དགེ་བའི་བཤེས་གཉེན་བཀའ་བཅུ་བ་སྦྱིན་པ་དར་རྒྱས་སམ་མུན་འཇོམས་སྒྲོན་མེ་ལགས་ནི།སྤྱི་ལོ་༡༩༦༣ལོའི་བོད་ཟླ་བརྒྱད་པའི་ཚེས་བཅོ་ལྔ་ལ་རེབ་གོང་གསེར་མོ་ལྗོངས་ཀྱི་སའི་བྱེ་བྲགརྒྱལ་བོ་ཀླུ་ཆུ་ཞེས་པའི་འབྲོག་སྡེའི་ནང་ཚན་གྲྭ་ཚང་ཚོ་བའི་ཁྱིམ་རྒྱུད་འབྱོར་ལྡན་ཡབ་འཕགས་པ་སྐྱབས་དང་ཡུམ་བོ་ཅོག་སྐྱིད་གཉིས་ཀྱི་སྲས་སུ་འཁྲུངས།ཕ་མར་རོགས་རམ་ཕྱུགས་སྐྱོང་ལས་ཞོར་དུ་སྦྲ་གུར་སློབ་གྲྭར་འགྲིམས་ཏེ་སློབ་གཉེར་གནང་།ཕའི་གམ་དུ་སྐྱབས་འགྲོ་དང་།མདོ་གདུགས་སོགས་བསླབས།ཕྱུགས་རྫིའི་ཞོར་བོད་ཡིག་འབྲི་ཀློག་སོགས་སློབ་སྦྱོང་ལ་ཧ་ཅང་ཐུགས་སྤྲོས་འབད་འབུངས་གནང་།སྤྱི་ལོ་༡༩༧༩ལོ་ནས་སློབ་སྦྱོང་གནང་སའི་དགོན་པ་ཞིག་ལ་ཕེབས་འདོད་ལྡོག་ཏུ་མེད་པ་སྐྱེས།སྤྱི་ལོ་༡༩༨༡ལོར་ཕ་མ་སོགས་ཀྱིས་གནང་བ་ཐོབ་ཅིང་།ཡུལ་དེ་གའི་ཚ་རྒྱ་ཐར་བ་གླིང་དུ་བཟང་སྤྱོད་སོགས་སྨོན་ལམ་འདོན་ཆོས་བློར་འཛིན་དང་བོད་ཡིག་རང་སྦྱོང་གནང་།དྷཱིཿཚ་དགོན་པ་ཞེས་སློབ་གཉེར་བྱེད་ས་ཆེས་བཟང་རབས་གསན་པས།སྤྱི་ལོ་༡༩༨༢ལོར་དྷཱིཿཚར་སློབ་གཉེར་ལ་ཕེབས་རྒྱུའི་བསམ་ཐག་བཅད།ལོ་དེའི་ཧོར་ཟླ་དང་བོར་མ་དང་ལྷན་ཅིག་དབུས་གཙང་སོགས་ལ་མཇལ་སྐོར་དུ་ཕེབས་ནས་ཕྱིར་ཟི་ལིང་དུ་ཕྱིན་ཏེ།རང་གཅིག་པུ་ཧོར་ཟླ་གཉིས་པའི་ཚེས་བཅུ་གཅིག་ལ་དྷཱིཿཚར་ཕེབས།

རྗེ་བཙུན་ཕུན་ཚོགས་དར་རྒྱས་ཚང་ལས་རབ་བྱུང་དང་དགེ་ཚུལ་གྱི་དངོས་པོ་མནོས།མཚན་ལ་སྦྱིན་པ་དར་རྒྱས་གསོལ།མཚན་གཞན་ལ་མུན་འཇོམས་སྒྲོན་མེ་དང་།རྙི་གཅོད་རལ་གྲི།སྒྲའི་མཚན་ལ་དབྱངས་ཅན་སྒེག་པའི་རྡོ་རྗེ་སོགས་ཀྱིས་འབོད།ཧོར་ཟླ་བཞི་བའི་ནང་དྷཱིཿཚའི་ཆོས་སྒོར་ཞུགས།དགེ་རྒན་དགེ་ལེགས་རྒྱ་མཚོ་ཚང་ལས།འདོན་ཆོག་དང་ཡིག་གཟུགས་དབུ་ཅན་དབུ་མེད་ལན་ཝར་སོགས་དང་།སུམ་རྟགས་དག་གསུམ་དང་།སྙན་ངག་སོགས་སྦྱངས།མཁན་པོ་དེ་ཉིད་ལས།པྲ་ཏིའི་སུམ་རྟགས་དང་།དབྱངས་ཅན་དགྱེས་གླུ་སོགས་དང་།བསྡུས་གྲྭ།བློ་རྟགས།ཕར་ཕྱིན་དྲང་ངེས་ཟུར་བཀོལ་བཞི་སོགས་དང་།ལམ་རིམ་ཆེན་མོའི་བཤད་ལུང་།ལམ་ཁྲིད་ཆེན་མོ།དབང་དང་རྗེས་གནང་།སྒྲ་དབྱངས་ཅན་མ་སོགས་ཐུན་མོང་རིག་གནས་སོགས་ཆོས་རྒྱུན་མང་དུ་ཐོབ།དགུང་ལོ་ཉེར་གསུམ་སྟེང་མཁན་པོ་དེ་ལས་བསྙེན་པར་རྫོགས།དབྱར་མཚམས་མང་བོར།རེབ་གོང་དུ་ཕྱིན་ནས་བླ་མ་རྫོང་དཀར་ཚང་ལས།རྗེ་འཇིགས་མེད་རིགས་པའི་བློ་གྲོས་ཀྱི་སྐྱབས་ཁྲིད་དང་།ཐུགས་རྗེ་ཆེན་པོའི་དབང་།ཤར་སྐལ་ལྡན་རྒྱ་མཚོའི་གསུང་འབུམ་གྱི་ལུང་སོགས་དང་།དགེ་བཤེས་ལྷ་སྡེ་ཨ་ཁུ་ཚང་ལས།བརྡ་དག་ཕྱེ་མ་ལེབ་ཀྱི་གཤོག་རླབས་སོགས་ཐ་སྙད་རིག་གནས་དང་།བསྡུས་གྲྭ་ལམ་རིམ།དྲང་ངེས་སོགས་དཔེ་ཁྲིད་མང་དུ་ཐོབ།ཆོས་གྲྭར་ཞུགས་ནས་རྩོད་པ་གནང་།རྗེ་འཇིགས་མེད་རིགས་པའི་བློ་གྲོས་ལས།རྗེ་ཨ་བྷྱའི་བཀའ་འབུམ་ལས་བཤད་ལུང་དང་བཀླག་ལུང་མང་བོ་མནོས།

སྤྱི་ལོ་༡༩༨༥ནས་ལོ་ལྔར་དབྱར་དགུན་གྱི་ལོང་ནམ་ཡོད་ལ་བླ་བྲང་དུ་ཕེབས་ནས།རྗེ་དམུ་དགེ་བསམ་གཏན་རྒྱ་མཚོའི་ཞལ་སྔ་ནས།སྒྲུབ་ཐབས་རིན་འབྱུང་ལས་ཆོས་རྒྱུན་མང་བོ་དང་།རྗེ་བཙུན་འཇམ་དབྱངས་རྒྱ་མཚོ་ལས།བློ་གསལ་འཇུག་ངོགས་དང་དགའ་སྟོན།སྙན་འགྲེལ་ཡང་གསལ་སྣང་མཛོད་སོགས་ཀྱི་ཁྲིད་རྒྱུན།བསྡུས་གྲྭ་དང་བློ་རྟགས།དོན་བདུན་ཅུ།ཕར་ཕྱིན།ལམ་རིམ་ཆེན་མོའི་སྐྱེས་བུ་ཆུང་ངུ་།བསམ་གཟུགས།དགེ་འདུན་ཉི་ཤུ།དྲང་ངེས་སོགས་དང་།རྗེ་བཙུན་ཡོན་ཏན་རྒྱ་མཚོ་ཚང་ལས།བསྡུས་གྲྭ།བློ་རྟགས།ཀུན་མཁྱེན་རྣམ་འགྲེལ་མཐའ་དཔྱོད།བསམ་གཟུགས།ལེགས་བཤད་གསེར་ཕྲེང་སོགས་ཀྱི་དཔེ་ཁྲིད་ཀྱི་རྒྱུན་མང་བོ་ཐོབ།རྩིས་རམས་པ་ཆེན་པོ་རྗེ་བཙུན་བསམ་འགྲུབ་རྒྱ་མཚོ་ལས།རྒྱ་རྩིས་དབྱངས་ཅན་དགྱེས་པའི་མཆོད་སྤྲིན་དང་།སྐར་རྩིས་རིགས་ལྡན་སྙིང་གི་ཐིག་ལེ།སྐར་རྩིས་ཀུན་འདུས་ནོར་བུའི་སྔོན་འགྲོའི་ཁྲིད་རྒྱུན་སོགས་དང་།དུས་འཁོར་བ་ཨ་ཁུ་ཀ་མདོའི་བསྟན་པ་ལས།རིགས་ལྡན་མཆོད་པའི་འོད་སྣང་དང་།ཨ་ཁུ་ལྷ་མོ་ཚུལ་ཁྲིམས་རྒྱ་མཚོ་ཚང་གི་འབྱུང་རྩིས་ཀྱི་ཁྲིད་རྒྱུན་སོགས་དང་།ཨ་ཁུ་ཤེས་རབ་ཆོས་འཕེལ་ལས།རྒྱ་རྩིས་འཇམ་དཔལ་དགྱེས་པའི་མཆོད་སྤྲིན་གྱི་ཁྲིད་རྒྱུན།དགེ་བཤེས་འཇམ་དབྱངས་ཉི་མ་ལས།ཨ་ཁུ་ལྷ་མོ་ཚུལ་ཁྲིམས་རྒྱ་མཚོའི་འབྱུང་རྩིས་དང་ས་དཔྱད་སོགས་ཀྱི་ཁྲིད་རྒྱུན་སོགས་དང་།དགེ་རྒན་ཨ་ཁུ་སངས་རྒྱས་དོན་གྲུབ་ལས།ཐོན་མིའི་ཞལ་ལུང་དང་།སི་ཏུའི་ཞལ་ལུང་སོགས་ཀྱི་ཁྲིད་རྒྱུན།གཞན་སྡེ་འདིར་དབང་ལུང་ཞལ་ཁྲིད་སོགས་ཀྱི་ཆོས་བཀའ་མང་དུ་ཐོབ།རང་དགོན་དུ་རྗེ་བཙུན་བླ་མ་ཡེ་ཤེས་མཚན་ཅན་ལས་ཁོང་གི་གསུང་འབུམ་གྱི་ཞལ་ཁྲིད།བཀླག་ལུང་མང་བོ་དང་རྣམ་འགྲེལ།ཕར་ཕྱིན་མཛོད་འདུལ་བ་སོགས་ཀྱི་དཔེ་ཁྲིད་མང་དུ་མནོས།རྗེ་བཙུན་བློ་བཟང་བསྟན་དར་ལས་གཅོད་ཀྱི་ཞི་དྲག་གཉིས་ཀྱི་དབང་སོགས་ཆོས་རྒྱུན་མང་བོ་ཐོབ།གཞན་པའི་བླ་མ་དང་དགེ་བཤེས་མང་བོ་ལས།འཇིགས་བྱེད་དང་དུས་འཁོར་དབང་སོགས་དབང་ལུང་རྗེས་ཁྲིད་སོགས་ཀྱི་ཆོས་རྒྱུན་མན་ངག་མང་བོ་ཐོབ་བོ།།

སྤྱི་ལོ་༡༩༨༧ལོ་ནས་བཟུང་དྷཱིཿཚ་དགོན་གོང་འོག་གཉིས་ཀྱི་གྲྭ་རིགས་ཀྱིས་མཚོན།དགོན་སྡེ་སུམ་ཅུ་ལྷག་གི་གྲྭ་བ་མང་བོ་དང་།ཞིང་ཆེན་ཕྱི་ནང་གི་སློབ་གྲྭ་ཆེ་འབྲིང་ཆུང་གསུམ་གྱི་སློབ་མ་དང་དགེ་རྒན།ཞིབ་འཇུག་རབ་འབྱམས་པ་དང་འབུམ་རམས་པ་སོགས་ལ།བོད་རིག་པ་སུམ་རྟགས་དག་གསུམ་དང་།སྒྲ་དབྱངས་ཅན་མ་དང་སྙན་གཞུང་།རྩིས་དཀར་ནགཡི་གེའི་འབྲི་རྩལ།ཚད་མ་དང་ཕར་ཕྱིན།དབུ་མ།མཛོད་འདུལ།ལམ་རིམ་ཆེ་ཆུང་སོགས་གཞུང་ལུགས་སྣ་ཚོགས་ཀྱི་སློབ་ཁྲིད་མི་ལོ་སུམ་ཅུའི་ཡུན་ལ་སྤེལ།རང་དགོན་གྱི་བླ་མ་གཞུང་ལས་པ་དང་ཚོགས་ཆེན་དགེ་བསྐོས་སོགས་ལས་སྣེ་མོ་དག་གི་ལས་འགན་ལེགས་པར་བསྐྱངས།རིམ་བཞིན་ཕར་ཕྱིན་དང་བཀའ་བཅུའི་རབ་འབྱམས་པའི་དམ་བཅའ་མཛད།

རང་དགོན་གྱི་ཚོགས་དང་ཆོས་གྲྭ་ཚུལ་བཞིན་འགྲིམས་ནས་སྤྱི་ལོ་༢༠༠༢ལོར་གཞུང་བཀའ་པོད་ལྔའི་སློབ་གཉེར་ཡོངས་སུ་མཐར་ཕྱིན།རང་རྩོམ་དེབ་ཆེ་ཆུང་བརྒྱད་པར་སྐྲུན་བགྱིས།རི་བོ་དགེ་ལྡན་པའི་བཅུ་ཕྲག་རིག་མཛོད་ཆེན་མོའི་དཔེ་ཚོགས་མུ་འབྲེལ་ཆེན་མོ་དང་།མཚོ་ཤར་གྲོང་ཁྱེར་ནང་བསྟན་དཔེ་ཚོགས་སོགས་གླེགས་བམ་ཆེན་མོ་སུམ་ཅུར་ཉེ་བར་རྩོམ་སྒྲིག་བགྱིས།གཞན་ཡང་དུས་དེབ་དང་དཔེ་དེབ་མི་ཉུང་བ་བཅུ་ཕྲག་དུ་མ་ཞིག་ལ་རྩོམ་སྒྲིག་སོགས་ཞབས་ཕྱི་མང་དུ་བསྒྲུབས།པེ་ཅིན་བོད་བརྒྱུད་མཐོ་རིམ་ནང་བསྟན་སློབ་གླིང་གི་མཐོ་རིམ་སློབ་མ་བསྡུ་བའི་རྒྱུགས་ལེན་དགེ་རྒན་དང་།མཚོ་སྔོན་ནང་བསྟན་སློབ་གླིང་སོགས་སློབ་གྲྭ་མང་བོ་ཞིག་ལས་སློབ་ཁྲིད་དང་འཆད་ཁྲིད་མང་དུ་གནང་མྱོང་ངོ་།།མཚོ་སྔོན་ཞིང་ཆེན་ཚད་མ་རིག་པའི་མཐུན་ཚོགས་ཀྱི་རྒྱུན་ལས་ལས་འཛིན་པ་དང་།མཚོ་ཤར་ནང་བསྟན་མཐུན་ཚོགས་ཀྱི་དྲུང་ཡིག་ཆེན་མོ།མཚོ་ཤར་གྲོང་ཁྱེར་གྱི་སྲིད་གྲོས་ཨུ་ཡོན།མཚོ་སྔོན་ཞིང་ཆེན་བོད་བརྒྱུད་ནང་བསྟན་དགོན་སྡེའི་དཔེ་ཁྲིད་དགེ་རྒན་གཏན་འབེབས་རྒྱུན་ལས་ཀྲུའུ་རིན་བཅས་སོགས་ཡིན།ད་ལྟའང་ཆོས་ཀྱི་ཉམས་ལེན་གཙོ་བོ་བྱེད་ཞོར་དུ།དགོན་པ་དང་སློབ་གྲྭའི་སློབ་གསོ་དང་།བསྟན་པ་དང་རིག་གནས་འཕེལ་རྒྱས་ཀྱི་ཕྱོགས་ལ་སྐུ་ནུས་གང་ཡོད་ཀྱིས་ཕྱག་ལས་མང་བོ་གནང་བཞིན་བཞུགས་སོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn