དེའི་ཕྱི་ལོར་བཅོམ་ལྡན་འདས་མཉན་ཡོད་ན་བཞུགས་སོ། །རྒྱལ་བོ་ཟས་གཙང་གིས། བཅོམ་ལྡན་འདས་ཀྱི་དྲུང་དུ་ཕོ་ཉ་གཅིག་ནས་བདུན་གྱི་བར་མངགས་ཏེ། ཤཱཀྱའི་རྒྱལ་ཁབ་ཏུ་མྱུར་དུ་བྱོན་ཅིག་ཅེས་ཞུས་པ་ལ། རྒྱལ་བོས་མངགས་པའི་མི་དེ་དག་བཅོམ་ལྡན་འདས་དང་མཇལ་བས། ཤིན་ཏུ་དད་པ་སྐྱེས་ནས་རབ་ཏུ་བྱུང་ཞིང་བསྡད་པས་བཀའ་ལན་མ་བྱུང༌། དེའི་ཚེ་རྒྱལ་བོ་ཟས་གཙང་མ་སེམས་ཁོང་དུ་ཆུད་ཅིང་འདུག་པ་ལ། མདུན་ན་འདོན་གྱི་བུ་འཆར་ཀས་རྒྱུ་མཚན་དྲིས་པས། གཞོན་ནུ་དོན་ཐམས་ཅད་གྲུབ་པ་སྔོན་དཀའ་བ་སྤྱོད་པའི་ཚེ། ཐམས་ཅད་ཀྱིས་གཏམ་ཁྱེར་ནས་འོང་ན། ད་ལྟ་བདུད་རྩི་ཐོབ་ནས་ཕུན་སུམ་ཚོགས་པར་གནས་པའི་ཚེ། འཕྲིན་སྐྱེལ་བ་བཏང་བ་ཐམས་ཅད་ཀྱང་སླར་མི་འོང་ངོ་ཞེས་ཟེར། དེ་ནས་འཆར་ཀས་དོན་དེ་ལ་བདག་འགྲོའོ་ཟེར། རྒྱལ་བོས། ཁྱོད་ཀྱང་དེའི་ཕུན་སུམ་ཚོགས་པ་མཐོང་ནས་དེར་འདུག་པར་འགྱུར་རོ། །འཆར་ཀས་བདག་ནི་སླར་ངེས་པར་འོང་ངོ་ཞེས་དམ་བཅས་སོ། །དེ་ནས་རྒྱལ་པོ་ཟས་གཙང་རང་ཉིད་ཀྱིས་ཕྱག་ཡིག་བྲིས་ཏེ། འདི་སྐད་ཅེས། ལྷུམས་སུ་ཞུགས་པ་ཚུན་ཆད་ནས། །བདག་གིས་ལེགས་པར་ཁྱོད་བསྲུངས་ཏེ། །ཉོན་མོངས་མེ་རབ་འབར་བཞིན་དུ། །རྒྱལ་བོའི་ལྗོན་ཤིང་སྡོད་ཅིང་མཆིས། །ད་ནི་ཁྱོད་ཀྱི་སློབ་མ་ཡི། །ཡལ་ཀ་ལྕུག་མ་འཕེལ་གྱུར་ན། །གཞན་ནི་བདེ་བས་དགའ་བར་གྱུར། །བདག་ནི་སྡུག་བསྔལ་བསྟེན་པར་གྱུར། །གང་ཚེ་དང་བོ་ཁྱོད་བསྲུངས་ཚེ། །ཤིན་ཏུ་དོན་ཆེན་མཛད་ནས་ནི། །ཉེ་དུ་རྗེས་སུ་གཟུང་མཛད་ཅེས། །དེ་ཚེ་ཁྱོད་ཀྱིས་ཐུགས་དམ་བཅས། །ཁྱོད་ཀྱིས་ཕྱེས་ནས་དེ་བརྙེས་ན། །བདག་དང་གཉེན་གྱི་ཚོགས་རྣམས་ལ། །ཐུགས་བརྩེས་རྗེས་སུ་ཟུངས་མཛོད་ལ། །གཤེགས་པའི་དགོངས་པར་མཛད་དུ་གསོལ། །ཅེས་སོ། །དེ་ནས་འཆར་ཀས་ཞུ་འཕྲིན་གྱི་ཡི་གེ་ཁྱེར་ཏེ་སོང་བ་ལས་ཞག་བདུན་གྱིས་མཉན་ཡོད་དུ་ཕྱིན། སྟོན་པའི་སྤྱན་སྔར་སོང་སྟེ་འཕྲིན་ཡིག་ཕུལ། སངས་རྒྱས་ཉིད་ཀྱི་ཕྱག་གིས་བཞེས་ཏེ་བཀླག་པར་མཛད་དོ། །འཆར་ཀས་ཀྱང་རྒྱལ་བོ་ཟས་གཙང་ཐུགས་ཡིད་ཕྱུང་བའི་ལོ་རྒྱུས་དང་བཅས། ཤཱཀྱའི་གྲོང་ཁྱེར་དུ་མྱུར་དུ་འབྱོན་པར་གསོལ་བ་ནན་ཆེར་བཏབ་པས། ཞག་བདུན་ནས་ཕེབས་པར་ཞལ་བཞེས་གནང་ངོ༌། །

        སྟོན་པས། འཆར་ཀ་འཕགས་པ་ཤཱ་རིའི་བུ་ལ་གཏད་དེ། རབ་ཏུ་བྱུང་ཞིང་ད་ཆོག་གི་སྒོ་ནས་བསྙེན་པར་རྫོགས་སོ། །དུས་ནི་ལུང་རྣམ་འབྱེད་ལས། བཅོམ་ལྡན་འདས་མངོན་པར་བྱུང་ནས་ལོ་བཅུ་གཉིས་ལོན་ཞིང༌། སངས་རྒྱས་ནས་ལོ་དྲུག་ལོན་ནས་སེར་སྐྱའི་གནས་སུ་བྱོན། ཅེས་སོ། །དེ་ནས་དགེ་སློང་འཆར་ཀ་སེར་སྐྱར་འགྲོ་བའི་དུས། སངས་རྒྱས་ཀྱི་མཐུས་ཡུད་ཙམ་ཞིག་ལ་སེར་སྐྱར་སླེབས་པ་ན། འཆར་ཀ་སངས་རྒྱས་ལ་ལྷག་པར་དད་པ་སྐྱེས་སོ། །དེ་ནས་སྟོན་པས་ཇི་སྐད་བཀའ་སྩལ་བ་ལྟར། རྒྱལ་བོའི་ཕོ་བྲང་གི་སྒོ་དྲུང་དུ་བསྡད་ནས་ཤཱཀྱའི་དགེ་སློང་འོངས་སོ། །ཞེས་བརྡའ་སྦྱར། དགེ་སློང་གཞན་དག་ཀྱང་ཡོད་དམ། ཤེས་ལྡན་དག་ཡོད་དོ་ཞེས་སྨྲས། དེ་དག་གིས་རྒྱལ་པོ་ཟས་གཙང་ལ་ཞུས་པས། འཆར་ཀ་རྒྱལ་བོའི་དྲུང་དུ་སོང་ནས་སྔར་གྱི་ཚུལ་རྣམས་རྒྱས་པར་བསྙད་དོ། །རྒྱལ་བོས། གཞོན་ནུ་ཡང་ཆ་ལུགས་འདི་འམ། ལྷ། འདི་འདྲའོ། །དུས་ཇི་ཙམ་ན་འབྱོན་གསུང༌། དགུང་བདུན་ནས་སོ། །ཞེས་ཞུས་སོ། །དེ་ནས་རྒྱལ་བོས་བློན་པོ་རྣམས་ལ། རྒྱལ་བོའི་ཁབ་དང་ཕོ་བྲང་ཕྱི་དོར་གྱིས་ཤིག་ཅེས་བསྒོ་བ་ན། འཆར་ཀས་སྨྲས་པ། བཅོམ་ལྡན་འདས་ནི་ཕོ་བྲང་དུ་མི་བཞུགས་ཏེ། དབེན་པའམ་གཙུག་ལག་ཁང་དུའོ། །རྒྱལ་བོས་གཙུག་ལག་ཁང་ཅི་འདྲ་ཞེས་དྲིས་པ་ན། འཆར་ཀས་རྒྱལ་བྱེད་ཚལ་གྱི་རྣམ་པ་རི་མོར་བྲིས་པ་བསྟན་ཏོ། །རྒྱལ་བོས་ཀྱང་སྐྱེད་མོས་ཚལ་གྲོ་དྷར་དེ་འདྲ་བ་བྱེད་དུ་བཅུག་སྟེ། ས་བདག་རྣམས་ནི་ཚིག་གིས་ཏེ། །ལྷ་རྣམས་བསམ་པས་འགྲུབ་པར་འགྱུར། །དེ་བཞིན་བསམ་གཏན་པ་རྣམས་ཀྱི། །སེམས་བསྐྱེད་པས་ནི་ཐམས་ཅད་འགྲུབ། །ཅེས་བྱ་བ་ཡིན་པས། ཁང་བཟང་ཆེན་པོ་དང༌། གཙུག་ལག་ཁང་བཅུ་དྲུག་དང༌། ཁང་མིག་དྲུག་བཅུ་དང༌། ར་བ། སྒོ་ཁང༌། རྟ་བབས་དང་བཅས་པ་ཡོ་བྱད་ཐམས་ཅད་ཀྱིས་ཡོངས་སུ་རྒྱས་པ་ཞག་བདུན་གྱི་ཁོངས་སུ་གྲུབ་བོ། །སྐྱེད་མོས་ཚལ་རོ་ཧི་ཀ་དང༌། ཚངས་པས་བསྐོར་བར་ཡང་དེ་དང་འདྲ་བར་བྱས་སོ། །

