ཀླུ་ཚང་དགོན་པའི་དགེ་བའི་བཤེས་གཉེན་ཤེས་རབ་དབང་བོ་མཆོག་ནི།སྤྱི་ལོ་1965ལོར་མང་རའི་ཀླུ་ཚང་ཆུ་མགོ་གཞུང་སྡེ་བར་ཡབ་རི་བྷ་དང་། ཡུམ་པདྨ་མཚོ་གཉིས་ཀྱི་སྲས་སུ་སྐུ་འཁྲུངས།

 ཆུང་དུས་སུ་སློབ་གྲྭར་འགྲིམས་ཤིང་། དགུང་ལོ་ཉི་ཤུའི་སྟེང་ཀླུ་ཚང་དགོན་དུ་ཨ་ལགས་ཆོས་རྗེ་རིན་པོ་ཆེའི་མདུན་ནས་རབ་ཏུ་བྱུང་།

 ྋ  ཆོས་རྗེ་རིན་པོ་ཆེ་འཇམ་དབྱངས་བློ་བཟང་བསྟན་དར་མཆོག་དང་། རྗེ་སྨད་སོག་སྨོན་ལམ་རྒྱ་མཚོ། དགེ་བའི་བཤེས་གཉེན་ཆེན་མོ་གོང་བའི་ཨ་ཁུ་དགེ་འདུན་ཆེ་བ་ཚང་དང་། དགེ་བའི་བཤེས་གཉེན་ཆོས་ཚའི་ཡོན་ཏན་ཚང་། རྗེ་ཡེ་ཤེས་རྒྱ་མཚོ།  ལ་མོ་ཡོངས་འཛིན་རིན་པོ་ཆེ། ཁྲི་ཆེན་གུང་ཐང་བསྟན་པའི་དབང་ཕྱུག ཨ་ལགས་ལྕང་སྐྱ་ཤེས་རབ་དར་རྒྱས། ཨ་ལགས་ཨོ་རྒྱ་ཆེ་ཚང་།སྤྲེལ་རྫོང་ཨ་ཁུ་འོད་ཟེར། ཨ་ལགས་དགེ་ཀྱཱ་ཚང་།  རྗེ་དགེ་འདུན་རྒྱ་མཚོ། རྗེ་འཇམ་དབྱངས་རྒྱ་མཚོ། ཡོངས་འཛིན་རྗེ་འཇིགས་མེད་དཔལ་ལྡན་རྒྱ་མཚོ་ཚང་། དགེ་བའི་བཤེས་གཉེན་ཆེན་མོ་རྗེ་འབོ་རའི་ཡོན་ཏན་ཚང་། འདུལ་འཛིན་ཆེན་པོ་རྗེ་གྲགས་པ་ཚང་སོགས་ལས་ཟབ་པ་དང་རྒྱ་ཆེ་བ་གདམས་པའི་ཉིང་བཅུད་་མདོ་སྔགས་ཀྱི་གཞུང་ཆེན་རྣམས་ལོ་ཟླ་མང་པོར་གསན་བསམ་མཛད།

དབུ་བསྡུས་གྲྭ་ནས་གྲུབ་དོན་ས་གསུམ་དང་ཕ་རོལ་ཏུ་ཕྱིན་པའི་གཞུང་སོགས་ལ་སློབ་གཉེར་བྱས་ཏེ། རང་ལོ་སོ་གསུམ་སྟེང་ཀླུ་ཚང་དགོན་དུ་ཕར་ཕྱིན་རབ་འབྱམས་པའི་དམ་བཅའ་བཞག  

1995ལོར་ཨ་ལགས་ཆོས་རྗེ་རིན་པོ་ཆེས་བཀའ་གནང་བ་བཞིན་དུ་ཀླུ་ཚང་དགོན་གཞུང་གི་དགེ་རྒན་དུ་བསྐོས་ཏེ། བསྡུས་གྲྭ་ཁག་གསུམ་དང་བློ་རྟགས། གྲུབ་དོན་ས་གསུམ། བསླབ་བྱ། ཕར་ཕྱིན་དང་དབུ་མ། མཛོད་དང་འདུལ་བ། རྣམ་འགྲེལ། ལམ་སྔགས་སོགས་འཛིན་གྲྭ་སོ་སོར་གང་ལ་གང་མཁོ་ལྟར་དཔེ་ཁྲིད་བྱས།  

དེ་དག་གི་ཞོར་ཏུ་རྩིབ་བཞག་བླ་མ་དང་། དགེ་བསྐོས་ཐེངས་གཉིས། ཀྲུའུ་རེན་གཞོན་པ་སོགས་ཀྱི་འགན་བཞེས།  2019ལོར་མཚོ སྔོན་ཞིང་ཆེན་བོད་བརྒྱུད་ནང་བསྟན་དགོན་པའི་དཔེ་ཁྲིད་དགེ་རྒན་གྱི་ལག་རྟགས་གནང་། གཞན་ཁུལ་དང་རྫོང་རིམ་པ་ནས་མཚན་རྟགས་བཞེས་པ་སོགས་མང་མོད་འདིར་མ་བྲིས། ད་ལྟའང་རྭ་ཟ་དགོན་པའི་དགེ་རྒན་དང་། རང་དགོན་དུ་འཆད་ཉན་མཛད་པ་དང་།ཕྱོགས་སོ་སོའི་སློབ་གཉེར་བ་རྣམས་ལ་དཔེ་ཁྲིད་བྱེད་བཞིན་བཞུགས་སོ།།

རྩོམ་སྒྲིག་པ།  ཤེས་རབ་རལ་གྲི།

གསལ་འདེབས།

རྩོམ་འདིའི་པར་དབང་ངེད་དགེ་ལུགས་པའི་དྲ་བར་གཏོགས་པས་གང་འདོད་དུ་གཞན་དུ་མི་འགོད་པ་དང་། གལ་ཏེ་འགོད་ན་རྩོམ་ཁུངས་དང་སྦྲེལ་ཐག་གསལ་པོར་དགོད་པར་ཞུ།ལྷག་པར་འཕྲིན་སྟེགས་དག་གིས་འགོད་དུས原创བྱས་ཏེ་འགོད་མི་ཆོག

དྲ་བའི་སྦྲེལ་ཐགhttp://www.tb1025.cn