བཀའ་བཅུ་རབ་འབྱམས་པ་རྨོག་རུ་ཡེ་ཤེས་རྒྱ་མཚོའམ་མི་ཕམ་དབྱངས་ཅན་རིག་པའི་འདོད་འཇོ།རྨོག་མུན་སེལ་སོགས་སུ་འབོད་པ་ཁོང་ནི།སྤྱི་ལོ་༡༩༦༦ལོར་མཚོ་སྔོན་པོའི་རྨོག་རུ་སྡེ་བར་ཡབ་མཁར་བྱམས་རྒྱལ་དང་།ཡུམ་ཀུན་ཐར་སྐྱིད་གཉིས་ཀྱི་སྲས་སུ་སྐུ་འཁྲུངས།དགུང་ལོ་བདུན་བརྒྱད་ཙམ་ནས་ཡབ་རྗེ་བླ་མ་དམ་པ་༧རྗེ་བཙུན་བློ་བཟང་བསྟན་དར་དཔལ་བཟང་བོའི་མདུན་ནས་སྦྱོར་ཀློག་བསླབས་ཤིང་།ཞོར་དུ་སྡེ་བའི་སློབ་ཆུང་མཐར་ཕྱིན་རྗེས།དགུང་ལོ་བཅུ་བདུན་སྟེང་ཡབ་རྗེ་དེ་ཉིད་ལས་རབ་བྱུང་དགེ་ཚུལ་གྱི་སྡོམ་པ་མནོས་ཤིང་།མཚན་ལ་ཡེ་ཤེས་རྒྱ་མཚོར་གསོལ།ལོ་དེ་ནས་བཟུང་མདོ་སྨད་ཀྱི་ཆོས་གྲྭ་ཆེན་པོ་དྷཱིཿཚ་དཔལ་ལྡན་བཀྲ་ཤིས་ཆོས་སྡིངས་ཀྱི་རིགས་སྨྲ་འདུས་པའི་ཚོགས་གྲྭར་བསྡུས་གྲྭ་ནས་བཟུང་གཞུང་ཆེན་རྣམས་ལ་ཐོས་བསམ་གྱི་དབུ་བརྩམས་ཤིང་།ཁོང་ཨ་ཁུ་རིན་པོ་ཆེ་དེ་ཉིད་དང་།ཡབ་རྗེ་བླ་མ་དམ་པ་༧རྗེ་བཙུན་ཛྙཱ་ན་ས་ར་དཔལ་བཟང་བོ་རྣམ་གཉིས་ལས་གཞུང་ཆེན་བཀའ་པོད་རྣམ་ལྔ་སོགས་ཀྱི་ཞལ་ཁྲིད་ཅི་འདོད་དུ་མནོས།དགུང་ལོ་ཉེར་གཉིས་སྟེང་༧རྗེ་བཙུན་ཛྙ་ན་ས་ར་ལས་དགེ་སློང་གི་དངོས་པོ་ཡང་དག་པར་བཞེས།ཆོས་གྲྭར་གྲོགས་རིག་པའི་དཔའ་བོ་རྣམས་དང་ལྷན་ཅིག་རྩོད་ཟླ་ཡུན་རིང་བགྱིས་ཤིང་།དགུང་ལོ་ཉེར་དགུའི་སྟེང་ཕར་ཕྱིན་དམ་བཅའ་ལེགས་པར་བཞགཞོར་དུ་བླ་བྲང་དུས་འཁོར་བ་སྨད་སོག་བཛྲ་བློ་བཟང་སྦྱིན་པ་མཆོག་ལས་སྒྲ་དབྱངས་ཅན་མ་ཆ་ཚང་དང་།ནག་རྩིས་སོགས་ཀྱང་བསླབས།ད་དུང་༧རྗེ་བཙུན་བློ་བཟང་བསྟན་དར་ཉིད་དང་མཚོ་ལྷོའི་དགེ་རྒན་ཆེན་མོ་བཤད་སྒྲུབ་རྒྱ་མཚོ་སོགས་ལས་སུམ་རྟགས་དག་གསུམ་དང་སྙན་ངག་བདུད་རྩིའི་མཆོད་ཡོན།སྔགས་ཀྱི་བཀླག་ཐབས།སྙན་ངག་དབྱངས་ཅན་དགྱེས་པའི་གླུ་དབྱངས།དཎྜིའི་དགོངས་རྒྱན་སོགས་ཐ་སྙད་རིག་གནས་ལའང་སྦྱང་བརྩོན་ཆེན་པོ་བྱས་པར་མ་ཟད་རྒྱལ་ཁབ་དང་ཞིང་ཆེན་ཕྱི་ནང་གི་དུས་དེབ་དང་ཚགས་པར་སྣ་ཚོགས་སྟེང་རྩོམ་ཡིག་འབོར་ཆེན་བཀོད་མྱོང་།དགུང་ལོ་སོ་གཅིག་སྟེང་རིགས་སྨྲ་བརྒྱ་ཕྲག་དུ་མའི་དཀྱིལ་འཁོར་དུ་བཀའ་བཅུ་རབ་འབྱམས་པའི་དམ་བཅའ་བཞག་པས་མཚན་བཏགས་ལེགས་པར་ཐོབ།

དགུང་ལོ་སོ་གཉིས་སྟེང་ཚོགས་ཆེན་དགེ་བསྐོས་ཀྱི་འགན་བཞེས་ཏེ།དགོན་དེའི་ཆོས་སྲིད་ལུགས་གཉིས་ཀྱི་ཕྱོགས་ལ་དམ་འཛིན་བགྱིས།སླར་ཡང་དགེ་བའི་བཤེས་གཉེན་ཆེན་མོ་རྔ་བ་གྲགས་པ་རྒྱ་མཚོ་མཆོག་ལས་མཛོད་འདུལ་དབུ་གསུམ་གྱི་དཔེ་ཁྲིད་ཆ་ཚང་དང་དབང་རྗེས་གནང་གི་ཟབ་ཆོས་མང་བོ་གསན།ལཱ་མོའི་ཡོངས་འཛིན་རིན་པོ་ཆེའི་ཞལ་སྔ་ནས་ཀྱང་དུས་འཁོར་དབང་ཆེན་སོགས་དང་།བཀའ་དྲིན་མཚུངས་མེད་ཨ་རྒ་རིན་པོ་ཆེ་༧རྗེ་ཀིརྟིའི་མཚན་ཅན་ལས་ལུང་ཁྲིད་ཅི་མང་དུ་མནོས་ཤིང་།དེ་ལྟར་ཕར་ཕྱིན་དམ་བཅའ་བཞག་པ་ནས་ད་ལྟའི་བར།དཔེ་གཟིགས་འཛིན་སྐྱོར་གྱི་ཞོར་དུ་ཕྱོགས་འདུས་ཀྱི་སློབ་བུ་མང་བོར་ཅི་ཕན་གང་བརྩོན་གྱིས་ཆོས་རིག་གཉིས་ཀྱི་དཔེ་ཁྲིད་ཀྱིས་སྐུ་ཚེ་འཁྱོལ་ཞིང་།ཁྱད་པར་དུ་ཁོང་གིས་ཡབ་རྗེ་དམ་པ་༧རྗེ་བཙུན་བློ་བཟང་བསྟན་དར་བ་ཉིད་ལ་སྐུ་ཚེ་མཐའ་འཁྱོལ་བའི་བར་ཞབས་ཕྱི་ཚུལ་བཞིན་བགྱིས་ཤིང་ཅི་གསུང་བཀའ་སྒྲུབ་ཀྱི་མཆོད་པས་མཉེས་པར་བྱས་ཏེ་ཟབ་མོ་གཅོད་ཀྱི་དབང་ཁྲིད་གདམས་ངག་ཁོང་ལ་གང་བཞུགས་མཐའ་དག་གསན་ཏེ་དགུང་ལོ་སོ་ལྔའི་སྟེང་ཆུ་མིག་བརྒྱ་རྩ་བཏང་བ་སོགས་གཅོད་ཀྱི་ཕྱི་ནང་གསང་བའི་ཉམས་ལེན་མཛད་པས།ཕྱོགས་ཀྱི་བུ་སློབ་མང་བོས་ཟབ་མོ་གཅོད་ཀྱི་དབང་ལུང་གནང་བར་གསོལ་འདེབས་ཤུགས་ཆེན་ཞུས་ཀྱང་རེ་ཞིག་གི་བར་དགོས་དབང་གིས་མ་གནང་།