        དེ་ནས་སྟོན་པས། མཽ་འགལ་གྱི་བུ་ལ་གྲོང་ཁྱེར་སེར་སྐྱར་ཡབ་སྲས་གདན་འཛོམ་པར་འགྱུར་གྱི། གང་དེ་བལྟ་བར་འདོད་པ་ཐམས་ཅད་ཆོས་གོས་ལོངས་ཤིག་གསུངས། དེ་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ། མཉན་ཡོད་ནས་སེར་སྐྱའི་བར་དུ་ལྗོངས་རྒྱུ་ཞིང་གཤེགས་པས་ལམ་བར་དུ་དགུང་ཞག་བདུན་མཛད་དེ། བདུན་པ་ལ་ཆུ་བོ་རོ་ཧི་ཀའི་འགྲམ་དུ་བཞུགས་སོ། །ཞག་བརྒྱད་པ་ལ། ཡབ་རྒྱལ་བོ་ལ་སོགས་པའི་གཉེན་ཚོགས་རྣམས་དང༌། ཡུལ་མི་རྣམས་དང༌། སྔར་བཅོམ་ལྡན་འདས་ཉིད་གཞོན་ནུའི་དུས་སུ་འདྲེས་ཤིང་མཉམ་འགྲོག་རྣམས་ཀྱིས་མ་གུས་པ་དང་སེམས་ཁེངས་པ་སོགས་གཞོམ་པའི་ཕྱིར་དུ། བཅོམ་ལྡན་འདས་འཁོར་དང་བཅས་པ་ནམ་མཁའི་མཐོངས་ནས་ངོ་མཚར་བའི་ཆོ་འཕྲུལ་དུ་མ་ཕྱོགས་བཞིར་སྟོན་བཞིན་གྲོ་དྷའི་ཀུན་དགའ་ར་བར་འབྱོན་པ་ལ། འཆར་ཀས། ནམ་མཁའ་ནས་བྱོན་པའི་ཡ་གི་དགྲ་བཅོམ་པ་འདིའོ། །འདི་འདིའོ་ཞེས་སོ་སོ་ནས་ངོ་སྤྲོད་བྱས་སོ། །དེ་ནས་བཅོམ་ལྡན་འདས་གཙུག་ལག་ཁང་དུ་བྱོན་ནས་ཁྲི་ལ་བཞུགས། ཡབ་སྲས་གཙང་གིས་གུས་པས་མཆོད་པ་རྒྱ་ཆེན་པོས་མཆོད་དེ། གསོལ་བ། གཞལ་མེད་ཁང་གི་གནས་རྣམས་སུ། །ཡབ་ཀྱི་ཁང་ན་བཞུགས་པ་ལས། །དགོན་པ་འཇིགས་དང་བཅས་རྣམས་སུ། །ཇི་ལྟ་བུར་ན་འབའ་ཞིག་བཞུགས། །བཅོམ་ལྡན་འདས་ཀྱིས་བཀའ་བསྩལ་བ། མི་ཡི་བདག་པོ་གང་དུ་ནི། །ཁྱིམ་གྱི་འཆིང་བ་ལས་གྲོལ་བ། །འཕགས་པ་ཡི་ནི་གནས་པ་བཅུས། །ཐུབ་པ་རྣམས་ནི་གནས་པར་མཛད། ཅེས་གསུངས། དེ་དག་ལ་སོགས་པ་ཞུ་བ་ཞུ་ལན་མང་དུ་མཛད་ཅིང༌། རྒྱལ་བོས་ཞུ་བ་ཞུས་པའི་ལན་ལས་བརྩམས་ཏེ། ཆོས་ཀྱི་གཏམ་རྒྱ་ཆེན་པོ་མཛད་དོ། །རྒྱལ་བོས་སྲས་ཀྱི་ཡོན་ཏན་མཆོག་བརྙེས་པར་མཁྱེན་ནས་ལྷག་པར་ཡང་ཐུགས་དགྱེས་སོ། །དེའི་ཚེ་བཅོམ་ལྡན་འདས་ཀྱིས་འཁོར་ཚོགས་ཐམས་ཅད་ཀྱི་བསམ་པ་མཁྱེན་ཏེ། ཆོས་བསྟན་པས་ཤཱཀྱའི་རྒྱལ་བུ་ཟས་དཀར་ལ་སོགས་པ་ཤཱཀྱ་བདུན་ཁྲི་བདུན་སྟོང་གིས་བདེན་པ་མཐོང་ངོ༌། །ཡང༌། ཚངས་པའི་བསྐོར་བ་ཞེས་བྱ་བའི་སྐྱེད་མོས་ཚལ་དུ་ཆོས་བསྟན་པས། རྒྱལ་བུ་བྲེ་བོ་ཟས་ལ་སོགས་པ་ཤཱཀྱ་དྲུག་ཁྲི་དྲུག་སྟོང་གིས་བདེན་པ་མཐོང་ངོ༌། ཡང༌། ནོ་ཧིཀ་ཞེས་བྱ་བའི་སྐྱེད་མོས་ཚལ་དུ་ཆོས་གསུངས་པས། །རྒྱལ་བུ་བདུད་རྩི་ཟས་ལ་སོགས་པ་ཤཱཀྱ་ལྔ་ཁྲི་ལྔ་སྟོང་གིས་བདེན་པ་མཐོང་ངོ༌། །དེ་ལྟར་ཉིན་ཞག་གསུམ་པོ་དེ་ལ་ལྷ་དང་མི་བགྲང་ལས་འདས་པ་ཞིག་རྒྱུན་ཏུ་ཞུགས་པ་དང༌། ཕྱིར་འོང་དང༌། ཕྱིར་མི་འོང་དང༌། དགྲ་བཅོམ་པའི་འབྲས་བུ་ལ་བཀོད་པ་དང༌། བྱང་ཆུབ་མཆོག་ཏུ་སེམས་བསྐྱེད་པ་དང༌། ཉན་ཐོས་དང་རང་རྒྱལ་དུ་སེམས་བསྐྱེད་པ་དང༌། ལྷའི་གཙོ་བོ་རྣམས་སུ་འགྱུར་བའི་དགེ་བ་བསགས་པ་དང༌། སྡིག་པའི་ལས་སྤངས་པ་སོགས་རང་རང་གི་སྐལ་བ་དང་འཚམ་པར་རྨད་དུ་བྱུང་བའི་གནས་ཐོབ་བོ། །དེ་དག་ཏུ་རྒྱལ་བོ་ཟས་གཙང་མས་བདེན་པ་མ་མཐོང་སྟེ། བདག་གི་བུ་ཁོ་ན་མཐུ་དང་རྫུ་འཕྲུལ་ཆེའོ་སྙམ་དུ་ཤིན་ཏུ་དྲགས་ཤིང་དགའ་བ་དང༌། བཅོམ་ལྡན་འདས་ལ་སྔོན་ནི་ལྷ་དང་ལྷ་མ་ཡིན་རྣམས་ཀྱིས་ཀྱང་མཆོད་པར་བྱེད་ན། ད་ལྟ་མི་ཁོ་ནས་མཆོད་ཀྱི། ལྷས་ནི་མ་ཡིན་ནོ་སྙམ་དུ་ཧ་ཅང་ཞུམ་པ་སྟེ། རྒྱུ་གཉིས་པོ་དེས་བདེན་པ་མ་མཐོང་བར་གསུངས་སོ། །དེ་ནས་བཅོམ་ལྡན་འདས་ཀྱིས། འཕགས་པ་མཽ་འགལ་གྱི་བུ་ལ་བཀའ་སྩལ་པ། རྒྱལ་བོ་ཟས་གཙང་མ་ལ་སོམས་ཤིག་ཅེས་པས། འཕགས་པ་མཽ་འགལ་གྱི་བུས། རྒྱལ་བོ་ཟས་གཙང་གི་དྲུང་དུ་སོང་སྟེ། ནམ་མཁའ་ལ་སྤྱོད་ལམ་བཞི་བྱེད་པ་དང༌། འོད་འབྱིན་པ་སོགས་ཆོ་འཕྲུལ་མང་བོ་བསྟན་ནས་སྟན་བཤམས་པ་ལ་བཞུགས་སོ། །

        དེ་ནས་རྒྱལ་བོས་འདི་སྐད་ཅེས། བཅོམ་ལྡན་འདས་ཀྱི་ཉན་ཐོས་རྫུ་འཕྲུལ་དང་མཐུ་ཆེ་བ་གཞན་ཡང་མཆིས་སམ། འཕགས་པས། ཤིན་ཏུ་མང་ངོ༌། །ཞེས་གསུངས་པས། རྒྱལ་བོ་སྔར་གྱི་དགའ་ཆེ་བའི་དྲེགས་པ་ཞིའོ། །དེའི་ཚེ་བཅོམ་ལྡན་འདས་ཀྱིས་ལྷ་རྣམས་ལ་ཆོས་སྟོན་པར་བཞེད་པ། ལྷའི་ཚོགས་ཀྱིས་ཤེས་ཏེ། ནྱ་གྲོ་དྷའི་ཀུན་དགའ་ར་བར་ལྷའི་བཟོ་བོས་ལྷའི་གཞལ་མེད་ཁང་སྐད་ཅིག་ལ་བཞེངས་ཏེ། བརྒྱ་བྱིན་ལ་སོགས་པའི་ལྷ་དབང་ཆེ་བ་ཐམས་ཅད་འདུས་ཤིང༌། རྒྱལ་ཆེན་བཞིས་སྒོ་བཞི་ནས་སྲུང་བ་དང༌། མཆོད་པའི་རྒྱན་ཐམས་ཅད་ཀྱི་བརྒྱན་པར་བྱས་སོ། །དེ་ནས་འཕགས་པ་མཽ་འགལ་གྱི་བུས། རྒྱལ་བོ་ཟས་གཙང་མ་ཁྲིད་དེ་ཀུན་དགའ་ར་བའི་ཤར་སྒོ་ནས་འཇུག་པར་བརྩམས་པ་ན། རྒྱལ་བོ་ཆེན་པོ་ཡུལ་འཁོར་སྲུང་ན་རེ། རྒྱལ་བོ་ཆེན་པོ་ནང་དུ་མ་འགྲོ་ཞིག་བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། མིར་གྱུར་པ་འཇུག་ཏུ་མི་དབང་ངོ༌། །དེ་བཞིན་དུ་སྒོ་གཞན་གསུམ་དུ་སོང་ཡང་རྒྱལ་བོ་ཆེན་པོ་དེ་དག་གིས་ཀྱང་དེ་ཁོ་ན་ལྟར་ཟེར་རོ། །དེའི་ཚེ་བཅོམ་ལྡན་འདས་ཀྱིས་ཀུན་དགའ་ར་བ་དེ་དག་ཤེལ་ལས་གྲུབ་པར་སྤྲུལ་བ་དང༌། ལྷ་རྣམས་ཀྱིས་གདན་བཤམས་པ་ལ་བཅོམ་ལྡན་འདས་བཞུགས་ཤིང༌། ལྷ་རྣམས་ལ་ཆོས་སྟོན་པ་རྒྱལ་པོས་མངོན་སུམ་དུ་མཐོང་བས། སྔར་གྱི་ཞུམ་པའི་སེམས་དེ་ཡང་ཞི་བར་གྱུར་ནས་དགའ་བ་དང་མགུ་བ་བླ་ན་མེད་པ་ཐོབ་སྟེ། ཞབས་ལ་ཕྱག་བྱས་ནས་ཕྱོགས་གཅིག་ཏུ་འཁོད་པ་ལ། བཅོམ་ལྡན་འདས་ཀྱིས་ཆོས་བསྟན་པས། རྒྱལ་བོ་ཟས་གཙང་མས་ཀྱང་བདེན་པ་མཐོང་ངོ༌། །དེ་ནས་ཤཱཀྱ་བཟང་ལྡན་རྒྱལ་སྲིད་ལ་བསྐོས། ནང་བར་བཅོམ་ལྡན་འདས་ཀྱིས། རྒྱལ་བོ་ཟས་གཙང་གི་ཕོ་བྲང་དུ་བསོད་སྙོམས་གསོལ་ཅིང༌། རྒྱལ་བོས་གསེར་གྱི་བྱ་མ་བུམ་ནས་ཆུ་བསྒྲེངས་ཏེ། ནྱ་གྲོ་དྷའི་ཀུན་དགའ་ར་བ་ཕུལ་ཏོ། །དེར་བཅོམ་ལྡན་འདས་ཀྱིས། སྦྱིན་པའི་བསོད་ནམས་གང་ཡིན་འདིས། །ཤཱཀྱ་རྣམས་ཀྱི་བསམ་པ་ཡི། །ཡིད་ལ་རེ་བ་རྫོགས་ནས་ནི། །རྟག་པའི་གནས་ནི་ཐོབ་པར་ཤོག །ཅེས་ཡོན་བསྔོ་བར་མཛད་དོ། །དེ་ནས་སྟོན་པས། རྒྱལ་པོ་ལ། སྒྲ་ཅན་འཛིན་འདི་ནི་སྲིད་པ་ཐ་མ་བ་ཡིན་པས་ཁྱིམ་ན་གནས་པའི་སྐབས་མེད་དོ། །ཞེས་བཀའ་བསྩལ་པས། རྒྱལ་བོས་འོ་ན་དེང་གི་ཉིན་པར་རབ་ཏུ་མི་འབྱིན་པར་གསོལ་བ་བདག་གིས་མཆོད་པ་བྱ་དགོས་སོ་ཞེས་ཞུས་ནས། ཉི་མ་གཞན་ཞིག་ལ་དུས་སྟོན་ཆེན་པོ་དང་བཅས་འཕགས་པ་ཤཱ་རིའི་བུ་ལ་གཏད་དེ་རབ་ཏུ་བྱུང་ངོ༌། །དེ་ནས་བཅོམ་ལྡན་འདས་ཀྱིས་བཙུན་མོའི་ཕོ་བྲང་དུ་གདུགས་ཚོད་གསོལ་བའི་སྐབས་ཤིག སོ་སོ་སྐྱེ་བོ་རྣམས་ནི་རྫུ་འཕྲུལ་ལ་མྱུར་དུ་དད་པར་འགྱུར་རོ་དགོངས་ནས། འོད་ཟེར་སྤྲོ་བ་དང༌། ཉི་མ་དང་ཟླ་བ་ལ་ཕྱག་གིས་ནོམ་པ་དང༌། རི་རབ་ཕྱག་ཏུ་བླངས་ནས་བསྐོར་བ་སོགས་ཆོ་འཕྲུལ་དུ་མ་བསྟན་ཏེ། གདན་བཤམས་པ་ལ་བཞུགས་སོ། །

        དེ་ནས་བཙུན་མོའི་འཁོར་རྣམས་མཆོག་ཏུ་དད་པ་སྐྱེ་བ་ལ་ཆོས་བསྟན་པས། ས་མཚོ་མ་དང༌། རི་དྭགས་སྐྱེ་མ་ལ་སོགས་པ་བུད་མེད་དྲུག་ཁྲིས་རྒྱུན་དུ་ཞུགས་པའི་འབྲས་བུ་ཐོབ་སྟེ། འོན་ཀྱང་གྲགས་འཛིན་མ་ནི་ད་དུང་འདོད་པའི་རྣམ་པར་རྟོག་པ་དང་བཅས་པས་བདེན་པ་མ་མཐོང་ངོ༌། །དེ་ནས་གང་ཐོས་ན་བདེན་པ་མཐོང་བར་འགྱུར་བ་དེ་ལྟ་བུའི་ཆོས་བསྟན་པས། གྲགས་འཛིན་མས་ཀྱང་བདེན་པ་མཐོང་ཞིང༌། ཕྱིས་རབ་ཏུ་བྱུང་ནས་དགྲ་བཅོམ་ཐོབ་བོ། །དེའི་འོག་ཏུ་ཤཱཀྱ་མིང་ཆེན་གྱི་སྲས་མ་འགགས་པ་ལ་སོགས་པ་ཤཱཀྱ་བ་ལྔ་བརྒྱའི་གཙུག་ཕུད་ཉེ་བར་འཁོར་གྱིས་བྲེགས་ཏེ་རབ་ཏུ་བྱུང་ཞིང༌། གསོལ་བཞིའི་ལས་ཀྱིས་བསྙེན་པར་རྫོགས་སོ། །དེ་ནས་ཉེ་བར་འཁོར་གྱིས་བསམ་པ། འདི་དག་རྒྱལ་སྲིད་ལ་སོགས་པའི་དཔལ་དང་འབྱོར་བ་ཆེན་པོ་ལ་མ་ཆགས་པར་རབ་ཏུ་བྱུང་ན། བདག་ནི་འདི་དག་གི་རྒྱན་ལ་ཆགས་པ་མི་འོས་མོད། རིགས་ངན་དུ་མ་སྐྱེ་ན་བདག་ཀྱང་རབ་ཏུ་འབྱུང་བ་ཞིག་ཡིན་སྙམ་དུ་ཡིད་མི་བདེ་བར་འདུག་པ། འཕགས་པ་ཤཱ་རིའི་བུས་མཁྱེན་ནས། ཉེ་བར་འཁོར་ལ། སྟོན་པའི་གསུང་རབ་ལ་རིགས་དང་རུས་སྙིང་བོར་བྱེད་པ་མ་ཡིན་སྒྲུབ་པ་སྙིང་པོར་བྱེད་པ་ཡིན་ནོ། །ཞེས་སོགས་ཀྱིས་དབུགས་ཕྱུང་ནས་སྟོན་པའི་སྤྱན་སྔར་ཁྲིད་དེ། སྟོན་པས་ཀྱང་ཉེ་བར་འཁོར་ཚུར་ཤོག་གིས་བསྙེན་པར་རྫོགས་པར་མཛད་དོ། །རིང་བོ་མ་ཐོགས་པར་ཉེ་བར་འཁོར་ཡང་དགྲ་བཅོམ་པ་ཐོབ་ནས་འདུལ་བ་འཛིན་པ་རྣམས་ཀྱི་མཆོག་ཏུ་ལུང་བསྟན་ཏོ། །བཟང་ལྡན་ལ་སོགས་པ་ལྔ་བརྒྱ་བོ་ཤས་ཆེ་བ་དག་གིས་ཀྱང་རིམ་གྱིས་བདེན་པ་མཐོང་ངོ༌། །བསླབ་པ་རྒན་རིམ་ལ་ཕྱག་འཚལ་བའི་སྐབས། རིགས་ངན་དུ་སྐྱེ་བ་ཉེ་བར་འཁོར་གྱི་རྐང་བ་ལ། ཤཱཀྱའི་རྒྱལ་བོ་བཟང་ལྡན་གྱི་མགོ་བོས་བཏུད་པས་ས་ཆེན་པོ་རྣམ་པ་དྲུག་ཏུ་གཡོས་སོ། །གང་གི་ཚེ་བདུད་རྩི་ཟས་ཀྱི་ཁྱེའུ་ཀུན་དགའ་བོ་ལ་མཚན་མཁན་རྣམས་ཀྱིས། འདི་བཅོམ་ལྡན་འདས་ཀྱི་རིམ་གྲོ་བར་འགྱུར་རོ་ཞེས་ལུང་བསྟན་པས། བདུད་རྩི་ཟས་ཁྱེའུ་ལ་རབ་ཏུ་གཅེས་པས། སྟོན་པ་སེར་སྐྱར་བྱོན་པའི་ཚེ། ཀུན་དགའ་བོ་ཡུལ་བཻ་ཤཱ་ལར་སྐྱེ་བར་བྱེད། དེར་བྱོན་པའི་ཚེ་སེར་སྐྱར་སྐྱེལ་བར་བྱེད་དོ། །

        ལན་གཅིག་ཁྱེའུ་སེར་སྐྱ་ན་ཡོད་པ་ལ་མ་ཚོལ་བ་ཁོ་ནར་བཅོམ་ལྡན་འདས་བདུད་རྩི་ཟས་ཀྱི་ཁང་བར་གཤེགས་ཤིང་གདན་བཤམས་པ་ལ་བཞུགས་སོ། །དེར་ཀུན་དགའ་བོ་ཁྱིམ་དེའུ་ཕུག་གི་ཁང་ཕྲན་ཞིག་ཏུ་བཅུག་སྟེ་སྒོ་བསྡམས་སོ། །དེ་ནས་སངས་རྒྱས་ཀྱི་མཐུས་སྒོ་རང་ཕྱེ་ཞིང༌། ཁྱེའུ་ཀུན་དགའ་བོས་བཅོམ་ལྡན་འདས་མཐོང་བས་རབ་ཏུ་དགའ་ཆེས་ཏེ་རྒྱུགས་ཤིང་འོངས་ནས་ཞབས་ལ་ཕྱག་བྱས་ཏེ། སྣམ་ལོགས་སུ་བསིལ་ཡབ་གཡོབ་ཅིང་འདུག་གོ །བདུད་རྩི་ཟས་འཁོར་བཅས་ལ་བཅོམ་ལྡན་འདས་ཀྱིས་ཆོས་བསྟན་ཏེ་ཕྱིར་ཕེབས་པ་ན། ཀུན་དགའ་བོ་ཡང་ཕྱི་བཞིན་འབྲངས་ཏེ། ཕ་མ་ལ་སོགས་པ་རྣམས་ཀྱིས་ཐབས་སྣ་ཚོགས་ཀྱིས་བཟློག་ཀྱང་ངུ་ཞིང་བཟློག་པར་མ་ནུས་སོ། །དེ་ནས་སྟོན་པས་འདི་ནི་སྲིད་པ་ཐ་མ་ཡིན་པས་བཟློག་ཅིག་ཅེས་བཀའ་བསྩལ་པ་ན། བདུད་རྩི་ཟས་ཀྱི་གལ་ཏེ་དེ་ལྟ་ན་རིམ་པ་བཞིན་བགྱིའོ་ཞེས་གནང་སྟེ། དགེ་སྦྱོང་དང༌། བྲམ་ཟེ་དང༌། འཕོངས་པའི་ཚོགས་ལ་སྦྱིན་པ་རྒྱ་ཆེན་པོ་བཏང༌། གཉེན་གྱི་ཚོགས་ལ་གཟོད་པ་གསོལ་ཏེ། ཁྱེའུ་ཀུན་དགའ་བོ་གླང་བོ་ཆེ་ལ་བསྐྱོན། འཁོར་ཚོགས་དང་བཅས་ཏེ་གྲོ་དྷའི་ཀུན་དགའ་ར་བར་བཏང་བའི་ལམ་དུ་གླང་བོ་ཆེས་ཨུཏྤ་ལའི་སྡོང་པོ་ཞིག་སྣ་ཞགས་ཀྱིས་ཕྱུང་ནས་ཟས་སོ། །མཚན་མཁན་རྣམས་ཀྱིས་གཞོན་ནུ་འདི་ཐོས་པ་འཛིན་མཆོག་ཏུ་འགྱུར་རོ་ཞེས་ལུང་བསྟན་ཏོ། །དེ་ནས་སྟོན་པའི་སྤྱན་སྔར་སོང་ཞིང་ཞབས་ལ་ཕྱག་བྱས། སྟོན་པས་ཀྱང་འཕགས་པ་འོད་སྲུངས་སྟོབས་བཅུ་བ་ལ་གཏད་དེ། རབ་ཏུ་བྱུང་ཞིང་བསྙེན་པར་རྫོགས་སོ། །དུས་གཞན་ཞིག་ན་བཅོམ་ལྡན་འདས་སེར་སྐྱའི་གྲོ་དྷའི་ཀུན་དགའ་ར་བ་ན་བཞུགས་སོ། །དེ་བཞིན་གཤེགས་པ་ལ་སྔོན་ནུ་མ་བསྣུན་པའི་མ་མར་གྱུར་པ་སྐྱེ་དགུའི་བདག་མོ་ཆེན་མོ། ཤཱཀྱ་མོ་ལྔ་བརྒྱ་དང་ལྷན་ཅིག་འོངས་ཏེ། བུད་མེད་ཀྱི་དགེ་སྦྱོང་ཚུལ་གྱི་འབྲས་བུ་བཞི་ཐོབ་པའི་སྐབས་མཆིས་ན། བདག་ཅག་བུད་མེད་རྣམས་རབ་ཏུ་བྱུང་ཞིང་བསྙེན་པར་རྫོགས་པར་མཛད་དུ་གསོལ། ཞེས་ཞུས་པ་ལ། བཅོམ་ལྡན་འདས་ཀྱིས། གཽ་ཏ་མི། ཁྱོད་གོས་དཀར་བོ་གྱོན་ལ་ནམ་འཚོའི་བར་དུ་དེ་འབའ་ཞིག་པས་ཚངས་པར་སྤྱད་པ་སྤྱོད་ཅིག །ཁྱོད་ལ་ཡུན་རིང་བོར་ཕན་པ་དང་བདེ་བར་འགྱུར་རོ། །ཞེས་བཀའ་བསྩལ་ནས་རབ་ཏུ་བྱུང་བར་མ་གནང་ལ། ལན་གཉིས་ལན་གསུམ་དུ་ཞུས་ཀྱང་མ་གནང་ངོ༌། །དེ་ནས་སྟོན་པ་ཡུལ་བྲི་ཛིའི་ལྗོངས་བརྒྱད་དེ། ཡུལ་ན་དི་ཀར་གཤེགས་ནས། གོ་ཛི་ཞེས་བྱ་བའི་གནས་ན་བཞུགས་སོ། །དེའི་ཚེ་གཽ་ཏ་མི་ལྔ་བརྒྱ་ཡང་སྐྲ་བྲེགས་ནས། གོས་སྦྱར་མ་གྱོན་ཏེ། སྟོན་པ་འཁོར་བཅས་ཀྱི་ཕྱི་བཞིན་འབྲངས་ནས་གནས་དེར་སྟོན་པའི་ཞབས་ལ་བཏུད་དེ། ལན་གསུམ་དུ་གསོལ་བ་བཏབ་ཀྱང༌། སྔར་བཞིན་གསུངས་ཏེ་རབ་ཏུ་བྱུང་བ་མ་གནང་ངོ༌། །དེ་ནས་དེ་རྣམས་སྒོ་ཁང་གི་ཕྱོགས་གཅིག་ཏུ་ངུ་ཞིང་འདུག་པ། འཕགས་པ་ཀུན་དགའ་བོས་མཐོང་སྟེ། དྲིས་ལན་རྒྱས་པར་བྱས་ནས། དེ་རྣམས་ཀྱིས་ཇི་ལྟར་གསོལ་བ་བཞིན་བཅོམ་ལྡན་འདས་ལ་ཞུས་པས། སྟོན་པས། ཀུན་དགའ་བོ་ཁྱོད་ཀྱིས་བུད་མེད་རབ་ཏུ་བྱུང་ཞིང་བསྙེན་པར་རྫོགས་པར་མ་གསོལ་ཅིག བུད་མེད་རབ་ཏུ་བྱུང་ན་ཆོས་འདུལ་བ་ཡུན་རིང་དུ་གནས་པར་མི་འགྱུར་རོ། །ཞེས་སོགས་རྒྱས་པར་བཀའ་བསྩལ་ཀྱང༌། ལན་གཉིས་ལན་གསུམ་དུ་ནན་གྱིས་ཞུས་པ་ལས་མཐར་གནང་སྟེ། འོན་ཀྱང་དགག་ཅིང་མི་འདའ་བའི་ཕྱིར། ལྕི་བའི་ཆོས་བརྒྱད་བཅས་པ་ལ་ཇི་སྲིད་འཆོའི་བར་དུ་བསླབ་པར་བྱའོ་གསུངས། དེ་ནས་ལྕི་བའི་ཆོས་བརྒྱད་ཀུན་དགའ་བོས་དེ་དག་ལ་བཤད་པས། དེ་དག་གིས་ཀྱང་བསླབ་པར་གྱུར་པ་འདི་ནི། བདག་ཅག་གི་ངག་དང་ཡིད་དང་སྤྱི་བོས་ཀྱང་ནོད་དོ། །ཞེས་ཁས་བླངས་པ་ཙམ་གྱིས་སྐྱེ་དགུའི་བདག་མོ་ལ་སོགས་པ་ཤཱཀྱ་མོ་ལྔ་བརྒྱ་དགེ་སློང་མར་གྱུར་ཅིང༌། བུད་མེད་རབ་ཏུ་འབྱུང་བར་འདོད་པ་གཞན་དག་ལ་གསོལ་བཞིའི་ལས་ཀྱི་ཆོ་ག་ཡང་རྗེས་སུ་གནང་ངོ༌། །གཽ་ཏ་མི་ལྔ་བརྒྱ་བོ་དེ་རྣམས་ཀྱང་ཡུན་རིང་མ་ལོན་པར་དགྲ་བཅོམ་པའི་འབྲས་བུ་མངོན་དུ་བྱས་སོ། །དེ་ནས་དགེ་སློང་ཕ་མ་གཉིས་དང༌། དགེ་བསྙེན་ཕ་མ་གཉིས་ལ་སྟོན་པའི་འཁོར་རྣམས་བཞི་ཞེས་གྲགས་སོ། །གྲོང་ཁྱེར་སློབ་མ་ཅན་དུ་ཁྱིམ་བདག་རི་ལྷ་ན་ཞེས་པ་ལ་བུ་འབྱོར་ལེན་དང༌། འབྱོར་སྐྱབས་དང༌། འབྱོར་དགའ་ཞེས་བྱ་བ་གསུམ་དང༌། བྲན་མོས་བཙས་པའི་བུ་གང་བོ་དང་བཞི་ཡོད་དོ། །གང་བོ་རྒྱ་མཚོ་ཆེན་པོར་ལན་བདུན་རིན་པོ་ཆེ་ལེན་དུ་སོང་བ་ལས། ཐེངས་བདུན་པའི་སྐབས་སུ་གྲུ་ནང་དུ་ཡུལ་དབུས་ཀྱི་ཚོང་བ་རྣམས་ཀྱིས་མདོ་སྡེ་དག་བཏོན་པས་རྐྱེན་བྱས་ཏེ། སངས་རྒྱས་ཀྱི་ཡོན་ཏན་ཐོས་པས་རབ་ཏུ་བྱུང་བར་འདོད་པ་སྐྱེས་སོ། །དེ་ནས་གང་བོ་དང་ནོར་གཅིག་པ་འབྱོར་ལེན་ཡིན་པས། ནོར་ཐམས་ཅད་དེ་ལ་གཏད་དེ་སྨྲས་པ། ཇི་ལྟར་བྱས་ཀྱང་འོ་སྐལ་ཀྱི་ཡོ་བྱད་ཟད་པར་མི་འགྱུར་གྱི། རྒྱ་མཚོ་ཆེན་པོ་འདི་འཇིགས་པ་དང་བཅས་པ་ཡིན་པས་མ་འགྲོ་ཞིག་ཅེས་གདམས་ཏེ། གང་བོ་ཉིད་རིམ་གྱིས་ཡུལ་དབུས་སུ་ཆས་སོ། །མཉན་ཡོད་དུ་སླེབ་སྟེ་ཁྱིམ་བདག་མགོན་མེད་ཟས་སྦྱིན་གྱི་སྒོ་དྲུང་དུ་ཕྱིན་ནས་བརྡའ་ལོན་སྦྱར་བས། ནང་དུ་བོས་ཏེ་གང་གི་ཕྱིར་བྱོན་ཞེས་དྲིས་སོ། །སྟོན་པའི་སྤྱན་སྔར་རབ་ཏུ་བྱུང་བའི་ཕྱིར་འོངས་སུ་ཞེས་པས། མགོན་མེད་ཟས་སྦྱིན་རྗེས་སུ་ཡི་རང་བར་གྱུར་ཏེ། ནང་བར་ལྷན་ཅིག་ཏུ་སྟོན་པའི་སྤྱན་སྔར་སོང་ངོ༌། །བཅོམ་ལྡན་འདས་ཀྱིས་གང་བོ་ཚུར་ཤོག་གི་བསྙེན་པར་རྫོགས་ཤིང༌། བས་མཐའི་གནས་མལ་བརྟེན་ཅིང་ཟླ་བ་གསུམ་བསྒྲུབས་པས་དགྲ་བཅོམ་པར་གྱུར་ཏེ། ཚེ་དང་ལྡན་པ་བྱམས་མའི་བུ་གང་བོ་ཞེས་གྲགས་སོ། །དེ་ནས་བྱམས་མའི་བུ་གང་བོས་བཟོད་པའི་གོ་ཆ་ཆེན་པོ་བགོས་པས། རྔོན་པ་དག་དད་ཅིང་སྐྱེས་པ་ལྔ་བརྒྱ་དང་བུད་མེད་ལྔ་བརྒྱ་དགེ་བསྙེན་དུ་བསྒྲུབས་ནས། མཐའ་འཁོབ་ཀྱི་ཡུལ་ཐ་དད་པ་རྣམས་སུ་གཙུག་ལག་ཁང་ལྔ་བརྒྱ་ཡང་བྱེད་དུ་བཅུག་གོ །གང་བོ་རབ་ཏུ་བྱུང་བའི་ཤུལ་དུ་འབྱོར་སྐྱབས་དང་འབྱོར་དགའི་ནོར་རྣམས་ཟད་པས། འབྱོར་ལེན་དང་ཕྱོགས་གཅིག་བྱེད་འདོད་པ་ལ། འབྱོར་ལེན་ན་རེ། ངའི་ནོར་ནི་ཆོས་དང་མཐུན་པར་བསྒྲུབས་པ་ཡིན་པས་མི་བསྲེའོ་ཞེས་པ་ལ། ནུ་བོ་གཉིས་ཀྱིས་སྨྲས་པ། བྲན་མོའི་བུ་ཡང་ཡང་རྒྱ་མཚོར་ཕྱིན་ནས་བླངས་པ་ཡིན་མོད། ཁྱོད་རྒྱ་མཚོར་འགྲོ་མ་ནུས་ན་ནོར་ཅི་ཞིག་བསྒྲུབས་ཞེས་སོ། །ཚིག་དེ་གནད་དུ་ཕོག་ནས་འབྱོར་ལེན་ཚོང་བ་ལྔ་བརྒྱ་དང་བཅས་ཏེ་རྒྱ་མཚོར་ཞུགས། ཙན་དན་ས་མཆོག་གི་གླིང་དུ་སླེབ་སྟེ། ཚོང་བ་རྣམས་ཀྱིས་ཅན་དན་དག་བཅད་ཅིང་གྲུ་གང་སྟེ་ཚུར་འཕགས་སོ། །དེའི་ཚེ་གླིང་དེ་སྲུང་བའི་གནོད་སྦྱིན་དབང་ཕྱུག་ཆེན་པོ་ཞེས་བྱ་བ། དེར་སླེབ་ནས་རླུང་མི་བཟད་པ་བཏང་བས་གྲུ་ཤིན་ཏུ་བསྐྱོད་པའི་ཚེ། ཚོང་བ་ལྔ་བརྒྱ་བོ་རྣམས་ཆེས་སྐྲག་པས་ཚམ་ཚོམ་དུ་གྱུར་ཀྱང༌། འབྱོར་ལེན་ཅི་བདེར་འདུག་པ་ལ་གཞན་རྣམས་ཀྱིས་རྒྱུ་དྲིས་པས། གང་བོས་ཟེར་བ་དེ་བདེན། དེའི་ངག་མ་མཉན་པས་འདི་ལྟར་གྱུར་མོད། ད་ནི་ཐབས་མེད་པ་ལ་ཙབ་ཙོབ་བྱར་ཅི་ཡོད་ཞེས་པས། ཚོང་བ་རྣམས་ཀྱིས་གང་བོ་བདག་ཉིད་ཆེན་པོར་ཤེས་ནས། ཐམས་ཅད་ཀྱིས་གང་བོ་ལ་སྐྱབས་སུ་མཆིའོ་ཞེས་སོ། །དེར་གང་བོ་རྫུ་འཕྲུལ་གྱིས་སྐད་ཅིག་གིས་གྲུའི་སྟེང་དུ་འོངས་པ་ན་རླུང་ནག་ཆེན་པོ་དེ་ཡང་ཕྱིར་ལྡོག་གོ །དེ་ནས་གང་བོས་གནོད་སྦྱིན་དེ་ལ། ཁྱོད་ཀྱིས་ཅིའི་ཆེད་དུ་ཙན་དན་སྲུང༌། དེ་ན་རེ། འཁོར་ལོས་བསྒྱུར་བའི་རྒྱལ་བོའི་ཆེད་དུའོ། །དེ་བས་ཀྱང་ཆེས་མཆོག་ཏུ་གྱུར་པ་སངས་རྒྱས་ཡིན་པས་དེའི་དོན་དུ་ཙན་དན་རྣམས་ཐོངས་ཤིག་གསུངས་པས་གནོད་སྦྱིན་གྱིས་ཀྱང་བཏང་ངོ༌། །དེ་ནས་གྲུ་དེ་རྒྱ་མཚོ་ནས་བདེ་བར་འོངས་ཏེ། འབྱོར་ལེན་སོགས་གྲོང་ཁྱེར་སློབ་མ་ཅན་དུ་སླེབ། སངས་རྒྱས་བཞུགས་པའི་གཙུག་ལག་ཁང་ཙན་དན་གྱིས་བཞེངས་ནས། སྤུན་རྣམས་བློ་མཐུན་པར་སངས་རྒྱས་དགེ་འདུན་དང་བཅས་པ་སྤྱན་འདྲེན་པར་འདོད་ཅིང༌། རྒྱལ་བོ་དང་ཡང་བློ་མཐུན་པར་བྱས་སོ། །དེ་ནས་འཕགས་པ་བྱམས་མའི་བུ་གང་བོས་ཁང་བཟང་སྟེང་ནས་མཆོད་པ་རྣམས་བཤམས། རྒྱལ་བྱེད་ཚལ་དུ་ཁ་ཕྱོགས་ཏེ། སྟོན་པ་འཁོར་བཅས་སྤྱན་འདྲེན་པའི་དོན་དུ་གསོལ་བ་བཏབ་པས། སངས་རྒྱས་ཀྱི་མཐུས་མེ་ཏོག་རྣམས་ཁང་བཟང་དུ་གྱུར། བདུག་སྤོས་ནི་སྤྲིན་གྱི་རྣམ་པ་དང༌། ཡོན་ཆབ་ནི་བཻཌཱུརྱའི་ཕུང་པོའི་རྣམ་པར་གྱུར་ཏེ། ནམ་མཁའ་ལ་འཕགས་ཏེ་སོང་བར་ཀུན་གྱིས་མཐོང་ཞིང༌། དེ་མ་ཐག་རྒྱལ་བྱེད་ཚལ་དུ་སྟོན་པའི་སྤྱན་སྔར་མཆོད་རྫས་རྣམས་སླེབ་པ་ན། ཀུན་དགའ་བོས་འདི་གང་ནས་བྱུང་ཞེས་ཞུས་པ་ན། སྟོན་པས། མཆོད་རྫས་འདི་རྣམས་སངས་རྒྱས་འཁོར་བཅས་སྤྱན་འདྲེན་པའི་ཕྱིར་དུ་སློབ་མ་ཅན་ནས་འདིར་སླེབ་པ་ཡིན། འདི་ནས་དེ་ལ་དཔག་ཚད་བརྒྱ་ཕྲག་དུ་མའི་བར་ཐག་ཡོད། ནང་བར་དགེ་སློང་རྣམས་ལ་གྲོང་ཁྱེར་སློབ་མ་ཅན་དུ་ཟན་ཟ་བར་སྤྲོ་བ་དག་ཚུལ་ཤིང་ལོངས་ཤིག་ཅེས་སྨྲོས་ཤིག་གསུངས། ཚུལ་ཤིང་བྲིམས་པ་ན། ཡུལ་ཆུ་མངས་ན་གནས་པའི་གང་བོ་ཤེས་རབ་རྐྱང་བས་རྣམ་པར་གྲོལ་བའི་དགྲ་བཅོམ་པས་ཀྱང་ལེན་པར་བརྩམས་པ་ན། ཀུན་དགའ་བོས་རྫུ་འཕྲུལ་དང་མི་ལྡན་པས་མ་ཡིན་པར་བརྡ་སྤྲད་པས། དེས་རྫུ་འཕྲུལ་མོད་ལ་བསྒྲུབས་ཏེ། གནས་བརྟན་གཉིས་ལ་ཚུལ་ཤིང་འབྲིམ་པའི་བར་ལ་འགྲུབ་ནས། གསུམ་པ་ལ་མ་བྲིམས་པའི་སྔོན་དུ་བླངས་སོ། །ཡུལ་དེར་མུ་སྟེགས་ཅན་ལྷག་པར་གནས་པའི་ཕྱིར། དགེ་སློང་རྣམས་རྫུ་འཕྲུལ་སྟོན་པར་བཀས་གནང་ངོ༌། །ནང་སྔ་བར་གྲོང་ཁྱེར་སློབ་མ་ཅན་གྱི་རྒྱལ་བོས། གྲོང་ཁྱེར་ཕྱག་བདར་དང་ཙན་དན་གྱི་ཆུས་ཆག་ཆག་བཏབས། མཆོད་པ་སྣ་ཚོགས་བཤམས། རྒྱན་སྣ་ཚོགས་བཀྲམས། གྲོང་ཁྱེར་ལ་སྒོ་ཆེན་པོ་བཅོ་བརྒྱད་ཡོད་པ་ལས། སྒོ་གཞན་བཅུ་བདུན་དུ་ནི་རྒྱལ་བོའི་སྲས་བཅུ་བདུན་པོ་རེ་རེ་བཞག །ཤར་གྱི་སྒོ་མོ་ཆེར་རྒྱལ་བོ་རང་ཉིད་དང་འཕགས་པ་བྱམས་མའི་བུ་གང་བོ་དང༌། འབྱོར་ལེན་སྤུན་སོགས་སྐྱེ་བོའི་ཚོགས་མང་པོ་དང་བཅས་པ་ལྷན་ཅིག་འདུག་གོ །དེར་ནམ་ལངས་མ་ཐག་ཏུ་དགེ་སློང་ལོ་མ་དང་སྣོད་སྤྱད་འབྲིམ་པ་དང༌། ཆུའི་སྟ་གོན་བྱེད་པ་དག་རྫུ་འཕྲུལ་གྱིས་དེར་སླེབ་པ་ན། རྒྱལ་བོས་སངས་རྒྱས་བྱོན་ནམ་སྙམ་སྟེ་དྲིས་པས། གང་བོས་འདི་དག་ནི་འདི་ལྟའོ་ཞེས་སྨྲས་སོ། །དེ་ནས་དགེ་སློང་གནས་བརྟན་རྣམས་སྣ་ཚོགས་པའི་རྫུ་འཕྲུལ་དང་བཅས་ཏེ་སློབ་མ་ཅན་དུ་གཤེགས་པ་ནི། ཇི་སྐད་དུ། ཁ་ཅིག་སེང་གེ་སྟག་དང་གླང་ཆེན་རྟ་དང་ཁྱུ་མཆོག་བཟང་པོ་ཆིབས། །ཁ་ཅིག་རིན་ཆེན་གཞལ་མེད་ཁང་དང་རི་དང་ཤིང་མཛེས་ཤིང་རྟ་འབར་ལ་བརྟེན། །གཞན་དག་ནམ་མཁའི་ངོས་ལ་ཆུ་འཛིན་གློག་གི་འཕྲེང་བས་བརྒྱན་པ་ལྟ་བུར་ནི། རབ་ཏུ་དགྱེས་ཤིང་ལྷ་ཡི་ཕོ་བྲང་ལྟ་བུར་རྫུ་འཕྲུལ་དག་གིས་གཤེགས་པར་བརྩོན། །ལ་ལ་ས་བརྟོད་གྱེན་དུ་འབྱུང༌། །འགའ་ཞིག་ནམ་མཁའི་དཀྱིལ་ནས་འབབ། །ཁ་ཅིག་སྟན་ལས་སྤྲུལ་བར་བྱེད། །རྫུ་འཕྲུལ་ལྡན་པའི་མཐུ་ལ་ལྟོས། །ཞེས་པ་ལྟར། བཅོམ་ལྡན་འདས་དགྲ་བཅོམ་པ་སྟོང་གིས་ཡོངས་སུ་བསྐོར་ཏེ། ནམ་མཁའ་ནས་ཆོ་འཕྲུལ་སྣ་ཚོགས་པ་སྟོན་བཞིན་སློབ་མ་ཅན་དུ་གཤེགས་པའི་ཚེ། སྒོ་གཅིག་ནས་གཤེགས་ན་སྒོ་གཞན་དག་ན་འཁོད་པ་རྣམས་མི་དགའ་བར་མཁྱེན་ནས། ནམ་མཁའི་ལམ་ནས་གྲོང་ཁྱེར་གྱི་དབུས་སུ་གཤེགས་སོ། །རྒྱལ་བོ་འཁོར་བཅས་སྟོན་པའི་དྲུང་དུ་འོངས་ཤིང་ཞབས་ལ་ཕྱག་འཚལ། དེ་ནས་བཅོམ་ལྡན་འདས་ཙན་དན་གྱི་ཁང་བཟང་དུ་དགེ་འདུན་གྱི་གོང་ལ་གདན་བཤམས་པར་གཞུགས་སོ། །རྒྱལ་བོ་ལ་སོགས་པས་མཆོད་པ་དཔག་ཏུ་མེད་པས་ཡང་དག་པར་མཆོད་དོ། །ཕྱི་རོལ་ཏུ་འཁོད་པའི་སྐྱེ་བོ་རྣམས་ཀྱིས་བཅོམ་ལྡན་འདས་མ་མཐོང་ནས་ཁང་བཟང་གཞིག་པ་ལ་ཐུག་པ་ཙམ་དུ་གྱུར་པ་ན། ཁང་བཟང་ཤེལ་གཙང་མའི་རང་བཞིན་དུ་སྤྲུལ་ནས་སངས་རྒྱས་ཀྱི་སྐུ་སྒྲིབ་པ་མེད་པར་མཐོང་བས་རབ་ཏུ་དགའ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཁོར་དེ་རྣམས་ཀྱི་བསམ་པ་མཁྱེན་ཏེ་ཡང་དག་པའི་ཆོས་བསྟན་པ་ན། འཁོར་