བཀའ་བཅུ་རབ་འབྱམས་པ་གསེར་ལག་འཇམ་དབྱངས་དགེ་ཚོགས་སམ་མི་ཕམ་དབྱངས་ཅན་དགྱེས་པའི་ལང་ཚོ་མཆོག་ནི།སྤྱི་ལོ་༡༩༧༡ལོའི་རྒྱ་ལོའི་ཚེས་བཅོ་ལྔར་གོང་ས་ལཱ་མོ་ཞབས་དྲུང་དཀར་བོའི་ལྷ་འབངས་སུ་སྦྱོར་འཇགས་མཛད་པའི་ལྷ་སྡེ་དཀར་བོ་མང་འབའ་བྱ་གསུམ་དུ་གྲགས་པའི་ཡ་གྱལ་འབའ་གཞུང་གསེར་མོ་ལྗོངས་ཏེ་འབའ་ཞོལ་མའི་ཡབ་ཤེས་བྷ་དང་ཡུམ་གཡང་འཛིན་སྒྲོལ་མ་གཉིས་ཀྱི་སྲས་སུ་འཁྲུངས།དགུང་གྲངས་བརྒྱད་ཀྱི་སྟེང་འབའ་ལུང་སློབ་ཆུང་དང་སློབ་འབྲིང་དག་རིམ་གྱིས་འགྲིམས་ཏེ་བོད་རྒྱ་དབྱིན་གསུམ་གྱི་སྐད་ཡིག་སོགས་ལ་ཅུང་ཙམ་སྦྱངས།དེ་ནས་དགུང་གྲངས་བཅུ་བཞིའི་སྟེང་རང་འགུལ་གྱིས་ངེས་པར་འབྱུང་འདོད་ཀྱི་བསམ་པ་ལྡོག་ཏུ་མེད་པ་འཁྲུངས་ཏེ།ལོ་དེའི་ཟླ་དྲུག་པའི་ཚེས་བཅུ་བདུན་ཉིན་གསེར་ལག་དགོན་དུ་རྗེ་འཇམ་དབྱངས་འོད་ཟེར་རྒྱ་མཚོ་ཚང་ལས་རབ་ཏུ་བྱུང་སྟེ་ལོ་ངོ་བཞིའི་རིང་ལ་ཆོ་ག་ཆོས་སྤྱོད་སོགས་ཐུགས་འཛིན་མང་བོ་གནང་།རྗེ་སྨད་སོག་རྡོ་རྗེ་འཆང་དང་རྗེ་ཚེ་མཚམས་པ་ལྕང་སྐྱ་རིན་པོ་ཆེའི་རྣམ་གཉིས་ཀྱི་དྲུང་དུ་དབང་བཀའ་མང་བོ་གསན་བཞེས་གནང་།དགུང་གྲངས་བཅོ་བརྒྱད་སྟེང་མཁས་གྲུབ་གདེངས་ཅན་བྱེ་བའི་བསྟི་གནས་དྷཱིཿཚ་བཀྲ་ཤིས་ཆོས་སྡིངས་སུ་སློབ་གཉེར་ལ་ཕེབས་ཏེ།མདོ་སྔགས་ཡོངས་སུ་རྫོགས་པའི་པཎྜི་ཏ་ཆེན་མོ་རྗེ་བཙུན་ཡེ་ཤེས་རྒྱ་མཚོ་དཔལ་བཟང་བོ་དང་།རྗེ་བློ་བཟང་བསྟན་དར་དཔལ་བཟང་བོ།ཁོང་ཨ་རྒ་རིན་པོ་ཆེ་རྗེ་བཙུན་གྲགས་པ་རྒྱ་མཚོ་རྣམས་ཀྱི་ཞབས་རྡུལ་སྤྱི་བོར་བསྟེན་ཏེ་རིམ་བཞིན་བསྡུས་གྲྭ་དང་།བློ་རྟགས།གྲུབ་དོན་ས་གསུམ།ཟུར་བཀོལ་བཞི།ཕར་ཕྱིན་གྱི་གཞུང་རྣམས་དང་ཞོར་དུ་རྗེ་ཡབ་སྲས་གསུམ་གྱི་གསུང་འབུམ་བཀླག་ལུང་གིས་མཚོན་དབང་ལུང་ཁྲིད་གསུམ་གྱི་མན་ངག་མཐའ་དག་གསན་བཞེས་གནང་།ཁྱད་པར་དུ་གྲྭ་རྐྱང་དཀྱུས་མའི་ལུགས་སུ་ཚོགས་ཆོས་གྲྭ་ཆད་མེད་དུ་འགྲིམས་ནས་སློབ་གཉེར་རྡོ་རུས་ཐུག་པ་གནང་བའི་འབྲས་རྟགས་སུ་དགུང་གྲངས་སུམ་ཅུའི་སྟེང་ཕར་ཕྱིན་དམ་བཅའ་བཞགལོ་དེའི་ཕྱི་ལོར་དགེ་བཤེས་བོང་སྟག་མཁས་གྲུབ་དང་དགེ་བཤེས་སྐྱིད་བདེ་བསམ་གཏན་རྣམ་གཉིས་དང་ལྷན་དུ་མ་ཅིག་ཁྲོས་མ་ནག་མོའི་སྒོ་ནས་ཆུ་མིག་བརྒྱ་རྩ་ལེགས་པར་འགྲིམས།བླ་བྲང་བཀྲ་ཤིས་འཁྱིལ་གྱི་གཞུང་བརྒྱ་སྨྲ་བའི་དབང་ཕྱུག་རྗེ་གྲགས་པ་རྒྱ་མཚོ་སོགས་ཀྱི་མདུན་དུ་སླར་ཡང་བསྡུས་གྲྭ་བློ་རྟགས།ཕར་ཕྱིན།མཛོད་འདུལ་དབུ་གསུམ།སྔགས་སོགས་སློབ་གཉེར་ཡུན་རིང་བགྱིས་པའི་མཐར།

དགུང་ལོ་སོ་གསུམ་པ་སྤྱི་ལོ་༢༠༠༣ལོའི་དགེ་ལྡན་ལྔ་མཆོད་ཆེན་མོར་མཁས་པའི་དབང་བོ་བརྒྱ་ཕྲག་དུ་མའི་དབུས་སུ་བཀའ་བཅུ་རབ་འབྱམས་པའི་དམ་བཅའ་ལེགས་པར་བཞག་སྟེ་དགོན་གཞུང་དང་གྲྭ་ཚང་རིན་པོ་ཆེ་སོགས་ཀྱིས་བསྔགས་བརྗོད་ཀྱི་མེ་ཏོག་འཐོར་ཞིང་།རབ་འབྱམས་པའི་མཚན་བཏགས་གནང་།དེ་དག་གི་ཞོར་དུ་ལྔ་རིག་སྨྲ་བ་རྗེ་བཤད་སྒྲུབ་རྒྱ་མཚོ་དང་ཨ་ཁུ་བཛྲ་ཚང་རྣམ་གཉིས་ལས་སུམ་རྟགས་དང་སྙན་ངག་ལེའུ་གསུམ།དབྱངས་ཅན་སྒྲ་ཊཱིཀ་རྩིས་དཀར་ནག་སོགས་ཀྱི་མཛུབ་ཁྲིད་ཀྱང་རྒྱས་པར་ཐོབ།

དགུང་གྲངས་སོ་གཅིག་སྟེང་ཐང་གཞི་དགོན་པའི་དགེ་རྒན་དུ་ཡང་ཡང་གདན་འདྲེན་ཞུས་པ་ལྟར་དགོན་པ་དེར་ཕེབས་ཏེ་དྷཱིཿཚ་བཀྲ་ཤིས་ཆོས་སྡིངས་ཀྱི་ཕྱག་བཞེས་བཞིན་གཞི་གསུམ་གྱི་ཆོ་ག་གསར་དུ་བཙུགས་ཏེ་འདོན་རྟ་དབྱངས་གསུམ་གྱི་ཕྱག་བཞེས་མཐའ་དག་འཁྲུལ་མེད་དུ་མཛད།དགོན་པའི་བླ་གྲྭ་ཡོངས་ལ་སུམ་རྟགས་དག་གསུམ་དང་།སྒྲ་དང་སྙན་ངགབསྡུས་གྲྭ་སྐྱབས་ཁྲིད།ལམ་རིམ་རྒྱས་བསྡུས་སོགས་ཀྱི་ཁྲིད་རྒྱས་པར་གནང་བཞིན་པ་མ་ཟད།ཆོས་སྲིད་ལུགས་གཉིས་ཀྱི་སྒོ་ནས་དགོན་པར་བདག་གཉེར་མཛད་བཞིན་མཆིས།དགུང་གྲངས་སོ་བཞི་བ་སྤྱི་ལོ་༢༠༠༤ལོའི་ཧོར་ཟླ་བརྒྱད་པའི་ཚེས་བཅུ་ཉིན་གསེར་ལག་དགོན་གཞུང་གི་སྤྱིའི་འཆད་ཉན་དགེ་རྒན་དུ་གདན་ཞུས་གནང་བ་ལྟར་ཕྱགས་ཕེབས་ཏེ།བློ་གསལ་རིགས་པ་སྨྲ་བ་བརྒྱ་ཕྲག་དུ་མ་ལ་གཞུང་ལུགས་སྣ་ཚོགས་ཀྱི་ཟབ་ཁྲིད་ལུང་རིགས་ཀྱི་ལམ་ནས་དྲངས་པའི་ལེགས་བཤད་ཕངས་མེད་དུ་བསྟབས་པས།རྣམ་དཔྱོད་དོན་གཉེར་དང་ལྡན་པ་མཐའ་དག་དགའ་དད་ཟུང་གི་ཀུན་ད་ཁོང་ནས་འཛུམ་པའི་སྐལ་བཟང་མངོན་དུ་བྱས།གཞན་བླ་བྲང་བཀྲ་ཤིས་འཁྱིལ་གྱི་བཤེས་གཉེན་དམ་པ་རྗེ་ཡོན་ཏན་རྒྱ་མཚོ་ཚང་དང་།ཡོངས་འཛིན་རྗེ་གྲགས་པ་རྒྱ་མཚོ་ཚང་།རྗེ་དཔལ་ལྡན་རྒྱ་མཚོ་སོགས་སྔ་ཕྱིར་བསྟེན་ནས་དབང་ལུང་ཁྲིད་གསུམ་གྱི་མན་ངག་མཐའ་དག་བུམ་པ་གང་བྱོའི་ཚུལ་གྱིས་གསན་བཞེས་གནང་།དེ་ལྟ་བུའི་གཞན་དོན་རླབས་ཆེན་གྱི་བྱ་བ་ལ་བརྩོན་བཞིན་པའི་མུར་གསེར་ལག་དགོན་པའི་ཆོས་རིག་འཕེལ་རྒྱས་གླིང་གི་རབ་བྱུང་མཁན་པོ་མཛད་ནས་གསར་ཞུགས་སློབ་བུ་བརྒྱ་ཕྲག་དུ་མ་ལ་སྡོམ་རྒྱུན་གཙང་མའི་དངོས་པོ་ཡང་དག་པར་སྩོལ་བཞིན་པ་དང་།གསེར་ལག་དགོན་དང་།དྷཱིཿཚ་དགོན།ཐང་གཞི་དགོན་སོགས་སུ་སློབ་བུ་དོན་གཉེར་ཅན་རྣམས་ལ་སྐབས་བབ་ཀྱི་སློབ་ཁྲིད་དང་།སློབ་གྲྭ་ཆེ་འབྲིང་ཆུང་གསུམ་ནས་ཕེབས་པའི་དགེ་རྒན་དང་ཞིབ་འཇུག་སློབ་མ་རྣམས་ལ་གང་མཁོའི་གཞུང་ལུགས་ཀྱི་སློབ་ཁྲིད་གནང་བཞིན་པའི་མུར་བཞུགས་པ་ལགས་སོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn