བཀའ་བཅུ་རབ་འབྱམས་པ་སེང་གཤོང་དགེ་འདུན་ཐབས་མཁས་ལགས་ནི།རེབ་གོང་རིག་པ་འབྱུང་བའི་གྲོང་ཁྱེར་གྱི་སེང་གེ་གཤོང་ཡ་མགོ་སྡེ་བའི་གཡུ་ཚོ་བར་ལྷ་རིས་སྒྱུ་རྩལ་ལ་ནང་བྱན་ཆུད་པའི་ཡབ་རིན་ཆེན་དང་ཡུམ་མཁའ་མོ་སྐྱིད་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ས་ཕོ་སྤྲེལ་སྤྱི་ལོ་༡༩༦༨ལོའི་ཧོར་ཟླ་༣པའི་ཚེས་༣ལ་སྐུ་འཁྲུངས།དགུང་ལོ་བདུན་པ་སྤྱི་ལོ་༡༩༧༤ལོར་སློབ་ཆུང་དུ་ཞུགས་ཏེ་ཕྲལ་སྦྱོར་གྱི་ཀློག་བསླབས་ཤིང་།རྒྱ་ཡིག་དང་རྩིས་རིག་སོགས་ལའང་སྦྱངས།ན་ཚོད་གཞོན་པའི་དུས་ནས་ལྷན་སྐྱེས་ཀྱི་ངེས་འབྱུང་གིས་ཡིད་བསྐུལ་ཏེ།མདོ་སྨད་ཡུལ་གྱི་སྒྲུབ་པའི་ཤིང་རྟ་བ་ཆེན་པོ་རྣམ་འདྲེན་བླ་མ་༧ཡབ་རྗེ་སྐལ་ལྡན་རྒྱ་མཚོའི་སྤྲུལ་རབས་བརྒྱད་པ་མཆོག་གི་ཡོངས་འཛིན་༧རྗེ་བཙུན་དགེ་འདུན་བསྟན་འཛིན་དཔལ་བཟང་བོའི་སྤྱན་སྔར་དགུང་ལོ་བཅུ་གསུམ་པ་སྤྱི་ལོ་༡༩༨༠ལོའི་སྟོན་པ་ལྷ་ལས་བབས་པའི་དུས་ཆེན་ཁྱད་པར་ཅན་གྱི་ཉིན་དགེ་བསྙེན་དང་བར་མ་རབ་བྱུང་།དགེ་ཚུལ་རྣམས་དཀྱུས་གཅིག་ཏུ་བསྒྲུབས།དེ་ནས་སེང་གཤོང་ཡ་མགོ་དཔལ་ལྡན་ཆོས་འབྱོར་གླིང་གི་ཆོས་སྒོར་ཞུགས་ཏེ་སྐྱབས་འགྲོ་དང་བླ་མཆོད།སྨོན་ལམ་རྣམ་ལྔ།ཀུན་རིགའཇིགས་བྱེད་ལྷ་བཅུ་གསུམ་པ།མགོན་ཆོས་སོགས་ཀྱི་ཆོ་ག་དང་ཆོས་སྤྱོད་སོགས་ཚོགས་འདོན་མཐའ་དག་ཐུགས་འཛིན་གནང་ཞིང་འདོན་རྟ་དབྱངས་གསུམ་སོགས་ལ་ཞིབ་ཏུ་བསླབས།གསུང་རབ་ཀྱི་དགོངས་དོན་ལ་གཏུགས་པ་མེད་པའི་མཁྱེན་རབ་ཀྱི་རྩལ་རྫོགས་པའི་བླ་མ་དམ་པ་༧རྗེ་བཙུན་བློ་གསལ་རྒྱ་མཚོ་དཔལ་བཟང་བོ་དང་།བླ་མ་བཀའ་འགྱུར་བ་༧རྗེ་བསྟན་པའི་རྒྱལ་མཚན་དཔལ་བཟང་བོ་རྣམ་གཉིས་ལས་བདེ་གསང་འཇིགས་གསུམ་དང་།ཀུན་རིགརྣམ་སྣང་མངོན་བྱང་།ས་བདག་ལྟོ་འཕྱེ་དང་མཆོད་རྟེན་སོགས་ཀྱི་ཐིག་རྩ།སྐྱབས་ཁྲིད་དང་ལམ་རིམ་བློ་སྦྱོང་སྐོར་གྱི་གཟབ་ཁྲིད་ལན་མང་ཐོབ།༧རྗེ་བློ་གསལ་རྒྱ་མཚོ་མཆོག་གིས་གཞུང་ཆེན་བཀའ་པོད་ལྔ་ལ་སློབ་གཉེར་བྱེད་རྒྱུ་ཤིན་ཏུ་གལ་ཆེན་ཡིན་པའི་སྐོར་གྱི་བཀའ་སློབ་གནང་བ་གསན་འཕྲལ་གཞུང་ཆེན་པོ་ཏི་ལྔ་ལ་སློབ་འདོད་ཀྱི་འདུན་པ་བཟློག་ཏུ་མེད་པ་འཁྲུངས་ཤིང་།དགུང་ལོ་བཅུ་བདུན་པ་སྤྱི་ལོ་༡༩༨༤ལོར་ཡབ་རྗེ་བླ་མ་རྡོ་རྗེ་འཆང་རྗེ་བཙུན་དགེ་འདུན་བསྟན་འཛིན་རྒྱ་མཚོ་དཔལ་བཟང་བོ་མཆོག་གི་གདན་ས་དྷཱིཿཚ་དགེ་ལྡན་བཀྲ་ཤིས་ཆོས་སྡིངས་སུ་ཕེབས་ཏེ།༧རྗེ་ཞྭ་དམར་སྐུ་ཕྲེང་དྲུག་པ་མཆོག་གི་ཡོངས་འཛིན་རིན་པོ་ཆེ་༧རྗེ་བཙུན་ཕུན་ཚོགས་དར་རྒྱས་དཔལ་བཟང་བོ་མཆོག་གི་དགྱེས་ཞལ་ཐོག་མར་མཇལ།ཁོང་གིས་ཐུགས་བརྩེ་བ་ཆེན་པོས་རྗེས་སུ་བཟུང་སྟེ་རིག་གནས་རྒྱ་མཚོའི་ཕྲེང་འཛིན་ཨ་ཁུ་རིན་པོ་ཆེ་རྗེ་དགེ་ལེགས་རྒྱ་མཚོ་ཚང་གི་གམ་དུ་བསྐྱལ།

དགུང་ལོ་ཉེར་གཅིག་པ་སྤྱི་ལོ་༡༩༨༨ལོའི་ཧོར་ཟླ་༦པའི་ཚེས་༤ཆོས་འཁོར་བསྐོར་བའི་དུས་ཆེན་ཉིན།སྐྱབས་རྗེ་ཡོངས་འཛིན་རིན་པོ་ཆེ་༧རྗེ་ཕུན་ཚོགས་དར་རྒྱས་མཆོག་ལས་བསྙེན་རྫོགས་ཀྱི་སྡོམ་པ་ལེགས་པར་བཞེས།དེ་ནས་བཟུང་ཡོངས་འཛིན་དམ་པ་ཁོང་དང་།རྗེ་བཙུན་ཡེ་ཤེས་རྒྱ་མཚོ་དཔལ་བཟང་བོ།རྗེ་བཙུན་བློ་བཟང་བསྟན་དར་བ།རྗེ་བཙུན་རྔ་བ་གྲགས་པ་རྒྱ་མཚོ་སོགས་ཀྱི་ཞབས་པད་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་ལོ་ངོ་ཉི་ཤུ་ལྷག་གི་རིང་ལ་རྗེ་ཡབ་སྲས་གསུམ་དང་ཀུན་མཁྱེན་འཇམ་དབྱངས་བཞད་པ་ཡབ་སྲས་ཀྱི་གསུང་གཙོ་བོར་གྱུར་པའི་འཕགས་བོད་ཀྱི་མཁས་གྲུབ་ཚད་ལྡན་དག་གིས་མཛད་པའི་གཞུང་ཆེན་མང་བོ་གུང་བསྒྲིགས་ཏེ་གཟིགས་རྟོག་མཛད།ཁྱད་པར་དུ་མདོ་ཕྱོགས་བཀའ་པོད་ལྔ་ལ་ཆོས་གྲྭ་ཆག་མེད་དུ་འགྲིམས་པའི་སྒོ་ནས་ཐོས་བསམ་རྒྱ་ཆེར་མཛད་ཅིང་།སྔགས་ཀྱི་ས་ལམ་དང་སྤྱི་དོན།བདེ་གསང་འཇིགས་གསུམ་གྱི་རིམ་གཉིས་ཀྱི་ཁྲིད།སྔགས་རིམ་ཆེན་མོ།འགྲེལ་བ་བཞི་སྦྲགས།རིམ་ལྔ་གསལ་སྒྲོན།སྦས་དོན་ཀུན་གསལ་སོགས་ཀྱིས་མཚོན་པའི་གསང་ཆེན་རྒྱུད་སྡེ་བཞི་ལ་འབད་བརྩོན་ལྷོད་མེད་ཀྱི་ངང་ནས་སློབ་གཉེར་རྡོ་རུས་ཐུག་པ་གནང་།སྔ་ཕྱིར་བསྡུས་གྲྭའི་གཞུང་ཚན་མང་བོ་དང་བློ་རྟགས་སོགས་ཀྱི་སྡོམ།གྲུབ་མཐའ་རྩ་བ།རྒྱན་འཇུགའགྲེལ་བ་དོན་གསལ།དྲང་ངེས་ཀྱི་སེམས་ཙམ་སྐོར།མངོན་པ་མཛོད་ཀྱི་རྩ་བ་སོགས་རྒྱ་བོད་ཀྱི་གཞུང་ཆེན་མང་བོ་ཐུགས་ལ་བྱང་བར་བཟུང་སྟེ་སྐྱོར་སྦྱང་ཆག་མེད་མཛད།ཞར་ལ་དབུ་ཅན་དང་དབུ་མེད།ལཉྫ་དང་ཝརྟུ་སོགས་ཀྱི་ཡིག་གཟུགས་སྣ་ཚོགས།སུམ་རྟགས་དག་གསུམ།སྒྲ་རིག་པ།སྙན་ངགམངོན་བརྗོད་སོགས་ཐུན་མོང་རིག་གནས་ཀྱི་སྐོར་ལའང་སྦྱངས་པ་དཔྱིས་ཕྱིན་པ་མཛད།

དགུང་ལོ་ཉེར་དྲུག་པ་སྤྱི་ལོ་༡༩༩༣ལོར་བླ་མ་རིན་པོ་ཆེ་རྗེ་བཙུན་ཡེ་ཤེས་རྒྱ་མཚོ་དཔལ་བཟང་བོ་མཆོག་གིས་འཆད་ཉན་གོང་འཕེལ་ལ་དམིགས་ནས་སྡེ་འདིར་ཚོགས་གླེང་བྱེད་པའི་སྲོལ་གསར་དུ་བཙུགས་ཤིང་ལོ་དེའི་ཆུ་སྟོད་ཟླ་བའི་ཚེས་བཞི་སྟེ་ཆོས་འཁོར་བསྐོར་བའི་དུས་ཆེན་ཁྱད་པར་ཅན་གྱི་ཉིན།མཁས་མང་བརྒྱ་ཕྲག་གདན་འཛོམས་པའི་དབུས་སུ་དྲི་མ་མེད་པའི་ལུང་དང་རིགས་པའི་ལམ་ནས།ཤེར་ཕྱིན་གྱི་ཆོས་འཁོར་ལས་བརྩམས་ཏེ་ཆོས་སྡེ་འདིར་ཚོགས་གླེང་ཐེངས་དང་བོ་མཛད་པ་གྲྭ་ཚང་རིན་པོ་ཆེ་ཐུགས་མཉེས་པའི་མཆོད་སྤྲིན་དུ་གྱུར།ཉིན་དེར་བླ་མ་རིན་པོ་ཆེ་ཐུགས་དགྱེས་པའི་རྩེར་སོན་ཏེ་བསྟོད་བསྔགས་ཚད་མེད་གནང་།དགུང་ལོ་ཉེར་དགུ་བ་སྤྱི་ལོ་༡༩༩༦ལོར་གྲྭ་ཚང་རིན་པོ་ཆེའི་དགེ་འདུན་མཁས་མང་འདུས་པའི་དབུས་སུ་ཕར་ཕྱིན་རབ་འབྱམས་པའི་དམ་བཅའ་མཛད་ཅིང་།གཟུར་གནས་རིགས་སྨྲ་ཡོངས་ཀྱིས་བསྔགས་བརྗོད་ཀྱི་མེ་ཏོག་གཏོར།དེ་ནས་བཟུང་འཛིན་གྲྭ་སོ་སོར་སྐབས་བབ་ཀྱི་རྩོད་མཚམས་དང་།ལམ་ཁྲིད་དགེ་ལེགས་འོད་སྣང་འགྱེད་པའི་ཉིན་བྱེད་ཀྱིས་མཚོན་པའི་ལམ་རིམ་བློ་སྦྱོང་སོགས་མདོ་སྔགས་རིག་གསུམ་གྱིས་བསྡུས་པའི་གཞུང་ལུགས་སྣ་ཚོགས་ཀྱི་འཆད་ཁྲིད་ད་ལྟའི་བར་དུ་བསྐྱངས།དགུང་ལོ་སོ་གཉིས་པ་སྤྱི་ལོ་༡༩༩༩ལོར་ཁྲི་རིན་པོ་ཆེ་མཆོག་གིས་བཀའ་ཕེབས་པ་ལྟར།ལོ་དེའི་དགའ་ལྡན་ལྔ་མཆོད་ཆེན་མོ་དང་འབྲེལ་བར་གྲྭ་ཚང་རིན་པོ་ཆེའི་དབུས་སུ་དམ་བཅའ་ལེགས་པར་མཛད་དེ།བཀའ་བཅུ་རབ་འབྱམས་པའི་མཚན་བཏགས་བཞེས།དགུང་ལོ་སོ་ལྔ་བ་སྤྱི་ལོ་༢༠༠༢ལོར་ཚོགས་ཆེན་དགེ་བསྐོས་ཀྱི་འགན་བཞེས་ཏེ་ཚོགས་དང་ཆོས་གྲྭའི་སྒྲིག་ལམ་ཀུན་སྤྱོད་སོགས་ལ་རྟིང་བསྐུལ་ནན་ཏན་མཛད་ནས་འཆད་ཉན་ཡར་རྒྱས་སུ་བསྐྱངས།

དགུང་ལོ་སོ་བརྒྱད་པ་སྤྱི་ལོ་༢༠༠༥ལོར་རྒྱ་གར་འཕགས་པའི་ཡུལ་དུ་ཕྱིན་ཏེ།ཟླ་ངོ་དྲུག་གི་རིང་ལ་མཉམ་མེད་ཐུབ་པའི་དབང་བོ་མངོན་པར་རྫོགས་པར་སངས་རྒྱས་པའི་གནས་མཆོག་རྡོ་རྗེ་གདན་གྱིས་གཙོས་གནས་ཆེན་བརྒྱད་དང་གྲུབ་ཆེན་བརྒྱད་ཅུའི་སྒྲུབ་གནས་སོགས་ལ་གནས་མཇལ་དང་རྟེན་གཙོ་ཁག་ལ་མཆོད་མཇལ་ལེགས་པར་གྲུབ།སྤྱོད་འཇུག་ཆེན་མོ་དང་བསླབ་བཏུས་སོགས་ཀྱི་ཁྲིད་དང་བཤད་ལུང་།བཀའ་གདམས་ཐིག་ལེ་བཅུ་དྲུག་གི་དབང་སོགས་ཆོས་རྒྱུན་རྣམ་དག་གང་མང་གསན་བཞེས་མཛད།དགུང་ལོ་སོ་དགུ་བ་སྤྱི་ལོ་༢༠༠༦ལོ་ནས་ལོ་འཁོར་གསུམ་གྱི་རིང་ལ་དགོན་པའི་དོ་དམ་ཁང་དུ་གྲྭ་ཚང་རིན་པོ་ཆེའི་ཆོས་སྲིད་ལེགས་ཚོགས་ལ་དམིགས་ནས་ལྷག་བསམ་རྣམ་དག་གིས་ཞབས་ཕྱི་ཚུལ་བཞིན་དུ་བསྒྲུབས།སྤྱི་ལོ་༢༠༠༧ལོ་ནས་བཀའ་བཅུ་རབ་འབྱམས་པའི་དགེ་བཤེས་དགེ་འདུན་འཇིགས་མེད་ཚང་དང་རབ་འབྱམས་པ་བློ་གྲོས་རྒྱ་མཚོ་བཅས་ཀྱིས་ཕ་ཡུལ་དུ་ཟབ་སྦྱོང་འཛིན་གྲྭ་བཙུགས་ནས་སློབ་མ་རྣམས་ཀྱི་འདོད་མོས་ལྟར་བརྡ་སྤྲོད་སོགས་ཀྱི་གཞུང་ལུགས་མང་བོའི་འཆད་ཁྲིད་གང་མང་སྤེལ།སྤྱི་ལོ་༢༠༡༠ལོར་ཕ་ཡུལ་དུ་བྱམས་བརྩེ་དམངས་སྐྱོང་ཚོགས་པ་བཙུགས་ཤིང་བོད་ཀྱི་བྱིས་པའི་སློབ་གསོ་ལ་དམིགས་ནས་བྱིས་གཉོར་ཁང་དང་བོ་དང་གཉིས་པ།གསུམ་པ་བཅས་རིམ་བཞིན་བཙུགས་ཏེ་ད་ལྟའི་བར་དུ་ལེགས་པར་བསྐྱངས།མི་དམངས་ཀྱིས་དགའ་བསུ་ཚད་མེད་ཐོབ་ཅིང་མི་འགྱངས་པར་བྱིས་གཉོར་ཁང་བཞི་བ་དང་ལྔ་བ་སོགས་སློབ་གསོའི་དགོས་མཁོ་དང་བསྟུན་ནས་བསྐྲུན་འཆར་ཡོད།སྡེ་མི་རྣམས་ཀྱི་རེ་འདོད་ལྟར་ལོ་རེ་བཞིན་དུ་སྐྱབས་འགྲོ་དང་ལས་འབྲས་ཀྱི་ཚུལ་ལས་བརྩམས་པའི་ནང་ཆོས་ངོ་སྤྲོད།ལམ་རིམ་བདེ་ལམ་དང་དམར་ཁྲིད།འཇིག་རྟེན་མི་ཆོས་ཀྱི་བསླབ་བྱ་སོགས་ཀྱིས་མཚོན་པའི་ཆོས་སྦྱིན་ལན་མང་དུ་བསྩལ།གཞན་ཡང་དགེ་བསྙེན་དང་བསྙེན་གནས་སོགས་ཀྱི་སྡོམ་པ་བསྩལ་ཏེ་རྒྱུད་ལ་ཐར་བའི་ས་བོན་བསྐྲུན་ཅིང་འཁོར་བ་མཐའ་ཅན་དུ་བྱས་པའང་སྟོང་ཕྲག་ལས་བརྒལ་བ་བྱུང་།

དགུང་ལོ་ཞེ་བཞི་བ་སྤྱི་ལོ་༢༠༡༡ལོར་ཁྲི་རིན་པོ་ཆེའི་བཀའ་གསུང་ལྟར་བླ་མ་གཞུང་ལས་པའི་ཐུགས་འགན་བཞེས་ཏེ་གཞི་གསུམ་གྱི་ཉམས་ལེན་དམ་པ་གོང་མའི་ཕྱག་བཞེས་བཞིན་མ་ཉམས་པར་བསྐྱངས།སྔ་གཞུག་ཏུ་༧གོང་ས་ལྷ་མིའི་རྣམ་འདྲེན་སྣང་མཐའི་སྒྱུ་འཕྲུལ་ཀུན་གཟིགས་པཎ་ཆེན་རིན་པོ་ཆེ་རྗེ་བཙུན་ཆོས་ཀྱི་རྒྱལ་མཚན་མཆོག་དང་།རྡོ་རྗེ་འཆང་ལཱ་མོ་ཡོངས་འཛིན་རིན་པོ་ཆེ།མཁས་དབང་ཚེ་ཏན་ཞབས་དྲུང་འཇིགས་མེད་རིགས་པའི་བློ་གྲོས་མཆོགབསེ་རྡོ་རྗེ་འཆང་བློ་བཟང་དཔལ་ལྡན་མཆོགགཡེར་གཤོང་རིན་པོ་ཆེ་འཇམ་དབྱངས་དགེ་འདུན་རྒྱ་མཚོ་དཔལ་བཟང་བོ།བྱང་རྩེ་མཁན་པོ་རྗེ་བཙུན་དགེ་འདུན་བཟང་བོ་མཆོགརོང་བོ་གསེར་ཁྲི་རྫོང་དཀར་རིན་པོ་ཆེ་མཁས་བཙུན་ལུང་རིགས་རྒྱ་མཚོ་མཆོགརྗེ་མགོ་ལོག་ཨ་ཁུ་གྲགས་པ་ཚང་།རྗེ་བཙུན་འབོ་རའི་ཡོན་ཏན་རྒྱ་མཚོ་ཚང་།བླ་བྲང་རྗེ་བཙུན་འཇམ་དབྱངས་རྒྱ་མཚོ་མཆོགརྗེ་བཙུན་བློ་བཟང་གྲགས་པ་རྒྱ་མཚོ་དཔལ་བཟང་བོ་སོགས་བཀའ་དྲིན་མཚུངས་ཟླ་མ་མཆིས་པའི་སངས་རྒྱས་དངོས་དང་འདྲ་བའི་དགེ་བའི་བཤེས་གཉེན་བཅུ་ཕྲག་གཉིས་ལྷག་ལས་དུས་འཁོར་དབང་ཆེན་དང་རྡོ་རྗེ་ཕྲེང་བ།བདེ་གསང་འཇིགས་གསུམ།སྒྲུབ་ཐབས་རིན་འབྱུང་།ཞལ་རྣམ་འགྱུར་བཅུ་བདུན།སེམས་བསྐྱེད་ཆོ་གའཇམ་དབྱངས་ཆོས་སྐོར།མགོན་བཀའ་བཅུ་གསུམ།རྣམ་སྲས་བཀའ་བཅོ་ལྔས་མཚོན་སྤྱི་ཟུར་གྱི་དབང་དང་རྗེས་གནང་སོགས་གང་མང་གསན།གཞན་ཡང་རྗེ་ཡབ་སྲས་གསུམ་གྱི་བཀའ་འབུམ་དང་།དམིགས་བརྩེ་མའི་བེའུ་བུམ།ཞང་སྟོན་བསྟན་པ་རྒྱ་མཚོའི་གསུང་འབུམ་སོགས་ཀྱི་བཀླག་ལུང་གིས་མཚོན་པའི་རྒྱ་བོད་ཀྱི་མཁས་གྲུབ་དག་གི་གཞུང་རྣམས་ལས་བཤད་ལུང་དང་ཁྲིད་སོགས་ཀྱི་ཆོས་རྒྱུན་དཀོན་པོ་གང་མང་ཆེད་གཉེར་གྱིས་གསན་བཞེས་མཛད་ཅིང་།ལོང་ནམ་ཡོད་ལ་ལྷག་ལྷ་དུ་མའི་བསྙེན་སྒྲུབ་ཚད་ལྡན་ཡང་མང་དུ་བཏང་།

ད་ལྟའང་དྷཱིཿཚ་བཀྲ་ཤིས་ཆོས་སྡིངས་སུ་མདོ་སྔགས་ཡོངས་སུ་རྫོགས་པའི་སྒྲུབ་པ་ལ་རྩེ་གཅིག་ཏུ་གཞོལ་བའི་ཞར་ལ།སྐྱ་སེར་རིས་མེད་ཀྱི་སློབ་བུ་རྣམས་ལ་སྐྱབས་ཁྲིད་དང་ལམ་རིམ་ཁྲིད་ཆེན་བརྒྱད།སྤྱོད་འཇུག་ཆེན་མོ།གཞུང་ཆེན་པོ་ཏི་ལྔའི་རྩ་འགྲེལ་རྣམས་ཀྱི་ཁྲིད་དང་ཞལ་ལུང་སོགས་གང་ལ་གང་འཚམས་ཀྱི་ཆོས་སྦྱིན་སྩོལ་བ་སོགས་གཅིག་ཏུ་བསྟན་འགྲོའི་དོན་ལ་བརྩོན་བཞིན་བཞུགས་ལགས་སོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn