བཀའ་བཅུ་རབ་འབྱམས་པ་དགེ་བཤེས་བློ་བཟང་བྱང་ཆུབ་ཚང་ནི།མདོ་སྨད་རིག་སྨོན་གསེར་ལྗོངས་རིང་མོ་ཞེས་པའི་སར་ཉིན་ལུང་དཔོན་སྐོར་སྡེ་བར་ཡུམ་ལྷ་དར་སྐྱིད་ཀྱི་སྲས་སུ་སྤྱི་ལོ་༡༩༦༤ལོའི་ཟླ་༩བའི་ཚེས་༩ལ་འཁྲུངས།སྤྱི་ལོ་༡༩༨༠ལོར་གཡོན་རུའི་དགོན་དུ་ཡོངས་ཀྱི་དགེ་བའི་བཤེས་གཉེན་ཆེན་མོ་༧རྗེ་བཙུན་ཡེ་ཤེས་རྒྱ་མཚོ་མཆོག་གི་སྐུ་དྲུང་ནས་རབ་ཏུ་བྱུང་།གནས་ཀྱི་བླ་མ་ཨ་ཁུ་བརྩོན་འགྲུས་མཆོག་གི་དྲུང་ནས་འདོན་ཆོག་སོགས་ལ་སྦྱངས་པ་མཛད།སྤྱི་ལོ་༡༩༨༧ལོར་གཡོན་རུའི་ཨ་ལགས་ཚང་གིས་ཕྱག་འཕྲིན་དང་བཅས་སྐབས་དེའི་ཁྲི་རིན་པོ་ཆེ་ཨ་རྒ་ཚང་ལ་བཅོལ་གདམས་གང་ལེགས་དང་བཅས་སློབ་གཉེར་གྱི་ཕྱིར་མདོ་སྨད་ཀྱི་ཆོས་སྡེ་ཆེན་མོ་དྷཱིཿཚ་བཀྲ་ཤིས་ཆོས་སྡིངས་སུ་སྐྱེལ་མ་གནང་།དགོན་འདིར་ཚོགས་ལ་ཞུགས་ནས་༧རྗེ་ཡེ་ཤེས་རྒྱ་མཚོ་མཆོག་དང་།རྗེ་༧རྨོག་རུ་བ་བློ་བཟང་བསྟན་དར་སོགས་བསམ་སྦྱོར་དག་པས་ཚུལ་བཞིན་བསྟེན་ནས་བསྡུས་གྲྭ་ནས་བཟུང་གཞུང་ཆེན་ཁག་ལ་སློབ་གཉེར་དང་།ལཱ་མོའི་ཡོངས་འཛིན་རྡོ་རྗེ་འཆང་དང་སྐྱབས་རྗེ་ཨ་རྒ་རིན་པོ་ཆེ་སོགས་ལས་ལམ་ཁྲིད་དང་དབང་ལུང་མན་ངག་གི་སྐོར་མང་དུ་གསན།སྤྱི་ལོ་༡༩༩༦ལོར་ཕར་ཕྱིན་དམ་བཅའ་དང་།སྤྱི་ལོ་༡༩༩༩ལོར་དགེ་ལྡན་ལྔ་མཆོད་ཆེན་མོ་དང་འབྲེལ་བར་དཀའ་བཅུ་རབ་འབྱམས་པའི་དམ་བཅའ་བཞག་ནས་མཁས་པའི་སྙན་པ་ཕྱོགས་བཅུར་རྒྱས།སྔ་ཕྱིར་རྗེ་རྔ་བའི་གྲགས་པ་རྒྱ་མཚོ་ཚང་དང་།བཤེས་གཉེན་ཆེན་མོ་འབོ་རའི་ཡོན་ཏན་ཚང་།རྗེ་མགོ་ལོག་གྲགས་པ་ཚང་སོགས་ལས་ཀྱང་གཞུང་ཆེན་དཔེ་ཁྲིད་དང་བཀའ་ཆོས་ཀྱི་རིམ་པ་ཤིན་ཏུ་མང་བོ་གསན་བཞེས་མཛད།

