བཀའ་བཅུ་རབ་འབྱམས་པ་དགེ་བཤེས་སྐྱིད་བདེ་བསམ་གཏན་རྒྱ་མཚོ་མཆོག་ནི།སྤྱི་ལོ་༡༩༦༥ལོར་དཔའ་ལུང་རྫོང་ཆུ་དམར་ཡུལ་ཚོ་སྨྲས་རྒྱལ་སྡེ་བར་ཡབ་ཀྭ་མོ་དང་།ཡུམ་སངས་སྐྱིད་གཉིས་ཀྱི་སྲས་སུ་སྐུ་བལྟམས།ཆུང་དུས་ནས་ཁུ་བོ་དགེ་སློང་འདུལ་འཛིན་པ་དགེ་འདུན་རབ་རྒྱས་དང་མཉམ་དུ་ཆོས་དང་ཟང་ཟིང་གི་འཚོ་བཞེས་གནང་ཞིང་།སློབ་འབྲིང་སོགས་རིམ་གྱིས་མཐར་ཕྱིན།སྤྱི་ལོ་༡༩༨༡ལོར་ཁུ་བོའི་རྗེས་སུ་འབྲངས་ནས་སྤྱི་བ་བུ་རྒྱུད་སྐྱིད་བདེ་དགའ་ལྡན་དར་རྒྱས་གླིང་དུ་ཕེབས།སྙིགས་དུས་ཀྱི་འཕགས་པ་ཉེ་བར་འཁོར།གསུམ་ལྡན་ངུར་སྨྲིག་འཛིན་པ་༧རྡོ་རྗེ་འཆང་ཆེན་མོ།མཁན་ཡེ་ཤེས་རྒྱ་མཚོ་དཔལ་བཟང་བོ་ལས་རབ་ཏུ་བྱུང་ཞིང་།ཚིགས་སྔ་ཕྱི་དགེ་ཚུལ་དང་ཡོངས་རྫོགས་དགེ་སློང་གི་སྡོམ་པ་མནོས།འཇམ་དབྱངས་ཞི་ཁྲོ་སྦྲགས་སྒྲུབ་སོགས་རྒྱུད་སྡེ་གོང་འོག་དུ་མའི་དཀྱིལ་འཁོར་དུ་བཅུག་ཅིང་གསང་སྔགས་བླ་ན་མེད་པའི་སྡོམ་པ་དང་།སེམས་བསྐྱེད་ཆོ་ག་སོགས་ཀྱི་སྒོ་ནས་བྱང་ཆུབ་སེམས་དཔའི་སྡོམ་པ་ཡང་དག་འཛིན་དུ་བཅུག་པའི་གསུམ་ལྡན་དགེ་སློང་གི་ངོ་བོར་བསྐྱེད།དེ་ནས་རིམ་གྱིས་དགོན་དེ་གའི་འདོན་དབྱངས་རྟ་བཅའ་ཤོམ་ཕྱག་ལེན་སོགས་ངེས་པར་བྱས་ནས་དགུང་ལོ་བཅུ་དགུའི་སྟེང་བྱིངས་འདྲེན་ཆེན་མོའི་འགན་བཞེས་ཏེ་བསྟུད་མར་ལོ་གསུམ་བཞུགས།

དགུང་ལོ་ཉེར་ལྔའི་སྟེང་དུ་དྷཱིཿཚ་བཀྲ་ཤིས་ཆོས་སྡིངས་སུ་ཕེབས་ནས།དགེ་བའི་བཤེས་གཉེན་ཆེན་མོ་༧རྗེ་བཙུན་རྨོག་རུ་བ་བློ་བཟང་བསྟན་དར་བ་མཆོག་དང་།༧རྗེ་བཙུན་གྲགས་པ་རྒྱལ་མཚན་རྣམ་གཉིས་ཀྱི་ཞབས་པད་ཚུལ་བཞིན་དུ་བསྟེན་ནས་དཔེ་ཁྲིད་སྣ་ཚོགས་དང་དབང་ལུང་རྗེས་གསུམ་ལམ་རིམ་བློ་སྦྱོང་སོགས་མི་ཉུང་བ་ཐོབ།གཞན་ཡང་བླ་བྲང་བཀྲ་ཤིས་འཁྱིལ་གྱི་མདོ་སྔགས་ཡོངས་སུ་རྫོགས་པའི་དགེ་བའི་བཤེས་གཉེན་ཆེན་མོ་༧རྗེ་གྲགས་པ་རྒྱ་མཚོ་སོགས་ལས་མདོ་སྔགས་རིག་གསུམ་གྱི་ཁྲིད་དང་མན་ངག་ཐོབ།སྤྱི་ལོ་༢༠༠༠ལོར་ཕར་ཕྱིན་དམ་བཅའ་བཞགསྤྱི་ལོ་༢༠༠༡ལོར་སྡེ་ཚའི་ལུང་ཁོག་ཏུ་ཆུ་མིག་བརྒྱ་རྩར་འགྲིམས།

སྤྱི་ལོ་༢༠༠༧ལོར་བཀའ་བཅུ་རབ་འབྱམས་པའི་དམ་བཅའ་བཞགསྤྱི་ལོ་༢༠༠༨ལོར་འཛིན་གྲྭ་ཡོངས་སུ་མཐར་ཕྱིན།སྤྱི་ལོ་༢༠༡༣ལོར་ཚོགས་ཆེན་དགེ་བསྐོས་ཀྱི་འགན་བཞེས་ཤིང་།སྤྱི་ལོ་༢༠༡༤ལོར་གསེར་ཁང་རི་ཁྲོད་དུ་ལོ་འཁོར་གཅིག་གི་རིང་ལ་འཇིགས་བྱེད་ལྷ་བཅུ་གསུམ་མའི་གཞི་བསྙེན་ཆེན་མོ་བཏང་བ་སོགས་ཐོས་བསམ་དང་ཉམས་ལེན་ཟུང་དུ་སྦྲེལ་བའི་མཛད་པ་བླ་ན་འཕགས་ཤིང་།དྷཱིཿཚ་རང་དགོན་དང་སྐྱིད་བདེ་དགའ་ལྡན་དར་རྒྱས་གླིང་།མཱེ་ཧྭོ་ཐང་རིང་དགའ་ལྡན་བཤད་སྒྲུབ་གླིང་།ཡུལ་ཤུལ་ལྷ་ལམ་དགོན་སོགས་སུ་གཞུང་ཆེན་དུ་མའི་དཔེ་ཁྲིད་རྒྱུན་མར་གནང་བཞིན་པ་མ་ཟད།ཕྱོགས་སོ་སོའི་མང་ཚོགས་རྣམས་ལའང་ནང་བསྟན་ངོ་སྤྲོད་དང་ཆོས་ལྡན་གྱི་བྱ་བ་སྣ་ཚོགས་ཀྱིས་དུས་འདའ་བར་བྱས་ཤིང་།སྤྱི་ལོ་༢༠༡༨ལོར་བླ་མ་གཞུང་ལས་པའི་ལས་འགན་བཞེས།ད་ལྟ་འང་རྗེ་ཞྭ་དམར་རྡོ་རྗེ་འཆང་གི་རི་ཁྲོད་ཉམས་ལེན་ལ་རྩེ་གཅིག་ཏུ་གཞོལ་བཞིན་བཞུགས་པའི་སྐབས་ལགས་སོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn