ཡོངས་ཀྱི་དགེ་བའི་བཤེས་གཉེན་ཨ་ཁུ་བསམ་གཏན་རྒྱ་མཚོ་མཆོག་ནི་༡༩༦༩ལོར་མདོ་སྨད་མང་རའི་ཀླུ་ཚང་རུ་མང་སྡེ་བར་ཡབ་ལེགས་བཤད་དང་ཡུམ་ཞིང་མོ་རྒྱལ་གཉིས་ཀྱི་སྲས་སུ་སྐུ་འཁྲུངས།དགུང་ལོ་དགུ་ནས་བཅུ་བདུན་བར་སློབ་གྲྭར་འགྲིམས།དགུང་ལོ་བཅོ་བརྒྱད་པ་ལ་དཔའ་ལུང་བ་རྗེ་ཡེ་ཤེས་རྒྱ་མཚོ་མཆོག་གི་སྤྱན་སྔ་ནས་རབ་ཏུ་བྱུང་།དགེ་བའི་བཤེས་གཉེན་ཆེན་མོ་གཡོན་གཞིས་དར་རྒྱས་ཚང་གནས་ཀྱི་སློབ་དཔོན་དུ་བཀུར་ནས་རིམ་གྱིས་འདོན་ཆོས་སྤྱོད་ཀྱི་ཀྱི་རིམ་པ་ཐུགས་འཛིན་མཛད་ནས་མདོ་སྨད་ཀླུ་ཚང་དགོན་པའི་ཆོས་སྒོར་ཞུགས།སེམས་དཔའ་ཆེན་པོ་ཆོས་རྗེ་རིན་པོ་ཆེ་འཇམ་དབྱངས་བློ་བཟང་བསྟན་དར་མཆོག་དང་སྨད་སོག་རྗེ་བཟོད་པ་རྒྱ་མཚོ་ཚང་རྣམ་གཉིས་གཙོ་བོར་བསྟེན་ནས་གཞུང་བཀའ་པོད་ལྔ་ལ་སློབ་གཉེར་མཐར་ཕྱིན་པར་མཛད།སྔ་ཕྱིར་དཔའ་ལུང་བ་རྗེ་ཡེ་ཤེས་རྒྱ་མཚོ་དང་ཁྲི་གུང་ཐང་བསྟན་པའི་དབང་ཕྱུག་མཆོགལཱ་མོ་ཡོངས་འཛིན་མཆོགབླ་བྲང་རྗེ་དགེ་འདུན་རྒྱ་མཚོ་ཚང་།བླ་བྲང་རྗེ་འཇིགས་མེད་དཔལ་ལྡན་རྒྱ་མཚོ་མཆོགཨ་ཁུ་བཛྲ་ཚང་།སྤྲེལ་རྫོང་ཨ་ཁུ་འོད་ཟེར་ཚང་།བླ་བྲང་རྗེ་ཡོན་ཏན་རྒྱ་མཚོ་ཚང་སོགས་དགེ་བའི་བཤེས་གཉེན་ཆེན་པོ་བཅུ་ཕྲག་ལྷག་ཚུལ་བཞིན་བསྟེན་ཏེ་གཞུང་བཀའ་པོད་ལྔ་དང་སྔགས་རྒྱུད་སྡེ་བཞིའི་ཁྲིད་རྒྱུན་དང་དབང་ལུང་མན་ངག་སོགས་མང་དུ་གསན།སྒྲ་སྙན་ངག་སོགས་ཐ་སྙད་རིག་གནས་དང་བཅས་པ་ལ་ཞིབ་ཏུ་སྦྱངས་ནས་ཡོངས་རྫོགས་ཐུགས་སུ་ཆུད།

དགུང་ལོ་ཉེར་བདུན་པ་ལ་ཕར་ཕྱིན་རབ་འབྱམས་པའི་དམ་བཅའ་བཞགདགུང་ལོ་སོ་གསུམ་པ་ལ་ཚོགས་ཆེན་ཞལ་ངོའི་འགན་བཞེས།དགུང་ལོ་སོ་ལྔ་བ་ལ་ཨ་ལགས་སྐྱི་མཆོག་སྤྲུལ་ཚང་གི་ཡོངས་འཛིན་ལ་བཞུགས།

༢༠༠༢་ལོ་ནས་བཟུང་གདན་ཞུས་ལྟར་བན་ཤུལ་དགོན་རྙིང་སོགས་ཀྱི་དགེ་རྒན་ལ་ཕེབས།ཕར་ཕྱིན་དམ་བཅའ་བཞག་པ་ནས་བཟུང་གསར་བ་རྣམས་ལ་འཕྲོས་པ་བྱེད་པའི་དགེ་རྒན་མཛད།༢༠༠༣་ལོར་དགོན་འདིའི་འཆད་ཉན་གྱི་བདག་པོ་སྐྱབས་མགོན་ཨ་ལགས༧ཆོས་རྗེ་རིན་པོ་ཆེའི་ཞལ་སྔ་ནས་ཀྱིས་ཁོང་དང་བཅས་དགེ་བཤེས་དུ་མར་གཞུང་ཆེན་མོའི་ཁྲིད་རྒྱུན་སོགས་སྤེལ་བའི་དགོན་པ་འདིའི་འཆད་ཉན་གྱི་དགེ་རྒན་ཆེན་མོར་བསྐོ་བཞག་མཛད།

ཁོང་ནི་གཅིག་ཏུ་མཁྱེན་དཔྱོད་ཀྱི་རྩལ་ཡངས་པ།ཆེ་ཆེ་དྲེགས་དྲེགས་མི་བྱེད་པར་གཅིག་ཏུ་བསླབ་པ་གསུམ་གྱི་ཉམས་ལེན་ལ་གཞོལ་ཞིང་འཕགས་པའི་རིགས་བཞི་ལ་གནས་ཏེ་བྱ་ཉུང་དོན་ཉུང་གི་སྒོ་ནས་ཁོང་འཇམ་པའི་དབྱངས་ཆོས་རྗེ་རིན་པོ་ཆེའི་ཐུགས་དགོངས་བཞིན་གཅིག་ཏུ་དགོན་འདིའི་ཆོས་འཆད་ཉན་དང་བསླབ་པ་སློབ་གཉེར་ཐུགས་ཀྱི་ཕུགས་སུ་བཅངས་ནས་ལོ་ཧྲིལ་བོར་གནང་སྐབས་དང་སྒྲུབ་མཆོད་སོགས་ཀྱི་དུས་མ་གཏོགས་ཕར་ཆེར་རྒྱུན་དུ་ཉིན་གཅིག་ལ་དཔེ་ཁྲིད་ཐེངས་ལྔ་དྲུག་རེ་བྱེད་ཀྱིན་མཆིས་སོ། །

དེ་ལྟར་ད་ལྟའི་བར་དུ་བཀའ་པོད་ལྔ་དང་སྔགས་རྒྱུད་སྡེ་བཞི་ཐ་སྙད་རིག་གནས་དང་བཅས་པའི་ཁྲིད་དང་།གཞན་སྔོན་འགྲོ་ཁྲིད་ཆེན་བཞི་ལམ་རིམ་བློ་སྦྱོང་གི་སྐོར་སོགས་འཛིན་གྲྭ་སོ་སོ་དང་།གཞན་སྐྱ་སེར་ཕོ་མོ་དང་བཅས་པ་ལ་གང་ལ་གང་འཚམ་གྱིས་གནང་བར་མཛད་དོ།།

མདོར་ན་རང་གི་ལུས་སྲོག་ལ་ཅི་ཡང་མི་སྙམ་པར་གཅིག་ཏུ་བསྟན་འགྲོའི་དོན་དུ་མི་ཚེ་འདའ་བཞིན་པར་བཞུགས་པ་འདི་ལགས་སོ།།།

དེ་ཡང་ཇི་སྐད་དུ་འཇམ་དབྱངས་བླ་མ་གུང་ཐང་བསྟན་པའི་སྒྲོན་མེའི་ཞལ་ནས།ལུང་རྟོགས་ཡོན་ཏན་རེག་བྱ་མ་མཆིས་ཀྱང་།།ཟང་ཟིང་འབྱོར་བའི་སྤྲིན་གྱི་འདུ་འགོད་ཅན།།ལྟར་སྣང་མཛེས་པའི་ཟོབ་ཀྱི་བེེ་ཌཱུར་མདངས།།དགུང་སྔོན་མཐོན་པོར་གྲགས་པའི་སྟོང་བ་ལ།།འཕྱ་བ་གསལ་བྱེད་ཀུནྡ་རབ་རྒོད་ཅིང་།།ལུང་རིགས་རླབས་ཀྱི་ཕྲེང་བའི་རོལ་གར་མཁན།།དམའ་བའི་གཤོང་བུར་འཁྱིལ་བ་དྭངས་པའི་མཚོ།།བློ་གསལ་ངང་མོ་འབུམ་གྱི་རྩེ་དགའི་གནས།།ཞེས་གསུངས་པ་ལྟར་ལས་གཞན་དུ་མ་མཆིས་སོ།།

ཁོང་གི་གསུང་རྩོམ་ལ།བྱང་ཆུབ་ལམ་རིམ་ཆེན་མོའི་ཟིན་ཐུན་དྲི་ཞིམ་སྤོས་ཀྱི་རྫིང་བུ་དང་།རྗེ་འཇམ་པའི་དབྱངས་སྨོན་ལམ་རྒྱ་མཚོ་མཆོག་གི་རྣམ་ཐར་མདོར་བསྡུས་སྐལ་ལྡན་འདྲེན་པའི་ལྕགས་ཀྱུ།རྗེ་བྱམས་པ་འཕྲིན་ལས་ཀྱི་རྣམ་ཐར་དགེ་ལེགས་འདོད་འཇོ།རྙེ་དགོན་བཤད་སྒྲུབ་དར་རྒྱས་དགེ་འཕེལ་གླིང་གི་བྱུང་བ་བརྗོད་པ་གཎྜིའི་སྒྲ་དབྱངས་སོགས་བཞུགས་སོ། ། 

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn