དེ་ནས་ཆོས་ཀྱི་འཁོར་ལོ་བསྐོར་བ་སོགས་ནི། བསྟོད་པ་ལས། མི་མཇེད་བདག་པོ་ཚངས་པ་ཆེན་པོ་ཡིས། །རྩིབས་སྟོང་གསེར་གྱི་འཁོར་ལོ་ཕུལ་ཏེ་བསྐུལ། །ངོ་མཚར་རྨད་བྱུང་འཕགས་པའི་བདེན་པ་བཞིའི། །ཆོས་ཀྱི་འཁོར་ལོ་བསྐོར་ལ་ཕྱག་འཚལ་ལོ། །ཞེས་སྨྲས་སོ། །དེ་ནས་མི་མཇེད་ཀྱི་བདག་པོ་ཚངས་པ་ཆེན་པོ། བཅོམ་ལྡན་འདས་ཀྱི་ཞབས་དྲུང་དུ་སོང་སྟེ། གསོལ་བ། མ་ག་དྷར་ནི་སྔོན་ཆད་ཆོས་བྱུང་བ། །དག་པ་མ་ལགས་དྲི་མར་བཅས་པར་རྟོགས། །བདུད་རྩི་ཆོས་ཀྱི་སྒོ་ནི་ཕྱེ་མཛོད་ལ། །དྲི་མ་མེད་པའི་རྟོགས་པ་བཤད་པར་མཛོད། །ཅེས་དང༌། གཞན་ཡང༌། ཚངས་པས། ཡེ་ཤེས་ཆེན་པོ་མཆོག་གི་དཀྱིལ་འཁོར་བསྒྲུབས་ནས་ནི། །ཕྱོགས་བཅུ་དག་ཏུ་འོད་ཟེར་རྣམ་པར་བཀྱེ་མཛད་དེ། །ཡེ་ཤེས་ཟེར་གྱིས་མི་ཡིས་པདྨ་ཁ་འབྱེད་པ། །སྨྲ་བའི་ཉི་མ་དེ་རིང་ཅི་སླད་བཏང་སྙོམས་བཞུགས། །ཞེས་དང༌། ལྷའི་དབང་པོ་བརྒྱ་བྱིན་གྱི་གསོལ་བ། ཟླ་བ་ཉ་བ་གཟའ་ལས་ཐར་པ་ལྟར། །ཁྱོད་ཀྱི་ཐུགས་ནི་རྣམ་པར་གྲོལ་བ་ལགས། །གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་འབྱུང་གསོལ། །ཞེས་གསོལ་བ་བཏབ་བོ། །སྟོན་པས། ངས་ཚེགས་ཆེན་པོས་རྟོགས་པ་འདི། གཞན་གྱིས་རྟོགས་པར་མི་འགྱུར་རོ་ཞེས་དང་པོར་ཞལ་གྱིས་མ་བཞེས་སོ། །ཡང་ཚངས་པས། འཇིག་རྟེན་ན་མཆོག་དང་འབྲིང་དང་དམན་པ་དག་ཡོད་པས། རབ་དང་འབྲིང་གིས་ཆོས་ཐོས་ན་རྟོགས་པར་འགྱུར་ལ། མ་ཐོས་ན་ཉམས་པར་འགྱུར་བ་ལགས་པས། ངེས་པར་ཆོས་གསུངས་པར་ཞུ། ཞེས་ཞུས་པ་ན། སྟོན་པ་ཉིད་ཀྱི་གཟིགས་པས་ཀྱང་དེ་ལྟར་དགོངས་ཏེ། དཀའ་སྩལ་པ། བདུད་རྩིའི་སྒོ་མོ་དག་ནི་དབྱེ་བར་བྱ། །ཉན་པར་སུ་འདོད་སོམ་ཉི་སོལ་ཅིག་དང༌། །ཚངས་པ་མི་རྣམས་ལ་ནི་གྱ་ནོམ་ཆོས། །ཀླན་ཀ་མི་སྩལ་མདོ་ཙམ་བཤད་པར་བྱ། །ཞེས་ཞལ་གྱིས་བཞེས་པས། ཚངས་པ་དགའ་སྟེ་སོང་ངོ༌། །གང་གི་ཚེ་ཞག་བདུན་ཕྲག་བདུན་པ་ལ་བབ་པ་ན། རིང་འཕུར་དང་ལྷག་སྤྱོད་དག་ལ་ཆོས་སྟོན་པར་དགོངས་པའི་ཚེ། ལྷ་རྣམས་ཀྱིས་རིང་འཕུར་འདས་ནས་ཞག་བདུན་དང༌། ལྷག་སྤྱོད་འདས་ནས་ཞག་གཅིག་ལོན་པར་གསོལ་བས། ཀྱེ་མ་དེ་དག་གིས་ངའི་ཆོས་ཐོས་ན་བདུད་རྩི་ཐོབ་པར་འགྱུར་བ་ཞིག་ན། ད་ནི་གཞན་ལ་བསྟན་དགོས་པས། ལྔ་སྡེ་རྣམས་ངས་སྔོན་དཀའ་བ་སྤྱོད་པ་ན། གུས་པ་དང་བཅས་པ་ཡིན་པས་དེ་རྣམས་ལ་བསྟན་པར་བྱའོ་དགོངས་ནས། རིམ་པས་ལྗོངས་རྒྱུ་ཞིང་ཀཱ་ཤཱིའི་ཡུལ་དུ་གཤེགས་སོ། །ལམ་དུ་ཀུན་ཏུ་འཚོ་བ་ཉེར་འགྲོ་དང་མཇལ་ཏེ། གཽ་ཏ་མ་ཁྱོད་ཀྱི་དབང་བོ་ནི་དྭངས། བཞིན་གྱི་མདོག་ནི་ཡོངས་སུ་དག པགས་པའི་མདོག་ནི་རབ་ཏུ་གསལ་ན། ཁྱོད་ཀྱི་སྟོན་པ་ནི་གང་ཞེས་ཞུས་པ་ན། བཀའ་སྩལ་པ། ང་དང་འདྲ་བ་ཡོང་མེད་ཀྱི། །ང་ལ་སློབ་དཔོན་འགའ་མེད་དོ། །འཇིག་རྟེན་སངས་རྒྱས་ང་གཅིག་བུ། །ཡང་དག་བྱང་ཆུབ་དམ་པ་ཐོབ། །ཅེས་སོགས་གསུངས་སོ། །དེ་ནས་ཝ་ར་ཎཱ་སིར་བྱོན་ཏེ། དྲང་སྲོང་ལྷུང་བ་རི་དྭགས་ཀྱི་ནགས་ན་ལྔ་སྡེ་རྣམས་འཁོད་པས། དེ་བཞིན་གཤེགས་པ་འབྱོན་པ་རྒྱང་རིང་པོ་ནས་མཐོང་སྟེ། ཕན་ཚུན་ཁྲིམས་སུ་བཅས་པ། གཽ་ཏ་མ། བྱ་བ་མང་པོ། མང་བོས་འཚོ་བ་དེ་འོང་གི དེ་ལ་སྨྲ་བར་མི་བྱ། ལྡང་བར་མི་བྱ། སྟན་བཏིང་བར་མི་བྱའོ། །ཞེས་སོ། །

        དེ་ནས་བཅོམ་ལྡན་འདས་ཁད་ཉེ་བར་བྱོན་པ་ན། གཟི་བརྗིད་མ་བཟོད་པར། ཐམས་ཅད་ལངས་ཤིང་ཕྱག་ཕུལ་ནས། གཅིག་གིས་ནི་གདན་བཤམས། གཅིག་གིས་ནི་བསུས་ཏེ་ན་བཟའ་བླངས། གཅིག་གིས་ནི་ཞབས་བཀྲུ། ཤེས་ལྡན་དག་གཽ་ཏ་མ་བྱོན་པ་ལགས་སོ། །གདན་བཤམས་པ་ལ་བཞུགས་ཤིག་ཅེས་ཟེར་རོ། །བཅོམ་ལྡན་འདས་གདན་བཤམས་པ་ལ་བཞུགས་ནས་ལྔ་སྡེ་རྣམས་མགུ་བར་བྱ་བའི་ཕྱིར་གཏམ་མང་དུ་བྱས་ཏེ། ལྔ་སྡེས། ཚེ་དང་ལྡན་གཽ་ཏ་མ། དབང་པོ་ནི་གསལ། ལྤགས་པ་ནི་ཡོངས་སུ་དག་ན། ཡེ་ཤེས་མཐོང་བའི་ཁྱད་པར་མངོན་དུ་མཛད་དམ། བཀའ་སྩལ་པ། ཁྱེད་དེ་བཞིན་གཤེགས་པའི་མཚན་ནས་རྗོད་པ་དང༌། གདུང་ནས་རྗོད་པ་དང༌། ཚེ་དང་ལྡན་པ་ཞེས་མ་རྗོད་ཅིག དེ་བཞིན་གཤེགས་པའི་མཚན་ནས་རྗོད་པ་སོགས་བྱས་ན་ཡུན་རིང་བོར་གནོད་པ་དང་སྡུག་བསྔལ་བར་འགྱུར་རོ། །དེས་ནི་བདུད་རྩི་ཐོབ་བོ། །སངས་རྒྱས་སོ། །ཐམས་ཅད་མཁྱེན་པའོ། །དགེ་སློང་དག རབ་ཏུ་བྱུང་བས་མཐའ་འདི་གཉིས་ལ་བརྟན་པར་མི་བྱ་སྟེ། འདོད་པ་བསོད་ནམས་ཀྱི་མཐའ་དང༌། ངལ་ཞིང་དུབ་པའི་མཐའོ། དབུ་མའི་ལམ་ལ་བརྟེན་དགོས་ཏེ། དེ་ཡང་འཕགས་པའི་ལམ་ཡན་ལག་བརྒྱད་དོ། །དགེ་སློང་དག སྔོན་མ་ཐོས་པའི་ཆོས་རྣམས་ལ། འདི་ནི་སྡུག་བསྔལ་འཕགས་པའི་བདེན་པའོ་ཞེས་ཚུལ་བཞིན་ཡིད་ལ་བྱེད་པ་ན། མིག་སྐྱེས་སོ། །ཤེས་པ་སྐྱེས་སོ། །རིག་པ་སྐྱེས་སོ། །བློ་སྐྱེས་སོ། །རྟོག་པ་སྐྱེས་སོ། །དེ་བཞིན་དུ། འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང༌། རིག་པ་དང༌། བློ་དང༌། རྟོགས་པ་སྐྱེས་སོ། །དགེ་སློང་དག་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ། ངས་མངོན་པར་ཤེས་པས་ཡོངས་སུ་ཤེས་པར་བྱའོ། །ཞེས་སོགས་དང༌། སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་སྤངས་པར་བྱའོ་སོགས་དང༌། སྡུག་བསྔལ་འགོག་པ་འཕགས་པའི་བདེན་པ་དེ་མངོན་དུ་བྱའོ་སོགས་དང༌། སྡུག་བསྔལ་འགོག་པར་འགྲོ་བའི་ལམ་བསྒོམ་པར་བྱའོ། །ཞེས་སོགས་དང༌། དེ་བཞིན་དུ། སྡུག་བསྔལ་ཡོངས་སུ་ཤེས་སོ། །ཀུན་འབྱུང་སྤངས་སོ། །འགོག་པ་མངོན་དུ་བྱས་སོ། །ལམ་བསྒོམས་སོ་ཞེས་འཕགས་པའི་བདེན་པ་བཞི་ལན་གསུམ་དུ་བཟླས་ཤིང་རྣམ་པ་བཅུ་གཉིས་སུ་སྐོར་ཏོ། །དེའི་ཚེ་ནམ་མཁའ་ནས། ཨ་ལ་ལ་འཛམ་བུའི་གླིང་དུ་ཆོས་ཀྱི་འཁོར་ལོ་སྐོར་བར་མཐོང་ངོ༌། །ལྷ་རྒྱལ། ལྷ་མིན་འགྲིབས། སྐྱེ་བོ་ཐམས་ཅད་བདེའོ། །ཞེས་རབ་ཏུ་དགའ་བའི་ཆེད་དུ་བརྗོད་པའི་དབྱངས་ཀྱིས་ཁྱབ་པར་གྱུར་ཏོ། །དེ་ལྟར་འཕགས་པའི་བདེན་པ་བཞི་ལན་གསུམ་དུ་བཟླས་པ་ལས། དང་པོའི་ཚེ་ཀཽ་ཎྜི་ནྱ་དང་ལྷ་བརྒྱད་ཁྲིས་བདེན་པ་མཐོང༌། བཟླས་པ་གཉིས་པའི་ཚེ་ཀུན་ཤེས་ཀཽ་ཎྜི་ནྱས་དགྲ་བཅོམ་ཐོབ། རྟ་ཐུལ་དང༌། རླངས་པ་དང༌། མིང་ཆེན་དང༌། བཟང་ལྡན་བཞིས་ཀྱང་བདེན་པ་མཐོང་ངོ༌། །དེའི་ཚེ་འཇིག་རྟེན་ན་དགྲ་བཅོམ་པ་གཉིས་ཏེ། བཅོམ་ལྡན་འདས་དང༌། ཀུན་ཤེས་ཀཽ་ཎྜི་ནྱའོ། །བཟླས་པ་གསུམ་པ་བསྐོར་བའི་ཚེ། འཕགས་པ་རྟ་ཐུལ་ལ་སོགས་པ་བཞིས་ཀྱང་དགྲ་བཅོམ་ཐོབ་བོ། །དེའི་ཚེ་དགྲ་བཅོམ་པ་དྲུག་གོ །དེ་ནས་བཅོམ་ལྡན་འདས་ཀྱི་བཀའ་སྩལ་པ། ཀཽ་ཎྜི་ནྱ་ཆེན་པོ་ནི། སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་གོ །ཞེས་ལུང་བསྟན་ཏོ། །

       དེ་ཡང་ལྔ་སྡེ་རྣམས་སྔོན་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས། བསྟན་པ་ནུབ་པའི་ཚེ་གསུངས་པ། ཐུབ་པ་ཆེན་པོ་འོད་སྲུང་གི །གལ་ཏེ་ཆོས་ནི་ནུབ་གྱུར་ཀྱང༌། །ཡང་དག་སངས་རྒྱས་ཀྱིས་བཤད་པའི། །བརྩོན་འགྲུས་དོར་བར་མི་བྱའོ། །བདག་ཅག་གི་ནི་ཟག་པ་ཡང༌། །གལ་ཏེ་ཟད་པར་མ་གྱུར་ན། །ཤཱཀྱ་སེངྒེ་སྐྱོབ་པ་ཡི། །ཉན་ཐོས་མཆོག་ཏུ་འགྱུར་བར་བྱ། །ཞེས་དང༌། ནམ་ཞིག་ན་དགེ་སློང་བཞི་ཡང་འདས་ནས་གཅིག་ལུས་པ་ན། དེ་སྐྱོ་ནས་ད་བདག་གཅིག་བུ་འཛམ་བུ་གླིང་ན་སྣམ་སྦྱར་གྱི་རྒྱལ་མཚན་འཛིན་པ་ལྟ་སྙམ་ནས་སྨོན་ལམ་བཏབ་པ། བདག་གིས་སངས་རྒྱས་འོད་སྲུང་ལས་ཇི་སྲིད་དུ་ཚངས་པར་སྤྱོད་པ་སྤྱད་ཀྱང་ཡོན་ཏན་གྱི་ཚོགས་ཅུང་ཟད་ཀྱང་མ་ཐོབ་ཀྱི། དགེ་བའི་རྩ་བ་འདིས་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་ཐོག་མར་དགྲ་བཅོམ་པ་མངོན་སུམ་དུ་བྱས་པ་ན། བཅོམ་ལྡན་འདས་ཤཱཀྱ་ཐུབ་པས་བདག་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་ལུང་སྟོན་པར་གྱུར་ཅིག་ཅེས་སོ། །དེས་ན་ལྔ་སྡེ་བཟང་པོ་ནི། མཐོང་ལམ་ཐོབ་པའི་ཚེ། བསྙེན་རྫོགས་ཀྱི་སྡོམ་པའང་ཐོབ་པ་སྟེ། ལུང་མ་མོ་ལས། ལྔ་བོ་རྣམས་ཡེ་ཤེས་ཁོང་དུ་ཆུད་པས་དང༌། ཞེས་དང༌། མཛོད་འགྲེལ་ལས། ངེས་པར་འཇུག་པས་ནི་རྟེན་ལྔ་བོ་རྣམས་སོ། །ཞེས་འབྱུང་ལ། ངེས་པ་ནི་མཐོང་ལམ་དང༌། འཇུག་པ་ནི། དེ་རྒྱུད་ལ་སྐྱེས་པའི་དོན་ནོ། །བཟླས་པ་གསུམ་པོ་རེ་རེའི་མཐར་མིག་སྐྱེས་སོ། །ཤེས་པ་དང་རིག་པ་དང་བློ་སྐྱེས་སོ་ཞེས་པ་ནི། རྣམ་གྲངས་བཅུ་གཉིས་དང༌། དེ་བཞི་རིམ་པ་བཞིན་སྦྱོར་བ་དང༌། བར་ཆད་མེད་པ་དང༌། རྣམ་པར་གྲོལ་བ་དང༌། ཁྱད་པར་གྱི་ལམ་སྐྱེས་པར་བསྟན་པར་ཡང་གསུངས་ལ། རྣམ་བཤད་རིགས་པ་ལས་ཟག་པ་མེད་པའི་ཤེས་རབ་ནི་མིག་གོ །ཐེ་ཚོམ་མེད་པའི་ཕྱིར་ཤེས་པའོ། །ཡང་དག་པར་དོན་དུ་འགྱུར་བའི་ཕྱིར་རིག་པའོ། །རྣམ་པར་དག་པའི་ཕྱིར་བློ་སྟེ། ཞེས་དང༌། རྒྱན་སྣང་ལས་ཀྱང་དེ་བཞིན་གསུངས་པས། དེ་ལྟར་ན་ཆོས་ཀྱི་མིག་ནི་མཐོང་ལམ་དང་དེ་ལ་བྱེད་ལས་ཐ་དད་པའི་ལྡོག་ཆ་ནས་གཞན་གསུམ་གྱི་མིང་གིས་ཀྱང་གསུངས་སོ། །དེ་ཡང་བདེན་པ་བཞིའི་ངོ་བོ་དང༌། རབ་དབྱེ་འཕྲོས་དོན་ཡན་ལག་དང་བཅས་པ་ནི། སློབ་དཔོན་འཕགས་པ་ཐོགས་མེད་དང༌། སློབ་དཔོན་དབྱིག་གཉེན་གྱི་གཞུང་མངོན་པ་གཉིས་ལས་རྒྱ་ཆེར་གསུངས་ཤིང༌། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རེག་པར་བྱ་ཞིང་བསྟེན་པར་བྱ། །ཞེས་དཔེ་དང་སྦྱར་ནས་ཀྱང་གསུངས་སོ། །

        ཆོས་ཀྱི་འཁོར་ལོ་བསྐོར་བའི་རྗེས་དེར་ཝ་ར་ཎཱ་སིར་བཀྲ་ཤིས་སྒོ་མང་མཆོད་རྟེན་དབྱིབས་གྲུ་བཞི་བ་བང་རིམ་བཞི་བ་ཅན་གློ་འབུར་དང་བཅས་པ། རབ་སྒོ་བརྒྱ་རྩ་བརྒྱད། འབྲིང་ང་དྲུག ཐ་མ་བཅུ་དྲུག་པར་ཡོངས་གྲགས་སུ་བཞེད་ཅིང༌། ཕྱོགས་རེར་སྒོ་བཞི་རེ་བྱེད་པ་བདེན་པ་བཞི། བརྒྱད་རེ་བྱེད་པ་རྣམ་ཐར་བརྒྱད། བཅུ་གཉིས་སུ་བྱེད་པ་རྟེན་འབྲེལ་བཅུ་གཉིས། བཅུ་དྲུག་ཏུ་བྱེད་པ་སྟོང་ཉིད་བཅུ་དྲུག་མཚོན་པ་འཁོར་ལྔ་སྡེ་བཟང་བོ་སོགས་ཀྱིས་བཞེངས་སོ། །        རྗེ་ཡེ་ཤེས་རྒྱ་མཚོའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་མཛད་ཆེན་རྣམ་པར་ཐར་པ་པདྨ་དཀར་པོའི་ཕྲེང་བ་ལས་བཤུས།

                                                                                                                                                                 རྩོམ་སྒྲིག་པ། མང་ར་བ།
 

              གསལ་འདེབས། 
                     རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
                      དྲ་བའི་སྦྲེལ་ཐགhttp://www.tb1025.cn