ཚོགས་དཔག་ཏུ་མེད་པ་ཞིག་ངེས་པར་འབྱེད་པ་དང་འབྲས་བུ་བཞི་ལ་བཀོད་ཅིང༌། བྱང་ཆུབ་གསུམ་དུ་སེམས་བསྐྱེད་པ་ལ་སོགས་པ་མཐའ་ཡས་པའི་བར་དུའོ། །དུས་གཞན་ཞིག་ན། ཀླུའི་རྒྱལ་བོ་དགའ་བོ་དང་ཉེ་དགའ་བོ་གཉིས་སྦྲུལ་གྱི་ལུས་པོས་རི་རབ་ལ་སྐོར་བ་གསུམ་དུ་དཀྲི་བར་ནུས་པ་དེ་དག་ཡུན་རིང་དུ་གཉིད་ལོག་ཅིང་གཉིད་སངས་པ་ན། དབུགས་ཀྱི་རླུང་དྲག་པོ་བཏང་བས། རི་རབ་དང་གསེར་རི་ལ་གནས་པའི་བྱ་དང་རི་དྭགས་སོགས་སྲོག་ཆགས་དུ་མ་དག་དུག་གིས་ཤི་ནས་མཚོ་ནང་དུ་ལྷུང་བ་རྣམས་ཟ་བར་བྱེད་དོ། །དགེ་སློང་རྫུ་འཕྲུལ་ཐོབ་པ་དག་རི་རབ་ཀྱི་བང་རིམ་ན་གནས་ཤིང་བསམ་གཏན་སྒོམ་པ་དག་ཀྱང༌། དབུགས་ཀྱི་རླུང་དུག་དང་བཅས་པ་དེས་ཕོག་པས་ལུས་རིད་ཅིང་སྐྱ་སེང་སེང་བོར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཕགས་པ་མཽ་འགལ་གྱི་བུ་ལ་བཀའ་བསྩལ་པ། ཀླུའི་རྒྱལ་བོ་དགའ་བོ་དང་ཉེ་དགའ་བོ་ལ་སོམས་ཤིག །འཕགས་པ་མཽ་འགལ་གྱི་བུ་དེར་རྫུ་འཕྲུལ་གྱིས་སོང་ནས། དེ་གཉིས་གཉིད་ལོག་པ་ལ་སེ་གོལ་གྱིས་སྒྲ་བྱས་པས། དེ་གཉིས་ཀྱི་གཉིད་མ་སད། དེ་གཉིས་ཀྱི་ལུས་ཀྱི་སྟེང་དུ་ཕན་ཚུན་ཞབས་ཀྱིས་བཅགས་ཀྱང་གཉིད་མ་སད། དེ་ནས་རི་རབ་ལ་ལན་བདུན་དུ་དཀྲི་བར་ནུས་པའི་སྦྲུལ་ཆེན་པོ་ཆེས་མི་བཟད་པ་ཞིག་ཏུ་སྤྲུལ་ཏེ། དེ་གཉིས་ཀྱི་སྟེང་དུ་མནན་པས་གཉིད་སད་དེ་བལྟས་པ་ན། ཀླུ་ཤིན་ཏུ་མི་བཟད་པས་རང་ཉིད་ནོན་པར་ཤེས་ནས་ཤིན་ཏུ་སྐྲག་སྟེ་བྲམ་ཟེའི་གཟུགས་ཀྱིས་བྲོས་ཤིང༌། ཇི་ལྟར་རི་བོ་ཁོར་ཡུག་ལ་ཉེ་བ་དེ་ལྟར་བྲོས་པའི་ཚེ། དེ་དག་གི་མདུན་དུ་འཕགས་པ་མཽ་འགལ་གྱི་བུ་ཉིད་ཀྱི་ལུས་དངོས་སུ་བསྟན་ཏེ་བྱོན་ནས། ཅི་ཀླུ་དག་གར་འགྲོ་གསུངས་པས། ཀླུ་གཉིས་ཀྱིས་བསམས་པ། དེ་ནི་དགེ་སློང་འདིའི་མཐུ་ཡིན་པ་ཡང་དག་གོ་སྙམ་ནས། འཕགས་པ་ཀུ་རེ་མ་བགྱིས་སམ། ཅི་སྟོན་པའི་ཕོ་ཉ་ལ་མི་སེམས་སམ། འོ་ན་ཇི་ལྟར་བགྱི། བཅོམ་ལྡན་འདས་ཀྱི་སྤྱན་སྔར་འདོང་ངོ་ཞེས་ཁྲིད་ནས། བཅོམ་ལྡན་འདས་ཀྱང་རྒྱ་མཚོའི་ངོགས་སུ་གཤེགས་ཏེ་བཞུགས་པ་ན། ཀླུའི་རྒྱལ་བོ་དགའ་བོ་དང་ཉེ་དགའ་བོ་འཁོར་དང་བཅས་པ་རྣམས་ཀྱིས་མཆོད་པ་དུ་མས་ཡང་དག་པར་མཆོད་ནས་ཞབས་ལ་ཕྱག་བྱས་ཏེ་ཕྱོགས་གཅིག་ཏུ་འདུག་པ་ལ། བཅོམ་ལྡན་འདས་ཀྱིས་ལས་ངན་པ་ལ་སྨད་ཅིང་ཆོས་བསྟན། རི་རབ་ཀྱི་བང་རིམ་ན་གནས་པ་རྣམས་ལ་གནོད་པ་མི་བྱེད་པར་བཀའ་བསྩལ་ནས། དེ་དག་སྐྱབས་སུ་འགྲོ་བ་དང༌། བསླབ་པའི་གཞི་ལ་བཀོད་དོ། །

        དེ་ལྟར་ཀླུ་དགའ་བོ་དང་ཉེ་དགའ་བོ་ཆོས་ལ་བཀོད་པ་དེ་ནས་བརྩམས་ཏེ། ཀླུའི་འགྲོ་བ་འབུམ་ཕྲག་མང་པོ་ཞིག་མི་རིང་བར་ཆོས་ལ་འཁོད་པར་གྱུར་ཏོ། །གང་གི་ཚེ་རྒྱལ་བོ་གསལ་རྒྱལ་དང་གཟུགས་ཅན་སྙིང་བོས་རྒྱལ་སྲིད་སྐྱོང་བ་ན། ཚོམ་རྐུན་པ་རྣམས་ལ་ཆད་པས་བཅད་པས། དེ་རྣམས་མ་ག་དྷ་དང་ཀོ་ས་ལའི་བར་གྱི་ནགས་ཚལ་དང་འབྲོག་དགོན་པ་དག་ཏུ་གནས་ཏེ། དོན་མཐུན་ཚོང་བ་ཐམས་ཅད་འཇོམས་པར་བྱེད་དོ། །རྒྱལ་བོ་གཟུགས་ཅན་སྙིང་པོའི་དྲུང་ན། སྟོང་ཐུབ་དཔའ་བོ་ཞིག་ཡོད་པས། ཚོང་བ་མང་བོ་རྒྱལ་བོའི་ཁབ་ནས་ཀོ་ས་ལར་འགྲོ་བའི་ལམ་སེལ་ལ་སྟོང་ཐུབ་དེ་མངགས་སོ། །སྟོང་ཐུབ་དཔའ་བོ་དེས་ནགས་ཕན་ཚུན་གྱི་བར་དུ་ལམ་སེལ་གྱི་ཁྱིམ་བརྩིགས་པས། དེར་རིམ་གྱིས་འབྲོག་གནས་ཞེས་བྱ་བའི་གྲོང་ཁྱེར་ཆགས་ཏེ། ཚོང་འདུས་ཆེན་པོ་ཡང་བྱུང་ལ། དཔའ་བོ་སྟོང་ཐུབ་ཀྱིས་གྲོང་དཔོན་བྱེད་དོ། །ཕྱི་ཞིག་ན་གྲོང་མི་རྣམས་ཀྱིས་རྐྱེན་ཞིག་ལ་བརྟེན་ནས་གྲོང་དཔོན་སྟོང་ཐུབ་གསོད་པར་བགྲོས་པ་ལས། ཉིན་ཞིག་མཆོག་ཟུང་གྲོང་དཔོན་གནས་ཀྱི་སར་བྱོན་པ་ལ། དེར་བསོད་སྙོམས་ཕུལ་ནི་ཟིན། ཡོན་བཤད་པ་མ་ཚར་བའི་བར་དེ་ལ་ཡུལ་མི་རྣམས་ཀྱིས་ཁྲུས་ཀྱི་རྫིང་བུ་བྱས་ཏེ། གྲོང་དཔོན་ལ་འབུལ་བའི་ཕོ་ཉ་སླེབ་ནས་དེའི་སར་ཕྱིན་ནས་རྫིང་འགྲམ་དུ་སྐྲ་བཀྲུ་བའི་སྐབས། ཡུལ་མི་དག་གིས་མཚོན་ཆས་བསྣུན་ཏེ་གྲོང་དཔོན་བསད་དོ། །དེ་འཆི་བའི་ཚེ་བདག་གིས་མཆོག་ཟུང་གཅིག་ལ་བསོད་སྙོམས་ཕུལ་བ་དེའི་མཐུ་ལས། གྲོང་ཁྱེར་བ་འདི་དག་གསོད་པ་ཞིག་ཏུ་སྐྱེ་བར་གྱུར་ཅིག་ཅེས་སྨོན་ལམ་བཏབ་བོ། །ཤི་མ་ཐག་གནོད་སྦྱིན་གདུག་པ་ཅན་ཞིག་ཏུ་སྐྱེས་ནས་རྣམ་ཐོས་ཀྱི་བུ་ལ་གནས་སྩོལ་བར་ཞུས་ཞེས་པས། འབྲོག་གནས་ཀྱི་ཡུལ་ཕྱིན་ཏོ། །དེ་ནས་དེ་ནད་ཡམས་ཆེན་པོ་བཏང་སྟེ། ཁྱོགས་ནས་ཁྱོགས་སུ་འདོམས་པ་དག་བྱུང་ངོ༌། །ལྟས་མཁན་རྣམས་ལ་དྲིས་པས་གྲོང་དཔོན་ཤི་ནས་གནོད་སྦྱིན་དུ་སྐྱེས་པས་བྱས་སོ་ཞེས་པས། ཡུལ་མི་རྣམས་གཞན་དུ་འབྲོས་པར་བརྩམས་པ་ན། གནོད་སྦྱིན་དེ་སྲིན་པོའི་གཟུགས་ཀྱིས་དངོས་སུ་འོངས་ནས་ལམ་བཀགས་པས། དེ་དག་གིས་སྨྲས་པ། གྲོང་དཔོན་བཟོད་པ་མཛོད་ཅིག་ཅེས་པས། ཉིན་རེ་ལ་མིསྟོང་སྟོང་འབུལ་ན་བཟོད་དོ་ཟེར། དེ་ནས་བཤད་པས་མཐར་བརྒྱའི་བར་དུ་ཕབ་བོ། །དེར་འགའ་ཞིག་གིས་དེ་ལྟ་ན་གྲོང་ཁྱེར་སྟོང་བར་འགྱུར་གྱི། བ་ལང་དྲུག་དང་ལྡན་པའི་ཤིང་རྟ་བཟའ་བཅས་བཀང་བ་རེ་དང༌། བ་ལང་ཁྲིད་པའི་མི་རེ་ཉིན་རེ་བཞིན་འབུལ་གྱི་བཟོད་པ་མཛོད་ཅིག་ཅེས་པས། གནོད་སྦྱིན་ན་རེ། འོ་ན་དེ་དག་གླུ་གར་རོལ་མོ་དང་བཅས་པས་ཕུལ་ཞིག་ཟེར་བ། ཡུལ་མི་རྣམས་ཀྱིས་ཀྱང་ཁས་བླངས་པས་ནད་ཡམས་ཆད་དོ། །དེ་ནས་གྲོང་ཁྱེར་བ་རྣམས་ལ་རེ་མོས་འབབ་པར་བྱས། དེ་ཡང་ཁྱིམ་གྱི་མིང་བྱང་རྫ་མར་བཅུག་སྟེ་དཀྲོགས་ནས་གང་ཐོན་པ་དེ་ཚབ་མི་མ་བཏང་བར་རང་ངམ་བུ་འགྲོའོ་ཞེས་ཁྲིམས་སུ་བཅས་སོ། །དེ་ལྟར་དུས་འགའ་ཞིག་འདས་པ་ན། ཁྱིམ་བདག་ཞིག་ཡུལ་གཞན་དུ་སོང་བའི་དུས་ན། ཁྱིམ་དུ་ཆུང་མ་ལ་བུ་སྐྱེས་སོ། །དེ་རང་ཁྱིམ་དུ་འཁོར་བ་ན་ཁྱིམ་བྱང་སྒོ་ལ་བཏགས་པ་མཐོང་ངོ༌། །ནང་དུ་ཆུང་མས་དགྱེས་པར་མཛོད་ཅིག བུ་བཙས་སོ། །དེ་ཅང་མི་སྨྲ་སྟེ་དྲིས་པས། འདི་ལྟར་རོ་ཞེས་བཤད། དེ་ནས་དེས་བུ་བཏང་བར་བྱས་ཏེ། ཕ་མ་དེ་དག་གིས་མཚན་མོ་ནམ་བསྲོས་པ་ན་ཁང་སྟེང་ནས་མཆོད་པ་བཤམས། སངས་རྒྱས་ལ་གུས་པ་ཆེན་པོས་བདག་གི་བུ་སྐྱབས་དུ་གསོལ། ཅེས་གསོལ་བ་བཏབ་བོ། །ནང་བར་བུ་དང་བཅས་པའི་ཤིང་རྟ་སོགས་སྔར་བཞིན་སོང་ངོ༌། །ཡང་དག་པར་རྫོགས་པའི་སངས་རྒྱས་རྣམས་ནི་མི་མཁྱེན་པ་མེད་པས། བཅོམ་ལྡན་འདས་འབྲོག་གནས་ཀྱི་གནོད་སྦྱིན་གྱི་གནས་སུ་བྱོན་པ་ན། དུས་དེར་གནོད་སྦྱིན་དེ་གནོད་སྦྱིན་གཞན་གྱི་མདུན་སར་སོང་བ་ལ། གནོད་སྦྱིན་བོང་བུ་ཞེས་བྱ་བས་རིངས་པར་བརྡ་བཏང་སྟེ། གནོད་སྦྱིན་འབྲོག་གནས་ཕྱིར་ལྡོག་སྟེ་འོངས་པ་ན། རང་གི་གནས་ན་སངས་རྒྱས་བཞུགས་པ་མཐོང་ནས། བརྟག་པའི་ཕྱིར་དགེ་སྦྱོང་ཕྱིར་ཕྱུངས་ཤིག་ཅེས་པས། སྟོན་པ་ཕྱིར་བྱོན་ནོ། །ཡང་ནང་དུ་བཞུད་ཅིག་བྱས་པ་ན་ནང་དུ་ཕེབས་སོ། །དེ་ལྟར་ལན་གསུམ་སོང་ནས། ཡང་ཕྱིར་བྱུང་ཞིག་ཅེས་པས། བཀའ་བསྩལ་བ། ཁྱོད་ཀྱི་གནས་འདི་ནས་ལན་གསུམ་དུ་ཕྱིན་པ་ཡིན་ནོ། །ཞེས་གསུངས་ཏེ་མ་བཞེད་དོ། །དེ་ན་རེ། ངས་དྲིས་པ་བཞིན་དུ་ལན་ཐོབ་ཅིག མ་ཡིན་ན་སྐལ་ལྡན་ཤིང་རྟའི་སླད་རོལ་དུ་འཕང་ངོ་ཟེར། སྟོན་པས། ཁྱོད་ཀྱིས་དེ་ལྟར་མི་ནུས་ཞེས་གསུངས་པས། གནོད་སྦྱིན་དེ་རབ་ཏུ་ཁྲོས་ཏེ་འཇིགས་པའི་གཟུགས་ཀྱིས་སྟོན་པའི་དྲུང་དུ་རྒྱུགས་པ་ན། དེས་སྟོན་པ་ཡི་དྭགས་ཆེས་མི་སྡུག་པ་ཞལ་དང་ཕྱག་སྣ་ཚོགས་པར་འདུག་པ་ཤིན་ཏུ་འཇིགས་སུ་རུང་བར་མཐོང་སྟེ། འཇིགས་སྐྲག་དངངས་ཏེ་དྲན་མེད་དུ་འགྱེལ་ལོ། །བརྒྱལ་བ་སངས་པ་ན། སྟོན་པས། ཁྱོད་ཀྱིས་མཆོག་ཟུང་གཅིག་ལ་བསོད་སྙོམས་ཕུལ་བའི་ལས་དེས་སུམ་ཅུ་རྩ་གསུམ་པའི་ལྷར་སྐྱེ་བ་ཡིན་པ་ལ། སྨོན་ལམ་ལོག་པ་བཏབ་པས་འདིར་འདི་ལྟ་བུར་སྐྱེས་སོ། །ཞེས་སོགས་གསུངས་སོ། །

        དེ་ནས་དེ་བཅོམ་ལྡན་འདས་ལ་སྐྱབས་སུ་སོང་ཞིང་བསླབ་པ་ཡང་བླངས། འབྲོག་གནས་པ་རྣམས་ལ་གནོད་པ་མི་བྱེད་པར་དམ་ཡང་བཅས་སོ། །དེ་ནས་སྟོན་པའི་བཀའ་བཞིན་ཟས་སྐམ་གྱི་གཏོར་མ་བླངས་ཏེ་མི་དང་བ་ལང་མི་ཟའོ། །དེ་ནས་སྔར་གྱི་ཁྱེའུ་དེ་གནོད་སྦྱིན་འབྲོག་གནས་ཀྱི་ལག་ནས་སྟོན་པ་ལ་ཕུལ། སྟོན་པའི་ཕྱག་གིས་ཕ་མ་ལ་གནང་བས། དེའི་མིང་ལ་ལག་བརྒྱུད་ཅེས་བཏགས་སོ། །དུས་ཕྱིས་ཞིག་ན་སྟོན་པ་འཁོར་དང་བཅས་པ་འབྲོག་གནས་ཀྱི་གཙུག་ལག་ཁང་དུ་དབྱར་གནས་པར་མཛད་དོ། །དེའི་ཚེ་སྟོན་པས་ལག་བརྒྱུད་ལ་ཆོས་བསྟན་པ་ན། དེས་ཕྱིར་མི་འོང་གི་འབྲས་བུ་ཐོབ་བོ། །འབྲོག་གནས་ཀྱི་སྐྱེ་བོ་རྣམས་ཀྱིས་རྒྱ་ཆེར་མཆོད་ཅིང་བསྙེན་བཀུར་བྱས། ཕྱོགས་དེར་ཡང་འགྲོ་བ་མང་པོ་ཞིག་བདེན་པ་ལ་བཀོད་དོ། །གང་གི་ཚེ་འོད་སྲུངས་ཆེན་པོ་འཁོར་དུ་འདུས་པ་ནི། འོད་སྲུངས་ཀྱི་རིགས་ལ་བྲམ་ཟེ་གྲོ་དྷ་སྐྱེས་ཞེས་བྱ་བ་འདོད་པ་སྤངས་པ་ཞིག་ཡོད་པ་ལས། ཡབ་ཀྱིས་བག་མ་བླང་བར་བརྩམས་པ་ན། ཛམ་བུ་ཆུ་བོའི་གསེར་ལས་བུད་མེད་མཆོག་གི་གཟུགས་བྱས་ནས། འདི་འདྲ་བ་ཡོད་ན་བླང་ངོ་ཞེས་པས། ཕྱོགས་བཞིར་འཚོལ་དུ་བཏང་བ་ལས། ནུབ་ཕྱོགས་ཀ་ལིངྒའི་གྲོང་ཀ་བི་ལ་ཞེས་བྱ་བ་ན། བྲམ་ཟེ་སེར་སྐྱའི་བུ་མོ་སེར་སྐྱ་བཟང་མོ་ཞེས་བྱ་བ། ཛམ་བུ་ཆུ་བོའི་གསེར་ལས་ཀྱང་ལྷག་པའི་ཁ་དོག་ཏུ་འདུག་པ་ཞིག་ཡོད་པ་མཐོང་ནས། བྲམ་ཟེ་ཕོ་ཉ་བ་རྣམས་ཀྱིས་བྲམ་ཟེ་སེར་སྐྱ་ལ་བསློངས་པས། དེས་ཉེ་དུ་རྣམས་དང་གྲོས་བྱས་ཏེ་སེར་སྐྱ་བཟང་མོ། བྲམ་ཟེ་གྲོ་དྷ་སྐྱེས་ཀྱི་བག་མར་བཏང་ངོ༌། །དེ་ནས་དེ་གཉིས་མིང་སྲིང་གི་འདུ་ཤེས་ཀྱིས་ཁྱིམ་དུ་གནས་ཀྱང་ཚངས་པར་སྤྱོད་པ་སྤྱོད་ཅིང༌། གཉིས་ཀའང་རབ་ཏུ་བྱུང་བར་འདོད་ཀྱང༌། ཕ་མས་མ་གནང་བས་ལོ་བཅུ་གཉིས་ཀྱི་བར་དུ་ཁྱིམ་ཉིད་དུ་གནས་ནས་ཚངས་པར་སྤྱོད་པ་སྤྱད་དོ། །ཕ་མ་དག་འདས་པའི་འོག་ཏུ་འོད་སྲུང་གིས་ཞིང་ལ་སོགས་པ་ཕྱིའི་ལས་ཀྱི་མཐའ་ལ་བལྟས། སེར་སྐྱ་བཟང་མོས་ཁྱིམ་གྱི་ལས་ཀྱི་མཐའ་ལ་བལྟས་པས། ཐམས་ཅད་སྡུག་བསྔལ་དང་བཅས་པར་མཐོང་སྟེ། ཁྱིམ་གྱི་འབྱོར་བ་ཐམས་ཅད་སྦྱིན་པར་བཏང་བ་དང༌། གཉེན་བཤེས་སོགས་ལ་བགོས་ཏེ། འདི་སྐད་ཅེས། བྲེ་ཆུང་གང་གི་འབྲས་ཆེན་རྡུང༌། །མལ་གཅིག་གིས་ནི་བདེ་བ་བསྐྱེད། །རས་བཅོས་ཟུང་གཅིག་བཅང་པར་བྱ། །ལྷག་མ་གཏི་མུག་ཡོངས་སུ་འཛིན། །ཞེས་བརྗོད་དོ། འོད་སྲུངས་དང་སེར་སྐྱ་བཟང་མོ་གཉིས་ཁྱིམ་ནས་དུས་གཅིག་ཏུ་ཕྱི་རོལ་ཏུ་བྱུང་སྟེ། རས་ཡིག་ཆེན་རེ་རེ་ཁྱེར་ནས་ཕན་ཚུན་ཅི་བདེ་བར་གནང་བ་བྱིན་ཏེ། ལམ་འཕྲང་ཅིག་ནས་སོ་སོར་གྱེས་སོ། །སེར་སྐྱ་བཟང་མོ་ནི། རེས་ཞིག་གཅེར་བུ་པ་རྫོགས་བྱེད་ལས་རབ་ཏུ་བྱུང་སྟེ་གནས་སོ། །དུས་ཕྱིས་ཤིག་ན་སྐྱེ་དགུའི་བདག་མོ་ཆེན་མོ་ལས་རབ་ཏུ་བྱུང་ཞིང་བསྙེན་པར་རྫོགས་སོ། །

        འོད་སྲུངས་ནི། མི་སྟེགས་ཀྱི་སྟོན་པ་དྲུག་སོ་སོར་ཚངས་པར་སྤྱོད་པའི་ལམ་དྲིས་ཀྱང༌། ལོག་པར་སྟོན་པར་བྱེད་པས་ཡིད་མི་དགའ་བར་གྱུར་ཏོ། །དེའི་ཚེ་བཅོམ་ལྡན་འདས་རྒྱལ་བོའི་ཁབ་ཀྱི་བུ་མང་གི་མཆོད་རྟེན་ན་བཞུགས་སོ། །འོད་སྲུང་གིས་བཅོམ་ལྡན་འདས་མཐོང་བས། རབ་ཏུ་དགའ་བ་ཆེན་པོས་དྲུང་དུ་ཕྱིན་ནས་ཞབས་ལ་ཕྱག་བྱས་ཏེ། བཅོམ་ལྡན་འདས་ནི་བདག་གི་སྟོན་པའོ། །བདག་ནི་བཅོམ་ལྡན་འདས་ཀྱི་ཉན་ཐོས་སོ། །ཞེས་ལན་གསུམ་དུ་བཟླས་པས། རབ་ཏུ་བྱུང་བ་དང་བསྙེན་པར་རྫོགས་པའི་སྡོམ་པ་ཐོབ་བོ། །སྟོན་པས་ཀྱང༌། དེ་དེ་བཞིན་ཏེ། དེ་དེ་བཞིན་ནོ། །ང་ནི་ཁྱོད་ཀྱི་སྟོན་པའོ། །ཁྱོད་ནི་ང་ཡི་ཉན་ཐོས་སོ། །ཞེས་བཀའ་སྩལ་ཏོ། །དེ་ནས་བཅོམ་ལྡན་འདས་ཀྱིས། འོད་སྲུངས། དེ་ལྟ་བས་ན། འདི་ལྟར་བསླབ་པར་བྱ་སྟེ། ཉེ་བར་ལེན་པའི་ཕུང་པོ་ལྔ་པོ་རྣམས་ལ། སྐྱེ་བ་དང་འཇིག་པས་རྗེས་སུ་གནས་པས་བལྟ་བར་བྱའོ། །ཞེས་སོགས་གསུངས་ཏེ། སྟོན་པ་ཕྱོགས་གཞན་དུ་གཤེགས་སོ། །འོད་སྲུངས་གིས་གདམས་ངག་དེ་བསྒོམས་པས། ཉི་མ་དེ་ཉིད་ལ་རྒྱུན་དུ་ཞུགས་པའི་འབྲས་བུ་ཐོབ་བོ། །དེ་ནས་ཞག་བརྒྱད་ཀྱི་བར་དུ་སློབ་པའི་ལམ་ལ་གནས་ནས། ཉིན་དགུ་བ་ལ་དགྲ་བཅོམ་པའི་འབྲས་བུ་ཐོབ་སྟེ། ཁམས་གསུམ་ལས་འདོད་ཆགས་དང་བྲལ་བ། གསེར་དང་བོང་བ་མཉམ་པ། ནམ་མཁའ་ལས་མཐིལ་དུ་མཚུངས་པའི་སེམས་དང༌། ཙན་དན་སྤངས་པ་ལྟ་བུར་བསིལ་བ། མ་རིག་པའི་སྒོ་ངའི་སྦུབས་དང་བྲལ་བ། རིག་པ་དང༌། མངོན་པར་ཤེས་པ་དང༌། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་ལ་ཆགས་པ་དང་བཀུར་སྟི་ལས་ཕྱིར་ཕྱོགས་པ། དབང་བོ་དང་ཉེ་དབང་ལ་སོགས་པའི་ལྷ་རྣམས་ཀྱིས་མཆོད་པ་དང་ཕྱག་བྱ་བར་གྱུར་ཏོ། །དེའི་ཚེ་འོད་སྲུང་གིས། ཁྱད་པར་ཐོབ་པ་གཞན་རྣམས་ལས་ཀྱང་ཆེས་ཁྱད་པར་ཐོབ་པས་འོད་སྲུངས་ཆེན་པོ་ཞེས་གྲགས་སོ། །

        དེ་ནས་འོད་སྲུངས་ཆེན་པོས་སེར་སྐྱ་བཟང་མོ་ལ་ཆོས་བསྟན། དེས་ཀྱང་བརྩོན་པ་བྱས་པས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཐོབ་བོ། །ལན་གཅིག་འོད་སྲུངས་ཆེན་པོས་སྣམ་སྦྱར་སྟོང་ཕྲག་བརྒྱ་རི་བ་གྱོན་ཞིང༌། སྟོན་པས་ཕྱག་དར་ཁྲོད་ཀྱི་སྣམ་སྦྱར་གསོལ་ཏེ་ལྷན་ཅིག་ཏུ་གཤེགས་པའི་ཚེ། གང་དུ་སྟོན་པ་བཞུགས་པ་དེར་བདག་གི་སྣམ་སྦྱར་གདིང་ངོ་སྙམ་པ་ལས། སྟོན་པ་བཞུགས་པར་བརྩམས་པ་ན། འོད་སྲུངས་ཆེན་པོས་སྣམ་སྦྱར་བལྟབ་ནས་གདན་དུ་བཏིང་ཞིང༌། དེའི་སྟེང་དུ་ཅུང་ཟད་བཞུགས་ནས། འོད་སྲུངས་ཁྱོད་ཀྱི་སྣམ་སྦྱར་ཡང་ངོ་འཇམ་མོ་གསུངས། དེ་ནས་འོད་སྲུངས་ཆེན་པོས། བདག་ལ་ཐུགས་བརྩེ་བའི་སླད་དུ་བདག་གི་སྣམ་སྦྱར་བཞེས་སུ་གསོལ། ཞེས་ཞུས་པས། འོད་སྲུངས་ཆེན་པོའི་སྣམ་སྦྱར་སྟོན་པས་བཞེས། སྟོན་པའི་ཕྱག་དར་ཁྲོད་ཀྱི་སྣམ་སྦྱར་འོད་སྲུངས་ཆེན་པོ་ལ་གནང་ངོ༌། །དེ་ནས་འོད་སྲུངས་ཆེན་པོ་འབྲོག་དགོན་པར་གནས་ཤིང༌། སྦྱང་པའི་ཡོན་ཏན་ལ་རྟག་ཏུ་གནས་པས། སྦྱང་བའི་ཡོན་ཏན་ལ་གནས་པའི་མཆོག་ཏུ་ལུང་བསྟན་ཏོ། །དུས་ཕྱི་ཞིག་ན། བཅོམ་ལྡན་འདས་དགེ་སློང་གསར་བུ་ཤེས་ཆེ་བའི་འཁོར་ཚོགས་ཀྱི་དབུས་སུ་བཞུགས་པའི་སྐབས་ཤིག །འོད་སྲུངས་ཆེན་པོ་སྟོན་པའི་སྤྱན་སྔར་བྱོན་པ་ལ། དགེ་སློང་གསར་བུ་དག་གིས་ངོ་མ་ཤེས་ཤིང༌། ན་བཟའ་ཕྱག་དར་ཁྲོད་ཀྱི་གོས་དང་དགོན་པ་ཡིན་པས་སྐྲ་དང་སྨ་ར་རིང་བོར་གྱུར་པ་མཐོང་བས་འཕྱ་བའི་རྣམ་འགྱུར་བྱས་སོ། །དེར་ཉན་ཐོས་མཆོག་ལ་བརྙས་པ་བསལ་བའི་ཆེད་དུ། བཅོམ་ལྡན་འདས་ཀྱིས། འོད་སྲུངས་ཁྱོད་ནི་འདོད་པ་ཆུང་ཞིང་ཆོག་ཤེས་པ་ཡིན་གྱི། ངའི་སྟན་ཕྱེད་ལ་སྡོད་ཅིག་གསུང༌། འོད་སྲུངས་ཆེན་པོས་སྟོན་པའི་ཐུགས་དགོངས་ཤེས་ནས། ཆོས་ཀྱིས་རྒྱལ་བོས་སྟན་ཕྱེད་བསྟབ་པར་མཛད་པ་དེ་དང་དུ་བླངས་ནས་ཅུང་ཟད་ཙམ་ལ་བཞུགས་ཏེ། སླར་ཡང་བཞེངས་ཏེ། སྟོན་པའི་ཞབས་ལ་ཕྱག་འཚལ་ནས་འཁོར་གྱི་ནང་དུ་བཞུགས་སོ། །དེ་ལྟར་འོད་སྲུངས་ཆེན་པོ་ལ་སྟོན་པས་སྟན་ཕྱེད་བསྟབས་པ་ནི། དུས་དེར་བརྙས་པ་བཟློག་པའི་དོན་དུ་མཛད་པ་ལྟར་སྣང་ཡང༌། དོན་གྱིས་རྒྱལ་ཚབ་ཏུ་བསྐོས་པའང་ཡིན་ནོ་གསུངས།

                                                                                                     རྩོམ་སྒྲིག་པ། མང་ར་བ།
            གསལ་འདེབས།                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn