་འོད་སྲུངས་འཁོར་བཅས་རལ་བ་ཅན། །སྟོང་གིས་དགྲ་བཅོམ་ཐོབ་ཚེ་བཅོམ་ལྡན་འདས། །ལྷུན་པོ་གསེར་རི་སྟོང་གིས་བསྐོར་བ་བཞིན། །འཇིག་རྟེན་ཀུན་གྱི་ཤེས་རབ་ཐམས་ཅད་ཀྱིས། །གང་གི་བཅུ་དྲུག་ཆར་ཡང་མི་ཆོག་གསུངས། །སྤོབས་པ་ཆེན་པོའི་མཆོག་ཏུ་ལུང་བསྟན་པ། །རྒོལ་ངན་ཚར་གཅོད་འཕགས་པ་ཤཱ་རིའི་བུ། །ཞབས་གཡས་མཐེ་བོས་ལྷ་དབང་བརྒྱ་བྱིན་གྱི། །རྣམ་པར་རྒྱལ་བའི་ཁང་བཟང་ལན་གསུམ་བསྒུལ། །འོད་ཟེར་ཅན་དུ་ཉིན་མཚན་བདུན་གྱིས་གཤེགས། །རྫུ་འཕྲུལ་མཆོག་གྱུར་འཕགས་པ་མཽ་འགལ་བུ། །ཁྱོད་ནི་སྟོབས་བཅུ་མངའ་བའི་རྒྱལ་ཚབ་ཏུ། །སྟོན་པ་ཉིད་ཀྱིས་དབང་བསྐུར་བསྟན་པ་གཏད། །སྦྱངས་པའི་ཡོན་ཏན་མཆོག་ཏུ་ལུང་བསྟན་པ། །ཐུབ་དབང་གཉིས་པ་འོད་སྲུངས་ཆེན་པོའོ། །ཁྱོད་ཀྱི་ཞབས་ལ་ཤཱཀྱ་བཟང་ལྡན་གྱིས། །ཕྱག་བྱས་ས་ཆེན་རྣམ་པ་དྲུག་ཏུ་གཡོས། །འདུལ་བ་འཛིན་པའི་མཆོག་ཏུ་ལུང་བསྟན་པ། །བྲམ་ཟེའི་བུ་མོ་ལྟ་བུ་ཉེ་བར་འཁོར། །རྟ་ཐུལ་དྲུང་དུ་བསྙེན་རྫོགས་དགྲ་བཅོམ་ཐོབ། །སོར་མོ་དག་ལས་མུན་སེལ་སྣང་བ་སྤྲོ། །གནས་མལ་འབོགས་པའི་མཆོག་ཏུ་ལུང་བསྟན་པ། །སངས་རྒྱས་འདྲ་བའི་འཕགས་པ་གྱད་བུ་ནོར། །འཕགས་རྒྱལ་གྲོང་དུ་སྟོན་པའི་རྒྱལ་ཚབ་མཛད། །མ་འོངས་ལུང་བསྟན་ཡམས་ནད་ཞི་བ་སོགས། །ངོ་མཚར་རྨད་དུ་བྱུང་བའི་རྣམ་ཐར་མང༌། །མཐའ་འཁོབ་འདུལ་མཛད་ཀཱ་ཏ་ཡཱ་ནའོ། །གྲོང་ཁྱེར་སློབ་མ་ཅན་དུ་བཅོམ་ལྡན་འདས། །སྤྱན་འདྲེན་མཆོད་རྫས་རྒྱལ་བྱེད་ཚལ་དུ་སླེབས། །ཙན་དན་མཆོག་གི་ཀུན་དགའ་ར་བ་བཞེངས། །རྫུ་འཕྲུལ་སྟོབས་ལྡན་བྱམས་མའི་བུ་གང་བོ། །བཅོམ་ལྡན་འདས་ལ་རིམ་གྲོ་ཡུན་རིང་མཛད། །གསུང་རབ་ཡན་ལག་བཅུ་གཉིས་ཁྱོད་ལ་གཏད། །མང་དུ་ཐོས་པའི་མཆོག་ཏུ་ལུང་བསྟན་པ། །བསྟན་པའི་མངའ་བདག་གཉིས་པ་ཀུན་དགའ་བོ། །རྒྱལ་བྱེད་ཚལ་བཞེངས་བདེ་གཤེགས་འཁོར་བཅས་ལ། །བསྙེན་བཀུར་ཞུས་ཏེ་བསྟན་པ་རྒྱས་པར་མཛད། །རིན་ཆེན་འབྱུང་གནས་ས་འོག་གཏེར་ཡང་མཐོང༌། །ཡོན་གྱི་བདག་པོ་མགོན་མེད་ཟས་སྦྱིན་ནོ། །ཨེ་མ་ཐུགས་རྗེ་ཅན་དང་དེ་ཡི་སྲས། །ཟག་པ་ཀུན་ཟད་རིག་དང་ཞབས་སུ་ལྡན། །འཕགས་པའི་ཚོགས་ཀྱིས་འགྲོ་དོན་མཛད་པའི་ཚུལ། །བསམ་གྱིན་སྙིང་ནས་དད་པས་ཕྱག་བགྱིའོ།། 
          རྗེ་ཡེ་ཤེས་རྒྱ་མཚོའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་མཛད་ཆེན་རྣམ་པར་ཐར་པ་པདྨ་དཀར་པོའི་ཕྲེང་བ་ལས་བཤུས།

                                                          རྩོམ་སྒྲིག་པ། མང་ར་བ།

         གསལ་འདེབས། 
                རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                དྲ་བའི་སྦྲེལ་ཐགhttp://www.tb1025.cn