དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་ནས་མི་རིང་བ་ཉིད་ན། རྒྱལ་པོ་གཟུགས་ཅན་སྙིང་བོ་གནས་ལྔ་ལ་སྨོན་པར་བྱེད་དོ། །དེ་ཡང་སངས་རྒྱས་འབྱུང་བ་དང༌། དེ་བལྟ་བའི་ཕྱིར་འགྲོ་བ་དང༌། དེས་ཆོས་གསུངས་པ་དང༌། ཆོས་དེ་ཡང་བདག་གིས་རྟོགས་པ་དང༌། དེ་ལས་བསླབ་པ་ཡང་དག་པར་ལེན་ལ་སྨོན་པའོ། །དེའི་ཚེ་གཟུགས་ཅན་སྙིང་པོའི་འཁོར་ཞོ་ཤས་འཚོ་བ་སྟེ། ནང་གི་ལས་ཀྱི་བྱ་བ་སྤྱོད་པའི་མི་འགའ་ཞིག་ལྗོངས་ལྟ་ཞིང་སོང་བས། ག་ཡའི་རི་ལ་བཅོམ་ལྡན་འདས་ཉིད་དགྲ་བཅོམ་པ་སྟོང་དང་ཐབས་གཅིག་བཞུགས་ཤིང༌། ཆོ་འཕྲུལ་རྣམ་པར་འཕྲུལ་བ་སྟོན་པའི་གཟི་བྱིན་མཐོང་ནས། དེས་བློར་མ་ཆུད་ཅིང་ལོག་པར་སེམས་པས། རྒྱལ་པོའི་དྲུང་དུ་སོང་ནས་གནས་མ་ཡིན་པའི་དོགས་པས་བཟུང་སྟེ། ཕྲ་མ་སྨྲ་བར་བྱེད་ན་དེ་རྒྱལ་པོས་བཟློག་གོ །

        དེ་ནས་རྒྱལ་པོ་གནས་ལྔ་ལ་ལྷག་པར་རྩེ་གཅིག་ཏུ་སྨོན་ཅིང་སེམས་པར་གྱུར་ལ། ཡང་ཞོ་ཤས་འཚོ་བ་གཞན་འགའ་ཞིག་གིས་མཐོང་ཞིང་ཐོས་ནས། གཞོན་ནུ་དོན་གྲུབ་དེ་མངོན་པར་རྫོགས་པར་སངས་རྒྱས་ནས་ཆོས་སྟོན་གྱི། དེ་ལྟ་ལྷས་བཀུར་བསྟི་མཛོད་ཅིག་ཅེས་བསྐུལ་བ། རྒྱལ་པོའི་ཡིད་དུ་ཆེས་འཐད་པར་གྱུར་ཏེ། རྒྱལ་པོས་ནང་མི་ཞིག་ལ་སྤྱན་འདྲེན་པར་བཀའ་བསྒོས་ནས། བཅོམ་ལྡན་འདས་ཀྱི་སྐུའི་དྲུང་དུ་བཏང་ཞིང༌། དེས་རྒྱལ་པོའི་མིང་གིས་ཞབས་ལ་ཕྱག་བཙལ་ཞིང༌། གནོད་པ་ཆུང་ངམ། ཉམས་ང་བ་ཆུང་ངམ་འཚོའམ། སྤྱོད་པ་ཡང་ངམ། སྟོབས་དང་བདེ་བ་དང་སྐུ་ཉམས་དང་ལྡན་ནམ། རེག་པར་སྐྱོད་དམ། བཅོམ་ལྡན་འདས་དགེ་སློང་གི་དགེ་འདུན་དང་ལྷན་ཅིག་ཇི་སྲིད་འཚོའི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བགྱིད་ན། གྲོང་ཁྱེར་རྒྱལ་པོའི་ཁབ་ཏུ་གཤེགས་སུ་གསོལ་ཞེས་གཟུགས་ཅན་སྙིང་པོའི་མཆིད་རྣམས་གསོལ་བ་དང༌། སྟོན་པས་ཀྱང་ཅི་ཡང་མི་གསུང་བར་གནང་ངོ༌། །དེ་ནས་ནང་བར་སངས་རྒྱས་དགྲ་བཅོམ་སྟོང་དང་ལྷན་ཅིག་ག་ཡ་དང་རྒྱལ་པོའི་ཁབ་ཀྱི་བར་མཆོད་རྟེན་ལེགས་པར་རབ་གནས་ཀྱི་དྲུང་ཤིང་ཏང་བྲང་གི་ཚལ་དུ་བྱོན་ཏེ་བཞུགས་སོ། །

        དེ་རྒྱལ་བོས་ཐོས་ནས་རང་ཉིད་ཤིང་རྟར་ཞུགས་ཏེ་འཁོར་མང་པོས་བསྐོར་ནས། བཅོམ་ལྡན་འདས་ལ་བལྟ་ཞིང་བསྙེན་བཀུར་བྱ་བའི་ཕྱིར། ཕོ་བྲང་ནས་ཕྱིར་བྱུང་བ་ན། དེར་ཤིང་རྟའི་འཁོར་ལོ་ས་ལ་བྱིང་ངོ༌། །བདག་གིས་མ་ལེགས་པ་ཞིག་བྱས་སམ་སྙམ་དོགས་པ་ལ། ལྷ་རྣམས་ཀྱིས་སྨྲས་པ། ཁྱོད་ཀྱིས་ལས་སྐྱོན་ཅན་མ་ཡིན་མོད། ལས་མཐུན་མང་པོ་བཙོན་ར་ན་འདུག་པ་དེ་རྣམས་ཐོངས་ཤིག དེར་རྒྱལ་པོས་བཙོན་རྣམས་བཏང་ངོ༌། །ཡང་འོངས་པ་ན། རྒྱལ་པོའི་དབུ་རྒྱན་སྒོའི་ཡ་ཐེམ་ལ་ཐོགས་སོ། །ཡང་སྔར་བཞིན་དོགས་པ་སྐྱེས་ཏེ་བསྡད་པ་ན། ལྷ་རྣམས་ཀྱིས་ལས་མཐུན་མང་པོ་ཡུལ་གཞན་དུ་ལས་ཀྱི་མཐའ་བྱེད་དུ་བཅུག་འདུག་གི དེ་རྣམས་སྤྲོན་ཅིག རྒྱལ་པོས་ཀྱང་དེ་ཐམས་ཅད་བཀུག་སྟེ། མཐར་གྱིས་རྒྱལ་པོ་ཉིད་ཤིང་རྟ་ཁྲི་ཉིས་སྟོང་དང༌། རྟ་བ་ཁྲི་བརྒྱད་སྟོང་དང༌། བྲམ་ཟེ་དང༌། ཁྱིམ་བདག་བརྒྱ་སྟོང་དུ་མ་དང་ལྷན་ཅིག་སོང་སྟེ། བཞོན་པ་ལས་བབས་ནས་ཏང་བྲང་གི་ཚལ་གྱི་ཀུན་དགའ་ར་བར་ཞུགས་སོ། །རྒྱལ་པོའི་མཚན་མ་ལྔ་བོ་དབུ་རྒྱན་དང༌། གདུགས་དང་རལ་གྲི་དང༌། རིན་པོ་ཆེས་བརྒྱན་པའི་ལྷམ་དང་ནོར་བུའི་ཡུ་བ་ཅན་གྱི་རྔ་ཡབ་རྣམས་ཕུད་ཅིང་བཞག་ནས། བཅོམ་ལྡན་འདས་ཀྱི་སྤྱན་སྔར་ཕྱིན་ཏེ་ཕྱག་བཙལ་ནས། བཙུན་པ། བདག་ནི་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ་ཞེས་གསོལ་པས། རྒྱལ་པོ་ཆེན་པོ་དེ་དེ་བཞིན་ཏེ། སྟན་ལ་འདུག་ཅིག རྒྱལ་པོ་ཡང་ཕྱོགས་ཤིག་ཏུ་འཁོད། བྲམ་ཟེ་དང་ཁྱིམ་བདག་ལ་ལ་ཕྱག་འཚལ། ལ་ལ་དགའ་བའི་གཏམ་གསོལ། འགའ་ཞིག་རྒྱང་རིང་བོ་ནས་ལྟ་ཞིང་འཁོད་དོ། །དེའི་དུས་ན་བྲམ་ཟེ་དང་ཁྱིམ་བདག་མང་པོ་ཞིག་གིས་ལྟེང་རྒྱས་འོད་སྲུངས་ཀྱང་འཁོར་དེ་ན་འདུག་པ་མཐོང་སྟེ། ཅི་དགེ་སྦྱོང་ཆེན་པོ་འོད་སྲུངས་ཀྱི་དྲུང་དུ་ཚངས་པར་སྤྱོད་དམ། འོད་སྲུངས་དགེ་སྦྱོང་ཆེན་པོའི་དྲུང་དུ་ཚངས་པར་སྤྱོད་པ་ཡིན་སྙམ་ཐེ་ཚོམ་དུ་གྱུར་པ་ལས། སྟོན་པས་དེ་མཁྱེན་ཏེ། དོན་དེའི་དབང་དུ་བྱས་ནས་འོད་སྲུངས་དང་ཞུ་ལན་འགའ་རེ་མཛད་ནས། བཀའ་སྩལ་པ། འོད་སྲུངས་འཁོར་རྣམས་སྐྱོ་བ་སྐྱེད་ཅིག དེ་ནས་འོད་སྲུངས་སྟན་གྱི་སྟེང་དུ་མི་སྣང་བར་གྱུར་ཏེ། ཕྱོགས་བཞིའི་ནམ་མཁའ་ལ་འཕགས་ནས་སྤྱོད་ལམ་རྣམ་བཞི་བྱེད་པ་དང༌། འོད་འབྱིན་པ་དང༌། ཡ་མ་ཟུང་གི་ཆོ་འཕྲུལ་དག་བསྟན་ནས། སྟོན་པའི་སྤྱན་སྔར་ལུས་བཏུད་དེ། བཅོམ་ལྡན་འདས་ནི་བདག་གི་སྟོན་པ་ལགས་སོ། །བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །ཞེས་ལན་གསུམ་གསོལ་ཞིང་བཅོམ་ལྡན་འདས་ཀྱིས་ཀྱང་མཐུན་འགྱུར་མཛད། ལྟེང་རྒྱས་འོད་སྲུངས་ཀྱིས་བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ་སྟན་ལ་འཁོད་པ་ན། སྐྱེ་བོ་ཐམས་ཅད་ཐེ་ཚོམ་དང་བྲལ་ཞིང་དད་པ་སྟོབས་སུ་གྱུར་པ་ན། བདག་མེད་ཀྱི་དོན་ལས་བརྩམས་ཏེ་ཆོས་གསུངས་པས། རྒྱལ་པོ་གཟུགས་ཅན་སྙིང་པོ་དང་ལྷ་བརྒྱད་ཁྲི་དང་བྲམ་ཟེ་དང་ཁྱིམ་བདག་སོགས་སྐྱེ་བོ་འབུམ་ཕྲག་དུ་མས་དུས་དེ་ཉིད་དུ་བདེན་པ་མཐོང་ངོ༌། །རྒྱལ་པོ་གཟུགས་ཅན་སྙིང་པོས་གྲོང་ཁྱེར་རྒྱལ་པོའི་ཁབ་ཏུ་འབྱོན་པར་ཞུསཔ་ལ་ཡང་ཅང་མི་གསུང་བར་གནང་ངོ༌། །

        དེ་ནས་རྒྱལ་པོ་ལ་སོགས་པ་དེ་རྣམས་རང་གནས་སུ་སོང་ཞིང༌། ཇི་ཙམ་ན་དུས་ལ་བབ་པར་མཁྱེན་ནས་བཅོམ་ལྡན་འདས་འཁོར་དང་བཅས་པ་ལྗོངས་རྒྱུ་ཞིང༌། རྒྱལ་པོའི་ཁབ་ཀྱི་ཤིང་དྲུང་དང་ཉེ་བར་བྱོན་པ། རྒྱལ་བོས་གདུགས་ཚོད་ལ་སྤྱན་འདྲེན་པར་སྙན་མནན་ནས། དེའི་ནང་བར་རྒྱལ་པོ་རང་ཉིད་ཀྱིས་ལག་བདར་ཏེ། བསོད་སྙོམས་རྒྱ་ཆེར་ཕུལ་ནས། གསེར་གྱི་བྱ་མ་བུམ་བླངས་ནས་ཆུ་བསྒྲེངས་ཤིང༌། འོད་མའི་ཚལ་བྱ་ཀ་ལན་ཏ་ཀ་གནས་པ་སྔར་སྐྱེད་མོའི་ཚལ་ཡིན་པ། སྟོན་པ་བཞུགས་པའི་གནས་གཙུག་ལག་ཁང་དུ་བྱས་ཏེ་ཕུལ། དེར་བཅོམ་ལྡན་འདས་འཁོར་དང་བཅས་པ་གྲོང་ཁྱེར་རྒྱལ་པོའི་ཁབ་དང་ཉེ་བ་འོད་མའི་ཚལ་བྱ་ཀ་ལན་ཏ་ཀའི་ཀུན་དགའ་ར་བ་བཞུགས་ཏེ་ཆོས་སྟོན་ཏོ། །དེའི་ཚེ་ཀུན་ཏུ་རྒྱུ་ཉེ་རྒྱལ་ཞེས་བྱ་འཤཱ་རིའི་བུ་དང༌། པང་ནས་སྐྱེས་ཞེས་བྱ་བ་མཽ་འགལ་གྱི་བུ་སྟེ་ཀུན་ཏུ་རྒྱུ་གཉིས་པོ་དེ་འཁོར་ལྔ་བརྒྱ་དང་བཅས་ནས། གྲོང་ཁྱེར་རྒྱལ་པོའི་ཁབ་ཏུ་ཕྱིན་པ་ན། གྲོང་ཁྱེར་ཅ་ཅོ་ཉུང་ཞིང་རྒྱུ་འགྲུལ་ཉུང་སྟེ་ཆེ་མེད་འདུག་པ་མཐོང་ངོ༌། །དེ་གཉིས་ཀྱིས་བསམས་པ། ཨེ་མ་རྒྱལ་པོ་གཞན་གྱི་དམག་ཚོགས་ཀྱིས་འཇིགས་པའམ། ཡང་དགེ་སྦྱོང་དང་བྲམ་ཟེ་དབང་ཆེ་བར་གྲགས་པ་དག་གནས་པ་ལས་བྱུང་ངོ་སྙམ་ནས། ནུབ་མོ་རྒྱུ་སྐར་ལ་བལྟས་པས་འཇིགས་པ་ནི་མེད་པར་ཤེས་སོ། །ནང་བར་དཔྲལ་རིས་གསུམ་བྱས་ཏེ་སྤྱོད་ཡུལ་དུ་སོང་བ་ན། སྔར་དེ་གཉིས་ལ་སྐྱེ་བོ་འབུམ་ཕྲག་དུ་མ་ཕྱི་བཞིན་དུ་འབྲང་བ་ལས། དེ་ཉིན་གཅིག་ཀྱང་འབྲང་བ་མེད་དོ། །

        དེའི་ཚེ་བཅོམ་ལྡན་འདས་ཀྱིས་ཀུན་ཏུ་རྒྱུ་གཉིས་པོ་འདུལ་བའི་དུས་ལ་བབ་པར་མཁྱེན་ཅིང༌། དེ་ཡང་སྤྱོད་ལམ་གྱིས་འདུལ་བ་ཡིན་པས། འཕགས་པ་རྟ་ཐུལ་ལ་བཀའ་སྩལ་པ། ཁྱོད་ཀྱིས་ཀུན་ཏུ་རྒྱུ་གཉིས་པོ་ལ་སོམས་ཤིག དེས་ཀྱང་སྔ་དྲོའི་དུས་སུ་སྤྱོད་ལམ་མཆོག་གིས་བསོད་སྙོམས་ལ་ཞུགས་པའི་ཚེ། ཀུན་ཏུ་རྒྱུ་གཉིས་ཀྱིས་ཀྱང་ཐག་རིང་བོ་ནས་མཐོང་སྟེ་ངོ་མཚར་སྐྱེས་སོ། །གྲོང་ཁྱེར་ནས་ཕྱིར་འོང་བའི་ཚེ་དྲི་བར་བྱའོ་སྙམ་ནས། གྲོང་ཁྱེར་དུ་བྱ་བ་རྣམས་མགྱོགས་པར་བྱས་ཏེ། ཉི་རྒྱལ་སྔོན་ལ་གྲོང་ཁྱེར་གྱི་ཕྱིར་ཕྱུང་སྟེ། ལམ་ཐམས་ཅད་འདུས་པའི་མདོ་ཞིག་ཏུ་དགུག་ཅིང་འདུག་གོ །ཅི་ཞིག་ན་འཕགས་པ་རྟ་ཐུལ་ཡང་གྲོང་ཁྱེར་གྱི་ཕྱིར་བྱུང་བ་ན། ཉེ་རྒྱལ་གྱིས་སྨྲས་པ། ཁྱོད་ཀྱི་སྟོན་པ་ནི་གང་ཡིན། གང་གི་ཕྱིར་རབ་ཏུ་བྱུང༌། སུའི་ཆོས་ལ་དགའ། རྟ་ཐུལ་གྱིས་སྨྲས་པ། ཁོ་བོའི་སྟོན་པ་ནི་སངས་རྒྱས་བཅོམ་ལྡན་འདས་སོ། །དེའི་ཕྱིར་རབ་ཏུ་བྱུང་ཞིང་དེའི་ཆོས་ལ་དགའོ། །ཉེར་རྒྱལ་གྱིས་སྨྲས་པ་དགེ་སློང་དེའི་ཕྱིར་ཆོས་སྟོན་ཅིག རྟ་ཐུལ་གྱིས་སྨྲས་པ། ཆོས་རྣམས་གང་དག་རྒྱུ་ལས་བྱུང་བ་དང༌། །དེ་ཡི་རྒྱུ་དང་དེ་འགོག་གང་ཡིན་པ། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་བའི་ཚུལ་ཅན་དགེ་སྦྱོང་ཆེ། །དེའི་ཚེ་ཉེ་རྒྱལ་གྱིས་བདེན་པ་མཐོང་སྟེ། རྟ་ཐུལ་ལ་ཐལ་མོ་སྦྱར་ཀྱང་བཏུད་ནས། སྐྱོབ་པ་རྣམས་ཀྱི་ཆོས་འདི་ཡིན། །བསྐལ་མང་བྱེ་བ་ཁྲག་ཁྲིག་ཏུ། །སྔོན་ཆད་མ་མཐོང་མ་ཐོས་པ། །འཆི་མེད་མྱ་ངན་འདས་པ་ཡི། །གོ་འཕང་འདི་ལ་རྗེས་སུ་རྟོགས། །བཅོམ་ལྡན་འདས་དེ་ད་ལྟར་གང་དུ་བཞུགས། རྟ་ཐུལ་གྱིས་སྨྲས་པ། འོད་མའི་ཚལ་འདི་ཉིད་ནའོ། །དེ་ནས་ཉེ་རྒྱལ་ཡང་པང་ན་སྐྱེས་ཀྱི་སར་སོང་ནས་བདུད་རྩི་ཐོབ་པར་བརྡའ་སྤྲད་དེ། སྔར་གྱི་ཚིགས་བཅད་དེ་བརྗོད་པས། པང་ན་སྐྱེས་ཀྱིས་ཀྱང་བདེན་པ་མཐོང་ཞིང་ཆེད་དུ་བརྗོད་པའི་བར་སྔ་མ་བཞིན་ནོ། །

        དེ་ནས་ཀུན་ཏུ་རྒྱུ་གཉིས་ཀྱིས་འཁོར་རྣམས་ལ་རིག་པར་བྱས་ཏེ། དེ་དག་ཀྱང་སངས་རྒྱས་ཀྱི་རྗེས་སུ་རབ་ཏུ་འཇུག་པར་ཁས་བླངས་ནས། །ཀུན་ཏུ་རྒྱུ་གཉིས་པོ་བྲམ་ཟེའི་ཁྱེའུ་ཉིས་བརྒྱ་ལྔ་བཅུ་རེ་དང་བཅས་ཏེ། འོད་མའི་ཚལ་དུ་ཞུགས་པ་ན། འཕགས་པ་རྟ་ཐུལ་ཤིང་དྲུང་ན་བཞུགས་པ་མཐོང་སྟེ། དང་པོར་བཅོམ་ལྡན་འདས་ལ་བསྙེན་བཀུར་བྱའམ། འོན་ཏེ་ཆོས་ཐོས་པ་ལ་བྱ་སྙམ་པ་ལས། ཆོས་ཐོས་པ་ལ་ཐོག་མར་བྱ་དགོས་པར་ཤེས་ནས། དང་པོར་རྟ་ཐུལ་གྱི་ཞབས་ལ་ཕྱག་བྱས་སོ། །སྟོན་པས་བཀའ་སྩལ་པ། རྒན་ནམ་ཡང་ན་གཞོན་ཡང་རུང༌། །གང་ལས་ཆོས་ནི་རྣམ་ཤེས་པ། །དེ་ལ་ཐོག་མར་ཕྱག་བྱ་སྟེ། །བྲམ་ཟེ་གཙང་མས་མེ་བཞིན་ནོ། །དེ་ནས་དེ་གཉིས་བཅོམ་ལྡན་འདས་འཁོར་བརྒྱ་ཕྲག་དུ་མས་བསྐོར་བའི་དྲུང་དུ་འོང་བ་ན། སྐུའི་དྲུང་དུ་མ་ཕྱིན་གོང༌། སྟོན་པས་རྒྱང་རིང་བོ་ནས་གཟིགས་ཙམ་ནས། དེ་གཉིས་ཀྱི་ཆེད་དུ་བརྗོད་པ་དུ་མ་མཛད་དེ། རྫུ་འཕྲུལ་དང་ལྡན་པའི་མཆོག་དང༌། ཤེས་རབ་ཅན་གྱི་མཆོག་ཏུ་སྔ་ཉིད་ནས་ལུང་བསྟན་ཏོ། །དེའི་ཚེ་དགེ་སློང་དགྲ་བཅོམ་པ་གཅིག་གིས་ཆེད་དུ་བརྗོད་དེ། སྟོན་པ་དགོངས་ཡུལ་མཐའ་ཡས་པ། །སྐྱེ་དགུའི་དབང་པོ་ཁྱོད་མཐར་བྱོན། །བཅོམ་ལྡན་སྲིད་པ་མཐར་མཛད་པས། །གྲོགས་པོ་ཉེ་རྒྱལ་པང་ན་སྐྱེས། །དེ་ལྟར་འོངས་པ་གཟིགས་གྱུར་ནས། །འོད་མའི་ཚལ་དུ་མ་ཕྱིན་པར། །ཚོགས་མཆོག་དབུས་སུ་དེ་གཉིས་ནི། །འདི་གཉིས་ང་ཡི་ཉན་ཐོས་ཀྱི། །མཆོག་ཟུང་འགྱུར་ཞེས་དེ་བསྟན་ཏེ། །གཅིག་ནི་རྫུ་འཕྲུལ་ལྡན་པའི་མཆོག། གཅིག་ཤོས་ཤེས་རབ་ལྡན་པ་ཡི། །མཆོག་ཏུ་འགྱུར་བར་ལུང་བསྟན་མཛད། །ཅེས་སོ། །དེ་ནས་ཉེ་རྒྱལ་དང་པང་ནས་སྐྱེས་ལ་སོགས་པ་བྲམ་ཟེའི་རིགས་ཀྱི་ཀུན་ཏུ་རྒྱུ་ལྔ་བརྒྱ་དག བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ་རབ་ཏུ་འབྱུང་བ་དང༌། བསྙེན་པར་རྫོགས་པར་གསོལ་བ་བཏབ་པ་ན། བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཚངས་པར་སྤྱད་པར་སྤྱོད་ཅིག ཅེས་བཀའ་སྩལ་པའི་འཇུག་ཁོ་ནར་སྐྲ་དང་ཁ་སྤུ་བྲེགས་ནས་ཞག་བདུན་ལོན་ཙམ་དུ་གྱུར། ལག་ན་ནི་ལྷུང་བཟེད་དང་བྱ་མ་བུམ་ཐོགས༌། ལུས་ལ་ནི་ཆོས་གོས་རྣམ་པ་གསུམ་གཡོགས། སྤྱོད་ལམ་ནི་བསྙེན་པར་རྫོགས་ནས་ལོ་བརྒྱ་ལོན་པ་ལྟར་ཤིན་ཏུ་དུལ་བར་བྱུང་སྟེ། དེའི་ཚེ་ལྷ་རྣམས་ཀྱིས། དེ་བཞིན་གཤེགས་པས་ཚུར་ཤོག་བཀའ་སྩལ་པས། །དེ་དག་སྐྲ་བྲེགས་ལུས་ལ་སྣམ་སྦྱར་གྱོན། །མོད་ལ་དབང་པོ་རབ་ཞི་གནས་གྱུར་ཏེ། །སངས་རྒྱས་དགོངས་པས་ལུས་ཟུང་བཀབ་པར་གྱུར། །ཅེས་ཆེད་དུ་བརྗོད་པར་བྱེད་དོ། །

        དེའི་ཚེ་དགེ་སློང་མང་པོ་བསོད་སྙོམས་ལ་ཞུགས་པ་ན། སྐྱེ་བོ་མ་དད་པ་དག་འདི་སྐད་ཅེས། སངས་རྒྱས་མ་ག་དྷ་དག་གི །གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་པོའི་ཀུན་ཁྲིད་ན། །ཕྱི་ནས་ཅི་ཞིག་བཀྲི་བར་བྱ། །ཞེས་ཟེར་བ་ན། དགེ་སློང་རྣམས་ཀྱིས་ལན་སྨྲ་བར་མ་ནུས་སོ། །ནང་བར། འདི་ན་དཔའ་ཆེན་བདེ་གཤེགས་དག །དམ་པའི་ཆོས་ཀྱིས་བཀྲི་མཛད་དེ། །ཐམས་ཅད་ཆོས་ཀྱི་བཀྲི་བ་ལ། །མཁས་པ་སུ་ཞིག་མི་བཟོད་བྱེད། །ཅེས་སྨྲོས་ཤིག་ཅེས་བཀའ་སྩལ་པ་ལྟར་བྱས་པས་སྤོབས་པ་ལན་མེད་དོ། །དེ་ནས་ཚེ་དང་ལྡན་པ་ཤཱརིའི་བུ་བསྙེན་པར་རྫོགས་ནས་ཞག་བཅོ་ལྔ་ལོན་པ་ན། བཅོམ་ལྡན་འདས་ཀྱི་སྐུའི་དྲུང་དུ་བསིལ་ཡབ་གཡོབ་ཅིང་འདུག་གོ །དེའི་ཚེ་སངས་རྒྱས་ཀྱིས་ཀུན་ཏུ་རྒྱུ་སེན་རིངས་ལ་ཆོས་བསྟན་པས་སེན་རིངས་ཀྱིས་བདེན་པ་མཐོང་ཞིང༌། ཤཱརིའི་བུས་དགྲ་བཅོམ་པ་ལེན་པ་ལས་སེམས་རྣམ་པར་གྲོལ་བ་ཐོབ་བོ། །དེ་ནས་རིང་པོ་མ་ལོན་པ་ཁོ་ནར་མཽ་འགལ་གྱི་བུ་ལ་སོགས་པ་ཀུན་ཏུ་རྒྱུ་ལྔ་བརྒྱ་ཡང་དགྲ་བཅོམ་པ་ཉིད་ཀྱིས་འབྲས་བུ་མངོན་དུ་བྱས་ཏེ། དེ་ཡན་ཆད་ཉན་ཐོས་དགྲ་བཅོམ་པའི་དགེ་སློང་གི་དགེ་འདུན་ཆེན་པོ་གྲངས་ངེས་པ་དང་བཅས་པ་ཡིན་ཏེ་དགེ་སློང་དགྲ་བཅོམ་པ་སྟོང་དྲུག་བརྒྱ་ཉི་ཤུའོ། །བདེན་པ་མཐོང་ནས་དགྲ་བཅོམ་པ་མ་ཐོབ་ཀྱི་བར་ལ་ཅུང་ཟད་རེ་ཐོགས་པའི་སྐབས་མ་གཏོགས། གཞན་དགྲ་བཅོམ་པ་ཁོ་ནའི་འཁོར་ཡིན་པས། སོ་སོ་སྐྱེ་བོའི་དགེ་འདུན་མེད་དོ། །དེར་དུས་ཅུང་ཟད་གཅིག་ལ་ཐོག་མའི་དགྲ་བཅོམ་པ་བརྒྱ་ཉི་ཤུ་དང༌། མཆོག་ཟུང་གཅིག་གི་འཁོར་གཉིས་བརྒྱ་ལྔ་བཅུ་ནི། ཡུལ་ཐ་དད་པ་སོ་སོར་ལྗོངས་རྒྱུ་ཞིང་ཆོས་སྟོན་པའི་ཕྱིར་གཤེགས་ལ། རལ་བ་ཅན་སྟོང་རབ་ཏུ་བྱུང་བ་དང༌། མཆོག་ཟུང་གཅིག་གི་འཁོར་ཉིས་བརྒྱ་ལྔ་བཅུ་ནི། སྟོན་པའི་ཞབས་འབྲིང་དུ་ཆོས་ཉན་པའི་ཕྱིར་འདུག་པས་ན། དེར་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཞེས་གྲགས་སོ། །དེ་ནས་ནི་གང་ཟག་དེ་དག་ཏུ་མ་ངེས་མོད། ཕྱིས་ཀྱང་སྟོན་པའི་སྐུ་དྲུང་དུ་ཉན་ཐོས་ཀྱི་དགེ་སློང་དགྲ་བཅོམ་པ་སྟོང་ཉིས་བརྒྱ་ལྔ་བཅུ་ཙམ་ཚོགས་པ་ཉིད་ཤས་ཆེ་བར་གྲགས་སོ། །གང་གི་ཚེ་མཆོག་ཟུང་གཅིག་དགྲ་བཅོམ་པ་ཐོབ་པ་ནས། དགེ་སློང་གི་དགེ་འདུན་ཉིན་རེ་བཞིན་ཕྱོགས་ཐམས་ཅད་དུ་འཕེལ་བར་གྱུར་པས་གྲངས་ངེས་པའི་ཚད་བཟུང་བར་དཀའ་བ་ཉིད་དེ། དེ་ཕྱིན་ཆད་ནས་དགྲ་བཅོམ་པ་དང༌། འཕགས་པ་སློབ་པ་དང༌། སོ་སོ་སྐྱེ་བོ་ཡང་རུང་སྟེ་མ་ངེས་པ་སྣ་ཚོགས་པའོ། །

        དུས་གཞན་ཞིག་ན་དྲང་སྲོང་ཉོན་མོངས་མེད་ཀྱི་ཚ་བོ་མེས་བྱིན། བཅོམ་ལྡན་འདས་ཀྱི་དྲུང་དུ་འོང་ནས་ཞབས་ལ་ཕྱག་བྱས་ཏེ་འདུག་པ་ལ། སྟོན་པས་ཆོས་བསྟན་པས་དེ་ཉིད་དུ་བདེན་པ་མཐོང་ངོ༌། །དེ་ནས་སྟོན་པས་ཀླུ་ཨེ་ལའི་འདབ་སྐྱབས་སུ་འགྲོ་བ་དང་བསླབ་པའི་གནས་ལ་བཀོད་ཅིང༌། མེས་བྱིན་ཡང་ཚུར་ཤོག་གིས་བསྙེན་པར་རྫོགས་སོ། །འདི་ནི་འཕགས་པ་ཀཱ་ཏ་ཡ་ན་ཆེན་པོ་ཡིན་ནོ། །དེ་ནས་དེ་ལ་ཡོད་པ་དང་མེད་པའི་མཐའ་གཉིས་ལ་མི་བརྟེན་པའི་ཚུལ་གྱིས་ཆོས་བསྟན་པས། འཕགས་པ་ཀཱ་ཏ་ཡ་ནས་དགྲ་བཅོམ་ཐོབ་བོ། །དེའི་ཚེ་ནུབ་ཕྱོགས་ཀྱི་ཡུལ་གྲོང་ཁྱེར་འཕགས་རྒྱལ་ན། རྒྱལ་པོ་གཏུམ་པོ་རབ་སྣང་གིས་རྒྱལ་སྲིད་ཆོས་བཞིན་དུ་སྐྱོང་བ་ལས། ཡུལ་དེར་ཡམས་ནད་ཆེན་པོ་ཞིག་བྱུང་སྟེ། བསྔགས་མཁན་རྣམས་ཡམས་ནད་ཞི་བའི་ཐབས་ལ་བརྩོན་པར་བྱས་ཀྱང་རེ་ཞིག་མ་ཞིའོ། །དེའི་ཚེ་རྒྱལ་པོ་ལ་སོགས་པའི་སྐལ་བ་དང་ལྡན་པ་རྣམས་གདུལ་བའི་དུས་ལ་བབ་པར་མཁྱེན་ནས། འཕགས་པ་ཀཱ་ཏ་ཡ་ན་འཁོར་ལྔ་བརྒྱ་དང་བཅས་པ་ལ། རྒྱལ་པོ་རབ་སྣང་ལ་སོགས་པ་གྲོང་ཁྱེར་འཕགས་རྒྱལ་གྱི་སྐྱེ་བོ་རྣམས་འདུལ་བར་བཀའ་སྩལ་ཏོ། །དེ་ནས་འཕགས་པ་འཁོར་བཅས་ཡུལ་དེར་འབྱོན་པའི་ཚེ། བར་ལམ་གྱི་གྲོང་ཁྱེར་ཀ་ཎཱ་ཀུ་བ་ཛ་ནར། སྔོན་འཕགས་པ་ཀཱ་ཏ་ཡ་ན་དང་མཛའ་བཤེས་སུ་གྱུར་པའི་བྲམ་ཟེ་ཞིག་ལ་བུ་མོ་གཟུགས་བཟང་བ་མིང་སྐྲ་ཅན་ཞེས་བྱ་བ་ཞིག་ཡོད་དོ། །འཕགས་པ་ཀཱ་ཏ་ཡ་ན་འཁོར་བཅས་བྱོན་ཏོ་ཞེས་བྲམ་ཟེའི་ཆུང་མས་ཐོས་ནས། འཕགས་པ་འཁོར་བཅས་འདིར་བྱོན་པ་ལ་མགྲོན་མཆོད་བྱར་མེད་དོ་སྙམ་ནས་ཤིན་ཏུ་ཡིད་ཁོང་དུ་ཆུད་པ་ལ། བུ་མོས་དྲིས་པས་དོན་དེ་བཤད་པ་ན། བུ་མོ་ན་རེ། དེ་ལྟར་ན་གར་མཁན་གྱི་སློབ་དཔོན་ཞིག་གིས་བདག་གི་སྐྲ་བཙོང་ཟེར་བ་དེ་ལ། བདག་གི་སྐྲ་བཙོངས་ཤིག་དང༌། དེའི་ཡོན་གྱིས་འཕགས་པ་འཁོར་བཅས་སྤྱན་འདྲེན་པར་བྱའོ་ཟེར། །དེ་ནས་བྲམ་ཟེ་མོས་གར་མཁན་དེ་ལ་བུ་མོའི་ཀ་རྵ་པ་ན་ལྔ་བརྒྱར་བཙོང་སྟེ། འཕགས་པ་འཁོར་བཅས་ལ་གདུགས་ཚོད་གསོལ་བའི་མཆོད་པ་བཟང་པོ་བྱས་སོ། །དེ་ནས་བྲམ་ཟེ་མོས་ཆོས་ཉན་པའི་ཕྱིར་འདུག་པའི་ཚེ། འཕགས་པས་སྐྲ་ཅན་ག་རེ་ཞེས་དྲིས་པ་ན། སྤྱོད་ལམ་ཉམས་ཏེ་མཆིས་སོ་ཞེས་སྔར་གྱི་ལོ་རྒྱུས་གསོལ་ཏོ། །དེ་ནས་ཞབས་དྲུང་དུ་སྐྲ་ཅན་བོས་ཏེ་ཞབས་ལ་ཕྱག་འཚལ་དུ་བཅུག དེར་བྲམ་ཟེ་མོས་སྐྲ་ཅན་འདི་སུ་ལ་སྦྱིན་ཞུ་བས། འདི་ནི་རབ་ཏུ་བྱུང་བ་ལ་འཚམ་པ་མ་ཡིན་པ་ཞིག་དྲིས་མོད་ཀྱི། འོན་ཀྱང་འདི་གང་ལ་སྦྱིན་པ་དེ་ལས་སྦས་པའི་རྒྱན་ལྔ་བརྒྱ། ཕྱིའི་རྒྱན་ལྔ་བརྒྱ། གྲོང་གི་མཆོག་ལྔ་བརྒྱ་ཐོབ་པར་འགྱུར་རོ་ཞེས་ལུང་བསྟན་ཏེ་བྱོན་པ་ལས། གང་གི་ཚེ་འཕགས་པ་ཀཱ་ཏ་ཡ་ན་འཁོར་བཅས་གྲོང་ཁྱེར་འཕགས་རྒྱལ་དུ་བྱོན་པའི་མོད་ལ། ཡམས་ནད་གཏོང་བའི་མི་མ་ཡིན་ཤས་ཆེ་བ་དག་རིང་དུ་བྲོས་ཏེ། ཡམས་ནད་ཀྱི་ཕྱེད་ཙམ་ཞིའོ། །དེའི་ཚེ་གྲོང་ཁྱེར་གྱི་སྒོ་སྲུང་བ་དག་གིས། ཆ་བྱད་སྔོན་མ་མཐོང་བའི་དགེ་སློང་ལྔ་བརྒྱ་འདིར་འོངས་པའི་མོད་ལ། ཡམས་ནད་ཀྱི་ཕྱེད་ཞིའོ་ཞེས་རྒྱལ་པོ་ལ་གསོལ་པས་རྒྱལ་པོ་དགྱེས་སོ། །

        དེ་ནས་རྒྱལ་བོས་འཕགས་པ་འཁོར་བཅས་ལ་ཡང་ཡང་མཆོད་ཅིང༌། ལན་ཅིག་རྒྱལ་བོས་བྲོ་གར་རྩེ་བ་དུ་མ་འཕགས་པའི་གཟིགས་སར་ཕུལ་ཏེ། བྲོ་གར་གྱི་བཟང་ངན་དྲིས་ཚེ། འཕགས་པས་མ་མཐོང་གསུངས་པས། རྒྱལ་པོ་ཡིད་མ་ཆེ་བ་ལ། འཕགས་པས། ཆད་པས་གསད་དགོས་པ་ལ་ཐུག་པའི་མི་ཞིག་གི་ལག་ཏུ་སྣུམ་གྱིས་ཁ་ད་ཆད་དུ་གང་བའི་སྣོད་གཏད་དེ། ཐིག་པ་གཅིག་ས་ལ་བོར་ཡང་གསད་དོ་ཞེས་བསྡིགས་ནས། དེའི་མདུན་དུ་བྲོ་གར་རྩེ་བ་རྣམས་འགྲོར་ཆུག་ཅིག་གསུངས། དེ་ལྟར་བྱས་པའི་རྗེས་སུ་མི་དེ་ལ་དྲིས་ཚེ། བདག་ནི་གསོད་པས་འཇིགས་ཏེ་བྲོ་གར་མ་མཐོང་ཟེར། དེར་འཕགས་པས། མི་འདི་ཚེ་གཅིག་གི་སྡུག་བསྔལ་གྱིས་འཇིགས་པས་བག་ཡོད་པ་འདི་འདྲ་ན། བདག་ཅག་དགེ་སློང་རྣམས་ནི་ཚེ་རབས་དུ་མའི་སྡུག་བསྔལ་གྱིས་འཇིགས་པས་བག་ཡོད་ཀུན་ཏུ་སྲུངས་པ་ལྟ་ཅི་སྨོས་གསུངས། དེ་ནས་རྒྱལ་པོ་ལྷག་པར་ཡང་དད་དེ། འཕགས་པ་ཀཱ་ཏ་ཡ་ན་འཁོར་བཅས་ལ་ཆེས་ཆེར་མཆོད་ནས། འཕགས་པ་ལ་མཆོད་པ་འདི་ལྟ་བུས་མཆོད་པ་གཞན་ཡོད་དམ་ཞེས་ཞུས་པས། མཆོད་པ་འདི་དག་ངོ་མཚར་མི་ཆེ་ཡི། བུ་མོ་ཞིག་ལ་ནོར་མེད་པས་རང་གི་སྐྲ་པ་ན་ལྔ་བརྒྱར་བཙོངས་ཏེ། བདག་ཅག་དགེ་སློང་འཁོར་བཅས་མཆོད་པས་ཚིམ་པར་བྱས་སོ་གསུང༌། རྒྱལ་པོས། སྐྲ་པ་ན་ལྔ་བརྒྱར་འདོམས་པའི་སྐྲ་དང་ལྡན་པ་ནི། ལྷའི་ནང་ནའང་དཀོན་ནོ་སྙམ་སྟེ། ཞོ་ཤས་འཚོ་བ་དག་བུ་མོ་སློང་དུ་བཏང་ནས། སྐྲ་ཅན་མ་རྒྱལ་བོའི་བཙུན་མོར་སླངས་ཤིང༌། སྦས་པའི་རྒྱན་ལྔ་བརྒྱ་ལ་སོགས་པ་ཡང་བྲམ་ཟེ་མོ་ལ་བྱིན་ནོ། །སྐྲ་ཅན་མ་གྲོང་ཁྱེར་འཕགས་རྒྱལ་དུ་སླེབ་པའི་མོད་ལ། ཡམས་ནད་ཀྱི་ལྷག་མ་རྣམས་ཀྱང་ཞི་བས་བཙུན་མོ་ཞི་བ་ཞེས་མིང་དུ་བཏགས་སོ། །དེ་ནས་རྒྱལ་བོ་གཏུམ་པོ་རབ་སྣང་གིས། འཕགས་པ་ཀཱ་ཏ་ཡ་ན་དགེ་འདུན་དང་བཅས་པ་ལ་རྒྱལ་སྲིད་ཕུལ་ཡང་བཞེས་སུ་མ་གནང༌། འདོད་པ་ཐམས་ཅད་ལ་སྟོབས་ཀྱིས་སྤྱོད་པའི་རྒྱལ་སྲིད་ཀྱི་ཕྱེད་ཕུལ་ཡང་བཞེས་སུ་མ་གནང༌། ལོངས་སྤྱོད་དང་ཡོ་བྱད་ཀྱི་མཆོག་འབུལ་བར་ཞུས་པ་ལ། འཕགས་པ་ཀཱ་ཏ་ཡ་ནས་འཕགས་རྒྱལ་གྱི་གཙུག་ལག་ཁང་ནས་སྟོན་པ་ལ་ཞུས་ཤིང༌། སྟོན་པས་འཇིག་རྟེན་པའི་ཐུགས་བསྐྱེད་ཅིང༌། མཉམ་ཡོད་ནས་བཀའི་གནང་བ་སྩལ་པ། འཕགས་པ་ཀཱ་ཏ་ཡ་ནས་ལྷའི་རྣ་བས་གསན་ཏེ་ཞུ་བ་ཞུ་ལན་མཛད་དོ། །སྐྱེ་བོ་ཕྱི་རབས་ལ་སྙིང་བརྩེ་བའི་ཕྱིར་དང༌། སྦྱིན་བདག་གི་ལོངས་སྤྱོད་འཕེལ་བའི་ཕྱིར། དགེ་འདུན་ལ་ནི་གནང་གི །གང་ཟག་ལ་ནི་མ་ཡིན་ནོ་གསུངས། དེ་ཡང་ལོངས་སྤྱོད་ཅེས་པ་ནི་གྲོང་དང་ཞིང་ངོ༌། །ལོངས་སྤྱོད་ཀྱི་མཆོག་ནི་བ་ལང་དང༌། མ་ཧེ་དང༌། ར་ལུག་ལ་སོགས་པའོ། །དེ་ནས་རྒྱལ་བོས་ཡོ་བྱད་ཕུན་སུམ་ཚོགས་པའི་གཙུག་ལག་ཁང་མང་པོ་དང༌། ལོངས་སྤྱོད་དང་ལོངས་སྤྱོད་ཀྱི་མཆོག་རྣམས་ཕྱོགས་བཞིའི་དགེ་འདུན་ལ་ཕུལ་ཏོ། །དེའི་ཚེ་བཅོམ་ལྡན་འདས་ཀྱིས་ངའི་དགེ་བསྙེན་རྣམས་ཀྱི་ནང་ནས་དགེ་འདུན་ལ་ཐོག་མར་འདོད་པ་ཐམས་ཅད་ཀྱིས་སྟོབ་པའི་མཆོག་ནི་རབ་སྣང་ངོ་ཞེས་གསུངས་ཤིང༌། བཤོས་འབུལ་བའི་མཆོག་གཟུགས་ཅན་སྙིང་བོའོ། །གནས་མལ་འབུལ་བའི་མཆོག་མགོན་མེད་ཟས་སྦྱིན་ནོ། །གཙུག་ལག་ཁང་བྱེད་པའི་མཆོག་བཟང་ལྡན་ནོ་ཞེས་ཀྱང་སྐབས་གཞན་དུ་གསུངས་སོ། །འདི་ནི་གྲོང་ཁྱེར་འཕགས་རྒྱལ་དུ་དངོས་སུ་བཅོམ་ལྡན་འདས་ཉིད་ཀྱི་ཞབས་མ་བཅགས་ཤིང༌། འཕགས་ཀཱ་ཏ་ཡ་ན་ཆེན་པོ་དེར་མངགས་པ་ཉིད་སྟོན་པའི་མཛད་པར་འགྱུར་རོ་གསུངས།

        གང་གི་ཚེ་མཉན་ཡོད་ཀྱི་ཁྱིམ་བདག་མགོན་མེད་ཟས་སྦྱིན་རང་གི་བུ་དྲུག་གི་ཁྱིམ་ནི་ཕུག་ཟིན། བུ་བདུན་པ་ལེགས་སྐྱེས་ཀྱི་མནའ་མ་ལེན་ཞིང་ཁྱིམ་འབུགས་པའི་དོན་དུ་གངས་རིའི་གླང་བོ་བརྒྱ། རྟ་བརྒྱ། གསེར་གྱི་རྒྱན་བརྒྱ། དྲེ་འུའི་ཤིང་རྟ་བརྒྱ་སོགས་མནའ་མའི་རིན་དུ་ཁྱེར་ཏེ། རྒྱལ་པོའི་ཁབ་ཏུ་འོངས་ནས། མནའ་མའི་ཕ་ཁྱིམ་དུ་མཚན་མོ་འདུག་པ་ལས། ཁྱིམ་བདག་དེས་ནངས་བར་སངས་རྒྱས་དགེ་འདུན་དང་བཅས་པ་སྤྱན་དྲངས་པར་འདོད་པས། ནམ་གྱི་གུང་ལ་ལངས་ཏེ། གཡོག་འཁོར་དག་དང་ལྷན་ཅིག་ཏུ་བཟའ་བཅའ་རྒྱ་ཆེ་བའི་སྟ་གོན་བྱེད་པ་མགོན་མེད་ཟས་སྦྱིན་གྱིས་མཐོང་ནས། ཁྱིམ་བདག་དེ་ལ་ཁྱོད་ཀྱིས་ནངས་བར་བག་མ་གཏོང་ལེན་བྱེད་དམ། ཡང་ན་ཚོང་བའི་ཚོགས་ལ་སྟོན་མོ་འམ། ཡང་ན་རྒྱལ་པོ་གཟུགས་ཅན་སྙིང་པོ་སྤྱན་འདྲེན་པ་སོགས་གང་ཡིན་ཞེས་དྲིས་པས། ཁྱིམ་བདག་གིས། དེ་དག་མ་ཡིན་ཏེ། ནངས་བར་སངས་རྒྱས་དགེ་འདུན་དང་བཅས་པ་སྤྱན་འདྲེན་ནོ་ཟེར། མགོན་མེད་ཟས་སྦྱིན་གྱིས་སངས་རྒྱས་ཞེས་བྱ་བའི་སྒྲ་ཐོས་པ་ཙམ་གྱིས་སྤུ་ཟིང་བྱེད་དེ། ཁྱིམ་བདག་དེ་ལ་སངས་རྒྱས་དང་དགེ་འདུན་ཇི་ལྟ་བུ་ཞེས་དྲིས་པ་ན། དེས་ཀྱང་རྒྱས་པར་བཤད་པས། མགོན་མེད་ཟས་སྦྱིན་ཤིན་ཏུ་དད་པ་སྐྱེས་ཏེ། བཅོམ་ལྡན་འདས་གང་ན་བཞུགས། ཞལ་བལྟ་བར་རུང་ངམ་ཞེས་དྲིས་པ་ལ། དུར་ཁྲོད་བསིལ་བའི་ཚལ་ན་བཞུགས་ཏེ། འདིར་བྱོན་པ་ན་མཐོང་བར་འགྱུར་རོ་ཟེར། དེ་ནས་མགོན་མེད་ཟས་སྦྱིན་སངས་རྒྱས་ལ་དམིགས་པའི་དྲན་པ་དང་ལྡན་པས་ཅུང་ཟད་ཉལ། ཡང་གཉིད་སད་པ་ན། སྣང་བའི་འདུ་ཤེས་ཀྱི་དྲན་པའི་མཐུ་ལས། མཚན་མོའི་དུས་དེ་ཉིད་དུ་ནམ་ལངས་པ་ལྟར་ཕྱོགས་ཐམས་ཅད་གསལ་བར་མཐོང་བས། དེར་ལངས་ཏེ་ལྷོ་སྒོའི་ཕྱོགས་ནས་འགྲོ་བའི་ཚེ། ཕོ་ཉ་བ་རྒྱུ་འགྲུལ་གྱི་དོན་དུ་སྒོ་ཕྱེ་བ་དང་འགྲིག་ནས། གྲོང་ཁྱེར་གྱི་ཕྱི་རོལ་ཏུ་ཐོན་པ་ན། ནམ་མ་ལངས་པས་མུན་པར་འདུག་གོ །སླར་ལྡོག་པར་འདོད་པ་ལ། ཕྱོགས་དེར་གནས་པའི་ལྷའི་ཕྱོགས་དེ་ནས་དུར་ཁྲོད་བསིལ་བའི་ཚལ་གྱི་བར་ལམ་ཐམས་ཅད་སྣང་བས་ཁྱབ་པར་བྱས་ཏེ། འདི་སྐད་ཅེས། རྟ་བརྒྱ་དང་ནི་གསེར་རྒྱན་བརྒྱ། །དྲེའུའི་ཤིང་རྟ་བརྒྱ་དང་ནི། །སྣ་ཚོགས་ནོར་གྱིས་བ་སྦུ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་སླར་མི་ལྡོག་པར་འགྲོ་བར་བསྐུལ་བས། ཁྱོད་སུ་ཞེས་དྲིས་པས། མགོན་མེད་ཟས་སྦྱིན་ཁྱོད་ཀྱི་གྲོགས་པོ་རྙིང་བ་བྲམ་ཟེ་བ་སྦྲང་རྩིའི་ཕུང་པོ་ཡིན་ཏེ། མཆོག་ཟུང་གཅིག་ལ་དད་ཅིང་ཤི་བས་ལྷར་སྐྱེས་ནས་ལྷོ་སྒོའི་ཕྱོགས་འདིར་གནས་སོ། །ཞེས་ཟེར་རོ། །

        དེ་ནས་ཁྱིམ་བདག་མགོན་མེད་ཟས་སྦྱིན་ཡ་མཚན་དུ་གྱུར་ནས་བསིལ་བའི་ཚལ་དུ་སོང་སྟེ། བཅོམ་ལྡན་འདས་གཙུག་ལག་ཁང་གི་ཕྱི་རོལ་ན་ཞབས་འཆག་པར་མཛད་པ་མཐོང་ནས་སྙུན་དྲིས་པས༌། བཅོམ་ལྡན་འདས་ཀྱིས། གང་ཞིག་འདོད་པས་མ་གོས་ལ། །ཟག་མེད་རབ་ཏུ་རྣམ་གྲོལ་བ། །མྱ་ངན་ཡོངས་འདས་བྲམ་ཟེ་ནི། །ཐམས་ཅད་དུ་ནི་བདེ་བར་རྣལ། །ཞེས་སོགས་བཀའ་སྩལ་ཏེ། ནང་དུ་བྱོན་ནས་གདན་ལ་བཞུགས་པ་ན། ཞབས་ལ་ཕྱག་བྱས་ཏེ། ཕྱོགས་གཅིག་ཏུ་འདུག་པ་ལ། བཅོམ་ལྡན་འདས་ཀྱིས་ཆོས་བསྟན་པས། མགོན་མེད་ཟས་སྦྱིན་གྱིས་གནས་དེ་ཉིད་དུ་བདེན་པ་མཐོང་ཞིང་ཆེད་དུ་བརྗོད་ནས་དགེ་བསྙེན་དུ་གྱུར་ཏོ། །དེ་ནས་ཞུ་ལན་ཅུང་ཟད་མཛད་ནས། མགོན་མེད་ཟས་སྦྱིན་གྱིས་གསོལ་བ། བཅོམ་ལྡན་འདས་མཉན་ཡོད་དུ་གཤེགས་ཤིག་དང༌། དགེ་སློང་གི་དགེ་འདུན་དང་བཅས་པ་ལ་ཇི་སྲིད་འཚོའི་བར་དུ་བསྙེན་བཀུར་བགྱིའོ་ཞེས་ཞུས་སོ། །བཀའ་སྩལ་པ། དེ་ནས་གཙུག་ལག་ཁང་ཡོད་དམ། གསོལ་བ། མ་མཆིས་སོ། །བཀའ་སྩལ་པ། གང་དུ་གཙུག་ལག་ཁང་ཡོད་པ་དེར་དགེ་སློང་རྣམས་འོང་བ་དང་འགྲོ་བ་དང་གནས་པར་སེམས་སོ། །མགོན་མེད་ཟས་སྦྱིན་གྱིས་གསོལ་བ། བདག་གིས་ཅི་ནུས་ཀྱིས་གཙུག་ལག་ཁང་རྩིག་གོ །དེ་ནས་བཅོམ་ལྡན་འདས་ཀྱིས་ཅང་མི་གསུངས་པས་གནང་ངོ༌། །དེ་ནས་མགོན་མེད་ཟས་སྦྱིན་གྱིས་རྒྱལ་བོའི་ཁབ་ཏུ་རང་གི་བྱ་བ་བསྒྲུབ་དགོས་པ་རྣམས་གྲུབ་པ་ན། སྟོན་པའི་ཞབས་ལ་ཕྱག་འཚལ་དུ་འོངས་ནས། བདག་ལ་དགེ་སློང་ཞིག་གྲོགས་སུ་སྩལ་དུ་གསོལ་ཞེས་ཞུས་པས། འཕགས་པ་ཤཱ་རིའི་བུ་ལ་བཀའ་གནང་ངོ༌། །འཕགས་པ་ཤཱ་རིའི་བུ་ཡང་ནང་བར་བསོད་སྙོམས་སྤྱད་ཅིང་གནས་མལ་འཁོས་སུ་ཕབ་ནས། མཉན་ཡོད་ཀྱི་ཕྱོགས་སུ་རྒྱུ་ཞིང་གཤེགས། མགོན་མེད་ཟས་སྦྱིན་གྱིས་ཚུར་ལམ་མཉན་ཡོད་ཀྱི་ཉེ་འཁོར་གྱི་ཀུན་དགའ་ར་བ་དང༌། སྐྱེད་མོས་ཚལ་དང༌། ནགས་ཚལ་ཐམས་ཅད་ལ་རྣམ་པར་བརྟགས་ཤིང་འོངས་པ་ན། གཙུག་ལག་ཁང་གི་ས་གཞི་ལ། རྒྱལ་བུ་རྒྱལ་བྱེད་ཀྱི་ཀུན་དགའ་ར་བ་ཉིད་ཡོན་ཏན་དཔག་ཏུ་མེད་པ་དང་ལྡན་པར་མཐོང་ངོ༌། །རྒྱལ་བུ་རྒྱལ་བྱེད་ཅེས་བྱ་བ་དེ་ནི། རྒྱལ་བོ་གསལ་རྒྱལ་གྱི་སྤུན་ཟླར་གྱུར་པ་ཞིག་གོ །དེ་ནས་མགོན་མེད་ཟས་སྦྱིན། གཞོན་ནུ་རྒྱལ་བྱེད་ཀྱི་དྲུང་དུ་སོང་ནས། ཁྱོད་ཀྱི་ཀུན་དགའ་ར་བ་བདག་ལ་སྩོལ་ཅིག་དེར་བདག་གིས་སངས་རྒྱས་ཀྱི་གཙུག་ལག་ཁང་རྩིག་པ་ལགས། ཞེས་སྨྲས་པས། རྒྱལ་བུ་རྒྱལ་བྱེད་ཀྱིས་ཁས་མི་ལེན་ནོ། །ལན་གསུམ་དུ་སློང་བས། གསུམ་པ་ལ་རྒྱལ་བྱེད་ན་རེ། ཀུན་དགའ་ར་བ་གསེར་གྱི་བྱེ་མས་ཁེབས་པར་གཤིབས་ཀྱང་ངས་མི་གཏོང་ངོ་ཟེར། མགོན་མེད་ཟས་སྦྱིན་གྱིས་སྨྲས་པ། གཞོན་ནུ་ཀུན་དགའ་ར་བའི་རིན་ཐང་ནི་བཅད་ཟིན་གྱིས། གསེར་ལོངས་ཤིག །དེ་ནས་དེ་གཉིས་རིན་ཐང་བཅད་མ་བཅད་ལ་རྩོད་པར་གྱུར་ཏོ། །དེ་ནས་ཞལ་ལྕེ་གཅོད་པ་རྣམས་ཀྱི་གན་དུ་སོང་བ་ན། འཇིག་རྟེན་སྐྱོང་བ་རྒྱལ་བོ་ཆེན་པོ་བཞི་ཞལ་ལྕེ་གཅོད་པའི་མི་བཞིར་སྤྲུལ་ཏེ། དེ་རྣམས་ཀྱིས་གཞོན་ནུ་རིན་ཐང་བཅད་ཟིན་གྱིས་གསེར་ལོངས་ཤིག་དང༌། ཀུན་དགའ་ར་བ་འདི་ནི་མགོན་མེད་ཟས་སྦྱིན་གྱིས་ཡིན་ནོ་ཞེས་བཤད་པས། རྒྱལ་བུ་རྒྱལ་བྱེད་ཀྱིས་ཐབས་མ་རྙེད་དོ། །དེ་ནས་མགོན་མེད་ཟས་སྦྱིན་གྱིས་ཤིང་རྟ་ལ་སོགས་པས་གསེར་དྲངས་ཏེ། ཀུན་དགའ་ར་བའི་ས་གཞི་ཐམས་ཅད་ལ་བཀྲམས་པ་ན། ས་གཞི་ཕལ་ཆེར་ཁེབས་ཀྱང་ཕྱོགས་འགའ་ཞིག་མ་ཁེབས་པར་མཐོང་ནས། དེ་དང་འཚམ་པའི་གཏེར་ཞིག་གང་དུ་ཡོད་བསམ་ཞིང་ཕྱོགས་རྣམས་སུ་བལྟས་པ་ན། རྒྱལ་བྱེད་ཀྱིས་སྨྲས་པ། ཁྱིམ་བདག་འགྱོད་པ་སྐྱེས་ན་གསེར་སླར་ལོངས་ཤིག་དང༌། ཀུན་དགའ་ར་བ་ནི་ང་ཉིད་ཀྱི་བྱའོ་ཟེར། མགོན་མེད་ཟས་སྦྱིན་གྱིས་དོན་དེ་རྒྱས་པར་བཤད་པའི་ཚེ། རྒྱལ་བྱེད་ཀྱིས་བསམ་པ། ཀྱེ་མ་སངས་རྒྱས་འབྱུང་བ་ནི་མཆོག་ཡིན་ཏེ། འདི་ཡིས་ཀུན་དགའ་ར་བའི་ཆེད་དུ་གསེར་འདི་སྙེད་ཅིག་གཏོང་ན། བདག་གིས་ཀྱང་ཅུང་ཟད་ཅིག་བྱའོ་སྙམ་ནས། ཁྱིམ་བདག་ལ་སྨྲས་པ། འོ་ན་གསེར་མ་བཀྲམ་པའི་ས་ཕྱོགས་འདི་བདག་ལ་བྱིན་ཅིག བདག་གིས་ཀྱང་སྒོ་ཁང་བརྩིག་པར་བྱའོ་ཞེས་སྨྲས་པས། མགོན་མེད་ཟས་སྦྱིན་དང་གཞོན་ནུ་རྒྱལ་བྱེད་གཉིས་ཀ་བློ་མཐུན་པར་གྱུར་ཏོ། །

        དེ་ནས་གཙུག་ལག་ཁང་བརྩིག་པར་བརྩམ་པ་ན། མུ་སྟེགས་ཅན་རྣམས་འདུས་ཏེ། མགོན་མེད་ཟས་སྦྱིན་གྱི་དྲུང་དུ་ལྷགས་ནས། ཀྱེ་ཁོ་བོ་ཅག་གིས་གྲོང་ཁྱེར་བགོ་བཤའ་བྱས་ཟིན་ཏེ། དགེ་སྦྱོང་གཽ་ཏ་མའི་ནི་རྒྱལ་བོའི་ཁབ་ཡིན་ལ། ངེད་ཅག་ནི་མཉན་ཡོད་ཡིན་ན། གཽ་ཏ་མའི་ཕྱིར་དུ་གཙུག་ལག་ཁང་མ་རྩིག་ཅིག་ཟེར་བ་ལ། མགོན་མེད་ཟས་སྦྱིན་གྱིས་སྨྲས་པ། ཁྱེད་ཅག་གིས་གྲོང་ཁྱེར་བགོ་བཤའ་བྱས་ཟིན་ཀྱང༌། ངའི་ནོར་ཁྱེད་ཅག་གིས་མ་བགོས་པས། རང་གང་ལ་དགའ་བའི་ཆོས་ཀྱི་ཕུང་པོ་རྩིག་གོ །དེ་ནས་དེ་རྣམས་རྒྱལ་བོའི་དྲུང་དུ་སོང་ནས་ཀྱང་སྔར་བཞིན་བཤད་ཅིང༌། གཙུག་ལག་ཁང་རང་དགར་རྩིག་ཏུ་གཞུག་གི །གཽ་ཏ་མའི་ཉན་ཐོས་ཀྱི་མཆོག་དེ་དང་ནུས་པ་འགྲན་ཏེ། གལ་ཏེ་ཉན་ཐོས་དེ་རྒྱལ་ན་རྩིགས་ཤིག་ཟེར། མགོན་མེད་ཟས་སྦྱིན་གྱིས། འཕགས་པ་ཤཱ་རིའི་བུ་ལ་དེ་ལྟར་ཞུས་པས། མུ་སྟེགས་ཅན་དེ་དག་གི་རྒྱུད་ལ་དགེ་བའི་རྩ་བའང་ཡོད་ལ། དེ་རྣམས་བདག་ཉིད་ཀྱིས་འདུལ་བ་ལ་རག་ལས་པར་ཡང་མཁྱེན་ནས། ཁྱིམ་བདག་དེ་བཞིན་དུ་བྱ་སྟེ། འོན་ཀྱང་ཞག་བདུན་ནས་སོ། །ཞེས་གསུངས་སོ། །མགོན་མེད་ཟས་གྱིས་མུ་སྟེགས་ཅན་རྣམས་ལ་དེ་བཞིན་དུ་བཤད་པས། དེ་རྣམས་གྲོས་བྱས་ཏེ། ཞག་བདུན་གྱི་དུས་འདེབས་པ་ནི། ཡང་ན་ནི་འདི་འབྲོས། ཡང་ན་ནི་ཕྱོགས་འཚོལ་བ་ཡིན་པས། བདག་ཅག་གིས་ཀྱང་རེ་ཞིག་ཕྱོགས་འཚོལ་ལོ་ཞེས་ཉིན་ཞག་གི་རིམ་པ་བགྲང་ཞིང་ཙབ་ཙབ་པོར་ཕྱོགས་འཚོལ་བ་ལས། ཀུན་ཏུ་རྒྱུ་མིག་དམར་ཞེས་བྱ་བ་མིག་འཕྲུལ་ལ་ཤིན་ཏུ་བྱང་བ་ཞིག་ཡོད་པ་དེ་རྙེད་ནས་གྲོགས་བཅོལ་ལོ། །དེ་དག་ཏུ་ཉིན་རེ་བཞིན་གདུལ་བྱར་གྱུར་པའི་སྐྱེ་བོ་མང་པོ་ཡང་འདུས། ཞག་བདུན་ལོན་པ་ན། ས་ཕྱོགས་ཤིན་ཏུ་ཡངས་པར་གདན་བཤམས། འཕགས་པ་ཤཱ་རིའི་བུ་སེང་གེ་ཁྲི་ལ་བཞུགས་ཏེ། ཞལ་འཛུམ་པ་མཛད་པ་སྔོན་དུ་བཏང་ནས། གདུལ་བྱའི་སྐྱེ་བོ་རྣམས་ལ་གཟིགས་སོ། །དེ་ནས་མུ་སྟེགས་བྱེད་རྣམས་དང་ལྟད་མོ་བའི་སྐྱེ་བོ་དཔག་ཏུ་མེད་པ་འདུད་པ་ན། ཀུན་ཏུ་རྒྱུ་མིག་དམར་གྱིས། ཤིང་ས་ཧ་ཀ་ར་མེ་ཏོག་རྒྱས་པ་ཞིག་སྤྲུལ་བས། འཕགས་པ་ཤཱ་རིའི་བུས་རླུང་དམར་དང་ཆར་དྲག་པོ་བཏང་ནས། ཤིང་དེ་རྣམས་རྩ་བ་ནས་བཅག་ཅིང་བཏོན་ནས་གཏོར་རོ། །

        ཡང་པདྨའི་རྫིང་བུ་སྤྲུལ་བ་ལ། གླང་པོ་ཆེ་མང་པོ་སྤྲུལ་ནས་དཀྲུགས་ཤིང་བརྫིས་ཏེ་ལྷག་མ་མེད་པར་བྱས་སོ། །ཡང་སྦྲུལ་མགོ་བདུན་པ་བཏང་བ་ལ། མཁའ་ལྡིང་མང་པོ་སྤྲུལ་ནས་ཟོས་སོ། །མཐར་རོ་ལངས་རྦད་པ་ན། འཕགས་པ་ཤཱ་རིའི་བུས་རོ་ལངས་ལ་ཕུར་བུས་བཏབ་བོ། །རོ་ལངས་ལ་ཕ་རོལ་བོས་ཕུར་བུས་བཏབ་ན། གཏོང་བ་བོ་ཉིད་གསོད་པ་ནི་ཆོས་ཉིད་ཡིན་པས། རོ་ལངས་སླར་ལོག་སྟེ་ཀུན་ཏུ་རྒྱུ་མིག་དམར་དང་མུ་སྟེགས་ཅན་རྣམས་བདས་པའི་ཚེ། དེ་དག་འཇིགས་ཤིང་སྐྲགས་ནས་མགོན་སྐྱབས་གཞན་མ་རྙེད་པར་འཕགས་པ་ཤཱ་རིའི་བུ་ལ་སྐྱབས་སུ་སོང་བས། འཕགས་པས་ཕུར་བུ་ཕྱུང་བ་ན་རོ་ལངས་ཞི་བར་གྱུར་ཏོ། །དེ་ནས་ཀུན་ཏུ་རྒྱུ་མིག་དམར་དད་པས་རབ་ཏུ་བྱུང་ཞིང་བསྙེན་པར་རྫོགས་པ་ལ་ཆོས་བསྟན་པས། བདེན་པ་མཐོང་བ་ནས་དགྲ་བཅོམ་པའི་བར་དུ་གྱུར་ཏོ། །འཕགས་པ་ཤཱ་རིའི་བུས་འཁོར་ཚོགས་འདུས་པ་ཐམས་ཅད་ལ་རང་རང་གི་བསམ་པ་ཇི་ལྟ་བར་ཆོས་བསྟན་པས། ལྷ་དང་མིའི་སྐྱེ་བོ་མཐའ་ཡས་པས་བདེན་པ་མཐོང་ཞིང༌། སྐལ་བ་དང་འཚམ་པར་བྱང་ཆུབ་གསུམ་ལ་གཞོལ་བར་གྱུར་ཏོ། །དེ་ནས་གཙུག་ལག་ཁང་གི་ཐིག་འདེབས་པའི་ཚེ། ཐིག་སྐུད་ཀྱི་མཐའ་གཅིག་ནས་ནི་འཕགས་པ་ཤཱ་རིའི་བུས་བཟུང༌། ཅིག་ཤོས་ནས་ནི་ཁྱིམ་བདག་མགོན་མེད་ཟས་སྦྱིན་གྱིས་བཟུང་སྟེ། ཐིག་དང་པོ་བཏབ་པ་ན་འཕགས་པ་ཤཱ་རིའི་བུ་འཛུམ་པ་མཛད་དོ། །མགོན་མེད་ཟས་སྦྱིན་གྱིས་འཕགས་པ་ལ་འཛུམ་པ་མཛད་པའི་རྒྱུ་དྲིས་པས། དགའ་ལྡན་གྱི་ལྷའི་གནས་སུ་ཡང་གསེར་གྱི་ཁང་བ་དཔག་ཚད་བཞི་བཅུ་བ་ཞིག་གྲུབ་བོ་ཞེས་གོ་བར་མཛད་དོ། །དེ་ནས་ཐིག་གཉིས་པ་བཏབ་པས། གསེར་གྱི་ཁང་བ་དེ་རིན་པོ་ཆེ་སྣ་བཞི་ལས་གྲུབ་པར་གྱུར་ཏོ་གསུངས། དེ་ནས་རིམ་གྱིས་ས་གཞི་དེའི་དབུས་སུ་གཙུག་ལག་ཁང་ཆེན་པོ་བཞེངས་ཤིང༌། དེའི་མཐའ་གཙུག་ལག་ཁང་བཅུ་དྲུག་གིས་བསྐོར་པ་དང༌། དེ་དག་གི་མཐར་ཁང་ཕྲན་དྲུག་བཅུས་བསྐོར་བ་བཞེངས་ཏེ། ཕྱི་རོལ་རྭ་བ་དང་བཅས་པ་ཡོ་བྱད་ཐམས་ཅད་ཀྱིས་རྒྱས་པར་བྱས་སོ། །གཞོན་ནུ་རྒྱལ་བྱེད་ཀྱིས་ཀྱང་སྒོ་ཁང་ལེགས་པར་ཚང་བར་གྱུར་ཏོ། །

        དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་འཁོར་བཅས་མཉན་ཡོད་རྒྱལ་བྱེད་དུ་ཚལ་དུ་གསར་དུ་བཞེངས་པའི་ངོ་མཚར་བའི་གཙུག་ལག་ཁང་ཆེན་པོར་སྤྱན་དྲང་བར་འདོད་ནས། འཕགས་པ་ཤཱ་རིའི་བུ་ལ་དེ་བཞིན་གཤེགས་པ་ཉི་མ་རེར་བཤུལ་སོ་ཇི་ཙམ་རེ་འབྱོན། ཞེས་དྲིས་པས། འཁོར་ལོས་བསྒྱུར་པའི་རྒྱལ་བོ་བཞིན་ཏེ། རྒྱང་གྲགས་བཅུའི་ལམ་དུའོ་གསུངས། དེ་ནས་མཉན་ཡོད་ནས་རྒྱལ་བོའི་ཁབ་ཀྱི་བར་དུ་ཞག་མལ་བརྩིས་ཏེ། ཞགས་རེ་རེར་སྦྱིན་གཏོང་གི་ཁང་བ་རེ་བརྩིགས། གཞན་ཡང་དུས་དང་དུས་ཚོད་སོ་སོའི་མཆོད་པའི་ཡོ་བྱད་རྣམས་དང༌། གདུགས་ཚོད་གསོལ་བའི་མི་དག་ཀྱང་བཞག་རྟ་བབས་དག་ཀྱང་བརྩིགས། ལམ་ཐམས་ཅད་ལ་ཆག་ཆག་བཏབ་ཅིང་རྒྱན་ཐམས་ཅད་ཀྱིས་བརྒྱན་པ་སོགས་ཕེབས་བསུའི་ལྟ་གོན་ཆེན་པོ་མཛད་དོ། །དེ་ནས་མི་ཞིག་ཕོ་ཉར་མངགས་ཏེ། བཅོམ་ལྡན་འདས་འཁོར་བཅས་སྤྱན་འདྲེན་པར་བཏང་ངོ༌། །སྤྱན་འདྲེན་པ་དེ་ཡང་མྱུར་བར་རྒྱལ་པོའི་ཁབ་ཏུ་ཕྱིན་ནས། སྟོན་པའི་ཞབས་ལ་ཕྱག་འཚལ་ཏེ། མཉན་ཡོད་ཀྱི་གཙུག་ལག་ཁང་དུ་ཕེབས་པར་གསོལ་ལོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ཏུ། །རྒྱལ་བོའི་ཁབ་ནས་མཉན་ཡོད་ཀྱི་བར་གྱི་ལྗོངས་རྣམས་རྒྱུ་ཞིང༌། ཁྱིམ་བདག་མགོན་མེད་ཟས་སྦྱིན་གྱིས་གུས་པར་བཤམས་པའི་མཆོད་ཡོན་བསྒྲེང་བའི་གནས་རྣམས་རིམ་པར་བརྒྱུད་དེ་ཕེབས་སོ། །དེ་ཡང་བཅོམ་ལྡན་འདས་དུལ་བ། འཁོར་ཡང་དུལ་བ། བཅོམ་ལྡན་འདས་ཞི་བ། འཁོར་ཡང་ཞི་བ། བཅོམ་ལྡན་འདས་གྲོལ་བ། འཁོར་ཡང་གྲོལ་བ། བཅོམ་ལྡན་འདས་དབུགས་ཕྱིན་པ། འཁོར་ཡང་དབུགས་ཕྱིན་པ། བཅོམ་ལྡན་འདས་དགྲ་བཅོམ་པ། འཁོར་ཡང་དགྲ་བཅོམ་པ། བཅོམ་ལྡན་འདས་འདོད་ཆགས་དང་བྲལ་བ། འཁོར་ཡང་འདོད་ཆགས་དང་བྲལ་བ་སྟེ། ཉི་མ་འོད་ཟེར་སྟོང་གིས་བསྐོར་བ་ལྟ་བུ། སྐུ་རིན་པོ་ཆེའི་རི་བོ་དང་འདྲ་བ། འོད་འདོམས་གང་བ། མཚན་དང་དཔེ་བྱད་ཀྱིས་བརྒྱན་པ། ཐུགས་རྗེ་ཆེན་པོ་དང་ལྡན་པ་དེ། དགེ་སློང་གི་དགེ་འདུན་ཆེན་པོ་དང༌། ཁྱིམ་བདག་མགོན་མེད་ཟས་སྦྱིན་ལ་སོགས་པ་སྐྱེ་བོའི་ཚོགས་རྣམས་དང༌། ལྷ་བརྒྱ་སྟོང་དུ་མས་ཞབས་འབྲང་བྱས་ཏེ། གྲོང་ཁྱེར་གྱི་སྒོའི་ཐེམ་པ་ལ་ཞབས་བཞག་མ་ཐག་ཏུ་ས་ཆེན་པོ་རྣམ་པ་དྲུག་ཏུ་གཡོས་སོ། །འཇིག་རྟེན་གྱི་ཁམས་ཐམས་ཅད་འོད་ཀྱིས་ཁྱབ། ནམ་མཁའ་ནས་ལྷ་རྣམས་ཀྱིས་མེ་ཏོག་གི་ཆར་ཕབ་ཅིང་རོལ་མོའི་སྒྲ་བསྒྲགས། གླང་བོ་ཆེ་དང་རྟ་དང་ཁྱུ་མཆོག་རྣམས་ནི་སྐད་འབྱིན། རོལ་མོའི་ཆ་བྱད་ཐམས་ཅད་དང་སྣོད་ཐམས་ཅད་ལས་ནི་རང་སྒྲ་འབྱིན། ལོང་བས་མིག་ཐོབ། འོན་པས་སྒྲ་ཐོས། ལྐུག་པའི་སྨྲ་ནུས། དབང་པོ་མ་ཚང་བ་དག་གི་དབང་པོ་རྣམས་ཡོངས་སུ་རྫོགས་པར་གྱུར། ཆང་དང་དུག་གིས་མྱོས་པ་རྣམས་ཀྱང་སངས། ཕན་ཚན་འཁོན་པ་རྣམས་ཀྱང་བྱམས་པའི་སེམས་དང་ལྡན་པར་གྱུར། སྦྲུམ་མ་བཙའ་བའི་དུས་ལ་བབ་པ་རྣམས་ནི་བདེ་བར་བཙས། བཙོན་དུ་བཅིངས་པ་རྣམས་ནི་ཐར། ནོར་མེད་པ་རྣམས་ཀྱིས་ནོར་རྙེད་དོ། །འདི་ལྟ་བུའི་ཡ་མཚན་གྱི་ཆོས་ནི། རྫུ་འཕྲུལ་མངོན་པར་འདུ་བ་མཛད་པ་མ་ཡིན་པར་རང་ཤུགས་ཀྱིས་འབྱུང་བས། ཡ་མཚན་ནར་མ་སྣ་ཚོགས་པ་ཞེས་བྱ་བ་དེ་ཡིན་ནོ། །འདི་ལྟ་བུའི་ངོ་མཚར་བའི་ཆོས་འབྱུང་བ་ནི། བཅོམ་ལྡན་འདས་འཁོར་བཅས་རྒྱལ་བོའམ། ཁྱིམ་བདག་ལ་སོགས་པས་སྤྱན་དྲངས་ཏེ། སྔར་མ་བྱོན་པའི་ཡུལ་ཕྱོགས་གང་དང་གང་དུ་བྱོན་པའི་སྐབས་ཐམས་ཅད་ལ་འདྲའོ་གསུངས། དེ་ནས་བཅོམ་ལྡན་འདས་ཁྱིམ་བདག་མགོན་མེད་ཟས་སྦྱིན་གྱིས་བཞེངས་པའི་གཙུག་ལག་ཁང་ཆེན་པོར་བྱོན་ཏེ། དགེ་སློང་གི་དགེ་འདུན་གྱི་དབུས་སུ་གདན་བཤམས་པ་ལ་བཞུགས་སོ། །མགོན་མེད་ཟས་སྦྱིན་ཉེ་དུ་འཁོར་ཚོགས་དང་ལྷན་ཅིག་པས་བཀུར་སྟི་ཆེན་པོ་དང་བཅས་ཏེ། ཁྱིམ་བདག་ཉིད་ཀྱིས་གསེར་གྱི་བྱ་མ་བུམ་ཐོགས་ནས་ཆུ་བསྒྲེངས་པ་ལས། བྱ་མ་བུམ་ལས་ཆུ་འབབ་ཏུ་མ་བཏུབ་བོ། །དེ་ནས་མགོན་མེད་ཟས་སྦྱིན་གྱིས་བདག་གིས་ལས་ལ་མ་ལེགས་པ་ཞིག་བྱས་སམ་སྙམ་ནས་ཡིད་མི་དགའ་བ་ལ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བུ་མ་ཡིན་མོད། འོན་ཀྱང་སྔོན་གྱི་སངས་རྒྱས་རྣམས་ལ་ཁྱོད་ཀྱིས་ཕྱོགས་འདི་ཉིད་ཕུལ་ཟིན་པ་ཡིན་པས། ཕྱོགས་གཞན་དུ་ཆུ་སྒྲེངས་ཤིག་གསུངས། དེར་བསྒྲེངས་པས་ཆུ་བྱུང་ངོ༌། །

        དེ་ཡང་སངས་རྒྱས་ནམ་གཟིགས་ཀྱི་དུས་ཁྱིམ་བདག་རྒྱལ་བྱེད་ཅེས་བྱ་བར་གྱུར་པས་ཕུལ་ཅིང༌། སངས་རྒྱས་གཙུག་ཏོར་ཅན་ལ་ཁྱིམ་བདག་རྒྱས་པ་དང༌། སངས་རྒྱས་ཐམས་ཅད་སྐྱོབ་ལ་ཁྱིམ་བདག་མཆུ་དང༌། སངས་རྒྱས་འཁོར་བ་འཇིག་ལ་ཁྱིམ་བདག་སྲིད་སྦྱིན་དང༌། སངས་རྒྱས་གསེར་ཐུབ་ལ་ཁྱིམ་བདག་ཕུར་བུ་དང༌། སངས་རྒྱས་འོད་སྲུངས་ལ་ཁྱིམ་བདག་ཆུ་སྟོད་དུ་གྱུར་ཏེ་ཕུལ། མ་འོངས་པ་ན་སངས་རྒྱས་བྱམས་པ་ལ་ཁྱིམ་བདག་ནོར་བཟང་དུ་གྱུར་ཏེ་དབུལ་ལོ། །ཞེས་ལུང་བསྟན་ཏོ། །འདིར་ཆུ་སྒྲེང་བ་ནི། རྒྱ་གར་བ་རྣམས་ཀྱི་ཡུལ་ཆོས་ཏེ། བཟའ་བཏུང་མ་ཡིན་པའི་སྦྱིན་པ་རྒྱ་ཆེ་བ་གང་ལ་ཡང་ཆུ་གཙང་སྒྲེང་བ་ཡིན་པས། སྐབས་འདིར་ཡང་གཙུག་ལག་ཁང་འབུལ་བའི་བརྡའ་ཡིན་ནོ་གསུངས། དེའི་ཚེ་གང་སྦྱིན་པའི་དངོས་པོ་དེ་ཉིད་བརྗོད་དགོས་པས། སྐབས་དེར་རྒྱལ་བུ་རྒྱལ་བྱེད་ཀྱིས་བསམ་པ། བཅོམ་ལྡན་འདས་ཀྱིས་དངོས་པོ་བརྗོད་པ་གསུང་བ་ན། བདག་གི་མིང་ཐོག་མར་སྨྲོས་ཏེ་གསུངས་ན་ཅི་མ་རུང་སྙམ་པ། བཅོམ་ལྡན་འདས་ཀྱིས་མཁྱེན་ནས་བཀའ་སྩལ་པ། དགེ་སློང་དག་འདི་ནི་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ཡིན་ནོ། །ཞེས་གསུངས་པ་ཐོས་ནས། གཞོན་ནུ་རྒྱལ་བྱེད་དགའ་སྟེ། སྒོ་ཁང་རིན་པོ་ཆེ་སྣ་བདུན་གྱི་རང་བཞིན་དང་ལྡན་པར་བྱེད་དུ་བཅུག་གོ །དེ་ནས་ཞག་མང་པོ་མ་ལོན་པའི་དུས་ཤིག་ན། ཀོ་ས་ལའི་རྒྱལ་བོ་གསལ་རྒྱལ་གྱིས། བཅོམ་ལྡན་འདས་རྒྱལ་བྱེད་ཚལ་དུ་བཞུགས་པ་ཐོས་ནས་རྒྱལ་པོ་འཁོར་དང་བཅས་པ་སྟོན་པའི་དྲུང་དུ་སོང༌། ཕྱག་བྱས་ཏེ་ཕྱོགས་གཅིག་ཏུ་འཁོད་ནས་སྨྲས་པ། དགེ་སྦྱོང་གཽ་ཏ་མ་མངོན་པར་རྫོགས་པར་སངས་རྒྱས་སོ། །ཞེས་གསུངས་པར་གྲགས་ན། དགེ་སྦྱོང་གཽ་ཏ་མ་ལ་རྫུན་གསུང་ཞེས་སྐུར་བ་འདེབས་པ་མ་ལགས་སམ། བཀའ་སྩལ་པ། མ་ཡིན་ཏེ། ང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །རྒྱལ་བོས་གསོལ་བ། རེ་ཞིག་རྒན་ཞིང་རྒན་པའི་དགེ་སྦྱོང་དང༌། བྲམ་ཟེ་རྫོགས་བྱེད་ལ་སོགས་པ་རྣམས་ཀྱང༌། དེ་ལྟ་བུར་ཁས་མི་འཆེ་ན། ཤེས་ལྡན་གཽ་ཏ་མ་འཁྲུངས་ནས་རིང་པོ་མ་ལོན་པ། གསར་དུ་རབ་ཏུ་བྱུང་བ་ལྟ་སྨོས་ཀྱང་ཅི་འཚལ། ཞེས་ཞུས་པ་ན། བཅོམ་ལྡན་འདས་ཀྱིས། རྒྱལ་རིགས་དཔེ་བྱད་ལྡན་པ་དང༌། །དེ་བཞིན་བྲང་འགྲོ་མེ་དང་ནི། །དགེ་སློང་ཚུལ་ཁྲིམས་ལྡན་དེ་ལ། །བློ་དང་ལྡན་པས་བརྙས་མི་བྱ། །ཞེས་སོགས་བཀའ་སྩལ་པས། རྒྱལ་བོ་གསལ་རྒྱལ། བཅོམ་ལྡན་འདས་ཐམས་ཅད་མཁྱེན་པ་ཉིད་དང༌། རྫོགས་པའི་སངས་རྒྱས་ཉིད་དུ་ཡིད་ཆེས་ནས། ཞབས་གཉིས་ལ་མགོ་བོས་གཏུགས་ཏེ་སོང་ངོ༌། །དེའི་ཚེ་བཅོམ་ལྡན་འདས་དགེ་སློང་གི་དགེ་འདུན་ཆེན་པོ་དང་བཅས་པ་གྲོང་ཁྱེར་མཉན་ཡོད་ཀྱི་ཕྱོགས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དབྱར་གནས་པར་མཛད་དོ། །

                   རྗེ་ཡེ་ཤེས་རྒྱ་མཚོའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་མཛད་ཆེན་རྣམ་པར་ཐར་པ་པདྨ་དཀར་པོའི་ཕྲེང་བ་ལས་བཤུས།

                                                                                                             རྩོམ་སྒྲིག་པ། མང་ར་བ།
            གསལ་འདེབས།                  རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                    དྲ་བའི་སྦྲེལ་ཐགhttp://www.tb1025.cn