དགུང་ལོ་སོ་བཞིའི་སྟེང་ལྷ་མོ་དྲེལ་དགོན་པར་ཕེབས་ཏེ་སློབ་ཁྲིད་གནང་།དགུང་ལོ་སོ་ལྔའི་སྟེང་གཡོན་རུ་དགོན་པའི་དགེ་རྒན་ལ་གདན་ཞུས་ལྟར་ལོ་མང་བོར་ཆོས་རིག་གི་སློབ་ཁྲིད་མཛད།དགུང་ལོ་སོ་དགུའི་སྟེང་ནས་རྐང་ཚའི་དགོན་ཆེན་གྱིས་གདན་ཞུས་ལྟར་དགོན་དེའི་དགེ་རྒན་དུ་ཕེབས་ཤིང་།གྲྭ་ཚང་ཡོངས་ཀྱིས་གཙུག་རྒྱན་དུ་བཀུར་ཏེ་ད་ལྟའི་བར་སུམ་རྟགས་སྙན་ངག་སོགས་ཐ་སྙད་རིག་གནས་དང་།སྐྱབས་ཁྲིད།ལམ་རིམ་རྒྱས་བསྡུས།སྡོམ་གསུམ་བསླབ་བྱ་སོགས་གཟབ་ཁྲིད་མང་བོ་གནང་།དྷཱིཿཚ་བཀྲ་ཤིས་ཆོས་སྡིངས་ཀྱི་བླ་མ་གཞུང་ལས་པའི་འགན་བཞེས་ཏེ།དབྱར་དགག་གསོ་གསུམ་དང་གདན་ས་དེ་དང་རྐང་ཚའི་དགོན་ཆེན་གྱི་བསྒྲུབ་བྱ་སྐོར་ཞིག་ལ་རབ་བྱུང་དགེ་ཚུལ་ཐོག་དང་བོར་བསྒྲུབས་པ་སོགས་ལོ་གཅིག་ལ་ཆོས་འདུལ་བའི་ལས་སྣ་ཚོགས་པ་དབུ་བརྩམས་པ་སོགས་རྟེན་འབྲེལ་རང་ཆས་སུ་འགྲིག་པ་དང་།

དགུང་ལོ་བཞི་བཅུའི་སྟེང་རྐང་ཚའི་དགོན་ཆེན་གྱི་ལས་སྣེ་རྣམས་ཀྱིས་དགོན་དེར་ཞི་བདེ་ཤེས་རིག་སློབ་གླིང་གསར་འཛུགས་གནང་ཞིང་སློབ་གྲྭ་དེའི་སློབ་དཔོན་ཆེན་མོ་དང་དགེ་རྒན་གྱི་འགན་གཙོ་བོར་བཞེས་ཏེ་སྔར་གྱི་གསང་ཆེན་རྒྱུད་སྡེ་བཞིའི་འཆད་ཉན་གྱི་སྟེང་དུ་གཞུང་ཆེན་བཀའ་པོད་ལྔའི་འཆད་ཉན་གྱི་གཞི་བཙུགས།ལོ་རེ་བཞིན་དཔྱིད་དབྱར་གྱི་ཆོས་ཐོག་སོ་སོར་ཕེབས་ཏེ་འཛིན་གྲྭ་གོང་འོག་དུ་མར་དཔེ་ཁྲིད་དང་འཛིན་སྐྱོར་སྦྱང་སོགས་ལ་གཟིགས་རྟོག་གནང་བར་མ་ཟད།ཡབ་རྗེ་སེ་ར་མཁྱེན་པ་སོགས་ལས་སྣེ་ལྷན་རྒྱས་ཀྱིས་ཇི་ལྟར་གསོལ་བ་བཏབ་པ་བཞིན་རྐང་ཚའི་དགོན་ཆེན་གྱི་ཆོས་གྲྭའི་རྩོད་ཡིག་ཕན་བདེ་འཇུག་ངོགས་ཆེན་མོ་མཛད་དེ་དཔྱིད་ཆོས་སྔ་ཕྱི་གཉིས་དང་དབྱར་ཆོས།སྟོན་ཆོས་སོགས་ཆོས་ཐོག་སོ་སོའི་གཞུང་བཀའ་པོད་ལྔའི་རྩོད་མཚམས་གཏན་ལ་ཕབ་པ་སོགས་འཆད་ཉན་གོང་འཕེལ་དུ་འགྲོ་བའི་ཐབས་ལམ་སྣ་ཚོགས་གནང་བས།ད་ལྟ་བསྡུས་གྲྭ་གསུམ་དང་བློ་རྟགས།གཞུང་གསར་བ།སྐབས་དང་བོ་སོགས་འཛིན་གྲྭ་ཕར་ཕྱིན་རྫོགས་ལ་ཉེ་བར་སླེབས་ཡོད་ལ།མ་འོངས་པར་སྡེ་འདིར་མཛོད་འདུལ་དབུ་གསུམ་ཀྱི་འཆད་ཉན་འཛུགས་རྒྱུའི་ཐུགས་བཀོད་ཀྱང་གནང་བ་སོགས་སྡེ་འདིའི་འཆད་ཉན་གྱི་ཐད་ལ་སྐུ་དྲིན་བླ་ན་མཐོ།གོང་གི་ལོ་དེར་སྡེ་འདིའི་བསྒྲུབ་བྱ་བཅུ་ཕྲག་ལྷག་ལ་བསྙེན་རྫོགས་ཐོག་མར་བསྒྲུབས་ཤིང་།ལོ་དེའི་ཧོར་ཟླ་བཅུ་བའི་ནང་རྒྱ་གར་འཕགས་པའི་ཡུལ་དུ་ཕེབས་ནས།༧གོང་ས་མཆོག་ལ་གཟིམ་ཆུང་མཇལ་ཁ་ཞུས་ཏེ་ཚེ་བུམ་སོགས་ཕུལ།དུས་འཁོར་དབང་ཆེན་སོགས་དབང་བཀའ་ཆོས་ཅི་དགར་གསན།གནས་ཆེན་ཁག་ལ་མཇལ་སྐོར་གནང་སྟེ་ཕྱི་ལོའི་ཧོར་ཟླ་དང་བོའི་ནང་རང་ཡུལ་དུ་བསླེབས།

དགུང་ལོ་ཞེ་གཅིག་སྟེང་དགེ་ལྡན་བཀྲ་ཤིས་ཆོས་སྡིངས་ཀྱི་དགོན་གཙོ་གཞོན་པའི་འགན་བཞེས་ཏེ་ཆོས་སྲིད་ཀྱི་ཕྱག་ལས་རྒྱ་ཆེར་གནང་།ལོ་དེའི་ཧོར་ཟླ་དྲུག་པའི་ནང་རུ་མང་ཨ་རྒ་བླ་མ་ཚང་གིས་ཇི་ལྟར་གསོལ་བ་བཏབ་པ་ལྟར་རྐང་ཚའི་རུ་མང་དགོན་པར་ཕེབས་ནས་དབྱར་དགག་གསོ་གསུམ་གསར་འཛུགས་མཛད་དེ་ཆོས་འདུལ་བའི་ལག་ལེན་ཆ་ཚང་བར་བྱས།དགུང་ལོ་ཞེ་བཞིའི་སྟེང་དགོན་གཙོ་ལས་གནང་བ་ཞུས་རྗེས་བླ་བྲང་བཀྲ་ཤིས་འཁྱིལ་གྱི་བཤེས་གཉེན་ཆེན་མོ་རྗེ་འཇམ་དབྱངས་རྒྱ་མཚོ་ཚང་དང་།བཀའ་དྲིན་མཚུངས་མེད་དགེ་རྒན་རིན་པོ་ཆེ་རྗེ་མགོ་ལོག་གྲགས་པ་རྒྱ་མཚོ་ཚང་།ལྷ་རམས་པ་ཆེན་མོ་རྗེ་འབོ་རའི་ཡོན་ཏན་རྒྱ་མཚོ་ཚང་སོགས་ལས་དབང་བཀའ་ཆོས་མཐའ་ཡས་པ་གསན།

དགུང་ལོ་ཞེ་དགུ་བར་ཆོས་སྡེ་ཆེན་པོ་རྐང་ཚའི་དགོན་ཆེན་དགའ་ལྡན་ཆོས་འཕེལ་གླིང་གི་འདུས་སྡེ་རིན་པོ་ཆེས་གསོལ་བ་ཡང་ཡང་བཏབ་པ་ལ་བརྟེན་ལོ་དེའི་ཧོར་ཟླ་བཞི་བའི་ཚེས་དགུའི་ཉིན་གདན་ས་དེར་ཁྲ་སྐོར་སྤྲུལ་པའི་སྐུ་རིན་པོ་ཆེ་དང་།རྒྱ་ཉག་སྤྲུལ་སྐུ་འཇམ་དཔལ་རྒྱ་མཚོ།བན་སེར་མཆོག་སྤྲུལ་སོགས་ཀྱིས་གཙོས་ཕྱོགས་སོ་སོའི་དགོན་སྡེ་ཁག་ནས་ཕེབས་པའི་བླ་སྤྲུལ་དང་དགེ་བཙུན་བུ་སློབ་བརྒྱ་ཕྲག་གསུམ་ཙམ་ལ་ཟབ་མོ་གཅོད་ཀྱི་ཞི་དབང་དང་།ཚེས་བཅུའི་ཉིན་དམིགས་བསལ་ཅན་སྐོར་ཞིག་ལ་དྲག་དབང་སོགས་ཇི་ལྟར་ཕྱག་བཞེས་བཞིན་གནང་བ་དང་།དེ་དག་ལས་ཆུ་མིག་བརྒྱ་རྩ་སོགས་མ་ཅིག་ཁྲོས་མ་ནག་མོའི་བསྙེན་པ་གཏོང་མཁན་མང་དུ་བྱུང་།དགུང་ལོ་ང་གཅིག་སྟེང་བྲག་དཀར་རྫོང་སློབ་འབྲིང་གཉིས་པས་ཆེད་ཞུས་ལྟར་ཕེབས་ཏེ་དགེ་རྒན་རྣམས་ལ་པྲ་ཏིའི་སུམ་ཅུ་བ་དང་།སྒྲ་མཚམས་སྦྱོར་ལྔ་བ།བློ་གསལ་རིགས་སྒོ་བཅས་ཀྱི་སློབ་ཁྲིད་གནང་།མདོར་ན་ཁོང་གིས་སྐུ་ཚེ་གང་བོར་གོང་གསལ་བཤེས་གཉེན་དེ་དག་དང་།༧ཀུན་གཟིགས་པཎ་ཆེན་སྣང་བ་མཐའ་ཡས་བཅུ་བ་མཆོག་དང་།ཨ་ལགས་ལྕང་སྐྱ་རིན་པོ་ཆེ།རས་ཆུང་བ་ཨ་ཁུ་ཤེས་རབ་རྒྱ་མཚོ་སོགས་བཤེས་གཉེན་བཅུ་གསུམ་ལྷག་བསམ་སྦྱོར་གཉིས་ཀྱིས་ཚུལ་བཞིན་བསྟེན་ཏེ་གཞུང་ཆེན་བཀའ་པོད་ལྔ་དང་གསང་ཆེན་རྒྱུད་སྡེ་བཞིས་མཚོན་དབང་བཀའ་ཆོས་མཐའ་ཡས་པ་གསན།ཞར་ལ་རང་དགོན་བཀྲ་ཤིས་ཆོས་སྡིངས་དང་རྐང་ཚའི་དགོན་ཆེན།རྐང་ཚའི་རྒྱ་ཉག་དགོན།དཔོན་ཚང་དགོན།གཡོན་རུ་དགོན།ལྷ་མོ་དྲེལ་དགོན།དཀར་ལ་དགོན།རུ་མང་དགོན།སྐྱིད་བདེ་དགོན།འཁྱག་ཆུ་དགོན།བན་སེར་སྤྱི་བ་སོགས་ཀྱི་བུ་སློབ་མང་བོར་རབ་བྱུང་བསྙེན་རྫོགས་དང་ལུང་ཁྲིད་མན་ངག་སོགས་མཐའ་ཡས་པ་གནང་བ་དང་།ད་དུང་ཕྱོགས་སོ་སོའི་སློབ་གྲྭ་ཆེ་འབྲིང་གི་དགེ་སློབ་ཁག་ལ་སྒྲ་སྙན་ངག་སོགས་ཐ་སྙད་རིག་གནས་ཀྱི་འཆད་ཁྲིད་དང་།ཡུལ་ཕྱོགས་རིས་མེད་ཀྱི་དད་ལྡན་བརྒྱ་ཕྲག་མང་བོར་བསྙེན་གནས་དང་དགེ་བསྙེན་གྱི་སྡོམ་པ་གནང་བ།ལས་འབྲས་དང་ལེགས་ཉེས་ཀྱི་བླང་དོར་སྟོན་པ་སོགས་ནང་ཆོས་ངོ་སྤྲོད་ཀྱིས་སེར་སྐྱ་བགྲང་གིས་མི་ལང་བའི་རྒྱུད་ལ་ཐར་བའི་ས་བོན་བསྐྲུན་པ་སོགས་ཁོང་གི་སྐུ་ཚེ་གང་བོར་ཆོས་རིག་གི་ལས་ཀྱིས་དུས་འདའ་བར་བཞུགས་པའི་སྐབས་ལགས་སོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn