དཀའ་བ་སྤྱད་པའི་ཚུལ། 
        དེ་ནས་དཀའ་བ་སྤྱད་པའི་ཚུལ་བསྟན་པ་ནི། བསྟོད་པ་ལས། ཕ་རོལ་ཕྱིན་དྲུག་གྲངས་མེད་གསུམ་གྱི་ཚོགས། །དཔག་མེད་བསྐལ་བའི་སྔོན་ནས་རྫོགས་མཛད་ཀྱང༌། །དཀའ་སྤྱད་ལས་ཀྱིས་རྣམ་གྲོལ་འཐོབ་པོ་ཞེས། །ལོ་དྲུག་དཀའ་བ་སྤྱད་ལ་ཕྱག་འཚལ་ལོ། །ཞེས་སྨྲས་སོ། །དེ་ཡང་མཛོད་ལས། ཀུན་ལ་ཐམས་ཅད་སྙིང་རྗེ་ཡིས། །སྦྱིན་པར་བྱེད་པས་སྦྱིན་པ་རྫོགས། །ཞེས་གསུངས་ལ། འདི་ནི་སྟག་མོ་ལ་ལུས་ཡོངས་སུ་བཏང་བའི་སྐྱེ་རབས་ལས། འཇིག་རྟེན་ཕན་བརྩོན་རྣམས་ལ་བསྟན་པ་དང༌། །བརྩོན་འགྲུས་ཞན་ལ་སྤྲོ་བ་བསྐྱེད་པ་དང༌། །གཏོང་ཕོད་རྣམས་ནི་དགའ་བ་བསྐྱེད་པ་དང༌། །སྐྱེ་བོ་དམ་པའི་ཡིད་ནི་དྲང་བ་དང༌། །བདུད་ཀྱི་སྡེ་ཆེན་དཔའ་ནི་བཀོང་པ་དང༌། །སངས་རྒྱས་ཡོན་ཏན་དགའ་བ་དད་པ་དང༌། །བདག་གི་དོན་བརྩོན་ངོ་ཚ་བསྐྱེད་པ་དང༌། །འཇུངས་དང་འདོད་ཆེན་ཅན་ཡང་ངོ་ཚ་བསྐྱེད། །ཐེག་པ་མཆོག་ལ་བརྟེན་པ་དད་བསྐྱེད་ཅིང༌། །གཏོང་བ་སྙེམས་པ་ངོ་མཚར་བསྐྱེད་པ་དང༌། །གཏོང་ལ་དགའ་བ་རྗེས་སུ་ཡི་རང་རྣམས། །མཐོ་རིས་ལམ་ཆེན་རྣམ་པར་སྦྱང་ཕྱིར་རོ། །ལུས་ཙམ་གྱིས་ཀྱང་གཞན་ལ་ཕན་ཐོགས་པར། །ནམ་ཞིག་འགྱུར་ཞེས་བདག་གིས་གང་བསམ་པ། །སྨོན་ལམ་དེ་ནི་འབྲས་བུ་ཡོད་པར་བྱ། །བྱང་ཆུབ་མཆོག་ཀྱང་རབ་ཏུ་ཉེ་བར་བྱ། །འགྲན་ཕྱིར་མ་ཡིན་གྲགས་པ་འདོད་ཕྱིར་མིན། །མཐོ་རིས་འདོད་དང་རྒྱལ་སྲིད་བསྒྲུབ་ཕྱིར་མིན། །བདག་གི་བདེ་བ་མཆོག་ཐོབ་ཕྱིར་མིན་གྱི། །གཞན་དོན་བསྒྲུབ་ཕྱིར་བདག་ནི་འདི་རྩོམ་མོ། །དེ་བས་བདག་ནི་འདི་ཡིས་དུས་གཅིག་ཏུ། །འཇིག་རྟེན་དག་ལ་སྡུག་བསྔལ་བདེ་འབྱུང་བ། །བསལ་ཞིང་བསྒྲུབ་པ་རྟག་ཏུ་ནུས་གྱུར་ཅིག །ཉི་མས་མུན་བསལ་སྣང་འབྱུང་ནུས་བཞིན་ནོ། །མཐོང་ཞིང་ཐོས་སམ་རྗེས་སུ་དྲན་ཀྱང་རུང༌། །རེག་གམ་གཏམ་དུ་བརྗོད་པར་གྱུར་ཀྱང་རུང༌། །རྣམ་པ་ཀུན་ཏུ་འགྲོ་ལ་ཕན་པ་ནི། །བདེ་དང་ལྡན་པ་རྟག་ཏུ་བྱེད་གྱུར་ཅིག །དེ་ལྟར་གཞན་དོན་བསྒྲུབ་ཕྱིར་ངེས་བྱས་ནས། །སྲོག་དང་བྲལ་ཡང་རབ་ཏུ་དགའ་འགྱུར་ཏེ། །བརྟན་པའི་ལྷ་རྣམས་ངོ་མཚར་སྐྱེ་འགྱུར་པར། །བདག་གི་ལུས་ནི་དེ་ནས་བོར་བར་གྱུར། །ཅེས་དང༌། ཚོང་དཔོན་ཟིལ་གྱིས་མི་གནོན་པའི་སྐྱེས་རབས་ལས། འདོད་པའི་དོན་འབྱོར་ཐེ་ཚོམ་མེད་གྱུར་པས། །དགའ་བ་བསྐྱེད་པའི་ཁྱད་པར་རྒྱུར་གྱུར་པ། །ཕོངས་པ་རྣམས་ཀྱིས་དེ་ནི་མཐོང་བ་བཞིན། །དེས་ཀྱང་ཕོངས་པ་རྣམས་ནི་མཐོང་ན་དགའ། །སློང་བས་བླང་ཞེས་ངེས་པར་སྨྲས་པ་ལ། །དེ་ནི་མེད་ཅེས་སྨྲས་པར་མི་ནུས་ཏེ། །དེ་ཡི་སེམས་ནི་ནོར་ལ་ཆགས་པའི་སྐབས། །སྙིང་རྗེ་ཆེན་པོས་རབ་ཏུ་མེད་པར་བྱས། །ཕོངས་པ་རྣམས་ཀྱིས་དེ་ཡི་ཁྱིམ་ནས་ནི། །ནོར་གྱི་སྙིང་པོ་ཕྱུང་ཡང་རབ་ཏུ་དགའ། །རྒྱུ་རྐྱེན་མེད་པར་མྱུར་དུ་ཆུད་ཟ་བའི། །ནོར་ནི་ཤིན་ཏུ་མི་བཟད་ནོར་མིན་རིགས། །འཇིག་རྟེན་དག་ན་ནོར་ནི་ཕལ་ཆེར་ཡང༌། །ཆགས་པའི་གཞི་དང་ངན་འགྲོའི་གྲོགས་སུ་འགྱུར། །དེ་ཡི་ནོར་ནི་བདག་དང་གཞན་དག་གི །འབྱོར་བ་ཐོབ་པས་དོན་དང་མཐུན་པར་གྱུར། །ཅེས་དང༌། སྤྱན་སྟོང་མངའ་བ་རབ་ཏུ་ཕོངས་གྱུར་ཀྱང༌། །འཕགས་པས་མ་རབས་ཆོས་བྱ་རབ་ཏུ་དཀའ། །གང་ཞིག་ཐོབ་ཕྱིར་སེར་སྣའི་སེམས་འབྱུང་བ། །བརྒྱ་བྱིན་ནོར་ཏེ་བདག་ལ་མེད་ཀྱང་རུང༌། །སློང་བའི་སྡུག་བསྔལ་ཤི་དང་འདྲ་བ་ཡི། །གཉེན་པོའི་ལམ་དུ་འགྲོ་བར་འདོད་པ་ལ། །དེ་ཡིས་ཕོངས་པ་ཡ་རབས་གཟི་བྱིན་ཅན། །སུ་ཞིག་མེད་ཅེས་ཟེར་བའི་སེར་བས་རྡེག །སློང་བས་གདུངས་ནས་ངོ་ཟུམ་གནག་གྱུར་པ། །ཕོངས་པ་རྣམས་ནི་མགུ་བར་མི་འགྱུར་བའི། །ནོར་རམ་རིན་ཆེན་ལྷ་ཡི་རྒྱལ་སྲིད་ཀྱང༌། །དེ་ལྟ་བུ་དག་བདག་ནི་སོགས་སམ་ཅི། །གང་ཞིག་སེར་སྣའི་སྐྱོན་ནི་འཕེལ་འགྱུར་ཞིང༌། །གཏོང་བའི་སེམས་ནི་སྐྱེ་བར་མི་འགྱུར་བ། །བདག་ལྟ་བུ་ཡིས་དེ་ནི་བཏང་བར་རིགས། །ཡོངས་སུ་བཟུང་བར་སྙད་གདགས་ཕོངས་པ་ཡིན། །གློག་ན་འགྱུ་བ་བཞིན་དུ་མི་བརྟན་ནོར། །ཀུན་དང་ཐུན་མོང་ཕོངས་པ་དུ་མའི་རྒྱུ། །བདེ་བ་འབྱུང་བའི་རྒྱུ་ནི་སྦྱིན་ཡིན་ན། །ཡ་རབས་སུ་ཞིག་སེར་སྣའི་ལམ་ལ་བརྟེན། །ཞེས་སོགས་གསུངས་ཏེ། སྦྱིན་པ་རླབས་ཆེན་པོས་ཕོངས་པ་རྣམས་ཚིམ་པར་བྱས་པ་དང༌། རྒྱལ་པོ་བྱམས་པའི་སྟོབས་ཀྱི་སྐྱེས་རབས་ལས། མི་ཤ་ཤིན་ཏུ་དྲོན་མོ་དང༌། །མི་ཡི་ཁྲག་ནི་དྲོན་མོ་དག །བརྟུལ་ཞུགས་མ་ཉམས་པདྨའི་སྤྱན། །གནོད་སྦྱིན་རྣམས་ཀྱི་བཟའ་བཏུང་ལགས། །ཞེས་གནོད་སྦྱིན་ལྔས་སྨྲས་པ་ལ། རྒྱལ་པོས། ཕོངས་ཏེ་སློང་དུ་འོངས་པ་རྣམས་ཀྱི་གདོང༌། །རེ་བ་ཟློག་པས་ངོ་ཟུམ་གནག་གྱུར་པ། །བུ་ཡུག་རླུང་གིས་པདྨ་རྙིངས་པ་བཞིན། །མི་དགའ་བྱས་པ་ནམ་ཡང་བདག་མི་དྲན། །ཞེས་དང༌། རྟག་ཏུ་ན་ཞིང་སྡུག་པའི་རྨ་འདྲ་བ། །ནད་ཀྱི་འབྱུང་ཁུངས་ངན་པའི་ལུས་འདི་ལས། །དགོས་པ་ཁྱད་པར་ཅན་དུ་སྤྱད་པ་ཡིས། །བཅོས་པའི་སྡུག་བསྔལ་ཤིན་ཏུ་བཟང་པོར་བྱ། །བདག་གི་ཤ་ནི་ཁྲག་དང་བཅས་པ་འདི། །འཇིག་རྟེན་རྣམས་ལ་ཕན་པའི་ཕྱིར་བཟུང་སྟེ། །གལ་ཏེ་དེ་རིང་མགྲོན་དུ་བྱར་རུང་ན། །དེ་ནི་བདག་གི་མངོན་པར་མཐོ་བར་འགྱུར། །ཞེས་སོགས་གསུངས་ཏེ། བདག་ཉིད་ཆེན་པོ་རྒྱལ་པོ་དེའི་ཤ་ཁྲག་གིས་གནོད་སྦྱིན་དེ་རྣམས་ཚིམ་པར་བྱས་པ་ལྟ་བུའོ།། 
        ཚུལ་ཁྲིམས་དང་བཟོད་པའི་ཕར་ཕྱིན་རྫོགས་ཚུལ་ནི། མཛོད་ལས། ཆགས་བཅས་ཡན་ལག་བཅད་ཀྱང་ནི། །མི་འཁྲུགས་བཟོད་དང་ཚུལ་ཁྲིམས་ཀྱི། །ཞེས་རྒྱལ་སྲས་བདག་ཉིད་ཆེན་པོ་གང་གི་ཡན་ལག་སོགས་བཅད་ཀྱང་སེམས་ཁོང་ནས་མི་འཁྲུགས་པས། བཟོད་པའི་ཕར་ཕྱིན་དང༌། དེའི་ཚེ་ལུས་ངག་གི་ཉེས་སྤྱོད་ལྷག་པར་སྡོམ་པས་ཚུལ་ཁྲིམས་ཀྱི་ཕར་ཕྱིན་གཉིས་རྫོགས་པར་གསུངས་སོ། །དེ་ཡང་དྲང་སྲོང་བཟོད་པ་སྨྲ་བའི་སྐྱེས་རབས་ལས། དབང་ཕྱུག་རིག་པ་དཀའ་ཐུབ་ཕུན་སུམ་ཚོགས། །སྒྱུ་རྩལ་རྣམས་ལ་གོམས་པ་རྒྱ་ཆེ་བ། །ལུས་དང་ངག་གི་སྤྱོད་པ་མཐུ་རྩལ་ཅན། །མི་རྣམས་མིང་ནི་གཞན་དུ་འདོགས་པར་བྱེད། །དེ་ནི་བཟོད་པའི་ཡོན་ཏན་མཐུ་ཤེས་ནས། །དེ་ཡི་བདག་བཞིན་འཇིག་རྟེན་རབ་ཏུ་བརྒྱན། །བཟོད་པའི་གཏམ་ཡང་རྒྱུན་དུ་བྱེད་པར་གྱུར། །དེ་པས་དེ་ནི་བཟོད་པ་སྨྲ་ཞེས་གྲགས། །བཟོད་པ་ཆེན་པོ་རང་གི་ངང་དུ་གྱུར། །གཞན་ལ་གནོད་པ་མི་བྱེད་རབ་ཏུ་བརྟན། །དེ་ཡི་དོན་དང་མཐུན་པའི་གཏམ་དག་གིས། །ཐུབ་པ་དེ་ཡི་གྲགས་པ་རྒྱས་པར་གྱུར། །ཅེས་དང༌། དམ་པ་ཡོན་ཏན་མཆོག་ལྡན་པ། །གང་ན་གནས་པ་དེ་དག་ཉིད། །བཀྲ་ཤིས་ཡིད་དུ་འོང་བ་དང༌། །དེ་ཉིད་རྟེན་དང་དཀའ་ཐུབ་ཚལ། །ཞེས་གསུངས་པ་ལྟར། བདག་ཉིད་ཆེན་པོ་དེ། ནགས་ཚལ་གྱི་ས་ཕྱོགས་རབ་ཏུ་དབེན་ཞིང་ཉམས་དགའ་བ། མེ་ཏོག་དང་འབྲས་བུ་དག་རྙེད་པར་སླ་བ། མཚོའི་ཆུ་གཙང་མ་པདྨ་དང་ཨུཏྤ་ལས་བརྒྱན་པ། སྐྱེད་མོའི་ཚལ་ཉམས་དགའ་བ་ཞིག་ཏུ་གནས་བཅའ་བས་ཤིན་ཏུ་བཀྲ་ཤིས་པར་བྱས་སོ། །དཔྱིད་ཀྱི་དུས་ལ་བབས་པ་ན། ཡུལ་དེའི་རྒྱལ་པོ་འཐབ་མོ་སྐྱེས་ཞེས་བྱ་བའི་བཙུན་མོ་འཁོར་བཅས་སྐྱེད་མོའི་ཚལ་དེར་རྒྱུ་ཞིང་དོང་དོང་བ་ལས། དྲང་སྲོང་བཟོད་པ་སྨྲ་བའི་དཀའ་ཐུབ་ཀྱི་གནས་སུ་ཕྱིན་ཏོ། །དེ་དག་ལ་དྲང་སྲོང་གིས་ནད་དྲི་བའི་སྐབས་ནས་གླེང་བསླང་སྟེ། ཆོས་ཀྱི་གཏམ་འདི་ལྟར་བྱས་སོ། །མི་ཡི་ལུས་སུ་སྐྱེས་པ་མ་སྨད་ཐོབ་པར་གྱུར། །དེ་བཞིན་དབང་པོ་རྣམས་ཀྱང་མ་ཉམས་བློ་དང་ལྡན། །འོན་ཀྱང་འཆི་བདག་དེ་ནི་ལེགས་པར་མི་བྱེད་དེས། །བག་མེད་གྱུར་པ་དེ་དག་ཉིན་རེས་བསླུས་པར་འགྱུར། །རབ་ཏུ་སྦྱིན་དང་ཚུལ་ཁྲིམས་ལ་སོགས་མ་སྦྱངས་ན། །རིགས་དང་གཟུགས་དང་ལང་ཚོ་ཡོན་ཏན་རྣམས་དང་ནི། །སྟོབས་ནི་རབ་ཏུ་ཆེ་ཞིང་ནོར་གྱིས་ཕྱུག་གྱུར་ཀྱང༌། །ཕྱི་མའི་ཚེ་ལ་སུ་ཡང་བདེ་བ་ཐོབ་མི་འགྱུར། །རིགས་ལ་སོགས་པ་དམན་ཡང་སྡིག་ལ་མ་ཆགས་ཤིང༌། །རབ་ཏུ་སྦྱིན་དང་ཚུལ་ཁྲིམས་ལ་སོགས་ཡོན་ཏན་ལྡན། །དབྱར་གྱི་དུས་སུ་འབབ་ཆུས་རྒྱ་མཚོ་གང་བ་བཞིན། །ཕྱི་མའི་ཚེ་ལ་ངེས་པར་བདེ་བ་རྒྱས་པར་འགྱུར། །རིགས་དང་གཟུགས་དང་ལུས་ཀྱི་ཡོན་ཏན་རྣམས་ཀྱང་རུང༌། །སྟོབས་ནི་རབ་ཏུ་ཆེ་ཞིང་ནོར་གྱིས་ཕྱུག་ཀྱང་རུང༌། །ཡོན་ཏན་ཡོད་ན་ཚེ་འདི་ལ་ཡང་རྒྱན་དུ་འགྱུར། །གསེར་གྱི་ཕྲེང་བས་ཕྱུག་པོའི་མཚན་མ་བསྟན་པ་བཞིན། །མེ་ཏོག་རྣམས་ནི་ལྗོན་པའི་ཤིང་གི་རྒྱན་དུ་འགྱུར། །གློག་ཕྲན་འགྱུ་པ་ཆར་སྤྲིན་རྣམས་ཀྱི་རྒྱན་དུ་འགྱུར། །བུང་བ་མྱོས་པ་འདུ་བའི་པདྨ་རྒྱ་མཚོའི་རྒྱན། །ཡོན་ཏན་ཁྱད་པར་འཕགས་པ་ལུས་ཅན་རྣམས་ཀྱི་རྒྱན། །ནད་མེད་ཚེ་རིང་ནོར་དང་རིགས་དང་གཟུགས་རྣམས་ནི། །རབ་དང་འབྲིང་དང་ཐ་མའི་བྱེ་བྲག་སྣ་ཚོགས་པའི། །སྐྱེ་བོ་འདི་དག་ངོ་བོ་ཉིད་ལས་གྱུར་མ་ཡིན། །གཞན་གྱིས་སྐྱེད་མིན་ལས་ནི་རྣམ་པ་གསུམ་ལས་གྱུར། །འགྲོ་བའི་ཆོས་ཉིད་འདི་ལྟར་ངེས་པར་གནས་པ་དང༌། །སྲོག་ཀྱང་མི་བརྟན་ཤི་དང་ཉེ་བར་ཤེས་ནས་ནི། །དགེ་བའི་ཕྱོགས་ལ་བརྟེན་ནས་སྡིག་པ་སྤང་བར་གྱིས། །གྲགས་པ་བདེ་བ་འཐོབ་པའི་ལམ་ནི་འདི་ཡིན་ནོ། །ཡིད་ལ་ཞེ་སྡང་ཡོད་ན་བདག་དང་གཞན་དག་ལ། །ཕན་པར་འགྱུར་བ་མེ་བཞིན་རབ་ཏུ་སྲེག་པར་བྱེད། །དེ་བས་སྐྱེ་བོ་སྡིག་ལ་འཛེམ་པ་དེ་དག་གིས། །གཉེན་པོ་རྣམས་ལ་བརྟེན་ནས་སྡིག་པ་སྤང་བར་བྱ། །དགོན་པའི་མེ་ནི་རབ་ཏུ་འབར་བར་འགྱུར་བ་ཡང༌། །ཆུ་ཀླུང་ཆེན་པོ་མཐའ་ཀླས་འབབ་དང་ཕྲད་གྱུར་ན། །ཇི་ལྟར་རབ་ཏུ་ཞི་བར་འགྱུར་བ་དེ་བཞིན་དུ། །ཡིད་ཀྱིས་གདུངས་པའང་བཟོད་ལ་བརྟེན་ན་ཞི་བར་འགྱུར། །དེ་བས་དེ་རྒྱུ་ཟིལ་གྱིས་མནན་པས་བཟོད་པས་སྡིག་པ་སྤོང༌། །དེ་ཕྱིར་བྱམས་ལ་བརྟེན་པའི་སྟོབས་ཀྱིས་དགྲ་ཡང་འཕེལ་མི་འགྱུར། །དེ་ལས་དགའ་ཞིང་མཆོད་འོས་བདེ་བའི་སྐལ་དང་ལྡན་པར་འགྱུར། །བསོད་ནམས་བྱས་པའི་ཡོན་གྱིས་ཐ་མར་མཐོ་རིས་འགྲོ་བར་འགྱུར། །ཞེས་སོགས་གསུངས་སོ། །

        དེ་ནས་ཡུལ་དེའི་རྒྱལ་པོ། བཙུན་མོ་དག་གི་རྗེས་སྙེགས་ཤིང་སོང་བ་ལས། དྲང་སྲོང་བཟོད་པ་སྨྲ་བ་དེ་བཙུན་མོའི་འཁོར་གྱིས་བསྐོར་ཞིང་འདུག་པ་མཐོང་ནས། འདོད་ཆགས་དང་ཕྲག་དོག་གིས་སེམས་རབ་ཏུ་འཁྲུགས་པར་གྱུར་ཏོ། །བཙུན་མོ་དག་གིས་སྨྲས་པ། འདི་ནི་བཅོམ་ལྡན་བཟོད་པ་སྨྲ་བ་ལགས་ཀྱིས། ལྷ། དེ་ལྟ་བུའི་ཐུབ་ཆོད་ཆེན་པོ་མ་མཛད་ཅིག ཅེས་པས། རྒྱལ་པོ་དེས། འདི་ནི་བཟོད་པ་སྨྲ་ཞེས་ཟེར། །དེ་ཡང་ཉམས་སུ་ཡོང་མི་ལེན། །འདི་ལྟར་བུད་མེད་བསྟེན་པ་ཡིས། །སྲེད་པ་འདིས་ནི་བཟོད་མ་གྱུར། །ཚིག་ཏུ་གཞན་སྨྲ་ལུས་ཀྱི་སྤྱོད་པ་གཞན། །བསམ་པ་གདུག་ཅིང་ཡིད་ལ་གཞན་དུ་སེམས། །དཀའ་ཐུབ་ནགས་ན་མ་ཞི་འདི་སུ་ཞིག །འབྲིད་པའི་ཚུལ་ཅན་ཕྱི་ཚུལ་འཆོས་ཤིང་འདུག །ཅེས་སོགས་མ་རུང་བའི་ཚིག་རྩུབ་མོ་དག་སྨྲས་ཏེ། དྲང་སྲོང་ཆེན་པོ་དེའི་ལག་པ་ཡ་གཅིག་དང༌། དཔུང་བ་གཉིས་དང༌། རྣ་བ་དང༌། སྣ་དང༌། རྐང་པ་གཉིས་ཀྱང་དེ་བཞིན་དུ་བཅད་དོ། །དེ་ཡི་ལུས་བཅད་འགྱེལ་བར་གྱུར་ན་ཡང༌། །ལུས་ཀྱི་ཁོག་པ་གནས་པའི་མཐའ་ཤེས་ཤིང༌། །སྐྱེ་བོ་རྣམས་ལ་བཟོད་པ་གོམས་གྱུར་པས། །ཐུབ་པ་མཆོག་དེ་མ་འཁྲུགས་མྱ་ངན་མེད། །ལུས་ནི་བཅད་པར་གྱུར་ཀྱང་དེ་ཡི་སེམས། །དགེ་བའི་ཚུལ་བལྟས་བཟོད་པ་བརྟན་མ་ཉམས། །དགའ་བའི་ཚུལ་གྱིས་སྡུག་བསྔལ་ཡོད་མ་གྱུར། །རྒྱལ་པོའི་ཆོས་ཉམས་མཐོང་ནས་མི་དགའ་གྱུར། །སོ་སོར་བརྟགས་བཟོད་སྙིང་རྗེ་ཅན། །གཞན་གྱི་སྡུག་བསྔལ་མི་བཟོད་པ། །བདག་གི་སྡུག་བསྔལ་ཆེན་པོ་ཡང༌། །དེ་ཙམ་དུ་ནི་གནོད་མི་འགྱུར། །རྒྱལ་པོ་དེ་ཡིས་མི་བཟད་ལས་བྱས་པས། །དེ་མ་ཐག་ཏུ་རིམས་ནད་མེ་བཞིན་འབར། །ནགས་ཚལ་ཉེ་བའི་གནས་ནས་མཐར་མ་བྱུང༌། །ས་གས་ནང་དུ་དེ་མ་ཐག་ཏུ་སོང༌། །ཞེས་དང༌། དྲང་སྲོང་གིས་སྨྲས་པ། བདག་ནི་ནགས་ན་གནས་པ་ལ། །ཉེས་པ་མེད་པར་རལ་གྲི་ཡིས། །ལག་པ་དང་ནི་རྐང་པ་དང༌། །སྣ་དང་རྣ་བ་བཅད་གྱུར་ཀྱང༌། །བདག་ལྟ་བུ་ཡིས་ཇི་ལྟར་ན། །དེ་ལ་གནོད་པ་བསལ་བར་བྱ། །རྒྱལ་པོ་དེ་ནི་ཚེ་རིང་གྱུར། །དེ་ལ་སྡིག་ཏུ་མ་གྱུར་ཅིག །འཆི་དང་ན་བའི་སྡུག་བསྔལ་ཅན། །འདོད་ཆགས་ཞེ་སྡང་དབང་དུ་གྱུར། །ཉེས་པར་སྤྱད་པས་ཚིག་པ་ལ། །མྱ་ངན་བྱེད་མོད་ག་ལ་ཁྲོ། །ཞེས་དང༌། ནགས་ན་གནས་ཤིང་རབ་ཏུ་བྱུང་བར་ཤེས། །བཟོད་པ་སྨྲ་བ་རིང་པོ་མི་ཐོགས་འཆི། །ཅི་ཕྱིར་མི་བཟོད་སྐབས་ནི་འབྱེད་པར་བྱེད། །དེ་བས་མ་འཇིགས་ཁྱེད་ཅག་བདེ་བར་དེངས། །དེ་ལྟར་ཐུབ་པ་མཆོག་གི་རྗེས་བསྟན་པས། །སློབ་མ་ཉིད་དུ་ལེགས་པར་གྱུར་པར་བྱས། །བཟོད་ལ་གནས་པས་བརྟན་པ་མ་ཉམས་པར། །བཟོད་པའི་མཐུ་ཡིས་མཐོ་རིས་སོང་བར་གྱུར། །ཅེས་སོགས་གསུངས་པ་ལྟར་རོ། །སྐར་རྒྱལ་བསྟོད་པས་བརྩོན་འགྲུས་ཀྱི། །ཞེས་པ་ནི་སྔར་བཤད་པ་ལྟར་ལ། དེ་མ་ཐག་ལ་ཏིང་འཛིན་བློ། །ཞེས་རྡོ་རྗེ་ལྟ་བུའི་ཏིང་ངེ་འཛིན་གྱི་ཚེ་ཕར་ཕྱིན་ཐ་མ་གཉིས་རྫོགས་པར་གསུངས་པ་ནི། གྲུབ་མཐའི་འདོད་པ་ཡིན་ཞིང༌། དེ་གཉིས་སྔོན་ཇི་ལྟར་རྫོགས་པའི་ཚུལ་ནི། བསྟན་འབར་མའི་མདོ་ལས་འབྱུང་བ་ལྟར་དང༌། མདོ་གཞན་ལས་ཀྱང༌། བྲམ་ཟེ་རབ་འབར་གྱུར་པ་ན། །རལ་བ་འདབ་ཆགས་ཚིང་བྱས་ཀྱང༌། །བསམ་གཏན་ལས་ནི་མ་གཡོས་པར། །བསམ་གཏན་ཕ་རོལ་ཕྱིན་པ་རྫོགས། །ཞེས་དང༌། སྨན་ཆེན་བློན་པོར་གྱུར་པ་དང༌། །གནག་ལྷས་སྐྱེས་བུར་ང་གྱུར་ཚེ། །ཤེས་རབ་ཕ་རོལ་ཕྱིན་པ་རྫོགས། །དེའི་ཚེ་རྔ་བོ་ཆེ་ཡང་བསྒྲགས། །ཞེས་སོགས་གསུངས་སོ། །དེ་ལྟར་ན་བསྐལ་བ་ཆེན་པོ་གྲངས་མེད་པ་གསུམ་གྱི་ཚོགས་དང༌། ཕ་རོལ་ཏུ་ཕྱིན་པ་དྲུག་སོགས་བསྐལ་བ་དཔག་ཏུ་མེད་པའི་སྔ་རོལ་ནས་རྫོགས་ཟིན་ཀྱང༌། །གདུལ་བྱ་འདུལ་བའི་ཐབས་ལ་མཁས་པའི་དབང་གིས་དཀའ་བ་སྤྱད་པའི་ཚུལ་ཡང་མཛད་པ་ཡིན་ཏེ། ཇི་སྐད་དུ། སློབ་དཔོན་དཔའ་བོས། དཀའ་སྤྱད་ལས་ནི་མ་བགྱིད་པར། །གོ་འཕང་རྙེད་དཀའ་མི་འཐོབ་ཅེས། །དེ་སླད་ཉིད་ལའང་མ་གཟིགས་པར། ཁྱོད་ཀྱིས་བརྩོན་འགྲུས་ལེགས་པར་སྤེལ། །ཞེས་གསུངས་པ་ལྟར། གྲོང་ཁྱེར་སེར་སྐྱའི་ཤར་ཕྱོགས་དཔག་ཚད་བཅུ་གཉིས་འདས་པ། ཡངས་པ་ཅན་གྱི་མཆོད་རྟེན་རྣམ་དག་གི་གནས་དེར་ཅུང་ཟད་བཞུགས་ནས། གྲོང་ཁྱེར་སེར་སྐྱ་དང་ཐག་ཉེ་དྲགས་སོ་སྙམ་དུ་དགོངས་ནས། མཐར་གྱིས་རྒྱལ་པོའི་ཁབ་ཏུ་བྱོན་ནས་བསོད་སྙོམས་མཛད་དེ། རི་དྲུང་གི་ཤིང་པ་ཊ་ལའི་སྡོང་བོའི་དྲུང་ན་བཞུགས་སོ། །

        དེའི་ཚེ་རྒྱལ་པོ་གཟུགས་ཅན་སྙིང་པོ་འཁོར་དང་བཅས་པ་བྱང་ཆུབ་སེམས་དཔའི་དྲུང་དུ་བྱོན། རྒྱལ་པོ་ན་རེ། གཞོན་ནུ་ལང་ཚོ་དང་པོ་ལ་བསོད་སྙོམས་སྤྱོད་པ་མི་མཛེས་ཀྱི། བདག་གིས་འདོད་པའི་ཡོན་ཏན་ཐམས་ཅད་འབུལ་བར་བགྱི་སྟེ། ཉིད་ཀྱི་རིགས་རུས་སོགས་ཇི་ལྟར་ཡིན་ཞེས་དྲིས་པའི་ལན་དུ། བཀའ་སྩལ་པ། རྒྱལ་པོ་གངས་རི་ཉེ་བ་ན། །ཡུལ་གྱི་ལྗོངས་ནི་འབྲུ་དག་དང༌། །ནོར་རྣམས་ཀྱིས་ནི་གང་བ་ཡི། །གོ་ས་ལ་ཞེས་གྲགས་པ་ཡོད། །བུ་རམ་ཤིང་བ་ཉི་མའི་རུས། །ཤཱཀྱ་དག་ནི་དེ་ན་གནས། །རྒྱལ་པོ་ང་ནི་རྒྱལ་རིགས་ཏེ། །ང་ནི་འདོད་པ་དོན་མི་གཉེར། །ཞེས་དང༌། རྒྱལ་པོ་ང་ནི་སྐྱེས་མ་ཐག་ཏུ་ཡང༌། །འདོད་པ་རྣམས་ལ་མི་དགའི་བློ་བསྐྱེད་ན། །འཇིགས་བྱེད་ཆོས་ཀྱི་དགྲ་བོར་གྱུར་པ་དག །བོར་བ་དེ་ཀོ་སླར་ཡང་ཇི་ལྟར་བླང༌། །ཞེས་སོགས་གསུངས་སོ། །

        དེ་ནས་བྱ་རྒོད་ཕུང་པོའི་རི་དང་ཉེ་བའི་དྲང་སྲོང་སྣ་ཚོགས་པའི་བསྟི་གནས་སུ་གཤེགས་ཏེ། དྲང་སྲོང་རྣམས་མེ་ལྔས་གདུང་བ་དང༌། རྐང་པ་ཡ་གཅིག་འགྲེང་བ་སོགས་དཀའ་ཐུབ་ཇི་ཙམ་སྤྱོད་པ་དེ། བྱང་ཆུབ་སེམས་དཔས་ཉིས་འགྱུར་ཉིས་འགྱུར་དུ་སྤྱད་དོ། །དེའི་ཚེ་དགེ་སྦྱོང་ཆེན་པོ་དང༌། དྲང་སྲོང་ཆེན་པོ་ཞེས་མཚན་དུ་གྲགས་སོ། །དེ་ནས་དྲང་སྲོང་དེ་རྣམས་མཐོ་རིས་ཙམ་དོན་དུ་གཉེར་བ་མཁྱེན་ནས། ལམ་འདི་ནི་སླར་ཡང་ལྷུང་བ་ལོག་པར་ཞུགས་པའོ་སྙམ་དུ་དགོངས་སོ། །

        དེ་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་བའི་བསྟི་གནས་སུ་གཤེགས་ཏེ། རིང་འཕུར་ལས། ཅི་ཡང་མེད་པའི་སྐྱེ་མཆེད་ཀྱི་བར་ཚུན་ཆོད་ཀྱི་གདམས་ངག་ཞུས་ཏེ། དེ་ནི་མཚན་མོ་དེ་ཉིད་ལ་ཐོབ་པར་མཛད་ནས། ནང་བར་རིང་འཕུར་ལ། ཁྱོད་ཀྱིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་འདི་ཁོ་ན་མངོན་དུ་བྱས་སམ། གསོལ་བ། དེ་ཁོ་ནའོ། །བཀའ་སྩལ་པ། དེ་ལྟར་ན་ངས་ཀྱང་དེ་མངོན་དུ་བྱས་སོ། །ཞེས་གསུངས་སོ། །དེ་ནས་བྱང་ཆུབ་སེམས་དཔས་ལམ་འདི་ཙམ་གྱིས་ནི། རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམདུ་དགོངས་ཏེ། རེངས་བྱེད་ཀྱི་བུ་ལྷག་སྤྱོད་ཀྱི་གནས་སུ་གཤེགས་སོ། །དེའི་དྲུང་དུ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཅེས་བྱ་བ་སྲིད་རྩེའི་ཏིང་ངེ་འཛིན་ནུབ་གཅིག་ལ་ཐོབ་པར་མཛད་དོ། །དེ་ནས་ལྷག་སྤྱོད་ཀྱི་གནས་ནས་ཕྱིར་བྱུང་སྟེ་གཞན་དུ་གཤེགས་སོ། །དེའི་ཚེ་རྒྱལ་པོ་ཟས་གཙང་མས། བྱང་ཆུབ་སེམས་དཔའ་གཅིག་པུར་འཁྱམས་ཤིང་འདུག་གོ་ཞེས་ཐོས་ནས། རིམ་གྲོ་བྱེད་པའི་མི་སུམ་བརྒྱ་བཏང་ཞིང༌། རྒྱལ་པོ་ལེགས་པར་རབ་སད་ཀྱིས་ཀྱང་མི་ཉིས་བརྒྱ་བཏང་ངོ༌། །དེ་ནས་འཁོར་ལྔ་བརྒྱ་དང་བཅས་ནགས་སུ་རྒྱུ་བ་ན། སྐྱེ་བོ་མང་པོ་དང་ལྷན་ཅིག་གནས་པས་བདུད་རྩི་མི་ཐོབ་པར་མཁྱེན་ནས། ཡབ་ཀྱི་ཕྱོགས་ནས་ཀཽཎྜིནྱ་དང༌། རྟ་ཐུལ་དང༌། རླངས་པ་སྟེ་གསུམ་དང༌། ཡུམ་གྱི་ཕྱོགས་ནས་མིང་ཆེན་དང༌། བཟང་པོ་གཉིས་ཁྲིད། ལྷག་མ་རྣམས་ཕྱིར་བཀྱེ་སྟེ། ལྔ་སྡེ་རྣམས་དྲང་སྲོང་གི་ཆ་བྱད་དུ་བསྒྱུར་བ་དང་ལྷན་ཅིག་གྲོང་ཁྱེར་ག་ཡའི་ལྷོ་ཕྱོགས་ལྟེང་རྒྱས་ཀྱི་གྲོང་རྡལ་རྒྱུ་ཞིང་གཤེགས་ནས། ཆུ་བོ་ནཻ་ར་ཉྫ་ནའི་འགྲམ། ནེའུ་སིང་ཡིད་དུ་འོང་བ་མཐའ་ནགས་ཚང་ཚིང་དང༌། ཤིང་སྣ་ཚོགས་ཀྱིས་བརྒྱན་པ་ཞིག་གཟིགས་ནས། ནགས་ཁྲོད་འདིར་བདག་གནས་ལ་སྤོང་བ་བྱའོ་སྙམ་དུ་དགོངས་ནས་ཤིང་དྲུང་ཞིག་ཏུ་བཞུགས་སོ། །

        དེ་ནས་སྙིགས་མ་ལྔའི་དུས་དམན་པ་ལ་མོས་པ། བརྟུལ་ཞུགས་ངན་པས་དག་པར་འཛིན་པ་སུན་དབྱུང་བའི་ཕྱིར། དཀའ་ཐུབ་བརྩམ་མོ་སྙམ་སྟེ། ལོ་དྲུག་མཁའ་ཁྱབ་ཀྱི་ཏིང་ངེ་འཛིན་ལ་མཉམ་པར་བཞག་སྟེ། ཏིལ་འབྲུ་གཅིག་ལ་སོགས་པ་གསོལ་བས་དཀའ་བ་སྤྱད་དོ། །དེའི་ཚེ་ལྷ་མོ་སྒྱུ་འཕྲུལ་མའི་སྐྱེས་པ་སུམ་ཅུ་རྩ་གསུམ་པའི་ལྷ་དེས། གཞོན་ནུས་དཀའ་ཐུབ་དྲག་པོ་སྤྱད་པ་ཐོས་ནས་དེར་འོངས་པ་དང༌། བྱང་ཆུབ་སེམས་དཔའི་སྐུ་ལུས་སྐེམས་པ་སོགས་མཐོང་བས། ལུམ་བིའི་ཚལ་དུ་བུ་བཙས་ཚེ། །སྐྱེ་བའི་ཐ་མ་ཡིན་ཞེས་དང༌། །དྲང་སྲོང་ནག་པོས་སངས་རྒྱས་སུ། །ལུང་བསྟན་པ་ཡང་ཉམས་འགྱུར་ཞིང༌། །ཞེས་སོགས་མི་སྲིད་པ་དང་མི་རིགས་པར་གསོལ་བ་ལ། བྱང་ཆུབ་སེམས་དཔས་སྨྲས་པ། ཉི་ཟླ་སྐར་ཚོགས་ས་ལ་ལྷུང་འགྱུར་སྲིད། །སོ་སོ་སྐྱེ་བོ་ཡིན་ཡང་ང་མི་འཆི། །དེའི་ཕྱིར་འདི་ལ་མྱ་ངན་ཁྱོད་མ་བྱེད། །རིང་བོར་མི་ཐོགས་བྱང་ཆུབ་སངས་རྒྱས་མཐོང༌། །ཞེས་གསུངས་པས་དགའ་སྟེ་རང་གནས་སུ་སོང་ངོ༌། །དེ་ལྟར་དཀའ་བ་སྤྱད་དེ་ལོ་དྲུག་འདས་ནས། འདི་སྙམ་དུ་ད་ལྟར་གང་སུ་དག་སྡུག་བསྔལ་སྤོང་བར་འདོད་པ་ཐམས་ཅད་ནི། འདི་ཙམ་དུ་ཟད་དེ། ལུས་རིད་ཅིང་ཉམས་ཆུང་བས་བྱང་ཆུབ་དེ་ཡང་བསྐྱེད་པར་མི་ནུས་སོ། །དེས་ན་ལུས་མདངས་སྟོབས་དང་ལྡན་པར་བྱའོ་དགོངས་ནས་དབུགས་འབྱུང་རྔུབ་ཅི་བདེར་མཛད་ཅིང༌། འབྲས་ཆེན་སོགས་ཁམ་ཟས་རགས་པ་ཡང་གསོལ། ཏིལ་མར་གྱིས་བྱུགས་ཤིང་ཆུ་འཇམ་པོས་ཁྲུས་ཀྱང་མཛད་དོ། །དེའི་ཚེ་རིམ་གྲོ་བ་ལྔ་བོ་མ་དད་པར་གྱུར་ཏེ། ཤེས་ལྡན་དག་དགེ་སྦྱོང་གཽ་ཏ་མ་ནི། སྤོང་བ་ལས་ཉམས་པ་ཡིན་ཏེ། ད་ནི་འདིས་ཅུང་ཟད་ཀྱང་འཐོབ་པར་མི་ནུས་སོ་ཞེས་བྱང་ཆུབ་སེམས་དཔའ་བོར་ནས་ཝ་ར་ཎ་སིར་སོང་ཞིང༌། དེ་རྣམས་ལ་ལྔ་སྡེ་ཞེས་གྲགས་སོ། །

        དེ་ནས་བྱང་ཆུབ་སེམས་དཔའ་རིམ་གྱིས་སྐུའི་མཐུ་བསྐྱེད་ནས་སྡེ་ཅན་གྱི་གྲོང་དུ་གཤེགས་སོ། །ཡུལ་དེར་དཔོན་པོ་སྡེ་ཅན་ཞེས་བྱ་བ་ལ། བུ་མོ་དགའ་མོ་དང༌། དགའ་སྟོབས་མ་ཞེས་བྱ་བ་གཉིས་ཡོད་དོ། །དེ་གཉིས་བུད་མེད་རིན་པོ་ཆེ་ལྟར་ཕུན་སུམ་ཚོགས་ཤིང༌། ཚུལ་ཁྲིམས་དང་བརྟུལ་ཞུགས་བླངས་ནས་དུས་དེར་ལོ་བཅུ་གཉིས་ཀྱང་རྫོགས་པས། དེ་གཉིས་ཀྱིས་བ་མཆོག་སྟོང་ཡོད་པ་རྣམས་བཞོས་ཏེ། བ་སྟོང་བོ་དེ་ཉིད་ལ་བླུད་དོ། །དེ་རྣམས་བཞོས་ནས་ལྔ་བརྒྱ་ལ་བླུད་དོ། །དེ་བཞིན་དུ་ཉིས་བརྒྱ་ལྔ་བཅུ་དང༌། བརྒྱ་ཉེར་ལྔ་དང༌། དྲུག་ཅུ་རྩ་གསུམ་དང༌། སུམ་ཅུ་རྩ་གཉིས་དང༌། བཅུ་དྲུག་དང༌། བརྒྱད་དེ་ལན་བཅུ་དྲུག་ཉིད་ཁུར་བྱས་པའི་འོ་མ་རྣམས་ཤེལ་སྣོད་དུ་བསྐོལ་བའི་ཚེ། གནས་གཙང་མའི་ལྷ་རྣམས་ཀྱིས། མོད་ལ་མཐུ་བསྐྱེད་པ་ཞེས་བྱ་བའི་སྨན་བླུགས་སོ། །འོ་མ་བསྐོལ་བ་དེའི་སྟེང་དུ་བཀྲ་ཤིས་དང༌། གཡུང་དྲུང་འཁྱིལ་བ་ལ་སོགས་དགེ་བའི་མཚན་མ་དུ་མ་བྱུང་ངོ༌། །དེ་ནས་བུ་མོ་དེ་གཉིས་བྱང་ཆུབ་སེམས་དཔའི་དྲུང་དུ་ཆས་སོ། །དེའི་ཚེ་བྱང་ཆུབ་སེམས་དཔའ་ཆུ་ཀླུང་ནཻ་ར་ཉྫ་ནར་སྐུ་ཁྲུས་མཛད་ཅིང༌། ཤིང་ཨ་རྫུ་ནའི་ཡལ་ག་ལ་ཕྱག་གིས་འཇུས་ཏེ་བཞེངས་ནས། ཆོས་གོས་གསོལ་ཏེ་ཆུ་འགྲམ་ན་བཞུགས་སོ། །དེར་བུ་མོ་དེ་གཉིས་ཀྱིས་འོ་ཐུག་ཕུལ་བ་བཞེས་ཏེ། བཀའ་སྩལ་པ། ཡོལ་གོ་འདི་ཡང་བཏང་བ་ཡིན་ནམ། གསོལ་བ། བཏང་བ་ལགས་སོ། །དེ་ནས་བྱང་ཆུབ་སེམས་དཔའ་འོ་ཐུག་གསོལ་ནས། གསེར་གྱི་ཡོལ་གོ་ཆུ་ཀླུང་དེར་བོར་བ་ཀླུ་རྣམས་ཀྱིས་བླངས་སོ། །དེར་བརྒྱ་བྱིན་མཁའ་ལྡིང་གི་ཆ་བྱད་དུ་སྤྲུལ་ནས་ཀླུ་ལས་ཡོལ་གོ་ཕྲོགས་ཏེ། སུམ་ཅུ་རྩ་གསུམ་དུ་ཁྱེར་ནས་མཆོད་པ་ཆེན་པོ་བཙུགས་སོ། །དེ་ལྟར་འོ་ཐུག་མཆོག་དེ་གསོལ་བ་ཙམ་གྱིས་སྐུ་ཉམས་སྟོབས་དང་ལྡན་ཞིང༌། སྐུ་ལུས་ཀྱི་མདངས་སོགས་སྔོན་བཞིན་དུ་གྱུར་ཏོ།། 

             རྗེ་ཡེ་ཤེས་རྒྱ་མཚོའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་མཛད་ཆེན་རྣམ་པར་ཐར་པ་པདྨ་དཀར་པོའི་ཕྲེང་བ་ལས་བཤུས།

                                                                  རྩོམ་སྒྲིག་པ། མང་ར་བ།
      གསལ་འདེབས། 
            རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ། 
            དྲ་བའི་སྦྲེལ་ཐགhttp://www.tb1025.cn