སྐུ་བལྟམས་པའི་ཚུལ། 
        དེ་ལྟར་ལྷུམས་སུ་ཟླ་བ་བཅུ་ལོན་ཏེ། ལྗོན་ཤིང་དང་མེ་ཏོག་ཐམས་ཅད་ནི་རབ་ཏུ་རྒྱས། བྱ་རྣམས་ནི་དགའ་བས་སྐད་འབྱིན། ཤིང་ས་ཧ་ཀ་རའི་འབྲས་བུ་ཡང་སྨིན་ཅིང་དུད་པར་གྱུར། དཔྱིད་ཟླ་ཐ་ཆུང་གི་ཡར་ངོ་ལ་བབ་པ་ན། ལྷ་མོ་སྒྱུ་འཕྲུལ་ཆེན་མོས་བསམ་པ་བདག་ལྷས་བསྟན་གྱི་སྐྱེད་མོས་ཚལ་དུ་འདུག་པར་བྱའོ་སྙམ། དེ་ལྟར་རྒྱལ་པོ་ལ་ཞུས་པས་རྒྱལ་པོས་ས་ཀྱང་གནང་སྟེ། གྲོང་ཁྱེར་ལྷས་བསྟན་དང་ཉེ་བའི་ལུམ་པིའི་ཚལ་དུ་འབྱོན་པར་ཆས་ནས། རིན་པོ་ཆེ་སྣ་བཞིའི་ཁྱོགས་བཤམས་པ་ལ་བཞུགས་ཤིང༌། གཡོག་མོ་དུ་མས་ཡོངས་སུ་བསྐོར། རྒྱལ་པོ་ཟས་གཙང་མ་ཡང་དཔུང་ཚོགས་ཡན་ལག་བཞི་དང་བཅས་པ། སེར་སྐྱ་གཞིའི་གྲོང་ཁྱེར་ནས་འཕགས་ཏེ། ལུམ་པི་ནི་ཡི་སྐྱེད་ཚལ་དུ་ཕེབས་སོ། །ཡུམ་གྱིས་ཕྱོགས་ཀུན་ཏུ་གཟིགས་པས། ཤིང་མྱ་ངན་འཚང་མེ་ཏོག་རབ་ཏུ་རྒྱས་པ་ཞིག་གཟིགས་ཏེ། དེའི་ཡལ་ག་ལ་ཕྱག་གཡས་པས་བཟུང་སྟེ་བལྟམས་པར་འདོད་པ་ན། བརྒྱ་བྱིན་གྱིས་བདག་ཉིད་མ་མ་རྒན་མོའི་ཆ་བྱད་དུ་སྤྲུལ་ནས་མདུན་དུ་བསྡད་དོ། །དེ་ནས་བྱང་ཆུབ་སེམས་དཔའ་ཡུམ་ལ་གནོད་པ་མེད་པར་གོས་དང་བཅས་པར་ཡུམ་གྱི་དཀུ་གཡས་པ་བརྟོལ་ཏེ་བྱོན་པ་ནི། དཔེར་ན། སྐྱེས་བུ་ཞིག་སྒོ་ཕྱེ་སྟེ་ཕྱི་རོལ་དུ་ཐོན་ནས་ཡང་སྒོ་བཅད་པ་བཞིན། བལྟམས་ཟིན་པ་ན་རྨའི་སྒོ་མངོན་པ་ཅུང་ཟད་ཀྱང་མེད་དོ། །

        དེ་ལྟར་སྐུ་བལྟམས་མ་ཐག་ཏུ་ས་ཆེན་པོ་ནི་རྣམ་པ་དྲུག་ཏུ་གཡོས། འོད་ཀྱི་སྣང་བ་ཆེན་པོས་ནི་འཇིག་རྟེན་གྱི་ཁམས་ཐམས་ཅད་ཁྱབ་པར་གྱུར་ཏོ། །དེ་མ་ཐག་ཏུ་ཕྱོགས་བཞིར་གོམ་པ་བདུན་བདུན་བོར་བར་མཛད་དེ། འདི་སྐད་ཅེས། འདི་ནི་ཤར་ཕྱོགས་ཡིན་ཏེ། མྱ་ངན་ལས་འདས་པའི་ཐོག་མར་འགྲོ་བར་བྱའོ། །འདི་ནི་ལྷོ་ཕྱོགས་ཡིན་ཏེ། འགྲོ་བ་ཐམས་ཅད་ཀྱི་ཡོན་གནས་སུ་འགྱུར་བར་བྱའོ། །འདི་ནི་ནུབ་ཕྱོགས་ཡིན་ཏེ། ང་ཡི་སྐྱེ་བའི་ཐ་མ་ཡིན་ནོ། །འདི་ནི་བྱང་ཕྱོགས་ཡིན་ཏེ། སྲིད་པའི་རྒྱ་མཚོ་ལས་བརྒལ་བར་བྱའོ་ཞེས་སོགས་གསུངས་སོ། །དེའི་ཚེ་ནམ་མཁའ་ནས་ཚངས་པ་དང་བརྒྱ་བྱིན་དང་འཇིག་རྟེན་སྐྱོང་བ་ལ་སོགས་པ་དང༌། ཀླུ་དགའ་བོ་དང་ཉེ་དགའ། གཞན་ཡང་ལྷའི་བུ་མང་པོས་སྐུ་ཁྲུས་གསོལ་ཞིང༌། མེ་ཏོག་འཐོར། གདུགས་དཀར་དང་བ་དན་དང་རྔ་ཡབ་སོགས་ཀྱང་ལྷའི་བུ་རྣམས་ཀྱིས་སྟེང་ཕྱོགས་སུ་འཛིན། རོལ་མོའི་སྒྲ་ཡང་བསྒྲགས་སོ། །

        དེ་ལྟར་སྐུ་བལྟམས་པར་གྱུར་བའི་འོད་ཟེར་ཏེ། རི་བོ་ཀུན་འཛིན་གྱི་ཕུག་པ་ན། དྲང་སྲོང་ཉོན་མོངས་མེད་རང་གི་ཚ་བོ་མེས་བྱིན་དང་ལྷན་ཅིག་བསམ་གཏན་བྱེད་པས། ཕུག་པ་དེ་སྣང་བའི་ཁྱབ་པ་མཐོང་སྟེ། མེས་བྱིན་གྱིས། འདི་ནི་ཉི་མ་ཐམས་ཅད་དག །ཅིག་ཆར་ཤར་བར་གྱུར་ཏམ་ཅི། །འདི་ལྟར་རི་ནི་ཕུག་བཅས་པ། །འོད་གཅིག་གིས་ནི་གསལ་བར་གྱུར། །ཅེས་དྲིས་པ་ན། དྲང་སྲོང་ནག་པོ་པས། ཉི་མའི་འོད་ནི་རྒྱུན་དུ་རྣོ། །བུ་གཅིག་སྣང་བའི་འོད་འདི་དག །ཡན་ལག་རེག་ན་བདེ་བསིལ་བས། །ངེས་པར་ཐུབ་པ་དེ་ཡི་འོད། །ཅེས་སྨྲས་པས། མེས་བྱིན་བྱང་ཆུབ་སེམས་དཔའ་འཕྲལ་དུ་མཇལ་འདོད་སྐྱེས་པ་ལ། དྲང་སྲོང་གིས། ད་ལྟ་ལྷ་དབང་ཆེ་བ་རྣམས་ཀྱིས་བསྐོར་ཅེང་བཞུགས་པས། འོ་སྐལ་གྱིས་སྐབས་རྙེད་པར་མི་འགྱུར་གྱི། སེར་སྐྱ་གཞིར་བྱོན་པའི་ཚེ་བལྟ་བར་བྱའོ་ཞེས་སྨྲས་སོ། །

        ཉི་མ་དེ་ཉིད་ལ་ཕྱོགས་བཞིའི་རྒྱལ་པོ་རྣམས་ལ་ཡང་བུ་རེ་རེ་སྐྱེས་ཏེ། མཉན་ཡོད་དུ་རྒྱལ་པོ་རྩིབས་ཀྱི་རིང་འཕུར་གྱི་བུ་བཙས་པ་ན། ཡུལ་བྲ་ཕབ་པ་བཞིན་གསལ་བས་མིང་ལ་གསལ་རྒྱལ་དང༌། རྒྱལ་པོའི་ཁབ་ཏུ་རྒྱལ་པོ་པདྨ་ཆེན་པོའི་བུ་བཙས་པ་ན། ཉི་མའི་གཟུགས་ཤར་བ་ལྟར་སྣང་ཞིང་གཟུགས་ཅན་མའི་བུ་ཡིན་པས་མིང་ལ་གཟུགས་ཅན་སྙིང་པོ་དང༌། ཀཽ་ཤམྦི་རྒྱལ་པོ་དམག་བརྒྱ་བའི་བུ་བཙས་པ་ན། འཇིག་རྟེན་དུ་ཉི་མ་ཤར་བ་ལྟར་གྱུར་པས་མིང་ལ་ཤར་བ་དང༌། འཕགས་རྒྱལ་དུ་རྒྱལ་པོ་མུ་ཁྱུད་མཐའ་ཡས་ཀྱི་བུ་བཙས་པ་ན། འཇིག་རྟེན་སྒྲོན་མེས་སྣང་བ་ལྟར་གྱུར་པས་མིང་ལ་རབ་སྣང་ཞེས་བཏགས་ཤིང༌། དེ་ཡང་བྱང་ཆུབ་སེམས་དཔའ་སྐུ་བལྟམས་པའི་འོད་ཀྱིས་འཇིག་རྟེན་གྱི་ཁམས་ཐམས་ཅད་ཁྱབ་པ་ལ་གྲས་ནས་སོ་སོར་དེ་ལྟར་མིང་བཏགས་སོ། །

        གཞན་ཡང་ཉིན་དེ་ལ། བཟང་ལྡན་ལ་སོགས་པའི་ཤཱཀྱའི་བུ་ལྔ་བརྒྱ་ཡང་བཙས། རྒྱལ་པོའི་རིམ་གྲོ་བ་སོགས་ལ་བུ་བདུན་པ་ལ་སོགས་པ་ལྔ་བརྒྱ་དང༌། བུ་མོ་མདུན་མ་སོགས་པ་ལྔ་བརྒྱ་ཡང་བཙས། གླང་མོ་ལྔ་བརྒྱ་ལ་ཕྲུ་གུ་འབྲངས། རྒོད་མ་ལྔ་བརྒྱ་ཡང་རྟེའུ་འབྲངས། གཏེར་ལྔ་བརྒྱ་ཡང་ཁ་ཕྱེ་བར་གྱུར་ཏོ། །འཛམ་བུ་གླིང་གི་དབུས་སུ་བྱང་ཆུབ་ཀྱི་ཤིང་ཨ་ཤྭའི་སྡོང་བོ་སྐྱེས། མཚོ་མ་དྲོས་པའི་འགྲམ་དུ་ཨུ་དུམ་ཝ་རའི་མེ་ཏོག་ཁ་འབུས། གླིང་ཕྲན་རྣམས་སུ་ཙན་དན་གྱི་ཚལ་དང༌། འབབ་ཆུ་རོ་ཧི་ཏའི་འགྲམ་དུ་ཤིང་དགེ་བའི་སྙིང་པོ་ཡང་སྐྱེས་སོ། །དེ་ནས་རྒྱལ་པོ་ཟས་གཙང་མས། བདག་གི་བུ་འདི་བཙས་པ་ན་དོན་ཐམས་ཅད་གྲུབ་པར་གྱུར་པས། གཞོན་ནུའི་མཚན་དོན་ཐམས་ཅད་གྲུབ་པར་བཏགས་སོ། །ཞེས་བརྗོད་དེ། དེ་ལྟར་གྲགས་སོ། །དེ་ལྟར་གཞོན་ནུ་དོན་ཐམས་ཅད་གྲུབ་པ་ཕྱོགས་བཞིར་གོམ་པ་བདུན་བདུན་བོར་བའི་སར་མེ་ཏོག་པདྨ་བྱུང་བ་སོགས་དང་འབྲེལ་བར་དབྱིབས་ཟླུམ་པོ་པདྨའི་རྣམ་པ་ཅན། བང་རིམ་བཞི་བའམ་བདུན་བརྒྱད་དུའང་བཤད་པ། པདྨ་དང་འཁོར་ལོས་སྤྲས་པ་པདྨ་སྤུང་པའི་མཆོད་རྟེན་ནི་རྒྱལ་པོ་ཟས་གཙང་མ་སོགས་ཀྱིས་བཞེངས་སོ།། 
       བར་སྐབས་ཀྱི་ཚིགས་བཅད།འདིར་སྨྲས་པ། རིན་ཆེན་གཞི་དང་སྙིང་པོ་མེ་ཏོག་གིས། །ཡོངས་སུ་བརྒྱན་པའི་སྟོང་གསུམ་མི་མཇེད་ཞིང༌། །དུམ་བུར་ཆགས་པ་གླིང་བཞིའི་འཇིག་རྟེན་ཁམས། །ལྷོ་ཕྱོགས་འཛམ་བུ་པྲིཀྵས་མཚན་པའི་གླིང༌། །དེ་ཡི་དབུས་སུ་སེར་སྐྱ་གཞི་ཞེས་པ། །གྲོང་ཁྱེར་ཆེན་པོའི་ཕུན་ཚོགས་དཔལ་འབྱོར་སོགས། །སུམ་ཅུ་རྩ་གསུམ་འཆི་མེད་ལྷ་ཡི་ཡུལ། །འཛམ་གླིང་འཛིན་མའི་རྒྱན་དུ་འཕོས་པ་བཞིན། །ཉི་ཟླའི་ཕྲེང་བ་ལྟར་མཛེས་རྒྱལ་པོའི་ཁབ། །གསེར་གྱི་ཁང་བཟང་ནམ་མཁའི་དབྱིངས་ཀྱི་རྒྱན། །དེ་ན་མི་ཡི་དབང་པོ་ཟས་གཙང་རྗེས། །བགྲང་ཡས་སྐྱེ་དགུ་བྱམས་པས་བུ་བཞིན་སྐྱོང༌། །གྲགས་པའི་ཟླ་བ་བསོད་ནམས་འོད་སྣང་གིས། །རབ་མཛེས་ས་ཡི་ཚངས་པ་ཆེན་པོ་དེ། །ཡན་ལག་བཞི་ཡི་དཔུང་གི་དབུས་ན་བརྗིད། །དྲག་ལྡན་ཡོངས་ཀྱི་གཙུག་ཏུ་རྐང་རྟེན་འཆའ། །སྟོབས་ཀྱི་དབང་ཕྱུག་མཛེས་སྡུག་རྫོགས་པའི་སྐུ། །གཞོན་ནུ་ལང་ཚོ་དར་བའི་སྐབས་ཤིག་ན། །སྐྱོན་ལྔ་དག་ཅིང་ཡོན་ཏན་བརྒྱད་དང་ལྡན། །རྒྱལ་ཡུམ་ལྷ་མོ་སྒྱུ་འཕྲུལ་ཁབ་ཏུ་བསུས། །གང་ཚེ་དགའ་ལྡན་ཆོས་ཀྱི་ཕོ་བྲང་ནས། །རྒྱལ་སྲས་ཚུལ་བཟུང་དམ་པ་ཏོག་དཀར་བོས། །འཛམ་བུའི་གླིང་དུ་གཟིགས་པ་རྣམ་ལྔ་མཛད། །གླིང་འདིར་ཕེབས་ལ་མངོན་དུ་ཕྱོགས་པར་གྱུར། །དེའི་ཚེ་དགའ་ལྡན་ལྷ་རྣམས་མྱ་ངན་གྱིས། །ཁྱོད་ནི་འཛམ་བུའི་གླིང་དུ་གཤེགས་གྱུར་ན། །ལྷ་ཡི་འཇིག་རྟེན་འདི་ནི་སྟོང་བར་གྱུར། །ད་ནི་མགོན་སྐྱབས་སུ་ལ་འཆའ་ཞེས་གསོལ། །ལྷ་ཡི་འཁོར་ལ་ཀུན་དགའ་སྐྱེད་པའི་ཕྱིར། །ཉིད་ཀྱི་རིན་ཆེན་མཛེས་པའི་ཅོད་པན་དཀར། །རྗེ་བཙུན་མི་ཕམ་མགོན་པོའི་དབུ་ལ་ཕུལ། །རྒྱལ་ཚབ་དམ་པ་ཉིད་དུ་དབང་ཡང་བསྐུར། །ནམ་ཞིག་ཆུ་སྟོད་ཟླ་བ་རྒྱས་པའི་ཚེ། །ལྷ་ཡི་ཡུལ་དུ་མི་སྣང་ལྟར་མཛད་ནས། །གླང་ཆེན་དཀར་པོ་མཆེ་བ་དྲུག་ལྡན་གྱི། །རྣམ་པས་ཡུམ་གྱིས་ལྷུམས་སུ་ཞུགས་པར་གྱུར། །དེ་ལྟར་ལྷུམས་སུ་ཟླ་བཅུ་འདས་པ་ན། །དཔྱིད་ཀྱི་ཕོ་ཉས་རབ་སྙན་གླུ་དབྱངས་སྒྲོག །ས་གཞི་སྔོ་ལྗང་གཡུ་ཡི་མཎྜལ་སྟེང༌། །མེ་ཏོག་སྣ་ཚོགས་ཕྲ་ཚོམ་བཀོད་པ་བཞིན། །རབ་མཛེས་དབྱར་གྱི་དགའ་སྟོན་རྒྱས་པའི་དུས། །སྐབས་གསུམ་དགའ་བའི་ཚལ་གྱི་རྗེས་འགྲོ་བའི། །ལྷས་བསྟན་ལུམ་བི་ནི་ཡི་སྐྱེད་ཚལ་དུ། །འཇིག་རྟེན་གསུམ་གྱི་མགོན་པོ་ཡང་དག་བལྟམས། །དེའི་ཚེ་བཀྲ་ཤིས་སྣང་བ་དཀར་པོས་མ་ལུས་འཇིག་རྟེན་ཁམས་ཀུན་གསལ། །གསེར་བུམ་ཐོགས་པའི་ལྷ་རྣམས་གྱིས་ནི་མཚན་དཔེ་སྐུ་ལ་ཁྲུས་ཀྱང་གསོལ། །ངོ་མཚར་རོལ་མོ་སྣ་ཚོགས་བརྡུང་བས་ཕྱོགས་ཀྱི་འཁོར་ལོ་མ་ལུས་ཁྱབ། །གདུགས་དཀར་རྔ་ཡབ་རྒྱལ་མཚན་སོགས་ཀྱིས་འཆི་མེད་ལྷ་ཡི་ལམ་ཡང་གང༌། །ང་ནི་འཇིག་རྟེན་ཀུན་གྱི་མཆོག་གྱུར་ཡོན་གནས་བླ་ན་མེད་པའོ་ཞེས། །ཡངས་པའི་ས་ཆེན་འདི་ཡི་ཕྱོགས་བཞིར་གོམ་པ་བདུན་རེ་ཕེབས་པར་མཛད། །ཞབས་ཀྱི་བཀྲ་ཤིས་རི་མོ་བྲིས་སར་ངོ་མཚར་པདྨ་དག་ཀྱང་བྱུང༌། །ལྷར་བཅས་འགྲོ་བ་ཐམས་ཅད་དགའ་ཞིང་ས་ཡང་རྣམ་པ་དྲུག་ཏུ་གཡོས། །འཛམ་གླིང་དབུས་སུ་བྱང་ཆུབ་ཤིང་སྐྱེས་ཨུ་དུམ་ཝ་རའི་ཚལ་ཡང་རྒྱས། །ཕྱོགས་བཞིར་རྒྱལ་སྲས་བཞི་ཡང་འཁྲུངས་ལ་རིན་ཆེན་གཏེར་ཁ་ཕྱེ་བ་སོགས། །ངོ་མཚར་ལྟས་བཟང་དཔག་མེད་བྱུང་བས་གཞོན་ནུ་དོན་ཀུན་གྲུབ་པ་ཞེས། །བཀྲ་ཤིས་མཚན་གྱི་མེ་ཏོག་ཕྲེང་བ་དཔལ་ལྡན་ཟས་གཙང་རྒྱལ་བོས་ཕུལ། །གང་གི་ཕྱག་ཞབས་མཛེས་ཤིང་དམར་ལ་ཤིན་ཏུ་འཇམ་པས་པདྨ་འདྲ། །སོར་མོ་རིང་ཞིང་མཛེས་པར་འབྲེལ་བས་ངང་བའི་རྒྱལ་པོ་ཇི་བཞིན་ནོ། །ཕྱག་ཞབས་བཀྲ་ཤིས་འཁོར་ལོས་མཚན་ཞིང་སེན་མོ་དམར་བས་ཟངས་མདོག་བཞིན། །གསང་བ་མཛེས་པར་སྦུབས་སུ་ནུབ་པས་གླིང་ཆེན་རྟ་མཆོག་ཅང་ཤེས་ལྟར། །སྐུ་ནི་མཛེས་ཤིང་ཆུ་ཞེང་གབ་པས་ནྱ་གྲོ་དྷ་ཡི་ལྗོན་པ་བཞིན། །ཤིན་ཏུ་གསལ་ཞིང་གཟི་བརྗིད་འབར་བས་གསེར་གྱི་མཆོད་སྡོང་ཆེན་པོ་འདྲ། །སྐུ་ལ་རྡུལ་དང་དྲི་མ་མེད་པས་བཻཌཱུརྱ་ཡི་རིགས་སུ་མཐུན། །ཟླུམ་ལ་རྒྱས་པའི་གཙུག་ཏོར་ལྡན་པའི་དབུ་ནི་རིན་ཆེན་གདུགས་ལྟ་བུ། །དཔྲལ་བའི་དབྱེས་ཆེ་ལྟ་ན་སྡུག་པའི་ཡར་གྱི་ཟླ་བ་ཚེས་པ་བཞིན། །རིམ་པ་སོ་གཉིས་གཡས་སུ་འཁྱིལ་བའི་མཛོད་སྤུ་ཉ་རྒྱས་ཟླ་བ་འདྲ། །སྤྱན་གཉིས་མཐོན་མཐིང་དཀྱུས་རིང་གཡོ་བས་ཨུཏྤལ་སྔོན་པོའི་འདབ་མ་བཞིན། །འགྲམ་པའི་དཀྱིལ་འཁོར་ཟླུམ་ལ་འཚམ་པས་སེངྒེའི་འགྲམ་པ་དག་དང་མཚུངས། །ཤངས་ནི་གཙང་ཞིང་དྲི་མ་མེད་པས་པདྨའི་སྦུབས་དང་ཡང་དག་མཚུངས། །མཆུ་ནི་དམར་ཞིང་ཤིན་ཏུ་མཛེས་པས་བིམ་པའི་མདངས་ཀྱི་མཛེས་པ་འཕྲོག །ཚེམས་འཕྲེང་བཞི་བཅུ་དཀར་ཞིང་གསལ་བས་ཟླ་བའི་འོད་ཟེར་འབྱེད་པ་བཞིན། །སྲབ་ཡངས་ཞལ་གྱི་དཀྱིལ་འཁོར་ཁེབས་པས་ལྗགས་ནི་པདྨའི་འདབ་མ་ལྟར། །ཤིན་ཏུ་སྙན་ཞིང་འཇེབས་པའི་གསུང་ནི་ཀ་ལ་པིང་ཀའི་དབྱངས་དང་མཚུངས། །ཀུན་ཏུ་ཁྱབ་ཅིང་ཤིན་ཏུ་བརྗིད་པས་འབྲུག་སྒྲ་ངག་གི་གཉེན་པོར་གྲུབ། །ཕྱག་ཞབས་བོལ་སོགས་བདུན་ནི་མཐོ་ཞིང་སྐུ་སྟོད་བརྗིད་པས་སེངྒེ་འདྲ། །བྱིན་པ་རྒྱས་ཤིང་ཟླུམ་ལ་འཚམ་པས་རི་དྭགས་ཨེ་ན་ཡའི་ལྟ་བུ། །འཕགས་པའི་ཚོགས་ཀྱི་ཐོག་མར་གཤེགས་པས་ཁྱུ་མཆོག་དག་གི་འགྲོས་དང་མཚུངས། །རྒྱུ་སྐར་ལམ་ནས་གཤེགས་ཤིང་འབྱོན་པས་ངང་བའི་རྒྱལ་པོར་ཡང་དག་མཚུངས། །སྐུ་ཡི་འོད་ཀྱི་དཀྱིལ་འཁོར་གསལ་བས་ཉི་མ་བྱེ་བའི་གཉེན་པོར་གྲུབ། །མགྲིན་པ་བཀྲ་ཤིས་རི་མོ་གསུམ་ལྡན་དྲི་མེད་དུང་གི་དཔེ་རུ་བྱས། །ཞལ་གྱི་དཀྱིལ་འཁོར་རབ་ཏུ་རྒྱས་པས་ཆ་ཤས་གང་བའི་ཟླ་བ་འདྲ། །སྲིད་པ་གསུམ་ན་ཤིན་ཏུ་དཀོན་པས་ཨུ་དུམ་ལྭ་རའི་མེ་ཏོག་བཞིན། །སྐུ་ལས་དྲི་ཞིམ་ཕྱོགས་སུ་འཕྲོ་བས་འཆི་མེད་ཡོངས་འདུའི་ལྗོན་པ་ལྟར། །སྐལ་ལྡན་ཀུན་གྱི་འདོད་པ་འཇོ་བས་ཡིད་བཞིན་དབང་གི་རྒྱལ་པོ་འདྲ། །སྟོང་གསུམ་སྟོང་གི་གཙོ་བོར་གྱུར་པས་ཚངས་པ་ཆེན་པོའི་ཁེངས་པ་ཟུམ། །འཇིག་རྟེན་ཀུན་གྱི་མགོན་དུ་གྱུར་པས་སྲིད་པ་གསུམ་ན་དཔེ་དང་བྲལ། །ཐུགས་ཀར་དཔལ་གྱི་བེའུས་མཚན་པའི་སྐྱེས་བུ་ཆེན་པོ་ཁྱོད་ལ་འདུད། །སྐུ་ལ་མཚན་དཔེ་དཀྱིལ་འཁོར་རྫོགས་པའི་དོན་ཀུན་གྲུབ་པ་ཁྱོད་ལ་འདུད། །ལྷར་བཅས་འགྲོ་བའི་སྙིང་གི་མུན་སེལ་གཞོན་ནུ་ཉི་མ་ཁྱོད་ལ་འདུད། །སྟོང་གསུམ་མི་མཇེད་ཞིང་གི་རྒྱན་གཅིག་ཟས་གཙང་སྲས་པོ་ཁྱོད་ལ་འདུད། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ།། 

                 རྗེ་ཡེ་ཤེས་རྒྱ་མཚོའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་མཛད་ཆེན་རྣམ་པར་ཐར་པ་པདྨ་དཀར་པོའི་ཕྲེང་བ་ལས་བཤུས།

       གསལ་འདེབས། 
             རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།

             དྲ་བའི་སྦྲེལ་ཐགhttp://www.tb1025.cn