སྤྱི་ལོ་༢༠༠༣ལོར་རྗེ་ཞྭ་དམར་སྐུ་ཕྲེང་བདུན་པ་བསྟན་འཛིན་དགེ་འདུན་ཕུལ་བྱུང་རྒྱ་མཚོ་མཆོག་གི་དགེ་རྒན་གྱི་ཐུགས་འགན་བཞེས།སྤྱི་ལོ་༢༠༠༤ལོར་འཛིན་གྲྭ་ཡོངས་སུ་རྫོགས་པ་མཐར་ཕྱིན་ནས་བཀའ་རམས་སུ་ཞུགས།སྤྱི་ལོ་༢༠༡༣ལོར་དགོན་འདིའི་དབྱར་གནས་བླ་མར་བཞུགས་པ་དང་།གཞན་ཡང་དགོན་དེ་གའི་ཚོགས་ཆེན་དགེ་བསྐོས་སོགས་ལས་སྣེ་ཆེ་ཕྲ་མཐའ་དག་མཐར་ཕྱིན།དྷཱིཿཚ་དགོན་པ་རུ་མི་ལོ་ཉེར་ལྔའི་རིང་ལ་དཔེ་ཁྲིད་དགེ་རྒན་གྱི་འགན་བཞེས་ཏེ་ཕྱོགས་ངེས་མེད་ནས་སློབ་གཉེར་དུ་ཕེབས་པའི་བླ་སྤྲུལ་དགེ་བཤེས་རིགས་སྨྲའི་ཚོགས་ཤིན་ཏུ་མང་བོར་མདོ་སྔགས་གཞུང་ཆེན་རྣམས་དང་།སུམ་རྟགས་དག་གསུམ།སྒྲ་སྙན་ངགརྩིས་དཀར་ནག་སོགས་རིག་གནས་ཀྱི་དཔེ་ཁྲིད།ཕྱོགས་ངེས་མེད་ནས་ཕེབས་པའི་བསྒྲུབ་བྱ་མང་བོར་རབ་བྱུང་དགེ་ཚུལ་སོགས་ཀྱི་སྡོམ་པ་འབོགས་པ་དང་།འགྲོ་འདུག་སྤྱོད་གསུམ་གྱི་བསླབ་བྱ།ལམ་རིམ་བློ་སྦྱོང་གི་མན་ངག་སོགས་ཀྱིས་སྒོ་སྣ་ཚོགས་ནས་སྐྱོང་བར་མཛད།ཕྱོགས་ཡས་མས་ཀྱི་དགོན་སྡེ་ཁག་དང་སློབ་གྲྭ་ཁག་མང་བོར་གདན་ཞུས་ལྟར་བྱོན་ནས་བསླབ་སྟོན་དང་དཔེ་ཁྲིད་མང་དུ་གནང་ཞིང་།ཆོས་རིག་དང་ཡུལ་སྲོལ་བཟང་བོ་རྒྱུན་འཛིན་དང་གོང་དུ་སྤེལ་བའི་མཛད་རྗེས་བླ་མེད་བཞག

སྤྱི་ལོ་༢༠༡༧ལོའི་ཟླ་༥བའི་ཚེས་༢༥ཉིན་ཀྲུང་ཀོ་པེ་ཅིན་མཐོ་རིམ་ནང་བསྟན་སློབ་གླིང་དང་མཚོ་སྔོན་བོད་བརྒྱུད་མཐོ་རིམ་ནང་བསྟན་སློབ་གླིང་མཚོ་སྔོན་ཞིང་ཆེན་འཐབ་སྒྲིལ་པུའུ་བཅས་ལས་ཁུངས་གསུམ་དང་།ས་དགེ་རྙིང་གསུམ་སོགས་ཀྱི་མཁས་དབང་བཅོ་ལྔ་ལྷག་གིས་གཞུང་ཆེན་བཀའ་པོད་ལྔ་རིག་གནས་དང་བཅས་པར་རྒྱུགས་བླངས་པའི་ཁྲོད་ཁོང་ལ་རྒྱུགས་འབྲས་ཨང་རིམ་དང་བོ་ཐོབ་ནས་རྒྱལ་ཡོངས་ཀྱི་ཆོས་ཀྱི་ཡོངས་འཛིན་ཞེས་པའི་ཆོ་ལོ་བཞེས།སྤྱི་ལོ་༢༠༡༦ལོའི་ཟླ་༨པའི་ཚེས་༢༥ཉིན་ནས་བཟུང་ད་ལྟའི་བར་མཚོ་སྔོན་ནང་བསྟན་སློབ་གླིང་གི་གདན་ཞུས་ལྟར་སློབ་གྲྭ་དེའི་བཀའ་བཞི་འཛིན་གྲྭའི་དགེ་རྒན་གྱི་འགན་བཞེས་ནས་སློབ་ཁྲིད་གནང་བཞིན་བཞུགས་པའི་སྐབས་ལགས་སོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn