དགའ་ལྡན་ནས་འཕོས་ཏེ་ལྷུམས་སུ་ཞུགས་པའི་ཚུལ། 
          དགའ་ལྡན་ནས་འཕོས་ཏེ་ལྷུམས་སུ་ཞུགས་པ་སོགས་ནི། བསྟོད་པ་ལས། ཐུགས་རྗེ་ཆེན་པོས་གཟིགས་པ་རྣམ་པ་ལྔས། །སྒྱུ་འཕྲུལ་ལྷུམས་ཞུགས་ལུམ་བིའི་སྐྱེད་ཚལ་དུ། །མཚན་དཔེ་དཔལ་འབར་གཞོན་ནུ་དོན་ཀུན་གྲུབ། །སྐྱེ་དགུའི་མགོན་དུ་བལྟམས་ལ་ཕྱག་འཚལ་ལོ། །ཞེས་སྨྲས་སོ། །དེའི་ཚེ་བྱང་ཆུབ་སེམས་དཔའ་དམ་པ་ཏོག་དཀར་བོས་འཛམ་བུའི་གླིང་དུ་གཟིགས་པ་རྣམ་པ་ལྔ་མཛད་དེ། རིགས་དང༌། ཡུལ་དང༌། དུས་དང༌། རྒྱུད་དང༌། ཡུམ་ལ་གཟིགས་པའོ། །དེ་ཡང་རིགས་ཀྱི་མཆོག་ཤིན་ཏུ་བཙུན་པར་བཀུར་པའི་རྒྱལ་རིགས་དང༌། ཡུལ་གྱི་མཆོག་ཡུལ་དབུས་ཀྱི་གྲོང་ཁྱེར་དམ་པ་དང༌། དུས་ཀྱང་ཡིད་འབྱུང་བ་དང་སྐྱོ་ཤས་ཆེ་ཞིང་ཧ་ཅང་རང་སྙིགས་མ་ལྔ་བདོ་བ་ཡང་མ་ཡིན་པ་ཚེ་ལོ་བརྒྱ་བའི་དུས་དང༌། རྒྱུད་ནི་མང་པོས་བཀུར་བའི་རྒྱལ་པོའི་རྒྱུད་པ་ཡང་ཡིན་ལ། ཕ་མེས་དང་མ་མེས་བདུན་རྒྱུད་ཀྱི་བར་དུ་སྐྱོན་མེད་པ་དང༌། ཡུམ་ནི་བུད་མེད་ཀྱི་སྐྱོན་ཀུན་སྤངས་ཤིང༌། ཡོན་ཏན་ཀུན་ཚང་ལ། ཁྱད་པར་དུ་བྱང་ཆུབ་སེམས་དཔའ་ཟླ་བ་བཅུར་ལྷུམས་སུ་འཛིན་ནུས་པའི་བསོད་ནམས་བསགས་པ་དང༌། སྔོན་གྱི་རྒྱལ་བ་ལ་མཆོད་དེ་སངས་རྒྱས་ཀྱི་ཡུམ་དུ་འགྱུར་པར་སྨོན་ལམ་བཏབ་པ་སྟེ་དེ་དག་དགོས་པ་ལས། ལྷ་མོ་སྒྱུ་འཕྲུལ་ལ་དེ་ཡང་ཚང་པར་གཟིགས་སོ། །དེ་ནས་ལྷ་རྣམས་ལ། གྲོགས་པོ་དག་ཆོས་སྣང་བའི་སྒོ་བརྒྱ་རྩ་བརྒྱད་པོ་འདི་དག་ནི། རྒྱས་སྲས་འཆི་འཕོ་བའི་ཚེ་བསྟན་པར་བྱའོ། །དད་པ་ནི། ཆོས་སྣང་བའི་སྒོ་སྟེ། བསམ་པ་མི་ཕྱེད་པར་འགྱུར་རོ། །དད་པ་ནི། ཆོས་སྣང་བའི་སྒོ་སྟེ། སེམས་རྙོག་མ་ཅན་དང་བར་འགྱུར་བའི་ཕྱིར་རོ། །ཞེས་པ་ནས། དབང་བསྐུར་བའི་ས་ནི། ཆོས་སྣང་བའི་སྒོ་སྟེ། མངལ་དུ་འཇུག་པ་ནས་མྱ་ངན་ལས་འདས་པ་ཆེན་པོ་སྟོན་པའི་བར་འགྱུར་རོ། །ཞེས་པའི་བར་དུ་གསུངས་ནས། གང་གི་ཚེ་ན་དགའ་ལྡན་གནས་མཆོག་ནས། །འདྲེན་པ་སྐྱེས་བུ་སེང་གེ་འཆི་འཕོ་ཚེ། །ལྷ་རྣམས་དག་ལ་ཚིག་ཏུ་སྨྲས་པ་ནི། །གྲོགས་དག་བག་མེད་སྤྱོད་པ་སྤོང་བར་གྱིས། །ཞེས་སོགས་གསུངས་སོ། །

       དེ་ནས་བྱང་ཆུབ་སེམས་དཔའ་དགའ་ལྡན་དུ་གནས་པ་ལ་སོགས་པའི་འདོད་པའི་ལྷ་རིགས་དྲུག་ལ་ལན་གསུམ་དུ་འདི་སྐད་ཅེས་བསྒྲགས་ཏེ། ང་ནི་དགའ་ལྡན་གྱི་ལྷའི་རིགས་འདི་ནས་འཕོས་ཏེ་འཛམ་བུའི་གླིང་དུ་རྒྱལ་བོ་ཟས་གཙང་གི་བུར་གྱུར་ནས་བདུད་རྩི་རྟོགས་པར་བྱ་ཡི། ཁྱེད་ཅག་བདུད་རྩིའི་དོན་དུ་གཉེར་བ་རྣམས་ཡུལ་དབུས་ཀྱི་མིར་ཉིང་མཚམས་སྦྱོར་བ་ལོངས་ཤིག་ཅེས་སོ། །དེར་དགའ་ལྡན་གྱི་ལྷ་རྣམས་ཀྱིས་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་མཁྱེན་པར་མཛོད་ཅིག ད་ལྟ་འཇིག་རྟེན་ནི་སྡིག་པས་གོས་ལ། སྐྱེ་དགུ་ནི་མ་རུང་བའོ། །འཛམ་བུའི་གླིང་ནི། འོད་སྲུངས་རྫོགས་བྱེད་དང༌། གནག་ལྷས་ཀྱི་བུ་ཀུན་ཏུ་རྒྱུ་དང༌། ཡང་དག་རྒྱལ་བ་ཅན་དང༌། མི་ཕམ་སྐྲའི་ལྭ་བ་ཅན་དང༌། ཀ་ཏའི་བུ་ནོག་ཅན་དང༌། གཉེན་གྱི་བུ་གཅེར་བུ་བ་སྟེ་རྟོག་གེ་པ་དྲུག་དང༌། བྲམ་ཟེ་རྒྱུད་རྒྱལ་དང༌། བྲམ་ཟེ་གནག་ལྡོག་དང༌། བྲམ་ཟེ་བཟང་ལྡན་དང༌། བྲམ་ཟེ་ཚངས་པའི་ཚེ་དང༌། བྲམ་ཟེ་པདྨའི་སྙིང་པོ་དང༌། བྲམ་ཟེ་དམར་པོ་སྟེ་རྗེས་སུ་སྒྲོག་པ་དྲུག་དང༌། རེངས་བྱེད་ཀྱི་བུ་ལྷག་སྤྱོད་དང༌། སྒྱུ་རྩལ་ཤེས་ཀྱི་བུ་རིང་འཕུར་དང༌། ཀུན་ཏུ་རྒྱུ་རབ་བཟང་དང༌། བྲམ་ཟེའི་ཁྱེའུ་ཀུན་རྒྱལ་དང༌། དྲང་སྲོང་ཉོན་མོངས་མེད་དང༌། ལྟེང་རྒྱས་འོད་སྲུངས་རལ་བ་ཅན་ཏེ་སྙོམས་འཇུག་པ་དྲུག་གོ །དེ་ལྟར་སྟོན་པ་བཅོ་བརྒྱད་ཀྱིས་དཀྲུགས་པ་ལགས་པས། གཤེགས་པའི་སྐབས་མ་ལགས་སོ། །ཞེས་གསོལ་ཏོ། །

        དེ་ནས་བྱང་ཆུབ་སེམས་དཔས། གྲོགས་པོ་དག་རོལ་མོའི་ཆ་བྱད་ཐམས་ཅད་རྡུང་ཤིག་ཅེས་པས། དེ་རྣམས་ཀྱིས་རོལ་མོ་ཐམས་ཅད་བརྡུངས་པ་ན། བྱང་ཆུབ་སེམས་དཔས་ཀྱང་དུང་འབུད་པར་མཛད་ནས། འདི་རྣམས་ལས་སྒྲ་ལྷག་པར་ཆེ་བ་གང་ཡིན། གསོལ་བ། དུང་གི་སྒྲ་ལགས་སོ། །བཀའ་སྩལ་བ། དུང་གི་སྒྲས་རོལ་མོའི་སྒྲ་གཞན་ཐམས་ཅད་ཟིལ་གྱིས་གནོན་པ་བཞིན་དུ། ངས་ཀྱང་དེ་དག་ཟིལ་གྱིས་མནན་ཏེ། བདུད་རྩིས་འགྲོ་བ་ཚིམ་པར་བྱའོ། །སེང་གེ་གཅིག་གིས་གཅན་གཟན་ཚོགས་ནི་དུ་མ་འཇོམས། །རྡོ་རྗེ་གཅིག་གིས་བྲག་རྩེ་དུ་མ་རྣམ་པར་འཇིག །བརྒྱ་བྱིན་གཅིག་གིས་ལྷ་མིན་དབང་པོ་དུ་མ་འཇོམས། །ཉི་མ་གཅིག་གིས་མུན་པ་དུ་མ་རྣམ་པར་སེལ། །ཞེས་སོ། །དེ་དག་གི་ཚེ་བར་སྣང་ལ་རྒྱུ་བའི་ལྷ་རྣམས་ཀྱིས། ད་ལྟའི་ལོ་བཅུ་གཉིས་ན་བྱང་ཆུབ་སེམས་དཔའ་ཡུམ་གྱི་ལྷུམས་སུ་འཇུག་པར་འགྱུར་རོ། །ཞེས་བྱ་བ་ལ་སོགས་པ་བསྒྲགས་པས། འཛམ་བུའི་གླིང་ན་རང་སངས་རྒྱས་ལྔ་བརྒྱ་ཙམ་བཞུགས་པ་དེ་དག་ཕན་ཚུན་གཅིག་ནས་གཅིག་ཏུ་འདུས་ཏེ་ཝ་རཱ་ཎ་སིར་བྱོན། ད་ནི་སངས་རྒྱས་མྱུར་དུ་འབྱུང་བས་བདག་ཅག་གིས་འགྲོ་བའི་དོན་བྱ་མི་དགོས་སོ་སྙམ་དུ་དགོངས་ནས། ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདས་སོ། །གདུང་ལ་རང་བྱུང་གི་མེ་འབར་ཏེ་ནམ་མཁར་སོང་བ་ལས་རིང་བསྲེལ་རྣམས་སའི་སྟེང་དུ་ལྷུང་བར་གྱུར་ཏོ། །དེ་ནས་དགའ་ལྡན་གྱི་ལྷ་རྣམས་ཀྱིས། གལ་ཏེ་མགོན་པོ་ཁྱོད་འཛམ་བུའི་གླིང་དུ་གཤེགས་ན། དགའ་ལྡན་གྱི་གནས་འདི་ངན་པར་འགྱུར་རོ་ཞེས་པས། བཀའ་སྩལ་པ། དེང་ཕྱིན་ཆད་མི་ཕམ་པས་ཆོས་སྟོན་པར་འགྱུར་རོ། །ཞེས་རིན་པོ་ཆེའི་ཅོད་པན་རྒྱལ་བ་མི་ཕམ་མགོན་པོ་ལ་ཕུལ་ཏེ་རྒྱལ་ཚབ་ཏུ་བསྐོས་སོ། །དེའི་ཚེ་ལྷའི་དབང་པོ་བརྒྱ་བྱིན་གྱིས། ཡུམ་ལྷ་མོ་སྒྱུ་འཕྲུལ་ཆེན་མོའི་སྐུ་ལ་གཟི་མདངས་བསྐྱེད་ཅིང༌། ལྷུམས་ཀྱང་གཙང་མར་བྱས་སོ། །

        ཆུ་སྟོད་ཀྱི་ཟླ་བའི་ཚེས་བཅོ་ལྔ་ལ་བབ་སྟེ། ལྷ་མོ་སྒྱུ་འཕྲུལ་ཆེན་མོ་ཡང་བསྙེན་གནས་ཀྱི་སྡོམ་པ་ཡང་དག་པར་བླངས་ཤིང་གནས་པ་ལ། བྱང་ཆུབ་སེམས་དཔའ་ནམ་གྱི་གུང་གི་ཐུན་ལ་གླང་པོ་ཆེ་ཐལ་དཀར་མཆེ་བ་དྲུག་ལྡན་གྱི་རྣམ་པས་ཡུམ་གྱི་ལྷུམས་སུ་ཞུགས་སོ། །དེའི་ཚེ་ས་ཆེན་པོ་གཡོས་ཤིང་འཇིག་རྟེན་གྱི་ཁམས་ཐམས་ཅད་འོད་ཀྱི་སྣང་བས་ཁྱབ་པར་གྱུར་ཏོ། །ཡུམ་གྱི་རྨི་ལམ་དུ་གླང་པོ་ཆེ་མཆོག་གིས་ཡུམ་ཉིད་ཀྱི་གཡས་ཕྱོགས་ཀྱི་རུམ་དྲལ་ནས་ཞུགས་པ་དང༌། སྟེང་གི་ནམ་མཁར་འགྲོ་བ་དང༌། རི་བྲག་ཆེན་པོ་ལ་འཛེག་པ་དང༌། སྐྱེ་བོ་མང་པོས་རང་ལ་ཕྱག་བྱེད་པ་སོགས་རྨིས་ཏེ། ཇི་སྐད་དུ། གསེར་གྱི་དྲ་བས་ལེགས་གཡོག་སྤྱི་གཙུག་དམར། །ཐལ་དཀར་མཆེ་བ་དྲུག་དང་རབ་ལྡན་ཞིང༌། །དུང་དང་ཁ་བ་དངུལ་མདོག་ལྟ་བུ་ཡི། །གླང་པོའི་མཆོག་གཅིག་ཁོང་དུ་སོང་སྙམ་བྱེད། །དེ་ཞུགས་ནས་ནི་བདག་གི་ལུས་དང་སེམས། །སྔོན་ཆད་མཐོང་ཐོས་མྱོང་བར་མ་གྱུར་པའི། །གྱ་ནོམ་བདེ་བས་ཤིན་ཏུ་བདེར་གྱུར་ཏེ། །བསམ་གཏན་མཉམ་པར་བཞག་པ་བཞིན་དུ་གྱུར། །ཅེས་སོ། །རྨི་ལྟས་དེ་དག་རྒྱལ་པོས་རྨི་ལམ་སྟོན་མཁན་སོགས་ལ་དྲིས་པ་ན། དེ་རྣམས་ཀྱིས་སྨྲས་པ། མཚན་བཟང་པོ་སུམ་ཅུ་རྩ་གཉིས་དང་ལྡན་པའི་སྲས་ཤིག་བལྟམས་པར་འགྱུར་རོ་ཞེས་ལུང་བསྟན་ཏོ། །

        དེ་ནས་ལྷ་མོ་སྒྱུ་འཕྲུལ་ཕོ་བྲང་གི་སྐྱེད་མོས་ཚལ་དུ་ཡོ་བྱད་དང༌། འབྱོར་བ་དཔག་ཏུ་མེད་པ་དང་བཅས་ཏེ་སྡུག་བསྔལ་དང་ཡིད་མི་བདེ་བའི་རྐྱེན་ཐམས་ཅད་སྤངས་ཏེ། དགའ་ཚལ་གྱི་ལྷའི་བུ་མོ་བཞིན་དུ་གནས་པ་ལས། ནམ་ཞིག་ན་རྒྱ་མཚོ་བཞིའི་ཆུ་བཏུང་བར་འདོད་པ་སྐྱེས་ནས། རྒྱལ་པོ་ལ་ཞུ་ཞིང༌། རྒྱལ་པོས་མཚན་མཁན་རྣམས་ལ་དྲིས་ཏེ། ཀུན་ཏུ་རྒྱུ་མིག་དམར་ཞེས་བྱ་བ་སྒྱུ་འཕྲུལ་གྱི་རིག་སྔགས་ལ་བྱང་བ་ཞིག་ཡོད་པ་བོས་ནས། དེས་རིག་སྔགས་ཀྱིས་སྤྲུལ་བའི་རྒྱ་མཚོ་བཞི་བསྟན་ཏེ། དེ་བཞིའི་ཆུ་བླུད་ནས་ཚིམ་པར་བྱས་སོ། །གཞན་ཡང༌། སྐྱེ་བོ་དུ་མ་སྦྱིན་པས་ཚིམ་པར་བྱའོ་སྙམ་པ་ཡང་རྒྱལ་པོས་དེ་བཞིན་དུ་མཛད། སྐྱེད་མོས་ཚལ་སྣ་ཚོགས་གཟིགས་པར་འདོད་པ་ཡང་དེ་བཞིན་དུ་མཛད་དོ།། 

                            རྗེ་ཡེ་ཤེས་རྒྱ་མཚོའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་མཛད་ཆེན་རྣམ་པར་ཐར་པ་པདྨ་དཀར་པོའི་ཕྲེང་བ་ལས་བཤུས།

      གསལ་འདེབས། 
           རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།            དྲ་བའི་སྦྲེལ་ཐགhttp://www.tb1025.