སེང་གཤོང་དགེ་འདུན་འཇིགས་མེད་ནི།གསེར་ལྗོངས་ཡུལ་གྱི་བཟོ་རིག་འཕྲུལ་གྱི་མེ་ཏོག་བཞད་པའི་ཞིང་ཁམས་སེང་གེ་གཤོང་གཙང་ཚོ་བར་སྤྱི་ལོ་༡༩༦༩ལོའི་ཆོ་འཕྲུལ་ཟླ་བའི་ཚེས་བཅུ་གཅིག་ལ་ཕ་སྙིང་ལྕགས་དང་མ་བནྡེ་མཚོ་གཉིས་ཀྱི་བུ་རུ་སྐྱེས།ལོ་བདུན་ནས་སློབ་གྲྭར་ཞུགས།རང་ལོ་བཅུ་གསུམ་པ་སྤྱི་ལོ་༡༩༨༡ལོའི་ཧོར་ཟླ་བདུན་པའི་ཚེས་ཉེར་གཉིས་ཉིན་རོང་བོ་དགོན་ཆེན་དུ་ཤར་ཐམས་ཅད་མཁྱེན་པའི་ཡོངས་འཛིན་རྗེ་བཙུན་དགེ་འདུན་བསྟན་འཛིན་ཚང་ལས་རབ་ཏུ་བྱུང་ཞིང་སེང་གཤོང་དཔལ་ལྡན་ཆོས་འབྱོར་གླིང་དུ་ཞུགས།བཟོ་རིག་སྨྲ་མཁས་ཨ་ཁུ་སངས་རྒྱས་དང་དགེ་འདུན་འཕྲིན་ལས་ཚང་རྣམ་གཉིས་དགེ་རྒན་དུ་བསྟེན་ནས་བླ་མཆོད་དང་སྨོན་ལམ།ཀུན་རིག་དང་འཇིགས་བྱེད་ལྷ་བཅུ་གསུམ་པ།མགོན་ཆོས་རྣམ་ལྔ།ཆོས་སྤྱོད་ཆོ་ག་ཡོངས་རྫོགས་བློ་འཛིན་བྱས་ཏེ་རྒྱུགས་སྤྲད་།སྐབས་དེར་ཀུན་རིག་བདག་འཇུག་དང་བཅས་པའི་འདོན་རྟ་དབྱངས་གསུམ་ཕྱག་རྒྱ་དང་བཅས་པ་བྱང་ཆུབ་པར་གྱུར།རང་ལོ་བཅོ་ལྔའི་སྟེང་ཨ་ཁུ་སངས་རྒྱས་ཚང་བཟོ་རིག་གི་དགེ་རྒན་དུ་ཞུས་ནས་སློབ་མགོ་རྩོམ་པའི་སྐབས་དེར་བཀའ་དྲིན་མཚུངས་མེད་རྗེ་བཙུན་བློ་གསལ་རྒྱ་མཚོ་རིན་པོ་ཆེ་ཡ་མགོ་དགོན་པར་ཕེབས་ནས་བཞུགས་པའི་རིང་ཁོང་ལ་གསོལ་ཐབ་པར་བསྐོས་ནས་ཞབས་ཕྱི་སྒྲུབ་པའི་སྐལ་བཟང་ཐོབ།ཉིན་ཞིག་དགེ་རྒན་རིན་པོ་ཆེས་ལག་རིས་དང་སེན་མོར་གཟིགས་ནས་ཁྱེད་ནི་ཤེས་རབ་ཆེ་ལ་ཆོས་དོན་གཉེར་བ་ཞིག་ཡིན་ནམ་སྙམ།ཕ་མ་ཡིད་མཐུན་བྱུང་ན་ང་དང་མཉམ་དུ་འགྲོ་གསུངས།

དེ་ནས་ཡུལ་སྲོལ་གོམས་འདྲིས་ལྟར་ལྷ་བྲིས་འབུར་གྱི་ལས་ལ་ཞུགས་ནས་མི་ཚེ་བསྐྱལ་ན་རྒྱུ་འབྱོར་དཔལ་གྱི་མངའ་ཐང་ཅན་ཞིག་ཏུ་འགྱུར་མོད།ཡིན་ནའང་།དེ་འདྲའི་བསམ་པ་ལས་བཟློག་ཏེ་རབ་ཏུ་བྱུང་བའི་བྱ་བ་གཞུང་ལུགས་ལ་ཐོས་བསམ་བྱེད་འདོད་ཀྱི་བསམ་པ་ལྡོག་ཏུ་མེད་པ་སྐྱེས་པ་ལ་ཕ་མས་ཀྱང་ཡིད་འཐད་བྱུང་བས་གཙོས་དགོན་པ་དང་ཁ་གྱ་སྟོད་ཟི་ཁྲོན་སོག་ཚང་སྟོད་རྣམས་ལ་ཁོང་གི་ཞབས་འབྲིང་དུ་བསྐྱོད་དེ།ཐོག་མར་དབུ་ཅན་དབུ་མེད་ཀྱི་ཡིག་གཟུགས་འབྲི་ཚུལ་དྷཱིཿཚ་དགོན་པའི་ཁྲིད་རྒྱུན་ཁོང་གི་བླ་མ་མཁས་དབང་དཔྱི་ས་བློ་གྲོས་རྒྱ་མཚོའི་ཕྱག་རྒྱུན་ཁྲིད་པ་དང་།སུམ་རྟགས་དག་གསུམ།དཀྱིལ་འཁོར་དང་ལྷ་སྐུ་མཆོད་རྟེན་ལས་བཞི་སོགས་ཀྱི་ཐིག་རྩ།ལན་ཝར་གྱི་ཐིག་འགྲེལ་རྣམས་དང་།བསེ་བསྡུས་ཀྱི་སྟེང་ནས་རིགས་ལམ་དང་།ལམ་རིམ་དམར་ཁྲིད་དང་ཚིགས་བཅད་མ་ཀིརྟིའི་སྔགས་བསྡུས་སོགས་ཀྱི་ཁྲིད་ཐོབ།ལམ་རིམ་ཐར་འདོད་འཇུག་ངོགས་ཀྱི་ཁྲིད་ཐོབ་ཅིང་བློ་འཛིན་བྱས།ལོ་ངོ་གཉིས་ལ་སློབ་གཉེར་བགྱིད་སྐབས་དགེ་རྒན་རིན་པོ་ཆེས་སྔར་གྱི་དྷཱིཿཚ་དགོན་པའི་སློབ་གཉེར་གནང་ཚུལ་རེ་གླེང་ཚེ་མཚན་ཐོས་པ་ཙམ་གྱིས་ཡིད་སེམས་རབ་ཏུ་སྤྲོ་བས་དེར་སློབ་གཉེར་ལ་འགྲོ་འདོད་སྐྱེས།གནས་ཚུལ་དེ་ཁོང་ལ་ཞུས་པས་གནས་དེ་བདག་གི་བླ་མ་རྡོ་རྗེ་འཆང་གི་གདན་ས་ཡིན་པས་ཁྱེད་ཉིད་དེར་སོང་ན་བཟང་།དེ་ལྟ་བུའི་གྲྭ་ས་ཆེན་པོ་བསྟེན་ན་གཞུང་བཀའ་པོད་ལྔ་ལ་སློབ་གཉེར་མཐའ་ཆོད་པ་འོང་ཞེས་གསུངས་པ་ལྟར།རང་ལོ་བཅུ་བདུན་པ་སྤྱི་ལོ་༡༩༨༥ལོའི་ས་ག་ཟླ་བའི་ཡར་ཚེས་ལ་ལུང་རིགས་དབྱངས་སྙན་སྒྲོགས་པའི་ཆོས་ཀྱི་དགའ་ཚལ་དམ་པ་དྷཱིཿཚ་རི་ཁྲོད་བཀྲ་ཤིས་ཆོས་སྡིངས་སུ་ཕྱིན།མཁས་པའི་དབང་བོ་ཡོངས་འཛིན་ཞོ་འོང་བ་༧རྗེ་ཕུན་ཚོགས་དར་རྒྱས་ཚང་གི་དགྱེས་ཞལ་མཇལ།ལྔ་བའི་ཚེས་མགོ་ནས་ཐོག་མའི་ཆོས་སྐལ་འཇམ་སྡུད་བཟང་གསུམ།བསྟོད་སྤྲིན་རྒྱ་མཚོ།སྨོན་ལམ་རྣམ་ལྔ་སོགས་ཀྱི་ལུང་དང་།པྲ་ཏིའི་རྟགས་འཇུག་གི་དཔེ་ཁྲིད་སྐབས་དཔེ་བརྗོད་ཀྱང་ཕུལ།དབྱར་ཆོས་ཀྱི་མགོ་ནས་ཆོས་སྒོར་ཞུགས།བསྡུས་གཞུང་ཉི་མའི་འོད་ཟེར་སོགས་ཀྱི་སྟེང་ནས་སློབ་ཁྲིད་ཀྱི་དབུ་བརྩམས།རྒྱན་འཇུགབསྡུས་གྲྭའི་རང་ལུགས་ཡོངས་རྫོགས།བློ་རྟགས་གཉིས་ཀྱི་སྡོམ་ཚིགགྲུབ་མཐའ་རྩ་བ།ས་ལམ་ཐེག་གསུམ་མཛེས་རྒྱན་སོགས་བློ་འཛིན་བྱས།ལོ་དྲུག་ལ་བསྡུས་གྲྭ་བློ་རྟགས་ཀྱིས་མཚོན་པའི་ཚད་མའི་གཞུང་དང་གྲུབ་དོན་ས་གསུམ་སོགས་ལ་སྦྱངས།ཞོར་དུ་བཤེས་གཉེན་ཆེན་པོ་བསྟན་པའི་རྒྱལ་མཚན་ཚང་ལས་སྙན་འགྲེལ་ཡང་གསལ་སྣང་མཛོད་ཀྱི་ཁྲིད་རྒྱུན་དང་དཔེ་བརྗོད་ཀྱང་ཕུལ།ལྔ་རིག་སྨྲ་བའི་དབང་བོ་དགེ་ལེགས་རྒྱ་མཚོ་ལས་སྒྲ་རིག་པའི་བསྟན་བཅོས་དང་།སྙན་འགྲེལ་དབྱངས་ཅན་དགྱེས་གླུ།བདུད་རྩིའི་མཆོད་ཡོན།སྙན་ངག་སྤྱི་དོན་སོགས་ཀྱི་ཁྲིད་རྒྱུན་དང་།ལན་ཝར་དང་དབུ་ཅན་དབུ་མེད་ཀྱི་ཡིག་གཟུགས་མཁས་དབང་ཚེ་ཏན་ཞབས་དྲུང་ཚང་གི་ཕྱག་རྒྱུན་ཞིབ་ཏུ་སྦྱངས།

རང་ལོ་ཉི་ཤུ་བ་སྤྱི་ལོ་༡༩༨༨ལོའི་ཟླ་བཅུ་གཅིག་པའི་ཚེས་བརྒྱད་ཉིན་བཀའ་དྲིན་མཚུངས་མེད་མཁན་པོ་རིན་པོ་ཆེ་རྗེ་བཙུན་བློ་གསལ་རྒྱ་མཚོ་ཚང་ལས་བསྙེན་པར་རྫོགས།དགེ་རྒན་བཀའ་དྲིན་ཅན་ལས་ཉིད་ཀྱི་སྒྲ་རིག་མཛུབ་མོ་རི་སྟོན་གྱི་ཁྲིད་དང་།ཨ་ཀྱཱ་ཡོངས་འཛིན་པའི་སྡེབ་སྦྱོར་རིན་ཆེན་འབྱུང་གནས་ཀྱི་འགྲེལ་བ་དང་ངོ་མཚར་རྟོགས་བྱེད་རྣམས་ཀྱི་སྟེང་ནས་སུམ་རྐང་སྒྲིག་ཚུལ་ཁྲིད།བླ་བྲང་དུས་འཁོར་བ་ཨ་ཁུ་ཀ་མདོ་བསྟན་པ་ཚང་ལས་སྐར་རྩིས་རིགས་ལྡན་སྙིང་ཐིག་དང་རྒྱ་རྩིས་ལོ་ཐོ་རྣམས་ཀྱང་བསླབས།་རྗེ་བཙུན་ཡེ་ཤེས་རྒྱ་མཚོ་ཚང་།དགེ་རྒན་བཀའ་དྲིན་ཅན་དང་།རྗེ་བློ་བཟང་བསྟན་དར་ཚང་།བླ་བྲང་བཤེས་གཉེན་རྗེ་འཇམ་དབྱངས་རྒྱ་མཚོ་རྣམས་ལས་ཤེར་ཕྱིན་གཞུང་ལ་བརྩོན་པ་ལྷོད་མེད་བྱས།

རང་ལོ་ཉེར་བརྒྱད་པ་སྤྱི་ལོ་༡༩༩༦ལོའི་དགེ་ལྡན་ལྔ་མཆོད་ཆེན་མོར་ཚོགས་དབུས་སུ་མཚན་ཕུད་ཕར་ཕྱིན་དམ་བཅའ་བཞག་སྟེ་ཕར་ཕྱིན་རབ་འབྱམས་པའི་མཚན་བཏགས་བླངས།སྤྱི་ལོ་༡༩༩༧ལོ་ནས་བླ་བྲང་དགེ་བཤེས་ཆེན་མོ་གྲགས་པའི་མཚན་ཅན་ལས་མཛོད་འདུལ་དབུ་གསུམ་ལོ་ངོ་བརྒྱད་ལ་དཔེ་ཁྲིད་དང་སློབ་གཉེར་བྱས།

རང་ལོ་སོ་དྲུག་པ་སྤྱི་ལོ༢༠༠༤ལོར་བཀའ་པོད་ལྔའི་སློབ་གཉེར་གྱི་འཛིན་གྲྭ་མཐར་ཕྱིན་ཏེ་བཀའ་རམས་གོང་མར་ཞུགས།རང་ལོ་སུམ་ཅུ་བ་སྤྱི་ལོ་༡༩༩༨ལོ་ནས་ལོ་འཁོར་ལྔ་ལ་དྷཱིཿཚ་དགོན་པའི་དོ་དམ་པའི་ལས་སྣེ་དང་།རང་ལོ་སོ་གསུམ་པ་སྤྱི་ལོ་༢༠༠༡ལོར་ཚོགས་ཆེན་དགེ་བསྐོས་ཀྱི་ལས་འགན་བབས་ཏེ་དགོན་པའི་སྒྲིག་ལམ་ཀུན་སྤྱོད་དམ་འཛིན་བྱས།ལོ་འཁོར་ལྔའི་རིང་སློབ་གཉེར་ལ་རྟིང་བསྐུལ་གྱི་ཞབས་ཕྱི་བསྒྲུབས།སྤྱི་ལོ་༡༩༩༦ལོར་ཕར་ཕྱིན་དམ་བཅའ་བཞག་པ་ནས་བཟུང་ད་ལྟའི་བར་དུ།བསྡུས་གྲྭ་གསུམ་དང་བློ་རྟགས་གཉིས།ཕར་ཕྱིན་སོགས་ཀྱི་འཛིན་གྲྭ་བ་རྣམས་ལ་སྐབས་བབ་ཀྱི་དཔེ་ཁྲིད་དང་།སློབ་གྲྭ་ཆེ་ཆུང་གི་དགེ་སློབ་མང་བོར་སུམ་རྟགས་དང་།སྙན་ངགཚད་མའི་དཔེ་ཁྲིད་བྱས།རང་ལོ་སོ་གཉིས་སྟེང་དྲང་ངེས་ལེགས་བཤད་སྙིང་བོའི་ཚིག་འགྲེལ་འཇམ་དབྱངས་བླ་མ་དགྱེས་པའི་ཞལ་ལུང་ཞེས་པ་བརྩམས།

གཞན་ཡང་བླ་མ་འགའ་ཞིག་གི་རྟོགས་བརྗོད།ལྷག་ལྷ་དང་གནས་བསྟོད་ལས་འབྲས་ཀྱི་རྣམ་བཞག་སོགས་བརྩམས་ཆོས་མང་བོ་སྤེལ་བཞིན་པ་དང་།རང་ལོ་སོ་ལྔ་བ་སྤྱི་ལོ་༢༠༠༣ལོར་དགོན་པ་བཏབ་ནས་ལོ་འཁོར་བརྒྱ་ལོན་པའི་རྟེན་འབྲེལ་དང་འཁེལ་བའི་དགེ་ལྡན་ལྔ་མཆོད་ཆེན་མོར་བཀའ་པོད་གཞུང་ལ་སློབ་གཉེར་བྱས་པའི་འབྲས་རྟགས་སུ་བཀའ་བཅུ་རབ་འབྱམས་པའི་མཚན་བཏགས་ཐོབ།ཞོར་ལ་སྔ་གཞུག་ཏུ་༧གོང་ས་ལྷ་མིའི་རྣམ་འདྲེན་༧སྣང་མཐའི་སྒྱུ་འཕྲུལ་ཀུན་གཟིགས་པཎ་ཆེན་རིན་པོ་ཆེ་རྗེ་བཙུན་ཆོས་ཀྱི་རྒྱལ་མཚན་མཆོག་དང་།ལཱ་མོ་ཡོངས་འཛིན་རྡོ་རྗེ་འཆང་།བསེ་རྡོ་རྗེ་འཆང་བློ་བཟང་དཔལ་ལྡན་མཆོགགཡེར་གཤོང་རིན་པོ་ཆེ་འཇམ་དབྱངས་དགེ་འདུན་རྒྱ་མཚོ་དཔལ་བཟང་བོ།རོང་བོ་གསེར་ཁྲི་རྫོང་དཀར་རིན་པོ་ཆེ་མཁས་བཙུན་ལུང་རིགས་རྒྱ་མཚོ་མཆོགརྗེ་མགོ་ལོག་ཨ་ཁུ་གྲགས་པ་རྒྱ་མཚོ་ཚང་།རྗེ་བཙུན་འབོ་ར་ཡོན་ཏན་རྒྱ་མཚོ་ཚང་།བླ་བྲང་རྗེ་བཙུན་འཇམ་དབྱངས་རྒྱ་མཚོ་མཆོགཁྲི་རིན་པོ་ཆེ་རྗེ་བཙུན་བློ་བཟང་གྲགས་པ་རྒྱ་མཚོ་དཔལ་བཟང་བོ་སོགས་དགེ་བའི་བཤེས་གཉེན་བཅུ་ཕྲག་གཉིས་ལྷག་ལས་རྗེ་ཡབ་སྲས་གསུམ་གྱི་བཀའ་འབུམ་གྱི་ལུང་སོགས་རྒྱབ་རྟེན་ལུང་གི་དཔུང་ཚོགས།དུས་འཁོར་དབང་ཆེན་ཚར་དགུ་དང་བདེ་གསང་འཇིགས་གསུམ།རྡོར་ཕྲེང་སོགས་སྨིན་བྱེད་དབང་དང་།རྗེས་གནང་།ལམ་སྔགས་སོགས་གྲོལ་བྱེད་ཀྱི་ཁྲིད།བླ་ཕྱག་སྦྲགས་ཁྲིད་སོགས་སྙན་བརྒྱུད་གསེར་གྱི་ཡང་ཞུན་མན་ངག་བདུད་རྩིའི་རྒྱུན་བཟང་དཀོན་པོ་གང་མང་ཆེད་གཉེར་གྱིས་ཉན་པ་དང་།སྤྱི་ལོ་༢༠༠༥ལོའི་ཧོར་ཟླ་བཅུ་བའི་ནང་བལ་ཡུལ་གྱི་གནས་མཇལ་བརྒྱུད་དེ་རྒྱ་གར་འཕགས་པའི་ཡུལ་དུ་འབྱོར་ནས་ལོ་ཕྱེད་ལ་༧གོང་ས་ཡིད་བཞིན་ནོར་བུ་མཆོག་ལ་གཟིམ་ཆུང་ཕྱག་དབང་དང་ཚེ་བུམ་དངོས་འབུལ།དཔལ་ལྡན་འབྲས་སྤུངས་མཆོད་རྟེན་མདུན་དུ་རྩ་ཤེས་ཀྱི་གསུང་ཆོས་དང་དུས་དབང་རྟེན་འབྲེལ་བསྟོད་པ་དང་འཇམ་དཔལ་མཚན་བརྗོད་བཅས་ཀྱི་བཤད་ལུང་།བཞུགས་སྒར་རྡ་རམ་ས་ལར་བསླབ་སྤྱོད་སྦྲགས་པའི་བཤད་ལུང་བཀའ་གདམས་ཐིག་ལེ་བཅུ་དྲུག་གི་དབང་སོགས་ཀྱི་གསུང་ཆོས་ཐོབ།རྡོ་རྗེ་གདན་དང་དཔལ་གྱི་རི།ཨ་ཆེན་ཏ་ཨེ་ལོ་ར་གྲུབ་ཆེན་བརྒྱད་ཅུའི་གནས་སོགས་ལ་གནས་མཇལ་བླངས།

སྤྱི་ལོ་༢༠༠༧ལོར་བཀའ་བཅུ་རབ་འབྱམས་པ་དགེ་འདུན་ཐབས་མཁས་དང་ལྷག་བསམ་ཅན་དགེ་སློང་བློ་གྲོས་རྒྱ་མཚོ་རྣམ་གཉིས་དང་ལྷན་དུ་ཕ་ཡུལ་སེང་གཤོང་སློབ་གྲྭར་དབྱར་དགུན་གནང་ལ་ཟླ་རེར་ཟབ་སྦྱོང་འཛིན་གྲྭ་བཙུགས་ཏེ་ལོ་ངོ་གསུམ་རིང་རང་ཉིད་ཀྱིས་སློབ་ཁྲིད་ཀྱི་རྒྱུན་འཁྱོངས་བྱས་པར་མ་ཟད།ལོ་དེར་བྱམས་བརྩེ་དམངས་སྐྱོང་ཚོགས་པ་གསར་དུ་བཙུགས་ཤིང་སྤྱི་ལོ་༢༠༡༠ལོའི་ཟླ་༡༠བའི་ཚེས་༡༠ཉིན་ཁུལ་རིམ་པའི་ཆོག་མཆན་ཐོབ།རིམ་གྱིས་ཚོགས་མི་སྟོང་ལྷག་འདུས་པས་སེང་གཤོང་ཡུལ་དུ་བྱམས་སྐྱོང་བུ་གསོ་ཁང་དང་བོ་དང་གཉིས་པ་གསུམ་པ་བཞི་བ་ལྔ་བ་རྣམས་རིམ་བཞིན་བཙུགས་ཏེ་བྱིས་པའི་སློབ་མ་སྟོང་ལ་ཉེ་བ་གསོ་སྐྱོང་གི་ལས་འཛིན་བྱེད་བཞིན་པ་དང་།སེང་གཤོང་གོང་འོག་གི་བསྒྲུབ་བྱ་བརྒྱ་ཕྲག་དུ་མར་དགེ་བསྙེན་གྱི་སྡོམ་པ་བསྩལ་པར་མ་ཟད།བྱམས་སྐྱོང་ཚོགས་པའི་བཀོད་སྒྲིག་ལྟར་ལོ་རེར་ལམ་རིམ་དང་སྤྱོད་འཇུགབློ་སྦྱོང་དང་སློབ་གསོ་སོགས་ཀྱི་ནང་ཆོས་ངོ་སྤྲོད་དང་།

སྤྱི་ལོ་༢༠༠༨ལོར་ཁོ་བོའི་རེ་འདོད་ལྟར་བཀྲ་ཤིས་ཆོས་སྡིངས་སུ་སྟོན་ཆོས་ཆེན་མོའི་སྦྱིན་བདག་བཙལ་བ་ལ་བརྟེན་ནས་ཉིན་ཉི་ཤུ་ཅན་གྱི་རྣམ་འགྲེལ་ཆོས་ཐོག་གསར་དུ་བཙུགས་ཏེ་ལོ་བཞི་ལ་བསྙེན་བཀུར་ཞུས་པར་མ་ཟད་མཐུན་རྐྱེན་ལ་དམངས་སྒོར་ཁྲི་ཕྲག་ཉི་ཤུའི་རྒྱུན་འཇོག་ཕུལ།

སྤྱི་ལོ་༢༠༠༩ལོར་དོ་དམ་ཁང་གི་དོ་དམ་པར་ཡང་བསྐྱར་བསྐོས་ཏེ་ལོ་ངོ་གསུམ་གྱི་རིང་འདུ་ཁང་ཆེན་མོ་བསྐྱར་བཞེངས་ཀྱི་ཐད་ལ་རང་ནུས་ཡོད་རྒུ་བཏོན་པའི་ཞོར་དུ།དམངས་སྒོར་ཁྲི་ཕྲག་དྲུག་ཅུ་ལྷག་གིས་གསོ་རིག་གཞན་ཕན་གླིང་ཁང་མིག་ལྔ་ཅན་གྱི་ཉིས་ཐོག་ཆེན་མོ་དང་སྨན་གྱི་མ་དངུལ་སོགས་ཀྱི་མཐུན་རྐྱེན་གསར་དུ་བསྐྲུན།

སྤྱི་ལོ་༢༠༡༠ལོར་དམངས་སྒོར་ཁྲི་བདུན་ཅུ་ལྷག་གིས་ཆོས་རིག་རིན་ཆེན་གླིང་གི་སློབ་ཁང་དང་དཔེ་མཛོད་ཁང་ལུས་རྩལ་ར་བ་སོགས་གསར་བཞེངས་བགྱིས་ཏེ་ཡུལ་ཕྱོགས་རིས་མེད་ཀྱི་སྐྱ་སེར་དགེ་སློབ་དག་ལ་ཤིན་ཏུ་ཕན་པའི་ཟབ་སྦྱོང་འཛིན་གྲྭ་བསྡུ་བའི་ཁོར་ཡུག་བསྐྲུན།སྤྱི་ལོ་༢༠༡༣ལོར་རིགས་གསུམ་མགོན་པོའི་ལྷ་ཁང་ཀུན་གཟིགས་རིག་པའི་སྐྱེད་ཚལ་གྱི་རྟེན་གཙོ་རྨིད་དྲུག་ཅན་གྱི་འཇམ་དབྱངས་དམར་སེར་གྱི་སྐུ་བརྙན་ཆེན་མོ་ལ་པཎ་གྲུབ་བཅུ་བདུན་གྱིས་བསྐོར་བ་བཅས་གསར་བཞེངས་ལ་སྒོར་ཁྲི་བཞི་བཅུར་ཉེ་བ་དང་།འདུ་ཁང་ཆེན་མོའི་རྗེ་རིན་པོ་ཆེའི་ལི་སྐུ་རྨིད་ཁྲུ་ཕྱེད་དང་ལྔ་གསར་བཞེངས་ལ་སྒོར་ཁྲི་ཕྲག་བཞི་བཅུ་དང་།འཇམ་དབྱངས་ཀུན་གཟིགས་བཞེངས་ཐེབས་སུ་སྒོར་ཁྲི་བཅུ་ཕུལ་པ་སོགས་ཀྱི་སྦྱིན་བདག་བཙལ་ཏེ་རྟེན་གསུམ་མང་དུ་བཞེངས།

སྤྱི་ལོ་༢༠༡༥ལོར་རང་དགོན་གྱི་གསར་དུ་བཞེངས་པའི་འདུ་ཁང་ཆེན་མོ་ཙོང་ཁའི་རྒྱན་གཅིག་ཅེས་པ་ལེགས་གྲུབ་བྱུང་བར་ཐོག་མའི་བླ་མ་གཞུང་ལས་པའི་འགན་འཁྲི་བགྱིས།མཛད་སྒོའི་སྟེང་དྷཱིཿཚ་དགོན་པའི་གདན་རབས་མདོར་བསྡུས་དང་ཀུན་གཟིགས་རིག་པའི་སྐྱེད་ཚལ་གྱི་དཀར་ཆག་གི་དེབ་གཅིག་བརྩམས་པ་འགྲེམ་སྤེལ་བྱས།

སྤྱི་ལོ་༢༠༡༦ལོར་བདེ་གསང་འཇིགས་གསུམ་གྱི་བསྐྱེད་རྫོགས་ཀྱི་བཤད་ལུང་དང་དམིགས་བརྩེ་མའི་བེའུ་བུམ་པོད་གསུམ་དང་།རས་ཆུང་སྙན་བརྒྱུད་པོད་བཞི་སོགས་ཀྱི་ལུང་།སྟག་ཕུ་དག་སྣང་བཅུ་གསུམ་སོགས་ཀྱི་བཀའ་ཆོས་མང་དུ་ཉན།སྤྱི་ལོ་༢༠༡༧ལོར་དྷཱིཿཚ་དགོན་པའི་གདན་རབས་དཔག་བསམ་འཁྲི་ཤིང་ཞེས་པའི་པོད་གཅིག་ཀྱང་བརྩམས།རང་ལོ་ཉེར་གཅིག་ནས་ཞོགས་པར་བརྒྱ་རྩའི་མགོ་བརྩམས་པ་དང་།སྔ་མོར་མཆོད་པ་བརྒྱ་མཆོད་དགོང་མོར་མཆོད་མེ་འབུལ་བ་འཇིགས་བྱེད་ཀྱི་ཁ་ཏོན་སོགས་རི་ཁྲོད་པའི་ཕྱག་བཞེས་རྒྱུན་འཁྱོངས་བྱས་ཤིང་།རི་བོ་རྩེ་ལྔར་སྔ་ཕྱི་དུ་མར་མཇལ་ནས་འཇམ་དབྱངས་དཀར་དམར་གྱི་བསྙེན་སྒྲུབ་ཕྱག་བསྐོར་དང་།རང་དགོན་དུའང་ལྷག་ལྷ་དུ་མའི་བསྙེན་སྒྲུབ་སོགས་གཞུང་དོན་རྟོགས་པའི་བསགས་སྦྱངས་ལ་འབད་པ་བྱེད་ཁུལ་དང་།རང་དགོན་དུ་ལོ་ངོ་ཉི་ཤུ་ལ་ཉེ་བར་འཛིན་གྲྭ་སོ་སོ་ལ་སྐབས་བབ་ཀྱི་བཀའ་པོད་ལྔའི་དཔེ་ཁྲིད་དང་།ལམ་རིམ་བློ་སྦྱོང་སོགས་ཀྱི་ཁྲིད་ལུང་།སློབ་གྲྭ་ཆེ་ཆུང་གི་དགེ་སློབ་སྐོར་ཐེངས་མང་བོ་དང་།གྲྭ་རིགས་སྐོར་ཅིག་ལ་ཡིག་གཟུགས་སྣ་ཚོགས་དང་ཐིག་རྩ་སུམ་རྟགས་སྙན་ངག་སོགས་ཐུན་མིན་ཐུན་མོང་གི་རིག་གནས་སྣ་ཚོགས་ཀྱི་སློབ་ཁྲིད་དང་རྣམ་གཡེང་གིས་དུས་འདའ་བར་བྱེད་དོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn